Sõng-y-b tɩ b lebg n wa tao-​tao!

“Tõnd na n basa yãmb n kẽng ãnda nengẽ? Yãmb tara vɩɩm sẽn ka sɛt goama.”​—Zã 6:​68.

1. Karen-biis kẽer sẽn wa n bas a Zezi pʋgbã, a Pɩɛɛr yeelame tɩ bõe?

DAAR a yembre, a Zezi Kirist yeela a karen-​biisã bũmb tɩ kɩt tɩ b wʋsg bas a pʋgbo. Rẽ kɩtame t’a sok a tʋm-​tʋmdbã woto: “La yãmba, yãmb me ka rat n bas maam la?” A Pɩɛɛr leok-a woto: “Zusoaba, tõnd na n basa yãmb n kẽng ãnda nengẽ? Yãmb tara vɩɩm sẽn ka sɛt goama.” (Zã 6:51-69) Sɩd me, zĩig a to ra kae b sẽn tõe n kẽng ye. Zʋɩf rãmbã tũudum da pa tar “vɩɩm sẽn ka sɛt goam” ye. Rũndã-rũndã me, yaa vẽeneg tɩ goam a woto ka be Babilon kãsengã sẽn yaa ãndũniyã ziri tũudum toɛy-​toɛyã fãa wã pʋgẽ ye. Ned sẽn bas Wẽnnaam a Zeova bãgrã sã n tʋll n ta a yam, ‘wakat taame t’a tog n neke,’ n lebg n wa bãgrã pʋgẽ.​—Rom 13:11.

2. Ned d sẽn sõngd sã n da maana yell tɩ yaa kãsem dãmbã n segd n ges yel-kãng yelle, bõe la d pa segd n yĩmi?

² A Zeova ra wilgame t’a rata Israɛll piis bɩ a nin-buiidã sʋk neb nins sẽn menemã neere. (Karm-y Ezekɩɛll 34:15, 16.) Kiris-nebã kãsem dãmb me tʋll n sõnga kiris-ned ning fãa sẽn bas tigingã sẽn wõnd pesg sẽn menemã, la b segd n sɩd maana boto. B sã n kõ koe-moond sor t’a zãms Biiblã ned sẽn bas tigingã la a rat sõngre, a sã n wa bãng t’a soabã maana yel-wẽn-kãsenga, a segd n maana wãna? A pa segd n sagl-a pa rẽ bɩ a bao n na n welg yellã a toor ye. A tog n sagl-a lame t’a tɩ togs kãsem dãmbã. A sã n pa kẽnge, koe-moondã segd n wilga kãsem dãmbã yellã.—Maan. 5:1; Gal. 6:1.

3. Raoã sẽn yã a pesgã sẽn da menemã, a manesem yɩɩ wãna?

³ Sõsg ning sẽn loogã pʋgẽ, d goma a Zezi kibar ning sẽn gomd rao sẽn da tar piis 100 t’a ye menemã yelle. Raoã basa pis-wae la a waeyã n lebg n tɩ bao sẽn menem-a wã hali n wa yã-a. La a sẽn yã-a wã, a kɩdma sũ-noogo! (Luk 15:4-7) Tõnd me sã n paam tɩ Wẽnnaam pesg sẽn da bas a bãgrã lebg n wa, d kɩdemdame. Kãsem dãmbã la tigingã neb fãa sẽn nong-bã yĩnga, tõe tɩ b zoe n kaag-b lame. B ratame tɩ b lebg n wa b sʋka, n tõog n paam Wẽnnaam teelgo, a koglg la a barka. (Tõo. 33:27; Yɩɩl 91:14; Yel. 10:22) B sã n paam sor n na n sõng ned sẽn bas tigingã, wãn to la b tõe n sõng a soaba?

