Modg-y tɩ y kãadmã tall sũ-noogo
Modg-y tɩ y kãadmã tall sũ-noogo
“Yaa ne yam la ned yẽbgd a zak n metẽ.”—YEL. 24:3.
1. Pipi ninsaalã naaneg poore, bõe la Wẽnnaam yeelẽ tɩ wilgdẽ t’a yaa yam soaba?
TÕND saasẽ Ba wã yaa yam soaba. A mii bũmb nins fãa sẽn yaa sõma ne tõndã. Wala makre, a sẽn wa n naan pipi ninsaalã Edɛnnã poore, a yeelame tɩ “ka neer tɩ ninsaal zĩnd a yembr ye.” Sɩd me, bũmb a ye Wẽnnaam sẽn da rat yaa tɩ sẽn na n wa kẽ-b kãadmã rog kamb “n pid dũniyã.”—Sɩng. 1:28; 2:18.
2. Bõe la a Zeova maan ãdem-biisã neer yĩnga?
2 A Zeova paasa woto: “Mam na n maana sõngd sẽn zems ne yẽ n kõ-a.” Rẽ poore, a kɩtame tɩ gõe-sik yõk ninsaalã t’a gũsi, t’a yãk a sĩif a yembr n naan paga. A Zeova sẽn wa n tall pagã n kẽng raoã nengẽ wã, raoã yeela woto: “Masã, ada yaa mam kõabã kõbre, la mam yĩnga nemdo. B na n boola yẽ yʋʋr tɩ paga; tɩ bõe, b yãka yẽ rao yĩngẽ.” A Hawa sɩd ra zemsa ne a Ãdem. Yaa sɩd tɩ b tõogã, b pãngã la yɛl a taab pʋgẽ b ra pa wõnd taab ye. La Wẽnnaam naana b fãa n wõneg a menga, tɩ b ra zems zãng n pa tar yel-wẽn ye. Woto fãa yĩnga, d tõe n yeelame tɩ yaa a Zeova n lugl pipi yikãadmã. A Ãdem ne a Hawa sũy yɩɩ noog Wẽnnaam sẽn maan woto wã, bala b bãnga vẽeneg tɩ ra yaa b fãa neer yĩnga.—Sɩng. 1:27; 2:21-23.
3. Bõe la neb wʋsg yet la b maand kãadmã wɛɛngẽ, la rẽ kɩtame tɩ d sokd d mens sogs-bʋse?
3 Bʋko, rũndã-rũndã, neb wʋsg yaa tõatba. La rẽ sẽn wat ne zu-loees ninsã pa Wẽnnaam yell ye. Neb wʋsg paoogda kãadmã Wẽnnaam sẽn luglã n yetẽ t’a pa le tar yõodo, la t’a wata ne zab la sũ-sãamse. Sẽn kẽed-b kãadmã wʋsg wat n baas n kao-a lame, tɩ b wʋsg toor kae ne b kambã woto ye. Kẽer meng kãadem kaoob sasa, b tũnugda ne b kambã n baood b meng nafr bala. Mo-yõsr sã n kẽ roagdb kẽer sʋka, b tõdgda b na yɩ wʋmdba, sũ-bʋgsem dãmb la sik-m-mens rãmb sẽn na yɩl tɩ laafɩ la zems-n-taar tõog n zĩndi. (2 Tɩm. 3:3) La baa ne tõnd wakatã sẽn yaa toog tɩ zu-loeesã yaa wʋsgã, wãn to la kãadem tõe n baas n tall sũ-noogo? Sẽn kẽ-b kãadmã sã n yaa sũ-bʋgsem dãmba, wʋmdb la sakdba, wãn to la tõe n sõng tɩ b kãadmã ra sãame? Bõe la neb nins sẽn tõog tɩ b kãadem tar sũ-noogã mak-sõng tõe n wilg-du?
Sak-y-yã a Zeova noyã
4. a) Sagl-bʋg la a Poll kõ kiris-nebã kãadmã wɛɛngẽ? b) Bõe la kiris-neb sẽn yaa sakdb maand tɩ wilgdẽ tɩ b tũuda a Poll sagl-kãngã?
