A Nowe la sa-​kãsengã sɩd zĩndame, pa soalem ye

YÃMB rata dũni nebã sẽn vɩ ne taab ne laafɩ tɩ zabre, wẽnem, la namsg ka a pʋgẽ n zĩnd bɩ? Sã n yaa woto, kibar a ye sẽn zĩnd pĩnd wẽndẽ wã tõe n kenga y raoodo. La tõe tɩ y mii kibarã sõma. Yaa nin-​sõng a Nowe kibarã. A kaa koom koglg tɩ yẽ ne a zakã rãmb kẽ, n põs sa-​kãsengã sẽn ni n sãam dũniyã gill zug nin-​wẽnsã.

Kibay paood nebã sẽn mi dũniyã gill zug n ta kada. B gʋlsa a Nowe kibarã Sɩngr sak a 6 n tɩ ta 9 wã pʋgẽ, la b lebs n togsa rẽ alkʋrãanã pʋgẽ. Soalem wʋsgs pʋsẽ me, b gomda kiba-​kãng yelle. La rẽ yĩnga sa-​kãsengã yaa yell sẽn sɩd zĩnd bɩ, bɩ yaa soalem sẽn na yɩl tɩ nebã maan sẽn yaa tɩrga? Yʋʋm kobs la woto bãngdbã sẽn wẽed no-​koɛɛm yel-​kãngã zugu. La Biiblã sẽn yaa Wẽnnaam Gomdã wilgda vẽeneg tɩ yaa yell sẽn sɩd zĩndi, lakae pa soalem ye. Bɩ d ges a sẽn wilgd rẽ to-to:

Sɩngr sebrã wilgda sa-​kãsengã sẽn zĩnd yʋʋmd ningã, kiuug ningã, la daar ningã takɩ. A le wilga koglgã sẽn tɩ yals zĩig ningã, sẽn yɩ sasa ningã, la wakat ning tẽngã sẽn wa n kʋɩ zãngã. Sẽn paase, b wilga koglgã yalem, a zãntlem la a woglem sẽn yɩ to-to, la teed nins b sẽn tall n maan-a wã vẽenega. Sã n da yaa soalma, b ra pa na n tõog n wilg yɛlã vẽeneg-​vẽeneg woto ye.

Biiblã pʋgẽ, b sõdga neb yaab rãmb zĩis a yiibu, tɩ wilgdẽ t’a Nowe sɩd zĩndame. (1 Kibaya 1:4; Luk 3:36) A Ɛsdras ne a Luk maana vaeesg sõma n tõog n sõdg nin-​kãensã pʋgdg-​pʋgdga. A Luk sõdga a Zezi Kirist yaab rãmbã n tɩ tãag a Nowe.

No-​rɛɛs a Ezai, a Ezekɩɛlle, n paas tʋm-​tʋmd a Poll la a Pɩɛɛr goma a Nowe bɩ sa-​kãsengã yelle.​—Ezai 54:9; Ezekɩɛll 14:14, 20; Hebre dãmba 11:7; 1 Pɩɛɛr 3:19, 20; 2 Pɩɛɛr 2:5.

Sa-​kãsengã wɛɛngẽ, a Zezi Kirist me yeelã woto: “Bũmb ning sẽn zĩnd a Nowe wakatã na n zĩnda Ninsaal Biigã wakat me. Nebã rag n dɩtame la b yũuda, la b peesd pagba, la b kõt b kamb sɩdb hal tɩ ta daar ning a Nowe sẽn kẽ koom-​koglgã pʋgẽ wã; la sãoong sa-​kãsenga wa n sãama bãmb fãa.” (Luk 17:26, 27) Sa-​kãsengã sã n da pa yell sẽn sɩd zĩndi, dẽnd a Zezi sẽn gom “Nin-​saal Biigã wakat” yellã pa tar yõod ye.

Tʋm-​tʋmd a Pɩɛɛr pĩnd n togsame tɩ “neb sẽn laad neb” na n zĩndame, n paoogd Biiblã sẽn yet bũmb ninsã. A Pɩɛɛr wilgame tɩ bãmb “sẽn sakd bãmb mens wẽnga ratem” yĩnga, “bãmb ka rat n deeg tɩ . . . dũniyã sẽn da be [a Nowe wakatã] sãama koom sẽn lim-a wã yĩng ye.” Tõnd me na n zãgsame n pa sak n deeg bɩ? D kõn maan woto abada! A Pɩɛɛr paasame tɩ “yĩngr la dũniyã sẽn be masã wã bĩnga bugum yĩnga, bʋʋd kaoob la wẽn-​kɩɩsdbã sãoong daar sẽn na n ta wã.”​—2 Pɩɛɛr 3:3-7.

Wa sẽn yɩ to-to pĩndã, Wẽnnaam na n le sãama nin-​wẽnsã, la neb n na n põse. D sã n dɩk a Nowe togs-n-​taare, d na n zĩnda nin-​tɩrsã a Zeova sẽn na n fãag n kẽes dũni paalg pʋgẽ wã sʋka.