Yɩ-y wʋmdba, sakdba, la sũ-bʋgsem dãmba

“Tẽeg bãmb tɩ b . . . maand sũ-bʋgsem ne nebã fãa.”—TƖT 3:1, 2.

1, 2. Bõe la Gʋlsg Sõamyã yet sũ-bʋgsmã wɛɛngẽ, la bõe yĩng tɩ rẽ zemse?

TÕND saasẽ Ba a Zeova sẽn nong-dã yaa yam sẽn ka to soaba. Sẽn yaa yẽ la d naandã yĩnga, d teeg-a lame t’a wilgd tõnd sẽn segd wakat fãa. (Yɩɩl 48:15) Kirist karen-biig a Zak wilgame tɩ “yam ninga sẽn yit yĩngra reng n yaa sõma, la a yaool n bee laafɩ la sũ-bʋgsem n sakd nana, la a pida ne nimbãan-zoeer la sõmblem biisi, a ka be kãnegr ye, la a ka be zãmbg ye.” *—Zak 3:17.

² Tʋm-tʋmd a Poll sagl-d-la woto: “Kɩt-y tɩ neba fãa bãng yamb sũ-bʋgsmã.” (Fil. 4:5, Kãab-paalgã Koe-noogo) Yaa Kirist Zezi la tigingã Zusoab bɩ a taoor-lʋɩta. (Ef. 5:23) Woto yĩnga, ad sɩd tara yõod wʋsg tɩ tõnd ned kam fãa sakd Kirist zu-sobendã la d yɩ wʋmdba, n mi n bas d sẽn datã n tũ d taabã raabo!

3, 4. a) Rɩk-y makr n wilg nafa ning d sẽn paamde, d sã n yaa wʋmdb la sakdba. b) Bõe yell la d na n gome?

³ D sã n yaa sũ-bʋgsem dãmb la wʋmdba, n mi n sakd n tũud d taabã raabo, na n naf-d-la wʋsgo. D na n dɩka makr n wilg rẽ. Gãrãndbertayn tẽngã, b ra wa n yõga teerorist rãmb sẽn da rat n pusg sɩlga. Rẽ poore, sẽn na yɩl n kogl nin-buiidã, b yiisa noy n wilg teed kẽer neb nins sẽn dɩkd sɩlgã sẽn pa tog n le zã n kẽ sɩlgã pʋgẽ. La so-toagdbã fãa la bal saka no-kãens nana-nana. Ad makr a to: D sã n kẽnd tẽngã pʋgẽ ne mobill wall weefo, baa d sẽn yãgd to-to, soayã bug-rãmbã sã n widg miuugu, d sakdame n yals tɩ sẽn tog n loog-bã looge. D sã n pa sak n yalse, tõe n tũu ne d yõore.

⁴ Yɩ sũ-bʋgsem soab la sakd pa nana ye. La d sã n tags bũmb ninga sẽn kɩtd tɩ ned yɩ wʋmda, sũ-bʋgsem soab la sakdã zug neere, la d tags tõnd mensã sẽn sakd d zu-soben dãmbã to-to wã me zugu, na n naf-d lame. Sẽn paase, d sã n bãng tall zʋg-sõma kãensã sẽn pa rat n yɛɛlgã me, na n sõng-d lame.

Bõe yĩng tɩ d yaa wʋmdb la sakdba?

5. A Moiiz Tõogã tũub wakate, bõe n da tõe n kɩt tɩ yamb yãk yam n pa a zu-soab nugẽ?

⁵ Makr a ye sẽn zĩnd a Moiiz Tõogã tũub wakat n wilgd bũmb ning sẽn tõe n kɩt tɩ ned bʋk a meng n sak a to wã. Wakat kãnga, Israɛll ned sã n da lebg a to yamba, yʋʋm a yopoe loogr poore, pa rẽ bɩ kɩdeng yʋʋmdã sã n ta, b ra segd n bas-a lame. La yamb da tõe n yãka yam n kell n pa a zu-soabã nugẽ. (Karm-y Yikr 21:5, 6.) Bõe n da tõe n kɩt tɩ yamb sak n maan woto? Yaa nonglem.

