Bãng-y-yã a Zezi sẽn ka to Wẽnnaam daabã pidsg pʋgẽ wã võor neere
Bãng-y-yã a Zezi sẽn ka to Wẽnnaam daabã pidsg pʋgẽ wã võor neere
“Mam yaa sore, la sɩda la vɩɩm. Ned ka tõe n ta m Ba nengẽ a sã n ka mam maasem yĩng ye.”—Zã 14:6.
1, 2. Bõe yĩng tɩ d segd n bao n bãng a Zezi sẽn ka to Wẽnnaam daabã pidsg pʋgẽ wã võor neere?
HAL pĩnd wẽndẽ n tãag masã, neb wʋsg maoome n na n da wõneg b taaba, la wʋsg pa tõog ye. Zĩis kẽer wɛɛngẽ, sãnda tõogame n sɩd pa wõnd b taaba, la b sõor paoodame. La bũmb wʋsg n kɩt t’a Zezi Kirist sẽn yaa Wẽnnaam bi-riblã yẽ pa tol n tar to ye.
2 Bõe yĩng tɩ d segd n bao n bãng a Zezi sẽn ka to wã võore? Sẽn na yɩl n tall zood sõma ne d saasẽ Ba a Zeova, rẽndame tɩ d bãng rẽ! A Zezi meng yeela woto: “Mam yaa sore, la sɩda, la vɩɩm. Ned ka tõe n ta m Ba nengẽ a sã n ka mam maasem yĩng ye.” (Zã 14:6; 17:3) Bɩ d bao n bãng yɛl kẽer sẽn kɩt t’a Zezi ka to wã. Woto na n kɩtame tɩ d bãng n pẽg a sẽn maand bũmb ning Wẽnnaam daabã pidsg pʋgẽ wã sõma.
Bi-ribl yende
3, 4. a) Bõe yĩng tɩ d tõe n yeel t’a Zezi sɩd yaa bi-ribl sẽn ka to? b) Bõe n kɩt t’a Zezi ka to ãndũniyã naaneg wɛɛngẽ?
3 A Sʋɩtãan sẽn wa n na n mak a Zezi wã, a bool-a lame tɩ “Wẽnnaam Biiga.” (Mat. 4:3, 6) La a Zezi pa Wẽnnaam biig bal ye. Biiblã pʋgẽ b boond-a lame tɩ ‘Wẽnnaam Bi-ribl yende,’ la woto zemsame. (Zã 3:16, 18, NW ) Gɛrk gom-bil ning b sẽn lebg tɩ “bi-yendã” rat n yeelame me tɩ “sẽn ka to,” bɩ “sẽn yaa toor fasɩ.” La bõe yĩng tɩ b boond a Zezi tɩ bi-ribl-yend t’a Zeova yaool n tar malɛgs tus ka tɛk sẽn yaa a kom-dibli?
4 A Zezi sẽn ka to wã yaa tɩ yaa yẽnda a ye bal la a Ba wã naan a toore. Yaa yẽ la a bi-ribl-kãsenga. Sɩd me, a yaa “bi-kãseng sẽn yɩɩd bõn-naandsã fãa.” (Kol. 1:15) Yaa yẽ la ‘Wẽnnaam naan pipi.’ (Wil. 3:14, NW ) Bi-ribl-yend kãngã sẽn maan bũmb nins ãndũni wã naaneg pʋgẽ wã yĩng me kɩtame t’a ka to ye. Yaa sɩd tɩ pa yẽ la Naandã bɩ bũmba fãa yẽgr ye. La a Zeova tũnuga ne-a n naan sẽn ketã fãa. (Karm-y Zã 1:3, Kãab-paalgã Koe-noogo) Tʋm-tʋmd a Poll yeela woto: “Ne tõndo, Wẽnnaam a yembr bal n be. Bãmb yaa tõnd Ba, la bũmb fãa yita bãmb nengẽ, la yaa bãmb yĩng la tõnd be. Zusoab a yembr bal n be sẽn yaa a Zezi Kirist, [la yaa yẽ maasem yĩng la bũmb fãa la tõnd me be, NW ].”—1 Kor. 8:6.
