Yãmb geta nebã wa a Zeova sẽn get-b to-to wã bɩ?
Yãmb geta nebã wa a Zeova sẽn get-b to-to wã bɩ?
“Welgr kõn zĩnd yãmb yĩnga pʋgẽ ye, la . . . wila fãa na ges taab yell tɩ zemse.”—1 KOR. 12:25.
1. Y sẽn wa n lebg a Zeova Kaset soab paalmã, bõe la y paam-yã?
D SẼN wa n lak d mens ne dũni-wẽngã neb n lagemd a Zeova Kaset rãmbã, d yãa b sẽn nong taab to-to tɩ sũ-noog be b sʋkã tɩ yɩ-d noog wʋsgo. D sɩd yãame tɩ b yaa toor fasɩ ne a Sʋɩtãan dũniyã neb sẽn pa nand neba, n kis taab la b nong zabã. D sẽn lebg a Zeova Kaset soabã tɛka, d paama bãan la sũ-noog ning b sẽn tarã buudu.—Ezai 48:17, 18; 60:18; 65:25.
2. a) Bõe n tõe n wa kɩt tɩ d pa le get d saam-biisã wa a Zeova sẽn get-b to-to wã? b) Sã n yaa woto, bõe la d segd n maane?
2 La d sẽn yaa pãn-komsem dãmbã yĩnga, kaoosg poore, d tõe n wa tara tags-kɛg d saam-biisã zutu. Tõnd meng pãn-komsmã tõe n wa kɩtame tɩ d get d saam-biisã kong-bõonegã bal n pa ye ne b zʋg-sõma wã ye. Sẽn dat n yeel tɩ d pa ye get-b wa a Zeova ye. La sã n wa lebg woto, d tog n mao n toeemame n tõog n get-b wa a Zeova sẽn get-b to-to wã.—Yik. 33:13.
A Zeova sẽn get d saam-biisã to-to
3. Biiblã pʋgẽ, b maka kiris-neb tigingã ne bõe?
3 Wa b sẽn wilg 1 Korẽnt dãmb 12:2-26 pʋgẽ wã, tʋm-tʋmd a Poll maka kiris-neb nins sẽn zae ne vʋʋsem sõngã tiging ne ninsaal yĩngã sẽn tar “wil wʋsgã.” Wa yĩngã wil sẽn pa wõnd taabã, tigingã neb me yaa toor-toore, tɩ ned kam fãa sẽn tõe n maan bũmb ninsã la a zʋg pa wõnd a to rẽnd ye. La ne rẽ fãa, a Zeova sakame tɩ d be tigingã pʋgẽ. A nong-d lame, la a nand ned kam fãa. Rẽ n so t’a Poll sagl-d n yeel tɩ tigingã neb bɩ a ‘wilã fãa segd n gesa taab yelle.’ A saglgã tũub tõe n yɩɩ toogo, bala tõnd ned kam fãa zʋg tõe n yɩɩ toor ne to rẽnda.
4. Bõe n tõe n wa kɩt tɩ d segd n toeem d sẽn get d tẽed-n-taasã to-to wã?
4 D tõe n wa geta d saam-biisã pãn-komsem bala, n bas n pa get b zʋg-sõma wã ye. La d sã n maand woto, yaa wa d sẽn get foto tɩ bũmb bilf d sẽn pa nong be a zugu, tɩ d bas n pa ne fotã zãng sẽn yaa neerã ye. La a Zeova sã n get neda, a geta a fãa, hal ne a zʋg-sõmsã. Woto yĩnga d sã n modgd n dɩkd a Zeova mak-sõngã, na n kɩtame tɩ nonglem la zems-n-taar zĩnd tigingã neb sʋk n paase.—Ef. 4:1-3; 5:1, 2.
