Modg-y tɩ y kãadmã tall pãng wa wĩir sẽn kal a tãabo
Modg-y tɩ y kãadmã tall pãng wa wĩir sẽn kal a tãabo
“Wĩir sã n kal a tãabo, a ka tõe n kaoog naana ye.”—KOƐ. 4:12.
1. Ãnd n loe a Ãdem ne a Hawa kãadmã?
WẼNNAAM naana tɩɩsã la rũmsã buud toor-toorã n sa, n yaool n naan d yaab a Ãdem. Dẽ poore, a kɩtame tɩ gõe-sik yõk a Ãdem t’a gũsi, t’a yãk a sĩif n naan pag sẽn na n yɩ a sõngd sẽn zems ne-a kɛpɩ, n tall n wa n kõ-a. A Ãdem sẽn yã pagã pipi wã a yeelame yaa: “Masã, ada yaa mam kõabã kõbre, la mam yĩngã nemdo.” (Sɩng. 1:27; 2:18, 21-23) A Zeova sẽn loe a Ãdem ne a Hawa kãadmã sẽn yɩ pipi yikãadmã la a ning-b barkã, a wilgame t’a sũur yaa noog a sẽn naan pag n kõ a Ãdmã.—Sɩng. 1:28; 2:24.
2. Wãn-wãn la a Sʋɩtãan maan n sãam a Ãdem ne a Hawa moorã?
2 Bʋko, pa yã n kaoos la zu-loees sɩng kãadmã Wẽnnaam sẽn luglã pʋgẽ ye. Bõe n maane? Malɛk a yembr n lebg wẽnga, n belg a Hawa t’a sak n dɩ tɩɩg a ye bila. Wẽnnaam yaool n da gɩdga yẽ ne a sɩdã fãa tɩ b ra rɩ tɩ-kãng biisã ye. Malɛg-kãng la b sẽn wa n bool t’a Sʋɩtãanã. A Hawa sẽn dɩ tɩɩgã bil poor bilfu, a Ãdem me rɩɩme. La b yiibã fãa sẽn maan woto wã, b wilgame tɩ b pa rat tɩ Wẽnnaam soog-ba, n wilgd bãmb sẽn segd la sẽn pa segd ye. (Sɩng. 3:1-7) A Zeova sẽn wa n bool-b n na n sokã, a Ãdem sẽn leok to-to wã wilga vẽeneg tɩ yẽ ne a pagã moor da zoe n sɩnga sãoongo. A ninga a pagã taal n yeel woto: “Yaa pag ninga yãmb sẽn kõ maam t’a zĩnd ne maamã n yãk tɩɩgã biis n kõ maam tɩ m dɩ.”—Sɩng. 3:11-13.
3. Tagsa bʋs sẽn pa zems la Zʋɩf rãmbã kẽer wa n yik n tar kãadmã zugu?
3 Hal sẽn sɩng ne rẽ n tar n watẽ, a Sʋɩtãan maanda sɩlem buud toor-toor n sãamd pagbã ne b sɩdbã moore. A ra kɩtame tɩ tũudmã taoor dãmb zãms nebã yɛl sẽn kɩɩsd Wẽnnaam sebrã sẽn yet kãadmã zugã. Wala makre, Zʋɩf rãmbã tũudum taoor dãmb kẽer da paoogda kãadmã, n wilgd nebã tɩ baa ned sã n bas a pag a sẽn ning zẽed yamsem tɩ loog yĩnga, Wẽnnaam pa zabd ye. La a Zezi wilgame tɩ “ned sã n basd a pag tɩ ka yoob yĩng n dɩk a to, a maanda yoobo.”—Mat. 19:9.
4. Wãn-wãn la b sãbsd kãadmã rũndã-rũndã?
4 A Sʋɩtãan ket n maoodame n dat tɩ kãadmã ra yɩ wa Wẽnnaam sẽn da rat t’a yɩ to-to wã ye. La a sɩd tõogdame me, bala rũndã-rũndã, rap ne rap wall pagb ne taab kẽeda kãadem. Rao ne pag me tõe n vɩɩ ne taab n yaool n pa kẽ kãadem ye. Kãdensẽ wã, kãadem kaoob lebga nana. (Karm-y Hebre dãmba 13:4.) La tõnd sẽn yaa kiris-nebã, bõe n na n sõng-d tɩ manesem kãensã sẽn wɛ wã ra wa sãam yam ning d sẽn tar kãadmã wɛɛngẽ wã? Bɩ d bao n bãng bũmb kẽer sẽn kɩtd tɩ kãadem yɩ sõma la a tall sũ-noogo.
