A Zeova la tõnd fãagda
A Zeova la tõnd fãagda
“[A Zeova] na n sõnga bãmb tɩ b põse, la b fãag bãmba.”—YƖƖL 37:40.
1, 2. Bõe la d mi a Zeova zug tɩ kengd d pɛlga?
MAASEM pa yas zĩ-yend ye. Wĩndgã yiib n tɩ tãag a kõom, maasmã me tũud n yẽrsdame. La sẽn naan-a tẽngã la wĩntoogã yẽ pa toeemd lae-lae ye. (Mal. 3:6) Biiblã goma a yell n yeel woto: “Bãmb yaa a yembr daar fãa n ka tedgd baa bilf ye.” (Zak 1:17) D sẽn mi t’a Zeova sɩd pa toeemdã, kengda d pɛlg wʋsgo. Sẽn yɩɩd fãa yel-pakr la sũ-sãams wakate. Bõe yĩnga?
2 Wa d sẽn yã nindaarẽ sõsgã pʋgã, a Zeova fãaga neb pĩnd wẽndẽ. (Yɩɩl 70:6) A sẽn pa toeemd la a pidsd a gomd fãa wã yĩnga, a rũndã-rũndã nin-buiidã me sɩd tõe n teeg-a lame t’a ‘sõng-b la a fãag-ba.’ (Yɩɩl 37:40) Wãn-wãn la a Zeova fãag a neb tõnd wakatã? Wãn to la a tõe n fãag tõnd ned kam fãa me?
A fãag-b-la b bɛɛb nusẽ
3. Bõe yĩng tɩ d tõe n kɩs sɩd t’a Zeova Kaset rãmbã bɛɛb pa na n tol n tõog n kɩt tɩ b bas koe-noogã moonego?
3 Baa a Sʋɩtãan sẽn na n nams a Zeova Kaset rãmbã to-to, a pa na n tol n tõog n kɩt tɩ b pa sak a Zeova ne b sũy fãa wa a sẽn datã ye. Wẽnnaam Gomdã kõt-d-la bas-m-yam dẽ wɛɛngẽ n yet woto: “Zab-teed nins fãa neb sẽn maand n na n zab ne foomã ka na n tõog ye. Fo na n sãama zɩlmã nins fãa sẽn dõt foomã.” (Ezai 54:17) Bɛɛb n da mak n na n gɩdg Wẽnnaam nin-buiidã tɩ b ra moon koe-noogã, la b pa tõog ye. D ges yɛl a yiib sẽn wilgd rẽ.
4, 5. Yʋʋmd 1918 soabã pʋgẽ, wãn-wãn la b mak a Zeova nin-buiidã koe-mooneg gɩdgre, la baasa wãna?
4 Yʋʋmd 1918 soabã pʋgẽ, kiris-neb ne yʋʋr tũudmã taoor dãmb tusa neb tɩ b nams a Zeova Kaset rãmbã wʋsgo, sẽn na yɩl tɩ b bas b koe-moonegã. Yʋʋm-kãng sig-noy kiuug rasem a 7 wã daare, Etazĩni goosneema wã kõo noor tɩ b yõk saam-biig a J. F. Rutherford sẽn da get koe-moonegã yell dũniyã gill zug wakat kãngã, n paas a tʋmd-n-taas kẽer sẽn da be ne-a a Zeova Kaset rãmbã tʋʋmd biru kãsengẽ wã. Pa yã n maan kiis a yiibu, b kaoa saam-biig a Rutherford ne a tʋmd-n-taasã bʋʋdo, n dõd-b tɩ b yaa goosneema wã bɛɛba, la b pag-b bãens-roog n yeel tɩ b na n kaoosa be. La rẽ yĩnga bɛɛbã tõogame tɩ koe-moonegã yals fasɩ bɩ? Hakɩka, b pa tõog ye.