5. Bõe yĩng tɩ d pa segd n kaood d taabã bʋʋdo?
5 A Zezi ra mii hal sõma tɩ ãdem-biisã nong n kaooda taab bʋʋdo. Rẽ n so t’a sagl-d woto: “Da [le, NW] bʋ-y ned bʋʋd ye, tɩ Wẽnnaam da wa bʋ yãmb bʋʋd ye.” (Mat. 7:1) Ka wã, a Zezi yeela a kɛlgdbã vẽeneg tɩ b ‘ra le bʋ ned bʋʋd ye.’ Bala a ra miime tɩ b wʋsg ra minim n kaooda taab bʋʋdo, bɩ n wɩt-ba. Rẽ yĩnga d nong n kaooda d taabã bʋʋd bɩ? Sã n yaa rẽ, bɩ d mao n toeem tɩ Wẽnnaam da wa kao tõnd me bʋʋd ye. D pʋd n pa segd n kao ned a Zeova sẽn bobl tʋʋmd tigingã pʋgẽ bʋʋdo, wall d yeel t’a pa tog n zĩnd tigingã pʋgẽ ye. D tẽed-n-taag tõe n tara zĩis a sẽn kongde, la rẽ yĩnga a Zeova sã n saka t’a ket a nin-buiidã sʋka, zemsame tɩ d pa nong-a sɩda? (Zã 6:44) D sã n pa nong saam-biigã, rẽ yĩnga d sɩd tẽedame tɩ yaa a Zeova n get a siglgã yelle, la tɩ bũmb sã n segd ne remsgo, yẽ n na n dems-a wakat ning a sẽn dat sɩda?—Karm-y Rom dãmb 14:1-4.
6. A Zeova geta kiris-ned kam fãa wãn-wãna?
6 Bũmb sẽn noom d sũur wʋsg yaa t’a Zeova zoe n mii kiris-ned kam fãa sẽn tõe n lebg to-to dũni paalgã pʋgẽ, d sã n wa paam d mens ne yel-wẽndã biis n lebs n zems zãnga. Sẽn paase, a mii modgr ning d sẽn zoe n maan n tũ Biiblã noyã. Woto fãa kɩtame t’a pa get d kongr fãa ye. Yɩɩl Sõamyã 103:12 soabã pʋgẽ, b yeta woto: “Bãmb zãaga tõnd kongrã ne tõnd wa yaang sẽn zãr ne taoore.” Rẽ yĩnga woto pa segd n kɩt tɩ d fãa tall mi-beoog ne Wẽnnaam sɩda?—Yɩɩl 130:3.
7. A Zeova sẽn da get a Davɩɩd to-to wã wilgda tõnd bõe?
7 Kibay bee Biiblã pʋgẽ n wilgdẽ t’a Zeova sɩd basda ned kongr n ges a zʋg-sõma wã bala. Wala makre, a ra goma a tʋm-tʋmd a Davɩɩd yell n yeel t’a ‘tũu yẽ noorã ne a sũur fãa n maan bũmb nins yẽ sẽn datã.’ (1 Rĩm 14:8) Yaa sɩd tɩ d miime t’a Davɩɩd ra wa n maana wẽnga. La ne rẽ fãa, a Zeova gesa a zʋg-sõma wã, bala a ra miime t’a yaa pʋ-peelem soaba.—1 Kib. 29:17.
D get d saam-biisã wa a Zeova
8, 9. a) Wãn to la d tõe n dɩk a Zeova togs-n-taare? b) Wilg-y d sẽn tõe n bilg rẽ to-to, la saglg ning a sẽn kõt-do.
8 A Zeova tõe n bãnga sẽn be ninsaal sũurẽ, la tõnd pa tõe ye. Rẽ meng seka d na bas neb a taabã bʋʋd kaoobo. Ned kae n tõe n bãng sẽn be a to sũurẽ zãng ye. Woto yĩnga, d segd n dɩkda a Zeova mak-sõngã, n da get nebã kongr toɛy-toɛyã sẽn na n wa sa wã ye. D sã n maand woto, na n kɩtame tɩ laafɩ la zems-n-taar zĩnd d saam-biisã fãa sʋk n paase.—Ef. 4:23, 24.
9 D rɩk makr n wilg rẽ. Ges-y wa roog toll ne a feneta n paas a teed a taabã sẽn na n sãam t’a pa ye sakd gesg ye. Kẽer tõe n wa baas n yeelame tɩ b segd n wã-a lame. La ned n wa n ges roogã n tall tagsg a to. A basa teed nins sẽn sãamã gesgo, n ges roogã zãng n mik t’a ket n tara pãnga, tɩ b tõe n lebs n maneg-a. Rẽ zugẽ, a raa roogã n maneg-a la a nags-a t’a lebg neere. Dẽ poore, sẽn yã-a roogã fãa sũur yaa noog t’a pẽgd-a. Tõnd ned kam fãa tõe n wõnega sẽn maneg-a roogã. D sã n bas d saam-biisã pãn-komsem gesg n get b zʋg-sõma wã, la d ningd d yamẽ tɩ b tõe n wa toeemame, d rɩkda nin-kãngã mak-sõngã. D sã n maand woto, d na n dɩkda a Zeova togs-n-taare, n nong d saam-biisã b zʋg-sõma wã yĩnga.—Karm-y Hebre rãmb 6:10.
