D bao Wẽnnaam sor-wilgr wakat fãa
D bao Wẽnnaam sor-wilgr wakat fãa
“Bãmb yaa Wẽnnaam. Bãmb yaa tõnd Wẽnnaam wakat sẽn ka sɛta. Bãmb na n tɛɛ tõnd hal tɩ ta d kũum.”—YƖƖL 48:15.
1, 2. Bõe yĩng tɩ d segd n tũ a Zeova sor-wilgrã la d ra teeg d meng bãngre, la sogs-bʋs la d na n leok sõs-kãngã pʋgẽ?
YƐL nins sẽn pa tar yõodã tõe n tudga tõnd nana-nana, tɩ d wa tagsdẽ tɩ b tara yõodo. (Yel. 12:11) Tõnd sã n wa rat ne d sũur fãa n maan bũmb kiris-ned sẽn pa segd n maane, tõnd sũurã nong n kõt-d-la bʋʋm tɩ d maane. (Zer. 17:5, 9) Yaa rẽ n so tɩ yɩɩl-gʋlsdã bãng yam n pʋʋs a Zeova n yeel woto: “Bɩ y tʋm y vẽenemã ne y sɩdã tɩ b wa yãag maam.” (Yɩɩl 43:3) A teega a Zeova sẽn kõt sor-wilgr sẽn ka to wã. A pa teeg a meng bãngrã sẽn tar koakã ye. Wala yɩɩl-gʋlsdã, tõnd me segd n baoa sor-wilgr Wẽnnaam nengẽ.
2 La bõe yĩng tɩ d segd n kɩs sɩd ne a Zeova sor-wilgrã n yɩɩd sor-wilgr buud fãa? Wakat bʋg la d segd n bao a Zeova sor-wilgrã? Manesem bʋg la d segd n tall sẽn na yɩl n paam a Zeova sor-wilgrã, la wãn to la a Zeova wilgd tõnd sor rũndã-rũndã? D na n bãnga sogs-kãensã sẽn tar yõodã leoor sõs-kãngã pʋgẽ.
Bõe yĩng tɩ d segd n kɩs sɩd ne a Zeova sor-wilgrã?
3-5. Bõe yĩng tɩ d tõe n kɩs sɩd zãng-zãng ne a Zeova sor-wilgrã?
3 A Zeova yaa tõnd Ba. (1 Kor. 8:6) A mii tõnd ned kam fãa hal sõma, la a tõe n bãnga sẽn be tõnd sũyã pʋsẽ me. (1 Sãm. 16:7; Yel. 21:2) Rĩm a Davɩɩd yeela Wẽnnaam woto: “Yãmb mii wakat ninga mam sẽn zĩndeda, la wakat ninga mam sẽn yikda, yãmb bãnga mam tagsgã yɩɩga. Goam sẽn nan ka ta mam zɩlemdẽ, Zusoaba, gese, yãmb deng n bãng-a-la zãnga.” (Yɩɩl 139:2, 4) Sẽn mik t’a Zeova mii tõnd hal sõma wã, d pa segd n tags t’a pa mi bũmb ning sẽn tõe n maneg tõnd n yɩɩdã ye. Sẽn paase, a Zeova yamã pa tar koak ye. A nee bũmba fãa, la a nee ninsaalbã sẽn pa tõe n yã. Yell sã n sɩnge, a tõe n bãnga a sẽn na n baas to-to. (Ezai 46:9-11; Rom 11:33) A yaa “Wẽnnaam sẽn yaa yam soaba.”—Rom 16:27.
4 Sẽn paase, a Zeova nonga tõndo, la a rata tõnd neer wakat fãa. (Zã 3:16; 1 Zã 4:8) A sẽn nong tõndã yĩnga, a kõt-d-la bõn-sõma wʋsg tɩ sekdẽ. Karen-biig a Zak gʋlsa woto: “Bark sõma fãa la kũun sõma fãa yita yĩngr vẽenem Ba nengẽ n sigda.” (Zak 1:17) Neb nins sẽn sakd Wẽnnaam sor-wilgrã paamda bõn-sõma wʋsg a nengẽ.
