D sẽn tõe n tõog zak-zak moonegã zu-loees to-to
D sẽn tõe n tõog zak-zak moonegã zu-loees to-to
“Baa neb wʋsg sẽn kɩɩsã, tõnd Wẽnnaam kõo tõnd daood tɩ d togs yãmb [Wẽnnaam] koe-noogã.”—1 TES. 2:2.
1. Zu-loe-bʋs la a Zeremi paam-yã, la a maana wãn n tõog-ba?
A ZEREMI me ra yaa ned wa tõndo. A Zeova sẽn wa n yeel-a t’a yãk-a lame t’a lebg “no-rɛɛs buudã fãa yĩngã,” a yeela woto: “Zusoab a Wẽnnaam, mam ka mi goam ye, mam nan yaa biig bala.” La a Zeremi kell n teega a Zeova n sak tʋʋmd ning a sẽn bobl-a wã. (Zer. 1:4-10) Baa ne nebã sẽn da pa kelgd-a, n yaand-a la b pãbd-a wã, a kell n taasa nebã a Zeova koeesã sẽn yɩɩd yʋʋm 40 pʋgẽ. (Zer. 20:1, 2) Sasa ninga a ra tagsame t’a sẽn bas tʋʋmdã n são. La a kell n modgame n taas koɛɛg nebã sẽn pa nonge, la neb wʋsg pa sak n kelg ye. Ne Wẽnnaam sõngre, a Zeremi tõog n tʋma tʋʋmd a sẽn da pa na n tõog n tʋm a sã n da teeg a meng pãnga.—Karm-y Zeremi 20:7-9.
2, 3. Zu-loe-bʋs la Wẽnnaam nin-buiidã tar rũndã-rũndã tɩ wõnd a Zeremi zu-loeesã?
2 Rũndã-rũndã, Wẽnnaam nin-buiidã sʋka, wʋsg tagsg yaa wa a Zeremi tagsgã buudu. Zak-zak moonegã wɛɛngẽ, tõnd sʋkã neb wʋsg ra tagsdame tɩ yaa tʋʋmd b sẽn pa na n tõog n tʋm abada. La d sã n wa n bãng t’a Zeova ratame tɩ d moon koe-noogã, d basda yɩɩrã la d moond koɛɛgã. Rẽ poor menga, tõnd sʋkã neb wʋsg yãa yɛl b vɩɩmã pʋgẽ tɩ kɩt tɩ lebg toog tɩ b kell n moon koɛɛgã. Sɩd-sɩda yɩl n sɩng zak-zak moonegã la d kell n moon n tɩ tãag saabã wakat pa nana ye.—Mat. 24:13.
3 Yãmb zãmsda Biiblã ne a Zeova Kaset rãmbã hal n wat tigissã sẽn kaoos bilfu, n yaool n pa rat n sɩng zak-zak moonegã bɩ? Bɩ yãmb reega lisg n lebg a Zeova Kaset soaba, tɩ baa ne yãmb sẽn tar laafɩ wã, yaa toog ne-y tɩ y moon zak-zak bɩ? Sã n yaa woto bɩ y bãng tɩ dũniyã gill zugu, neb buud fãa modgdame n tõogd zak-zak moonegã zu-loeese. La ne a Zeova sõngre, yãmb me tõe n tõogame.