Ra yĩm-y-yã a Zeova yell ye
5. Bõe yĩng tɩ b mak kãadem ne “wĩir sẽn kal a tãabo”?
5 Pag ne a sɩd sã n dat tɩ b kãadem tall barka, b pa segd n yĩm a Zeova yell ye. A Gomdã yeta woto: “Wĩir sã n kal a tãabo, a ka tõe n kaoog naana ye.” (Koɛ. 4:12) “Wĩir sẽn kal a tãabã” ka wã makda zood ning sẽn be pagã ne a sɩdã la bãmb b yiibã ne Wẽnnaam sʋkã. Pagã ne a sɩdã ned kam fãa makda wĩirã risg a ye, tɩ Wẽnnaam a Zeova me makd risg a ye. Yaa b tãabã sẽn naag taab la sẽn lebg wa wĩir sẽn kal a tãabã. Wẽnnaam sẽn be ne-bã yĩng kɩtame tɩ b tõe n mao ne b zu-loeesã, la yaa woto n sɩd kɩtd tɩ kãadem tõog n tall sũ-noog hakɩka.
6, 7. a) Wãn-wãn la kiris-neb tõe n maan n da yĩm Wẽnnaam yell b kãadem pʋgẽ? b) Saam-bi-poak a yembr yeelame tɩ bõe n noom yẽ a sɩda nengẽ n yɩɩda?
6 La pag ne a sɩd maanda wãn n tõog tɩ b kãadem tall pãng wa wĩir sẽn kal a tãabo? Yɩɩl-gʋlsd a Davɩɩd yeela woto: “Mam Wẽnnaam, mam dat n maana yãmb daabo. La yãmb tõog bee mam sũur pʋgẽ.” (Yɩɩl 40:9) Yaa d sẽn nong Wẽnnaamã yĩng me la d sẽn maand a raabã ne d sũur fãa wã. Woto yĩnga, kãadmã pʋgẽ, neb a yiibã ned kam fãa segd n yõga zood sõma ne a Zeova la a nong a raabã maanego. Sẽn paase, b segd n sõngda taab sẽn na yɩl tɩ b ned kam fãa sẽn nong Wẽnnaam to-to wã paasdẽ.—Yel. 27:17.
7 Wẽnnaam tõogã sã n sɩd be d sũurẽ, d na n talla tẽebo, la d na n kɩsa sɩd tɩ tẽeb kãng na n pidsame, la d tall nonglem tɩ rẽ fãa paasd d kãadmã pãnga. (1 Kor. 13:13) Saam-bi-poak a ye sẽn kẽ kãadem sẽn ta yʋʋm 50 masã t’a yʋʋr boondẽ t’a Sandra yeela woto: “Bũmb mam sẽn nong m sɩdã nengẽ n yɩɩd yaa a sẽn tũud Biiblã noy n sagend-ma, la a sẽn nong a Zeova n yɩɩd a sẽn nong maam to-to wã.” Pʋg-sɩdbã, rẽ yĩnga y pagbã me tõe n pẽg-y lame tɩ y maanda woto bɩ?
8. Rao ne a pag sã n dat n paam “yõod sõma” b kãadmã pʋgẽ, bõe la b segd n maane?
8 Rapã, bɩ y sok y mens n ges yãmb ne y pagã naagda taab n wilgdẽ tɩ y lʋɩɩsda yãmb ne Wẽnnaam zoodã la Rĩungã tʋʋm taoor bɩ? Sẽn paase, y sɩd geta y pagã wall y sɩdã wa y tʋmd-n-taag a Zeova raabã maaneg pʋgẽ bɩ? (Sɩng. 2:24) Rĩm a Salomo sẽn yɩ yam soabã yeela woto: “Neb a yiib n são nin-yende. Tɩ bõe, bãmb paamda b tʋʋmdã yõod sõma.” (Koɛ. 4:9) Sɩd me, rao ne a pag sã n dat n paam “yõod sõma,” rat n yet tɩ b sã n dat tɩ Wẽnnaam ning b kãadmã bark t’a kaoos la b paam sũ-noog a pʋgẽ, b segd n modga wʋsgo.
