Kãadem la kamb wubr yaoolem wakat kãensã pʋgẽ
Kãadem la kamb wubr yaoolem wakat kãensã pʋgẽ
“Wakatã lebga bilfu.”—1 KOR. 7:29.
1. a) Bõe n naag “toodã” sʋka? b) Bõe yĩng tɩ zu-loees nins sẽn be zagsã pʋsẽ wã pak tõndo?
WẼNNAAM Gomdã ra pĩnd n togsame tɩ “yaoolem wakatã” zaba, tẽn-digimdsi, kom la bã-longds na n zĩndame. (Dan. 8:17, 19; Luk 21:10, 11) Biiblã leb n wilgame tɩ ãdem-biisã yɛl wʋsg na n toeemame. Zagsã pʋsẽ zu-loeesã naaga “tood” nins sẽn na n zĩnd “yaoolem wakatã” sʋka. (2 Tɩm. 3:1-4) Bõe yĩng tɩ yel-kãensã fãa pak tõndo? Yaa b sẽn be zĩig zãnga, la b tar pãng n tõe n kɩt tɩ kiris-ned sẽn tagsd to-to kãadmã la kambã wubr wɛɛngẽ toeemã yĩnga. Wãn to la yel-kãens tõe n toeem kiris-ned tagsgo?
2. Kãadmã kaoob lebga wãn-wãn dũniyã gill zugu?
2 Rũndã-rũndã, kãadem kaoob lebga nana n piuugi, tɩ tẽns wʋsg pʋsẽ, kãadem nins sẽn kaoodã sõor tar paasgo. La d pa segd n yĩm t’a Zeova tagsg kãadmã la a kaoobã wɛɛngẽ yaa toor fasɩ ne nebã sẽn tagsd to-to dũniyã gill zugã ye. A Zeova tagsg yɛl a yiibã zug la bʋgo?
3. A Zeova ne a Zezi ratame tɩ kãadem kaoos wãn-wãna?
3 Wẽnnaam a Zeova ratame tɩ sẽn kẽ-b kãadmã pids b sẽn pʋlem taab bũmb ninsã. A sẽn lugl pipi raoã ne a pagã kãadmã poore, a yeela woto: “Rao na n basa a ba ne a ma n zĩnd ne a paga; la bãmb na n yɩɩ yĩng a yembre.” Kaoosg zugẽ, a Zezi Kirist tẽega tõnd gom-kãensã la a paas woto: “Dẽ yĩnga, bɩ ned da welg bũmb nins Wẽnnaam sẽn lagem ne taabã ye. Mam yeta yãmba, tɩ ned sã n basd a pag tɩ ka yoob yĩng n dɩk a to, a maanda yoobo.” (Sɩng. 2:24; Mat. 19:3-6, 9) Rẽnd a Zeova ne a Zezi ratame tɩ pag ne a sɩd zĩnd ne taab b yõor tɛka. Yaa b nin-yend kaalem poor bal la a to wã tõe n ye soog a menga. (1 Kor. 7:39) Dẽnd sẽn yaa Wẽnnaam la kãadmã lugundã yĩnga, kãadem kaoob pa yel-bil ye. Sɩd me, Biiblã yeelame t’a Zeova kisa ned sẽn kaood a kãadem tɩ pa zems ne a noyã. *—Karm-y Malaki 2:13-16; 3:6.
Tall-y-yã a Zeova tagsg kãadmã zugu
4. Bõe yĩng tɩ kom-bɩɩs kẽer sẽn kẽ kãadem tɩ b nan paoodẽ wa maand b bãngẽ?
4 Dũni kãngã neb sẽn pa tũud Wẽnnaam noyã nonga yoobã yɛl tɩ loog nugu. Daar fãa d segda yel-kãens zĩig zãnga. D mii rẽ sẽn tõe n maan tõnd bũmb ninga. Sẽn yɩɩd fãa, d kom-bɩɩsã sẽn be tigingã pʋgẽ wã. Wãn-wãn la kom-bɩɩsã segd n mao ne yel-kãensã sẽn tõe n nek pag ne rao lageng tʋlsem tɩ pa tũ ne b raabã? Sẽn na yɩl n da yo, kẽer kẽe kãadem tɩ b nan paoodẽ. La b kãadmã poor bilfu, sãnda wa n maanda b bãngẽ. Bõe yĩnga? Bala pa yã n zãag la b sũ-noogã boog ye. B mikame tɩ b yiibã sẽn get yɛlã to-to wã pa yen ye. Vẽenega, bãmb dãmbã bee zu-loe-kãseng pʋgẽ.