6. Bõe yĩng tɩ d yetẽ tɩ yaa nonglem n tõe n kɩt tɩ ned bʋk a meng n sak a to?

⁶ Yaa tõnd me sẽn nong a Zeova wã yĩng la d sẽn dɩk d mens n kõ-a, n maand a raabã. (Rom 14:7, 8) Tʋm-tʋmd a Zã yeela woto: “Wẽnnaam nonglem yaa tɩ tõnd sak bãmb tõogo. La bãmb tõog ka toog ye.” (1 Zã 5:3) Sẽn tar-a nonglem kãngã ka baood a meng nafr bal ye. (1 Kor. 13:4, 5) D sã n nong d taabã, na n kɩtame tɩ d bʋkd d mens n lʋɩɩsd b raabã taoore. Wall tɩ yaa d mensã yell bal n pak-dã, d na n geta d taabã me yelle.—Fil. 2:2, 3.

7. D sã n yaa wʋmdba, wãn to la rẽ na n sõng-d koe-moonegã pʋgẽ?

⁷ D pa segd ne d no-goam bɩ ne d tʋʋm n kɩt tɩ ned pa sak n kelg koe-noogã ye. (Ef. 4:29) D sã n sɩd nong nebã, d na n maoome tɩ baa ne  rog-n-migsã la minimdã sẽn yaa toɛy-toɛyã bɩ d ra wa yɩ sabab tɩ ned tõdg koɛɛgã ye. Naoor wʋsgo, yɩl n tõog n da maan woto, rẽndame tɩ d yɩ wʋmdba. Makre, misioneer pogs sã n mikame tɩ b sẽn da minim n yeelgd fut kẽer b tẽnsẽ wã wall b sõod b nensã teed ninsã tõe n kɩtame tɩ neb tẽ tɩ b yaa yoaadba, n pa rat n kelg b koɛɛgã, b na n sak n basa woto maanego.—1 Kor. 10:31-33.

8. D sã n nong Wẽnnaam, wãn to la sõngd-d tɩ d sik d mens wa bi-bilfu?

⁸ Tõnd sẽn nong a Zeova wã yĩng kɩtame tɩ d kis zẽk-m-menga. Daar a yembre, a Zezi karen-biisã ra wa n wẽeda taab no-koeemd n dat n bãng ned ninga sẽn yaa kãseng b sʋka. La a Zezi talla bi-bilf n wa yals b sʋkã n yeel-b woto: “Ned sã n deeg bi-kãnga mam yĩnga, a reegda maam. La sẽn deeg-a maam, a reegda sẽn tʋm-a maamã. Tɩ bõe, ned ninga sẽn yaa bilf yãmb fãa sʋka, yaa yẽ n yaa kãsenga.” (Luk 9:48; Mark 9:36) Tõe n yɩɩ toog ne tõnd ned kam fãa t’a sik a meng wa bi-bilfu. Bala, d sẽn dog ne yel-wẽndã la d sẽn nong n dat n zẽk d mengã yĩnga, d tõe n mi n wa ratame tɩ b yet tɩ tõnd n yɩɩd d taabã. La sik-m-mengã na n sõngd-d lame tɩ d ra maand woto ye.—Rom 12:10.

9. D sã n yaa sakda, bõe la d segd n maandẽ?

⁹ D sã n yaa sakda, d segd n sakda neb nins Wẽnnaam sẽn lʋɩɩs tõnd taoorã. Kiris-neb hakɩkã tũuda noor ning Wẽnnaam sẽn gãneg zu-sobendã wɛɛngẽ wã. Tʋm-tʋmd a Poll wilga no-kãng Korẽnt kiris-nebã vẽeneg n yeel-b woto: “Mam datame tɩ yãmb bãng tɩ Kirist yaa ned kam fãa zugu, la tɩ pag zug ya a sɩda, la tɩ Kirist zug yaa Wẽnnaam.”—1 Kor. 11:3.