4. Galat dãmba 6:2, 5 goamã rat n yeelame tɩ bõe?

⁴ Tõe tɩ d sã n tẽeg sẽn bas-a tigingã t’a Zeova nonga a piisã, la t’a pa baood tɩ b maan sẽn yɩɩd b pãnga, na n kenga a raoodo. Biiblã zãmsgo, tigissã kẽnd la koe-noogã mooneg naaga bũmb nins a sẽn kot tɩ d maanã. D tõe n karma Galat dãmb 6:2, 5 la d wilg a soabã tɩ kiris-ned tõe n sõnga a to n tʋk a zɩɩbo, la “ned kam fãa na n tʋka a meng zɩɩb” Wẽnnaam taoore. Rat n yeel tɩ ned pa tõe n deeg d zĩig n maan a Zeova raab tɩ naf tõnd ye. Kall tõnd menga.

Yaa yɩɩr n kɩt t’a bas tigingã bɩ?

5, 6. a) Bõe yĩng tɩ d segd n maag d yĩng n kelg d saam-biis nins sẽn bas tigingã? b) Wãn to la y tõe n sõng nin-kãensã tɩ b bãng tɩ b sẽn bas tigissã kẽndã, b maana b mense?

⁵ Sẽn na yɩl n bãng b sẽn na n sõng saam-biis nins sẽn bas tigingã to-to, kãsem dãmbã la koe-moondb a taabã segd n maagda b yĩng n kelgd-ba, b sã n wa togsd b sũur gomde. D rɩk makr wa y sã n yaa kãsem soab n kẽng n na n tɩ kaag saam-biig ne a pag sẽn tar zu-loees tɩ rẽ  yɩɩr kɩt tɩ b bas tigingã. (Luk 21:34) Tõe n yaa ligd zu-loees wall b zakã rãmb yell gesg n lebg toog n paas n kɩt tɩ b wa bas tigingã. Tõe tɩ yaa b yellã tɩɩm la b baooda, la y tõe n wilg-b lame t’a tɩɩmã pa b sẽn na n bas tigingã ye. (Karm-y Yelbũna 18:1.) Y tõe n maana yam n sok-b woto: “Rẽ yĩnga yãmb sẽn bas tigingã tɛka, y sũ-noogã paasame bɩ? Y zakã pʋgẽ vɩɩm lebga noog n yɩɩd pĩndã bɩ? Y ket n tara sũ-noog ning a Zeova teegr sẽn kõtã bɩ?”—Neh. 8:10.

⁶ Neb sẽn pa le wat tigissã sã n bʋgs sogs-kãensã zugu, tõe n sõng-b lame tɩ b bãng tɩ rẽ kɩtame tɩ b bʋdge, tɩ b sũ-noogã me booge. (Mat. 5:3; Heb. 10:24, 25) D tõe n sõng-b lame tɩ b bãng me tɩ b pa le paamd sũ-noog ning koe-noogã mooneg sẽn kõtã ye. (Mat. 28:19, 20) Sã n yaa woto, bõe la nin-kãensã segd n maane?

7. D tõe n sagla ned sẽn bas Wẽnnaam bãgrã t’a maan bõe?

⁷ A Zezi yeela woto: ‘Bɩ y gũus y mens n da sak tɩ yão-beed ne rã-yũur la vɩ-kãngã yɛlã pak yãmb ye . . . Bɩ y gũ la y pʋʋs daar fãa n paam pãng n põs bõn-kãens fãa sẽn na n wa wã.’ (Luk 21:34-36) Ned sã n bas tigingã la a tʋll n lebs n paam sũ-noog ning a sẽn da tarã, d tõe n sagl-a lame t’a pʋʋs Wẽnnaam n kos a vʋʋsem sõngã la a sõngre, la a tʋm tɩ zems ne a kosgã.—Luk 11:13.

Yaa ned wall bũmb n sãam b sũur bɩ?

8, 9. Wãn-wãn la kãsem soab tõe n sõng ned sẽn bas tigingã ned manesem yĩng bɩ b sẽn kibl-a yĩnga?

