Bõe yĩng tɩ zak-​zak moonegã tar yõod rũndã-rũndã?

“Bãmb dag n zãmsda nebã la b moond a Zezi Kirist koe-​noogã wẽnd-​doogẽ wã la zagsã pʋs daar fãa n ka basdẽ ye.”​—TƲƲ. 5:42, Kãab-paalgã Koe-noogo.

1, 2. a) Wãn to la a Zeova Kaset rãmbã moond koɛɛgã tɩ nebã mi n yɩɩda? b) Bõe la d na n bãng sõs-kãngã pʋgẽ?

DŨNIYÃ gill zugu, nebã nong n yãta neb sẽn maneg b mens sõma n tũud taab yiib-yiib n kẽed zak-zak n wilgd nebã Biiblã sẽn yet bũmb ning Wẽnnaam Rĩungã wɛɛngẽ. Ned sã n sak n kelg la a wilg t’a rat n bãng n paasame, b kãabda a soabã sebr sẽn tik Biiblã zugu, la b wilg-a tɩ b na n wat n zãmsd-a-la Biiblã zaalem. Rẽ poore, b kẽeda zak ning sẽn pʋgdã pʋgẽ. Yãmb me sã n naag n tʋmda tʋʋm-kãnga, tõe tɩ y yãame tɩ naoor wʋsgo, nand tɩ y gom ne nebã, b bãngdame tɩ y yaa a Zeova Kaset soaba. Vẽenega, zĩig fãa, nebã miime t’a Zeova Kaset rãmbã moonda zak-zaka.

² Tõnd tũnugda ne manesem buud toor-toor n tʋmd tʋʋmd ning a Zezi sẽn bobl tõndã, sẽn yaa koɛɛgã mooneg la karen-biisã maanegã. (Mat. 28:19, 20) Tõnd moonda raasẽ, soayã noyã, la zĩis a taaba. (Tʋʋ. 17:17) D leb n tũnugda ne telefõn la lɛta n moond neb wʋsgo. D sẽn beẽ zĩig ning fãa me, d wilgda nebã Biiblã sẽn yetã. D tara sit wɛɛb ẽntɛrnetã pʋgẽ, tɩ nebã tõe n ges be n paam kibay sẽn yit Biiblã pʋgẽ ne buud goam sẽn yɩɩd 300. * Woto fãa kɩtdame tɩ koɛɛgã mooneg womd biisi. La zĩis wʋsgo, yaa zak-zak la d moond n yɩɩda. Bõe yĩng tɩ d moond zak-zaka? Sɩngame tɩ wãn tɩ yaa zak-zak la Wẽnnaam nin-buiidã moond rũndã-rũndã n yɩɩda? Bõe yĩng tɩ rẽ maaneg tar yõod rũndã-rũndã?

Tʋm-tʋmdbã sẽn da moond to-to

3. Bõe la a Zezi yeel tʋm-tʋmdbã koɛɛgã mooneg wɛɛngẽ, la rẽ wilgame tɩ wãn to la b ra segd n moone?

³ Yaa Biiblã n wilg tɩ d segd n moona zak-zaka. A Zezi sẽn tʋm tʋm-tʋmdbã tɩ b tɩ moonã, a yeel-b-la woto: “Yãmb sẽn kẽ tẽng ninga fãa, a sã n yaa tẽn-kãseng bɩ tẽn-bila, bɩ y bao ned sẽn zemse.” Wãn to la b ra segd n bao nin-kãense? A Zezi yeel-b lame tɩ b kẽ nebã zagsẽ. A yeela woto: ‘La yãmb sã n kẽ yi-kãnga, bɩ y ning-a barka. La yirã sã n zemse, bɩ y kɩt tɩ yãmb laafɩ wa a pʋgẽ.’ Rẽ yĩnga b ra segd n gũume tɩ nebã bool-b tɩ b yaool n tɩ moon-b bɩ? Ges-y a Zezi sẽn yeel bũmb ning n paasã: “La ned sã n ka reeg yãmba, la a ka kelg yãmb goama, yãmb sã n yi yi-kãng walla tẽn-kãnga, bɩ y pĩms y naoã tom.” (Mat. 10:11-14) Gom-kãensã wilgda vẽeneg tɩ tʋm-tʋmdbã sẽn da ‘kẽnd tẽng-tẽng n moond koe-noogã,’ b ra segd n kẽe nebã zagsẽ n da gũ tɩ nebã bool-b ye.—Luk 9:6.