4 Wẽnnaam da vẽnega tʋm-tʋmd a Poll t’a sagl pʋg-kõapã. A yeel-b lame tɩ sẽn dat-b n lebs n kẽ kãadmã tog n dɩka “ned sẽn tũud Zusoaba bala.” (1 Kor. 7:39) Ne kiris-neb nins sẽn da yaa Zʋɩf rãmbã, sagl-kãngã pa yɩ no-paalg ye. Bala, tõog ninga Wẽnnaam sẽn da kõ Israɛll nebã pʋgẽ, a ra yeel-b-la vẽeneg tɩ b ra “maan yikãadem” ne tẽn-yagsã neb sẽn da pa tũud-a wã ye. A Zeova wilga a no-kãngã kɩɩsg sẽn na n wa ne yɛl ninsã. A yeel-b-la woto: ‘Tɩ bõe, b na n kɩtame tɩ y kamba bas maam, n tũ wẽnnaam dãmb a taaba. La mam sũur na n puuga ne yãmb tɩ m sãam-y tao-tao.’ (Tõo. 7:3, 4) La rũndã-rũndã yẽ, a Zeova ratame tɩ sẽn dat-b n kẽ kãadem a nin-buiidã sʋkã maan wãna? Vẽenega, a ratame tɩ pag bɩ rao sẽn sɩd tũud-a sã n na n kẽ kãadem bɩ yɩ ne ned “sẽn tũud Zusoabã” bala. Rat n yeel tɩ ne a tẽed-n-taag sẽn dɩk a meng n kõ Wẽnnaam n deeg lisgu. No-kãngã a Zeova sẽn kõ wã sakr yaa yam bũmbu.
5. Wãn to la a Zeova la sẽn kẽ-b kãadmã get pʋleng ning b sẽn pʋlem b kãadmẽ wã?
5 Wẽnnaam datame tɩ pag ne a sɩd modg n pids bũmb ning b sẽn pʋlem taab b kãadmã raarã. Wẽnnaam bi-ribl a Zezi sẽn da gom a Ãdem ne a Hawa kãadmã yell n yeel bũmb ningã sɩd wilgda rẽ. A yeela woto: “Bɩ ned da welg bũmb nins Wẽnnaam sẽn lagem ne taaba ye.” (Mat. 19:6) Yɩɩl-gʋlsdã me tẽegda tõnd tɩ pʋleng sɩd pa reem bũmb ye. A yeela woto: ‘Kõ Wẽnnaam bark pʋʋsg tɩ yɩ maoongo, n pids fo wẽenega ne Sẽn-ka-to soabã.’ (Yɩɩl 50:14) Vẽenega, baa kãadem sẽn tõe n yɩ noogã, bũmb ning neb a yiibã sẽn pʋlem taabã pidsg pa nana ye. Bala b ned kam fãa tara a sẽn segd n maan tɩlae.—Tõo. 23:22.
6. A Zɛfte mak-sõngã wilgda tõnd bõe?
6 Ges-y Israɛll pĩnd wẽndẽ bʋ-kaood a Zɛfte makrã. Daar a ye, a pʋlma a Zeova woto: “Yãmb sã n sõng maam tɩ m tõog Amõ nebã, mam sã n tɩ tõog n wa, bũmb ninga fãa sẽn na n deng n yi m dignoorẽ wã n seg maama, bõn-kãng yaa [a Zeova] n so. Mam na n dɩk-a lame n maan maoongo.” A Zɛfte sẽn tɩ tõog zabrã n lebg n wat a yirã Mizpa wã, yɩɩ a bi-pugl sẽn da yaa a bi-yend n yɩ pipi n seg-a. La a Zɛfte viiga a pʋlengã bɩ? Ayo. Ad a sẽn yeele: “Mam da pʋlma ne [a Zeova]. La m ka tõe n bas m noorã tɩ vaal ye.” (Bʋk. 11:30, 31, 35) A Zɛfte bãngame t’a sã n sak n kɩs a bi-yendã n pids a pʋlengã, a pa na n tol n tall yagens ye. La ne rẽ fãa, a pa bas a noorã tɩ vaal ye. Yaa sɩd t’a Zɛfte sẽn pʋlem bũmb ningã yaa toor ne kãadmã pʋlengã. La a sẽn modg n pids-a wã, a kõo kiris-neb nins sẽn kẽ kãadmã mak-sõngo.
