Tesalonik rãmb la Tɩmote sɛbã vaeesgo
A Zeova Gomdã vɩɩme
Tesalonik rãmb la Tɩmote sɛbã vaeesgo
TƲM-TƲMD a Poll sẽn kẽng Tesalonik n tɩ luglg tiging be wã tɛka, tiging-paalg kãngã nebã paama namsg wʋsgo. A Tɩmote kẽnga be n lebg n wa ne kiba-noodo, tɩ kɩt t’a Poll gʋls lɛtr n tool tigingã neb n na n pẽg-b la a keng b raoodo. Tõe tɩ wakat kãng t’a Tɩmote ra tara yʋʋm 20 la zaka. Yaa lɛt-kãng n yɩ a Poll pipi lɛtr Wẽnnaam vʋʋsem sõngã sẽn vẽneg-a t’a gʋlse. La wõnda yɩɩ yʋʋmd 50 wã baasgẽ la a gʋls-a. Rẽ poor bilfu, a le gʋls-b-la lɛtr a yiib-n-soaba. Lɛt-kãng pʋgẽ, a remsa saam-biis kẽer tags-kɛga, la a sagl tigingã neb tɩ b kell n yals kãn-kãe.
Rẽ sẽn loog tɩ yʋʋm 10, a Poll kẽnga Masedoan, t’a Tɩmote kẽng Efɛɛze. A Poll gʋlsa a Tɩmote n wilg-a t’a kell n pa Efɛɛz n sõng saam-biisã tɩ b modg n tall zood ning b sẽn tar ne a Zeova wã, baa neb kẽer sẽn da be tigingã pʋgẽ n zãmsd nebã ziri wã. Yʋʋmd 64 sasa, bugmã sẽn dɩ Rom tẽngã loogr poore, b sẽn wa n yik n namsd kiris-nebã wʋsgã, a Poll gʋlsa lɛtr a yiib-n-soab n tool a Tɩmote. Lɛt-kãng yɩ a yaoolem lɛtr Wẽnnaam vʋʋsem sõngã sẽn vẽneg-a t’a gʋlse. Rũndã-rũndã, sagls nins sẽn be a Poll lɛta a naas kãensã pʋsẽ wã tõe n nafa tõnd me.—Heb. 4:12.
“D GŨUSI”
A Poll gʋlsa Tesalonik tigingã neb n pẽg-b b tẽeb tʋʋmã, b nonglem tʋʋmã, la b tõog-toogã yĩnga. A yeel-b lame tɩ b yaa yẽ ‘tẽebo, a sũ-noog la a sũ-noog maanfo.’—1 Tes. 1:3; 2:19.
A Poll sagla Tesalonik kiri-nebã tɩ b bels taab ne b sẽn mi tɩ kũum na n vʋʋgame wã. Rẽ poore, a yeel-b lame t’a Zeova “daarã na n waa wa wagdr sẽn wat yʋngo.” A sagl-b lame tɩ b “gũusi,” la b kell n ning ra-kãng b yamẽ.—1 Tes. 4:16-18; 5:2, 6.
Sogsg b sẽn leoke:
4:15-17—Ãnd dãmb la ‘b sẽn na n zẽk sawat pʋsẽ tɩ b seg Zusoabã yĩngrã,’ la wãn to la b zẽkd-ba? Yaa kiris-neb nins sẽn paam vʋʋsem sõngã zaeeb n ket tẽngã zug Kiristã naamã rɩɩb sasa wã. B ‘segda Zusoab’ a Zezi yĩngri, a sẽn beẽ zĩig ning tɩ nif pa tõe n yã wã. Nand tɩ b seg Zusoabã yĩngri, b segd n deng n kiime tɩ b vʋʋg-b tɩ b yɩ malɛgse. (Rom 6:3-5; 1 Kor. 15:35, 44) Kiristã zoe n sɩnga a naamã rɩɩbo, dẽnd kiris-ned sẽn paam vʋʋsem sõngã zaeeb sã n ki, a kelld n vʋʋgame. B zẽkd-b-la yĩngri, rat n yeel tɩ b loogda zĩig pʋgẽ.—1 Kor. 15:51, 52.
