A Zeova wʋmda tõnd sẽn kelemd n kot a sõngrã
A Zeova wʋmda tõnd sẽn kelemd n kot a sõngrã
“Zusoabã geta nin-tɩrse, la bãmb tʋb wʋmda bãmb kelems b sẽn dat sõngr wakate.”—YƖƖL 34:16.
1, 2. a) Bõe n paamd nebã rũndã-rũndã? b) Bõe yĩng tɩ woto pa ling tõndo?
YÃMB tara zu-loees sẽn namsd-y bɩ? Sã n yaa woto bɩ y bãng tɩ y pa y yembr ye. Neb milyõ rãmb n modgd sẽn na yɩl n tõog dũni-wẽn-kãngã pʋgẽ zu-loeesã. Ne neb kẽere, wõnda b yɛlã pʋd n dat n yɩɩga b pãnga. B sũur tagsg yaa wa a Davɩɩd rẽndã bal kɛpɩ. A Davɩɩd da yeela woto: “Mam pãng sɛɛme la mam gĩin kaoo hal wʋsgo. Mam kelemda mam sũ-pa-noangã yĩnga. Mam sũur miimdame, mam pãng basa maam. La mam nin vẽenem ka leb n be ne maam me ye.”—Yɩɩl 38:9, 11.
2 Tõnd sẽn yaa kiris-nebã yĩnga, toog ning sẽn paamd nebã fãa rũndã-rũndã wã pa ling tõnd ye. D miime tɩ rẽ naaga bãnd ning sẽn da na n wilg t’a Zezi waame wã sʋka. (Mark 13:8; Mat. 24:3) Gɛrk gom-biig ning b sẽn lebg tɩ “toogã” bilgda rogem toog sẽn yaa to-to wã. Woto sɩd wilgda toog ning sẽn namsd nebã rũndã-rũndã wã sẽn ta zĩig ninga.—2 Tɩm. 3:1.
A Zeova wʋmda d zu-loeesã võore
3. Bõe la Wẽnnaam nin-buiidã mi vẽenega?
3 A Zeova nin-buiidã mii vẽeneg tɩ b pa tõe n gil zu-loeesã, la tɩ na n pʋd n tara kengr n paasdẽ. Yaa sɩd tɩ ãdem-biisã fãa paamda zu-loeese, la tõnd sẽn yaa Wẽnnaam nin-buiidã, ‘bɛ wã sẽn yaa Sʋɩtãanã’ maanda a sẽn tõe fãa n dat n sãam d tẽebã. (1 Pɩɛ. 5:8) Dẽnd tõnd me sũur tagsg tõe n wa yɩɩ wa a Davɩɩd rẽndã. A yeela woto: “Tʋʋb sãama mam sũuri, la mam pãng sɛɛme. Mam gũuda nimbãan-zoeere, la a ka be ye, la mam baoo belsdb n ka yã ye.”—Yɩɩl 69:21.
4. D sã n wa tar zu-loeese, bõe n kõt-d belsgo?
4 A Davɩɩd sẽn yeel woto wã, rat n yeelame t’a zu-loeesã ra pa tar tɩɩm bɩ? Ayo. Ad a meng sẽn le yeele: “Zusoabã kelgda naong rãmbã la bãmb ka paoogd b yembsã ye.” (Yɩɩl 69:34) B sẽn yeel ka tɩ Zusoabã yembsã pa rat n yeel tɩ yaa yẽ n yõg-b n maan a yembs ye. Rat n yeelame bal tɩ wakat ninga, zu-loeesã namsd-d lame tɩ d yaa wa yembse. Tõe n wõnda neb a taabã pa wʋmd d zu-loeesã võor ye. B sɩd tõeeme n pa wʋmd a võor ye. La wala a Davɩɩde, d sã n miẽ t’a Zeova wʋmda d zu-loeesã võore, tõe n kõ-d-la belsgo.—Yɩɩl 34:16.
5. Rĩm a Salomo ra kɩsa sɩd ne bõe?
5 Zerizalɛm wẽnd-doogã pakr sasa, a Davɩɩd biig a Salomo sɩd wilgame t’a Zeova wʋmda tõnd zu-loeesã võore. (Karm-y 2 Kibaya 6:29-31.) A kosa a Zeova tɩ pʋ-peelem soab fãa “sũur sã n sãam” t’a pʋʋs-a n kos a sõngr bɩ a reege. Bõe la Wẽnnaam da na n maan n kõ nin-kãensã, b sũy sã n sãame? A Salomo ra kɩsa sɩd tɩ Wẽnnaam na n kelga b pʋʋsgã la a sõng-ba. Bõe yĩnga? Bala yẽ n sɩd “mi ninsaal fãa sũur pʋgẽ yelle.”