9. a) Zak pʋgẽ, pʋg-sɩd tʋʋmd yaa bõe? b) Sẽn zems ne Kolos rãmba 3:19 goamã, pʋg-sɩd yel-manesem ne a pag segd n yɩɩ wãna?
9 Bũmb sẽn wilgd tɩ pag ne a sɩd pa yĩmd Wẽnnaam yell b kãadmã pʋgẽ, yaa b ned kam fãa sẽn maood to-to n tũud Wẽnnaam noyã. Pʋg-sɩd pipi tʋʋmd yaa a ges t’a zakã rãmb tall zood ne Wẽnnaam, la b paam dɩɩb la fut la bũmb ning fãa sẽn yaa tɩlae ne-ba. (1 Tɩm. 5:8) Sẽn paasde, b sagla pʋg-sɩdbã tɩ b ra sãamd b pagbã sũy ye. Kolos rãmb 3:19 wã yeta woto: “Rapa, bɩ y nong y pagbã, la y ra maan gãgs ne bãmb ye.” Biibl mit a yembr yeelame tɩ ned sẽn maand “gãgs” ne a pag “gomd n paoogda a pagã wall a tʋʋd-a, bɩ n pãbd-a, pa rẽ bɩ a pa wilgd-a t’a nong-a lame, wall a pa get pagã yelle, la a pa kogend-a wall a pa sõngd-a ye.” Yaa vẽeneg tɩ kiris-ned pa segd n maan a pag woto lae-lae ye. Pʋg-sɩd sã n get a pag yell sõma, sõngda pagã t’a sakd-a ne yamleoogo.
10. Pagb nins sẽn yaa kiris-nebã segd n talla yel-manesem bʋg ne b sɩdbã?
10 Pag me sẽn yaa kiris-ned sã n pa rat n yĩm a Zeova yell a kãadmã pʋgẽ, a segd n tũuda a noyã. Tʋm-tʋmd a Poll yeela woto: “Pagba, bɩ y sak y sɩdbã wa yãmb sẽn sakd Zusoabã. Tɩ bõe, sɩd yaa pag zu-soab wa Kirist sẽn yaa bãmb nebã zu-soabã.” (Ef. 5:22, 23) A Sʋɩtãan da belga a Hawa t’a sã n bas Wẽnnaam sakr n soog a menga, a na n nafame. Vẽenega, rũndã-rũndã, pagb wʋsg sẽn kẽ kãadem dat n sooga b mense. La pagb nins sẽn mi Wẽnnaam sẽn dat tɩ b zã b mens to-to b kãadmã pʋgẽ wã pa get b sẽn segd n sak b sɩdbã wa zɩɩb ye. B tẽrame t’a Zeova yeelame t’a Hawa na n yɩ a sɩdã ‘sõngd sẽn zems ne-a,’ la b miẽ me tɩ Wẽnnaam sẽn yet t’a yɩ a sɩdã sõngdã, a waoog-a lame. (Sɩng. 2:18) Hakɩka, pag sẽn yaa kiris-ned sã n sakd Wẽnnaam sẽn yeelã, a yaa “a sɩd waoogre.”—Yel. 12:4.
11. Saam-biig a yembr wilgame tɩ bõe n sõng-a t’a kãadmã ket n noome?
11 Bũmb a to sẽn tõe n kɩt tɩ pag ne a sɩd pa yĩmd Wẽnnaam yell b kãadmã pʋgẽ, yaa b sẽn na n naagd taab n zãmsd a Gomdã. Rao a ye yʋʋr sẽn boond t’a Gerald kẽe kãadem tɩ ta yʋʋm 55 masã, hal tɩ ket n noome. A yeela woto: “Bũmb sẽn tõe n kɩt tɩ kãadem tall sũ-noog n yɩɩg yaa pagã ne a sɩdã sẽn na n naagd taab n karemd Biiblã la b zãmsd-a. B sã n naagd taab n maand bũmba fãa, la sẽn tɩ yɩɩde, tẽebã tʋʋma, paasda b zems-n-taarã pãnga, la paasd b yiibã ne a Zeova zoodã me pãnga.” Pagã ne a sɩdã sã n naagd taab n zãmsd Biiblã, a Zeova noyã na n yaa vẽeneg b yamẽ wakat fãa, la b tẽebã pãng me na n paasdame.