5 A Zeova leb n yaa pãng sẽn ka to soaba. Rẽ wɛɛngẽ, yɩɩl-gʋlsdã yeela woto: “Ned ning fãa sẽn zĩ Sẽn-ka-to wã zĩ-soalgdgã pʋgẽ paada Sẽn-tõeyã-fãa wã maasmẽ. Mam yeta Zusoabã yaa: ‘Yãmb yaa mam zĩ-lilldg la mam pãng zĩiga, la mam Wẽnnaam mam sẽn dellda.’ ” (Yɩɩl 91:1, 2) D sã n tũ a Zeova sor-wilgrã, d sũur pa na n tol n sãam ye. Bala a Zeova yaa Wẽnnaam sẽn pa na n bas-d abada. Baa bɛɛbã sã n wa namsd tõndo, a Zeova na n kell n sõnga tõndo. A pa na n bas-d ye. (Yɩɩl 71:4, 5; Karm-y Yelbũna 3:19-26.) Vẽenega, a Zeova mii bũmb ning sẽn yaa sõma ne tõnd n yɩɩda, la a rat tõnd neere. A tara tõog me n na n kõ-d bũmb ning sẽn yaa sõma n yɩɩdã. Tõnd sã n zãgs a sor-wilgrã, yaa yalemd menga! La wakat bʋg la d segd n bao a Zeova sor-wilgrã?
Wakat bʋg la d segd n bao a Zeova sor-wilgrã?
6, 7. Wakat bʋg la d segd n bao a Zeova sor-wilgrã?
6 Sẽn sɩng tõnd yãadmẽ n tãag d kʋʋlem wakate, d rata Wẽnnaam sor-wilgrã. Yɩɩl-gʋlsdã yeela woto: “Bãmb yaa Wẽnnaam. Bãmb yaa tõnd Wẽnnaam wakat sẽn ka sɛta. Bãmb na n tɛɛ tõnd hal tɩ ta d kũum.” (Yɩɩl 48:15) Wala yɩɩl-gʋlsdã, kiris-neb nins sẽn tar yamã baooda Wẽnnaam sor-wilgr wakat fãa.
7 Wakat ninga, bũmb n tõe n maan tɩ d rat sõngr tao-tao. Bɛɛbã sã n namsd tõndo, bã-kɛgeng bɩ d tʋʋm sẽn tiig n sãam walla bũmb a to tõe n kɩtame tɩ d wa be “toog” pʋgẽ. (Yɩɩl 69:17, 18) Wakat kãngã, yaa sõma tɩ d teeg a Zeova, n miẽ t’a na n kõ-d-la pãng tɩ d tõog toogã, la t’a na n wilg-d-la sor tɩ d tõog n bãng d sẽn segd n maan bũmb ninga. (Karm-y Yɩɩl Sõamyã 102:18.) D leb n baooda a Zeova sor-wilgr sasa a taab me. Wala makre, tõnd sã n wa rat n moon d yagsã Rĩungã koe-noogo, d segd n baoa a Zeova sor-wilgr n tõog n moon tɩ wom biisi. La d sã n wa rat n bãng n yãk reem sẽn yaa sõma, fuug sẽn zemse, tũud-n-taase, tʋʋma, kareng la yɛl a taaba, d sã n tũ a Zeova noyã, d wilgdame tɩ d tara yam. Dẽnd tõnd sẽn maand bũmb ninsã fãa pʋgẽ, d baooda sor-wilgri.