5:23—A Poll sẽn yeel a pʋʋsgã pʋgẽ tɩ saam-biisã modg n ‘tall b sɩɩga ne yam, la b yĩnga fãa gill tɩ rõdb ra zĩndã’ rat n yeelame tɩ bõe? A Poll ra gomda tigingã neb fãa sẽn naag taab yelle, tɩ Tesalonik kiris-nebã sẽn paam vʋʋsem sõngã zaeebã be sʋka. A kosa Wẽnnaam t’a sõng tigingã neb tɩ b naag taab n tall b “sɩɩgã” ne yam, rat n yeel tɩ b kell n tall b yam sõngã. A le pʋʋsa Wẽnnaam t’a kogl tigingã “yĩngã” sẽn dat n yeel tɩ sẽn paam-b vʋʋsem sõngã zaeebã fãa. (1 Kor. 12:12, 13) A Poll pʋʋsgã wilgdame tɩ tigingã yell ra pak-a-la wʋsgo.
Zãmsg tõnd yĩnga:
1:3, 7; 2:13; 4:1-12; 5:15. Sẽn na yɩl n tõog n kõ ned sagls tɩ yɩ sõma, d segd n modg n deng n pẽga a soabã a sẽn modgd zĩig ninsã yĩnga, la d yaool n wilg-a t’a segd n modg n tũu sagls nins d sẽn kõt-a wã me n paase.
4:1, 9, 10. A Zeova Kaset soab fãa segd n manegda zood ning a sẽn tar ne a Zeova wã wakat fãa n paasdẽ.
5:1-3, 8, 20, 21. A Zeova daarã sẽn kolgdã yĩnga, d segd n ninga ra-kãngã d yamẽ, ‘la d bob tẽeb la nonglem tɩ yɩ tõnd gãongo, la d fõgen fãagr tẽeb tɩ yɩ kut pugla.’ Sẽn paase, d segd n gũusd n geta bãngr-goam nins Wẽnnaam sẽn togs tɩ be a Gomdã pʋgẽ wã sẽn pidsd to-to.
“D YALS KÃN-KAE”
A Poll wilga a pipi lɛtrã pʋgẽ tɩ “Zusoab a Zezi Kirist waoongã” kolgame. La wõnda neb kẽer n da be tigingã pʋgẽ n wẽnemd a Poll goamã võore. Sẽn na yɩl n dems tags kãense, a Poll wilga bũmb nins sẽn na n deng n zĩndi.—2 Tes. 2:1-3.
A Poll sagla woto: “Bɩ y yals kãn-kãe la y tall bũmb nins tõnd sẽn zãms yãmbã.” A kõ-b-la noor tɩ b ‘welg b mens ne ba-biig ning kẽnd sẽn ka zemse.’—2 Tes. 2:15; 3:6.
Sogsg b sẽn leoke:
2:3, 8—“Yel-wẽnã rao” bɩ “kɩɩsg soabã” yaa ãnda, la wãn to la b na n sãam-a? Yaa kiris-neb ne yʋʋr tũudmã taoor dãmbã sẽn naag taab la b sẽn boond tɩ “yel-wẽnã rao” wã. Yaa “Gomdã,” rat n yeel t’a Zezi Kirist sẽn yaa Wẽnnaam koe-taasd kãsengã la b kõ noor t’a taas nin-wẽnsã Wẽnnaam bʋ-kaoorã koees la a kɩt tɩ b sãam-ba. (Zã 1:1) Dẽnd d tõe n yeelame t’a Zezi na n sãama yel-wẽnã rao ‘ne a noor pemsem.’
2:13, 14—B sẽn yeel tɩ Wẽnnaam yãka kiris-neb nins sẽn paam vʋʋsem sõngã zaeebã ‘hal sɩngrẽ tɩ b paam fãagrã’ rat n yeelame tɩ bõe? A Zeova pĩnd n yãka neb sõor a sẽn na n zae ne vʋʋsem sõngã hal wakat ning a sẽn yeel tɩ pagã yagengã na n pogla a Sʋɩtãan zugã. (Sɩng. 3:15) A Zeova reng n wilga yɛl nins b sẽn segd n pids tɩ b yaool n yãk-bã. A reng n wilga tʋʋm ning b sẽn na n tʋmã, la namsg ning b sẽn na n paamã me. Dẽnd d tõe n yeelame t’a boola nin-kãens ‘woto yĩnga.’
