Yãmb na n sak n teka y vɩɩmã ne bõe?
Yãmb na n sak n teka y vɩɩmã ne bõe?
“Ned na n teka a vɩɩm ne bõe?”—Mat. 16:26.
1. Bõe yĩng t’a Zezi zab a Pɩɛɛre?
DAAR a ye, tʋm-tʋmd a Pɩɛɛr wʋma gomd tɩ ling-a wʋsgo. Yaa a Zusoab a Zezi Kirist a sẽn nong wʋsgã n yeel ‘vẽeneg’ tɩ ka la bilfu, b na n namsa yẽ la b kʋ-a. A Pɩɛɛr manesem yɩɩ wãna? A leoka a Zezi woto: “Zusoaba, Wẽnnaam ka na n sak t’a yɩ woto ye! Bõn-kãng ka na n paam yãmb ye.” La yaa vẽeneg t’a Pɩɛɛr da rata a Zezi neere. A Zezi wẽnemdame n ges a karen-biis a taabã, n mik tɩ wõnda b fãa tẽedame t’a Pɩɛɛr bee bʋʋm. La a tãsa a Pɩɛɛr woto: “Leb mam poorẽ Sʋɩtãana. Fo rat n gɩdga mam sore, tɩ bõe, fo tagsg ka Wẽnnaam dẽnd ye, yaa ninsaal dẽnda.”—Mark 8:32, 33; Mat. 16:21-23.
2. A Zezi wilgame t’a karen-biig hakɩk fãa segd n maana bõe?
2 Tõe t’a Zezi sẽn lebs n gom goam nins rẽ zugẽ wã sõnga a Pɩɛɛr t’a wʋm a Zezi sẽn zab-a wã võore. A Zezi boola a karen-biisã ne neb kʋʋngã n yeel bãmb yaa: “Ned sã n dat n tũ maam bɩ a kɩɩs a meng raabo, n dɩk a [kũum da-luk, NW ] n tũ maam. Tɩ bõe, ned ninga sẽn dat n gũ a vɩɩm, a vɩɩm na sãam. La ned ninga sẽn na n bas a vɩɩm mam yĩnga, la koe-noogã yĩnga, a na paam a vɩɩm.” (Mark 8:34, 35) Vẽenega, a Zezi ra rat n wilga a kɛlgdbã t’a na n kiime tɩ yɩ maoong b yĩnga, la tɩ yẽ karen-biig fãa me segd n saka namsgo, la baa kũum meng Wẽnnaam tʋʋmdã poorẽ. Ned sã n sak n maan woto, a na n paama bark sẽn ka to.—Karm-y Matɩe 16:27.
3. a) Sogs-bʋs la a Zezi sok a kɛlgdbã? b) Tõe t’a Zezi sokr a yiib-n-soabã tẽega a kɛlgdbã bõe?
3 Baraar me a Zezi soka sogsg a yiib sẽn kɩtd tɩ ned tags neere. A soka woto: “Ned sã n paam dũniyã bũmb fãa t’a meng vɩɩm yaool n sãame, a yõod bee yɛ? Ned na n teka a vɩɩm ne bõe?” (Mark 8:36, 37) Pipi sokrã leokr yẽ yaa nana ne-do. Yaa vẽeneg tɩ ned sã n paam dũniyã bũmb fãa n yaool n bõn a yõore, sɩd ka neng ye. Bala yaa f sã n vɩ la f tõe n dɩ f paoong yõodo. Tõe t’a Zezi sẽn lebs n sok tɩ ‘ned na n teka a vɩɩm ne bõe’ wã, tẽega a kɛlgdbã a Sʋɩtãan sẽn da yeel a Zoob wakatẽ wã tɩ “ned na n dɩka a sẽn tar fãa n kõ a vɩɩm yĩngã.” (Zoob 2:4) Neb nins sẽn pa tũud a Zeova wã kẽer tõe n tẽedame t’a Sʋɩtãan gomdã yaa sɩda. Bala sẽn na yɩl n põs kũum, wʋsg sɩd na n maana b sẽn tõe fãa, hal n sak n kɩɩs Wẽnnaam noy menga. La kiris-nebã pa maand woto ye.