5 Tẽeg-y t’a Zeova pĩnd n kãaba woto: “Zab-teed nins fãa neb sẽn maand n na n zab ne foomã ka na n tõog ye.” Yʋʋmd 1919 tʋʋlg kiuug rasem 26 raarã, rat n yet tɩ kiis a wae saam-biig a Rutherford ne a tʋmd-n-taasã yõkr poore, bũmb b sẽn da pa tẽed n maane. Bʋʋd roog rãmbã kɩtame tɩ b yao ligd tɩ b yiis-ba, tɩ b pa kaoos bãensã roogẽ wa b sẽn da yeelã ye. Yʋʋmd ninga sẽn pʋglã, rat n yet tɩ yʋʋmd 1920 soabã, a sig-noy kiuug rasem a 5 wã daare, b tolg n basa saam-biisã taal fasɩ. B sẽn yi roogã, b ninga pãng ne Rĩungã koɛɛg moonego. Rẽ waa ne bi-bʋse? Sẽn sɩng ne rẽ n tar n watẽ, b paamdame tɩ neb wʋsg lebgd kiris-neba! D pẽgda fãagd a Zeova, a sẽn kɩt tɩ koe-moondbã sõor tar fɩɩgrã.—1 Kor. 3:7.
6, 7. a) Alemayn nazi rãmbã naam sasa, bõe la b bao n na n maan a Zeova Kaset rãmbã, la baasa wãna? b) Bõe la a Zeova rũndã-rũndã Kaset rãmbã kibay wilgd vẽenega?
6 Yʋʋmd 1934 soabã pʋgẽ me, a Hitler wẽename t’a na n menesa a Zeova Kaset rãmbã Alemayn soolmẽ wã fasɩ. B sɩd yõga saam-biis wʋsg n kẽes bãens-rotẽ. B namsa saam-biis tusa hal wʋsgo, la b kʋ bãmb kobs kã de kõnsãntrasiõ rãmbẽ. La rẽ yĩnga a Hitler tõog n menes-b-la fasɩ wa a sẽn wẽena bɩ? A tõog n kɩtame tɩ b bas koe-noogã mooneg Alemayn bɩ? Abada! Baa b sẽn wa n namsd tõnd saam-biisã, b ra ket n solgd n moondame. Nazi rãmbã naam lʋɩɩs poore, b kell n moona koɛɛgã. Rũndã-rũndã, yaa hal sẽn yɩɩd koe-moondb 165 000 n be Alemayn soolmã pʋgẽ. Ka me, fãagdã ye pidsa a gomdã. A ra yeela woto: “Zab-teed nins fãa neb sẽn maand n na n zab ne foomã ka na n tõog ye.”
7 A Zeova rũndã-rũndã Kaset rãmbã kibay wilgda vẽeneg t’a Zeova pa na n tol n bas tɩ b menes a nin-buiidã zãng fasɩ ye. (Yɩɩl 116:15) La tõnd ned kam fãa yẽ? Wãn-wãn la a kogend-do?
Yaa wakat fãa la a kogend d yõorã bɩ?
8, 9. a) Bõe n kɩt tɩ d miẽ tɩ pa wakat fãa la a Zeova kogend-d ne kũum? b) Bõe la d segd n sak n deege?
8 Tõnd miime t’a Zeova pa wilg tɩ yaa wakat fãa la a na n kogend-d tɩ d põsd kũum ye. Tõnd me yaa wa hebre rãmb a tãabã sẽn pa sak n wõgemd Rĩm a Nebukadnezaar sãnem bõn-naandgã taoorã. Baa b sẽn da yaa wẽn-zoɛtbã, b pa tags t’a Zeova na n maana yel-solemd tɩlae n kogl-b tɩ bũmb pa maan-b ye. (Karm-y Daniɛll 3:17, 18.) La baasgo, a Zeova fãag-b lame tɩ bugmã pa rɩ-b ye. (Dan. 3:21-27) La baa ne rẽ, pĩnd wẽndẽ, ra pa wakat fãa la a Zeova fãagd a nin-buiidã ne yel-solemd ye. Sɩd me, wẽn-sakdb wʋsg kii bɛɛb nusẽ.—Heb. 11:35-37.
