Kell-y n tall-y “y pipi nonglmã”
Kell-y n tall-y “y pipi nonglmã”
“Bɩ y tall bũmb nins yãmb sẽn tarã.”—WIL. 3:11.
1, 2. Y sẽn wa n sak n deeg tɩ bũmb ning b sẽn wilg-yã a Zeova zugã yaa sɩdã, y manesem yɩɩ wãna?
YÃMB ket n tẽra pipi y sẽn wa n bãng bũmb ning a Zeova sẽn kãab neb nins sẽn maand a raabã bɩ? Y sã n da bee tũudum a to pʋgẽ sasa kãnga, b sẽn wa n karem Biiblã n bilg-y bõn-sõma nins a Zeova sẽn na n maan n kõ ãdem-biisã, wall b sẽn sõng-y tɩ y wʋm bũmb võor y sẽn da pa wʋmd sõma wã, y manesem yɩɩ wãn-wãna? Tõe tɩ y bãngame tɩ y ra pa mi Wẽnnaam sõma ye. La b sẽn wa n wilg-y Biiblã sẽn sɩd yetã, y sũur lebga noogo! La y roagdbã sã n yaa kiris-neba, rẽ yĩnga y tẽra y manesem sẽn yɩ to-to y sẽn wa n sak n deeg tɩ bũmb nins fãa b sẽn wilg yãmb a Zeova zugã yaa sɩd tɩ kɩt tɩ y yãk yam n na n tũ-a wã bɩ?—Rom 12:2.
2 Y sã n sok y tẽed-n-taasã, wʋsg na n leok-y lame tɩ b me sũy yɩɩ noog hal wʋsgo, b sẽn wa paam t’a Zeova bool-b tɩ b lebg a kaset soabã. (Zã 6:44) Sũ-no-kãng kɩtame tɩ b tʋmd Wẽnnaam tʋʋmdã. Bũmb nins b sẽn bãngã noom-b-la wʋsgo, tɩ b rat tɩ nebã fãa bãng bõn-kãense. Yãmb me nengẽ yɩɩ woto bɩ?
3. A Zezi sẽn wa n taasd Efɛɛz tigingã neb a koeesã, zu-loe-bʋg la b ra tara?
3 Pipi kiris-nebã wakate, a Zezi taasa Efɛɛz tigingã neb koeese, n yeel-b tɩ b basa b “pipi nonglmã.” Yaa sɩd tɩ Efɛɛz tẽedbã ra tara zʋg-sõma wʋsgo. La b sẽn da nong a Zeova to-to wã wa n boogame. Rẽ n so t’a Zezi yeel-b woto: “Mam bãnga yãmb tʋʋmã ne y namsgã la y sũ-marã; la yãmb ka sakd neb nins sẽn yaa wẽngã ye; yãmb maka neb nins sẽn yet tɩ bãmb yaa tʋm-tʋmdba, la b yaool n ka tʋm-tʋmdbã, la yãmb mikame tɩ bãmb yaa ziri-yagdba; la yãmb maanda sũ-mar n sakd namsg mam yʋʋrã yĩnga, n ka yɛɛdẽ ye. La yell ning mam sẽn tar ne yãmba, yaa tɩ yãmb basa yãmb pipi nonglmã.”—Wil. 2:2-4.
4. Bõe yĩng tɩ koɛɛg ning a Zezi sẽn taas Efɛɛz kiris-nebã tar yõod rũndã-rũndã?
4 Sagls nins a Zezi sẽn kõ Efɛɛz tigingã la tigims a taabã Wilgr sebrã pʋgã zemsa kɛpɩ ne yɛl sẽn zĩnd kiris-neb nins sẽn paam vʋʋsem sõng zaeebã sʋk wakat bilf pʋgẽ, yʋʋmd 1914 tɛka. (Wil. 1:10) La baa rũndã-rũndã menga, kiris-neb kẽer tõe n wa basame tɩ b sẽn da nong a Zeova la sɩdã to-to wã booge. Woto yĩnga, bɩ d bao n bãng nonglem la yẽesem ning d sẽn tall sɩngrẽ wã yell tẽegr sẽn tõe n sõng-d to-to tɩ d kell n tall d pipi nonglmã, la d paas a pãnga.
Bõe n kɩt tɩ y sak sɩdã?
5, 6. a) Bõe la kiris-ned fãa segd n deng n bao n bãnge? b) Bõe n kɩt tɩ yãmb sak n deeg t’a Zeova Kaset rãmbã sẽn zãmsd nebã bũmb ningã yaa sɩda? d) Bõe n tõe n kɩt tɩ ned lebs n tall a pipi nonglmã?