⁸ Ãdem-biisã sẽn yaa koangdbã yĩnga, d moor mi n yõsga taaba, la rẽ tõe n sãama nina sũur n kɩt t’a bas tigingã. Neb kẽer sɩd basa tigingã b sẽn yã saam-biig b sẽn waoogd sõma sẽn kɩɩs Biiblã noor yĩnga. Sã n yaa yell a woto n kɩt tɩ ned bas koɛɛgã mooneg la tigissã, kãsem soab ning sẽn kaagd-a wã tõe n tẽeg-a lame t’a Zeova pa maand bũmb sẽn na n sãam ned sũur ye. Dẽnd ned yel-manesem pa segd n kɩt tɩ d sãam d zoodã ne a Zeova la d bas a nin-buiidã ye. Rẽ yĩnga d pa tog n ket n tũud Wẽnnaam la d kɩs sɩd tɩ “dũniyã fãa bʋ-kaoodã” mii yellã tiiri, la t’a na n welg-a lame sɩda? (Sɩng. 18:25; Kol. 3:23-25) Ned sã n lak n lʋɩ, rẽ yĩnga a na kell n pa a sẽn lʋɩẽ wã n pa yik sɩda?

⁹ Sẽn na yɩl n sõng-a t’a lebg n wa, kãsem soabã tõe n tẽeg-a lame me tɩ saam-biis kẽer sẽn bas tigingã yɛl a woto buud poorẽ wa n mikame tɩ ra pa sek b na bas tigingã ye. Sɩd me, yellã tõe n wa saame. Sã n mik tɩ yaa b sẽn kibl-a yĩng la a bas tigingã, a sã n maag a yĩng n bʋgs la a pʋʋs yellã zugu, tõe n kɩtame t’a sak n deeg t’a sɩd kongame, la a bãng t’a ra pa segd n bas tigingã b sẽn kibl-a wã yĩng ye.—Yɩɩl 119:165; Heb. 12:5-13.

Yaa Biiblã gomd võor bilgr la a pa sak bɩ?

10, 11. Wãn-wãn la d tõe n sõng ned t’a sak n deeg Biiblã gomd võor b sẽn bilg t’a pa rat n deege?

¹⁰ Tõe tɩ neb kẽer basa Wẽnnaam bãgrã b sẽn pa sak Biiblã gomd võor b sẽn bilg yĩnga. Wẽnnaam sẽn yiis Israɛll nebã Eziptã poore, b yĩma tʋʋm nins a sẽn tʋm n fãag-bã “n ka yaas n bao tɩ bãng [Wẽnnaam] yam sẽn yaa bũmb ninga ye.” (Yɩɩl 106:13) D sã n tẽeg ned sẽn bas tigingã tɩ “tʋm-tʋmd sẽn tũud sɩd la sẽn tar yamã” sẽn wilgd tõnd bũmb ning Wẽnnaam Gomdã zugã sõmblem pa tar to, tõe n sõng-a lame. (Mat. 24:45) Yaa rẽ meng n kɩt t’a bãng bũmb nins a sẽn mi Biiblã pʋgẽ wã. Dẽnd b sã n tẽeg-a rẽnda, tõe n kɩtame t’a lebg n sɩng sɩdã pʋgẽ kẽna.—2 Zã 4.

¹¹ Kãsem soab sã n wa maood n dat n sõng kiris-ned sẽn bas Wẽnnaam bãgrã gomd võor a sẽn pa sak yĩnga, a tõe n tẽeg-a-la a Zezi sẽn wa n wilg a karen-biisã bũmb tɩ b pa wʋm a võor tɩ kɩt tɩ kẽer bas a tũubã. (Zã 6:53, 66) B sẽn bas Kiristã ne a karen-biis nins sẽn kell n tũ-a wã pʋgbã, b sãama b tẽebã tɩ b sũ-noogã meneme. Rẽ yĩnga sẽn bas-b tigingã yãa zĩig a to b sẽn tõe n tɩ paam tɩ b zãms-b Biiblã sõma n yɩɩg sɩda? Hakɩka b pa yã zĩ-zẽng ye. Bala kae ye!

