Wakat bʋg la Wẽnnaam Rĩungã na n wa?

TƲM-​TƲMDBÃ ra rata ne b sũy fãa n bãng wakat ning a Zezi sẽn na n lugl a Rĩungã. Rẽ n so tɩ b sok a Zezi woto: “Zusoaba, yãmb na n deega Israɛll soolmã n kõ-b masã bɩ?” (Tʋʋma 1:⁠6) Hal ne rũndã, nebã ket n sokda b mens woto: Wakat bʋg la Wẽnnaam Rĩungã na n wa?

A Zezi koɛɛgã mooneg sẽn da tik  Wẽnnaam Rĩungã zug n yɩɩdã yĩnga, d tẽedame t’a leoka sok-​kãnga. La yaa vẽeneg t’a sɩd maana rẽ. A goma wakat a ye yell naoor wʋsgo. A boola wakat-​kãng tɩ yẽ “waoongã” wakate. (Matɩe 24:⁠37) Waoong kãng ne Mesi Rĩungã luglg tũuda taaba. A waoongã võor yaa bõe? D ges bũmb a naas Biiblã sẽn wilgd vẽeneg Kiristã waoongã wɛɛngẽ, tɩ tõe n sõng-⁠d tɩ d wʋm a võore.

1. Kiristã kũum poore, ra na n kaoosa wʋsg t’a waoongã yaool n sɩnge. A Zezi togsa kibare, n mak a meng kibarã pʋgẽ ne rao sẽn “da yi n kẽng tẽng sẽn zãr n na n tɩ reeg naam.” (Luk 19:⁠12) Wãn to la kiba-​kãnga sẽn yaa bãngr-​gomdã pids-​yã? A Zezi kiime tɩ Wẽnnaam vʋʋg-⁠a, rẽ poore a kẽnga “tẽng sẽn zãrẽ,” sẽn dat n yet tɩ saasẽ. A togsa kibar a to sẽn wõnd kiba-​kãngã n wilg tɩ ra na n “kaoosa wʋsg” t’a yaool n sɩng a naamã rɩɩbo.​—⁠Matɩe 25:⁠19.

A Zezi sẽn wa n leb saasẽ yʋʋm a wãn poore, tʋm-​tʋmd a Poll gʋlsa woto: “Kirist sẽn maan maoong a yembr bal yel-​wẽnã yĩnga, bãmb yaool n zaoo Wẽnnaam dɩtg wakat sẽn ka sɛta, n gũud bãmb bɛɛbã sẽn na n lebg bãmb nao wã roagendga.” (Hebre dãmba 10:⁠12, 13) Dẽnd a Zezi sẽn ta saasẽ wã, a gũu yʋʋm wʋsg nanda. A gũume n tãag sasa ning a Zeova sẽn kɩt t’a lebg Mesi Rĩung ning waoong a Zeova sẽn da pʋlem hal daar zãrã Rĩma. Yɩɩ sasa kãng me la Kirista waoongã sɩng-​yã. Rẽ yĩnga ãdem-​biisã ra na n yãa yel-​kãngã sẽn yaa kãsengã ne b nin bɩ?

2. Nebã pa tõe n yã Kiristã waoongã ne nif n bãng ye. D tẽeg t’a Zezi togsa bãnd sẽn na n wilg a waoongã. (Matɩe 24:⁠3) Yaa vẽeneg tɩ ninsaal sã n da tõe n yã a waoongã ne nifu, a ra pa na n le togs bãnd sẽn na n wilg rẽ ye. D rɩk makre: Yãmb sã n togd sor n na n tɩ ges mogre, y na n yãa palak rãmb sorã zug sẽn teesd mogrã zĩigẽ. La yãmb sã n wa lik n ne koomã, rẽ yĩnga y le baoodame tɩ palak wilg-⁠y tɩ mogrã la woto sɩda? Ayo, bala yãmb zoe n nee mogrã.

A Zezi sẽn togs bãndã sẽn wilgd a waoongã, pa sẽn na yɩl n wilg tɩ ninsaalbã na n yãa bũmb ne b nin ye. Yaa sẽn na yɩl n sõng nebã tɩ b bãng bũmb sẽn da na n maan saasẽ. A yeela woto: “Wẽnnaam soolem waoong ka bãngd ne nin gesg ye.” (Luk 17:⁠20) Wãn to la bãndã ra na n kɩt tɩ nebã bãng tɩ Kiristã waoongã zoe n sɩngame?

