A Zeova na n leoka pʋʋsg b sẽn pʋʋs-a ne sũur fãa

‘Tɩ b bãng tɩ yaa yãmb y ye bal yʋʋr n yaa [a Zeova]; yãmb yaa Sẽn-ka-to dũniyã tɛk fãa.’—YƖƖL 83:19.

1, 2. a) Tũu ne bõe tɩ neb wʋsg bãng Wẽnnaam yʋʋrã pipi, la b manesem yɩɩ wãna? b) La sogs-bʋs la d tõe n soke?

PAG a yembr n da yã yel-beed sẽn maan b sakẽ tɩ sãam a sũur wʋsgo. A roagdbã sẽn sɩng n yaa katolik rãmbã hal a yãadmẽ wã yĩnga, a kẽng n na n tɩ kosa sõngr prɛtr a ye nengẽ. La prɛtrã pa tol n bao n na n yã-a meng ye. Rẽ kɩtame tɩ pagã pʋʋs Wẽnnaam n yeel-a woto: “Mam pa mi foo ye . . . , la m miime tɩ f beeme. M kot-f lame tɩ f sõng-m tɩ m bãng-fo!” Rẽ poor bilfu, a Zeova Kaset rãmb n wa n sõs ne-a, n bels-a la b sõng-a wa a sẽn da ratã. B wilg-a-la yɛl wʋsgo,  la b sõng-a me t’a bãng tɩ Wẽnnaam yʋ-peellã la a Zeova. Pagã sũur yɩɩ noog hal wʋsg a sẽn bãng Wẽnnaam yʋʋrã. A pʋd n yeela koe-moondbã woto: “Yãmb miime? Ad yaa Wẽnnaam kãngã la mam sẽn da sɩng n dat n bãng hal m yãadmẽ wã!”

² Wa pʋg-kãngã, neb wʋsg me sẽn wa n bãng Wẽnnaam yʋʋrã pipi, b sũy yɩɩ noog hal wʋsgo. Kẽer nengẽ yɩɩ b sẽn wa n karem Yɩɩl Sõamyã 83:18 soabã Traduction du monde nouveau wã pʋgẽ la b yã a Zeova yʋʋrã pipi. Verse kãng yeta woto: “Tɩ nebã bãng tɩ fo yʋʋr sẽn yaa a Zeova wã, foo f yembr bal n yaa Zãntlem sẽn kã to Soab tẽngã fãa zugu.” La rẽ yĩnga yãmb zoe n soka y meng bũmb ning sẽn kɩt tɩ b gʋls yɩɩll 83 soabã bɩ? Bõe n na n wa kɩt tɩ nebã fãa sak n deeg tɩ yaa a Zeova a ye bal n sɩd yaa Wẽnnaam? Yɩɩl kãngã wilgda tõnd bõe rũndã-rũndã? D na n leoka sogs-kãensã sõs-kãngã pʋgẽ. *

Neb n da zems taab n na n zab ne a Zeova nin-buiidã

3, 4. Yaa ãnd n gʋls yɩɩll 83 soabã, la a gomda bõe yelle?

³ Yɩɩll Sõamyã 83 soabã pipi goamã pʋgẽ, b wilgame tɩ yaa “a Azaf yɩɩlle.” Tog n yaa Levi ned a Azaf sẽn yɩ yɩɩn-yɩɩnd yʋʋr sẽn da yi rĩm a Davɩɩd wakatẽ wã yageng a ye n gʋls-a. Yɩɩllã pʋgẽ, a kota a Zeova t’a kɩt tɩ b bãng tɩ yẽ a Zeova la ãndũniyã fãa naaba, la a kɩt me tɩ b bãng a yʋʋrã. Segd n yaa a Salomo kũumã zugẽ la b gʋls yɩɩl-kãngã. Bõe n wilgd rẽ? Bala a Davɩɩd ne a Salomo naamã wakat tɩ Tɩɩr dĩmã ra pa tar beem ne Israɛll ye. La yɩɩll 83 soabã gʋlsg sasa tɩ Tɩɩr naaga tẽns sẽn da yaa Israɛll bɛɛba.