6. Bõe la d tõe n maan n tõog zu-loeesã, la bõe yĩnga?
6 Tõnd me sã n wa tar zu-loeese, d tõe n pʋʋsa a Zeova n kos a sõngre. D sẽn mi t’a Zeova wʋmda d zu-loeesã võor la d miẽ tɩ d yell pak-a lame wã, segd n kõ-d-la belsgo. Tʋm-tʋmd a Pɩɛɛr wilgame t’a Zeova sɩd wʋmda d zu-loeesã võore, la tɩ d yell pak-a lame. A yeela woto: “Bɩ y bas yãmb yɩɩrã fãa ne bãmba, tɩ bõe, bãmb meng geta yãmb yelle.” (1 Pɩɛ. 5:7) A Zeova sũur pa noom ne yɛl nins sẽn paamd tõndã ye. A Zezi wilgame t’a Zeova sɩd geta tõnd yell ne nonglem. A yeela woto: “B ka koosd yirs a yiib su bɩ? La baasgo, ba a ye ka lʋɩt tẽng tɩ yãmb Ba ka yã ye. La baa yãmb zoobdã fãa sõdame. Dẽ yĩnga, bɩ y da zoe rabeem ye. Yãmb bee yõod n yɩɩd yirs wʋsgo.”—Mat. 10:29-31.
D teeg a Zeova
7. D tõe n basa yard t’a Zeova na n maana bõe n sõng-do?
7 D tõe n basa yard t’a Zeova tʋll n sõnga tõndo, la tɩ d sã n wa tar zu-loeese, a sɩd tõe n sõng-d lame. “Wẽnnaam yaa zĩ-soalgdg la pãng tõnd yĩnga. Ned tõe n yãa bãmb sõngr wʋsg a toog pʋgẽ.” (Yɩɩl 34:16-19; 46:2) Wãn to la d paamd sõng-kãnga? Pipi Korẽnt dãmb 10:13 yeta woto: “Wẽnnaam sẽn yaa sɩd soabã, bãmb ka na n sak tɩ yãmb paam makr sẽn yɩɩd yãmb pãng ye. La ne makre, bãmb na n maana sor tɩ yãmb tõe n yi, la tɩ yãmb tõe n paam pãng makrã pʋgẽ n da lʋɩ ye.” A Zeova tõe n demsa yɛlã n yiis tõnd zu-loeesã pʋgẽ, pa rẽ bɩ a kõ-d pãng tɩ d tõog toogo. Sẽn yaa a soab fãa, a Zeova na n sõnga tõndo.
8. Wãn to la d tõe n paam tɩ Wẽnnaam sõng-do?
8 Bõe la d tõe n maan n paam a Zeova sõngre? Biiblã sagenda tõnd tɩ d ‘bas d yɩɩrã fãa ne yẽ.’ Woto rat n yeelame tɩ d bas d yɛlã fãa ne a Zeova. D modgdame n pa ye maand yɩɩr ye. D teegda a Zeova n miẽ t’a na n gesa d yelle. (Mat. 6:25-32) Woto baoodame tɩ d sik d menga, la d ra teeg d meng pãng wall d yam ye. D sã n sik d meng “Wẽnnaam sẽn yaa pãng soabã taoore,” d wilgdame tɩ d sak n deegame tɩ d pa baa fʋɩ ye. (Karm-y 1 Pɩɛɛr 5:6.) Woto sõngd-d lame tɩ d tõogd zu-loees nins fãa Wẽnnaam sẽn bas tɩ beẽ wã. D tõe n tʋllame t’a Zeova yols-d tao-tao, la d segd n kɩsa sɩd t’a mii wakat ning a sẽn segd n sõng tõndo, la a sẽn na n sõng-d to-to.—Yɩɩl 54:9; Ezai 41:10.
9. Yel-bʋg la a Davɩɩd ra segd n bas ne a Zeova?
9 D tẽeg gomd ning a Davɩɩd sẽn togs tɩ be Yɩɩl Sõamyã 55:23 pʋgẽ wã. A yeela woto: “Bas f yell ne Zusoabã la bãmb na kogl foom. Bãmb ka na n bas nin-tɩrg t’a leng wakat sẽn ka sɛt ye.” A Davɩɩd sẽn wa n yet woto wã t’a sũur da sãama hal wʋsgo. (Yɩɩl 55:5) Yɩɩ wakat ning a biig a Absalom sẽn da wa n maan sɩlem n na n deeg a naamã. Baa a Ahitofɛll sẽn da yaa a sagend ning a sẽn da kɩs sɩd wʋsgã sak n naaga a Absalom n na n zãmb-a. Woto ra kɩtame t’a Davɩɩd zoe n yi Zerizalɛm sẽn na yɩl n põse. (2 Sãm. 15:12-14) Baa zu-loe-kãens fãa pʋgẽ, a Davɩɩd kell n teega a Zeova, la a Zeova sɩd sõng-a lame.