10. D sã n sakd a Zeova zu-sobendã, wilgda bõe?

¹⁰ D sã n sakd Wẽnnaam sẽn nong-dã zu-sobendo, d wilgdame tɩ d kɩs-a-la sɩda, la tɩ d teeg-a lame. A mii yɛl nins fãa sẽn paamd tõndã, la a na n keo-d lame. D sã n ningd rẽ d yamẽ wakat fãa, ned sã n wa paoog-d wall a yik a sũur ne-do, d na n tõog n bʋka d meng ne a soaba. Tʋm-tʋmd a Poll sagl-d-la woto: “Bɩ y maan yãmb sẽn tõe tɛka, t’a sã n tõe, bɩ laafɩ zĩnd yãmb ne neba fãa sʋka.” La a paase: “Da tug-y beem ye. Bas-y taale; tɩ bõe, a gʋlsame: ‘Zusoaba yetame yaa: Sũ-dokr yaa maam n so, la mam na keo.’ ”—Rom. 12:18, 19.

11. Wãn to la d tõe n wilg tɩ d sakda Kirist zu-sobendã?

¹¹ Kiris-nebã segd n saka neb nins Wẽnnaam sẽn lʋɩɩs b taoor tigimsã pʋsẽ wã me. Wilgr sebrã pipi sakã pʋgẽ, b bilgda Kirist Zezi sẽn zãad tigimsã “ãds” ne a nug-rɩtgo. (Wil. 1:16, 20) D tõe n yeelame tɩ ãd-kãens makda tigimsã kãsem dãmb bɩ b yel-gɛtbã sulli. Kãsem dãmb kãens b sẽn yãkã sulgda b mens n sakd Kiristã zu-sobendo, la b rɩkd a togs-n-taar n wilgd b manesmã ne b tẽed-n-taasã pʋgẽ tɩ b bʋgsame. Tigimsã neb fãa sulgda b mens n sakd nin-kãensã a Zezi sẽn kɩt tɩ “tʋm-tʋmd sẽn tũud sɩd la sẽn tar yamã” yãke, n tũnugd ne-b n dɩlgd a nebã wakat sẽn zemsã. (Mat. 24:45-47) Tõnd ned kam fãa sã n sakd n karemd seb nins  b sẽn yiisdã la a tũud saglsã, a wilgdame t’a sakda Kirist zu-sobendã. Yaa rẽ n kɩt tɩ d ket n gãd taab nusi, tɩ laafɩ be d sʋkã.—Rom 14:13, 19.

Yaa wakat fãa la d segd n sak bɩ?

12. Bõe yĩng tɩ pa wakat fãa la d segd n yɩ sakdba?

¹² Yɩ wʋmda, sakd la sũ-bʋgsem soabã pa rat n yeel tɩ d sakd n maand yɛl d tẽebã sẽn gɩdg ye. Pipi kiris-nebã wakate, Zʋɩf rãmbã tũudum taoor dãmb sẽn da wa n zab-b tɩ b ra le gom la b zãms nebã ne a Zezi yʋʋrã, b manesem yɩɩ wãna? Ne raoodo, a Pɩɛɛr ne tʋm-tʋmdb a taabã yeela woto: “Zemsame tɩ tõnd sak Wẽnnaam n yɩɩd nebã.” (Tʋʋ. 4:18-20; 5:28, 29) Rũndã-rũndã me, goosneem taoor dãmb sã n yiis noy n na n modgd tõnd tɩ d bas koe-noogã moonego, d pa sakd ye. D toeemda d sẽn moond to-to wã n ket n tʋmd d tʋʋmdã ne yam. Makre, b sã n wa gɩdg tɩ d ra ye moon zak-zakã, d baooda soay a taab sẽn na yɩl n ket n paamd n sõsd ne nebã, n tõog n kell n tʋm d tʋʋmdã Wẽnnaam sẽn bobl-dã. “Nanambsã” bɩ pãn-soaadbã sã n wa gɩdg d tigissã me, d maanda sul-bõoneg n ket n tigimd taab tɩ b ka miẽ ye.—Rom 13:1; Heb. 10:24, 25.