Yɛl nins sẽn paamd neda, a sã n zãgs Wẽnnaam sor-wilgrã
8. A Hawa sẽn kɩɩs n dɩ tɩɩgã bilã wilga bõe?
8 La yaa d bãng tɩ tõnd mengã n segd n sak n tũ a Zeova sor-wilgrã. Tõnd sã n pa rat n tũ, a pa na n modg-d ye. Ned ning sẽn yɩ-a pipi n zãgs a Zeova sor-wilgrã yaa a Hawa. La bũmb ning sẽn paam-a wã wilgda yɛl nins sẽn paamd neda, a sã n zãgs Wẽnnaam sor-wilgrã. D tags bilf n ges a Hawa manesmã sẽn da rat n yɛɛlga. A Hawa kɩɩs n dɩɩ tɩɩgã bila, bala a ra ratame n “lebg wa Wẽnnaam n mi sõma ne wẽng n bake.” (Sɩng. 3:5) A sẽn maan woto wã wilgdame t’a ra rat n deega a Zeova zĩiga, n bãng sõma ne wẽng n bak a toore, n pa tũ a Zeova noyã ye. Dẽnd a zãgsa a Zeova naam sẽn ka to wã. A da rat n sooga a menga. A sɩd a Ãdem me maana wa yẽ.—Rom 5:12.
9. Tõnd sã n zãgs a Zeova sor-wilgrã, yaa bõe la tõnd maan-yã, la bõe yĩng tɩ woto yaa yalemd meng-menga?
9 Rũndã-rũndã, tõnd sã n pa tũud a Zeova sor-wilgrã, rat n yeelame tɩ tõnd me zãgsda a Zeova naam sẽn ka to wã wa a Hawa. D rɩk makr ne ned sẽn nong n get filim dãmb sẽn wilgd neb sẽn gãe taab bɩ sẽn yaa b zaala. Sã n yaa kiris-ned hakɩka, a mii a Zeova noyã yel-kãngã zugu. A miime tɩ kiris-ned pa segd n gom bõn-dẽgd yelle, tɩ pa sokd a sẽn na n get rẽ filim dãmb pʋsẽ hal tɩ noom-a ye. (Ef. 5:3) La a sẽn pa tũud a Zeova noyã yĩnga, rat n yeelame t’a zãgsa a Zeova naam sẽn ka to wã. A pa sak t’a Zeova n yaa yẽ zu-soab ye. (1 Kor. 11:3) La woto yaa yalemd meng-menga, bala wala a Zeremi sẽn yeelã, “ninsaal ka so a meng vɩɩm” n tõe n wilg a meng sor ye.—Zer. 10:23.
10. Bõe yĩng tɩ d segd n gũus ne tõnd sẽn yãkd yam n maand bũmb ninsã?
10 La kẽer tõeeme n yeel tɩ b pa sak a Zeremi sẽn yeel bũmb ningã, bala b yeta b mens t’a Zeova sẽn naan tõnd tɩ d tõe n yãk yam n maand d sẽn datã yĩnga, a pa tõe n le ning-d taal tɩ d maanda d yam ye. La d ra yĩm tɩ Wẽnnaam sẽn naan tõnd tɩ d tõe n yãk yam n maand d sẽn datã yaa kũuni, la zɩɩb me ye. D na n kolg n togsa Wẽnnaam d manesmã la d goamã poorẽ. (Rom 14:10) A Zezi yeelame tɩ “sũur sẽn pid ne bũmb ningã, noor gomda bõn-kãense.” A leb n yeelame tɩ “tags-wẽnse, la nin-kʋʋbo, la yoob buud fãa, la wagdem ne ziri, la kãnegr yita sũur pʋgẽ.” (Mat. 12:34; 15:19) Dẽnd rat n yeelame tɩ tõnd goamã la d manesmã wilgda bũmb ning sẽn be tõnd sũurã pʋgẽ wã. Wilgda tõnd sẽn sɩd yaa ned ninga. Yaa rẽ n so tɩ kiris-ned sẽn tar yam baood a Zeova sor-wilgrã wakat fãa. Woto, a Zeova na n yãame t’a yaa ned sẽn tar sũ-tɩrga, n maan-a neere.—Yɩɩl 125:4.