⁴ Yɩɩl-gʋlsdã sõdga tẽns piig sẽn da zems taab n dat n menes Wẽnnaam nin-buiidã. Be-kãens fãa ra yaa Israɛll tẽn-yagse, tɩ b sõdg-b n wilgi: “Yaa Edom buud ne Ismaɛll buudu sẽn tilgd b fu-rotã, la Moaab soolem ne Hagaar yagensã, la Geball soolem ne Amõ soolem la Amalɛk buudã, la Filisti soolem ne Tɩɩr nebã. Asiiri soolem me lagma ne bãmba.” (Yɩɩl 83:7-9) Yaa pĩnd wẽndẽ yel-bʋg yell la yɩɩllã sẽn gomdã? Neb kẽer yeelame t’a tẽegda Amõ ne Moaab la Seyiir tãensã neb sẽn da wa n zems taab n na n zab ne Israɛlle, rĩm a Zozafat naamã wakatã. (2 Kib. 20:1-26) Sãnda me tẽedame tɩ yaa beem ning fãa tẽn-yagsã sẽn tall ne Israɛllã yell la yɩɩllã sẽn gomdã.

5. Wãn-wãn la Yɩɩll 83 soabã nafd kiris-nebã rũndã-rũndã?

⁵ La sẽn yaa a soab fãa, yaa vẽeneg tɩ yaa bɛɛb sẽn da wa n dat n sãam a Zeova nin-buiidã sasa la a kɩt tɩ b gʋls yɩɩl-kãngã sẽn yaa pʋʋsgã. Yɩɩllã kengda Wẽnnaam nin-buiidã raood rũndã-rũndã me, bala hal n tãag masã, b bɛɛbã maoodame n dat n menes-ba. La yaa vẽeneg tɩ ka la bilfu, a Goog sẽn yit Magoogã sã n wa tigim a nebã n na n zab a yaoolem zabr ne sẽn pʋʋsd-b Wẽnnaam ne sɩɩg la ne sɩdã, yɩɩl-kãngã na n kell n kenga d raoodo.—Karm-y Ezekɩɛll 38:2, 8, 9, 16.

Bũmb ning sẽn da pak yɩɩl-gʋlsdã n yɩɩda

6, 7. a) Yɩɩl-gʋlsdã kosa bõe yɩɩll 83 soabã sɩngrẽ? b) Bõe n da pak-a n yɩɩda?

⁶ Kelg-y yɩɩl-gʋlsdã sẽn yet bũmb ning a pʋʋsgã pʋga. A yeela woto: “Wẽnnaam, da sĩnd-y sɩɩ ye. Bɩ Wẽnnaam da bas goam n kaoos ye. Gese, yãmb bɛɛbã maanda bʋrga, yãmb kisgdbã zẽkda b zutu. Bãmb sɩfda yãmb nebã ne sɩlem. . . . Bãmb lagma taab ne yam a yembr n baood bãmb sẽn na n maan bũmb ning ne yãmba; bãmb maana kãabg ne taab n kɩɩsd yãmba.”—Yɩɩl 83:2-4, 6.

⁷ Bõe n da pak yɩɩl-gʋlsdã n yɩɩda? Vẽenega, a ra segd n tʋlla ne a sũur fãa tɩ yẽ  ne a zakã rãmb põs bɛɛbã nusẽ. La sẽn da pak-a a pʋʋsgã pʋgẽ n yɩɩd yaa b sẽn da paoogd a Zeova yʋʋrã la b bugsd a nin-buiidã sẽn da yaa a kaset rãmbã. Tõnd me sẽn vɩ dũni-kãngã yaoolem dayã pʋgẽ wã, d paamda toodo. La wa yɩɩl gʋlsdã, bɩ d modg tɩ yɩ a Zeova yʋʋrã sẽn segd n paam waoogrã n pak-d n yɩɩda.—Karm-y Matɩe 6:9, 10.

8. Bõe n kɩt tɩ tẽnsã ra sɩɩg taab noor n dat n zab ne Israɛlle?

⁸ Yɩɩl-gʋlsdã wilgame tɩ Israɛll bɛɛbã yeela woto: “Wa-y tɩ d menes bãmb tɩ b yi dũniyã buud sʋka, hal tɩ ned kõn leb n tẽeg Israɛll yʋʋr yɛs ye.” (Yɩɩl 83:5) Ad tẽn-kãensã sɩd ra kisa Wẽnnaam nin-buiidã wʋsgo! La bũmb a to me n da kɩt tɩ b zems taab n dat n zab ne Israɛllã. B ra tʋll n deega Israɛll tẽnsã. B wuka b mens n yeel woto: “Tɩ d dees zĩis nins Wẽnnaam sẽn be wã n sooge.” (Yɩɩl 83:13) La rẽ yĩnga kiris-nebã wakat tɛka, bũmb a woto buud zĩndame bɩ? Vẽenega!