4. Biiblã zĩ-bʋg la b gomd zak-zak moonegã yell takɩ?

⁴ Biiblã wilgda vẽeneg tɩ tʋm-tʋmdbã moona zak-zaka. Wala makre, kiris-neb tigingã luglg yʋʋmd 33 wã poor bilfu, Tʋʋm 5:42 wilgame tɩ tʋm-tʋmdbã ra zãmsda nebã la b moond a Zezi Kirist koe-noogã wẽnd-doogẽ wã la zak-zak daar  fãa n ka basdẽ ye. Sẽn zems yʋʋm 20 rẽ loogr poore, tʋm-tʋmd a Poll tẽegã Efɛɛz tigingã kãsem dãmb woto: ‘Mam ka kong tɩ togs yãmb bũmb nins fãa sẽn na n sõng yãmbã ye. La mam ka zoe rabeem tɩ moon koɛɛgã la tɩ zãms yãmb nebã sʋk la zak-zak ye.’ A Poll ra kẽnd n geta kãsem dãmbã b sẽn da nan pa lebg kiris-nebã bɩ? Yaa vẽeneg t’a sɩd maana rẽ, bala a zãms-b-la bũmb wʋsgo. Wala makre, b sẽn segd n tek yam n kos sugr to-to, la b sẽn segd n tẽ soaal a Zezi to-to. (Tʋʋ. 20:20, 21) Sebr a yembr (Robertson’s Word Pictures in the New Testament) wɛgsa Tʋʋm 20:20 wã, n yeel a Poll wɛɛngẽ woto: “Pa zaalem yĩng la koe-moond kãseng kãngã sẽn moon zak-zakã ye.”

Rũndã-rũndã koe-moondbã yaa wa sʋya

5. A Zoɛll bãngr-gomdã pʋgẽ, b maka koɛɛgã mooneg ne bõe?

⁵ Koɛɛgã b sẽn moon pipi kiris-nebã wakatẽ wã ra wilgda tʋʋm-kãseng ning sẽn na n zĩnd rũndã-rũndã wã. No-rɛɛs a Zoɛll maka kiris-neb nins sẽn paam vʋʋsem sõngã zaeebã koe-mooneg ne sʋy sẽn sãamd teedo. (Zoɛll 1:4) Sʋyã kẽngda wa sodaas kʋʋngo, tɩ baa fʋɩ pa tõe n gɩdg-b ye. B kẽeda zags pʋsẽ, la b wãbd bũmb nins fãa b sẽn segdã. (Karm-y Zoɛll 2:2, 7-9.) Woto sɩd wilgdame tɩ Wẽnnaam nin-buiidã modgdame n moond koɛɛgã ne raood la yẽesem rũndã-rũndã. Sẽn na yɩl n pids bãngr-gom-kãnga, kiris-neb nins sẽn paam vʋʋsem sõngã zaeebã la “piis a taabã” sẽn yaa b tũud-n-taasã moonda zak-zak n yɩɩda. (Zã 10:16) La sɩnga wãn tɩ tõnd a Zeova Kaset rãmbã wa moond wa tʋm-tʋmdbã sẽn moon to-to wã?

6. Yʋʋmd 1922 wã, bõe la b yeel zak-zak moonegã wɛɛngẽ, la neb kẽer manesem yɩɩ wãna?

⁶ Yʋʋmd 1919 wã tɛka, b wilgame tɩ kiris-ned fãa segd n moona koɛɛgã. Wala makre, yʋʋmd 1922 sa-sik kiuug 15 Gũusg Gasgã, sõsg ning gom-zug sẽn yet tɩ “koɛɛgã mooneg yaa tɩlae” wã tẽega kiris-neb nins sẽn paam vʋʋsem sõngã zaeebã tɩ tara yõod wʋsg tɩ b taas nebã bũmb ning Biiblã  sẽn yetã, n moon-b b zãgsã pʋsẽ n kɩs kaset tɩ saasẽ rĩungã waoong ta n saame. B wilga Bulletin wã (sẽn lebg Rĩungã Tʋʋmd masã wã) pʋgẽ b sẽn segd n maan dẽ to-to. La sɩngrẽ wã neb nins sẽn sɩd ra moond zak-zakã sõor da paoodame. Kẽer zãgsa koɛɛgã moonego. B baoa bʋʋm toɛy-toɛy n kõ b mense, la yellã meng yaa tɩ kẽer da getame tɩ zak-zak moonegã paoogda bãmba. Sẽn mik tɩ zak-zak moonegã wa n paamda pãngã, nin-kãensã sʋk neb wʋsg wa n lak n basa a Zeova siglgã.