12, 13. a) Bõe yĩng tɩ tar yõod tɩ rapã ne b pagbã naagd taab n pʋʋsdẽ? b) Bõe me la pag ne a sɩd tõe n naagd taab n maandẽ tɩ paas b kãadmã pãnga?
12 Neb nins kãadem sẽn nooma naagda taab me n pʋʋsdẽ. Pʋg-sɩd sã n pʋʋsdẽ, n ‘pelgd a pʋg’ n togsd yɛl nins sẽn pak yẽ ne a pagã, yaa vẽeneg tɩ na n paasa b zems-n-taarã. (Yɩɩl 62:9) Sɩd me, wala makre, pag ne a sɩd moor sã n yõsg tɩ b pʋʋs Wẽnnaam n kos-a sõngre, b na n tõog n kõo taab sugr nana-nana. (Mat. 6:14, 15) B sẽn pʋʋs n kos sõngrã, na n kɩtame tɩ b ned kam fãa modgd n na n sõngd a to wã, la b ‘maand sũ-mar ne taab la b kõt taab sugri.’ (Kol. 3:13) Ra yĩm-y tɩ d sã n pʋʋsd Wẽnnaam, rat n yeelame tɩ d teeg-a lame ye. Rĩm a Davɩɩd da yeela Wẽnnaam a pʋʋsg pʋgẽ woto: “Neba fãa geta yãmba.” (Yɩɩl 145:15) D sã n teeg Wẽnnaam n pʋʋsd-a, na n booga d yɩɩrã, bala d miime t’a get d yelle.—1 Pɩɛ. 5:7.
13 Bũmb me sẽn tõe n kɩt tɩ pag ne a sɩd pa yĩmd a Zeova yell b kãadem pʋgẽ, yaa b yiibã sẽn na n kẽnd tigissã la b tũud taab n moond koe-noogã. D tigissẽ wã, b sõngda sẽn kẽ-b kãadmã tɩ b tõogd n bãngd sɩlem nins a Sʋɩtãan sẽn maand n wãad zagsã, la b sẽn tõe n mao ne a sɩlem kãensã to-to. (Ef. 6:11) Sẽn paase, pag ne a sɩd sã n wae n tũud taab n moond koe-noogã, sõngd-b lame tɩ b “tall tẽeb kãn-kãe n da vigs ye.”—1 Kor. 15:58.
Y sã n wa tar zu-loeese
14. Bõe n kɩt tɩ kãadem pa tõe n pa tall zu-loeese?
14 Yaa vẽeneg tɩ pa pipi la woto y sẽn wʋm sagls nins b sẽn kõ zugẽ wã ye. La yɩta sõma tɩ y pelg y pʋs n sõs sagl-kãens zug ne taaba. Bao-y n bãng-y y sã n segd n maneg n tũu sagls kẽer sõma n paase. Biiblã wilgame tɩ baa neb sã n pa yĩmd Wẽnnaam yell b kãadem pʋgẽ, b “na n paama toog” bɩ zu-loeese. (1 Kor. 7:28) Ninsaal sẽn yaa koangdã yĩnga, n paas dũniyã neb yel-manesem sẽn pa sõma wã la a Sʋɩtãan bẽdsã kɩtame tɩ baa neb sẽn tũud Wẽnnaam tõe n tall zu-loees b kãadem pʋgẽ. (2 Kor. 2:11) La a Zeova sõngd-d lame tɩ d maood ne zu-loe-kãens n kelld n maand a raabã. Wẽn-zoɛt a Zoob bõna a paoongo, a tʋm-tʋmdb la a kamba. La baa ne rẽ Biiblã yeela woto: “Toodã fãa pʋgẽ, a Zoob ka tol n kong ye. La a ka yeel tɩ Wẽnnaam ka maan-a neer ye.”—Zoob 1:13-22.