4. Bõe yĩng t’a Zezi sogsgã võor tagem ne kiris-nebã?
4 D miime t’a Zezi pa wa n na n kõ-d laafɩ, paoong la yõ-wok dũni kãngã pʋgẽ ye. A waame n na n pak sor n kõ-d saagr tɩ d wa paam n vɩɩmd wakat sẽn kõn sa dũni paalgã pʋgẽ, la rẽ yõod yɩɩda sẽn ketã fãa. (Zã 3:16) Dẽnd kiris-ned na n bãnga vẽeneg t’a Zezi pipi sokrã rat n yeelame bal tɩ “ned sã n paam dũniyã bũmb fãa n yaool n sãam a vɩɩm sẽn pa satã saagre, ka yõod ye.” Hakɩka, woto sɩd ka yõod baa bilf ye. (1 Zã 2:15-17) A Zezi sokr a yiib-n-soabã leokr baoodame tɩ tõnd ned kam fãa sok a meng woto: ‘Sẽn na yɩl n wa paam vɩɩm sẽn pa satã dũni paalgã pʋgẽ, mam na n saka bõne, la hal baa kũum meng bɩ?’ Yaa d sẽn vɩ to-to wã n na n wilg d sã n na n sɩd saka woto.—Ges-y Zã 12:25.
5. Wãn to la d tõe n paam vɩɩm sẽn kõn sa wã sẽn yaa kũunã?
5 Yaa vẽeneg t’a Zezi ra pa rat n yeel tɩ ned tõe n tʋmame n paam vɩɩm sẽn kõn sa wã ye. Bala baa vɩ-koɛɛg ning d sẽn vɩ dũni kãngã pʋgẽ wã yaa kũuni. D pa tõe n da-a wall d tʋm n paam-a ye. Yaa “tẽeb ne Kirist Zezi” la tẽeb ne a Zeova sẽn yaa “neb nins sẽn baood bãmbã roandã” bal n kɩtd tɩ d paam vɩɩm sẽn kõn sa wã. (Gal. 2:16; Heb. 11:6) La baasgo, d segd n wilga d tẽebã ne tʋʋma, bala “tẽeb sã n ka lagem ne tʋʋma, a yaa [kɩɩnga].” (Zak 2:26) Woto yĩnga, d sã n wa bʋgsd a Zezi sokrã zugu, yɩta sõma tɩ d sok d mens woto: “Sẽn na yɩl n wilg tɩ m tẽebã vɩɩme, hal sẽn ta zĩ-bʋg la m na n sak n bõn dũni kãngã pʋgẽ? La bõe la mam dat n maan a Zeova tʋʋmdã pʋgẽ n wilg tɩ m tẽebã sɩd vɩɩme?”
“Kirist ka maan sẽn noom bãmb meng ye”
6. Bõe n da pak a Zezi n yɩɩda?
6 A Zezi sẽn zĩnd dũni zug ka wã, a tõdga laog la nuura vɩɩm baoob fasɩ, n bao bũmb nins sẽn tar yõod n yɩɩdã bala. A vɩɩmã tõre, a sak n monga a meng la a wɩng ne Wẽnnaam sakre. A pa tol n bao n na n maan a mengã raab ye. A tʋlgame n na n ta Wẽnnaam yam. A yeela woto: “Mam sẽn maand bũmb ninsã tata [Wẽnnaam] yam daar fãa.” (Zã 8:29) Hal sẽn ta zĩ-bʋg la a Zezi bao n na n ta Wẽnnaam yam?
