Yɛl b sẽn pĩnd n togs tɩ na n zĩnda tõnd wakatã

BIIBLÃ wilgame tɩ Wẽnnaam Rĩungã na n kɩtame tɩ laafɩ la sũ-noog zĩnd tẽngã zugu. (Daniɛll 2:44) Pʋʋsg ning a Zezi sẽn zãms a karen-​biisã pʋgẽ, a wilg-b lame tɩ b pʋʋs woto: “Tɩ yãmb soolem wa, tɩ yãmb daab maan dũniyã zug wa sẽn maand [saasẽ wã].” (Matɩe 6:10) Bãngr-​gomd ning a Zezi sẽn togs a karen-​biisã oliiv tɩɩs tãngã zugã pʋgẽ, a wilga yɛl takɩ sẽn na n zĩnd tɩ soolem kãng bɩ Rĩungã yaool n wa. Yel-​kãensã fãa sẽn naag taab ra na n yɩɩ bãnd pʋ-​peelem dãmbã sẽn na n yã vẽenega. Yɛl nins sẽn pʋgdã pʋgẽ, bʋs la yãmb mengã maan kaseto?

Zabã sẽn be zĩig zãngã. A Zezi pĩnd n wilgame tɩ “buud a yembr na n yika zabr ne buud a to, la soolem ne soolem a to.” (Matɩe 24:7) Nand tɩ dũni gill pipi zabrã yik yʋʋmd 1914 sasa wã, zabã ra bee zĩig-​zĩiga. La dũni gill pipi zabrã taa zĩis wʋsgo,  leb n kɩtame me tɩ b maan zab-te-​toos buud sẽn da zɩ n zĩndi. Wala makre, b talla sɩlg ning b sẽn da maan paalmã n lob bõmb rãmb n kʋ neb sẽn pa sodaase. B sẽn da maand zab-​teedã wʋsg-​wʋsgã kɩtame tɩ sẽn ki-​bã sõor pa tõe n bãng n bilg ye. Sodaas sẽn ki la sẽn pogl zabrã pʋgẽ sõor yɩɩda milyõ 32. La yʋʋmd 2000 wã tɛk n tar n watẽ, neb nins sẽn kiid zabã pʋsẽ wã sõorã tara paasgo. Bãngd a yembr wilgame tɩ sodaas la nin-​zaals sẽn ki dũni gill zabr a yiib-n-​soabã pʋgẽ wã pa tõe n sõd ye. La baa masã mengã zabã ket n beeme.

Komã sẽn be wã. A Zezi pĩnd n wilgame tɩ ‘kom na n zĩndame.’ (Matɩe 24:7) Yʋʋmd 2005 wã pʋgẽ, sebr a ye (Science) wilgame tɩ “dũniyã gill zugu, neb milyõ 854 n gãe kom wakat fãa, bɩ n pa paamd rɩɩb sẽn yaa sõma n dɩtẽ ye.” Yʋʋmd 2007 wã pʋgẽ, ONU wã sull ning sẽn get koodã la rɩɩbã yellã wilgame tɩ tẽns 33 n pa tar dɩɩb sẽn tõe n dɩlg b nebã tɩ sek ye. La maana wãn tɩ kood be wʋsg tɩ neb yaool n kiid kom? Yaa b sẽn dɩkd koodã b sẽn da segd n tall n dɩlg nebã n maand esãns b sẽn boond tɩ etanolle, la b bʋt pʋtã pʋsẽ bõn-​buud sẽn tar n maand esãnsã yĩngã. Afirikdisiid zʋrnall a ye (The Witness) wilgame tɩ “b sã n yãk etanollã n ning mobil-​bedr tɩ pid sõma, mikdame tɩ yaa kood sẽn tõe n dɩlg ned yʋʋm-​tõr la b rɩk n maane.”

Tẽn-​digimdg sẽn yaa kãsemse. A Zezi yeela woto: “Tẽn-​digimdg kãsems na n zĩndame.” (Luk 21:11) Y sã n tagsdame tɩ yaa masã la tẽn-​digimdgã namsd neb wʋsg n yɩɩda, y bee bʋʋm. Yʋʋmd 2007 wã pʋgẽ, bãngd a Rajender Chadha sẽn yɩt Ẽndã yeela woto: “Zĩig pʋgẽ d yãa tẽn-​digimdgã sẽn tar paasg dũniyã gill zugu. Ned baa a ye pa mi bũmb ning sẽn kɩt tɩ yaa woto wã ye.” Sẽn paase, nebã sõor sẽn tar paasg zĩis nins tẽn-​digimdg sẽn tõe n zĩndã kɩtame tɩ sẽn kiid-b tẽn-​digimdgã pʋgẽ wã sõor tar paasgo. Etazĩni tẽngã sull ning sẽn get tẽn-​gãongã yellã wilgame tɩ yʋʋmd 2004 pʋgẽ, tẽn-​digimdg ning sẽn maan Ẽnd mogrã pʋgẽ n dãmb koomã n wa ne ko-​wĩis sẽn tar pãng b sẽn boond tɩ tsunami wã kɩtame tɩ “neb sẽn ki yʋʋm-​kãngã wã sõor yɩɩd neb nins tẽn-​digimdgã sẽn kʋ yʋʋm 500 sẽn loogã pʋgẽ wã.”