D sẽn tõe n paam daood to-to
4. Bõe n sõng tʋm-tʋmd a Poll t’a tõog n moon koe-noogã ne raoodo?
4 Yaa vẽeneg tɩ y miime tɩ koɛɛgã sẽn moond dũniyã gill zugã pa tũ ne ninsaal pãng bɩ a yam ye. Yaa Wẽnnaam vʋʋsem sõngã sõngr yĩnga. (Zak. 4:6) Vʋʋsem sõngã sõngda kiris-ned fãa me koɛɛgã mooneg pʋgẽ. (2 Kor. 4:7) Wala makre, tʋm-tʋmd a Poll goma wakat ning kɩɩsdb sẽn da nams yẽ ne a tʋmd-n-taag yelle, n yeel woto: “Tõnd sẽn da nams n paam toog wʋsg Filipi, . . . baa neb wʋsg sẽn kɩɩsã, tõnd Wẽnnaam kõo tõnd daood tɩ d togs yãmb bãmb koe-noogã.” (1 Tes. 2:2; Tʋʋ. 16:22-24) Tõe tɩ d zɩ n tags tɩ wakat ninga ra pa nana ne a Poll meng sẽn yɩ koe-moond sẽn da tar yẽesmã t’a moon koɛɛgã ye. La wala tõnd fãa sẽn segd n teeg a Zeova sẽn na yɩl n tõog n moon koɛɛgã ne raoodã, a Poll me ra segd n maana woto. (Karm-y Efɛɛz rãmba 6:18-20.) Wãn to la tõnd tõe n dɩk a Poll togs-n-taare?
5. Bõe la d tõe n maan n paam daood n moon koɛɛgã?
5 Bũmb a ye d sẽn tõe n maan n paam daood n moon yaa d sẽn na n pʋʋs a Zeova. So-pakd a ye yeela woto: “Mam pʋʋsda a Zeova sẽn na yɩl n tõog n gom ne bas-m-yam, sẽn na yɩl tɩ m gomdã kẽ nebã sũyã, la sẽn na yɩl n paam sũ-noog koɛɛgã mooneg pʋgẽ, bala tʋʋmdã yaa a Zeova tʋʋmde, lakae pa tõnd tʋʋmd ye. Dẽnd sã n pa tũ ne a Zeova sõngre, d pa tõe n maan baa fʋɩ ye.” (1 Tes. 5:17) Tõnd fãa segd n pʋʋsa a Zeova wakat fãa n kos-a t’a sõng-d ne a vʋʋsem sõngã tɩ d moon koɛɛgã ne raoodo.—Luk 11:9-13.
6, 7. a) Bõe la Wẽnnaam kõ a Ezekɩɛll vẽnegr pʋgẽ, la a võorã yaa bõe? b) Bõe la a Ezekɩɛll vẽnegrã zãmsd Wẽnnaam nin-buiidã rũndã-rũndã?
6 A Ezekɩɛll sebrã wilgda bũmb a to me sẽn tõe n sõng tõnd tɩ d tõog n moon ne raoodo. Vẽnegr pʋgẽ, Wẽnnaam kõo a Ezekɩɛll seb-pindem sẽn tar “yãbr ne wiisg la sũ-sãoong” goam a nens a yiibã fãa, n yeel-a t’a wãbe. A yeel-a-la woto: “Ninsaal biiga, wãb sebr ninga mam sẽn kõ foomã n pid f pʋga.” Woto võor yaa bõe? A Ezekɩɛll ra segd n modgame tɩ koɛɛg ning a sẽn segd n togsã kẽ yẽ mengã yamã ne a sũurã sõma, hal tɩ wa lebg rẽ yell bal la a tagsda. No-rɛɛsã yeela woto: “La mam wãb-a lame. La a sẽn ta mam noorã pʋgẽ, a lebga noog wa sɩɩdo.” Wẽnnaam koeesã a Ezekɩɛll sẽn da taasd nin-buiidã ra noom-a-la wa sɩɩdo. A ra getame tɩ yaa zu-noog tɛkẽ, a sẽn gomd a Zeova yʋʋr yĩngã, la a sẽn paam n na n tʋm tʋʋmd ning Wẽnnaam sẽn bobl-a wã, baa ne a sẽn da segd n taas koɛɛgã neb wʋsg sẽn da pa rat n kelgã.—Karm-y Ezekɩɛll 2:8–3:4, 7-9.