7, 8. a) Bõe la a Zezi sak n maane, la bark bʋg la a paam-yã? b) Sok-bʋg la d segd n sok d mense?
7 Daar a yembre, a Zezi yeela a karen-biisã woto: ‘Ninsaal Biigã ka wa tɩ neb sõng bãmb ye, b waame n na n sõng nebã, la kõ b vɩɩm tɩ yao neb wʋsg yĩnga.’ (Mat. 20:28) Sẽn deng rẽ, a Zezi sẽn wa n yeel-b tɩ ka la bilfu, a na n “kõ a vɩɩmã,” a Pɩɛɛr sagl-a lame t’a ra maan dẽ ye. La a Zezi tõdga a saglgã fasɩ n sak n kõ a vɩɩmã sẽn zems zãngã ãdem-biisã yĩnga. A sẽn mong a meng woto wã, a paamame t’a beoog-daarã yɩ sõma. Wẽnnaam vʋʋg-a lame n zẽk-a n kɩt t’a zĩnd a rɩtgo. (Tʋʋ. 2:32, 33) Rẽ kɩtame t’a lebg mak-sõng sẽn ka to tõnd fãa yĩnga.
8 Tʋm-tʋmd a Poll sagla Rom kiris-nebã tɩ b ned kam fãa ‘ra maan sẽn noom’ a menga, la a tẽeg-b tɩ ‘Kiristã ka maan sẽn noom a meng ye.’ (Rom 15:1-3) Woto yĩnga, sẽn na yɩl n tũ a Poll saglgã n dɩk a Zezi togs-n-taare, hal sẽn ta zĩ-bʋg la d na n sak n mong m menga?
A Zeova ratame tɩ d tʋm a tʋʋmdã ne d sũy fãa
9. Kiris-ned sã n dɩk a meng n kõ Wẽnnaam, bõe la rẽ wilgda?
9 Pĩnd wẽndẽ Israɛllã sasa, a Moiiz Tõogã ra wilgame tɩ b buudã ned sã n lebg a to yamba, yʋʋm a yopoe soabã pʋgẽ, wall kɩdeng yʋʋmdã sã n ta, b segd n bas-a lame t’a ye soog a menga. La yambã ra tõe n yãka yam n maan bũmb a to. A sã n nong a zu-soabã, a tõe n yãka yam n kell n yɩ a yamb a yõor tɛka. (Karm-y Tõodo 15:12, 16, 17.) Tõnd me sã n dɩk d mens n kõ Wẽnnaam, d wilgame tɩ d yãka yam n na n kell n yɩ a yembs d yõor tɛka. D saka ne yamleoog n na n bas d mensã raab maanego, la d maand Wẽnnaam daab masã. D wilgda ne rẽ tɩ d nonga a Zeova ne d sũur fãa la tɩ d rat n maana a raabã d yõor tɛka.
10. Wakat bʋg la lebg a Zeova n so-do, la rẽ segd n kɩtame tɩ d maan bõe ne bõe?
10 Y sã n zãmsda Biiblã ne a Zeova Kaset rãmbã, n naagd-b n moond koe-noogã la y kẽnd b tigissã, d pẽgd-y lame. D saagdame me tɩ ka la bilfu, y na n sak n dɩka y meng n kõ a Zeova la y sok sokr ning Etiopi nedã sẽn da sok a Filipã. A sok-a-la woto: “Bõe n gɩdg maam ne lisgu?” (Tʋʋ. 8:35, 36) Y sã n deeg lisgu, yãmb ne Wẽnnaam sʋka, y na n lebga wa a Poll sẽn da gom ne kiris-neb ninsã. A yeel-b-la woto: “Yãmb ka mi tɩ . . . yãmb ka so yãmb mens bɩ? Tɩ bõe, b raa yãmb ne raab sẽn yaa toogo.” (1 Kor. 6:19, 20) D sã n dɩka d mens n kõ a Zeova n deega lisg n saagd n na n wa tɩ vɩɩmd saasẽ wall yaa tẽngã zug me, lebga a Zeova n so-do. Rẽ n so tɩ tar yõod wʋsg tɩ d bas tʋls-wẽnsã la d mao n da ye “lebg neb yembs ye.” (1 Kor. 7:23) Ad d sã n paam t’a Zeova soog-do, n tõe n maan a sẽn dat ne-do, sɩd yaa zu-no-kãseng la d paam-yã!