“Yãmb yi-sõngẽ wã”

9, 10. a) Bõe la b sẽn da boond pĩnd wẽndẽ tɩ Wẽnnaam yi-sõngã? b) Bark bʋs la sẽn paam-b zaeebã kellã n paas “piis a taabã” paamd rũndã-rũnda?

⁹ Pĩnd wẽndẽ, b ra boonda kãabg tẽngã tɩ Wẽnnaam yi-sõngo. Tẽeg-y tõogr yɩɩll ninga Israɛll nebã sẽn da yɩɩle, Wẽnnaam sẽn wa n fãag-b n yiis Eziptã. B yɩɩla woto: “Neb nins yãmb sẽn fãagã, yãmb yãagda bãmb ne nonglem. Yãmb pãnga tara bãmb n dabd yãmb yi-sõngẽ wã.” (Yik. 15:13) Kaoosg zugẽ, “yi-sõng” kãng wa n talla wẽnd-doog ne a maan-kʋʋdba, la na-tẽng sẽn yaa Zerizalɛm. Rĩm dãmb nins b sẽn da yãkdã ra yaa a Davɩɩd yagense, la a Zeova n da yãkd-b tɩ b rɩt naamã a yʋʋr yĩnga. (1 Kib. 29:23) Sɩd be bʋʋm t’a Zezi ra bool Zerizalɛm tɩ “Rĩm kãseng tẽnga.”—Mat. 5:35.

¹⁰ La yaa wãn to yẽ kiris-nebã wakatẽ? Yʋʋmd 33 soabã pʋgẽ, Wẽnnaam baoa bu-paalg a to b sẽn boond tɩ “Israɛll sẽn yaa Wẽnnaam dẽnda.” (Gal. 6:16) Bu-paalg kãngã sẽn yaa a Zezi Kirist ba-biis nins sẽn paam vʋʋsem sõngã zaeebã tõog n tʋma tʋʋmd pĩnd wẽndẽ Israɛllã sẽn pa tõoge. B tõog n yɩɩ Wẽnnaam yʋʋrã kaset rãmba. (Ezai 43:10; 1 Pɩɛ. 2:9) Wẽnnaam pʋlm-b-la bũmb ning a sẽn da pʋlem pĩnd wẽndẽ Israɛllã. A yeela woto: “Mam na n yɩɩ bãmb Wẽnnaam la bãmb na n yɩɩ mam neba.” (2 Kor. 6:16; Maan. 26:12) Yʋʋmd 1919 soabã pʋgẽ, a Zeova kɩtame tɩ “Israɛll sẽn yaa Wẽnnaam dẽndã” neb kellã paam a lohorem hal tɩ seke. Wakat kãnga a kõ-b-la “tẽnga.” La pa tẽng sɩd-sɩd ye. Yaa tʋʋmd a sẽn bobl-b tɩ b tʋmd dũniyã gill zugu, tɩ kɩt tɩ yaa wa b sẽn be arzãna. (Ezai 66:8) Hal yʋʋmd 1930 soabã tɛk n watẽ, neb nins b sẽn boond tɩ “piis a taabã” bãmb milyõ rãmb n wat n paasd-ba. (Zã 10:16) A Zeova sẽn kɩtd tɩ rũndã-rũndã kiris-nin-kãensã sõorã tar paasg la a kogend-b tɩ b tar sũ-noogã, yaa kaset sẽn wilgd vẽeneg t’a Zeova bal n sɩd segd n dɩ naam ãndũniyã gill zugu. (Karm-y Yɩɩl Sõamyã 91:1, 2.) Ad woto sɩd kãbga a Sʋɩtãan sũuri!