13. Zu-soben-dãmbã sakr wɛɛngẽ, bõe la a Zezi yeel-yã?

¹³ A Zezi sẽn da sõs tãngã zug ne kʋʋngã, a sagl-b lame tɩ b segd n saka b zu-soben-dãmbã. Baraare, a yeela woto: “Ned sã n bool foom bʋʋd zĩigẽ n deeg fo fu-bila, bɩ f sak t’a reeg fo fu-kãsenga me. Ned sã n modg foom tɩ f yãag-a kɩlo a ye, bɩ f yãag-a kɩlo a yiibu.” (Mat. 5:40, 41) * Woto yĩnga, tõnd sẽn tagsd nebã yell la d tʋll n sõng-bã yĩng kɩtame tɩ d modgd n sõngd-b tɩ yɩɩgd b sẽn kot-dã.—1 Kor. 13:5; Tɩt 3:1, 2.

14. Bõe yĩng tɩ d pa segd n sak sɩdã kɩɩsdb goama?

¹⁴ Yɩ sakdã pa rat n yeel baa bilf me tɩ d sak sɩdã kɩɩsdb goam ye. D segd n tõdga nin-kãensã ne d sũy fãa n da tol n deeg b goamã, tɩ b ra wa tudg-d la b sãam tigingã neb ne taab zems-n-taarã ye. Tʋm-tʋmd a Poll da goma “zãmb ba-biisã” yell n yeel woto: “Tõnd ka sak bãmb baa bilf ye, tõnd kɩɩsa bãmba, tɩ koe-nooga sẽn yaa sɩda tõe n pa yãmb sʋka.” (Gal. 2:4, 5) Ned sã n wa yik tigingã pʋgẽ n kɩɩsd sɩdã, kiris-neb nins sẽn nong Wẽndã pa na n tol n sak a goamã ye.

Yel-gɛtbã segd n yɩɩ wʋmdba, sakdb la sũ-bʋgsem dãmba

15. Kãsem dãmbã sã n wa tigim taaba, wãn-wãn la b tõe n wilg tɩ b yaa sũ-bʋgsem dãmba?

¹⁵ Zʋg-sõma nins b sẽn baood tɩ yel-gɛt tallã sʋka, sakrã la sũ-bʋgsmã naagame. Tʋm-tʋmd a Poll yeelame tɩ “karen-saamb tog . . . n yɩɩ sũ-bʋgsem soaba.” (1 Tɩm. 3:2, 3) Sũ-bʋgsem tallg yaa tɩlae ne tigingã kãsem dãmba. Sẽn yɩɩd fãa, b sẽn wat n tigim taab n na n welg yellã. Nand tɩ b rɩk noore, b ned kam fãa tara sor n na n wilg a tagsgo. La pa tɩlae tɩ kãsem soab fãa gom ye. Wala makre, b sã n wa yẽsd yell zugu, nina tõe n da tara a tagsgo, la a sã n kelg a taabã tɩ b wilg Biiblã noor b sẽn segd n tũ t’a mik zemsame, a tõe n basa a rẽndã tɩ lʋɩ. Kãsem soab tẽeb sẽn bɩ pa baood tɩ b tũ a raabã tɩlae ye. Yaa sɩd tɩ b tigisg sɩngrẽ, b ned kam fãa tagsg tõe n yɩɩ toor ne a to rẽnda. La kãsem dãmbã sẽn yaa sik-m-mens rãmb la sũ-bʋgsem dãmbã yĩnga, b sã n tags neer la b pʋʋse, na n sõng-b lame tɩ b zems taab noor a yembre.—1 Kor. 1:10; Karm-y Efɛɛz rãmb 4:1-3.