11. B sagla kiris-nebã tɩ b kõ maoong bʋg buudu, la a Moiiz Tõogã tũub wẽndẽ maandã wilgdame tɩ rẽ rat n yeelame tɩ bõe?
11 Tʋm-tʋmd a Poll sagla a tẽed-n-taas woto: “Mam kota yãmb . . . tɩ y kõ y yĩnsã tɩ yɩ maan-vɩɩs sẽn yaa sõma la sẽn zems Wẽnnaam yam. La yãoã zemsa yãmb maanego.” (Rom 12:1) Gom-kãensã tog n da tẽega kiris-neb nins sẽn yaa zʋɩf rãmbã maand nins b sẽn da kʋʋd b sẽn da wa n nan pa kiris-nebã. Tẽeg-b-la rũms nins b sẽn da kʋʋd a Zeova tẽn-kugrã zug a Moiiz Tõogã tũub wakatã yelle. B miime tɩ rũm-kãens ra segd n talla barka, n da tol n tall zang ye. (Mal. 1:8, 13) Dẽnd tõnd me kõta d “yĩnsã tɩ yɩ maan-vɩɩse,” d sã n tʋmd a Zeova tʋʋmdã ne d sũy fãa. Pa segd tɩ yaa d sẽn wat n maan d raabã fãa n sa tɩ sẽk ning kellã la d kõt-a ye. D sã n dɩk d meng n kõ Wẽnnaam, d kõ-a-la d “sɩɩsã” bɩ d vɩɩmã fãa, rat n yeel tɩ d rɩka d keelmã, d paoongã la d pãn-tõodã fãa n kõ-a. (Kol. 3:23) Bõe la d tõe n maan n wilg rẽ vẽenega?
Ra sãam-y y sẽkã ye
12, 13. Bõe la d tõe n maan n tõog n tʋm a Zeova tʋʋmdã ne d sũur fãa?
12 D sã n dat n wilg tɩ d tʋmda a Zeova tʋʋmdã ne d sũy fãa, d pa segd n sãam d sẽkã ye. (Karm-y Efɛɛz rãmba 5:15, 16.) La yɩl n tõog n maand dẽ baooda yõk-m-menga. Bala dũniyã yɛl toɛy-toɛyã n paas d sẽn pa zems zãngã kɩtame tɩ d nong n dɩkd d sẽkã fãa n maand sẽn noom tõnd mensã bala. Yaa sɩd tɩ “bũmb fãa tara a wakate.” Yõ-noogrã tara a wakate, tɩ bao-n-kõ-noorã tʋʋm sẽn sõngd-d tɩ d tõogd n tʋmd Wẽnnaam tʋʋmã me tara b wakate. (Koɛ. 3:1) La kiris-ned segd n gũusame tɩ bũmb da reeg a to zĩig ye.
13 Tʋm-tʋmd a Poll sẽn da wa n kẽng Atɛnnã, a gũus n gesame tɩ Atɛn nebã fãa ne sãambã sẽn be Atɛnnã sã n da paam sẽk fãa, b sẽn da nong yaa kibay togsg wall koe-paals kelgre. (Tʋʋ. 17:21) Rũndã-rũndã, neb wʋsg me sãamda b sẽkã woto. Yaa reemã toɛy-toɛyã, televiziõ wã gesgo, ze-video rãmbã la ẽntɛrnetã n pak-ba. Bũmb nins sẽn tõe n sãam d sẽkã waoogame. D sã n tũ bõn-kãense, d tõeeme n wa pa ye wɩngd n na n bao n bãng a Zeova n paas ye. D pʋd n tõe n wa tagsdame tɩ d pa tar sẽk n na n maan “bũmb nins sẽn yaa sõma n yɩɩdã,” rat n yet tɩ bũmb nins d sẽn tog n maan n waoog a Zeova wã.—Fil. 1:9, 10.