10. Wãn-wãn la saglg ning sẽn be Filip rãmb 2:3, 4 pʋgẽ wã tõe n sõng-do?
10 Tʋm-tʋmd a Poll kõo kiris-nebã sagls sẽn tõe n kɩt tɩ b tõog n zems taab tigingã pʋgẽ. A sagl-b-la woto: “Da maan-y bũmb baa a yembr ne zabr walla wilg-m-meng ye, la bɩ ned kam fãa tẽ ne sik-m-meng yam tɩ nebã fãa yɩɩda yẽnda. Bɩ yãmb ned kam fãa da ges a meng yell bal ye, bɩ y ges taab yell me.” (Fil. 2:3, 4) D sã n yaa sik-m-meng soaba, d pa na n getẽ tɩ d yɩɩda d taabã ye. B yell sã n sɩd pak-d lame, la d sã n get zʋg-sõma nins b sẽn tarã, na n sõng-d lame tɩ d get-b wa a Zeova sẽn get-b to-to wã.
11. Bõe n toeem d tigimsã wʋsg pʋsẽ?
11 Rũndã-rũndã, yɛl wʋsg sẽn tar toeeng dũniyã gill zugã kɩtame tɩ neb wʋsg yigsd n kẽnd tẽn-zẽmse. Galʋ-tẽns kẽer pida ne tẽns toɛy-toɛy neba. Kẽer sak n zãmsa Biiblã ne tõnd n lebg a Zeova Kaset rãmba. Nin-kãens yita “soolem fãa, la buud fãa,” la b gomd buud-goam toɛy-toɛya. (Wil. 7:9) Rẽ kɩtame tɩ d tigims wʋsg pid ne tẽns toɛy-toɛy neb masã.
12. Bõe la d segd n mao n kell n maane, la bõe yĩng tɩ tõe n yɩ toog wakat ninga?
12 Tigimsã pʋsẽ, tõe n yɩɩ tɩlae tɩ d modg n paas sẽn na yɩl n get d taabã wa a Zeova. Rẽ baoodame tɩ d tẽeg tʋm-tʋmd a Pɩɛɛr saglgã. A sagl-d lame tɩ d nong ‘ba-biisã ne sɩda,’ la a paas tɩ d ‘nong taab wʋsg ne d sũyã fãa.’ (1 Pɩɛ. 1:22) Nong buud toɛy-toɛyã neb ne d sũy fãa tõe n yɩɩ toogo. D tẽed-n-taag minimdu, b sẽn wub-a to-to wã, a bãngr wall a tarem tõe n kɩtame t’a yaa toor ne-do. D tõe n getame tɩ yaa toog tɩ d wʋm saam-biis kẽer tagsg wall b yel-manesem võore. La sã n yaa woto bɩ d ra yĩm tɩ bãmb me tõeeme n pa wʋmd tõnd ye. Sẽn yaa a soab fãa, Wẽnnaam sagla tõnd tɩ d “nong d ba-biisã” fãa.—1 Pɩɛ. 2:17.
13. Tõe n wa yɩɩ tɩlae tɩ d maan toeem-bʋse?
13 Tõe n wa yɩɩ tɩlae tɩ d toeem d sẽn get d saam-biisã to-to wã n tõog n nong b fãa. B yeta 2 Korẽnt dãmb 6:12, 13, Sebr Sõng pʋgẽ wã woto: “D sũurẽ wã, weer be y yĩnga, yaa y meng sũurẽ la weer paoogda. Lebs-y tõnd d yel-sõmde; m gomda ne yãmb wala m kamba, m kot-y lame tɩ y pak y sũura yalengo.” Daar ninga, d wa n yeela woto: “Mam pa kis bu-zẽng ned ye, la . . . ” D “la” wã poore, d wɩda buud a ye neb yel-manesem bɩ b zʋg d sẽn pa nonge. La d sã n zoe n maana woto, tõe n wilgdame tɩ d segd n mao n basa tagsa kẽer sẽn kɩt tɩ d ket n yaa bu-wɛls n pa miẽ ye. Sẽn na yɩl n bãng rẽ, d tõe n soka d meng woto: “Rẽ yĩnga mam maooda n na n bãnga buud a taab neb bɩ?” D sã n fees d mens woto, tõe n sõng-d lame tɩ d rems d tagsgã, n tõog n nong d saam-biisã sẽn yit dũniyã ween-vɩɩs a naasã.