16. Bõe la kãsem soab segd n modgd n maandẽ?

¹⁶ Kãsem soab segd n modgd n wilgdame t’a tũuda noy nins Wẽnnaam sẽn gãneg zu-sobendã wɛɛngẽ wã. A pʋd n segd n tũuda no-kãens n get Wẽnnaam piisã yelle. Rẽ na n sõng-a lame t’a bʋkd a meng ne nebã la a waoogd-ba. Tʋm-tʋmd a Pɩɛɛr yeela woto: “Bɩ y rɩlg Wẽnnaam piisa sẽn be yãmb nusẽ wã, ka modgr yĩng ye, la yaa ne yamleoogo, sẽn zems Wẽnnaam yam, ka ligd yĩng ye, la yaa nonglem yĩnga.”—1 Pɩɛ. 5:2.

17. Wãn to la tigingã nebã fãa tõe n wilg b manesmã ne taab pʋgẽ tɩ b yaa sũ-bʋgsem dãmba?

 ¹⁷ Sẽn kʋʋl-bã sũy nooma wʋsgo, tigingã neb nins yʋʋm sẽn pa ta-bã sẽn sõngd-bã yĩnga, tɩ kɩt tɩ b waoogd-ba. Woto kɩtame tɩ kom-bɩɩsã me waoogd sẽn kʋʋl-bã b sẽn sɩng n tũud a Zeova hal daar zãrã. (1 Tɩm. 5:1, 2) Kãsem dãmbã baooda rap sẽn tar zʋg-sõma n na n bobl tʋʋm kẽere, la b wilg-b b sẽn tõe n maan n sõng-b n ges Wẽnnaam nebã yelle. (2 Tɩm. 2:1, 2) Kiris-ned fãa segd n tũu a Poll saglg ning sẽn pʋgdã. A yeela woto: “Bɩ y sak yãmb taoor dãmba la y reeg bãmb goama, tɩ bõe, bãmb gũuda yãmb sɩɩse, bãmb sẽn na n wilg yɛla fãa Wẽnnaam taoora yĩnga. Bɩ a yɩ woto tɩ b maan ne sũ-noogo la ka ne sũ-sãoong sẽn ka na n yɩ yãmb nafr ye.”—Heb. 13:17.

D yɩ wʋmdb la sakdb d zagsã pʋsẽ

18. Bõe yĩng tɩ d segd n yɩ wʋmdb la sakdb d zagsã pʋsẽ?

¹⁸ D zagsã pʋsẽ me, d segd n yɩɩ wʋmdb la sakdba. (Karm-y Kolos rãmb 3:18-21.) Biiblã wilga kiris-neb zak ned fãa sẽn segd n maan to-to tɩ laafɩ zĩnd b zakã pʋgẽ. Yaa ba wã la pagã zu-soaba. Kambã wubr wɛɛngẽ, leb n yaa ba wã n lʋɩt taoore. Pagã segd n saka a sɩdã, tɩ kambã me segd n sak b ba wã ne b ma wã, bala woto tata Wẽnnaam yam. Zakã ned fãa sã n yaa sũ-bʋgsem soab la sakd wa sẽn segdã, sõngdame tɩ laafɩ la zems-n-taar zĩnd zakã pʋgẽ. Biiblã tara kibay kẽer sẽn sɩd wilgd rẽ.

19, 20. a) Welg-bʋg n be a Zeova sẽn maan to-to ne a malɛkã la a Eli sẽn maan ne a kambã sʋka? b) Kiba-kãngã kõta roagdbã sagl-bʋse?