5. Wãn-wãn la b wilgd Biiblã pʋgẽ t’a Zezi ka to?
5 La bũmb a taab yĩng me n kɩt t’a Zezi ka to ye. Biiblã pʋgẽ, b boond-a-la ne yʋy toɛy-toɛya, tɩ wilgdẽ tɩ Wẽnnaam daabã pidsg pʋgẽ a sɩd ka to ye. Bɩ d ges a Zezi yʋ-kãens a nu sẽn be Biiblã sɛb nins b sẽn gʋls ne gɛrkã pʋgẽ n wʋm b võore.
“Gomdã”
6. Bõe yĩng tɩ b sẽn boond a Zezi tɩ “Wẽnnaam Gomdã” zemse?
6 Karm-y Zã 1:14. Bõe yĩng tɩ b boond a Zezi tɩ Logos bɩ Gomdã? A yʋ-kãngã wilgda tʋʋmd ning a sẽn sɩng n tʋmd malɛgsã la ninsaalbã naaneg poor tɛkã. Ne a Zezi maasem, a Zeova taasa kibay la noy malɛgsã la hal baa ninsaalbã meng tẽngã zugu. A Zezi sẽn yeel zʋɩf rãmbã bũmb ningã wilgda vẽeneg t’a sɩd yaa Gomdã bɩ Wẽnnaam koe-taasda. A yeel-b-la woto: “Mam karengã ka mam dẽnd ye, yaa sẽn tʋm-a maamã rẽnda. Ned sã n dat n maan bãmb daabo, yẽ na bãng mam karengã sã n yaa Wẽnnaam dẽnda, bɩ m sã n gomda m meng [goama, NW ].” (Zã 7:16, 17) Baa a Zezi sẽn leb saasẽ wã, b ket n boond-a lame tɩ ‘Wẽnnaam Gomde.’—Wil. 19:11, 13, 16.
7. Wãn-wãn la d tõe n wilg tɩ d yaa sik-m-mens rãmb wa a Zezi b sẽn boond tɩ “Gomdã”?
7 Yãmb we n tags n ges b sẽn boond a Zezi tɩ Wẽnnaam Gomdã sẽn dat n yɛɛlgã. Baa ne a yam la a bãngr sẽn yɩɩd ãdem-biisã la malɛgsã zãngã, a pa teegd a mengã yam ye. A gomda wa a Ba wã sẽn wilg-a t’a gom to-to wã bal kɛpɩ. A baooda wakat fãa n na n kɩt tɩ b pẽg a Zeova la b ra pẽg yẽ ye. (Zã 12:50) Ad woto sɩd yaa mak-sõng tɛk n kõ-do! Wẽnnaam waooga tõnd me n tʋm-d tɩ d ‘moon koe-noogã.’ (Rom 10:15) D sã n nand a Zezi sik-m-mengã, d pa na n bao n wilg nebã d meng bãngr ye. D sã n wa taasd-b vɩɩm koɛɛgã sẽn be Gʋlsg Sõamyã pʋgẽ wã, d na n gũusame n da “maan tɩ yõsg bũmb ning sẽn gʋlsã ye.”—1 Kor. 4:6, Kãab-paalgã Koe-noogo.
“Ãmiina”
8, 9. a) “Ãmiina” wã võor yaa bõe, la bõe yĩng tɩ b boond a Zezi tɩ “Ãmiina”? b) Bõe la a Zezi maanẽ tɩ wilgdẽ t’a sɩd yaa “Ãmiina”?
8 Karm-y Wilgr 3:14. Bõe yĩng tɩ b boond a Zezi tɩ Ãmiina? Gom-bil ning b sẽn lebg tɩ “ãmiina” wã yaa Hebre gom-bila. Koɛɛg-koɛɛga, a rat n yeelame tɩ “bɩ yɩ woto,” wall “woto bal kɛpɩ.” Gom-bi-kãngã yita Hebre wã gom-bil a to pʋgẽ tɩ yẽ soabã rat n yeel tɩ “yɩ sɩd soaba,” wall “yɩ ned b sẽn tõe n teege.” B sã n gomd a Zeova pʋ-peelmã yelle, yaa gom-bi-kãng la b wae n pʋtẽ. (Tõo. 7:9; Ezai 49:7) Bõe yĩng tɩ b sẽn boond a Zezi tɩ “Ãmiina” wã wilgd t’a sɩd ka to? Kelg-y 2 Korẽnt dãmb 1:19, 20 wã sẽn leokd to-to. Be b yeta woto: “Wẽnnaam Biig a Zezi Kirist koɛɛgã [tõnd sẽn moon, NW ] yãmb sʋkã ka yɩ n-ye n yaool n yaa ayo ye; la ne bãmba, a yaa n-ye bala. Tɩ bõe, Wẽnnaam kãabg fãa yaa n-ye Kirist maasem yĩnga. Yaa woto yĩnga tõnd yetame tɩ ‘ãmiina,’ bãmb maasem yĩnga, Wẽnnaam waoogr yĩnga.”
