D sẽn tõe n tõog toog to-to sũ-sãang sasa

“[A Zakoob] kom-dibli wã ne a kom-pugli wã fãa wa n belsa yẽnda. La yẽ zãgsame n ka sak bãmb fãa belsgã ye. Yẽ yeelame: ‘Yaa ne yãbr la mam na n sig kɩɩm-kulg m biigã nengẽ.’ La yẽ yãba a biigã yĩnga.”—SƖNGRE 37:35.

A ZAKOOB sũur sãamã wʋsg a bi-riblã kaalem yĩnga. A yeelame t’a na n yãbame hal n tãag a yõor tɛka. Wala a Zakoobe, tõnd me tõe n tagsdame tɩ d ned sã n maan kaalem, d sũ-sãangã pa tõe n sa abada. La rẽ yĩnga woto rat n yeelame tɩ d pa tẽed Wẽnnaam bɩ? Ayo!

Biiblã wilgdame t’a Zakoob yɩɩ ned sẽn tall tẽebo. Wala b sẽn pẽg a ba a Izaak la a yaab a Abrahaam b tẽebã yĩngã, b pẽga yẽ me a sẽn tall tẽeb kãn-kãe wã yĩnga. (Hebre dãmba 11:8, 9, 13) Daar a yembre, a maoa ne malɛk meng yʋng tõr sẽn na yɩl tɩ Wẽnnaam ning-a barka. (Sɩngre 32:25-31) Vẽenega, a Zakoob yɩɩ Wẽnnaam zoa hakɩka. La a sũurã sẽn sãamã wilgda tõnd bõe? D sũur sã n sãam wʋsg d ned kaalem sasa pa rat n yeel tɩ d pa tẽed Wẽnnaam ye. D ned sã n maan kaalem, d sũur pʋd n pa tõe n pa saam ye.

D ned kaalem sẽn tõe n nams-d to-to

Ned kaalem poore, nebã sũ-sãams pa taab ye. La neb wʋsg yẽ sũy sãamda hal wʋsgo. Ges-y yell ning sẽn paam a Leonardo wã. A sẽn wa n tar yʋʋm 14, a baaba ra bẽeda sũur  bãaga, n wa tiig n maan kaalem. A Leonardo kõn tol n yĩm daar ning a ma-bil sẽn togs-a t’a baaba maana kaalmã yell ye. Sɩngrẽ wã a pa sak n tẽ ye. A yãa a ba wã sẽn ki n dɩg kʋʋrã sasa, la baa ne rẽ a ra ket n pa tẽed ye. Maana sẽn na ta kiis a yoob t’a Leonardo pa tõe n yãb ye. Naoor wʋsgo, a ra nong n gũudame t’a baaba sig tʋʋm n wa yiri. Maana sẽn na ta yʋʋmd t’a yaool n na n tẽ t’a baaba sɩd maana kaalem. Woto kɩtame t’a bãng t’a sɩd yaa a yembr masã. Baa a sã n wa ta yir n mik tɩ ned ka be zakẽ, tẽegd-a-la a ba wã kaalem yelle, t’a mi n tar yãbr bala. A bãngame t’a ba wã sɩd ka be, la t’a lebga a yembre.

A Leonardo kibarã wilgda vẽeneg tɩ ned sũur tõe n sãama hal wʋsgo. La d bãng tɩ sũ-sãang tõe n wa boogame. Wala nodr sẽn pa maagd zĩig pʋgẽ wã, d ned sã n maan kaalem, d sũ-sãangã me pa sat zĩig pʋgẽ ye. Tõe n maana kiisi, yʋʋmde, bɩ sẽn yɩɩd rẽ menga. Sɩngrẽ wã d sũur sãamda wʋsgo, la bilf-bilfã, d sũ-sãangã wat n boogame, tɩ d sũurã sɩng n noomẽ la d ne tɩ d vɩɩmã tara yõodo.

D sã n wilg d sũ-sãamse, kɩtdame tɩ booge. La woto na n sõng-d lame me tɩ d bãng d sẽn na n maan to-to d nedã kaalmã poore. D nedã sẽn ka le be wã yĩnga, d segd n gesa d sẽn na n vɩɩmd to-to. Ned sã n wilg a sũ-sãanga, tõe n sõng-a lame. Yaa vẽeneg tɩ nebã sẽn wilgd b sũ-sãamsã to-to wã pa yembr ye. La bũmb a ye la d fãa segd n sak n deege: Yaa tɩ ned sã n sĩnd n pa wilgd a sũ-sãanga, tõe n waa ne bãas la yɛl a taaba. La wãn to la d tõe n wilg d sũ-sãang tɩ zemse? Sagls n be Biiblã pʋgẽ n tõe n sõng-d wʋsg rẽ wɛɛngẽ.