7 A Ezekɩɛll vẽnegrã zãmsda Wẽnnaam rũndã-rũndã nin-buiidã bũmb sẽn tar yõodo. Tõnd me tara koɛɛg sẽn tar pãng n na n taase, tɩ neb wʋsg yaool n pa nong-a ye. Sẽn na yɩl n ket n getẽ tɩ koɛɛgã mooneg yaa zu-noog a Zeova sẽn kõ-do, d segd n karemda Biiblã la d zãmsd-a wakat fãa. D sã n dat n wʋm Wẽnnaam Gomdã sẽn yetã võor sõma, d pa segd n zãmsd-a zugẽ-zugẽ la d vaandẽ me ye. D segd n zãmsda Biiblã sõma la d karemd-a wakat fãa, la d bʋgsd d sẽn karemdã zug sõma wakat fãa.—Yɩɩl 1:2, 3.
D sẽn tõe n sɩng sõsg ne nebã to-to
8. Bõe la koe-moondb kẽer maan n tõog n sɩng sõsg ne nebã zak-zak moonegã sasa?
8 Ne koe-moondb wʋsgo, yaa f sẽn na n maan to-to n sɩng sõsg ne ned zak-zak moonegã sasa wã n yaa toog n yɩɩda. Sɩd-sɩda, zĩis kẽere, pa nana tɩ f tõog n sɩng sõsg ne ned ye. Sẽn na yɩl n tõog n moon nebã nana-nana, koe-moondb kẽer dengd n togsa kɛlgdã goam bilf bãmb mengã sẽn segle, tɩ rẽ poor bɩ b kõ-a seb-vãoogo, wala b sẽn wilg zĩ-gũbrã pʋgẽ wã. Seb-vãoogã gom-zugã, bɩ foto rãmb sẽn be a pʋgẽ wã tõe n kɩtame tɩ kɛlgdã rat n bãng sebrã sẽn yet bũmb ninga. Woto kɩtdame tɩ d tõog n wilg-a d waoongã võor koɛɛg-koɛɛga, la d sok-a sokre. D leb n tõe n wilga d kɛlgdã seb-vãad toɛy-toɛy a tã bɩ a naase, la d yeel-a t’a yãk a sẽn dat a soaba. Tõnd tʋʋmdã pa tek seb-vãad pʋɩɩb bɩ seb-vãadã zug sõsg zak fãa pʋgẽ ye. D rat n sõsã Biiblã zug ne nebã tɩ b wa sak n zãms Biiblã.
9. Bõe yĩng tɩ tar yõod tɩ d segl d mens sõma?
9 Sẽn yaa manesem ning fãa la y na n tũnug n sɩng sõsg ne nebã, y sã n segl y mens sõma, na n sõng-y lame tɩ y paam yẽesem zak-zak moonegã pʋgẽ. So-pakd a ye yeela woto: “Mam sã n segl m meng sõma, m sũur yaa noog wʋsgo. Bala kɩtdame tɩ mam dat n tũnug ne rẽ n sõs ne nebã.” So-pakd a to me yeela woto: “Mam sã n zoe n mi sɛb nins mam sẽn dat n kãab nebã sẽn yet bũmb ningã, mam paamda yẽesem n na n kãab nebã seb-kãense.” Yaa sõma tɩ d lebgd n togsd bũmb ning d sẽn segl n dat n togs kɛlgdbã d sũurẽ n yɩlemdẽ. La neb kẽer yãame tɩ sẽn yaa sõma n yɩɩd yaa b sẽn na n zẽkd b koɛɛg n togsdẽ n yɩlemdẽ. Bala woto kɩtdame tɩ b tõe n maan b sẽn tõe fãa a Zeova yĩnga.—Kol. 3:23; 2 Tɩm. 2:15.