9 La rũndã-rũndã yẽ? A Zeova sẽn yaa fãagdã yĩnga, a sɩd tõe n fãaga neb yel-beed pʋgẽ. La rẽ yĩnga yell sã n paam-d tɩ d tõog n yidg-a, d tõe n bãnga sã n yaa a Zeova n sɩd sõng-d bɩ? Ayo. La baasgo, nina sã n põs yelle, a tõe n tagsdame tɩ yaa a Zeova n sõng-a. D pa tar sor n na n kɩɩs tɩ pa a Zeova n sõng-a ye. La sẽn yaa a soab me, d segd n sak n deegame tɩ kiris-neb wʋsg la b nams b tẽebã poorẽ tɩ tũ ne b yõore. Wala makre, kiris-neb wʋsg kii nazi rãmbã naamẽ. Kẽer me kii sabaab rãmb pʋsẽ. (Koɛ. 9:11) D tõe n soka d mens woto: “Rẽ yĩnga a Zeova basa neb nins sẽn ki yɛl a woto buud pʋsẽ wã n pa fãag-b bɩ?” Vẽenega, pa tõe n yɩ woto ye.
10, 11. Bõe yĩng tɩ ninsaal pa tõe n põs kũum ne a meng pãnga, la bõe la a Zeova tõe n maane?
10 Tẽeg-y me tɩ ninsaal pa tõe n põs kũum ne a meng pãng ye, bala ned pa tõe n “vɩ n ka tol n yã kũum wall a põs kɩɩm-kulg pãng” ye. (Yɩɩl 89:49) La pa woto ne a Zeova ye. Saam-bi-poak sẽn põs nazi rãmbã na-toom wẽndẽ tẽra gomd a ma sẽn yaa tõnd saam-bi-poak me sẽn da yeel-a, n na n bels-a b neb sẽn ki kã de kõnsãntrasiõ rãmbã pʋg poorẽ. A yeel-a-la woto: “Kũum sã n tõeeme n kʋ ned t’a pa tol n ye vʋʋge, dẽnd kũum pãng yɩɩda Wẽnd wɛ. Bɩ bõe?” Vẽenega, kũum pãng pa yɩɩd Wẽnnaam sẽn ka to wã sẽn kõt bũmb fãa vɩɩmã ye! (Yɩɩl 36:10) Neb nins fãa sẽn be seool bɩ hadɛsã be a Zeova pʋ-tẽerẽ, la a na n fãaga b fãa kɛpɩ.—Luk 20:37, 38; Wil. 20:11-14.
11 La nananda, rũndã-rũndã menga, a Zeova sõngda a nin-buiidã b vɩɩmã pʋgẽ. Bɩ d ges yɛl a tãab pʋgẽ d sẽn yãt vẽeneg tɩ yaa yẽ n sɩd fãagd tõndo.
A pa basd tɩ bũmb sãam d tẽebã ye
12, 13. Bõe yĩng tɩ yaa zood ning d sẽn tar ne a Zeova wã yõod n yɩɩda, la wãn to la a Zeova sõngd tõnd tɩ d ra sãam-a?
12 A Zeova wilg-d-la vẽeneg t’a na n sõng-d lame tɩ bũmb da sãam d tẽebã ye. La sõng-kãng yõod n yɩɩda. D sẽn yaa kiris-neb hakɩkã, d miime tɩ bũmb n be t’a yõod yɩɩd d vɩɩmã. Bõn-kãng yaa zood ning tõnd ned kam fãa sẽn tar ne a Zeova wã. (Yɩɩl 25:14; 63:4) Zood kãng sã n da kaẽ, d vɩɩmã ra pa na n tallẽ võor sõma, la d ra pa na n tarẽ saagr beoog-daar yĩng me ye.
