Tõnd yita yɛ?

BÕE YĨNG TƖ SOK-KÃNGÃ LEOOR BÃNGR TAR YÕODO? Neb wʋsg tẽedame tɩ vɩɩmã puka yaar tẽngã zugu. B tẽedame tɩ yaa yɛl n maan n pʋg taab hal tɩ ninsaal wa beẽ, n tõe n tagse, n maan bũmb wʋsg la a bao n bãng a vɩɩmã võore.

La sã n mik tɩ ninsaal sɩd waa yaar woto n pa tar Naanda, dẽnd d tõe n yeelame tɩ ninsaal yaa kɩɩba. Rat n yeelame me tɩ tõnd pa tar ned t’a yam yɩɩd tõnd tɩ d tõe n kot-a saglse, la d paamdẽ t’a sõngd-d n welgd d zu-loeesã ye. Yaa ninsaal bãngrã bal la d na n teeg n tõog n welg tõnd mensã zu-loeesã, la yɛl a taab wa tẽngã sãoong la politikã sẽn wat ne zab ninsã.

La sã n yaa woto, rẽ yĩnga d yamã tõe n gãanda bãan bɩ? Rẽ sã n pa tõeyã, bɩ d sak tɩ ninsaal tara naanda. Rẽ n sakd kelgre, la rẽ n leb n são.

Biiblã sẽn yet bũmb ninga

Biiblã yetame tɩ yaa Wẽnnaam n naan tõndo, la d pa puk yaar ye. Tõnd tara Ba sẽn nong tõndo, la sẽn tar yam wʋsgo. Ges-y Biiblã sẽn yet bũmb ninga:

Sɩngre 1:27. “Wẽnnaam naana ninsaal wa b meng wẽnego, Wẽnnaam naana yẽ wa bãmb wẽnego. Bãmb naana bãmb daoa la paga.”

Yɩɩl Sõamyã 139:14, Sebr Sõngo. “M pʋʋsd-y-la barka, Soaala, y sẽn kãam m yĩnga t’a ya neerã, yaa yel-bãnd la y maan-yã, m mii rẽ neere.”

Matɩe 19:4-6. “Yãmb nan ka karem tɩ Naanda naana bãmb, dao la pag hal sɩngrẽ, la tɩ bãmb yeelame: A yaa woto yĩnga dao na bas a ba ne a ma n zĩnd ne a paga, la bãmb b yiiba fãa na n yɩɩ yĩng a yembr bɩ? Woto yĩnga, bãmb ka leb n yaa yiib yɛs ye, b yaa yĩng a yembre. Dẽ yĩnga, bɩ ned da welg bũmb nins Wẽnnaam sẽn lagem ne taaba ye.”

Tʋʋma 17:24, 25. “Wẽnnaam sẽn naan dũniyã ne bũmb nins fãa sẽn be a pʋgẽ, la b yaa yĩngr la tẽng Zusoabã, bãmb ka kẽed pʋʋsg rot sẽn maan ne neb nus pʋsẽ ye. Bãmb sẽn kõt fãa vɩɩm la vʋʋsem la bũmb fãa wã, neb ka tõe n sõng bãmb ne b nus tʋʋmd wa b sẽn kongd bũmb ye.”

Wilgri 4:11. “Tõnd Zusoaba la tõnd Wẽnnaam, yãmb n zems tɩ reeg pẽgr la waoogr la pãnga. Tɩ bõe, yãmb n naan bũmb fãa, la yaa yãmb daabã yĩng la yãmb naan bãmb tɩ b beẽ.”

 Biiblã sẽn kõt leoor ninsã sẽn tõe n kɩt tɩ d yamã gãand bãan to-to

Tõnd sã n miẽ t’a “soab ning buud fãa sẽn be yĩngr la sẽn be tẽng zug sẽn paamd b yʋy [a] nengẽ wã” yaa Wẽnnaam, woto na n toeema tõnd sẽn tagsd to-to neb a taabã zugã. (Efɛɛz rãmba 3:15, Kãab-paalgã Koe-noogo) Leb n toeemda tõnd sẽn tagsd to-to d meng zugã, la d sẽn get d zu-loeesã to-to wã me. Rẽ na n sõnga tõnd yɛl a yiib nins sẽn pʋgdã pʋsẽ:

D sã n wa rat n yãk yam n maan bũmb tɩ pa nana, d pa na n bas tɩ nebã tagsa sẽn kɩɩsd taabã liib-d ye. D na n teega sagls nins sẽn be Biiblã pʋgẽ wã. Bala “Gʋlsg Sõamyã zãng yaa Wẽnnaam n kõ tõndo: la a bee bark zãmsg yĩnga, la tɩ wilg ned a kongre, la saglg yĩnga, la tɩ zãms tɩrlem tɩ Wẽnnaam ned tõe n bɩ la a maan tʋʋm-sõma fãa.”—2 Tɩmote 3:16, 17.

La sẽn na yɩl n tõog n tũ Biiblã sẽn yet bũmb ningã, rẽnda d modg la d kibl d menga. Wakat ning menga, Biiblã sẽn kõt sagls ninsã tõeeme n pa zems ne tõnd tʋlsmã ye. (Sɩngre 8:21) La d sã n sak n deeg tɩ yaa tõnd saasẽ Ba wã sẽn nong tõndã n naan-do, d na n sak n deegame me tɩ yẽ n mi tõnd sẽn segd n maan bũmb nins tɩ naf-do. (Ezai 55:9) Rẽ n so t’a Gomdã yet woto: “Teeg Zusoaba ne f sũur fãa la f ra teeg f meng bãngr ye. Fo sẽn maand bũmb ninga fãa, bɩ f tẽeg Zusoaba yelle, la b na n demsa fo sorã.” (Yelbũna 3:5, 6) Tõnd sã n tũud sagl-kãngã, yɩɩr ning zu-loeesã la yam-yãkr kẽer sẽn wat ne wã na n boogame.

B sã n wa wẽgd tõndo, d sẽn yaa buud a to nedã yĩng bɩ d bãngr sẽn paood yĩnga, d pa na n wa tagsdẽ tɩ d pa tar yõodo, la tɩ d pa ta neb a taabã ye. D na n ket n nanda d mengã, bala Wẽnnaam a Zeova sẽn yaa tõnd Ba wã “ka tũusd neb ye. La buud fãa sʋka, ned ninga sẽn zoet bãmba la sẽn maand tɩrga, yẽ soab tata bãmb yam.”—Tʋʋma 10:34, 35.

D sã n miẽ tɩ Wẽnnaam pa tũusd neba, na n kɩtame me tɩ d ra tagsdẽ tɩ tõnd sãoã neb a taabã, b sẽn pa tõnd buudã ned bɩ b bãngrã sẽn pa ta tõndã yĩng ye. D na n bãngame me tɩ d pa tar bʋʋm n na n tags tɩ tõnd yɩɩda buud a taabã neb ye. Bala Wẽnnaam “naana ninsaalb buud fãa ne ned a yembre, n zĩndg bãmb dũniyã faa zugu.”—Tʋʋma 17:26.

Vẽenega, d sã n miẽ tɩ Wẽnnaam n naan tõnd la tɩ d yell pak-a lame, na n kɩtame tɩ d yamã gãe bãane. La d sã n dat tɩ d yamã kell n gãand bãane, bũmb a to me n yaa tɩlae.

[Goam sẽn tar pãngã, seb-neng a 4]

Ninsaal puka yaar bɩ?

[Foto, seb-neng a 5]

D sã n miẽ tɩ tõnd yell paka d Naandã, d yamã tõe n gãanda bãane