14. Sogs-bʋs zug la d segd n tags neere?
14 Yãmb dɩka y meng n kõ a Zeova n deeg lisg bɩ? Sã n yaa rẽ bɩ y sok y meng woto: ‘Rẽ yĩnga Biiblã karengo, a goamã zug bʋgsg la pʋʋsgã naaga mam be-vẽer fãa tʋʋmã sʋk bɩ?’ (Yɩɩl 77:13; 119:97; 1 Tes. 5:17.) ‘M yãka sẽk n segend tigissã bɩ? Tigissã sasa, m kõta leoor sẽn na yɩl n keng m taabã raood bɩ?’ (Yɩɩl 122:1; Heb. 2:12) Wẽnnaam Gomdã yeelame t’a Poll ne a Barnabas “kaoosa Ikoniyom n dell [a Zeova] n gom ne raoodo.” (Tʋʋ. 14:3) Rẽ yĩnga y tõe n manesa y yɛlã sẽn na yɩl n tõog n moon koɛɛgã wʋsgo, tɩ sã n tõe meng bɩ y yɩ so-pakd bɩ?—Karm-y Hebre dãmba 13:15.
15. Bõe la kãsem dãmbã maand n pa sãamd b sẽkã?
15 Tʋm-tʋmd a Poll ne a Barnabas sẽn tɩ kaag Ãntios tigingã, b “zĩnda be ne karen-biisã n kaoos” sẽn na yɩl n keng b raoodo. (Tʋʋ. 14:28) Rũndã-rũndã me, kãsem dãmbã sẽn nong b tẽed-n-taasã, b rɩkda b sẽkã wʋsg n kengd b raoodo. B moonda koɛɛgã la modgd wʋsg me n kɩɩmd bãgrã, n baood piis nins sẽn menemã, n sõngd sẽn ka-b laafɩ wã la b get yɛl a taab yell tigingã pʋgẽ. Y sã n yaa saam-biig sẽn deeg lisgu, rẽ yĩnga y yɛlã kõt-y-la sor tɩ y tõe n mao n wa paam n tʋm tʋʋm kãensã bɩ?
16. Bõe la d tõe n maan n wilg tɩ d maanda ‘neb nins sẽn yaa tõnd ba-biis a Zezi tẽeba yĩngã yel-sõmde’?
16 Neb wʋsg me sũy yaa noogo, b sẽn sõng b taab sẽn da rat sõngr yel-beed toɛy-toɛy sasa. Wala makre, saam-bi-poak a ye sẽn tʋmd Betɛllẽ t’a yʋʋm yɩɩd 60 sakame n tog so-wogd naoor wʋsgo, n tɩ tʋm n sõng neba. Bõe yĩng t’a sak n dɩk sẽk ning a sẽn tar n na n vʋʋsã n tɩ tʋm tʋʋm kãense? A yeela woto: “Baa mam sẽn pa tar tʋʋmd takɩ m sẽn mi sõma wã, m getame tɩ m sẽn tõog n maan bũmb ning fãa n sõngã yaa waoogr n kõ-ma. M sẽn yã saam-biisã sẽn bõn b paoong wʋsg tɩ b tẽebã baas n ket n tar pãngã, kenga m daoodo.” Sẽn paase, neb tusa yii dũniyã ween-vɩɩs a naasã fãa n wa sõng n me Rĩung Rot la tigis-kãsems roto. D sã n naagd n tʋmd tʋʋm kãensã buud n sõngd d saam-biisã, d wilgdame tɩ d maanda ‘neb nins sẽn yaa tõnd ba-biis a Zezi tẽeba yĩngã yel-sõmde.’—Gal. 6:10.