Bõe n kɩtd tɩ kãadem tall barka?
7. Bõe la sẽn nan kẽ-b kãadem paalmã segd n maane?
7 Pagb wʋsg ne b sɩdb sã n mi n tẽeg wakat ning b sẽn da wa n nan baood taabã yelle, b sũy yaa noogo. B ned kam fãa ra nan baoodame n na n bãng a to sõma, tɩ b sẽn da rɩkd sẽk wʋsg n be ne taabã ra paasd b zoodã pãngã. La kẽer nengẽ, yaa b roagdbã n dɩk-b n kõ. Baa sẽn yɩ to-to me b kãadmã poore, yɩɩ tɩlae ne b ned kam fãa t’a toeeme. Pʋg-sɩd a ye yeela woto: “Tõnd kãadmã poore, d zu-loɛɛg ra yaa d sẽn da wae n yĩmdẽ tɩ d pa le segd n vɩɩmd wa d sẽn da wa n nan pa kẽ kãadmã. Sɩngrẽ wã, yɩɩ toog ne tõnd ned kam fãa t’a tõog n da bas t’a roagdbã la zo-rãmbã rɩk a sẽkã wʋsg wa pĩndã ye.” Pʋg-sɩd a to kãadem sẽn ta yʋʋm 30 rũndã bãnga hal a kãadmã sɩngrẽ tɩ rẽndame t’a ra ye tagsd a meng yell bal ye. Rẽ kɩtame tɩ ned sã n bool-a t’a wa a yir wall zĩ-zẽng tɩ b sõse, pa rẽ bɩ a sã n dat n dɩk sɛk ne neda, a rengd n soka a pagã n bãng a tagsgo, n maan sẽn na naf bãmb b yiibã fãa. Yɛl a woto buud pʋsẽ, d sã n yaa sũ-bʋgsem dãmba la sik-m-mens rãmba, sõngdame.—Yel. 13:10.
8, 9. a) Bõe yĩng tɩ pagbã ne b sɩdbã segd n yẽsd ne taab sõma-sõma? b) B sã n yaa wʋmdba, wãn to la na n sõng-ba, la bõe yĩnga?
8 Sasa ninga, pagã ne a sɩdã tõe n yaa neb sẽn yit zĩis toor-toore, tɩ b wubrã la b minimdã yaa toɛy-toɛya. Sã n yaa woto, rẽndame tɩ neb a yiibã pelgd b pʋs n yẽsd ne taab sõma n tõogd n wʋmd taaba. Yẽsg pa goam bal ye. Y sã n gũusd n get y pagã bɩ y sɩdã sẽn gomd ne a nebã to-to wã, tõe n sõng-y lame tɩ y bãng-a sõma tɩ pa tũ ne goam ye. Pa wakat fãa me la gomd ned sẽn yeel wilgd sẽn sɩd be a sũurẽ ye. Yaa a sẽn yeel gomdã to-to wã pʋgẽ la b bãngd a tagsgo. D sã n gũusdẽ, d sɩd tõe n bãnga ned tagsg t’a pa yaag a noor meng ye. (Yel. 16:24; Kol. 4:6) Sẽn na yɩl n tõog n tall sũ-noog d kãadmã pʋgẽ, yaa tɩlae tɩ d bao yam-vẽenem.—Karm-y Yelbũn 24:3.