Yaa yel-wẽn-kãseng la a maanẽ bɩ?

12, 13. Ned sẽn bas tigingã sã n sak n deeg t’a maana yel-wẽn-kãsenga, wãn-wãn la b tõe n sõng-a?

¹² Kiris-neb kẽer basa koɛɛgã mooneg la  tigissã kẽnd b sẽn maan yel-wẽn-kãseng yĩnga. B tõe n tẽedame tɩ b sã n tɩ togs kãsem dãmbã yell ning b sẽn maanã, b na n yiis-b-la tigingã pʋgẽ. La b sã n teka yam n kot sugr ne b sũur fãa, b pa na n yiis-b ye. (2 Kor. 7:10, 11) B na n lebs n deeg-b lame tɩ kãsem dãmbã sõng-b wa sẽn segdã.

¹³ Y sã n yaa koe-moond sẽn tar minim tɩ b yãk-y tɩ y sõng ned sẽn bas tigingã, a sã n togs-y t’a maana yel-wẽn-kãsenga, y segd n maana wãna? Wa d sẽn zoe n wilgã, wall tɩ y kẽes y toaag yellã pʋgẽ, y segd n sagl-a lame t’a tɩ wilg kãsem dãmbã. A sã n pa rat n tɩ togse, a Zeova yʋʋrã manegr la tigingã neb neer yĩnga, y segd n tũu saglg ning Wẽnnaam Gomdã sẽn kõt yell a woto welgr wɛɛngẽ wã. (Karm-y Maankʋʋre 5:1.) Kãsem dãmbã na n bãnga b sẽn tog n sõng ned ning fãa sẽn dat n vɩɩmd tɩ zems ne Wẽnnaam daabã to-to. Wakat ninga, tõe n yɩɩ tɩlae tɩ b kibl a soaba. (Heb. 12:7-11) A sã n sak n deeg t’a beega Wẽnnaam n bas kɛgr ning a sẽn da maanã la a kot sugr ne a sũur fãa, kãsem dãmbã na n sõng-a lame, la a tõe n paama a Zeova sugri.—Ezai 1:18; 55:7; Zak 5:13-16.

Bi-ribl n lebg n wa t’a roagd-b kɩdme

14. Kʋms-y-yã a Zezi kibar ning sẽn gomd biig sẽn sãam a laogã yellã n wilgi.

¹⁴ B sã n yãk ned t’a na n sõng saam-biig sẽn bas tigingã, a tõe n tẽeg-a-la a Zezi kibar ning sẽn be Luk 15:11-24 pʋgã. Be, b gomda bi-bɩɩg a yembr sẽn deeg a paoong a ba nengẽ n tɩ vɩɩmd vɩ-yook n sãam a paoongã. La kaoosg zugẽ, a wa n kisga a tʋʋm-wẽnsã. Kom n wa n wʋm-a hal t’a sũur sãame, t’a zĩnd n tags n mik t’a sẽn da be ne a roagdbã n são, tɩ kɩt t’a yãk yam n na n leb yiri. A sẽn wa n nan be yɩɩg n watẽ, a ba wã yã-a lame n zoe a nimbãanega, n wudg n seg-a n mobg-a n mok-a. Ned sẽn bas tigingã sã n bʋgs kiba-kãngã zugu, tõe n kɩtame t’a lebg n wa. Dũni kãngã sẽn na n sa ka la bilfã yĩnga, a segd n lebg n waa tao-tao.