13 Zu-noogo, a Zeova sõngda d fãa tɩ d tõe n tall zood sõma ne-a. Wala makre, a Gomdã, a vʋʋsem sõngã la d tẽed-n-taasã sẽn be dũniyã gill zugã bee tõnd sõngr yĩnga. Wãn-wãn la d tõe n dɩ woto fãa nafa? D sã n zãmsd a Gomdã neer n pa vaandẽ, na n kenga d tẽebã tɩ kɩt tɩ d gũ a pidsgã ne d sũur fãa. (Rom 15:4) D sã n pelgd d pʋs n pʋʋsd a Zeova n kot a vʋʋsem sõngã, a na n kõ-d-la pãng tɩ d mao n da wa maan sẽn pa segd ye. (Luk 11:13) Tʋm-tʋmd sẽn tũud sɩd la sẽn tar yamã yiisda sɛba, la a tũnugd ne tigissã la tigis-kãsemsã n sagend tõndo. D sã n tũud sagls-kãense, d paamda rɩlgr tẽebã wɛɛngẽ wakat sẽn zemse. (Mat. 24:45) Segl-kãensã fãa sõngd-d lame tɩ d ra sãam zood ning d sẽn tar ne Wẽnnaamã ye.—Zak 4:8.
14. Togs-y kibar sẽn wilgd tɩ yaa zood ning d sẽn tar ne a Zeova wã yõod n yɩɩda.
14 Sẽn na yɩl n wilg a Zeova sẽn sõngd tõnd to-to tɩ d kelld n talld d zoodã ne-a wã vẽenega, tẽeg-y roagdb nins yell d sẽn gom sõsg ning sẽn loogã pʋgẽ wã yelle. B sẽn wʋm tɩ b biig a Theresa menemame wã, rasem a wãn poore, koe-beed n pʋgle: B wʋmame tɩ b kʋ-a lame. * A ba wã yeela woto: “Mam da pʋʋsa a Zeova t’a kogl m biigã. B sẽn wa n tɩ yã tɩ b kʋ-a lame wã, pipi mam soka m meng m pʋʋsgã sẽn pa reegã võore. Mam miime t’a Zeova pa kãab t’a na n kogenda a nin-buiidã ned kam fãa yõor ne yel-solemd ye. M da ket n pʋʋsdame n dat n wʋm yellã võor sõma. La m sẽn wa n bãng t’a Zeova sẽn kogendã yaa tõnd ne yẽ zoodã, m sũ-sãangã booga wʋsgo. Kogl-kãng yõod sɩd yɩɩda sẽn ketã fãa, bala rẽ n tõe tɩ d wa paam vɩɩm sẽn kõn sa wã. A Zeova sõnga a Theresa woto, bala a kũumã wẽnd t’a ket n tũuda a Zeova ne a sũur fãa. M sẽn bãng t’a Zeova tõe n wa vʋʋg-a lame wã, m yam gãanda bãane.”
D sã n wa bẽedẽ, d paamda a sõngre
15. D sã n wa gãe n “ka laafɩ,” wãn-wãn la a Zeova tõe n sõng-do?
15 Wa a Zeova sẽn sõng a Davɩɩd to-to a sẽn wa n bẽedẽ wã, d me sã n wa “ka laafɩ” n gãe d gãagẽ, a tõe n sõng-d lame. (Yɩɩl 41:4) Baa a sẽn pa maand yel-soalem rũndã-rũndã n tɩpd-dã, a sõngd-d lame. Wãn-wãna? Noy nins a sẽn kõ-d a Gomdã pʋgẽ wã sõngd-d lame tɩ d mi d sẽn tog n tɩp d mens to-to la d mi yɛl a taaba. (Yel. 2:6) D sã n karem Gũusg Gasgã la Réveillez-vous ! wã pʋgẽ, d tõe n paama sagls la kibay bãag ning sẽn namsd-dã zugu. A Zeova tõe n sõngd-d-la ne a vʋʋsem sõngã tɩ d paam “pãn-kãsenga,” tɩ kɩt tɩ baa d bãagã sẽn na n yɩ to-to bɩ d tõog n kell n mao ne-a la d sak a Zeova. (2 Kor. 4:7) Sõngr a woto kɩtdame tɩ d tõog n da bas tɩ d bãagã yell pak-d tɩ looge, n wa kɩt tɩ d sãam zood ning d sẽn tar ne a Zeova wã ye.