9 Pagb wʋsg ne b sɩdb mikame tɩ reemã la pemsmã kokr buud toɛy-toɛyã yãkr wɛɛngẽ, b segd n yɩɩ wʋmdba. Tõe tɩ y sẽn da wa n nan pa kẽ kãadmã, y ned kam fãa ra tara yĩn-wɩsgr deem wall reem a to a sẽn nong wʋsgo. La rẽ yĩnga y kãadmã poore, kõn yɩ sõma tɩ y toeem minimd kãens bilf sɩda? (1 Tɩm. 4:8) La sẽk ning d sẽn da rɩkd n kaagd d roagdbã yẽ wɛɛngẽ? Kãadem pʋgẽ, segdame tɩ pagã ne a sɩdã rɩkd sẽk n naagd taab n zãmsd Biiblã, n kẽnd tigissã, n moond koe-noogã la b maand yɛl a taab me.—Mat. 6:33.
10. Roagdb sã n tar kamb sẽn kẽ kãadem, b fãa sã n yaa wʋmdba, wãn to la na n kɩt tɩ zems-n-taar zĩnd b sʋka?
10 Pag ne rao sã n kẽ kãadem, b yiibã ned kam fãa basda a ba ne a ma n tɩ zĩnd ne to wã. (Karm-y Sɩngr 2:24.) La baa ne rẽ, b segd n ket n waoogda b ba rãmbã la b ma rãmbã wa Wẽnnaam sẽn yeelã. Dẽnd baa b kãadmã poore, tõe tɩ b na n ket n kẽnd n geta b roagdbã la b reem-dãmbã. Rao a ye kãadem sẽn ta yʋʋm 25 rũndã yeela woto: “D roagdbã, d ba-biisã la d reem-dãmbã yɛl gesg wɛɛngẽ, ra mi n yaa toog ne tõnd ned kam fãa t’a bãng n maan tɩ zemse. Rẽ wɛɛngẽ, Sɩngr 2:24 saglgã sõnga maam. Yaa sɩd tɩ d fãa segd n waoogda d roagdbã, n sakd-b la d get b yelle, la verse kãngã wilgdame tɩ yaa m pagã yell la m segd n deng n gese.” Woto yĩnga, kiris-neb sã n tar kamb sẽn kẽ kãadem, b tog n sak n deegame tɩ b kambã segd n gesa b zakã yell n yɩɩge, la tɩ raoã la a zakã zu-soaba.
11, 12. Bõe yĩng tɩ pagbã ne b sɩdbã segd n naagd taab n zãmsd Biiblã la b pʋʋsdẽ?
11 Pag ne a sɩd segd n tara sẽk b sẽn yãk n naagd taab n karemd Wẽnnaam Gomdã. Kiris-neb wʋsg sẽn kẽ kãadem wilgame tɩ woto sɩd yaa tɩlae. Yɩl n sɩngã tõeeme n pa yɩ nana ye. La d sã n tõog n sɩng me, tõe n wa yɩɩ toog tɩ d tõog n da vaandẽ ye. Zak-soab a yembr sɩd yeela woto: “Tõnd sã n da tõe n leb n sɩnge, d sẽn da na n modg n maan yaa yãk sasa d sẽn na n zãmsd Biiblã ne taab wakat fãa.” A paasa woto: “D zãmsgã sasa, d sã n wa karem bũmb tɩ yɩ m pagã noogo, nooma maam wʋsgo.”
12 Pag ne a sɩd sã n naagd taab n pʋʋsdẽ me, sõngd-b-la wʋsgo. (Rom 12:12) Hakɩka, b sã n naagd taab n maand a Zeova raabã, zood ning b sẽn tar ne a Zeova wã na n kɩtame tɩ bãmb ne taab zoodã pãng paase. (Zak 4:8) Pʋg-sɩd a ye sẽn yaa kiris-ned yeela woto: “Ned kam fãa sã n sakd n kot sugr tao-tao, tɩ b sã n wa pʋʋsd ne taab bɩ b gomd rẽ yell baa beegrã sã n paoodame, wilgdame tɩ b sũy sɩd sãamame.”—Ef. 6:18.