14, 15. a) Ãnd dãmb n toeem b sẽn da get b taabã to-to wã? b) Wãn to la d tõe n dɩk b mak-sõngã?
14 Biiblã tara kibay sẽn wilgd neb kẽer sẽn sak n toeem yam. Tʋm-tʋmd a Pɩɛɛr bee nin-kãens sẽn kõ-d mak-sõngã sʋka. A sẽn yaa Zʋɩfã, a ra pa segd n kẽ bu-zẽng ned zakẽ ye. Woto yĩnga, ges-y-yã a tagsg sẽn yɩ to-to, Wẽnnaam sẽn wa tʋm-a t’a tɩ kaag a Korney sẽn yaa bu-zẽng ned n pa kẽ bãongã! A Pɩɛɛr sẽn bãng tɩ Wẽnnaam datame tɩ buud toɛy-toɛyã fãa neb lebg kiris-nebã, a sak n toeema yam. (Tʋʋ. 10:9-35) A Soll sẽn wa n lebg tʋm-tʋmd a Pollã me ra segd n mao n basa bu-welsgo. A sak n deegame t’a ra kisa kiris-nebã hali n ‘da namsd Wẽnnaam tẽedbã wʋsg-wʋsg’ n sãamd-ba. La Zusoab a Zezi sẽn sagl a Pollã tɛka, a maoome n toeeme, hal n sakd n tũud neb a sẽn da nams meng saglse.—Gal. 1:13-20.
15 Yaa vẽeneg tɩ d sã n paam t’a Zeova sõng-d ne a vʋʋsem sõngã, d tõe n toeema d sẽn get d taabã to-to. D sã n mik tɩ d ket n kisa bu-zẽng baa yaa bilfu, d segd n modg n toeemame la d “mao tɩ fãa sak sɩɩg sõng ratem tɩ laafɩ zĩndi.” (Ef. 4:3-6) Biiblã sagenda d fãa tɩ d modg n nong taaba, bala ‘nonglem yaa bũmb fãa loɛtg sɩd-sɩda.’—Kol. 3:14.
D rɩkd a Zeova mak-sõngã d koe-moonegã pʋgẽ
16. Bõe la Wẽnnaam dat ne nebã fãa?
16 Tʋm-tʋmd a Poll gʋls n wilgame tɩ “Wẽnnaam ka tũusd neb ye.” (Rom 2:11) A Zeova sɩd ratame tɩ buud toɛy-toɛy neb naag tõnd n maan a raabã. (Karm-y 1 Tɩmote 2:3, 4.) Rẽ n so t’a rɩk segls sẽn na yɩl tɩ b moon “koe-noog sẽn ka sɛtã” “neb nins sẽn be dũniyã soolem fãa la buud fãa” pʋsẽ n gomd buud-goam toɛ-toɛyã. (Wil. 14:6) A Zezi yeelame tɩ “pʋʋgã yaa dũniyã.” (Mat. 13:38) Woto rat n yeelame tɩ bõe ne yãmb la y zaka neba?
17. Wãn-wãn la d tõe n sõng nebã buud fãa?
17 Pa d fãa n tõe n kẽng tẽn-zẽms n tɩ moon Rĩungã koɛɛg ye. La d tõe n taas-a-la tẽn-zẽms neb sẽn be tõnd moonegã zĩigẽ. D tõe n maoodame n kõt kasetã nebã buud fãa d sẽn segdã, la d ra tek d sẽn moond-b rãmb hal sẽn na maan yʋʋmã ye. D pʋd n tõe n modgdame n kõt kasetã neb nins sẽn nan pa wʋm koɛɛgã tɩ sekã.—Rom 15:20, 21.