5. Bõe n na n sõng kiris-neb nins sẽn kẽ kãadmã tɩ b kell n pids bũmb nins b sẽn pʋlem kãadmã raarã? (Ges-y tẽngr notã me.)
5 Baa kiris-ned sã n kẽ kãadem ne a tẽed-n-taaga, yɛlã sã n wa pa yɩ wa a sẽn da tẽedã, sɩd tõe n lebga toogo. (1 Kor. 7:28) La baa kiris-neb kãadem sẽn wa n tar zu-loees ninsi, b miime tɩ b sã n kao-a tɩ pa zems ne Biiblã noyã, pa na n maneg b yɛlã ye. Rẽ n so tɩ tigingã neb fãa segd n waoog la b sõng neb nins sẽn kelld n maood n dat n pids b pʋlemsã tɩ b kãadmã ra kaoã. *
6. Wãn to la kom-bɩɩs nins sẽn dat n kẽ kãadmã segd n tags a zugu?
6 Y yaa bi-bɩɩg n nan pa kẽ kãadem bɩ? Sã n yaa woto, wãn to la y segd n tags kãadmã zugu? Y sã n gũ n ta y bɩʋʋngo, la y sẽn wat n bɩ tẽebã wɛɛngẽ wã n yaool n sɩng ned baoobo, na n sõng-y lame tɩ y põs sũ-sãams wʋsgo. Yaa sɩd tɩ Biiblã pa wilgd d sẽn segd n ta yʋʋm ning n yaool n kẽ kãadem ye. * La a wilgdame tɩ kom-bɩɩsã segd n basame tɩ sasa ning pag ne rao lagengã tʋlsem sẽn tar pãng wʋsg b zugã loog nanda. Bõe yĩng tɩ b segd n gũ tɩ wakat kãng looge? Bala pag ne rao lagengã tʋlsem tõe n kɩtame tɩ y pa wʋmd yɛlã võor sõma, tɩ y sã n kẽ kãadem wakat kãng bɩ y tõe n wa paam sũ-sãams kaoosg zugẽ. Tẽeg-y tɩ y sã n tũ sagls nins a Zeova sẽn kõ Biiblã pʋgẽ kãadmã wɛɛngẽ wã, na n naf-y lame la kõ-y sũ-noogo.—Karm-y Ezai 48:17, 18.
Tall-y-yã a Zeova tagsg kambã wubr wɛɛngẽ
7. Bõe n paamd neb kẽer sẽn kẽ b kãadem tɩ b nan paoodẽ, la bõe yĩng tɩ rẽ tõe n nams-ba?
7 Kẽer sẽn kẽ kãadem tɩ b nan paoodẽ lebga roagdb tɩ b nan pa bɩ ye. B pa yã n bãng taab sõma la b tol n doge, tɩ bi-pɛɛlg zãab yaool n dɩkd sẽk wʋsgo. Sẽn mik me tɩ pag sã n doge, lebga a bi-pɛɛlgã yell n pak-a n yɩɩdã, tõe n wa kɩtame t’a sɩdã maand sũ-kiiri. Biigã yell gesg sẽn tõe n kɩt tɩ b kẽ yʋng n pa gũsã, tõe n waa ne zu-loeese. Pa na n kaoos la b mik tɩ b pa ye tar sẽk wa pĩndã ye. B pa le tõe n gõ la b maan yɛl kẽer ye. La b yɛlã sã n wa toeem a woto, bõe la b segd n maane?