D sẽn tõe n tõog toog to-to sũ-sãang sasa

Neb wʋsg neb sẽn maan kaalem yãame tɩ f sã n gomda, tõe n kɩtame tɩ f sũ-sãangã booge. Wala makre, Biiblã wilgda a Zoob sẽn maan bũmb ninga, a kamb piigã fãa sẽn maan kaalem, la yel-beed a taab me sẽn paam-a wã sasa. A yeela woto: “Mam yam yii ne m vɩɩmã. Mam na n yẽgmame n gom m sũ-sãoongã yelle.” (Zoob 1:2, 18, 19; 10:1) D bãng t’a Zoob da rat n ‘yẽgma’ a sũ-sãangã yĩnga. Wãn to la a na n maan dẽ? A yeelame t’a ‘na n gomame.’

A Paulo yeela woto a ma wã kaalem poore: “Bũmb a ye me sẽn sõng maam yaa m sẽn da gomd m ma wã yellã.” Dẽnd d sã n gomd d sũ-sãangã yell ne d zoa, tõe n kɩtame tɩ booge. (Yelbũna 17:17) A Yone ma wã kaalem poore, a yeela a kiris-nin-taasã tɩ b wat n get-a wakat fãa. A yeela woto: “Mam sẽn gom m sũ-sãangã yellã kɩtame tɩ m sũ-sãangã booge.” Yãmb me sã n gomd y sũ-sãamsã yelle, la y sõsd rẽ zug ne y zoa, tõe n sõng-y lame tɩ y tõog toogo.

D sã n gʋls bũmb d sũ-sãangã wɛɛngẽ tõe n sõng-d-la wʋsgo. Kẽer getame tɩ yaa toog ne-b tɩ b gom b sũ-sãangã yelle, la tõe n yɩɩ nana ne-b tɩ b gʋls bũmb b sũ-sãangã  wɛɛngẽ. A Sayull ne a Zonatã kũumã poore, a Davɩɩd gʋlsa sũ-sãang yɩɩll n na n wilg t’a sũur sãamame. B ninga sũ-sãang yɩɩl-kãngã Biiblã pʋgẽ, tɩ be a Sãmwɛll sebr a yiib-n-soabã pʋgẽ.—2 Sãmwɛll 1:17-27.

Yãbr me tõe n kɩtame tɩ ned sũ-sãang booge. Biiblã yeta woto: “Bũmb fãa tara a wakate. . . . yãbr wakat beeme.” (Koɛɛg Soaba 3:1, 4) Dẽnd yaa vẽeneg tɩ d ned sã n maan kaalem, yaa “yãbr wakate.” D pa segd n zoe yãnd n pa yãb ye. Biiblã gomda pagb la rap sẽn yɩ wẽn-sakdb sẽn yãb n wilg b sũ-sãang yelle. (Sɩngre 23:2; 2 Sãmwɛll 1:11) A Zezi Kirist sẽn wa n kolg a zoa a Lazaar sẽn da maan kaalem tɩ nan pa kaoosã yaoogã, a “yãbame.”—Zã 11:33, 35.

D ra yĩm tɩ sũ-sãang pa tõe n sa zĩig pʋgẽ ye. Bala, sẽn yaa wakat ning fãa, d sũurã tõe n tiig n sãamame. D tẽeg tɩ d pa segd n zoe yãnd n pa yãb ye. Wẽn-sakdb wʋsg yãame tɩ ned sã n wilg a sũ-sãang ne yãbre, yaa bũmb sẽn zemse. La sõngda wʋsg tɩ sũ-sãangã booge.

D kolg Wẽnnaam

Biiblã yeta woto: “Bɩ y kolg Wẽnnaam, la [a] na kolg yãmba.” (Zak 4:8) Sẽn yɩɩd fãa, bũmb a ye d sẽn tõe n maan n kolg Wẽnnaam yaa pʋʋsgã. D ra tags tɩ pʋʋsgã pa tar yõod ye! Biiblã yetame tɩ “Zusoabã pẽnegda neb nins sũy sẽn sãamã, la bãmb fãagda sũ-pa-noom dãmbã,” tɩ woto sɩd kõt-d belsg wʋsgo. (Yɩɩl Sõamyã 34:19) A leb n yeta woto: “Bas f yell ne Zusoabã la bãmb na kogl foom.” (Yɩɩl Sõamyã 55:23) Wala d sẽn yã tɩ loogã, neb wʋsg yãame tɩ b sã n gomd b sũ-sãangã yell ne b zoa, sõngd-b-la wʋsgo. La d sã n gomd d sũ-sãangã yell ne Wẽnnaam ning sẽn pʋlem t’a na n bels-d lame wã, kõn sõng tõnd n yɩɩd sɩda?—2 Tesalonik rãmba 2:16, 17.

A Paulo yell d sẽn gom tɩ loogã yeela woto: “M sã n wa mik tɩ m pa tõe n  tõog m sũ-sãangã, m yĩgimdidame n pʋʋs Wẽnnaam, n kos-a ne m sũur fãa t’a sõng-ma.” A Paulo kɩsa sɩd tɩ pʋʋsgã sõng-a-la wʋsgo. Yãmb me sã n pẽdgd ne pʋʋsgo, “belsg fãa Wẽnnaamã” na n leoka y pʋʋsgã, n kõ-y raood la pãng tɩ y tõog toogo.—2 Korẽnt dãmba 1:3, 4; Rom dãmba 12:12.