15. Yel-bʋs n kɩt tɩ kiris-neb kẽer bas tigingã?

¹⁵ Kiris-neb wʋsg sẽn bas tigingã to-to wã pa yɩ wa laog-sãamdã nengẽ wã fasɩ ye. Kẽer sɩnga bilf-bilf wa koom koglg b sẽn dɩgl kʋɩlg noor n pa loe sẽn tard n lebd kʋɩlgã pʋgẽ bilf-bilf hal n wa zãagã. Sãnda yaa zu-loeesã la yɩɩrã n loog b nug tɩ b wa tolg n bas tɩ zood ning b sẽn tar ne a Zeova wã booge. Kẽer me yaa tigingã ned n sãam b sũuri, wall yaa Biiblã gomd ning võor bilgr la b pa sake. A taab nengẽ yaa b sẽn tall manesem sẽn pa zems ne Biiblã noyã. La sẽn yaa a soab fãa, y tõe n tũu sagls nins b sẽn kõ wã n sõng sẽn bas-b tigingã bʋʋm kãensã wall b taab yĩngã tɩ b lebg n wa tao-tao tɩ nan ket n tõe.

“M biig sõngo, ne f waoongo!”

16-18. a) Wãn-wãn la kãsem soab sõng saam-biig sẽn da bas tigingã tɩ kaoos yʋʋmã? b) Sɩnga wãn tɩ saam-biigã wa bas tigingã, wãn-wãn la b sõng-a, la wãn-wãn la tigingã neb reeg-a?

¹⁶ Kãsem soab a yembr yeela woto: “Tõnd tigingã kãsem dãmb maooda wʋsg n kaagd sẽn bas-b tigingã. Mam tẽra saam-biig a ye m sẽn da sõng t’a bãng sɩdã yelle. A wa n basa tigingã tɩ maan yʋʋm 25 hal t’a zu-loeesã wa wʋm-a, tɩ mam wilg-a Biiblã sagls tũub sẽn tõe n sõng-a to-to. Rẽ poor bilfu, a lebs n sɩnga Rĩungã Roogẽ waoongo, n sak tɩ b na n lebs n zãms-a Biiblã n keng a raood t’a lebg n wa a taabã sʋka.”

¹⁷ Bõe n kɩt tɩ saam-bi-kãng ra wa bas tigingã? A yeela woto: “Mam wa n sɩnga dũniyã yɛl kẽer pʋgb tɩ kɩt tɩ m zoodã ne a Zeova yell ra pa ye pak-m woto ye. Rẽ poore, m  wa n basa Biiblã zãmsgo, koɛɛgã mooneg la tigissã kẽnde. La m sẽn wa n na n bãng tɩ m tolg n basa tigingã fasɩ. La kãsem soabã sẽn ges mam yell ne a sũur fãa to-to wã, sõng-m lame tɩ m lebg n wa.” Saam-biigã sẽn sak n na n zãms Biiblã tɛka, a yɛlã sɩnga boogre. A yeela woto: “Mam mikame tɩ m da ye pa paamd a Zeova ne a siglgã sagls la b nonglmã ye.”

¹⁸ Wãn-wãn la tigingã neb reeg saam-bi-kãngã a sẽn lebg n wa b sʋkã? Ad a sẽn yeele: “Baraare, mam yɩɩ wa a Zezi Kirist kibarã pʋgẽ biig ning sẽn sãam a laogã. Sɩd me, saam-bi-poak a ye sẽn be tigingã pʋgẽ hal sẽn na maan yʋʋm 30 n ket n tũud a Zeova ne a sũur fãa yeela maam woto: ‘M biig sõngo, ne f waoongo!’ Woto kenga mam daood hal wʋsgo. M mikame tɩ m sɩd ra segd n lebg n waa tigingã pʋgẽ. La m pʋʋsda kãsem soabã la tigingã neb fãa barka, b sẽn tʋlg mam neer n sõng-m ne sũ-mar la nonglmã. B fãa sẽn wilg tɩ b nonga a Zeova la b nong b taabã, sõnga maam tɩ m lebg n wa.”