7. Yʋʋmd 1950 wã tɛka, wa n lebga tɩlae tɩ b maan bõe?

⁷ Yʋʋm nins sẽn pʋgl rẽ poorã, koe-moondbã sõor wa n tara paasgo. Wa n lebga tɩlae tɩ b zãms nebã tɩ b tõog n moon zak-zak sõma. Wala makre, Etazĩni, yʋʋmd 1950 wã poor bilfu, Kaset rãmb koabg zugu, bãmb 28 ra pʋɩta nebã seb-vãado, bɩ n yas soayã noy ne zʋrno rãmb bala. Kaset rãmb koabg zugu, sẽn yɩɩd bãmb 40 n da vaand koɛɛgã moonego, hal n maand kiis n pa moon baa bilf meng ye. Bõe la b maan n sõng neb nins fãa sẽn deeg lisg n lebg kiris-nebã tɩ b tõog n moon zak-zaka?

8, 9. Bõe la b sigl yʋʋmd 1953, la rẽ woma bi-bʋse?

⁸ Tẽns toɛy-toɛy tigis-kãseng a ye sẽn zĩnd Niuyork yʋʋmd 1953 sasa, b goma zak-zak moonegã yell n yɩɩda. Saam-biig a Nathan Knorr wilgame tɩ sẽn yɩɩd fãa kiris-neb nins sẽn yaa taoor lʋɩtbã segd n sõnga kaset soab fãa t’a tõog n moond zak-zak wakat fãa. A yeelame tɩ “ned kam fãa segd n tõog n moona zak-zaka.” Woto kɩtame tɩ b sigl koɛɛgã mooneg zãmsg dũniyã gill zugu, sẽn na yɩl n tõog n moon zak-zaka. B zãmsa neb nins sẽn da nan pa sɩng zak-zak moonegã b sẽn na n maan to-to n sɩng sõsg ne nebã Biiblã zugu, la b leokd b sogsgã.

⁹ B sẽn sigl zãms-kãngã wã woma biis wʋsgo. Yʋʋm piig pʋgẽ bala, dũniyã gill zugu, koe-moondb koabg zugu, yɩɩ bãmb 100 n paase. B sẽn lebg n tɩ ges-b rãmbã koabg zugu, yɩɩ bãmb 126 n paase, la b sẽn zãmsd neb nins Biiblã koabg zugu, bãmb 150 n paase. Rũndã-rũndã, koe-moondb sõor sẽn kolg milyõ a yopoe n moond Rĩungã koe-noogã dũniyã gill zugu. Woto yaa bʋʋm sẽn wilgd t’a Zeova ningda modgr ning a nin-buiidã sẽn maand n moond zak-zakã barka.—Ezai 60:22.

B ningda nebã bãnde, tɩ b na n paam n põse

10, 11. a) Wala Ezekɩɛll sak a 9 sẽn wilgdã, bõe la Wẽnnaam vẽneg a Ezekɩɛll t’a yã? b) Wãn to la bũmb ning a sẽn yã wã paamd pidsg rũndã-rũndã?

¹⁰ Wẽnnaam vẽnega no-rɛɛs a Ezekɩɛll t’a yã bũmb tɩ wilgdẽ tɩ zak-zak moonegã tara yõodo. A yãa rap a yopoe. A yoobã zãada zab-teedo, t’a ye ning fu-peel n zãad bũmb sẽn tar n gʋlsdẽ. La b yeela ra-kãnga t’a “kẽng n saag zĩigã fãa,” tẽngã pʋgẽ n “ning neb nins fãa sẽn wõosd n yãbd bõn-wẽns nins sẽn maand tẽngã pʋgẽ wã yĩngã rĩy bãnde.” Bãndã ningr poore, b yeela rap a yoob nins sẽn zãad zab-teedã tɩ b kʋ neb nins fãa sẽn pa tar bãndã.—Karm-y Ezekɩɛll 9:1-6.