5 Yaa vẽeneg tɩ ned ning fãa sẽn dɩk a meng n kõ a Zeova rengame n bao n “bãng Wẽnnaam daabã sẽn yaa sõma la sẽn tat bãmb yam, la sẽn zems zãngã.” (Rom 12:1, 2) Yɩl n bãng woto fãa me, yɩɩ tɩlae t’a soab bãng Biiblã sẽn sɩd yetã. Bũmb ning ned sẽn wʋm tɩ kɩt t’a sak n deeg t’a Zeova Kaset rãmbã sẽn zãmsd neb bũmb ningã yaa sɩdã tõe n yɩɩ toor ne a to sẽn wʋme. Kẽer yeelame tɩ yaa b sẽn karem Biiblã n bãng naandã yʋ-peellã, bɩ b sẽn bãng bũmb ning sẽn paamd ned a kũum poorã n kɩt tɩ b sak n tẽ. (Yɩɩl 83:18, NW; Koɛ. 9:5, 10) Sãnda nengẽ, yɩɩ b sẽn yã a Zeova Kaset rãmbã sẽn nong taab to-to wã. (Zã 13:34, 35) Sã n yaa ne kẽere, yɩɩ b sẽn wa n bãng ra ‘yɩ dũniyã rẽndã’ sẽn dat n yɛɛlgã n kɩt tɩ b sak n deeg tɩ kiris-ned hakɩk sɩd pa segd n kẽ politikã no-koɛɛmẽ wall a teel zab ye.—Ezai 2:4; Zã 6:15; 17:14-16.
6 Ne neb wʋsgo, yaa yɛl nins d sẽn sõdgã la a taab b sẽn bãnge, n kɩt tɩ b wa nong Wẽnnaam. Rɩk-y sẽk n tẽeg bũmb ning sẽn kɩt tɩ y sak sɩdã yelle. Ned kam fãa zʋg la a yɛl yaa toor ne a to rẽnda. Bũmb nins sẽn kɩt tɩ y wa nong a Zeova la y tẽed bõn-sõma nins a sẽn kãab-dã me tõe n yɩɩ toore. La bõn-kãens pa toeem ye. Bala sɩdã pa toeemd ye. Rẽ n so tɩ y sã n lebs n tẽeg y tagsg sẽn yɩ to-to y sẽn wa n bãng sɩdã paalmã, tõe n kɩtame tɩ y lebs n tall y pipi nonglmã la y modg n keng-a.—Karm-y Yɩɩl Sõamyã 119:151, 152; 143:5.
Keng-y y pipi nonglmã
7. Bõe yĩng tɩ d segd n paas d pipi nonglmã, la wãn to la d tõe n maan dẽ?
7 Tõe tɩ y sẽn dɩk y meng n kõ a Zeova wã tɛk n tãag masã, y yɛlã wʋsg toeemame. Yaa vẽeneg tɩ sɩngrẽ wã, y ra nonga sɩdã wʋsgo, la kaoosg zugẽ, y mikame tɩ sẽn na yɩl n tõog n mao ne zu-loeesã n kell tall y tẽebã, rẽndame tɩ y paas y pipi nonglmã. La a Zeova sɩd sõng-y lame tɩ y maan boto. (1 Kor. 10:13) Rẽ kɩtame tɩ yɛl nins y sẽn seg y tẽebã sɩngrẽ n tãag masã wã tar yõod wʋsg ne-yã. Bala b sõng-y lame tɩ y paas y nonglmã pãnga, la b kɩt tɩ y bãng Wẽnnaam daabã sẽn yaa sõma, la sẽn tat a yam la sẽn zems zãnga.—Zoz. 23:14; Yɩɩl 34:9.
8. Bõe la a Zeova yeel a Moiiz n wilg a sẽn yaa a soaba, la wãn-wãn la a kɩt tɩ Israɛll kambã bãng-a sõma?
8 Wala makre, ges-y Israɛll kambã sẽn da wa n be yembd pʋgẽ Ezipt t’a Zeova kãab t’a na n yiis-b lame wã. A kɩtame t’a Moiiz bãng a sẽn yaa Wẽnnaam ning buud n yeel-a woto: “Mam na n yɩɩ m sẽn na n yɩ a soaba.” (Yik. 3:7, 8, 13, 14, NW) A Zeova sẽn yeel woto wã, a ra rat n wilgame t’a na n maana a sẽn na maaneg fãa, n fãag a nin-buiidã. A sẽn fãag Israɛll kambã to-to wã pʋgẽ, a sɩd kɩtame tɩ b bãng t’a yaa Wẽnnaam sẽn ka to, bʋ-kaooda, sor-wilgda, fãagda, zabr gãndaoogo, la kõta.—Yik. 12:12; 13:21; 14:24-31; 16:4; Neh. 9:9-15.