15. Zu-loɛɛg tõe n kɩtame tɩ ned maan bõe, la sẽn kẽ-b kãadmã segd n maana wãn sasa kãnga?
15 La a Zoob pagã yẽ ra wa n yeel-a-la woto: “Yãmb ket n kengda y meng y pʋ-peelmã pʋgẽ la? Tʋʋs-y Wẽnnaam n ki tɩ sɛ.” (Zoob 2:9) Yel-beed sã n paam ned wall zu-loees sã n wʋm neda, sɩd tõe n kɩtame t’a gom wall a maan bũmb sẽn pa zems ye. A Salomo ra yeelame tɩ b sã n maan yam soab pãnga, tõe n kɩtame t’a tʋm wa yalma. (Koɛ. 7:7) Bũmb sã n wa kɩt tɩ y sɩdã bɩ y pagã gom gomd tɩ sãam y sũuri, bɩ y mao n da lebs-a beed ye. Sã n pa rẽ, y na n paasa yellã wẽnem. (Karm-y Yɩɩl Sõamyã 37:8.) Woto yĩnga, y nin-yend sũur sã n wa sãam wall a komsa raood tɩ kɩt t’a gom n pa gũus bɩ y bas taale.—Zoob 6:3.
16. a) Bũmb ning a Zezi sẽn yeel Matɩe 7:1-5 pʋgẽ wã kõta sẽn kẽ-b kãadmã yam bʋgo? b) Bõe tɩ kãadmã pʋgẽ, pag ne a sɩd segd n yɩ wʋmdba?
16 Kãadem pʋgẽ, pagã wall sɩdã pa segd n tags t’a to wã na n toeema zĩig pʋgẽ ye. Wala makre, b nin-yend tõe n tara manesem sẽn pa noom a to wã zãnga, t’a tagsdẽ t’a tõe n kɩtame t’a toeeme. Y sã n tall sũ-mar ne-a n ket n wilgdẽ tɩ y nong-a lame, bilf-bilfu, tõe tɩ y na n tõog n sõng-a lame t’a toeeme. La ra yĩm-y me t’a Zezi bilgame tɩ ned sã n feesd a to n gẽesd a kong-bõonego, yaa wa a sẽn get “moog” sẽn be a to wã nifẽ tɩ “raoog” yaool n be yẽ mengã nifẽ t’a pa ne rẽ ye. A Zezi sagl-d-la woto: “Da bʋ-y ned bʋʋd ye, tɩ Wẽnnaam da wa bʋ yãmb bʋʋd ye.” (Karm-y Matɩe 7:1-5.) Baasgo, woto pa rat n yeel tɩ pag ne a sɩd pa segd n bao n toeem b manesem nins b sẽn segd n mao n toeemã ye. Rao a ye yʋʋr sẽn boond t’a Robert t’a kãadem kolg yʋʋm 40 yeelame: “Pag ne a sɩd sã n pelgd b pʋs n wilgd taab kongre, tɩ b ned fãa sakd n deegd a to saglse, na n sõng-b lame tɩ b bãng tɩ b ned kam fãa segd n toeema a manesem kẽere.” Woto yĩnga, y segd n yɩɩ wʋmdba. Wall tɩ y sãamd y sũur y to wã kongr yĩngã, y segd n nong-a-la zʋg-sõma nins a sẽn zoe n tarẽ wã yĩnga.—Koɛ. 9:9.
17, 18. Y zu-loeesã sã n wa waoogẽ, yɛ la y tõe n tɩ paam sõngre?
17 Yɛlã sẽn toeemdã yĩnga, y tõe n wa paama zu-loees y kãadmã pʋgẽ. Wala makre, y sã n wa rog kamba, yɛl pa na n kong ye. Y nin-yend wall y biig tõe n wa lʋɩya bã-kɛgeng me. Y roagdbã sã n wa kʋʋl wʋsgo, tõe n wa yɩɩ tɩlae tɩ y ges b yell n yɩɩg pĩndã. Y kambã bɩʋʋng zugẽ, b tõe n wa toeema zĩig n zãag wʋsg ne-yã. Tigingã tʋʋm toɛy-toɛyã me tõe n wa waa ne toeemse. Woto fãa yaa yɛl toɛy-toɛy sẽn tõe n wa ne yaams la yɩɩr kãadem pʋgẽ.
