D baooda fãagre!

ETAZĨNI tẽng ning b sẽn boond tɩ Pidisbɛrgã sɛɛgẽ, zĩig n be tɩ b tuud sarbõ. Koom wʋsg n wa n kẽ zĩ-kãngã tɩ sarbõ tuudb a wɛ pa bokã pʋgẽ. B sẽn pa zĩig ningã zulum taa metr 73. Rasem a tãab poore, nin-kãensã tõog n yii yɩng tɩ bũmb pa maan-b ye. Wãn to la b fãag-ba?

Neb n tũnug ne kart sẽn wilgd bokã sẽn yaa to-to, la masĩn b sẽn boond tɩ GPS n na n bãng nin-kãensã sẽn beẽ zĩig ning takɩ n tõog n fãag-ba. B tuu bog-yaleng sẽn na ta metr 65, n yaool n tũnug be n sik bũmb bokã pʋgẽ tɩ neb a wɛ wã kẽed yembr-yembr tɩ b yiisd-ba. B sã n da pa tõog n yiis-ba, zĩ-kãng bal n da na n yɩ b yaoogo. B fãa sũur yɩɩ noog tɩ b pʋʋs barka, b sẽn paam tɩ b fãag-bã yĩnga.

Tõe tɩ yel-kãngã buud bɩ sabaab a to sẽn tõe n tũ ne d yõor zɩ n paam tõnd ye. La baa ne rẽ, d fãa rata fãagre. Bala d pa tõe n põs baasã, kʋʋlmã la kũumã ye. A Zoob sẽn yɩ wẽn-sakdã yeela woto: “Ninsaal pag sẽn dogã vɩɩm yaa koɛɛg la toogo. Yẽ yita wa tɩ-puug n kʋɩtẽ. Yẽ loogda wa sulunsuk n menemdẽ.” (Zoob 14:1, 2) Baa ne a Zoob sẽn togs gom-kãngã sẽn na maan yʋʋm 3 500 masã wã, a ket n yaa sɩd rũndã-rũndã, bala ned pa be n tõe n põs kũum ye. Baa ne d sẽn vɩ zĩig ning bɩ d sẽn get d mengã yell to-to fãa, d fãa ratame tɩ b fãag-d ne namsgã, kʋʋlmã, la kũumã.

Bãngdbã maoodame n dat tɩ nebã tõog n vɩɩmd n kaoos n yɩɩge. Bãngdb sull a ye wilgame tɩ bãmb tʋʋmd yaa sõng nebã tɩ b ra ki pẽba, la b sõng-b tɩ b vɩɩmd n da ki meng ye. Hal ne rũndã, bãngdbã bãngr tara paasgo, la b tʋlla ne b sũy fãa tɩ nebã vɩɩmd n kaoos n yɩɩge. Baa ne rẽ, b pa tõog n kɩt tɩ nebã tõe n vɩɩmd n zʋʋg yʋʋmd 70 bɩ 80 n kaoos ye. Yaa woto la a Moiiz sẽn togs sẽn na maan yʋʋm 3 500 masã wã.—Yɩɩl Sõamyã 90:10.

Baa d wa n pa tagsd wa a Zoob sẽn da tagsd to-to wã me, yaa vẽeneg tɩ bilf-bilfã, d me na n wa ‘looga wa sulunsuku.’ D na n wa ki n basa d zakã, d zo-rãmbã, d zakã rãmba, la bũmb nins fãa d sẽn da tõog n maanã. Pĩnd wẽndẽ Israɛllã rĩm a Salomo sẽn yɩ yam soabã yeela woto: “Nin-vɩɩs miime tɩ b na n kiime. La kũum ka mi bũmb ye, la bãmb ka le paamd tʋʋmd yaood ye.”—Koɛɛg Soaba 9:5.

Zu-bʋko, wa Biiblã sẽn wilgdã, kũumã “tara pãng” ãdem-biisã zutu, wa na-toaag sẽn tar pãng n namsd neba. Vẽenega, ãdem-biisã ratame tɩ b fãag-b ne kũumã sẽn yaa b yaoolem bɛ wã. (Rom dãmba 5:14; 1 Korẽnt dãmba 15:26) Neb nins sẽn fãagd nebã yel-pakr wakatã tõe n tara minim la teed buud toor-toore, la baa ne rẽ fãa b pa tõe n fãag-y wakat fãa yĩng ye. La Wẽnnaam a Zeova sẽn yaa d naandã maana bũmb n na n fãag-do.

[Fotã soaadba, seb-neng a 3]

Photo by Gene J. Puskar-Pool/Getty Images