Modg-y n togs-y koe-noogã neere
Modg-y n togs-y koe-noogã neere
‘Bãmb kõo tõnd noor tɩ d moon nebã sʋk n kɩs kasetã neere.’—Tʋʋ. 10:42.
1. A Pɩɛɛr sẽn wa n gomd ne a Korney wã, tʋʋm bʋg Wẽnnaam sẽn bobl-b yell la a gom-yã?
DAAR a yembre, Itali soda-naab n tigim a roagdb la a zo-rãmba, la bũmb ning sẽn maan baraarã wilga toeeng Wẽnnaam sẽn maan a raabã ne ãdem-biisã wɛɛngẽ. Soda-naab kãngã sẽn da yaa wẽn-zoɛtã yʋʋr la a Korney. Tʋm-tʋmd a Pɩɛɛr yeela neb nins sẽn da tigmã tɩ b kõo tʋm-tʋmdbã noor tɩ b ‘moon nebã sʋk n kɩs a Zezi kaset neere.’ Baraare, a Pɩɛɛr koe-moonegã woma biis wʋsgo. Bu-zẽmsã neb sẽn da pa kẽ bãongã paama Wẽnnaam vʋʋsem sõngã la b reeg lisgu, tɩ kɩt tɩ b paam n na n wa tɩ yɩ rĩm dãmb saasẽ ne a Zezi. Ad a Pɩɛɛr sẽn togs koe-noogã neerã sɩd woma biis wʋsgo!—Tʋʋ. 10:22, 34-48.
2. Bõe n kɩt tɩ d miẽ tɩ pa tʋm-tʋmdb 12 wã bal la b bobl koe-moonegã?
2 Yel-kãngã zĩnda yʋʋmd 36 soabã pʋgẽ, pipi kiris-nebã wakate. Yʋʋm a yiib la bal sẽn deng rẽ, ned a ye sẽn da kis kiris-nebã wʋsg n tiig n toeeme. Yaa Tars rao a Solle. A ra rebda Damas soolmẽ wã t’a Zezi vẽneg a meng ne-a n yeel-a woto: “Yik n kẽng tẽnga pʋgẽ. La ned na n wilga foom fo sẽn na n maan bũmb ninga.” Dẽ poore, a Zezi yeela a karen-biig a Ananias vẽeneg t’a Soll ‘na n wilga neb sẽn ka zʋɩf buud la rĩm dãmb la Israɛll yagens yẽ yʋʋrã.’ (Karm-y Tʋʋm 9:3-6, 13-20.) A Ananias tɩ yeela a Soll woto: ‘Tõnd yaab rãmbã Wẽnnaam yãka yãmb . . . tɩ y na n yɩ bãmb kaset soab nebã fãa yĩnga.’ (Tʋʋ. 22:12-16) Wãn to la a Soll b sẽn wa n boondẽ t’a Pollã moon koɛɛgã ne a sũur fãa?
A sɩd togsa koe-noogã neere!
3. a) Sõs-bʋg la d na n wɛgse? b) A Poll toolã sẽn ta Efɛɛz kãsem dãmbã, b maana bõe tɩ yaa mak-sõng n kõ kiris-nebã?
3 Yaa sɩd tɩ d sã n da na n bao n bãng bũmb nins fãa a Poll sẽn maan dẽ poorã ball-balle, na n talla yamleoog wʋsgo. La d na n wɛgsa sõsg a yembr a sẽn sõs yʋʋmd 56 soabã sẽnes tɩ be Tʋʋm sebrã sak 20 wã. A Poll sõsa sõs-kãng a so-toak a tãab-n-soabã baasg sasa. A kẽe batayo n dʋʋg Aaze mogrã n kẽng Mile, la a sẽn ta be wã, a toolame tɩ b wilg Efɛɛz tigingã kãsem dãmb tɩ b seg-a. Mile ne Efɛɛz ra zemsa kilo 50 woto. La so-tɩrg sẽn da kaeyã yĩng kɩtame tɩ ra zãra. Tags-y n ges-y Efɛɛz kãsem dãmbã sũy sẽn yɩ noog to-to a Poll koɛɛgã sẽn ta-bã. (Ges-y Yelbũna 10:28 wã.) La baasgo, b ra segd n segla b mens n kẽng Mile. Tõe tɩ kẽer kosa sor b tʋʋm zĩisẽ wall b viig b tʋʋm menga. Rũndã-rũndã, kiris-neb wʋsg me maanda woto yʋʋmd fãa, sẽn na yɩl n tõog n paam rasem a tãab tigis-kãsengã sõss fãa n kelge.