10. Bõe la b tõe n maan n kɩt tɩ koe-moonegã tigisg naf nebã fãa?
10 Koe-moonegã tigisg sã n segl sõma, kɩtdame tɩ zak-zak moonegã womd biisi, la kõt-d sũ-noogo. Daarã verse sã n gomd koɛɛgã mooneg yelle, y tõe n karm-a lame la y sõs a zug bilfu. Saam-biig ning sẽn lʋɩt tigis-kãng taoorã segd n maaga a yĩng n wilg b sẽn tõe n maan to-to n moon neb nins sẽn be moonegã zĩigẽ wã nana-nana, walla a kɩt tɩ b maan mak-n-wilgi. A tõeeme me n wilg bũmb ning zug b sẽn tõe n sõs ne nebã daar-n-kãng tɩ b sak n kelge. Woto na n sõnga nebã tɩ b tõog n moon koɛɛgã sõma. Kãsem dãmbã la neb nins fãa sẽn lʋɩt tigis-kãngã taoorã sã n dengd n segend b mens sõma, na n sõng-b lame tɩ b tõog n maan woto fãa, la b tõog tɩ tigisgã ra zʋʋg wakatã ning b sẽn yãkã ye.—Rom 12:8.
Kelgrã yõodo
11, 12. D sã n maag d yĩng n kelg nebã sõma, wãn to la tõe n sõng tõnd tɩ d taas nebã koe-noogã? Wilg-y makre.
11 Seglgã yaa sõma, la rẽ bal pa sek ye. D sã n wilgd nebã tɩ b yell pak-d lame, na n sõng-d lame tɩ d tõog n sɩng sõsg ne nebã tɩ kẽ-b sõma. D sã n kelgd nebã sõma, d wilgame tɩ b yell pak-d lame. Tigims sull yel-gɛt a ye yeela woto: “D sã n maagd d yĩng n kelgd nebã sõma, tõe n kɩtame tɩ b sak n kelg koe-noogã. La yaa woto la d wilgd nebã tɩ b yell sɩd pak-d lame.” Wa kibar ning sẽn pʋgdã sẽn wilgdã, d sã n sɩd maag d yĩng n kelg nebã sõma, tõe n kɩtame tɩ b sak n kelg sõma.
12 Fãrens zʋrnall a ye (Le Progrès) pʋgẽ, pag a ye gʋlsa lɛtr n wilg tɩ yẽ kiuug a tãab bi-pɛɛlg sẽn maan kaalem poor bilfu, neb a yiib n wa n wẽ yẽ kʋɩlengã. Lɛtrã pʋgẽ a yeela woto: “Zĩig pʋgẽ bala mam bãngame tɩ yaa a Zeova Kaset rãmba. Mam da rat n dig-b lame, la m yãame tɩ b zãada sebr sẽn gomd bũmb ning sẽn kɩt tɩ Wẽnnaam bas tɩ namsgã beẽ wã yelle. Mam basame tɩ b kẽ sẽn na yɩl n wilg-b vẽeneg tɩ b pa togsd sɩd ye. . . . Kaset rãmbã maana lɛɛr a ye la zaka. B maaga b yĩng n kelg maam sõma. La b sẽn wa n loogdẽ wã, mam sũur yɩɩ noog wʋsg hal tɩ m dat tɩ b lebg n wa nindaare.” (Rom 12:15) Kaoosg zugẽ, a sakame n na n zãms Biiblã. Pʋg-kãngã sẽn tẽr bũmb ning yaa Kaset rãmb a yiibã sẽn maag b yĩng n kelg-a to-to wã lakae pa b sẽn yeel-a bũmb ningã ye. La woto zãmsda tõnd bũmb wʋsgo.