10. D sã n wa tar zu-loeese, bõe la d segd n maane?
10 Wala a Davɩɩde, d sẽn wa n be yell ning fãa pʋgẽ, d segd n pʋʋsa a Zeova. Rẽ wɛɛngẽ, kelg-y tʋm-tʋmd a Poll sẽn sagl tõnd tɩ d maan bũmb ninga. (Karm-y Filip rãmba 4:6, 7.) D sã n sɩd pʋʋs a Zeova ne d sũur fãa, bõe n na n maane? “Wẽnnaam laafɩ sẽn yɩɩd nebã bãngrã fãa na n gũu [tõnd] sũyã la [tõnd] tagsg Kirist Zezi maasem yĩnga.”
11. Wãn to la “Wẽnnaam laafɩ” wã kogend tõnd sũyã la d tagsgã?
11 Rẽ yĩnga pʋʋsgã tõe n kɩtame tɩ d yɛlã toeem bɩ? Tõeeme. La d segd n bãngame tɩ pa wakat fãa la a Zeova leokd d pʋʋsgã tɩ zemsd ne tõnd raabã ye. La baasg zãnga, pʋʋsgã kɩtdame tɩ d yam gãand bãane, n kɩtdẽ tɩ d zu-loeesã pa komsd d raood ye. D sã n wa tar zu-loeese, “Wẽnnaam laafɩ” wã kogenda tõnd sũyã la d tagsgã. Sẽn paase, a na n sõng-d lame tɩ d ra maan yɩɩre, tɩ d da tags kɛgre, la d ra yɩ yãg-yãg n maan sẽn pa segd me ye.—Yɩɩl 145:18.
12. Rɩk-y makr n wilg bũmb ning sẽn tõe n kɩt tɩ ned yam gãand bãane.
12 La wãn to la d yamã tõe n gãe bãan tɩ d yaool n tar zu-loeese? D na n dɩka makr n wilgr rẽ: Gɛs-y wala tʋʋmd taoor soab sẽn na n yaa nin-toaaga, n tar a tʋm-tʋmd a ye n namsd wakat fãa. Tʋʋmã zĩigẽ, b sẽn namsd a soabã yaool n tara sor n tõe n tɩ wilg a zu-loɛɛgã tʋʋmdã soab meng-menga. Nin-kãng yaa nin-sõng la wʋmda. A sã n tɩ togs-a t’a kɛlg-a la a wilg t’a na n yiisa a taoor soabã a zĩigẽ wã ka la bilfu, a manesem na n yɩɩ wãna? Vẽenega, a sẽn mi bũmb ning b sẽn na n maan a yĩng la a sɩd tẽed rẽ wã, na n kenga a raood t’a kell n sak n tʋme, baa b sã n nan pa bas-a namsgo. Woto me, tõnd me miime t’a Zeova wʋmda d namsgã võore, la t’a yeelame tɩ ka la bilfu, “b na n diga dũniyã naab t’a yi.” (Zã 12:31) D sẽn mi woto fãa wã sɩd kengda d raoodo!
13. D sã n pʋʋsdẽ, bõe me la d segd n maane?
13 D sã n pʋʋs a Zeova la d bas d yɛlã fãa ne-a, sekame bɩ? Ayo. Rẽ poore, d segd n tʋmame tɩ zems ne d sẽn pʋʋsd n kot bũmb ninsã. Rĩm a Sayull sẽn da wa n tʋm neb tɩ b kẽng a Davɩɩd zakẽ wã n tɩ kʋ-a wã, a Davɩɩd pʋʋsa woto: “Mam Wẽnnaam, bɩ y fãag maam ne m bɛɛbã. Bɩ y sõng maam tɩ neb nins sẽn zẽk b mens ne maamã da paam maam ye. Fãag-y maam ne tʋʋm-wẽns maandbã la nin-kʋʋdbã, fãag-y maam.” (Yɩɩl 59:2, 3) A Davɩɩd pʋʋsa a Zeova la a tʋm tɩ zems ne a pʋʋsgã. A kelga a pagã saglgã n zoe, sẽn na yɩl n põse. (1 Sãm. 19:11, 12) Tõnd me tõe n pʋʋs n kosa yam tɩ sõng-d tɩ d tõog toogo, pa rẽ bɩ kɩt tɩ d tõog n welg d zu-loeese.—Zak 1:5.