11. Bõe la Israɛll nebã kibar zãmsd tõndo?
11 D tẽeg Israɛll nebã kibare. B sã n da yãk yam n tũud a Zeova noyã n maand sẽn yaa sõma, a Zeova ra kogend-b lame. (Zoz. 24:15, 21, 31) La naoor wʋsgo, b ra basda Wẽnnaam noyã tũub n maand b yam. A Zeremi wakatẽ wã, a Zeova goma Israɛll nebã yell n yeel woto: “Bãmb ka sak n kelg ye. Bãmb maana b zʋg-wẽngã n wẽnemd b nens kɛɛng n ka ges maam ye.” (Zer. 7:24-26) Ad yaa kaeto! Bɩ d modg n da wa yɩ tõtba, bɩ neb sẽn dat n maan b yam, n wa ‘wẽnemd d nens kɛɛng’ n bas a Zeova sor-wilgrã n tũud d mens tagsa ye!
Bõe n yaa tɩlae sẽn na yɩl n tõog n tũ Wẽnnaam saglsã?
12, 13. a) Bõe n kɩt tɩ d rat n tũ a Zeova sor-wilgrã? b) Bõe yĩng tɩ tẽebã me yaa tɩlae?
12 Tõnd sẽn nong a Zeova wã yĩng kɩtame tɩ d rat n tũ a sor-wilgrã. (1 Zã 5:3) La a Poll wilga bũmb a to me sẽn yaa tɩlae sẽn na yɩl n tõog n tũ Wẽnnaam saglsã. A yeelame tɩ “tõnd kẽnda ne tẽebo, la d ka yã n yaool n tẽed ye.” (2 Kor. 5:6, 7) Bõe yĩng tɩ tẽebã tar yõodo? A Zeova yãagda tõnd “tɩrlem sor” zugu, la so-kãng pa kɩtd tɩ d paam arzɛk bɩ naam dũni-kãngã pʋgẽ ye. (Yɩɩl 23:3) Yaa rẽ n so tɩ tõnd segd n tall tẽeb kãn-kãe tɩ tõnd sã n tũ a Zeova, d na n paama bark sẽn yɩɩd bark buud fãa. (Karm-y 2 Korẽnt dãmb 4:17, 18.) Tẽebã sõngda tõnd tɩ d ra bao bũmb wʋsg ye.—1 Tɩm. 6:8.
13 A Zezi wilgame tɩ sẽn na yɩl n tũ Wẽnnaam tɩ ta a yam, rẽnda d sak n mong d meng yɛl kẽere, la rẽ me baoodame tɩ d tall tẽebo. (Luk 9:23, 24) Wẽn-sakdb kẽer sak n monga b mens bũmb wʋsgo, n sak naongo, wẽgbo, yaalg la nams-toaag meng b tẽebã yĩnga. (2 Kor. 11:23-27; Wil. 3:8-10) Yaa b tẽebã sẽn da yaa kãn-kãeyã yĩng n kɩt tɩ b sak yel-kãensã fãa ne sũ-noogã. (Zak 1:2, 3) Tõnd tẽebã sã n yaa kãn-kãe, d na n kɩsa sɩd zãng-zãng tɩ wakat fãa, a Zeova sor-wilgrã tũub n yaa sõma n yɩɩda. A nafda tõnd wakat fãa. D tara bas-m-yam tɩ bark ning neb nins sẽn tõogd toogã sẽn paamdã yɩɩda toog ning b sẽn deegd wakat bilf pʋgẽ wã zĩig sẽn zãre.—Heb. 11:6.