13. Wãn to la tõnd tõe n maneg koɛɛgã tɩ zems ne neb nins d sẽn moondã yɛla?
13 D sã n maagd d yĩng n kelgd nebã sõma, d na n bãng bũmb ning sẽn kɩt tɩ Wẽnnaam Rĩungã waoong yaa tɩlae ne-bã. Woto sõngda tõnd tɩ d tõe n taas-b koe-noogã sõma. Koe-moondb nins sẽn maagd b yĩns n kelgd nebã koe-mooneg nong n womda biisi. (Yel. 20:5) B wilgda neb nins b sẽn moondã tɩ b yell sɩd pak-b lame. B gʋlsda nebã yʋya, b adɛrs rãmba, la b sogsgã bɩ bũmb ning b sẽn dat n bãng n paasã. Ned sã n dat n bãng bũmb bɩ a sã n pa wʋmd bũmb võore, b maanda vaeesg n lebg n kẽng n tɩ wilg a soabã. Wala tʋm-tʋmd a Polle, b manegda koɛɛgã tɩ zems ne ned ning b sẽn moondã yɛla. (Karm-y 1 Korẽnt dãmba 9:19-23.) Woto kɩtdame tɩ nebã sakd n kelgd koe-noogã, la wilgdẽ me tɩ b rɩkda “tõnd Wẽnnaam nimbãan-zoeerã” togs-n-taare.—Luk 1:78.
D ra tall tags-kɛg ye
14. D sã n wa moond koɛɛgã, wãn to la d tõe n dɩk a Zeova togs-n-taare?
14 A Zeova sẽn naan tõnd tɩ d tõe n yãk yam n maan d sẽn datã, a wilgame t’a nanda tõndo. Baa ne a sẽn yaa pãng sẽn ka to soabã, a pa modgd ned baa a ye t’a tũ-a ye. A ratame tɩ nebã tũ-a a nonglmã yĩnga, la a ningda neb nins sẽn nand segls nins a sẽn dɩkã barka. (Rom 2:4) Tõnd sẽn yaa Wẽnnaam tʋm-tʋmdbã, d sã n wa moond koe-noogã, d segd n moona wa Wẽnnaam sẽn yaa nimbãan-zoetã sẽn dat tɩ d moon to-to wã. (2 Kor. 5:20, 21; 6:3-6) Rẽ n so tɩ d pa segd n tall tags-kɛg neb nins sẽn be d moonegã zĩigẽ wã zug ye. Bõe n tõe n sõng tõnd tɩ d ra tall tags-kɛga?
15. a) Bõe la a Zezi yeel a karen-biisã tɩ b maane, nebã sã n pa kelg koɛɛgã? b) Bõe n tõe n sõng tõnd tɩ d kell n bao pʋ-peelem dãmbã?
15 A Zezi sagla a karen-biisã tɩ neb kẽer sã n pa kelg koɛɛgã bɩ b ra sãam b sũur wʋsg ye. La tɩ b kell n bao pʋ-peelem dãmba. (Karm-y Matɩe 10:11-15.) Sẽn na yɩl n tõog n maan woto, d segd n yãka bũmb takɩ d sẽn dat n wa maane. Saam-biig a ye maka a meng ne ned sẽn tuud sãnem. A yeela woto: “Daar fãa mam baooda sãnem gilg a yembre, rat n yeel tɩ ned sẽn nong sɩdã.” Saam-biig a to me yeela woto: “Semen fãa mam baooda ned sẽn na n sak n kelg maam, tɩ rasem a wãn poor bɩ m lebg n tɩ sõs ne-a.” Koe-moondb kẽer modgdame tɩ b sã n paam sor bɩ b karem Biiblã baa verse a ye n wilg b kɛlgdbã. Bõe la yãmb me tõe n bao n maane?
16. Bõe yĩng tɩ d segd n ket n moond koɛɛgã?
16 Pa moonegã zĩigẽ nebã sẽn na n kelgd tõnd bal la wilgd tɩ zak-zak moonegã womda biis ye. Vẽenega, koɛɛgã mooneg sõngda pʋ-peelem dãmbã tɩ b wa paam fãagre, la pa rẽ bal la a yoodã ye. Yaa zu-noog d sẽn tũnugd n wilgd a Zeova d nonglem. (1 Zã 5:3) Koɛɛgã mooneg kɩtdame tɩ d ra paam zɩɩm samd ye. (Tʋʋ. 20:26, 27) Ne koɛɛgã moonego, d keoogda nin-wẽnsã tɩ “Wẽnnaam bʋʋdã kaoob wakat taame.” (Wil. 14:6, 7) Sẽn yɩɩd fãa, koe-noogã mooneg kɩtame t’a Zeova yʋʋrã paamd pẽgr dũniyã gill zugu. (Yɩɩl 113:3) Dẽnd nebã kelg tɩ b pa kelg me, d segd n ket n moonda Rĩungã koɛɛgã. Sɩd-sɩda, a Zeova sũur nooma ne modgr nins fãa d sẽn maand sẽn na yɩl n moon koe-noogã.—Rom 10:13-15.