Pagbã ne b sɩdbã segd n yɩɩ wʋmdba
13. Sagl-bʋs la a Poll kõ sẽn kẽ-b kãadmã?
13 Rũndã-rũndã, pag ne rao lagengã wɛɛngẽ, tʋʋm dẽgd wʋsg la nebã nong n maandẽ. La kiris-neb kãadem pʋgẽ, b segd n laka b mens fasɩ ne rẽ. Pag ne a sɩd kẽed-n-taarã wɛɛngẽ, tʋm-tʋmd a Poll kõo sagl-kãngã: “Bɩ sɩdã kɩs pagã bũmb ning a sẽn tog n kɩs-a wã, la tɩ pagã me maan a woto ne a sɩdã. Pag ka tar noor ne a mengã yĩng ye, yaa a sɩdã n tar noor ne. Raoã me ka tar noor ne a mengã yĩng ye, yaa a pagã.” Rẽ poore, a Poll paasa sagl-kãngã vẽenega: “Bɩ ned fãa ra mong a to, sã n ka tɩ y zemsa taab noor wakat bilf yĩnga.” Bõe t’a yet woto? A paasame: “Tɩ y tõe n paam weer n pʋʋs Wẽnnaam. Rẽ sã n loog bɩ y leb n bao taaba, t’a Sʋɩtãan da wa mak yãmba, y sẽn ka tõe y meng yĩng ye.” (1 Kor. 7:3-5, Kãab-paalgã Koe-noogo) A Poll sẽn gom pʋʋsgã yellã wilgda bũmb ning yikãad ne a pag sẽn yaa kiris-neb sẽn segd n lʋɩɩs taoore. La a wilga vẽeneg me tɩ b ned kam fãa segd n wilgda a to wã t’a nong-a lame la a pidsd a tʋlsmã.
14. Wãn to la Biiblã noy sõngd sẽn kẽ-b kãadmã tɩ b welgd b kẽed-n-taarã pʋgẽ zu-loeese?
14 Pagbã ne b sɩdbã segd n pelgda b pʋs n yẽsd ne taab b kẽed-n-taarã wɛɛngẽ. B segd n bãngame tɩ b ned kam fãa sã n pa wilgd a to wã t’a nong-a lame la a pidsd a tʋlsmã, tõe n wa waa ne zu-loeese. (Karm-y Filip rãmb 2:3, 4; la y ges Mat. 7:12 wã.) Zags kẽer pʋsẽ sẽn yaa pagã wall sɩdã bal n yaa kiris-nedã, zu-loe-kãens buud zoe n zĩndame. La naoor wʋsgo, sẽn ya-a kiris-nedã sã n tall manesem sõng la a yɩ wʋmda, a tõogd n manega yellã. (Karm-y 1 Pɩɛɛr 3:1, 2.) Kiris-nedã sã n kell n wilgdẽ t’a nonga a Zeova la a pagã bɩ a sɩdã la a yɩ wʋmda, tõe n sõng-b lame tɩ b welg zu-loɛɛgã.
15. Sẽn na yɩl tɩ kãadem tall sũ-noogo, wãn to la neb a yiibã segd n waoogd taaba?
15 Pʋg-sɩd sẽn nong a pag segd n waoogd-a lame me. Baa yel-bõoneg pʋsẽ, a segd n modgame n da sãamd a pagã sũur ye. Pʋg-sɩd a ye kãadem sẽn ta yʋʋm 47 masã sak n deegame tɩ rẽ wɛɛngẽ, yẽ segd n kell n maoome. B sagenda pagb nins sẽn yaa kiris-nebã tɩ b waoog b sɩdbã wʋsgo. (Ef. 5:33) Pag sã n sãbsd a sɩd la a wilgd zĩis nins a sẽn wae n kongdẽ wã zãma sʋka, a pa wilgd t’a waoogd-a lame ye. Yelbũn 14:1 wã tẽegd-d-la woto: “Pagb nins sẽn tar yamã manegda b yiya. La pʋg-yalemba sãamda b yiya.”