8. Tags-bʋg la roagdbã segd n tall kambã wubr wɛɛngẽ, la bõe yĩnga?
8 Wa b sẽn segd n tall a Zeova tagsg kãadmã zugã, b segd n talla a tagsg kambã wubr wɛɛngẽ me la b bãng tɩ yaa bark la zu-noog Wẽnnaam sẽn kõ-ba. Woto yĩnga, kiris-neb sẽn kẽ kãadem sã n wa paam bi-pɛɛlga, b segd n maana b sẽn tõe fãa n vɩɩmd tɩ zems ne b yɛlã sẽn toeem to-to wã. Sẽn mik tɩ yaa a Zeova n kõ ninsaal tõog t’a tõe n dog kambã, roagdbã segd n gesa biigã wa kũun sẽn yit a nengẽ. (Yɩɩl 127:3) Roagdb sẽn yaa kiris-neb segd n modgame n wub b kambã tɩ zems ne a Zeova noyã.—Ef. 6:1.
9. a) Bõe la biig wubr baooda? b) Wãn-wãn la pʋg-sɩd tõe n sõng a pag t’a tẽebã kell n yɩ sõma?
9 Biig wubr dɩkda yʋʋm wʋsgo, la baood modgr wʋsg me. Kiris-ned segd n bãngame t’a pag sã n wa tar biiga, na n maana yʋʋm a wãn t’a pa le paamd n kelgd sõma tigissã sasa, la na n lebga toog ne-a me t’a yãt sẽk n zãmsd Biiblã la bʋgsdẽ. Woto tõe n wa kɩtame tɩ zood ning a sẽn tar ne Wẽnnaamã booge. Pʋg-sɩd sã n dat n wilg t’a tara Wẽnnaam tagsg kambã wubr wɛɛngẽ, a maanda a sẽn tõe fãa n sõngd a pagã n get biigã yelle. Tigissã poore, b sã n ta yiri, a tõe n togsa pagã bũmb nins yell b sẽn gom sõssã pʋgẽ t’a pa paam n kelgã. A leb n tõe n sõngda pagã n get biigã yell sẽn na yɩl t’a tõogd n moond koɛɛgã.—Karm-y Filip rãmb 2:3, 4.
10, 11. a) ‘Wub kambã ne a Zeova zãmsgã’ rat n yeelame tɩ bõe? b) Bõe yĩng tɩ roagdb wʋsg sẽn yaa kiris-neb segd ne pẽgre?
10 Tall Wẽnnaam tagsg kambã wubr wɛɛngẽ baoodame tɩ d maan tɩ yɩɩg ges tɩ b paam dɩɩbo, ro-gãaga, futu, la d ges b laafɩ wã yelle. Sẽn yɩɩd fãa, yaoolem wakat kãensã sẽn yaa toogã pʋgẽ, b segd n sõnga kambã tɩ b bãng noy nins b sẽn segd n tũ wã tɩ b nan paoodẽ. B segd n wub-b-la ‘ne a Zeova saglsã la a zãmsgã.’ (Ef. 6:4) La rẽ baoodame tɩ b sõng-b tɩ b bãng a Zeova noyã hal b yãadmã wakat n tãag b bi-bɩɩlmã wakat sẽn yaa toogã loogre.—2 Tɩm. 3:14, 15.
11 A Zezi sẽn yeel tɩ b segd n sõnga ‘nebã buud fãa tɩ b yɩ a karen-biisã,’ yaa vẽeneg t’a rat n yeelame me tɩ roagdbã segd n sõnga b kambã tɩ b lebg a karen-biisi. (Mat. 28:19, 20) Dũniyã sẽn wat ne yɛl nins kambã zutã kɩtame tɩ woto yaa tʋʋm-toogo. Rẽ n so tɩ roagdb nins sẽn tõogd n sõngd b kambã tɩ b lebgd kiris-nebã sɩd segd ne tigingã neb fãa pẽgre. Bala b tõoga dũniyã ne b tẽebã la b sẽn kell n tall a Zeova tagsg kambã wubr wɛɛngẽ wã.—1 Zã 5:4.