D sẽn tõe n paam pãng to-to n tõog toogo
14. D sã n wa tar zu-loeese, bõe n tõe n sõng-d tɩ d tõog toogo?
14 D zu-loeesã tõeeme n pa sa tao-tao ye. B tõe n ket n namsd-d lame. Sã n wa yaa woto, bõe n na n sõng-d tɩ d tõog toogo? Pipi, d segd n ninga d yamẽ tɩ d sã n kell n maand a Zeova raabã baa ne zu-loeesã, d wilgdame tɩ d nong-a lame. (Tʋʋ. 14:22) D ra yĩm a Sʋɩtãan sẽn yeel bũmb ning a Zoob wɛɛngẽ n dõd Wẽnnaamã ye. A yeela Wẽnnaam woto: “A Zoob zoeta yãmb zaalem la? Yãmb wẽe yãgr n gũbg yẽ ne a zakã la a sẽn so wã fãa. Yãmb ninga a tʋʋmã fãa barka. A piisã pida tẽngã. La masã, bɩ y tẽeg y nug n sɩɩs bũmb nins a sẽn tarã, y na mik t’a tʋʋs yãmba.” (Zoob 1:9-11) A Zoob sẽn kell n sak Wẽnnaamã, a wilgame t’a Sʋɩtãan sẽn yeelã yaa ziri fasɩ. Tõnd me sã n tõog toog zu-loees sasa, d wilgdame t’a Sʋɩtãan yaa pʋ-yagda, tɩ kɩt tɩ d saagrã la d bas-yardã ne Wẽnnaam paamd pãng n paasdẽ.—Zak 1:4.
15. Bõe la d tõe n maan tɩ keng d raoodo?
15 Yiib-n-soaba, d tẽeg tɩ d ‘ba-biisa sẽn be dũniyã pʋgẽ wã tara namsg wa tõnd sẽn tarã.’ (1 Pɩɛ. 5:9) Tõnd sɩd “nan ka paam makr ba a yembr sẽn nan ka mak ninsaal ye.” (1 Kor. 10:13) Woto yĩnga, d sã n tagsd mak-sõma nins neb a taab sẽn kõ b sẽn da wa n tar zu-loeesã yelle, n pa tagsd d zu-loeesã yell bala, d tõe n paama pãng la raood n tõog toogo. (1 Tes. 1:5-7; Heb. 12:1) D maag d yĩng n tags neb d sẽn mi sẽn kell n sak a Zeova b zu-loees pʋgẽ wã mak-sõng yelle. D tõeeme me n vaees tʋm-tʋmd sẽn tũud sɩd la sẽn tar yamã sɛb pʋsẽ n bao kibay sẽn wilgd neb kẽer sẽn maan to-to b sẽn wa n tar tõnd zu-loeesã buudu. Kiba-kãens tõe n kenga d raood wʋsgo.
16. D sã n wa be namsg toɛy-toɛy pʋsẽ, wãn to la Wẽnnaam kengd d raoodo?
16 Tãab-n-soaba, d tẽeg t’a Zeova yaa tõnd “Ba sẽn yaa nimbãan-zoɛta, la Wẽnnaam sẽn belsd nebã wakat fãa. Bãmb belsda tõnd d toodã fãa pʋgẽ, tɩ tõnd sẽn paam belsg Wẽnnaam nengẽ wã, tõnd na tõog n bels neb nins sẽn be tood buud fãa pʋgẽ wã ne bels-kãnga.” (2 Kor. 1:3, 4, Kãab-paalga Koe-noogo) Dẽnd yaa wa Wẽnnaam meng bee tõnd sɛɛgẽ n kengd d raood la a kõt-d pãnga, ‘d toodã fãa pʋgẽ.’ Woto kɩtdame tɩ tõnd me tõe n bels neb a taab b ‘tood buud fãa pʋgẽ.’ A Poll meng yãame tɩ gom-kãensã yaa sɩda.—2 Kor. 4:8, 9; 11:23-27.