11. Bõe la Wẽnnaam bɛɛbã ket n data?

¹¹ Dũni kãngã yaoolem dayã sẽn sɩngã tɛka, a Sʋɩtãan tusda neb nins sẽn teend-a tẽngã zugã tɩ b zabd ne kellã sẽn zaeyã la “piis a taabã” sẽn yaa b tũud-n-taasã. Erop deluwɛst tẽnsã pʋsẽ, b nams-b-la nazi rãmbã naam sasa. Erop delɛste, b nams-b-la Iniyõ Sovietik kominist rãmbã naam sasa me. B nams-b-la tẽns a taab pʋsẽ me. La pa na n tek woto ye. Bala sẽn yɩɩd fãa, a Goog sẽn yit Magoog yaoolem zabrã sasa, b na n nams-b lame. Zab-kãng pʋgẽ, tõe tɩ bɛɛbã na n zaeya a Zeova nin-buiidã paoong wa pĩnd wẽndẽ bɛɛb sẽn da zae-bã. La bũmb ning a Sʋɩtãan sẽn datã ket n yaa a tõog n menes tõnd a Zeova Kaset rãmbã fasɩ n kɩt tɩ b yĩm d yelle. Wãn to la a Zeova na n leok  geesg a woto sẽn yaa a naamã sẽn ka to wã paoogrã? D tẽeg yɩɩl-gʋlsdã goama.

Kaset sẽn wilgd t’a Zeova na n tõogame

12-14. Yɩɩl-gʋlsdã tẽegda zab a yiib bʋs Israɛll nebã sẽn zab Megido sɛɛgẽ n tõoge?

¹² Tẽeg-y tɩ yɩɩl-gʋlsdã ra kɩsa sɩd ne a sũur fãa t’a Zeova tõe n kɩtame tɩ bɛɛbã magb pa pids ye. A tẽega Israɛll sẽn da tõog a bɛɛb zabr pʋgẽ pĩnd wẽndẽ Megido tẽngã sɛɛgẽ naoor a yiib n sãam-b zãng-zãnga. Tẽng-kãng sẽn be tãng zugã sigdg yaa lon-kãseng b sẽn da boond me tɩ Megido. Sɩpaolgo, b nee Kisõ kʋɩlgã sẽn dɩg koɛɛng n tall n tud lon-kãng pʋgẽ. La sẽoogo, kʋɩlgã pit n puugame tɩ longã fãa yas ne koom. Tõe tɩ yaa rẽ n kɩt tɩ b ra boond kʋɩlgã me tɩ “Megido koomã.”—Bʋk. 4:13; 5:19.

¹³ Morɛb tãngã ne Megido longã zemsa kɩlometr 15 woto. Yaa tãn-kãng sɛɛgẽ la Madiã ne Amalɛk la Israɛll yaang tẽnsã sodaas sẽn da zems taab n wa sig n na n zab ne Israɛll a Zedeõ wakatẽ wã. (Bʋk. 7:1, 12) A Zedeõ booga a sodaasã sõor sẽn da zoe n paoodẽ wã hal tɩ wa kell neb 300 bala. La ne a Zeova sõngre, b tõoga b bɛɛbã sẽn da yɩɩd-bã. B maana wãn n tõoge? Wẽnnaam yeel-b lame tɩ b tall bard ne rʋgd la bug-vɩlens n kẽng yʋn-sʋk n tɩ gũbg bɛɛbã sik zĩiga, la tɩ b sã n ta bɩ a Zedeõ kɩt t’a nebã naag taab n peeb bardã la b wã rʋgdã tɩ b bug-vɩlensã puki, la b peeb bardã la b kaas n yeel woto: “Sʋʋgã yaa [a Zeova] ne a Zedeõ n so.” B sɩd kẽngame n tɩ maan woto tɩ bɛɛbã pelens yɩke, tɩ kɩt tɩ b yik n wẽneg n sɩng taab kʋʋbo. Kẽer maka põsb n zoe n dʋʋg Zʋrdẽ kʋɩlgã. La Israɛll neb a taab yi n pʋgl-b lame. Bɛɛbã b sẽn kʋ wã sõor yika neb 120 000.—Bʋk. 7:19-25; 8:10.

