Yɛl b sẽn deng n togs Mesi wã zugu

ZƲƖF rãmbã sẽn da mi bũmb ning no-rɛɛs a Ezai la no-rɛɛsdb a taabã sẽn gʋls Mesi wã zugã yĩngã, kɩtame tɩ b ra gũud a waoongo. A Zezi wakatẽ wã, sẽn mik tɩ Mesi wã waoog ra ta n saame wã, Zʋɩf rãmbã wʋsg ra gũuda a pukrã. (Luk 3:15) Sẽn yɩɩd fãa, Biiblã bãngr-goamã wilgda yɛl sẽn tar yõod wʋsg Mesi wã vɩɩm pʋgẽ. Ninsaal baa ye kae n tõe n deng n togs yel-kãensã, bɩ n maan tɩ b sɩd zĩnd a Zezi vɩɩmã pʋgẽ ye.

Bũmb ning b sẽn deng n wilg Mesi wã rogem wɛɛngẽ. A Ezai reng n wilgame tɩ yaa pʋgsad sẽn pa mi rao n na n dog Mesi wã bɩ Kiristã. Tʋm-tʋmd a Matɩe sẽn wilg a Zezi Kirist rogmã sẽn yɩ to-to wã poore, a yeela woto: “Bõn-kãensã fãa maaname tɩ Zusoabã sẽn da gom ne b no-rɛɛsã noorã paam pidsgu: ‘Gese, pa-kul na n dɩka pʋga, n dog bi-ribla.’ ” (Matɩe 1:22, 23; Ezai 7:14) A Ezai paasame tɩ Kiristã na n yɩɩ a Davɩɩd yagenga, hal n wilg t’a Davɩɩd ba yʋʋr la a Zese. A Zezi sɩd yɩɩ a Davɩɩd yagenga. (Matɩe 1:6, 16; Luk 3:23, 31, 32) Nand t’a Maari rog a Zezi, malɛk a Gabriyɛll yeel-a lame tɩ “Wẽnnaam na n kõo yẽ a yaab a Davɩɩd naam.”—Luk 1:32, 33; Ezai 11:1-5, 10; Rom dãmba 15:12.

Bũmb ning b sẽn deng n wilg Mesi wã vɩɩmã wɛɛngẽ. A Zezi sẽn wa n lebg kãsmã, daar a yembre, Nazarɛt wẽnd-doogã pʋgẽ a  zẽka a koɛɛg n karem a Ezai bãngr-gomdã, la zĩig ning sẽn yet tɩ “Zusoabã Sɩɩg bee mam zugu. Tɩ bõe, bãmb kõo maam pãng tɩ m moon koe-noog naong rãmb sʋka.” A wilgame tɩ bãngr-gomdã pidsda yẽ zug n yeel woto: “Gʋlsg sõng kãngã yãmb sẽn wʋm masã wã pidsa rũndã.” (Luk 4:17-21; Ezai 61:1, 2) A Ezai reng n goma a Zezi sẽn na n yɩ nin-bʋgsgã, sik-m-meng soabã, la manesem ning a sẽn na n tall ne bãad rãmbã yelle. A Matɩe gʋlsa woto: “Neb wʋsg tũu bãmba, la b maaga bãmb fãa. La b sagla bãmb neer n yeel tɩ b ra gom tɩ ned wʋm ye. A yaa tɩ Wẽnnaam no-rɛɛs a Ezai sẽn da togsã paam pidsgu . . . ‘Yẽ kõn wẽ no-koeemd walla a zẽk a koɛɛg ye. . . . Yẽ kõn kaoog tã-wĩig sẽn zẽgemd ye.’ ”—Matɩe 8:16, 17; 12:10-21; Ezai 42:1-4; 53:4, 5.

Bũmb ning b sẽn deng n wilg Mesi wã namsgã wɛɛngẽ: A Ezai reng n wilgame tɩ Israɛlle, neb wʋsg pa na n sak n deeg tɩ yaa a Zezi la Mesi wã ye. La ne bãmbã, a na n yɩɩ kug-lakdga. (1 Pɩɛɛr 2:6-8; Ezai 8:14, 15) La sɩd yɩɩ woto. Baa ne a Zezi sẽn maan bõn-bãn wʋsgã, nebã ka tẽ-a ye. Yaa sẽn na yɩl “tɩ Wẽnnaam no-rɛɛs a Ezai koɛɛgã pidsi, yẽ sẽn yeele: ‘Zusoaba, ãnda n tẽ tõnd koɛɛga?’ ” (Zã 12:37, 38; Ezai 53:1) Bũmb ning sẽn kɩt tɩ Zʋɩf rãmbã pa tẽ t’a Zezi la Mesi wã yaa tags-kɛg nins b sẽn da tarã. B ra tẽedame tɩ Mesi wã na n fãaga b tẽngã Rom dãmbã nugẽ, la a lugl a Davɩɩd rĩungã tẽngã zugu. B sẽn nams a Zezi la b kʋ-a wã yĩnga, Zʋɩf rãmbã wʋsg pa sak n deeg tɩ yẽ la Mesi wã ye. La a Ezai da reng n togsame tɩ Mesi wã na n paama namsg n yaool n wa lebg Rĩma.