¹¹ D miime tɩ bãngr-gom-kãngã pʋgẽ, rao ning sẽn “yer fu-peellã” makda kiris-neb nins sẽn paam vʋʋsem sõngã zaeeb n ket tẽng zugã. Kiris-nin-kãensã sẽn moond koɛɛgã la b maand karen-biisã, b ningda neb nins sẽn lebgd Kiristã “piis a taabã” rĩy bãnde. (Zã 10:16) Bãndã  makda bõe? Wala bũmb sẽn be ned dĩirẽ sẽn pa tõe n solgã, bãndã yaa kaset sẽn wilgd vẽeneg tɩ nin-kãens rɩka b mens n kõ a Zeova n deeg lisg n lebg a Zezi Kirist karen-biisi, la tɩ b yeelga nin-paalga. (Ef. 4:20-24) Nin-kãensã b sẽn mak ne piisã lebgda bãgr a ye ne kiris-neb nins sẽn paam vʋʋsem sõngã zaeebã, n sõngd-b n ningd neb a taabã bãndã, sẽn yaa tʋʋmd sẽn fãagd yõyã.—Wil. 22:17.

12. Wãn to la b sẽn vẽneg a Ezekɩɛll t’a yã b sẽn ningd nebã rĩy bãndã wilgd koɛɛgã mooneg yõodo?

¹² Bũmb ning a Ezekɩɛll sẽn yã wã wilgda bʋʋm a ye sẽn kɩt tɩ d segd n wɩng ne neb nins sẽn “wõosd n yãbdã” baoobã. Yaa yõor yelle, bala ka la bilfu, neb a yoobã sẽn zãad zab-teedã sẽn makd tãb-biis sẽn be saasẽ wã na n sãama neb nins sẽn pa tar bãndã. Sãan-kãng wɛɛngẽ, tʋm-tʋmd a Poll yeelame tɩ Zu-soab a Zezi ne a “malɛg-kãsemsã” na n wa “sɩbga neb nins sẽn ka mi Wẽnnaam la sẽn ka sakd tõnd Zu-soab a Zezi koe-noogã.” (2 Tes. 1:7, 8) D bãng tɩ yaa nebã sẽn tall manesem ning ne koe-noogã zug la b na n tik n kao b bʋʋdo. Dẽnd Wẽnnaam Rĩungã segd n mooname hal n tɩ tãag saabã wakate. (Wil. 14:6, 7) Woto yaa tʋʋmd sẽn yaa tɩlae la sẽn pa reem yell ne neb nins sẽn dɩk b mens n kõ a Zeova wã.—Karm-y Ezekɩɛll 3:17-19.

13. a) Bõe la tʋm-tʋmd a Poll bãng t’a segd n maaname, la bõe yĩnga? b) Bõe la yãmb get tɩ y segd n maaname n sõng y moonegã zĩigẽ neba?

¹³ Tʋm-tʋmd a Poll bãngame t’a segd n moona neb a taabã koe-noogã. A yeela woto: “Mam tara Gɛrk rãmbã ne weoog neb samde, yam dãmbã la sẽn ka yam dãmb samde. Woto yĩnga, mam data ne m sũur fãa n moon koe-noogã yãmb sẽn be Romã me sʋka.” (Rom 1:14, 15) A sẽn da paam tɩ Wẽnnaam zoe a nimbãanegã yĩnga, a bãngame tɩ sẽn na yɩl n wilg a mi-beoogo, yaa tɩlae t’a modg n sõng neb a taabã me tɩ b paam Wẽnnaam lohormã. (1 Tɩm. 1:12-16) Dẽnd ra yaa wa a tara nebã fãa samde, tɩ yaa ne koe-noogã mooneg bal la a tõe n yao-ba. Yãmb me getame tɩ y tara neb nins sẽn be y moonegã zĩigẽ wã samd bɩ?—Karm-y Tʋʋm 20:26, 27.

14. Bʋʋm kãseng bʋg n kɩt tɩ d moond koɛɛgã zãma sʋk la zak-zaka?

¹⁴ Yaa sɩd tɩ tara yõod tɩ d sõng nebã tɩ b paam n põse, la bʋʋm sẽn yaa kãseng n yɩɩd rẽ n kɩt tɩ d moond zak-zakã. Bãngr-gomd ning sẽn be Malaki 1:11 (NW ) wã pʋgẽ, a Zeova yeela woto: “Sẽn sɩng ne wĩndg pukr n tɩ ta a lʋɩɩsẽ menga, mam yʋʋrã na n yɩɩ kãseng tẽn-tẽnsã sʋka, la . . . b na n maana kũun mam yʋʋrã yĩnga, kũun sẽn yaa sõng menga; bala mam yʋʋrã na n yɩɩ kãseng tẽn-tẽnsã sʋka.” Gom-kãngã pidsdame, rẽ n kɩt tɩ neb nins sẽn dɩk b mens n kõ a Zeova wã moond koe-noogã n pẽgd a yʋʋrã nebã sʋk dũniyã gill zugã. (Yɩɩl 109:30; Mat. 24:14) Bʋʋm kãseng sẽn kɩt tɩ tõnd moond zãma sʋk la zak-zakã yaa sẽn na yɩl n pẽg a Zeova.—Heb. 13:15.