9, 10. Yel-bʋs pʋsẽ la ned tõe n bãng Wẽnnaam sõma, la bõe yĩng t’a segd n tẽegd yel-kãens yelle?
9 Yaa sɩd tɩ y yɛlã ne Israɛll kambã rẽndã pa taab ye. La baasgo, y yãa a Zeova sẽn sõng-y to-to yɛl kẽer pʋsẽ tɩ kɩt tɩ y sak n deeg t’a sɩd nong-y lame, tɩ keng y tẽebã. Tõe t’a Zeova kɩtame tɩ y bãng t’a yaa y kõta, y belsda, wall y karen-saamba. (Karm-y Ezai 30:20b, 21.) Tõe me tɩ y yãa a sẽn leok y kosgo. Wala makre, tõe tɩ y ra tara zu-loɛɛg tɩ y tẽed-n-taag sõng-yã. Tõe me tɩ y yãa verse Biiblã pʋgẽ y zãmsg wakat tɩ sõng-y tɩ y welg yelle.
10 Y sã n togs ned yel-kãensã, tõe tɩ b pa na n tall yamleoog ne a soab wa sẽn yɩ to-to ne yãmbã ye. Yaa sɩd tɩ b pa yel-soalem ye. La b tara yõod wʋsg ne-yã. Vẽenega, y zu-loeesã pʋgẽ, a Zeova sɩd maana a sẽn na maaneg fãa n sõng-yã. Tags-y n ges-y yʋʋm sõor ning yãmb sẽn sɩng n maand a Zeova raabã. Rẽ yĩnga yãmb tõe n tẽega yɛl sẽn na ta a yiib pʋsẽ a Zeova sẽn sõng yãmb bɩ? Y sã n tẽeg yel-kãensã, la y tẽeg b sẽn kɩt tɩ y ra nong a Zeova to-to wã me, na n kɩtame tɩ y lebs n tall y pipi nonglmã. Ra tol-y n yĩm-y-b ye. Bʋgsd-y b zutu. B wilgda vẽeneg t’a Zeova nong-y lame, tɩ ned pa tõe n kɩt tɩ y pa tẽ rẽ ye.
Fees-y y meng n gese
11, 12. Kiris-ned sã n wa pa le nong sɩdã wa pĩndã, tõe n yaa bõe yĩnga, la sagl-bʋg la a Zezi kõ-do?
11 Y sã n getẽ tɩ y sẽn nong Wẽnnaam la sɩdã to-to wã boogame, pa rat n yeel tɩ Wẽnnaam toeemame ye. A Zeova pa tekd abada. (Mal. 3:6; Zak 1:17) A ket n nong-y-la wʋsgo. La bũmb sã n toeema yãmb ne a Zeova zoodã pʋgẽ, tõe n yɩɩ bõe? Yaa y zu-loeesã n paas tɩ y maand yɩɩr bɩ? Y ra pʋʋsda sõma-sõma n zãmsd Biiblã la y bʋgsdẽ tɩ masã y neẽ tɩ y pa le maand rẽ bɩ? Rẽ yĩnga y ra moonda koe-noogã ne yẽesem la y kẽnd tigissã sõma-sõma pĩndã n yɩɩd rũndã-rũndã bɩ?—2 Kor. 13:5.
12 Tõe tɩ y sã n fees y meng bɩ y mik tɩ yel-kãensã wɛɛngẽ, bũmb pa toeem ye. La toeeng sã n beẽ, yaa bõe n yɩ sababo? Tõe tɩ yaa y sẽn tʋll n modg n ges y zakã rãmb yell wa sẽn segdã yĩng bɩ? Bɩ yaa laafɩ kaalem wall yɛl a taab n kɩt tɩ y yĩm t’a Zeova raarã kolgdame? A Zezi ra yeela a tʋm-tʋmdbã woto: “Bɩ y gũus y mens n da sak tɩ yão-beed ne rã-yũuri la vɩɩm kãngã yɛlã pak yãmb tɩ ra-kãng wa ling yãmb ye. Tɩ bõe, a na n wa linga nebã fãa sẽn be dũniyã zugã wa kũusri. Dẽ yĩnga bɩ y gũ la y pʋʋs daar fãa n paam pãng n põs bõn-kãens fãa sẽn na n wa wã.”—Luk 21:34-36.