18. Koe-moonegã pʋgẽ, bõe la a Zezi maan n wilg t’a tʋll n sõnga neba?
18 A Zezi ra tʋlla ne a sũur fãa n sõng nebã gilli. Rẽ n so t’a pa moon koɛɛgã zĩ-yend ye. Biiblã kibar a ye yeelame t’a “saaga tẽn-kãsems ne tẽn-bõoneg fãa,” la t’a ‘sẽn yã kʋʋngã, b nimbãaneg yõk-a-lame’ t’a tʋlg n sõng-ba.—Mat. 9:35-37.
19, 20. Wãn-wãn la d tõe n dɩk a Zeova ne a Zezi mak-sõngã n wilg tɩ d sɩd tʋll n sõnga ned buud fãa?
19 Rẽ wɛɛngẽ, wãn-wãn la y tõe n dɩk a Zezi mak-sõngã? Kẽer yãka yam n na n moond b moonegã zĩis nins b sẽn pa wae n moondẽ wã. Wala koosmã zĩisẽ, park rãmbã pʋs la gaar dãmbẽ wã, wall zags nins sẽn pag tɩ b kõom pa nana wã. Sãnda me maoome n zãms buud gom-zẽms n na n moond bu-kãens neb sẽn nan wa b moonegã zĩisẽ bɩ neb nins b sẽn pa wae n taasd-b koɛɛgã. D sã n bao n bãng b sẽn pʋʋsd taab to-to ne b buudã gomdã menga, b na n bãngame tɩ d sɩd rata b neere. D sã n pa tõe n zãms buud gom-zẽng me bɩ d pẽg sẽn tõe-bã sõma. Vẽenega, d pa segd n wɩd sẽn zãmsd-b buud-goam a taab n na n paam n moon tẽn-zẽms nebã, wall d koms b raood ye. Wẽnnaam datame tɩ neb buud fãa paam fãagrã, tɩ tõnd me segd n dɩk a mak-sõngã.—Kol. 3:10, 11.
20 Ges nebã wa Wẽnnaam sẽn get-b to-to wã baoodame me tɩ d taas nebã fãa koɛɛgã baa b yɛlã sẽn yaa to-to. Wala makre, sãnda tõeeme n pa tar zagse, pa rẽ bɩ b tar vɩɩm manesem sẽn pa zems ne Wẽnnaam noyã, wall b yaa rẽgdo. Baa buud kẽer neb sã n pa sakd n kelgd-do, d pa segd n kisg b buudã wall b tẽngã neb n pa kõt-b kasetã ye. Neb kẽer namsa a Poll wʋsgo, la pa kɩt t’a pa moon b buudã neb koe-noogã ye. (Tʋʋ. 14:5-7, 19-22) A kell n tẽeme tɩ b sʋkã, sãnda n na n deeg koɛɛgã.
21. Y sã n get y taabã wa a Zeova sẽn get-b to-to wã, wãn to la na n naf-yã?
21 Masã, d bãnga vẽeneg tɩ segdame tɩ d get d saam-biisã d tigimsã pʋsẽ la dũniyã gill zugã n paas neb nins d sẽn moond koɛɛgã wa a Zeova sẽn get-b to-to wã. D sã n modgd n maand woto, na n kɩtame tɩ laafɩ la zems-n-taar zindi, la d na n tõog n sõnga nebã tɩ b nong a Zeova sẽn yaa Wẽnnaam sẽn pa ‘get nanambs n yɩɩd talse, la a pa get arzɛgs rãmb n yɩɩd naong rãmbã.’ A nonga nebã fãa, bala yaa yẽ “n naan-b fãa.”—Zoob 34:19.
Wãn to la y na n leoke?
• Tags-kɛg bʋs la d pa segd n tall d saam-biisã zutu?
• Wãn to la d tõe n wilg tɩ d geta d saam-biisã wa a Zeova sẽn get-b to-to wã?
• Sagls bʋs la d paam d sẽn segd n ges d saam-biisã to-to wã wɛɛngẽ?
• Koe-moonegã pʋgẽ, wãn to la d tõe n wilg tɩ d geta nebã wa a Zeova sẽn get-b to-to wã?
[Zãmsgã sogsgã]
[Foto rãmba, seb-neng 30]
Wãn to la y tõe n taas koɛɛgã neb wʋsgo?