Ãdsã wilgdame tɩ Wẽnnaam tara pãnga

“Zẽk-y y nens yĩngr n gese. Yaa ãnda n naan ãdsã la a mi b sõore; la a pʋd bãmb fãa b yʋya? Yaa bãmb pãn-kãsengã ne b noorã yĩng n kɩt tɩ bãmb fãa beẽ.”—EZAI 40:26.

WĨNTOOGÃ bedrem pa ta ãds kẽer ye. La a bedrmã yɩɩda tẽngã naoor 330 000. Ãds wʋsg sẽn pẽ tẽngã bedrem pa ta wĩntoogã ye. La kẽer bedrem yɩɩda wĩntoogã sẽn na ta naoor 27.

Wĩntoogã tʋʋlmã taa zĩ-bʋgo? Mams-y n ges bugum sẽn na n be kilo 15 zĩigẽ, t’a tʋʋlmã yaool n tat yãmb ka. Wĩntoogã bee kilo milyõ 150 zĩigẽ. Baa ne rẽ, d fãa mii a sẽn zabd to-to tʋʋlgã sasa. La yaa d bãng t’a tʋʋlmã fĩi-fĩi bal la sẽn tat tẽngã zugã. Baa ne rẽ, a seka a na sõng bõn-vɩɩsã la tɩɩsã tɩ b tõe n vɩɩmde.

Bãngdbã geelame n mik tɩ wĩntoogã tʋʋlmã seka a na zã tõnd tẽngã buud bãmb tus ka tɛka.

Wĩntoogã yaa bedre, la a sẽn yiisd tʋʋlem ningã yaa wʋsgo. Bãngdbã wilga ẽntɛrnetã pʋgẽ tɩ baa wĩntoogã sã n bas n pa kõt a tʋʋlmã, na n maana yʋʋm milyõ 50 tɩ ninsaalbã sẽn be tẽngã zugã pa bãng tɩ bũmb n maan ye.

Zĩigã sã n wa sobg tɩ y zẽk y neng n ges yĩngri, y na n yãa ãds ka tɛka. Bãmb me tʋʋlmã taa wĩntoogã tʋʋlmã. Bãngdbã wilgame tɩ ãdsã yaa wʋsg hal tɩ ninsaal pa tõe n bãng b sõor ye.

Maana wãn tɩ ãdsã fãa wa beẽ? Bãngdb wʋsg tẽedame tɩ ãdsã puka b toor sẽn na maan yʋʋm milyaar 14 la woto. La Biiblã yeta vẽeneg tɩ “hal sɩngr wakate, Wẽnnaam naana saasã la tẽngã.” (Sɩngre 1:1) Vẽenega, d tõe n yeelame tɩ sẽn naan-a wĩntoogã la ãdsã sɩd tara “pãng kãsenga.”—Ezai 40:26.

Wẽnnaam sẽn tʋmd ne a pãngã to-to

Wẽnnaam a Zeova sõngda neb nins sẽn maand a raabã ne a pãngã. Wala makre, a Poll rɩka a pãngã fãa n zãms neb a taabã yɛl wʋsg Wẽnnaam zugu. A Poll ra yaa ned wa tõndo, la a tõog n tʋma tʋʋm-sõma wʋsgo, baa ne nebã sẽn da kɩɩsd-a wã. Bõe n sõng-a t’a tõoge? Yẽ meng yeelame t’a paama ‘pãn-kãseng’ Wẽnnaam nengẽ.—2 Korẽnt dãmba 4:7-9.

Wẽnnaam a Zeova zoe n talla a pãngã n sãam neb sẽn kɩɩs a noyã ne pʋ-toogo. A Zezi Kirist goma Sodom la Gomoor sãoongã n paas a Nowe wakatẽ sa-kãsengã yelle, n wilg t’a Zeova sãamda nin-wẽnsã bala. A Zezi pĩnd n togsame tɩ ka la bilfu, a Zeova na n le talla a pãngã n sãam neb nins sẽn  kɩɩsd a noyã.—Matɩe 24:3, 37-39; Luk 17:26-30.

Yãmb tagsda wãn to Wẽnnaam zug masã?

Yãmb sã n wa bʋgsd Wẽnnaam pãngã ãdsã sẽn pukdã zugu, tõe tɩ yãmb me yeel wala rĩm a Davɩɩd sẽn yeelã. A yeela woto: “Mam sẽn get saasã sẽn yaa yãmb nus tʋʋmdã ne kiuugã la ãdsã yãmb sẽn ning b zĩigẽ wã, ninsaal yaa bõe tɩ yãmb tẽr a yelle? La ninsaalb kamb yaa bõe tɩ yãmb gũud-ba?”—Yɩɩl Sõamyã 8:4, 5.

D sã n tags n ges bũmb nins sẽn be yĩngr la tẽng zugã, d bãngdame tɩ tõnd pa baa fʋɩ ye. La Wẽnnaam pãngã pa segd n kɩt tɩ d yɛɛs ye. A Zeova vẽnega no-rɛɛs a Ezai t’a gʋls gom-kãensã sẽn kengd raoodã. A gʋlsa woto: “Ned sã n yɛ, [Wẽnnaam] kõt-a-la pãnga. Ned pãng sã n booge, bãmb paasd-a-la pãnga. Kom-bɩɩs na n yɛɛme tɩ b pãng sɛ. La rasãmbã na n lʋɩɩ tẽnga. La neb nins sẽn teegd Zusoabã pãng paasda wakat fãa. Bãmb na n yɩga wa sɩlse. Bãmb na n zoeeme la b pãng ka na n sɛ ye. Bãmb na n kẽname n ka yɛ ye.”—Ezai 40:29-31.

Yãmb sã n sɩd rat n maan Wẽnnaam daabo, bɩ y bãng t’a na n sõnga yãmb ne a vʋʋsem sõngã tɩ y tõog n maane. La y segd n kosa Wẽnnaam t’a kõ-y vʋʋsem sõngã. (Luk 11:13) Ne Wẽnnaam sõngre, y tõe n tõogã toog buud fãa n paam pãng n maan sẽn yaa tɩrga.—Filip rãmba 4:13.

[Goam sẽn tar pãngã, seb-neng a 7]

Ne Wẽnnaam sõngre, y tõe n paama pãng n maan sẽn yaa tɩrga

[Foto rãmba, seb-neng a 7]

Dans le sens des aiguilles d’une montre depuis le haut à gauche : galaxie Whirlpool ; amas stellaire des Pléiades ; nébuleuse d’Orion ; galaxie d’Andromède.

[Foto, rãmba, seb-neng a 7]

Wĩntoogã bedrem yɩɩda tẽngã naoor 330 000

[Foto rãmbã soaadba]

Pléiades : NASA, ESA et AURA/Caltech ; foto nins fãa sẽn be zugẽ wã : National Optical Astronomy Observatories