Sẽn ki-bã na n wa vʋʋgame

A Zezi yeela woto: “Mam yaa vʋʋgre, la vɩɩm. Ned ninga sẽn tẽed maam, baa yẽ sã n ki, a na paam vɩɩm.” (Zã 11:25) Biiblã wilgdame tɩ sẽn ki-bã na n wa vʋʋgame. * A Zezi sẽn wa n be tẽngã zugã, a wilgame t’a tõe n vʋʋga kũum. Wala makre, daar a yembre, a vʋʋga bi-pugl sẽn da tar yʋʋm 12. Biigã roagdb manesem yɩɩ wãna? B sũy yɩɩ noog hal tɩ b ‘yɛɛs wʋsgo.’ (Mark 5:42) A Zezi Kirist sã n wa rɩt naam dũniyã gill zugu, a na n vʋʋga neb wʋsg sẽn maan kaalem tɩ b vɩɩmd tẽngã zugu, tɩrlem la laafɩ pʋgẽ. (Tʋʋma 24:15; 2 Pɩɛɛr 3:13) Tags-y n ges y sũur sẽn na n yɩ noog to-to, y neb nins sẽn maan kaalmã sẽn na n vʋʋg tɩ y le vɩɩmd ne taaba!

Sɩlg n da lʋɩ t’a Claudete bi-ribl a Renato maan kaalem. A Claudete tabla a biigã foto a frigo wã. A nong n geta foto wã la a yet woto: ‘D na n le yãa taab kũum vʋʋgrã sasa.’ A Leonardo me mi n mamsa a yamẽ wã n yã a ba wã sẽn na n vʋʋg dũni paalg ning Wẽnnaam sẽn na n wa ne wã pʋgẽ. Vẽenega, sẽn ki-bã sẽn na n wa vʋʋgã kõta a Claudete ne a Leonardo la neb wʋsg neb sẽn maan kaalem belsg wʋsgo. La tõe n belsa yãmb me wʋsgo.

[Tẽngr note]

 [Zĩ-gũbri/Foto, seb-​neng a 7]

D bels neb a taabã

“Yaa [Wẽnnaam] n belsd tõnd d toog fãa pʋgẽ, tɩ tõnd tõe n bels toog sẽn tar-b rãmbã ne belsg ninga Wẽnnaam sẽn da bels tõndã.”—2 Korẽnt dãmba 1:4.

Kiris-neb wʋsg miime tɩ gom-kãensã yaa sɩda. B sẽn paam belsg b ned kaalem sasa wã, b yãame tɩ bãmb me tõogd n belsda neb a taabã la b kengd b raoodo.

Wala makre, a Claudete nong n kẽnd n kaagda neb n wilgd-b Biiblã sẽn yet bũmb ninga. Nand tɩ yẽ meng bi-riblã maan kaalem, a ra kẽnd n kaagda pag a ye biig sẽn da maan kaalem. Pʋg-kãngã sũur yɩɩ noog a Claudete sẽn wat n kaagd-a wã. La a tagsame t’a Claudete pa tol n tõe n wʋm a sũ-sãangã võor ye. A Claudete bi-riblã sẽn maan kaalmã poor bilf bala, pagã wa n kaag-a lame, n dat n bãng a sã n ket n tẽeda Wẽnnaam, a bi-riblã sẽn maan kaalem masã wã. A sẽn yã t’a Claudete ket n tẽeda Wẽnnaam ne a sũur fãa wã, kɩtame t’a sak n zãmsd Biiblã wakat fãa ne a Claudete n paamd belsg wʋsgo.

A Leonardo yãka yam n na n zãms mugsã goam a ba wã kaalmã poore, sẽn na yɩl n sõng mugsã tɩ b bãng Biiblã sẽn kõt belsg ningã. A wilgame tɩ yẽ sẽn modg woto wã naf-a-la wʋsgo. A yeela woto: “Bũmb a ye sẽn sõng maam tɩ m tõog m sũ-sãangã yaa m sẽn sõngd mugsã tɩ b bãngd yɛl wʋsg Wẽnnaam zugã. Mam dɩka sẽk wʋsg n sõngd-ba. M sũ-sãangã wa n lebga sũ-noogo, m Biiblã karen-biig a ye sẽn deeg lisgã! Sɩd-sɩda, hal m ba wã kũum tɛka, rẽ n yɩ pipi bũmb sẽn noog m sũur wʋsgo.”—Tʋʋma 20:35.

[Foto, seb-​neng a 4]

D sã n gomd d sũ-sãangã yelle, tõe n kɩtame tɩ d sũ-sãangã booge

[Foto, seb-​neng a 5]

D sã n gʋls bũmb d sũ-sãangã wɛɛngẽ, tõe n sõng-d-la wʋsgo

[Foto, seb-​neng a 5]

D sã n karemd sɛb sẽn gomd kũum vʋʋgrã yelle, tõe n kõ-d-la belsg wʋsgo

[Foto, seb-​neng a 6, 7]

A Zezi wilgame t’a na n vʋʋga neb nins fãa sẽn tẽed yẽ wã