9 A Zezi yaa Wẽnnaam kãabsã fãa “Ãmiina.” A sẽn zĩnd tẽng zug ka n pa tol n maan yel-wẽndã, n paas a sẽn ki tɩ yɩ maoongã fãa wilgdame tɩ Wẽnnaam a Zeova sẽn pʋlem bũmb ninsã fãa na n pidsa kɛpɩ. A Zezi sẽn tõog n pa tol n maan yel-wẽndã, a wilgame t’a Sʋɩtãan sẽn yeel a Zoob sebrã pʋgẽ tɩ fare, namsg la makr sã n wʋm ninsaala, a na n sak n basa Wẽnnaamã yaa ziri fasɩ. (Zoob 1:6-12; 2:2-7) Wẽnnaam malɛgsã gill la ninsaalbã fãa sʋka, yaa a Bi-ribl-kãsengã bal n tõog n wilg t’a Sʋɩtãan yagame. Sẽn paase, a wilga vẽeneg tɩ sɩd yaa a Ba a Zeova bal n segd n yɩ yĩngr la tẽng naaba.
10. Wãn to la d tõe n dɩk a Zezi togs-n-taar a sẽn wilg to-to tɩ yẽ la “Ãmiina” wã pʋgẽ?
10 Wãn to la d tõe n dɩk a Zezi togs-n-taar a sẽn wilg to-to tɩ yẽ la “Ãmiina” wã pʋgẽ? Yaa d sẽn na n sakd a Zeova la d wilgdẽ tɩ yẽ n sɩd segd n yɩ yĩngr la tẽng naaba. D sã n maand woto, d kõta Wẽnnaam bũmb ning a sẽn kos-d Yelbũn 27:11 pʋgẽ wã. Be b yetame yaa: “M biiga, maan yam n kõ maam sũ-noogo, tɩ m paam n leok sẽn paoogd-a maamã.”
Kaool-paalgã se-yõkda
11, 12. Bõe n kɩt t’a Zezi yaa se-yõkd sẽn ka to?
11 Karm-y 1 Tɩmote 2:5, 6. Yaa a Zezi a ye bal la se-yõkd Wẽnnaam ne ãdem-biisã sʋka. A yaa ‘kaool-paalgã se-yõkda.’ (Heb. 9:15; 12:24) B boola a Moiiz me tɩ se-yõkda. Sɩd me, a yɩɩ Tõog ning Wẽnnaam sẽn kõ-a t’a taas a nin-buiidã se-yõkda. (Gal. 3:19) La bõe yĩng t’a Zezi yaa se-yõkd sẽn ka to?
12 Gɛrk gom-bil ning b sẽn lebg tɩ se-yõkdã gomda ned laloa wã sẽn yãk n kõ sor yelle. B sẽn boond a Zezi tɩ se-yõkd (bɩ paasdã), yaa tɩ yaa yẽ a yembr n yɩ sabab tɩ b tõog n lugl kaool-paalgã n wa ne bu-paall ning b sẽn boond tɩ Wẽnnaam Israɛllã. (Gal. 6:16) Bu-paalg kãng yaa kiris-neb nins sẽn paam vʋʋsem sõngã zaeebã fãa sẽn na n wa tɩ yɩ “naam maan-kʋʋdb” saasẽ wã. (1 Pɩɛ. 2:9; Yik. 19:6) Tõogã kaool a Moiiz sẽn yɩ a se-yõkdã pa tõog tɩ buud a woto zĩnd ye.
13. Bõe me n kɩt t’a Zezi yaa se-yõkda?
13 Bõe me n kɩt tɩ b boond a Zezi tɩ se-yõkda? A Zeova kɩtame t’a Zezi zɩɩmã sẽn daagã yõod nafd neb nins sẽn na n kẽ kaool-paalgã pʋgẽ wã. A geelgda nin-kãensã wa nin-tɩrse. (Rom 3:24; Heb. 9:15, NW ) Rẽ poore, Wẽnnaam getame tɩ zemsame tɩ b kẽ kaool-paalgã pʋgẽ, n na n wa tɩ yɩ naam maan-kʋʋdb saasẽ! A Zezi sẽn yaa b se-yõkdã yĩnga, a sõngd-b lame tɩ b paad yɩlem Wẽnnaam taoore.—Heb. 2:16.