18 La y kãadmã zu-loees sã n wa kɩt tɩ y tẽed tɩ yɛlã yɩɩda y nugu, y segd n maana wãna? (Yel. 24:10) Ra koms-y raood ye! A Sʋɩtãan sã n paam tɩ y nin-yend bas tũudum hakɩkã a sũur yaa noog wʋsgo. A sã n paam tɩ ned ne a pag fãa bas Wẽnnaam sakre, a na n kɩdmame n yɩɩge. Woto yĩnga, modg-y tɩ y kãadmã kell n tall pãng wa wĩir sẽn kal a tãabo. Biiblã pida ne kibay sẽn gomd neb sẽn tõog n kell n sak Wẽnnaam to-kãsems pʋsẽ. Wala makre, a Davɩɩd pelga a pʋg n pʋʋs woto: “Mam Wẽnnaam, bɩ y zoe mam nimbãanega; tɩ bõe, ninsaalba . . . namsda maam ne zabre.” (Yɩɩl 56:2) Rẽ yĩnga b zoe n namsa yãmb hal tɩ y wa tagsdẽ tɩ b baood-y-la ne zabr bɩ? Woto yĩnga, yaa ned y sẽn nong wʋsg wall ned sẽn pa pẽ ne-y n wa ne sũ-sãamsã me, tẽeg-y t’a Davɩɩd paama pãng n tõog n mao ne a toogã, la yãmb me tõe n paama pãng n tõoge. Ad a Davɩɩd sẽn yeele: “Mam baooda [a Zeova] la bãmb leokda maam n yolsd maam ne m dabeemã fãa.”—Yɩɩl 34:5.
Bark a taab y sẽn na n paame
19. Bõe la d segd n maan t’a Sʋɩtãan da tõog n sãam d kãadmã?
19 Dũniyã yaoolem da-kãensã pʋsẽ, rapã ne b pagbã segd n ket n ‘sagenda taab la b sõngd taaba.’ (1 Tes. 5:11) Ra yĩm-y t’a Sʋɩtãan ket n yetame tɩ tõnd maanda a Zeova raabã d mensã nafr yĩng lakae, pa d sẽn nong-a yĩng ye. A na n ket n maanda a sẽn tõe fãa n dat n kɩt tɩ d bas Wẽnnaam sakre. A tõe n maka y kãadmã kaoob menga. Sẽn na yɩl t’a ra tõog-do, d segd n teega a Zeova ne d sũur fãa. (Yel. 3:5, 6) A Poll yeela woto: “Mam tõee fãa ne ned ning sẽn kõt-a maam pãngã” maasem.—Fil. 4:13, Sebr Sõngo.
20. Pag ne a sɩd sã n pa yĩm Wẽnnaam yell b kãadmã pʋgẽ, b na n paama bark bʋse?
20 Neb nins sẽn pa yĩmd Wẽnnaam yell b kãadmã pʋgẽ wã na n paama bark wʋsgo. A Joel ne a pagã kãadem sẽn ta yʋʋm 51 wã kɩsa sɩd ne rẽ. Ad a Joel sẽn yeele: “Mam pʋʋsda a Zeova bark wakat fãa, maam ne m pagã zĩid-n-taar sẽn noomã yĩnga. A sɩd yaa sõngd sẽn zems ne maam.” Yaa bõe n kɩt tɩ b kãadmã ket n noom woto wã? A paasame: “Tõnd ned kam fãa maoodame n maand a to wã neere, d bʋkda d sũy ne taab la d nong taaba.” Yaa sɩd tɩ dũni kãngã pʋgẽ, ned baa a ye pa tõe n maand woto tɩ zemsdẽ n pa yõsgdẽ ye. La d segd n maoodame n tũud Biiblã noyã, n da tol n yĩm a Zeova yell d kãadmã pʋgẽ ye. D sã n maand woto, d kãadmã na n talla pãng wa ‘wĩir sẽn kal a tãabo, n ka tõe n kaoog naana ye.’—Koɛ. 4:12.
Y tẽrame bɩ?
• Ra yĩm a Zeova yell kãadmã pʋgẽ wã rat n yeelame tɩ bõe?
• Pag ne a sɩd sã n wa tar zu-loeese, b segd n maana wãna?
• Bõe n wilgd tɩ pag ne a sɩd pa yĩmd Wẽnnaam yell b kãadem pʋgẽ?
[Zãmsgã sogsgã]
[Foto rãmba, seb-neng 23]
Rapã ne b pagbã sã n naagd taab n pʋʋsdẽ, b tõogd n maoa ne zu-loeesã