17. Bõe la nebã na n bãng vẽeneg ka la bilfu?
17 Yaa sɩd tɩ rũndã-rũndã neb wʋsg pa sakd n kelgd koɛɛgã ye. La ka la bilfu b na n bãngame tɩ koɛɛgã ra tara yõod wʋsgo. (Mat. 24:37-39) A Zeova yeela a Ezekɩɛll tɩ bʋ-kaoorã koɛɛg a sẽn taas nebã sã n wa pidsdẽ, Israɛll neb nins sẽn yaa tõatbã na n ‘bãngame tɩ no-rɛɛs n da be bãmb sʋka.’ (Eze. 2:5) Wẽnnaam sẽn na n sãam dũni-wẽng kãngã wã sasa me, nebã na n bãnga vẽeneg tɩ koɛɛg ning a Zeova Kaset rãmbã sẽn moon zak-zak la zĩis a taabã ra yita sɩd Wẽnnaam a Zeova nengẽ, la tɩ yaa a Zeova n tʋm-ba. Dẽnd d sẽn yaa a Zeova Kaset rãmb n moond a koɛɛgã rũndã-rũndã wã sɩd yaa zu-noog tɛkẽ! Ne a Zeova sõngre, bɩ d ket n tõogd zak-zak moonegã zu-loeese.
Y na n leokame tɩ bõe?
• Wãn to la d tõe n paam daood n moon koɛɛgã?
• Bõe n tõe n sõng tõnd tɩ d tõog n sɩng sõsg ne ned zak-zak moonegã sasa?
• Wãn to la d tõe n wilg nebã tɩ b yell pak-d lame?
• Bõe n tõe n sõng tõnd tɩ d ra tall tags-kɛg neb nins sẽn be d moonegã zĩigẽ wã zutu?
[Zãmsgã sogsgã]
[Zĩ-gũbri/Foto, seb-neng 17]
D sẽn tõe n sɩng sõsg to-to
D tõe n yeela woto:
▪ Y sã n pʋʋs a soabã n sa, y tõe n kõ-a-la seb-vãoog la y yeel-a woto: “Gomd sẽn tar yõod la kengd raood n be seb-vãoogã pʋgẽ, tɩ mam sõsd ne nebã rẽ zugu.”
▪ Y tõeeme me n wilg seb-vãoog la y yeel woto: “Mam da rat n bãnga yãmb tagsg sẽn yaa a soab ne seb-vãoogã gom-zugã.”
Ned sã n sak n deeg seb-vãoogã:
▪ Tao-tao bala y tõe n sok-a lame n gese bõe la a tagsd seb-vãoogã sẽn yetã zugu?
▪ Kelg-y a sẽn na n yeelã sõma sẽn na yɩl n wʋm a sẽn tagsd woto wã võore. Pʋʋs-y a soabã barka, a sẽn sak n wilg a tagsgã.
Sẽn na yɩl n kell n sõs ne-a:
▪ Karm-y verse a ye bɩ sẽn yɩɩd rẽ la y sõs a zug ne-a, n maneg y sõsgã tɩ zems ne yɛl nins sẽn pak-a wã.
▪ A sã n wilg t’a rat n bãng n paasame, sã n sakdẽ bɩ y kõ-a sebr la y wilg-a y sẽn tũnugd ne rẽ n zãmsd nebã Biiblã to-to. Rɩk-y sɛk n lebg n kẽnge.