Ra kõ-y Sʋɩtãanã weer ye
16. Wãn-wãn la sẽn kẽ-b kãadmã tõe n tũ Efɛɛz rãmb 4:26, 27 saglgã?
16 “Yãmb sũyã sã n yiki, bɩ y ra maan yel-wẽn ye, la y ra sak tɩ wĩndg lʋɩ tɩ yãmb sũyã ket n ka sig ye. La bɩ y ra kõ Sʋɩtãana weer ye.” (Ef. 4:26, 27) Sagl-kãngã tũub tõe n sõng-d lame tɩ d welg d mo-yõsã wall d gil-ba. Saam-bi-poak a yembr yeela woto: “Mam pa tẽr mo-yõsr sã n zoe n zĩnda maam ne m sɩdã sʋk tɩ d pa zĩnd n welg-a, baa sã n na n dɩka sẽk wʋsgo.” B kãadmã sɩngrẽ, pʋg-kãngã ne a sɩdã yãka yam n na n welgd b mo-yõsr fãa a daare. A yeela woto: “Tõnd da yãka yam tɩ baa sẽn wa n yaa yell ning fãa, d na n kõta taab sugri, sẽn na yɩl tɩ beoog sẽn vẽeg fãa bɩ d sũyã yar taaba.” B sẽn maand woto wã, kɩtame tɩ Sʋɩtãanã pa tõe n kẽe b sʋk ye.
17. Kãadem pʋgẽ, baa neb a yiibã sã n wa maand b bãngẽ, bõe n na n sõng-ba?
17 La sã n mik tɩ y kãadmã poore, y maanda y bãngẽ? Sã n yaa woto, tõe tɩ y na n getame tɩ y kãadmã pa noom wa y taabã nengẽ ye. La ne rẽ fãa, y sã n kell n tẽeg tɩ Wẽnnaam datame tɩ y modg n pids pʋleng ning y sẽn pʋlem taabã, na n sõng-y lame. Wẽnnaam vẽnega tʋm-tʋmd a Poll t’a sagl kiris-nebã woto: “Bɩ kãadem zĩnd waoogr ne neba fãa, la y ra sak tɩ gãag sãam ne wẽng ye. Tɩ bõe, Wẽnnaam na n kaoo raglem dãmba ne nin-yoaadba bʋʋdo.” (Heb. 13:4) Y leb n pa segd n yĩm me tɩ “wĩir sã n kal a tãabo, a ka tõe n kaoog naana ye.” (Koɛ. 4:12) A Zeova yʋʋrã waoogr sã n sɩd pak pag ne a sɩda, b na n gãda taab nus la b gãd Wẽnnaam me, n yɩ wa wĩir sẽn kal a tãabo. B na n maoome tɩ b kãadmã yɩ sõma, bala b miime tɩ woto na n waooga a Zeova sẽn yaa kãadmã lugundã.—1 Pɩɛ. 3:11.
18. D tõe n kɩsa sɩd ne bõe kãadmã wɛɛngẽ?
18 Hakɩka, kiris-ned fãa tõe n talla sũ-noog a kãadem pʋgẽ. Baoodame bal tɩ b modg la b tall zʋg-sõma wala sũ-bʋgsmã la sakrã, la b yɩ wʋmdb me. Rũndã-rũndã, dũniyã gill zugu, a Zeova Kaset rãmbã tigims pʋsẽ, sẽn kẽ-b kãadmã vɩɩm sẽn noom-b to-to wã wilgda vẽeneg tɩ kãadem sɩd tõe n talla sũ-noogo.
Y na n leokame tɩ bõe?
• Bõe yĩng tɩ d tõe n yeel tɩ kãadem tõe n talla sũ-noogo?
• Bõe la pag ne a sɩd tõe n maan tɩ b kãadmã tall barka?
• Zʋg-sõma bʋs la pag ne a sɩd segd n bao?
[Zãmsgã sogsgã]
[Foto, seb-neng 18]
Modg-y n welg-y mo-yõsr fãa a daare, n ‘da kõ Sʋɩtãanã weer ye’