 3. Zu-​loees wʋsg na n zĩnda tẽngã zug tɩ wilgdẽ t’a Zezi waoongã zoe n sɩngame. A Zezi yeelame tɩ zaba, kom, tẽn-​digimdgu, bãase, la wẽng buud toor-​toor na n yɩɩ bãnd sẽn na n wilg t’a lebga Rĩm saasẽ t’a waoongã me sɩnge. (Matɩe 24:​7-⁠12; Luk 21:⁠10, 11) Bõe n na n wa ne yel-​kãensã fãa? Biiblã wilgdame t’a Sʋɩtãan sẽn yaa ‘dũni-​kãngã naabã’ sũur puuga wʋsgo, bala a miime tɩ Kiristã sẽn lebg Rĩm saasẽ t’a waoongã sɩnga tɛka, wakat ning sẽn ket tɩ b sãam-⁠a wã yaa bilfu. (Zã 12:⁠31; Wilgri 12:​9, 12) Rũndã-rũndã, d nee vẽeneg t’a Sʋɩtãan sũurã sɩd puuga wʋsgo, la tɩ Kiristã waoongã zoe n sɩngame. Sẽn tɩ yɩɩda, yʋʋmd 1914 tɛka, yel-​kãsems nins sẽn maand dũniyã gill zugã sɩd wilgda rẽ vẽenega. Baa kʋdemd yɛl mitbã sak n deegame tɩ yʋʋmd 1914 tɛka, yɛlã toeema zĩig pʋgẽ.

Woto fãa tõe n wõnda kiba-​wẽnse. La yaool n pa woto ye. Rat n wilgame bal tɩ Mesi wã ne a na-​rɩt-⁠n-​taasã sɩnga naam dɩɩb saasẽ. La ka la bilfu, b Rĩungã na n sooga tẽngã gilli. Nebã na n maana wãn n bãng Wẽnnaam Rĩungã n tõog n sak-⁠a n lebg a poorẽ dãmba?

4. A Zezi waoongã sasa, b na n moonda koɛɛg dũniyã gill zugu. A Zezi yeelame t’a waoongã sasa na n yɩɩ wa “a Nowe wakatã.” * (Matɩe 24:⁠37-​​39) Pa koom koglgã bal la a Nowe ka ye. A ra yaa “tɩrlem koe-​moaand” me. (2 Pɩɛɛr 2:⁠5) A Nowe keooga nebã tɩ pa na n kaoos la a Zeova sãam nin-​wẽnsã ye. A Zezi ra pĩnd n yeelame tɩ yẽ waoongã sasa, a karen-​biisã sẽn be tẽngã zugã na n maanda bũmb sẽn wõnd a Nowe sẽn maanã. A yeela woto: “Wẽnnaam [Rĩungã] koe-⁠no-​kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.”​—⁠Matɩe 24:⁠14.

Wa d sẽn yã sõsg ning sẽn loogã pʋgẽ wã, Wẽnnaam Rĩungã na n sãama goosneema nins fãa sẽn be dũni kãnga zugã. Koe-​noogã mooneg kɩtdame tɩ nebã bãngd tɩ ka la bilfu, saasẽ goosneema wã na n tʋmame. A leb n kɩtdame tɩ nebã fãa tõe n bãng b sẽn tõe n maan to-⁠to n wa paam n põs sãoong ning sẽn watã n lebg Rĩungã poorẽ dãmba. Yãmb na n saka koɛɛgã bɩ y pa na n sake?

Wẽnnaam Rĩungã na n nafa yãmb bɩ?

Koɛɛg ning a Zezi sẽn moonã kõta saagr sẽn ka to. Kɩɩsgã sẽn zĩnd Edɛnnã poore, a Zeova yãka yam n na n lugl goosneema sẽn na n kɩt tɩ neb nins sẽn sakd-⁠a wã paam n vɩɩmd wakat sẽn ka sat tẽngã zug arzãna pʋgẽ, wa a sẽn da rat to-⁠to sɩngrẽ wã. La rũndã-rũndã, goosneemã kãng pa le yaa bũmb sẽn wat ye. Wẽnnaam zoe n lugl-⁠a-⁠la saasẽ. Ad sɩd yaa koe-​noog menga!

Rĩm ning Wẽnnaam sẽn yãkã rɩta naam a bɛɛbã sʋk masã menga. (Yɩɩl Sõamyã 110:⁠2) Dũni kãnga sẽn pid ne neb sẽn pa maand Wẽnnaam daabã pʋgẽ, Mesi wã gẽesda neb nins fãa sẽn sɩd rat n bãng Wẽnnaam la b tũ-a “ne sɩɩg la ne sɩdã.” Yaa woto la a Ba wã rat t’a maane. (Zã 4:⁠24) Neb buud toor-​toore, kãsemb la kamba, naong rãmb la arzɛgs rãmb fãa tõe n wa paam n vɩɩmda wakat sẽn kõn sa, Wẽnnaam Rĩungã sã n wa soog tẽngã. (Tʋʋma 10:⁠34, 35) D sagend-⁠y lame tɩ y modg masã tɛk n bao n bãng Wẽnnaam Rĩungã n wa paam n vɩɩmd wakat sẽn kõn sa, wakat ning a sẽn na n wa soog tẽngã.​—⁠1 Zã 2:​17.

[Tẽngr note]