Zãmsg tõnd yĩnga:
1:6-9. A Zeova bʋ-kaoor sasa, a bakda nin-wẽnsã n sãam la a kogl nin-sõma wã.
3:8-12. A Zeova raarã sẽn koglgã yĩng pa segd n kɩt tɩ d yeel tɩ d kõn tʋm n ges d mens yell ye. Ned sã n bas n pa tʋmdẽ, tõe n kɩtame t’a lebg kʋɩɩma, la kɩt tɩ lebg neb a taabã yɛl n pak-a.—1 Pɩɛ. 4:15.
“TALL BŨMB NING B SẼN NING FO NUGẼ WÔ
A Poll sagla a Tɩmote t’a ‘zab zabr sõma wa bãngr-goamã sẽn da togsã, la t’a tall tẽeb la sũur kaset sẽn yaa sõma.’ A leb n wilga neb nins b sẽn segd n yãk tɩ yɩ kãsem dãmb bɩ kãsem sõngdb tigingã pʋgẽ wã sẽn tog n tall zʋg-sõma ninsi. A Poll leb n sagla a Tɩmote t’a “kɩɩs soalem sẽn ka võore, la sẽn yaa yalemdo.”—1 Tɩm. 1:18, 19; 3:1-10, 12, 13; 4:7.
A Poll yeela a Tɩmote woto: “Da saag n tãs nin-kẽem ye.” A sagl-a-la woto: “Tall bũmb ninga b sẽn ning fo nugẽ wã, la f lak ne gom-wẽnse la gom-yaalse la no-koɛɛma.”—1 Tɩm. 5:1, Sebr Sõngo; 6:20.
Sogsg b sẽn leoke:
1:18; 4:14—Gom-bʋs la b reng n togs a Tɩmote zugu? Tõe tɩ yaa bãngr-goam vʋʋsem sõngã sẽn vẽneg tɩ b togs n na n wilg tʋʋm ning a Tɩmote sẽn na n wa tʋm tigingã pʋgẽ. La tõe tɩ yɩɩ sasa ning a Poll sẽn wa n kaagd Listr tigingã, a sẽn wa n gilgd tẽnsã naoor a yiib-n-soab n na n moon koɛɛgã. (Tʋʋ. 16:1, 2) Bãngr-goam kãensã b sẽn togsã yĩng kɩtame tɩ kãsem-dãmbã tik bi-bɩɩg a Tɩmote ne b nus n pʋʋs a yĩnga, t’a na n tʋm tʋʋm takɩ tigingã pʋgẽ.
2:15—Wãn to la pag tõe n paam fãagr a sẽn dog kamb yĩnga? Pʋsã zãabã, kambã rogem la b yell gesg n paas zakã yell gesg tõe n kɩtame tɩ pag pa tar sẽk n naagd “yel-kãnesdb la gom-yaals rãmb sẽn gomd sẽn ka zems” ye.—1 Tɩm. 5:11-15.
6:15, 16—Verse kãensã gomda Wẽnnaam a Zeova yell bɩ yaa a Zezi Kirist yelle? Verse kãensã gomda ned ning b sẽn da yeel t’a watame wã yelle, rat n yeel t’a Zezi Kirist yelle. (1 Tɩm. 6:14) D sã n mak a Zezi ne neb nins sẽn dɩt naam rũndã wã, d mikdame tɩ yaa yẽ a ye bal la “naab sẽn ka to” la sẽn pa kiidi. (Dan. 7:14; Rom 6:9) A sẽn kẽng saasẽ wã tɛka, ned baa a ye ka le ‘tõe n yã-a’ ne nif ye.
Zãmsg tõnd yĩnga:
4:15. D sẽn bãng a Zeova kaoosame tɩ pa kaoos me, d segd n kell n modgame n da leb poorẽ, la d modg tɩ zood ning d sẽn tar ne-a wã pãng paasdẽ.