Sõng-y-b tɩ b maan tao-tao!

19, 20. Wãn-wãn la y tõe n sõng sẽn bas-b tigingã tɩ b lebg n wa tao-tao, la wãn to la y tõe n wilg-b me tɩ Wẽnnaam pa baood tɩ b maan sẽn yɩɩd b pãnga?

¹⁹ D vɩɩ yaoolem dayã sasa tɩ dũni kãngã na n sa ka la bilfu. Woto yĩnga keng-y sẽn bas-b tigingã raood tɩ b lebs n sɩng tigissã kẽnde. Sagl-y-b tɩ b sɩng boto maaneg tao-tao. Tẽeg-y-b t’a Sʋɩtãan dat n sãama zood ning b sẽn tar ne Wẽnnaamã, n dat tɩ b tẽ tɩ b zu-loeesã tɩɩm yaa b sẽn na n bas tũudum hakɩkã. La wilg-y-b tɩ yaa b sẽn na n kell n yɩ a Zezi karen-biis bal la b sɩd na n paam b mens ne b zu-loeesã.—Karm-y Matɩe 11:28-30.

²⁰ Tẽeg-y sẽn bas-b tigingã tɩ Wẽnnaam datame tɩ d maan d sẽn tõe. A Zezi kũumã sẽn wa n kolg t’a Lazaar yao a Maari rɩk kaam sẽn tar yũ-noog t’a ligd yaa toog n zae a Zezi wã, kẽer sɩngame tɩ b na n wɩd a Maari. La a Zezi leok-b-la woto: “Bas-y-yã-a laafɩ. . . . A maana a sẽn tõe.” (Mark 14:6-8) A Zezi pẽga pʋg-kõor sẽn ning ligd sẽn pa zem fʋɩ wẽnd-doogã ligd koglgẽ. Bala a me maana a sẽn tõe. (Luk 21:1-4) Tõnd sʋkã neb wʋsg tõogd n kẽnda tigissã la b moond koe-noogã. Ne a Zeova sõngre, neb wʋsg sẽn bas tigingã me na n wa tõog n le maanda woto.

21, 22. Bõe la y tõe n tẽeg neb nins sẽn lebgd n wat a Zeova nengẽ wã tɩ keng b raoodo?

²¹ Ned sẽn da bas tigingã sã n dat n lebg n wa d sʋk la a zoet yãnde, y tõe n tẽeg-a-la laog-saamdã zakã rãmb sẽn kɩdem to-to a sẽn lebg n wa wã. Ned sẽn da bas tigingã me sã n lebg n wa, d kɩdemdame. Keng-y b raood tɩ b mao n kɩɩs a Sʋɩtãan masã tɛk la b pẽneg Wẽnnaam.—Zak 4:7, 8.

²² B na n deega neb nins sẽn lebg n wat a Zeova nengẽ wã ne sũ-noogo. (Wiis. 3:40) Yaa vẽeneg tɩ b sẽn da wa n maand a Zeova raabã, b sũy ra nooma wʋsgo. Neb nins sẽn lebgd n wat tigingã pʋgẽ tao-tao wã na n wa paama bark sẽn ka saabo!

Y na n leokame tɩ bõe?

• Wãn to la kãsem soab tõe n sõng kiris-ned sẽn bas tigingã ned yĩng bɩ b sẽn kibl-a yĩnga?

• Tagsg bʋg n tõe n sõng kiris-ned sẽn bas tigingã a sẽn pa sak Biiblã gomd võor b sẽn bilg yĩnga?

• Wãn-wãn la d tõe n sõng ned sẽn dat n lebg n wa tigingã pʋgẽ la a zoet yãnde?

[Zãmsgã sogsgã]

[Foto, seb-neng 23]

Sẽn bas-b tigingã sã n bʋgs laog-sãamdã kibar a Zezi sẽn togsã zugu, tõe n sõng-b lame tɩ b lebg n wa