16. Wãn-wãn la saam-biig a yembr mao ne a bãaga?
16 Ges-y bi-bɩɩg ning yell d sẽn gom nindaarẽ sõsgã sɩngrẽ wã me nengẽ sẽn yɩ to-to. Yɩɩ yʋʋmd 1998 soabã pʋgẽ la a sẽn kẽng logtor yir tɩ b tɩ yeel-a tɩ bãag ning sẽn tar-a wã (sclérose latérale amyotrophique, ou SLA) na n kɩtame t’a lebg koams a yõor tɛkã. * Wãn-wãn la a maan n mao ne a bãagã? Ad a sẽn yeele: “Wakat ninga, mam sã n tags tɩ m bãagã ka tɩɩm sã n pa kũum, namsd-m-la wʋsgo. La m sũ-sãamsã sã n wa rat n loog nugu, m pʋʋsda a Zeova n kos sõngr buk a tã: m kot-a lame t’a kɩt tɩ m yamã gãand bãane, t’a kõ m sũ-mare, la a sõng-m tɩ m paam pãng n tõog toogo. Mam miime t’a Zeova reegda m pʋʋsgã. Bala, mam yamã mi n sɩd gãeyã bãane, tɩ kɩt tɩ m tagsd yɛl sẽn kengd raood yelle. Wala makre, m mi n tagsda vɩɩmã sẽn na n yɩ to-to dũni paalgã pʋgẽ, m sẽn na n wa tõe n kẽne, n tõe n wʋm dɩɩb noosem la m tõe n gom ne m zakã nebã. Sũ-marã me kɩtdame tɩ m tõe n mao ne m komsmã zu-loees toor-toorã. A Zeova sẽn sõngd-m tɩ m tõogd toogã kɩtdame tɩ m get wakat fãa tɩ m zoodã ne-a yõod yɩɩda sẽn ketã fãa. M sɩd tõe n yeela wa yɩɩl-gʋlsd a Davɩɩd tɩ m sẽn gãe n ka laafɩ wã, a Zeova sõngd-m lame.”—Ezai 35:5, 6.
A kɩtdame tɩ d paamd d noorã rɩɩbo
17. Bõe la a Zeova pʋlem tõndo, la pʋleng kãng rat n yeelame tɩ bõe?
17 A Zeova pʋlmame t’a na n kõo tõnd bũmb nins fãa sẽn yaa tɩlae ne-dã. (Karm-y Matɩe 6:33, 34; Hebre dãmba 13:5, 6.) La woto pa rat n yeel t’a na n kõ-d-la bõn-kãens ne yel-solemde, wall tɩ d pa segd n tʋm ye. (2 Tes. 3:10) Rat n yeelame tɩ d sã n lʋɩɩs a Rĩungã taoor la d tʋmd n baood d noorã rɩɩbo, d tõe n kɩsa sɩd t’a na n sõng-d lame tɩ d paam sẽn yaa tɩlae ne-dã. (1 Tes. 4:11, 12; 1 Tɩm. 5:8) A Zeova tõe n sõng-d lame, t’a sẽn na n maan to-to n sõng-dã meng ling-du. Wala makre, a tõe n kɩtame tɩ d tẽed-n-taag kõ-d bũmb d sẽn dat wall a rɩk-d tʋʋma.