6:2. D tẽed-n-taag sã n dɩk-d tʋʋmã, d pa segd n tags tɩ d tõe n tʋma yaal-yaale, wall y baood y mens nafr bal ye. D segd n sakd-a-la ne d sũy fãa meng n yɩɩd ned sẽn pa d tẽed-n-taaga.
“MOON WẼNNAAM KOƐƐGÃ, LA F NANG PÃNG WAKAT FÃA”
A Poll gʋlsa a Tɩmote n na n segl-a t’a tõog n mao ne zu-loees nins sẽn watã. A yeela woto: “Wẽnnaam ka kõ tõnd dabeem sɩɩg ye, yaa sɩɩg sẽn wat ne pãnga la nonglem la yam.” A sagl-a-la woto: “Zusoabã tʋm-tʋmd ka tog n maan zabr ye. A tog n yɩɩ sũ-bʋgsem soab ne nebã fãa, la sẽn tõe n zãms neb a taabã.”—2 Tɩm. 1:7; 2:24.
A Poll sagla a Tɩmote yaa: “Kell n sak bũmb nins fo sẽn da zãms la f bãng tɩ yaa sɩdã.” Ziri zãmsgã ra pida tẽngã tɩ kɩt tɩ tʋm-tʋmd a Poll yeel a Tɩmote woto: “Bɩ f moon Wẽnnaam koɛɛgã, la f nang pãng wakat fãa, . . . wilg nebã b kongre, la f lenge, la f sagle.”—2 Tɩm. 3:14; 4:2.
Sogsg b sẽn leoke:
1:13—‘Gom-sõma wã mamsg’ yaa bõe? “Gom-sõma” wã yaa a Zezi Kirist goamã, rat n yeel tɩ kiris-neb hakɩkã sẽn zãmsd nebã bũmb ninsã. (1 Tɩm. 6:3) A Zezi sẽn zãms nebã bũmb nins la a maan bũmb ninsã zemsa ne Wẽnnaam Gomdã sẽn yetã. Dẽnd gom-sõma wã tõe n yɩɩ Biiblã sẽn yet bũmb ninsã fãa. B sõngda tõnd tɩ d bãngd a Zeova sẽn dat tɩ d maan bũmb ninsã. D sã n tũud bũmb nins d sẽn zãmsd Biiblã pʋgẽ wã, wilgdame tɩ d tallda gom-sõma kãens mamsgã.
4:13—Parsemẽ rãmbã b sẽn lebg ka tɩ seb-vãadã yaa bõe? Yaa gãnd b sẽn nome, n gʋls Biiblã sɛb kẽer goam b zutu. Tõe t’a Poll ra ratame tɩ b zɩ babg ning b sẽn gʋls ne hebre wã n wa kõ-a t’a karem bãensã roogẽ Romme. Tõe tɩ seb-pindem kẽer ra maana ne papirus tɩ taab maan ne gãndo.
Zãmsg tõnd yĩnga:
1:5; 3:15. Yaa zãmsg ning a Tɩmote sẽn paam hal a yãadmẽ wã n sõng-a n yɩɩg t’a tẽ a Zezi Kiristã. Yaa tẽeb kãng n kɩt t’a ra sakd n maand bũmb fãa wã. Ad sɩd tara yõod wʋsg tɩ roagdbã ges b sã n sɩd geta b kambã yelle neere, la b tʋmd tʋʋm nins fãa Wẽnnaam sẽn bobl-bã.
1:16-18. B sã n wa namsd d saam-biis b tẽebã yĩnga, n ning-b bãens roogẽ, wall d saam-biisã sã n segd zu-loeese, bɩ d modgd n pʋʋsd b yĩnga, la d maan d sẽn tõe fãa n sõngd-ba.—Yel. 3:27; 1 Tes. 5:25.
2:22. Kiris-nebã, sẽn yɩɩd fãa kom-bɩɩsã pa segd n bas tɩ yĩn-wɩsgrã, mizikã, reemã, so-togsã, sõs zaalã, la yɛl a taab yell pak-b tɩ b ye ka tar sẽk wʋsg n tʋmd Wẽnnaam tʋʋmã ye.
[Foto, seb-neng 31]
Lɛt-bʋg n yɩ a Poll yaoolem lɛtr Wẽnnaam vʋʋsem sõngã sẽn vẽneg-a t’a gʋlse?