13. A Zak maka Wẽnnaam Gomdã ne bõe?
13 A Zak sẽn yɩ Biiblã gʋlsdb nin-yendã ra sagla a tẽed-n-taasã tɩ b fees b mens n ges b sã n tũuda Wẽnnaam Gomdã sẽn yetã. A yeela woto: “Bɩ yãmb yɩ koe-sakdba, la y ra yɩ koe-kɛlgdb bala, sẽn belgd yãmb mens ne tagsg sẽn ka sɩd ye. Tɩ bõe, ned sã n yɩ koe-kɛlgd la a ka koe-sakda, yẽ wẽnda ned sẽn ges a neng nin-getg pʋgẽ, la a sẽn ges a neng n sɛ, a loogdame. La tao-tao bala, a yĩmda a sẽn wẽnd bũmb ninga. La ned ninga sẽn get tõog sẽn zems zãngã sẽn yaa lohorem tõogã, la sẽn ket n get-a daar fãa, la sẽn kelgd-a n ka yĩmdẽ, la sẽn sakd-a, bark na n zĩnda yẽ zugu, a sẽn maand woto wã yĩnga.”—Zak 1:22-25.
14, 15. a) Wãn-wãn la Biiblã tõe n sõng-y tɩ y paas y zoodã ne Wẽnnaam? b) Sogs-bʋs la y segd n sok y mense?
14 Ned tõe n gesa nin-gɛtg pʋgẽ n bãng a sẽn maneg a meng to-to wã sã n yaa sõma. Wala makre, rao sã n ges nin-gɛtgẽ n yã t’a karvat yaa kɛgre, a na n maneg-a lame. Pag me sã n mik t’a zoobd rata manegre, a na n manegame. Gʋlsg Sõamyã me sõngda tõnd wa nin-gɛtg tɩ d tõe n bãng d sẽn yaa to-to. D sã n makd d manesmã ne Biiblã sẽn dat tɩ d yɩ to-to wã, yaa wa d sẽn get d meng nin-gɛtgẽ. La rẽ yĩnga d sã n ges n yã bũmb d sẽn segd n maneg tɩ d pa manege, d gesgã talla yõod sɩda? Yɩta sõma tɩ d yɩ ‘koe-sakdba,’ n modgd n tũud Wẽnnaam ‘tõogã sẽn zems zãngã.’ Woto yĩnga, ned ning fãa sẽn ne t’a sẽn da nong a Zeova ne sɩdã to-to wã boogame segd n soka a meng woto: ‘Zu-loe-bʋs la mam tara, la m maooda ne-b wãn-wãna? Sã n da yaa pĩndã, m da na n maana wãn-wãna? Bũmb n toeem bɩ?’ Y sã n fees y meng woto n mik tɩ yɛl kẽer n sɩd rat remsgo, bɩ y rems-b tao-tao la y ra yog ye.—Heb. 12:12, 13.
15 Sogs-kãensã tõe n sõnga kiris-ned t’a bãng a sẽn na n maneg n wɩng Wẽnnaam tʋʋmdã pʋgẽ n paase. Tʋm-tʋmd a Poll da kõo bi-bɩɩg a Tɩmote sẽn yɩ a tʋmd-n-taagã sagls sẽn na n sõng-a t’a tʋm Wẽnnaam tʋʋmdã sõma. A Poll yeel-a-la woto: “Wɩng ne bõn-kãense, la f maan ne f sũur fãa, tɩ nebã fãa yã tɩ fo bɩtame.” Sõmbame tɩ tõnd me tũ Wẽnnaam Gomdã, la d bao n bãng d sẽn tõe n maan to-to n bɩ n paase.—1 Tɩm. 4:15.