¹⁹ Israɛlle, a Sãmwɛll sẽn da wa n nan yaa biiga, a Eli n da yaa maan-kʋʋdbã kãsma. La a Eli kom-dibli a Hofni ne a Fineyas ra yaa “kom-yoodo.” B ra ‘ka nand a Zeova’ ye. A Eli wa n wʋmame tɩ b tʋʋmã pa sõma ye. B ra wa n yeel-a lame meng t’a kambã gãeyã pagb nins sẽn tʋmd sɛk-roogã noorã. A Eli maana wãna? A yeel-b lame bal tɩ ned sã n beeg a Zeova, sɛ-yõkd kae ye. La a pa zab kambã la a sɩbg-b ye. Woto kɩtame tɩ b pa kelg b ba wã koɛɛga, n da ket n tʋmd b tʋʋm-wẽnsã. La a Zeova wa n gesame tɩ b segda ne kũum. A Eli sẽn wa n wʋm t’a kambã kiime wã, yẽ me kiime. Ad baas wẽng tek woto! Yaa vẽeneg t’a Eli kambã tʋʋm sẽn da pa sõma wã, a ra pa segd n bʋk a sũur ne-b ye. Bala a sẽn maan woto wã, kambã kell n maan wẽnga.—1 Sãm. 2:12-17, 22-25, 34, 35; 4:17, 18.

²⁰ Masã bɩ d ges a Zeova sẽn tall manesem ning ne a malɛkã tɩ yaa toor fasɩ ne a Eli nengẽ wã. A Zeova ra vẽenega no-rɛɛs a Miise t’a yã a sẽn tigim a malɛgsã n yẽsd ne-ba. Baraare, a sok-b lame n ges malɛk bʋg n tõe n tɩ belg Israɛll rĩm a Akaab n kʋʋg a naamã. A Zeova basame tɩ b wʋsg wilg b tagsgo. La malɛk a ye n wa n yeel tɩ yẽ tõeeme, t’a sok-a a sẽn na n maan to-to. A sẽn wilgã taa a Zeova yam, t’a tʋm-a t’a kẽng n tɩ maan woto. (1 Rĩm 22:19-23) Vẽenega, kiba-kãngã wilgda tõnd zak neb sẽn tõe n wʋm taab n welg yell to-to. Wala makre, zak soab sã n wa rat n maan bũmbu, a segd n bao n bãnga a pagã ne a kambã tagsgo. La baa pagã ne kambã sã n wilg b raabo, baasg zãnga, b segd n sak n tũu bũmb ning ba wã sẽn na n yeelã, bala Wẽnnaam sebrã yeelame tɩ yẽ la zakã zu-soaba.

21. Sõsg ning sẽn pʋgdã pʋgẽ, bõe la d na n wilgi?

²¹ Ad d sũy yaa noog wʋsg a Zeova sẽn nong-do, n tẽegd-d wakat fãa tɩ d segd n yɩɩ sũ-bʋgsem dãmba, wʋmdb la sakdbã. (Yɩɩl 119:99) D sõsg ning sẽn pʋgdã na n wilga zʋg-sõma kãensã tallg sẽn tõe n kɩt tɩ sũ-noog zĩnd kãadmã pʋgẽ to-to.

[Tẽngr not rãmbã]

Y na n leokame tɩ bõe?

• D sã n yaa sũ-bʋgsem dãmba, wʋmdb la sakdba, nafa bʋs la d tõe n paame?

• Wãn to la yel-gɛtbã tõe n wilg tɩ b yaa sakdb la sũ-bʋgsem dãmba?

• Bõe yĩng tɩ d segd n yɩ wʋmdb la sakdb d zagsã pʋsẽ?

[Zãmsgã sogsgã]

[Foto, seb-neng 12]

Kãsem dãmbã rɩkda Kiristã togs-n-taar n nong nebã