14. Bõe yĩng t’a Agaar da segd n tall sik-m-menga?
14 Sik-m-mengã me tara yõodo, d sã n dat n tu a Zeova sor-wilgrã. A Saara yemb-poak a Agaar kibarã n wilgd rẽ. A Saara sẽn wa n mik t’a pa tõe n paam biigã, a rɩka a Agaar n kõ a Abrahaam t’a maan a paga, la a Agaar rɩka pʋga. Rẽ poor masã, a Agaar sɩngame n paoogd a zu-soabã sẽn yaa pʋg-kirã. Rẽ n so t’a Saara me ‘nams a Agaar wʋsg’ hal t’a Agaar zoe. La a Zeova malɛk a ye n yã a Agaar sẽn zoetã n yeel-a yaa: “Lebg n leb f zu-soben-poakã nengẽ n tɩ sik f meng n sak-a.” (Sɩng. 16:2, 6, 8, 9) Tõe t’a Agaar ra nongẽ lame tɩ malɛkã yeel-a t’a maan bũmb a to. A sã n da rat n tũ malɛkã sẽn yeel bũmb ningã, a ra segd n talla sik-m-menga. La a sɩd sakame n sik a meng n maan wa malɛkã sẽn yeelã, tɩ rẽ kɩt t’a bi-ribl a Ismaɛll paam n dog a ba wã zakẽ.
15. Sõdg-y yɛl kẽer pʋsẽ d sẽn segd n tall sik-m-meng n tõog n tu Wẽnnaam sor-wilgrã rũndã-rũndã.
15 A Zeova sor-wilgrã tũub tõe n baoodame tɩ tõnd me yɩ sik-m-mens rãmba. Wakat tõe n wa zĩndame tɩ d segd n sak n deeg tɩ reem ning tõnd sẽn nong n deemdẽ wã pa tat a Zeova yam ye. Tõeeme me tɩ d beega d tẽed-n-taag n segd n kos sugri. Bɩ tõe tɩ d maana bũmb n segd n sak n deeg tɩ d kongame. La ned sã n maan yel-wẽn-kãseng yẽ? A soab segd n sika a meng n tɩ vẽneg yellã n togs kãsem dãmbã. B tõe n yiisa ned meng tigingã pʋgẽ, la a sã n dat tɩ b lebg n sak-a tigingã pʋgẽ, a segd n sika a meng n tek yam n bas a tʋʋm-wẽnsã. Yel-kãensã fãa la a taab pʋsẽ, Yelbũn 29:23 sẽn yet bũmb ningã tõe n sõng-d lame. Be b yeta woto: “Ned tɩtaam n wat ne a yãnde. La sik-m-meng soab na n paama waoogre.”
Wãn to la a Zeova wilgd tõnd sore?
16, 17. Bõe la d segd n maan n tõog n dɩ Wẽnnaam sor-wilgrã sẽn be Biiblã pʋgẽ wã nafa sõmã?
16 Zĩig ning tõnd sẽn tõe n paam Wẽnnaam sor-wilgr n yɩɩd yaa Biiblã pʋgẽ, bala yaa Wẽnnaam Gomde. (Karm-y 2 Tɩmote 3:16, 17.) Sẽn na yɩl n dɩ sor-wilgr ning Wẽnnaam Gomdã sẽn kõtã nafa tɩ pidi, yaa sõma tɩ d ra bas tɩ yell paam-d tɩ d yaool n baood saglsã a pʋgẽ ye. D segd n karemda Biiblã daar fãa. (Yɩɩl 1:1-3) Woto, d na n bãnga bũmb ning sẽn be Wẽnnaam Gomdã pʋgẽ wã, tɩ yell fãa taoor bɩ d bãng Wẽnnaam tagsg sẽn yaa a soaba, n tõog n yals kãn-kãe baa yel-lingdem sasa.
17 Sẽn paase, tara yõod tɩ d tags tõnd sẽn karemd bũmb ningã zug neere, la d pʋʋsd Wẽnnaam rẽ wɛɛngẽ. Tõnd sã n tagsd Biiblã verse nins tõnd sẽn karemdã zugu, sõngd-d lame tɩ d bãng d sẽn tõe n tũ-b to-to. (1 Tɩm. 4:15) Tõnd sã n tar zu-loeese, d pʋʋsda a Zeova t’a sõng-d tɩ d bãng d sẽn segd n maan bũmb ninga. A Zeova vʋʋsem sõngã na n sõnga tõnd tɩ d tẽeg sagls nins tõnd sẽn da karem Biiblã pʋgẽ wã, bɩ sɛb nins sẽn tik Biiblã zugã pʋgẽ wã.—Karm-y Yɩɩl Sõamyã 25:4, 5.