B tõdga kãadem wall rogem tʋʋm-sõng yĩnga
12. Bõe yĩng tɩ kiris-neb kẽer yãkd yam n na n kaoos yʋʋm a wãn n yaool n kẽ kãadem?
12 Sẽn mik tɩ ‘wakatã lebga bilf’ tɩ dũniyã yɛl tar toeengã yĩnga, Wẽnnaam Gomdã sagend-d lame tɩ d tags ned sẽn na n zĩnd a yembr n pa kẽ kãadem sẽn tar nafa ninsã yelle. (1 Kor. 7:29-31) Yaa rẽ n so tɩ kiris-neb kẽer yãk yam n pa na n tol n kẽ kãadem, wall b na n kaoos yʋʋm a wãn n yaool n kẽ. D sũy nooma ne bãmb dãmbã, bala b pa rɩkd b sẽkã n baood b mens nafr ye. B wʋsg yãka yam kãngã sẽn na yɩl n tõog n maan a Zeova raabã tɩ bũmb da tiis-b ye. (Karm-y 1 Korẽnt dãmb 7:32-35.) Kẽer sẽn pa kẽ kãadem yaa so-pakdb wall b tʋmd Betɛll dãmbẽ. B wʋsg sẽn dat n tʋm a Zeova siglgã tʋʋm n paas kẽngda Wẽnnaam tʋʋmdã zãmsg lekollẽ. Naoor wʋsgo, neb nins sẽn dengd n yɩ so-pakdb n maan yʋʋm a wãn n yaool n kẽ kãadmã yãtame tɩ bãngr ning b sẽn paamã nafd-b-la wʋsg b kãadmã pʋgẽ.
13. Bõe yĩng tɩ kiris-neb kẽer sẽn kẽ kãadem pa rat n dog kamba?
13 La yell a to me n toeem tẽns kẽer pʋsẽ. Wʋsg sẽn kẽed kãadem masã pa le rat n dog kamb ye. Kẽer nengẽ yaa ligd kaalem yĩnga, tɩ sãnda nengẽ yaa sẽn na yɩl n tõog n paam sẽk n tʋm nug-tʋʋmd sẽn kẽesd-b ligd wʋsgo. Kiris-nebã sʋka, kẽer me sẽn kẽ kãadem pa rat n dog kamb ye. La bãmb nengẽ wã yaa sẽn na yɩl n tõog n maan a Zeova raabã tɩ bũmb da tiis-b ye. B sẽn pa tar kambã pa rat n yeel tɩ b pa kẽed ne taab ye. Yaa b sẽn dat n lʋɩɩs Rĩungã tʋʋmd sẽn tar yõod n yɩɩdã taoorã yĩnga. (1 Kor. 7:3-5) B sãnda maanda a Zeova raabã, n gilgd tigims sulã n get saam-biisã yelle, wall b tʋmd Betɛll dãmbẽ. B kẽer yaa so-pakdb wall misioneer dãmba. A Zeova pa na n tol n yĩm b tʋʋmdã la nonglem ning b sẽn wilgd a yʋʋrã yĩngã ye.—Heb. 6:10.
B na n paama “toog b yĩngẽ”
14, 15. To-bʋs la kiris-neb nins sẽn yaa roagdbã tõe n paam “b yĩngẽ”?
14 Tʋm-tʋmd a Poll yeela kiris-neb nins sẽn kẽ kãadmã tɩ b na n paama “toog b yĩngẽ.” (1 Kor. 7:28, Sebr Sõngo) To-kãng tõe n yɩɩ bãag sẽn yik pagã bɩ a sɩdã, kambã bãase, wall roagdb sẽn kʋʋl sẽn ka laafɩ. Leb n tõe n yɩɩ sũ-sãams sẽn tũ ne kambã sababo. Wala d sẽn wilg sõsgã sɩngrẽ wã, Biiblã pĩnd n togsame tɩ “yaoolem dayã” na n yɩɩ toogo. Kambã sẽn na n yɩ ‘ba rãmb la ma rãmb kɩɩsdbã’ bee to-kãens sʋka.—2 Tɩm. 3:1-3.
15 Kamb wubr sɩd yaa tʋʋm-toog tɛk ne roagdb nins sẽn yaa kiris-nebã. Bala, yaoolem dayã toog tata tõnd me. Rẽ kɩtame tɩ wakat fãa, roagdbã segd n mao tɩ dũni wẽngã ra sãam b kambã ye. (Ef. 2:2, 3) La bʋko, pa wakat fãa la b tõogd ye! Roagdb sẽn yaa kiris-neb biig sã n bas a Zeova, baa ne b sẽn mao to-to n wub-a ne Wẽnnaam saglsã, sɩd yaa “toog” meng n paam-ba.—Yel. 17:25.