¹⁴ Taboor tãngã bee sẽn zems kɩlometr a 6 zĩigẽ ne Morɛb tãngã, tɩ Megido longã be b sʋka. Yaa Taboor tãngẽ wã la Israɛll bʋ-kaood a Barak sẽn da tigim sodaas 10 000 tɩ b na n zab ne Hazor sẽn yaa Kanã tẽng a ye wã. Tẽn-kãng rĩm a Zabẽ sodaasã naab yɩ a Sizera. A sodaasã ra tara saar dãmb 900, tɩ saar kãens naoã ra tar sʋ-wogdo. A Sizera sodaasã yãa Israɛll dãmbã sẽn pa tar zab-te-tɩrsã sẽn be Taboor tãngã zug n sãmb b na n tõog-b-la faag-faaga. Woto yĩnga, b yɩɩ tao-tao n seg-b longã pʋgẽ. La “[a Zeova] kɩtame t’a Sizera ne a saar dãmbã fãa ne a tãb-biisã fãa sãeeg” n ye pa mi b sẽn maandg ye. Dẽ poore, a kɩtame tɩ saagã sɩng niib hal tɩ kisõ kʋɩlgã wa pid n puugdẽ tɩ zĩigã fãa lebg bɛgdo, tɩ saar dãmbã sudi. Woto sõnga Israɛll nebã tɩ b paam n kʋ sodaasã fãa.—Bʋk. 4:13-16; 5:19-21.

15. a) Bõe la yɩɩl-gʋlsdã kos a Zeova a pʋʋsg pʋgẽ t’a maane? b) B sẽn boond Wẽnnaam yaoolem zabrã tɩ Armagedõ wã tẽegda tõnd bõe?

 ¹⁵ Yɩɩl-gʋlsdã pʋʋsa a Zeova n kos t’a maan tẽns nins sẽn da namsd Israɛllã neb wa a sẽn maan b pĩnd bɛɛbã. A pʋʋsame n yeele: “Bɩ y maan bãmb wa y sẽn da maan Madiã buud la a Sizera ne a Zabẽ Kisõ kʋɩlgã noorã. B sãama bãmb En-Dor tẽnga, bãmb lebga wa birg tẽnga tom yĩnga.” (Yɩɩl 83:10, 11) Sɩd pa zaalem tɩ b boond yaoolem zabr ning Wẽnnaam sẽn na n zab ne a Sʋɩtãan dũniyã rãmbã tɩ Armagedõ ye. Bala Armagedõ wã rat n yeelame tɩ Megido tãnga. Woto tẽegd-d-la zab nins sẽn zĩnd Megido sɛɛgẽ tɩ tõogdbã tõog b bɛɛbã n sãam-b zãng-zãngã. A Zeova sẽn tõog a bɛɛbã zab-kãens pʋgẽ wã wilgda tõnd vẽeneg tɩ Armagedõ zabrã sẽn watã, a na n ye tõoga a bɛɛbã.—Wil. 16:13-16.

D pʋʋs t’a Zeova wilg tɩ yẽ n sɩd segd ne naamã

16. Wãn-wãn la bɛɛbã nens ‘pid ne yãnd’ rũndã-rũndã?

¹⁶ ‘Yaoolem da-kãensã’ fãa pʋgẽ, a Zeova gɩdga bɛɛbã tɩ b pa tõog n menes a nin-buiidã ye. (2 Tɩm. 3:1) A sẽn maan woto wã, a ninga bɛɛbã yãnde. Yɩɩl Sõamyã 83:17 soabã ra pĩnd n goma rẽ yell n yeel woto: “[Zeova], pid-y bãmb nens ne yãnd tɩ b bao yãmb yʋʋre.” Tẽns nins fãa pʋsẽ b sẽn mak n na n gɩdg a Zeova Kaset rãmbã tʋʋmdã, b pa tõog ye. Tẽn-kãens pʋsẽ, Wẽnnaam nin-buiidã sẽn tall raood la b tõog toog to-to wã yɩɩ kaset n kõ pʋ-peelem dãmbã, tɩ kɩt tɩ wʋsg sɩd ‘bao a Zeova yʋʋrã.’ Masã, tẽns wʋsg pʋsẽ b sẽn da namsd a Zeova nin-buiidã, neb tus kẽemã n lebg a Zeova Kaset rãmb hali n tar sũ-noogo. A Zeova sɩd tõogame! Ad yaa yãnd tɛkẽ n kõ bɛɛbã!—Karm-y Zeremi 1:19.