A Ezai sebrã pʋgẽ, Mesi wã pĩnd n yeela woto: “Mam zõondame tɩ b pãb maam. . . . Mam ka solg m meng ne neb nins sẽn ning maam yãnde, la b tʋbs mam neng kolkoodã ye.” A Matɩe wilga b sẽn nams a Zezi to-to wã. A yeela woto: “Bãmb tʋbsa [a Zezi] neng kolkoodo, n pãb bãmb ne nug-gila.” (Ezai 50:6; Matɩe 26:67) A Ezai gʋlsame t’a Zezi ‘sika a meng n ka yaag a noor ye.’ Sɩd me, Zʋɩf rãmbã sẽn dõd a Zezi t’a Pɩlat ra sokd-a n dat n bãng sã n yaa sɩdã, a Zezi “ka leok yẽ gomd baa a yembr ye, la ada yɛɛsa guvɛrneerã wʋsgo.”—Ezai 53:7; Matɩe 27:12-14; Tʋʋma 8:28, 32-35.

Bũmb ning b sẽn deng n wilg a kũumã wɛɛngẽ. A Ezai bãngr-gomdã pidsa a Zezi kũumã wɛɛngẽ, la rẽ poor menga. A Ezai yeela woto: “B tuu bãmb yaoog n lagem nin-wẽns yaado, la b naaga bãmb ne arzegs rãmb n mum.” (Ezai 53:9) Wãn to la gom-kãensã sẽn wõnd kɩɩsda taabã pids-yã? A Zezi sẽn ki wã, yɩɩ ra-luk zug la b ka-a, bi-bees a yiib sʋka. (Matɩe 27:38) La rẽ poore, a Zozɛf sẽn yit Arimate n yaa arzɛk soabã rɩk-a lame n tɩ mum yao-paalg pʋgẽ a sẽn da kɩt tɩ b tu a meng yĩnga. (Matɩe 27:57-60) Sẽn na n baase, a Zezi kũumã pidsa gomd a ye sẽn tar yõod wʋsg a Ezai bãngr-goamã pʋgẽ. A goma Mesi wã yell woto: “Yaa mam tʋm-tʋmd tɩrgã bãngrã yĩng la b na n kɩt tɩ neb wʋsg lebg nin-tɩrse, la bãmb meng na n zɩɩ bãmb tʋʋm-wẽnsã zɩɩbo.” Vẽenega, a Zezi kũumã yɩɩ rondo, sẽn na yɩl n fãag kɩs-sɩd dãmbã ne yel-wẽnã.—Ezai 53:8, 11; Rom dãmba 4:25.

 Bãngr-goam a taab sẽn pidsi, la sẽn na n wa pidsi

Biiblã sɛbã sʋka, yaa a Ezai bãngr-goamã la tʋm-tʋmdbã ne a Zezi mengã ra nong n tikd n yɩɩda, n wilgd Mesi wã sẽn yaa a soabã. La pa a Ezai sebrã bal n togsd bũmb ning sẽn na n zĩnd beoog-daar ye. Bãngr-goam a taab wʋsg me sẽn be Biiblã babg ning b sẽn gʋls ne hebre wã pidsa a Zezi zugu, a Rĩungã zugu, la bõn-sõmã nins Rĩungã sẽn na n maan beoog-daarã zugu. * (Tʋʋma 28:23; Wilgri 19:10) Bõe n wilgd tɩ bãngr-goam kãensã na n sɩd pidsame? A Zezi yeela Zʋɩf rãmb nins sẽn da kelgd-a wã woto: “Bɩ y ra tags tɩ mam waame n na n sãam tõogã ne Wẽnnaam no-rɛɛsdbã noy [bɩ Biiblã babg ning b sẽn gʋls ne hebre wã] ye. Mam ka wa n na n sãam bãmb ye, la [yaa sẽn na n] pids bãmba. Tɩ bõe, mam yeta yãmb sɩd tɩ yĩngr la dũniyã na looge, la tõog tikri walla a kargr ba a ye kõn sãam ye, hal tɩ fãa paam pidsgu.”—Matɩe 5:17, 18.

A Zezi wilga yɛl sẽn zĩnd yẽ wakatẽ wã n pids Biiblã bãngr-goam kẽere, la yɛl a taab me sẽn nan wate. (Daniɛll 9:27; Matɩe 15:7-9; 24:15) Sẽn paase, a Zezi ne a karen-biisã pĩnd n togsa yɛl sẽn na n zĩnd beoog-daare, la yɛl nins tõnd sẽn ne rũndã-rũndã wã wʋsgo. Sõsg ning sẽn pʋgdã na n goma bãngr gom-kãensã la a taab sẽn na n wa pids yelle.

[Foto, seb-neng]

[Foto, seb-neng a 4]

“Pa-kul na n . . . doga bi-ribla”

[Foto, seb-neng a 5]

‘Mam ka solg m meng ne neb nins sẽn ning maam yãndã ye’