Bã-kɛgemse. A Zezi pĩnd n wilgame tɩ ‘bã-longds na n zĩndame.’ (Luk 21:11) Dũniyã gill zugu, bã-kʋd la bã-paals tɩbsg sẽn yaa toog yõkda neb wʋsgo. Wala makre, bãngdbã ne logtoɛɛmbã sẽn lagemd taab dũniyã gill zug n dat tɩ weoogã bɩ palu wã menem t’a ket n kʋʋd neb wʋsgã kɩtame tɩ b pa mi b sẽn maandg ye. Sẽn paase, bã-kʋd a taab wala kõs-​kʋdgã kʋʋda neb milyõ rãmbã. Sɩda wã la bã-paals a taab me kʋʋda ãdem-​biisã. ONU wã sull ning sẽn get yĩns laafɩ wã yellã wilgame tɩ dũniyã nebã fãa sʋka, nin-​yɛng tãab sʋk tara kõs-​kʋdgã biis a yĩngẽ wã. B le wilgame tɩ tẽns wʋsg pʋsẽ, sɩda wã kɩtame tɩ kõs-​kʋdgã yõkd neb wʋsgo. Segõnd fãa, ned la kõs-​kʋdgã yõkda, la a tɩpgã lebgda toog n paasdẽ. Zʋrnall a ye (New Scientist) wilgame tɩ yʋʋmd 2007 wã pʋgẽ, ned a ye n da bẽed kõs-​kʋdgã Erope, tɩ tɩt nins b sẽn tarã baa a ye pa tõog n tɩp ye.

Manesem wẽnsã tara paasgo. A Zezi yeelame tɩ ‘wẽngã sẽn na n yɩ wʋsgã yĩnga, neb wʋsg nonglem na n maagame.’ (Matɩe 24:12) Rẽ sẽn yãk a toogo, tʋm-​tʋmd a Poll me wilgame tɩ neb wʋsg pa na n  tall manesem sẽn yaa sõma ye. A wilga nebã sẽn na n tall manesem nins “yaoolem wakatã” sẽn na n yɩ toogã sasa, nand tɩ Wẽnnaam Rĩungã wa sãam dũni kãngã. A yeela woto: “Neba na n yɩɩ beed dãmba, ligd noangdba, wilg-m-​mens rãmba, tɩtaam dãmba, Wẽnnaam tʋʋsdba, ba rãmb la ma rãmb kɩɩsdba, zɩ-​beoog rãmba, nin-​zaalse, neb sẽn ka tar nimbãan-​zoeere la sũ-to-​neba, tẽn-​kãn-​neba, neb sẽn ka tar yõk-m-​menga, pʋto-​rãmba, nin-​sõamyã kisgdba, zãmb dãmba, neb sẽn ka gũusda, la wuk-m-​mens rãmba sẽn nong dũniyã sũ-noog n yɩɩd Wẽnnaam. Bãmb wẽnda wa b sẽn sakd Wẽnnaam, la b yaool n kɩɩsda bãmb pãnga.” (2 Tɩmote 3:1-5) Yãmb pa ne tɩ manesem kãensã yaa bũmb sẽn wae n yɩɩd pĩndã sɩda?

A Zezi ne a Poll pa sõdg bũmb nins fãa sẽn na n kɩt tɩ dũniyã lebg wẽng woto wã ye. La b pĩnd n wilga manesem la yɛl nins tõnd sẽn ne rũndã-rũndã wã vẽenegã. La sã n yaa ne beoog-​daarã yẽ? A Ezai bãngr-​gomdã sẽn gom Mesi wã waoogã yell tɩ sɩd pids kɛpɩ wã leb n wilga toeeng nins Wẽnnaam Rĩungã sẽn na n maan dũniyã zug ãdem-​biisã nafr yĩngã. Bɩ d ges rẽ sõsg ning sẽn pʋgdã pʋgẽ.

[Foto, seb-neng a 6]

“Buud a yembr na n yika zabr ne buud a to”

[Foto, seb-neng a 7]

“Bã-longds na n zĩndame”

[Fotã soaadba]

© OMS/P. Virot