14. Bõe yĩng tɩ kiris-neb nins sẽn debd saasẽ wã la sẽn na n vɩɩmd-b tẽngã zugã segd n pẽg a Zezi se-yõkrã tʋʋmd wʋsgo?
14 La neb nins sẽn pa kẽ kaool-paalgã pʋgẽ, n saagd n na n wa vɩɩmd tẽngã zug wakat sẽn kõn sa wã yẽ? Baa b sẽn pa kẽ kaool-paalgã pʋgẽ wã, b rɩta a yõodo. Wẽnnaam tikda rẽ zug n kõt-b b yel-wẽna sugr la a geelgd-b wa nin-tɩrse, n boond-b t’a zo-rãmba. (Zak 2:23; 1 Zã 2:1, 2) Woto yĩnga, d na n wa tɩ vɩɩmda saasẽ tɩ yaa tẽng zug ka me, tõnd ned kam fãa tara bʋʋm n na n pẽg sɛ-yõkr tʋʋmd ning a Zezi sẽn tʋm kaool-paalgã luglg pʋgẽ wã wʋsgo.
‘Maan-kʋʋdb kãsma’
15. Bõe yĩng tɩ maan-kʋʋdb kãsem a Zezi pa wõnd pĩnd wẽndẽ maan-kʋʋdb kãsem dãmbã?
15 Yaa sɩd tɩ rap wʋsg yɩɩ maan-kʋʋdb kãsem dãmb pĩnd wẽndẽ. La a Zezi yaa maan-kʋʋdb kãsem sẽn ka to. Bõe yĩnga? Tʋm-tʋmd a Poll bilga rẽ võor n yeel woto: “Bãmb ka na n maan maoong daar fãa wa maan-kʋʋdbã kãsem dãmb sẽn da maandã ye, pipi rẽnda b mens yel-wẽnã yĩnga, yaoolem dẽndã nebã yel-wẽnã yĩnga. Bãmb maana yãoã vugr wakat fãa yĩnga, b sẽn kõ b meng tɩ yɩ maoongã yĩnga. Tɩ bõe, neb nins tõogã sẽn maand tɩ yɩ maan-kʋʋdb kãsem dãmbã ka pãng ye, la wẽeneg sẽn pʋgl tõogã n wa wã maanda Wẽnnaam Biigã sẽn zems zãng wakat sẽn ka sɛtã tɩ b yɩ maan-kʋʋda.”—Heb. 7:27, 28. *
16. Bõe yĩng t’a Zezi maoongã sɩd ka to?
16 A Zezi yɩɩ ned sẽn zems zãng wa a Ãdem sẽn da yaa to-to nand t’a maan a yel-wẽndã. (1 Kor. 15:45) Woto kɩtame tɩ yaa a Zezi bal n tõe n kõ maoong sẽn zems zãnga, la vugr wakat fãa yĩnga. A Moiiz Tõogã tũub sasa, b ra kõta maandã daar fãa. La maand kãens ne maan-kʋʋrã tʋʋm toɛy-toɛyã fãa ra yaa maoong ning a Zezi sẽn da segd n wa kõ wã mamsg bɩ a maasem. (Heb. 8:5; 10:1) Woto yĩnga, a Zezi maoongã yõod sẽn yɩɩd maan-kʋʋdb kãsem dãmb a taabã fãa maandã, n paas a sẽn na n kell n yɩ maan-kʋʋdb kãsem wakat fãa yĩngã kɩtame t’a sɩd ka to ye.