18. Togs-y kibar sẽn wilgd tɩ yell sã n wa pak-do, d sɩd tõe n paama sõngre.
18 Y sã n tẽrame, nindaarẽ sõsgã sɩngrẽ me, d goma pag sẽn da yaa a ye n wubd a biig yelle. Yẽ ne a biigã ra tɩ bee tẽn-zẽnga, tɩ saam-bi-poakã pa tar tʋʋma, tɩ tʋʋmd paoong me yaa toog ne-a. Ad a sẽn yeele: “Mam da yita koe-moonegã yibeoogo, la zaabr fãa, m yitame n baood tʋʋma. Mam tẽra daar a ye, m sẽn kẽng n na n tɩ ra bĩisim. Mam sẽn ta wã, m yãa kood n da rat la m da pa tar ligd ye. Mam sũur zɩ n sãam wa baraarã ye. Mam sẽn lebg n kul baraarã, m tɩ mikame tɩ m doogã noor pid ne kood buud toor-toor n be saase rãmbẽ. Rɩɩb maam ne m biigã sẽn tõe n dɩ tɩ maan kiisi. Mam daaga nintãm la m pʋʋs a Zeova barka.” Pa zãag daare, saam-bi-poakã wʋmame tɩ yaa saam-biig a yembr sẽn yaa zẽ-maand n yãk koodã a zẽedã zĩigẽ n wa kõ-a. A wa n gʋlsa saam-biigã n yeel woto: “Baraare, m pʋʋs-f-la bark wʋsgo, la m pʋʋsa a Zeova me a sẽn tũnug ne fo nin-sõmblmã n wilg-m t’a nong-m lame wã.”—Yel. 19:17.
19. To-kãsengã sasa, a Zeova Kaset rãmbã na n basa b yam ne bõe, la nand tɩ rẽ ta, tõnd ned kam fãa segd n maoodame n maand bõe?
19 Vẽenega, bũmb nins a Zeova sẽn maan pĩnd wẽndẽ la rũndã-rũndã wã wilgdame tɩ d tõe n teeg-a-la ne d sũy fãa t’a sõng-do. Ka la bilfu, to-kãsengã sã n yik a Sʋɩtãan dũniyã zugu, d na n data a Zeova sõngr n yɩɩg raasenkamã. La a Zeova Kaset rãmbã na n tõog n basa b yam n teeg-a t’a sõng-ba. B na n tõog n nak n gesa yĩngri n kɩdme, bala b na n bãngame tɩ b fãagrã kolgame. (Luk 21:28) La nananda, yell ning fãa sẽn wa n paam-d bɩ d mao n kell n teeg Wẽnnaam n kɩs sɩd t’a pa toeemde, la t’a na n fãag-d lame.
[Footnotes]
^ sull 14 Ges-y “Une épouvantable tragedie.” Yʋʋmd 2001 sẽoog kiuug rasem 22 Réveillez-vous ! wã seb-neng 19-23.
^ sull 16 Ges-y “ La foi m’aide à vivre avec la SLA. ” Yʋʋmd 2006 yʋʋm-vẽkr kiuug Réveillez-vous ! wã seb-neng 25-29.
Y tẽrame bɩ?
• Baa sabaab sã n kʋʋg ned yõore, bõe yĩng tɩ pa wilgd t’a Zeova basame n pa fãag-a?
• Bõe yĩng tɩ d zoodã ne Wẽnnaam yõod yɩɩd sẽn ketã fãa?
• A Zeova sẽn pʋlem t’a na n kõo tõnd bũmb nins sẽn yaa tɩlae ne-dã rat n yeelame tɩ bõe?
[Zãmsgã sogsgã]
[Foto, seb-neng 14]
Yʋʋmd 1918 soabã pʋgẽ, b yiisa saam-biig a Rutherford ne a tʋmd-n-taasã bãensã roogẽ la b wilg vẽeneg tɩ ra yaa rõdga
[Foto, seb-neng 16]
D sã n wa “ka laafɩ,” a Zeova tõe n sõng-d lame