“Mam bee ne yãmb wakat fãa”
17. Bõe la yãmb na n sak n tek ne vɩɩm sẽn kõn sa wã?
17 Dũni kãngã ne a nebã sẽn kɩɩsd Wẽnnaamã na n looga ka la bilfu. Yaa sɩd tɩ d pa mi a loogr daar ye. La d miime t’a “wakat lebga bilfu,” la tɩ dũni-kãngã yɛlã tara toeengo. (Karm-y 1 Korẽnt dãmba 7:29-31.) Woto kɩtame tɩ d maneg n wʋmd sokr ning a Zezi sẽn da sokã võor sõma. ‘Ned sɩd na n teka a vɩɩm ne bõe’? Vẽenega, sẽn na yɩl n paam “vɩɩm hakɩkã,” d na n sak n maana modgr ninga fãa a Zeova sẽn dat tɩ d maane. (1 Tɩm. 6:19, Kãab-paalgã Koe-noogo.) Yaa tɩlae tɩ d tũ sagls nins a Zezi sẽn kõ-d n yeel tɩ d ‘tũ yẽ wakat fãa’ la d ‘reng n bao Wẽnnaam rĩungã ne a tɩrlmã’ me wã.—Mat. 6:31-33; 24:13.
18. D tõe n basa d yam ne bõe, la bõe yĩnga?
18 Yaa sɩd tɩ pa wakat fãa la a Zezi tũub yaa nana ye. Sɩd me, woto maaneg tũu ne neb kẽer yõy wa a Zezi sẽn da pĩnd n togsã. La ne rẽ fãa, d rɩkda a Zezi togs-n-taar n pa tol n dat n maan sẽn noom tõnd mensã ye. D kɩsa sɩd t’a na n pidsa bũmb ning a sẽn da pʋlem a pipi karen-biisã sẽn paam vʋʋsem sõngã zaeebã. A yeel-b-la woto: “Mam bee ne yãmb wakat fãa hal tɩ ta wakat sɛɛbo.” (Mat. 28:20) Bɩ d maood n dɩkd d sẽkã, d keelmã la d minimã n tʋmd Wẽnnaam tʋʋmdã wa d sẽn tõe tɛka. D sã n maand woto, d wilgdame tɩ d kɩsa sɩd t’a Zeova na n kogl-d-la to-kãsengã sasa, wall a wa vʋʋg-d dũni paalgã pʋgẽ. (Heb. 6:10) Woto, rẽ wẽnd tɩ d zoe n wilgame tɩ d sɩd nanda vɩɩmã sẽn yaa kũunã hal wʋsgo.
Wãn to la y na n leoke?
• Wãn-wãn la a Zezi wilgẽ t’a tʋll n maana Wẽnnaam daabã la a sõng ãdem-biisã ne a sũur fãa?
• Bõe yĩng tɩ ned segd n kɩɩs a meng raabo, la wãn-wãn la ned kɩɩsd a meng raabo?
• Pĩnd wẽndẽ Israɛllã sasa, maand bʋs buud bal la a Zeova ra reegda, la bõe la rẽ wilgd tõndo?
• Bõe la d tõe n maan n da sãam d sẽkã?
[Zãmsgã sogsgã]
[Foto rãmba, seb-neng 26]
A Zezi ra maanda sẽn tat Wẽnnaam yam wakat fãa
[Foto, seb-neng 28]
Israɛll neb nins sẽn da nong Wẽnnaamã kõo b bõn-sõma wã n teel tũudum hakɩkã
[Foto, rãmba, seb-neng 29]
D sã n pa sãamd d sẽkã, d noogda Wẽnnaam sũuri