17. Bõe n na n maan ka la bilfu, la gom-bʋs la rẽ na n kɩt tɩ d tẽege?

¹⁷ Yaa sɩd tɩ d miime tɩ d bɛɛbã na n ket n namsd-d lame. La d ket n moonda koe-noogã, n moond-a baa bɛɛbã menga. (Mat. 24:14, 21) Sẽn sõs n yɩla, d miime tɩ woto yaa weer n kõ bɛɛbã sẽn na yɩl tɩ b tek yam n kos sugr n wa paam fãagrã. La yaa weer sẽn na n sa ka la bilfu, bala a Zeova yʋʋrã sõmsg yõod yɩɩda ãdem-biisã fãagr hal zĩig sẽn zãre. (Karm-y Ezekɩɛll 38:23.) Tẽnsã fãa sã n wa zems taab n na n menes Wẽnnaam nin-buiidã, d na n tẽega yɩɩl-gʋlsdã sẽn yeel a pʋʋsgã pʋgẽ wã. A yeela woto: ‘Bɩ b paam yãnd la pɛleng yɩkr wakat fãa n yuus n sãame.’—Yɩɩl 83:18.

18, 19. a) Bõe n na n paam a Zeova naamã bɛɛb nins fãa sẽn pa tol n dat n toeem yamã? b) A Zeova sẽn na n wilg ka la bilf t’a tara sor n na n yɩ ãndũniyã fãa naabã yĩng kɩtame tɩ y maand bõe?

¹⁸ A Zeova naamã bɛɛb nins fãa sẽn pa tol n dat n toeemã na n paama yãnde. Wẽnnaam Gomdã yeelame tɩ ‘neb nins sẽn ka sakd koe-noogã’ b sẽn na n menes Armagedõ sasa wã sɩbgr na n yɩɩ “sãoong sẽn ka sɛta.” (2 Tes. 1:7-9) A Zeova sẽn na n sãam nin-kãensã la a fãag sẽn maand-b a raabã ne pʋ-peelmã na n kɩtame tɩ b bãng vẽeneg tɩ yẽnda a ye bal n sɩd yaa Wẽnnaam. Dũni paalgã pʋgẽ, d pa na n tol n yĩm tõog-kãngã ye. “Nin-tɩrsã la sẽn pa-b tɩrsã” sẽn na n vʋʋgã na n bãnga tʋʋm kãseng ning a Zeova sẽn tʋmã. (Tʋʋ. 24:15, NW ) Dũni paalgã pʋgẽ, b na n yãa yɛl wʋsg sẽn wilgd vẽeneg tɩ zemsame tɩ b sak t’a Zeova soog-ba. B sʋka neb nins sẽn yaa sik-m-mens rãmbã na n kɩsa sɩd tao-tao t’a Zeova a ye n sɩd yaa Wẽnnaam.

¹⁹ Ad beoog daar ning tõnd saasẽ Ba wã sẽn nong-dã sẽn segl a nin-buiidã yĩngã sɩd na n talla bark wʋsgo! Woto pa kɩt tɩ y pʋʋsd n dat t’a Zeova leok yɩɩl-gʋlsdã pʋʋsg n pids bũmb ning a sẽn kosã zãng sɩda? A kosa woto: “Bɩ [f bɛɛbã] paam yãnd la pɛleng yɩkr wakat fãa n yuus n sãame, tɩ nebã bãng tɩ fo yʋʋr sẽn yaa a Zeova wã, foo f yembr bal n yaa Zãntlem Sẽn-ka-to tẽngã fãa zugu”!—Yɩɩl 83:17, 18, NW.

[Tẽngr note]

Wãn to la y na n leoke?

• B sẽn wa n gʋlsd yɩɩll 83 soabã tɩ zu-loe-bʋg la Israɛll da tara?

• Bõe n da pak yɩɩll 83 soabã gʋlsd n yɩɩda?

• Ãnd dãmb la a Sʋɩtãan kis rũndã-rũndã?

• Wãn-wãn la a Zeova na n leok yɩɩll 83:19 wã pʋgẽ pʋʋsgã n baase?

[Zãmsgã sogsgã]

[Kart, seb-neng 19]

(Yaa sebrã meng pʋgẽ la y tõe n yã fãa)

Zab nins sẽn zĩnd pĩnd Megido sɛɛgẽ wã wilgda bõe sẽn na n zĩnd ka la bilfu?

Kisõ kʋɩlgã

Harosɛt

Karmell tãngã

Zizreɛll longã

Megido

Taanak

Gilboa tãngã

Harod bulgã

Morɛb tãngã

End-dor

Taboor tãngã

Galile mogrã

Zʋrdẽ kʋɩlgã