‘To-kãseng n na n zĩndi’
16. ‘To-kãseng’ bʋg sẽn wat yell la a Zezi pĩnd n gome?
16 Toog n na n zĩnd t’a wẽnemã na n yɩɩg kãadmã pʋgẽ toogã la kambã wubr sẽn wat ne a soabã hal zĩig sẽn zãre. A Zezi bãngr-gomd ning pʋgẽ a sẽn gom a waoongã la dũniyã sɛɛb wakat yellã, a yeela woto: “Wakat kãnga to-kãseng na n zĩndame, toog sẽn yaa woto nan ka zĩnd dũniyã zug ye, la a kõn leb n zĩnd yãoã zugẽ abada ye.” (Mat. 24:3, 21) Kaoosg zugẽ, a Zezi wilgame tɩ kʋʋn-kãseng n na n põs “to-kãsengã” sasa. La a Sʋɩtãan na n kell n tũnuga ne a dũniyã n zab a yaoolem zabr ne a Zeova Kaset rãmbã sẽn yaa laafɩ rãmbã. Sãmbg sẽn ka be, d yaa kãsem tɩ d yaa biiga, wakat kãng na n yɩɩ toog ne d fãa.
17. a) Bõe yĩng tɩ d pa segd n zoe to-kãseng ning sẽn watã? b) Bõe n segd n sõng tõnd d sẽn tagsd to-to kãadmã la kambã wubr wɛɛngẽ wã?
17 La baasgo, d pa segd n zoe to-kãseng ning sẽn watã tɩ loog nug ye. Roagdb nins sẽn sakd a Zeova wã tõe n kɩsa sɩd t’a na n kogl-b-la ne b kom-bõonegã. (Karm-y Ezai 26:20, 21; Sof. 2:2, 3; 1 Kor. 7:14.) D sẽn mi tɩ d vɩɩ dũni saab wakat tɩ yaa toogã, bɩ d modgd tɩ d sẽn tagsd to-to kãadmã la kambã wubr wɛɛngẽ wã zemsd ne a Zeova tagsgo. (2 Pɩɛ. 3:10-13) D sã n maan woto, d kẽe kãadem tɩ d pa kẽ kãadem, d tara kamb tɩ d pa tare, d sẽn vɩ to-to wã na n pẽgda a Zeova la waoogd tigingã.
[Tẽngr note]
^ sull 3 Ges-y Vivez en gardant à l’esprit le jour de Jéhovah sebrã neng 125, a gom-zu-bil kãngã: “Il a haï le divorce.”
^ sull 5 Sẽn maood-b ne zu-loees b kãadmã pʋgẽ wã sã n lebs n karem yʋʋmd 2003 zĩ-likr kiuug pipi daar Gũusg Gasgã ne yʋʋmd 2001 yʋʋm-vẽkr kiuug rasem a 8 Réveillez-vous ! wã, b paamda sõngr n paase.
^ sull 6 Ges-y Les jeunes s’interrogent — Réponses pratiques sebrã sak 30 wã pʋgẽ, a gom-zu-kãngã: “ Suis-je mûr pour le mariage? ”
D tẽegr yĩnga
• Bõe yĩng tɩ kom-bɩɩs nins sẽn yaa kiris-nebã pa segd n yɩ yãg-yãg n kẽ kãadem?
• Biig wubr baooda bõe ne bõe?
• Bõe yĩng tɩ kiris-neb kẽer pa rat n kẽ kãadem, la bõe yĩng tɩ sẽn kẽ-b kãadmã kẽer me pa rat n dog kamba?
• To-bʋs n tõe n paam doagdb nins sẽn yaa kiris-nebã?
[Zãmsgã sogsgã]
[Foto, seb-neng 24]
Pʋg-sɩd tõe n maana bũmb wʋsg n sõng a pag t’a tõog n tʋm Wẽnnaam tʋʋmã sõma