16. Y sã n tik Gʋlsg Sõamyã n na n fees y menga, y segd n deng n bãnga yel-bʋg tiiri?
16 Bãng-y tɩ y sã n fees y meng neere, y na n yãa yɛl y sẽn segd n demse. Rẽ tõe n sãama y sũuri. La y pa segd n koms raood ye. Bala feesgã yõod yaa tõog n yã bũmb d sẽn segd n demse. Yaa vẽeneg t’a Sʋɩtãan datame tɩ kiris-ned tẽ t’a pãn-komsmã yĩnga, a ka yõod ye. B zoe n yeelame meng tɩ baa ned sẽn maand to-to fãa, a pa tõe n ta Wẽnnaam yam ye. (Zoob 15:15, 16; 22:3) La a Zezi wilgame tɩ gom-kãensã yaa ziri fasɩ, la tɩ Wẽnnaam nanda tõnd ned kam fãa hal wʋsgo. (Karm-y Matɩe 10:29-31.) D sã n sak n deeg tɩ d tara pãn-komsem, d segd n sika d meng n mao ne d sũur fãa n bao a Zeova sõngr sẽn na yɩl n toeeme. (2 Kor. 12:7-10) Bãag wall kʋʋlem sã n kɩtame tɩ y pa le tõe n tʋm Wẽnnaam tʋʋmdã wa pĩndã, bɩ y modg n ket n tʋmd-a wa y sẽn tõe tɛka, n da tol n bas tɩ y pipi nonglmã boog ye.
D sẽn segd n tall mi-beoogã võore
17, 18. Y sã n ket n modgd n paasd y pipi nonglmã pãnga, bark bʋs la y na n paame?
17 Y sã n ket n modgd n paasd y pipi nonglmã pãnga, y na n paama bark wʋsgo. Wala makre, y na n bãnga Wẽnnaam sõma la y maneg n nong a noyã. (Karm-y Yelbũna 2:1-9; 3:5, 6.) Yɩɩl-gʋlsdã yeelame t’a “[Zeova noyã] sakr tara yõod wʋsgo,” la tɩ b “kõta zɩɩlem soab yam.” A paasame tɩ “bark bee neb nins sẽn kẽnd ne pʋ-peelma zutu, neb nins sẽn tũud [a Zeova] tõodã.”—Yɩɩl 19:8, 12; 119:1.
18 Sãmbg sẽn ka be, bõn-sõma nins fãa d sẽn paamã segd n kɩtame tɩ d yɩ mi-beoogo rãmbã. Wala makre, y wʋmda yɛl nins sẽn maand dũniyã zug rũndã-rũndã wã võore. Sẽn paase, y rɩta segls nins fãa Wẽnnaam sẽn dɩk n get a Kaset rãmbã yell tẽebã wɛɛngẽ wã yõodo. Yaa vẽeneg me tɩ y sũy nooma a Zeova sẽn kẽes yãmb a nin-buiidã sẽn be dũniyã gill zugã sʋk tɩ y lebg a Kaset soabã. Tall-y mi-beoog bõn-sõma kãensã fãa yĩnga! Tõe tɩ y pa na n tõog n sõdg bark nins y sẽn paamã fãa n sa ye. La y sã n nong n tagsd b yell ball-balle, na n sõng-y lame tɩ y tõog n tũ Biiblã sẽn sagl-d tɩ d maan bũmb ningã. B yeel-d-la woto: “Bɩ y tall bũmb nins yãmb sẽn tarã.”—Wil. 3:11.
19. Zood ning d sẽn tar ne Wẽnnaamã zug bʋgsg toor sẽn ka be, bõe me n tõe n sõng-d tɩ d kell n tall d pipi nonglmã?
19 Y sã n tags n ges y tẽebã sẽn paas to-to y sẽn bãng sɩdã tɛk n tãag masã wã zugu, na n sõng-y lame tɩ y kell n tall bũmb nins y sẽn tarã. Gũusg Gasgã wae n wilgda yɛl a taab d sẽn tõe n maan me n kogl d zoodã ne Wẽnnaam. Wala makre, b nong n tẽegd-d lame tɩ d pʋʋsd sõma-sõma, tɩ d kẽnd tigissã la d kẽesd d mens b pʋsẽ, la d moond koɛɛgã ne yẽesem. Woto tõe n sõng-d lame tɩ d kell n tall d pipi nonglmã la d manegd-a n paasdẽ.—Ef. 5:10; 1 Pɩɛ. 3:15; Ziid 20, 21.
Y na n leokame tɩ bõe?
• Wãn to la bũmb ning sẽn kɩt tɩ y wa nong a Zeova wã tõe n keng y raoodo?
• Y sã n bʋgs zu-loees nins y sẽn seg y sẽn bãng sɩdã tɛk n tãag masã wã zugu, na n kɩtame tɩ y kɩs sɩd ne bõe?
• Bõe yĩng tɩ d segd n fees d mens n ges d sẽn nong Wẽnnaam to-to sã n boogame?
[Zãmsgã sogsgã]
[Foto, seb-neng 29]
Bõe n kɩt tɩ yãmb sak sɩdã?
[Foto, seb-neng 31]
Y tara yɛl y sẽn segd n dems bɩ?