Tʋʋmd sẽn yaa kãseng n wate

15. a) Bõe la Israɛll nebã maan rasem a yopoe soabã? b) Bõe la rẽ wilgd koɛɛgã mooneg wɛɛngẽ?

¹⁵ Koe-moonegã na n wa lebga wãn to?  Zeriko gũbgrã kibarã b sẽn togs a Zozue sebrã pʋgẽ wã wilgda tõnd a sẽn na n yɩ to-to. D tẽeg tɩ nand tɩ Wẽnnaam sãam Zeriko, a yeela Israɛll nebã tɩ b gilg tẽngã vugr daar fãa tɩ ta rasem a yoobe. La rasem a yopoe soabã, b ra segd n gilga wʋsg n yɩɩd raasenkamã. A Zeova yeela a Zozue yaa: “Bɩ y gilg [tẽngã] naoor a yopoe tɩ maan-kʋʋdbã peeb bardã. La yãmb sã n wʋm tɩ b peebd bardã, bɩ nebã fãa kaas ne koe-kãsenga. La tẽngã lalgã na n lʋɩɩ tẽnga.” (Zoz. 6:2-5) Tõe tɩ d na n wa moona koɛɛgã wʋsg n paase. Sẽn yaa a soab fãa, dũni kãngã sãoong sã n ta, na n mikame tɩ d moona a Zeova yʋʋrã la a Rĩungã wʋsg zĩig fãa n yɩɩd raasenkam.

16, 17. a) Bõe la d na n maan nand tɩ “to-kãsengã” sa? b) Bõe la d na n bãng sõsg ning sẽn pʋgdã pʋgẽ?

¹⁶ Tõe tɩ wakat n na n wa tɩ koɛɛgã d sẽn moondã na n yɩ wa zabr koɛɛg sẽn yaa kãsenga. Wilgr sebrã pʋgẽ, b maka bʋ-kaoor koees sẽn yaa kãseng ne ‘sapɩlem t’a yembr fãa zɩslem kolg kɩlo pis-nu la a yopoe.’ * Wilgr 16:21 wã yetame tɩ toog ning a sẽn wat ne wã “yaa kãsengã.” D nan pa mi zak-zak moonegã sẽn na n wa tall yõod ning Wẽnnaam yaoolem bʋ-kaoorã koees taasg pʋgẽ ye. La d tõe n kɩsa sɩd tɩ nand tɩ “to-kãsengã” sa, rẽ tɩ d moona a Zeova yʋʋrã wʋsg n yɩɩd b sẽn da moon-a to-to hal pĩnd wẽndẽ n tãag masã wã.—Wil. 7:14; Eze. 38:23.

¹⁷ D sẽn gũud tʋʋm-kãseng ning sẽn watã yĩnga, bɩ d ket n moond Rĩungã koe-noog ne yẽesem. Zak-zak moonegã sasa, zu-loe-bʋs la d paamda, la wãn to la d tõe n tõog zu-loe-kãense? D na n bãnga rẽ sõsg ning sẽn pʋgdã pʋgẽ.

[Tẽngr not rãmbã]

Y na n leokame tɩ bõe?

• Biiblã zĩ-bʋs n wilgd tɩ d segd n moona zak-zaka?

• Bõe la b maan n wilg tɩ zak-zak moonegã tara yõod rũndã-rũndã?

• Bõe yĩng tɩ neb nins sẽn dɩk b mens n kõ a Zeova wã segd n moon koɛɛgã?

• Tʋʋm-kãseng bʋg n wate?

[Zãmsgã sogsgã]

[Foto rãmba, seb-neng 12]

Wa tʋm-tʋmd a Polle, yãmb me getame tɩ y segd n moona neb a taabã bɩ?

[Foto, seb-neng 13]

A Nathan Knorr, 1953