17. Bõe yĩng tɩ d segd n wilg tɩ d tara mi-beoog a Zezi sẽn yaa d maan-kʋʋdb kãsmã yĩnga, la wãn-wãn la d tõe n maan rẽ?
17 Sẽn na yɩl n paam n ta Wẽnnaam yam, d ratame tɩ maan-kʋʋdb kãsem a Zezi tʋm n sõng-do. La a sɩd yaa maan-kʋʋdb kãsem sẽn ka to tõnd yĩnga! Tʋm-tʋmd a Poll goma a yell n yeel woto: “Maan-kʋʋdb kãsem tõnd sẽn tarã ka a soab sẽn ka zoet tõnd nimbãaneg tõnd pãn-komsem pʋgẽ ye, la bãmb dag n paama makr ne bũmb fãa wa tõndo, la bãmb ka maan yel-wẽn baa bilf ye.” (Heb. 4:15) Hakɩka, d sã n yaa mi-beoog rãmba, woto segd n kɩtame tɩ d vɩɩmd sẽn ki-a tõnd yĩngã yĩnga, la d ra le vɩɩmd d mens yĩng ye.—2 Kor. 5:14, 15; Luk 9:23.
“Yageng” ning sẽn da tog n wa wã
18. A Ãdem yel-wẽndã poore, bãngr-gom-bʋg la b togs-yã, la bõe la b wilg kaoosg zugẽ?
18 Hal sɩngrẽ wã ãdem-biisã sẽn wa n bõn arzãnã, sũ-noogã, b zoodã ne Wẽnnaam la vɩɩm sẽn pa satã Edɛnnã, Wẽnnaam a Zeova togsame tɩ Fãagd n na n wa. B bool-a lame tɩ “yagenga.” (Sɩng. 3:15) Rẽ zugẽ, hal sẽn na maan yʋʋma, Biiblã bãngr-goam wʋsg goma yagen-kãngã b sẽn da pa mi wã yelle. B wilgame t’a na n yɩ a Abrahaam, a Izaak la a Zakoob yagenga, la b yeel me tɩ na n yɩɩ rĩm a Davɩɩd roogã neda.—Sɩng. 21:12; 22:16-18; 28:14; 2 Sãm. 7:12-16.
19, 20. a) Yageng ning sẽn da segd n wa wã yaa ãnda? b) La bõe yĩng tɩ d tõe n yeel tɩ yagen-kãng pa a Zezi a yen bala?
19 Yageng ning b sẽn da yeel tɩ watame wã yaa ãnda? D yãta sok-kãngã leoorã Galat dãmb 3:16 soabã pʋgẽ. (Karm-y-yã.) La Galat dãmb sebrã sak a 3 wã pʋgẽ me, tʋm-tʋmd a Poll wa n yeela kiris-neb nins sẽn paam vʋʋsem sõngã zaeebã woto: “Yãmb sã n yaa Kirist rẽnda, dẽ, yãmb yaa a Abrahaam yagense, la yãmb yaa neb nins sẽn na n paam dogem pʋɩɩr wa sẽn zems kãabgã.” (Gal. 3:29) Sẽn yaa Kiristã la yageng ning sẽn da segd n wa wã, bõe yĩng tɩ neb a taab me naage?
20 Neb milyõ rãmb n yet tɩ b yaa a Abrahaam yagens hal tɩ kẽer pʋd n boond b mens tɩ no-rɛɛsdba. Tũudum sãnda neb pẽgda b tũudmã wʋsgo, n geendẽ tɩ b no-rɛɛsdbã yaa a Abrahaam yagense. La rẽ yĩnga yaa no-rɛɛsdb kãens fãa la b sẽn boond tɩ yagensã bɩ? Ayo. Wa Wẽnnaam sẽn vẽneg tʋm-tʋmd a Poll t’a wilgã, pa a Abrahaam yagensã fãa n naag yagens nins yell b sẽn da gomã sʋk ye. Bala pa a Abrahaam kambã fãa pendẽ la yageng ning sẽn da na n wa yɩ sabab tɩ ãdem-biisã paam barkã ra segd n yi ye. Yaa a Izaak a yembr pendẽ wã bala. (Heb. 11:18) B wa n bãngame tɩ yagengã meng-meng yaa a Zezi Kirista, bala yaa yẽ a ye yaab rãmbã roog la b sõdg Biiblã pʋgẽ hal n tɩ tãag a Abrahaam. * La kaoosg zugẽ, neb kẽer n wa n lebg a Abrahaam yagengã yagen-taase, bala b yaa ‘Kiristã rẽnda.’ A Zezi sẽn pids bãngr-gom-kãngã wã yĩng kɩtame t’a sɩd ka to ye.
