Pag sẽn nong a biig to-to wã wilgda wẽnnaam nonglmã

“Pag tõe n yĩma biig ning yẽ sẽn yẽsemdã yell bɩ? A tõeeme n ka zoe biig ning yẽ sẽn dogã nimbãaneg bɩ? Baa yẽ sã n yĩm, mam ka na n tol n yĩm fo yell ye.”—EZAI 49:15.

BI-PƐƐLG sã n be a ma nugẽ t’a yẽsemd-a, sɩd bee yamleoogo. Pag a yembr yʋʋr sẽn boond t’a Pam yeela woto: “Mam sẽn gãd m bi-pɛɛlgã pipi wã, nonglem ning mam sẽn tall ne-a wã kɩtame tɩ mam yĩngã sidg wʋsgo, la kɩt tɩ mam bãng tɩ tʋʋmd meng la m paam-yã.”

Baa ne woto sẽn pa lingrã, bãngdbã wilgame tɩ pag sã n nong a biiga, kɩtdame tɩ biigã bɩt sõma la a tar laafɩ. Siglg a ye sẽn get laafɩ wã yell yeela woto: “B vaeesame n mik tɩ kamb nins ma rãmbã sẽn bas-bã, la kamb nins b sẽn welg ne b ma rãmbã tɩ b ket n paoodẽ wã wat n pa le tar sũ-noog ye. Wakat ning menga b lebgda yirsi.” B le wilgame tɩ naoor wʋsgo, kamb nins ma rãmbã sẽn nong-b la sẽn ges b yell sõma b yãadmẽ wã tara yam n yɩɩd kamb nins ma rãmb sẽn pa ges b yell sõmã b yãadmẽ wã.

Ma rãmbã sẽn nong b kambã to-to wã tara yõodo. Rẽ wɛɛngẽ, Etazĩni porfesɛɛr a ye yʋʋr sẽn boond t’a Alan Schore yeela woto: “Bi-pɛɛlg ne a ma sã n nong taaba, biigã sã n wa bɩ, a na n tõog n yõga zood ne neb a  taabã nana-nana. La a ma wã sã n da pa nong-a, na n yɩɩ toog ne-a t’a yõg zood ne neb a taabã.”

Zu-bʋko, yam-ka-m-menga, bãase wall yɛl a taab tõe n kɩtame tɩ pag pa get a biig yell sõma, pa rẽ bɩ a pʋd n yĩm a yelle. (Ezai 49:15) La d pa wae n yãt rẽ ye. Wẽnnaam pʋd n naana pag t’a nong a biiga. Bãngdbã vaeesame n mik tɩ bi-pɛɛlg sã n doge, bũmb n be a ma wã yĩngẽ n kɩtdẽ tɩ rogmã yɩ nana, la kɩtdẽ tɩ bĩis-koomã wat sõma-sõma. Bõn-kãng sẽn be rapã ne pagbã fãa yĩnsẽ wã yĩnga, b tẽedame tɩ rẽ n kɩt tɩ b fãa tõe n nong b biigã.

Maana wãn tɩ nonglem wa beẽ?

Neb nins sẽn tẽed tɩ ninsaal puka a toor tɩ pa tũ ne naandã yetame tɩ pag sẽn nong a biig to-to wã me waa yaare, tɩ nebã mik tɩ yaa bõn-sõng tɩ b kell n talle. La rẽ yĩnga yãmb tẽedame tɩ ma sẽn nong a biig to-to wã yaa bũmb sẽn wa yaar woto bɩ?

Biiblã wilgda vẽeneg tɩ Wẽnnaam naanã ninsaal wa yẽ meng wẽnego, sẽn dat n yeel tɩ d tõe n dɩka Wẽnnaam togs-n-taare. (Sɩngre 1:27) Sẽn yɩɩd fãa, Wẽnnaam yaa nonglem. Tʋm-tʋmd a Zã yeela woto: “Ned ninga sẽn ka tar nonglem ka mi Wẽnnaam ye; tɩ bõe, Wẽnnaam yaa nonglem.” (1 Zã 4:8) Biiblã verse kãngã pa yet tɩ Wẽnnaam tara nonglem ye. A yetame tɩ Wẽnnaam yaa nonglem. Nonglmã yita yẽ nengẽ.

Biiblã bilgda nonglmã woto: “Nonglem maanda sũ-mare, la a pida ne neerlem. Nonglem ka maand sũ-kiir ye. Nonglem ka pẽgd a meng ye, la a ka wukd a meng ye. Nonglem ka maand sẽn ka zems ye, la a ka baood a meng sõngr bal ye, la a ka maand sũ-yikr ye, la a ka tagsd wẽng ye. Nonglem ka maand sũ-noog ne wẽng ye, a maanda sũ-noog ne sɩda. A maanda sugr ne bũmb fãa, la a tẽeda bũmb fãa, a gũuda a tẽeb pidsg ne bũmb fãa, la a tõe n tõoga toog fãa pʋgẽ. Nonglem ka sɛt abada.” (1 Korẽnt dãmba 13:4-8) Rẽ yĩnga d tõe n yeelame tɩ nonglem kãngã buud waa yaar sɩda?

Yãmb tagsda wãn to Wẽnnaam zug masã?

Wa d sẽn bilg nonglmã to-to tɩ loogã, yãmb sɩd rata ne y sũur fãa tɩ ned nong yãmb woto bɩ? Yaa vẽeneg tɩ ninsaal buud fãa pʋd n data woto. Bõe yĩnga? Bala tõnd yaa Wẽnnaam kamba. (Tʋʋma 17:29) Wẽnnaam naana tõnd tɩ d nong neb a taabã woto tɩ bãmb me nong tõnd woto. La d tõe n kɩsa sɩd tɩ Wẽnnaam nonga tõnd wʋsgo. (Zã 3:16; 1 Pɩɛɛr 5:6, 7) Biiblã verse ning sẽn be sõs-kãngã sɩngrẽ wã wilgame tɩ Wẽnnaam sẽn nong tõnd to-to wã yɩɩda pag sẽn nong a biig to-to wã. Pʋd n pa tar mak-n-taag ye.

Tõe tɩ y sokda y meng woto: ‘Wẽnnaam sã n tara yam, pãnga, la a nong tõndo, bõe yĩng t’a bas tɩ d namsdẽ? Bõe yĩng t’a bas tɩ kambã kiidẽ, tɩ wẽgbã beẽ, la nebã sãamd tẽngã?’ Woto yaa sogsg sẽn sɩd baood leokre.

Bãng-y tɩ y tõe n paama sogs-kãensã leoore. Neb milyõ rãmb sẽn yit tẽns wʋsg pʋsẽ paama sogs-kãensã leoore, b sẽn sak n zãms Biiblã ne a Zeova Kaset rãmbã yĩnga. Neb nins sẽn yiis zʋrnall kãngã wã ratame tɩ yãmb me maan woto. Yãmb sã n zãmsd Wẽnnaam Gomdã la y bʋgsd bũmb nins a sẽn naanã zug tɩ y bãngrã paasdẽ, y na n yãame tɩ d tõe n bãnga Wẽnnaam sẽn sɩd yaa a soaba. Y na n bãngame me tɩ Wẽnnaam “ka zãr ne tõnd fãa ye.”—Tʋʋma 17:27.

[Goam sẽn tar pãngã, seb-neng a 8]

Wẽnnaam sẽn nong tõnd to-to wã yɩɩda pag sẽn nong a biig to-to wã