4. A Poll sẽn zĩnd Efɛɛz n kaoos yʋʋm a wãnã, bõe la a ra minim n maandẽ?
4 Yãmb tagsdame t’a Poll sẽn gũ kãsem dãmbã Mile na maan rasem a tãab bɩ a naasã fãa pʋgẽ, bõe la a ra maand n gũudẽ? Sã n da yaa yãmba, bõe la y ra na n maandẽ? (Ges-y Tʋʋm 17:16, 17 wã.) A Poll sẽn yeel Efɛɛz kãsem dãmbã bũmb ningã sõngd-d lame tɩ d bãng rẽ. A goma ne-b yẽ sẽn da minim n maand bũmb ning koe-moonegã wɛɛngẽ hal baa a sẽn da wa n be Efɛɛzã yelle. (Karm-y Tʋʋm 20:18-21.) A Poll sẽn da mi t’a goamã yaa sɩd tɩ ned pa tõe n kɩɩsã yĩnga, a yeela woto: “Yãmb mii mam yel-manesem yãmb sʋk wakat fãa, hal mam sẽn wa Aazi soolem pipi tɩ ta masã . . . Mam kɩsa kasetã [neere, NW ].” Hakɩka, a sɩd ra tʋlla ne a sũur fãa n pids tʋʋmd ning a Zezi sẽn bobl-a wã. Wãn-wãn la a maan rẽ Efɛɛze? Pipi, a ra kõta zʋɩf rãmbã kasetã la a kẽnd zĩis nins a sẽn tõe n paam-b wʋsgã. A Luk wilgame t’a Poll sẽn zĩnd Efɛɛz yʋʋmd 52 n tãag 55 soabã pʋgẽ wã wẽnde, a ra kẽeda zʋɩf rãmbã karen-dotẽ n sõsd ne-b n tõogdẽ tɩ neb tẽed koɛɛgã. La kẽer ‘sũy sẽn diglim tɩ b ka tẽ’ a Poll goama, a bas-b lame n moon neb a taaba. Woto kɩtame t’a tõog n kõ kasetã zʋɩf rãmb la gɛrk rãmb tẽn-kãngã sẽn yalmã pʋgẽ.—Tʋʋ. 19:1, 8, 9.
5, 6. Bõe yĩng tɩ d tõe n yeel tɩ pa kiris-neb la a Poll sẽn moon koɛɛgã zak ne zakã?
5 Yaa sẽn lebg-b kiris-neb rẽ wẽndã kẽer n wa n lebg kãsem dãmb nins a Poll sẽn sõs ne Mile wã. A Poll tẽeg-b-la a sẽn moon koɛɛgã to-to n sõng-bã n yeele: “Mam ka kong tɩ togs yãmb bũmb nins fãa sẽn na n sõng yãmbã ye. La mam ka zoe rabeem tɩ moon koɛɛgã la tɩ zãms yãmb nebã sʋka, la zak ne zak ye.” Rũndã-rũndã, neb kẽer yeelame tɩ ka wã, a Poll gomda a sẽn da tʋgd n kaagd a tẽed-n-taasã b zagsẽ n kengd b raood yell bala. La woto pa sɩd ye. A Poll sẽn bilgd t’a ‘moona koɛɛgã zãma sʋk la zak ne zakã,’ rat n yeelame t’a moona koɛɛgã neb sẽn pa kiris-neba. A Poll yaoolem goamã sɩd wilgda rẽ vẽenega, bala a yeelame t’a “kɩsa kasetã zʋɩf rãmbã la gɛrk rãmbã, tek yam n kos Wẽnnaam sugrã la tẽeb ne tõnd Soaal a Zezi wã wɛɛngẽ.” Vẽenega, a Poll da kõta kasetã sẽn pa-b tẽedbã sẽn na yɩl tɩ b tek yam la b tẽ a Zezi.—Tʋʋ. 20:20, 21, NW.