17. Wãn to la Biiblã tõe n sõng tõnd tɩ d tõog n mao ne vɩɩmã pʋgẽ zu-loeesã?
17 Naas-n-soaba, d tara Biiblã sẽn yaa Wẽnnaam Gomdã, t’a “yõod ya a sõng-f tɩ f zãmse, tɩ f gom n lubi, tɩ f rems sẽn golme la f wilg sẽn be neere. Yaa woto la Wẽnnaam ned paamd sẽn sek-a zãnga, n tõe tʋʋm-sõng buud fãa.” (2 Tɩm. 3:16, 17, Sebr Sõngo) Wẽnnaam Gomdã pa kɩtd tɩ d paamd sẽn ‘sek-d zãnga,’ la a kɩtdẽ tɩ d “tõe tʋʋm-sõng buud fãa” bal ye. A sõngda tõnd tɩ d tõogd n maood ne zu-loeesã me. B sẽn yeel t’a kɩtdame tɩ d ‘paamd sẽn sek-d zãng’ la d ‘tõe tʋʋm-sõng buud fãa’ wã tara võore. Gɛrk gom-biig ning b sẽn lebg ka tɩ “tõe tʋʋmdã” bilgda “tʋʋm teoog sẽn yaa sõma n zems kɛpɩ ne a tʋʋmde.” Tõe tɩ b ra tũnugda ne gom-bi-kãngã n bilgd batayo b sẽn segl sõma tɩ zems ne so-toaka. Rat n yet tɩ batayo sẽn tar bũmb nins fãa sẽn yaa tɩlae ne so-toagdbã a pʋgẽ, tɩ b tõe n bas b yam n tog sor ne-a. A leb n tõe n bilgda masĩn sẽn yaa sõma sẽn tõe n tʋm tʋʋm nins fãa b sẽn maan-a n na n tʋmã tɩ zems kɛpɩ. Woto yaa sẽn na yɩl n wilg t’a Zeova tũnugda ne a Gomdã n kõt tõnd bũmb nins sẽn tõe n kɩt tɩ d tõog n mao ne zu-loees nins fãa sẽn na n paam-dã. Dẽnd d tõe n yeelame tɩ namsg buud fãa sẽn na n paam-do, Wẽnnaam na n sõng-d lame tɩ d tõoge.
D zu-loeesã fãa na n saame
18. Sẽn na yɩl n tõog toogo, bõe yell la d segd n tẽegd wakat fãa?
18 A nu soaba, d tẽegd wakat fãa tɩ ka la bilfu, a Zeova na n kɩtame tɩ ãdem-biisã zu-loeesã buud fãa sa tɩ b paam b mense. (Yɩɩl 34:20; 37:9-11; 2 Pɩɛ. 2:9) Sasa kãnga, d tara sor n na n tɩ vɩɩmd ne a Zezi saasẽ, bɩ yaa tẽngã sẽn na n wa lebg arzãnã zug la d na n vɩɩmde, d fãa na n paam n vɩɩmda wakat sẽn-kõn-sa.
19. Wãn to la d tõe n maan n kell n tõog toogo?
19 Nand tɩ sasa kãng ta, d ket n maooda ne dũni-wẽn-kãngã zu-loeesã. Ad d sɩd tʋlla ne d sũy fãa tɩ sasa ning zu-loeesã fãa sẽn na n loog n bas-dã ta tao-tao! (Yɩɩl 55:7-9) Bɩ d tẽegdẽ tɩ d sã n kell n sak a Zeova, d wilgdame t’a Sʋɩtãan yaa pʋ-yagda. D pʋʋsd Wẽnnaam la d tẽegd d saam-biisã sẽn be dũniyã gill zugã yell n paamd raoodo, n miẽ tɩ toog ning sẽn paamd tõndã me paamda b fãa. D ket n tʋmd ne Wẽnnaam Gomdã sõma n paamd minim n paasdẽ. D modg tɩ d sẽn kɩs sɩd to-to tɩ ‘belsg fãa Wẽnnaamã’ geta d yell ne nonglmã ra tol n boog ye. D tẽeg t’a Zeova ‘geta nin-tɩrsã, la t’a wʋmda b kelemsã b sẽn dat sõngr wakate.’—Yɩɩl 34:16.
Y na n leokame tɩ bõe?
• A Davɩɩd sẽn da wa n tar zu-loeesã, a sũur tagsg yɩɩ wãna?
• Wãn to la rĩm a Salomo wilg t’a kɩsa sɩd ne Wẽnnaam?
• Bõe n tõe n sõng-d tɩ d tõog n mao ne zu-loees nins a Zeova sẽn bas tɩ beẽ wã?
[Zãmsgã sogsgã]
[Foto, seb-neng 21]
A Salomo ra kɩsa sɩd t’a Zeova na n sõnga a nin-buiidã sũy sẽn da sãamdã