21. Bũmb nins a Zezi sẽn maan a Zeova raabã pidsg pʋgẽ tɩ kɩt t’a ka to wã sʋka, bʋg n noom yãmb n yɩɩda?
21 D sẽn lebs n tẽeg a Zezi sẽn ka to a Zeova raabã pidsg pʋgẽ wã võor koɛɛg-koɛɛgã, bõe la d bãng-yã? D bãngame tɩ Wẽnnaam bi-ribl-yendã naaneg tɛk n tar n watẽ, a pa tol n tall to ye. La bi-ribl-yend kãngã sẽn wa n lebg a Zezi wã sikda a meng n tũud a Ba wã raab kɛpɩ n pa tond n baood a meng ziir ye. (Zã 5:41; 8:50) Ad a sɩd yaa mak-sõng sẽn ka to n kõ tõnd rũndã-rũndã! Bɩ d rɩk a Zezi togs-n-taare, n mao tɩ d sẽn maand bũmb ning fãa bɩ yɩ “Wẽnnaam waoogr yĩnga.”—1 Kor. 10:31.
[Tẽngr not rãmbã]
^ sull 15 Bãngd a yembr yeelame tɩ verse kãngã pʋgẽ, gom-bil ning b sẽn lebg tɩ “vugr wakat fãa yĩngã,” rat n yeelame tɩ “Kiristã sẽn ki vugrã sekame, t’a pa na n ye ki yɛsa, bɩ t’a kũumã yaa toor fasɩ ne kũum buud fãa.”
^ sull 20 Pipi kiris-nebã wakatẽ, baa ne Zʋɩf rãmbã sẽn da yaa a Abrahaam yagens tã-tã n da tagsdẽ tɩ bãmb n na n paam barkã, b ra baas n gũuda nin-yend sẽn na n wa yɩ Mesi wã bɩ Kiristã waoongo.—Zã 1:25; 7:41, 42; 8:39-41.
Y tẽrame bɩ?
• Bõe la a Zezi yʋy nins sẽn wilgd t’a ka to Wẽnnaam daabã pidsg pʋgẽ wã sõng-y tɩ y bãnge? (Ges-y zĩ-gũbrẽ wã.)
• Wãn-wãn la y tõe n dɩk a Zeova bi-ribl sẽn ka to wã togs-n-taare?
[Zãmsgã sogsgã]
[Zĩ-gũbri/Foto, seb-neng 23]
A Zezi yʋy kẽer sẽn wilgd t’a ka to Wẽnnaam daabã pidsg pʋgẽ
▪ Bi-ribl yende. (Zã 1:3, Kãab-paalgã Koe-noogo) Yaa a Zezi a yen bal la a Ba wã naan a toore.
▪ Gomdã. (Zã 1:14) A Zeova kɩtame t’a bi-riblã yɩ a koe-taasda, n taasd a koees a bõn-naands a taaba.
▪ Ãmiina. (Wil. 3:14) A Zezi sẽn zĩnd tẽng zug ka n pa tol n maan yel-wẽndã yĩnga, n paas a sẽn ki tɩ yɩ maoongã fãa wilgdame tɩ Wẽnnaam a Zeova sẽn pʋlem bũmb ninsã fãa na n pidsa zãnga.
▪ Kaool-paalgã se-yõkda. (1 Tɩm. 2:5, 6) Yaa a Zezi n yɩ sɛ-yõkd n kɩt tɩ bu-paalg ning b sẽn boond tɩ ‘Wẽnnaam Israɛllã,’ sẽn yaa kiris-neb sull sẽn na n tɩ yɩ “naam maan-kʋʋdb” saasẽ wã tõog n zĩndi.—Gal. 6:16; 1 Pɩɛ. 2:9.
▪ Maan-kʋʋdb kãsma. (Heb. 7:27, 28) Yaa a Zezi a yen bal n yɩ ãdem-biig ning sẽn tõog n kõ maoong sẽn zems zãng vugri, la wakat fãa yĩngã. A maoongã yẽesda d yel-wẽna la a yiisd tõnd kũum yembd sẽn yaa yel-wẽna biisã pʋgẽ.
▪ Yageng ning b sẽn da yeel tɩ watame wã. (Sɩng. 3:15) Yaa a Zezi Kirist la yageng ninga sẽn da tog n wa wã. La kaoosg zugẽ, neb kẽer n wa n lebg a Abrahaam yagengã yagen-taase, bala b yaa “Kirist rẽnda.”—Gal. 3:29.