18. Wãn to la a Zeova tũnugd ne tõnd saam-biisã n wilgd tõnd sore?
18 A Zeova tũnugda ne d saam-biisã me n wilgd tõnd sore. Sẽn tɩ yɩɩd fãa, a tũnugda ne “tʋm-tʋmd sẽn tũud sɩd la sẽn tar yamã,” la Siglgã taoor lʋɩtb Sull n kɩtdẽ tɩ b yiisd sɛb sẽn tik Biiblã zugu, la b segend tigissã la tigis-kãsemsã sẽn na yɩl n kõ tõnd tẽebã rɩɩb wakat fãa. (Mat. 24:45-47; ges-y Tʋʋm 15:6, 22-31.) Tigimsã pʋsẽ me, neb n be tɩ b tẽebã bɩ sõma, sẽn tɩ yɩɩd fãa kãsem dãmbã, sẽn tõe n sõng tõnd ned kam fãa la b kõ tõnd sagls sẽn tik Biiblã zugu. (Ezai 32:1) Kambã tara zĩig a to me b sẽn tõe n paam sor-wilgr n paase. Bala Wẽnnaam kõo roagdb nins sẽn yaa wẽn-tũudb hakɩkã sor tɩ b sõng b kambã tɩ b bãng a noyã, la a yet kambã me tɩ b bao sor-wilgr b roagdbã nengẽ wakat fãa.—Ef. 6:1-3.
19. D sã n baood a Zeova sor-wilgrã wakat fãa, bark-bʋs la d paamda?
19 Vẽenega, a Zeova tũnugda ne manesem buud toor-toor n wilgd tõnd sore. D modg n dɩ a sor-wilgrã nafa sõma. Rĩm a Davɩɩd goma sasa ning Israɛll nebã sẽn da tũud Wẽnnaam noyã yelle, n yeel woto: “Tõnd yaab rãmbã della yãmba, la yãmb fãaga bãmba. Bãmb kelmame n bool yãmba, la b põsame. Bãmb della yãmb n ka paam yãnd ye.” (Yɩɩl 22:4-6) Tõnd me sã n bas d yam n tũ a Zeova sor-wilgrã, d pa na n “paam yãnd ye.” D saagrã pa na n yɩ zaalem ye. Tõnd sã n ‘bas d yellã ne a Zeova’ n pa teeg d mens bãngre, a na n ning-d-la bark wʋsg masã menga. (Yɩɩl 37:5) D sã n kell n maan woto la d sakd a Zeova noyã wakat fãa d sẽn nong-a wã yĩnga, bark-kãens na n yɩɩ wakat fãa yĩnga. Rĩm a Davɩɩd gʋlsa woto: “[A Zeova] nonga tɩrlem, la bãmb ka basd neb nins sẽn nong bãmbã ye. Bãmb gũuda bãmb wakat sẽn ka sɛta. . . . Nin-tɩrs na n sooga dũniyã la bãmb na n zĩnda a zug wakat sẽn ka sɛta.”—Yɩɩl 37:28, 29.
Y tõe n wilga a võor bɩ?
• Bõe yĩng tɩ d tõe n kɩs sɩd ne a Zeova sor-wilgrã?
• Tõnd sã n zãgs a Zeova sor-wilgrã, rat n yeelame tɩ bõe?
• Yɛl kẽer bʋs pʋsẽ la Wẽnnaam sor-wilgrã tũub baood tɩ d sik d mense?
• Wãn to la a Zeova wilgd tõnd sor rũndã-rũndã?
[Zãmsgã sogsgã]
[Foto rãmba, seb-neng 16]
Yãmb teegda a Zeova bũmb fãa pʋgẽ bɩ?