6 Bãngd a ye sẽn vaees Biiblã sɛb nins b sẽn gʋls ne gɛrkã sõma yeela Tʋʋm 20:20 wã zug woto: “A Poll maana yʋʋm a tãab Efɛɛze. A sẽn yeel bũmb ning verse 26 soabẽ wã wilgdame t’a kaaga zagsã fãa bɩ t’a moona koɛɛgã tẽngã neb fãa la bala. Woto yaa kaset sẽn wilgd tɩ koɛɛgã mooneg zak ne zakã la zamã sʋkã segdame.” Bãngdã sẽn yeel t’a Poll kaaga zagsã fãa wã yaa sɩd tɩ pa sɩd me, yaa vẽeneg t’a Poll da ratame tɩ Efɛɛz kãsem dãmbã ra yĩm a sẽn moon koɛɛgã to-to, la rẽ sẽn wom biis ninsã ye. A Luk yeelame tɩ “Zʋɩf rãmbã ne Gɛrk rãmbã fãa sẽn be Aazi soolmã wʋma Zusoabã koɛɛga.” (Tʋʋ. 19:10) Maana wãn tɩ “nebã fãa” wʋm koɛɛgã Aazi soolmẽ wã, la rẽ tõe n dat n yeelame tɩ tõnd segd n moona koɛɛgã wãn-wãna?
7. Tõe tɩ tũu ne bõe tɩ neb a Poll sẽn pa moon koɛɛgã a toor wa wʋm-a?
7 A Poll sẽn moon zamã zĩisẽ la zak-zakã, neb wʋsg wʋma koɛɛgã. La rẽ yĩnga y tagsdame tɩ sẽn wʋm-bã fãa kell n paa Efɛɛz n pa tol n toeem zĩig leebg yĩng wall n na n pẽneg b neba, pa rẽ bɩ sẽn na yɩl n tɩ zĩnd zĩis bʋrg sẽn kae wa tẽngã pʋgã bɩ? Lae-lae. Rũndã-rũndã, bʋʋm toɛy-toɛy a woto yĩng kɩtame tɩ neb wʋsg toeem zĩisi, la tõe meng tɩ y me toeema zĩig bʋʋm kãensã yĩnga. Sẽn paase, pĩnd wẽndẽ, zĩis a taab neb me kẽnga Efɛɛz leebg wall bʋʋm a taab yĩnga. Tõe tɩ b sega a Poll be, bɩ b kelga a koe-moonegã. Nin-kãens sã n da wa lebg n kuli, b na n maana bõe? Yaa vẽeneg tɩ sẽn sak-b koɛɛgã n lebg tẽedbã na n taas-a-la neb a taaba. Tõe tɩ kẽer yẽ pa sak n lebg tẽedb ye. La b goma bũmb ning b sẽn wʋm Efɛɛzã yelle. Dẽnd woto yɩɩ sabab tɩ b neba, b yags wall b raadens wʋm koɛɛgã la tõe tɩ kẽer sakame. (Ges-y Mark 5:14.) Woto wilgdame tɩ y sẽn moond koɛɛgã neerã tõe n woma bi-bʋse?
8. Tõe tɩ tũu ne bõe tɩ Aazi soolmã fãa neb wʋm sɩdã?
8 A Poll sẽn wa n moond koɛɛgã Efɛɛz pipi wã, a yeelame tɩ ‘kʋɩlen-kãseng n pak yẽ taoor’ tʋʋmd yĩnga. (1 Kor. 16:8, 9) Yaa kʋɩlen-bõe buud la rẽ, la wãn-wãn la a pak-yã? A Poll sẽn kell n moon koɛɛgã Efɛɛzã, koe-noogã taa zĩis wʋsgo. Tẽeg-y tɩ Kolos ne Laodise la Hierapolis yaa tẽns a tãab sẽn da yaa Efɛɛz tẽn-yags sẽn pa pẽ mogrã. A Poll da na zɩ n kaag-b ye. La koe-noogã taa be. A Epafras yaool n da yita be sẽnese. (Kol. 2:1; 4:12, 13) Rẽ yĩnga, yaa Efɛɛz la a Epafras wʋm a Poll koe-moonegã n lebg kiris-ned bɩ? Biiblã pa wilg rẽ ye. La tõe t’a Poll tʋma a Epafras t’a tɩ moon koɛɛgã b soolmẽ wã. (Kol. 1:7) Tõe me tɩ koe-noogã taa tẽns wala Filadɛlfi, Sard la Tiyatiir a Poll sẽn da wa n be Efɛɛzã.
9. a) Bõe la a Poll da rat n maan ne a sũur fãa? b) Yʋʋmd 2009 soabã verse yetame tɩ bõe?
9 Woto fãa kɩtame tɩ Efɛɛz tigingã kãsem dãmb da be bʋʋm n na n deeg a Poll gom-kãensã. A yeel-b-la woto: “Mam ka tẽed tɩ mam yõora yaa bõn-kãseng ne maam ye. Mam sẽn data yaa tɩ mam we n tõog n baas bũmb ninga b sẽn ning mam zug tɩ m maanã, la m maan tʋʋmd ninga Zusoab a Zezi sẽn kõ maam tɩ m togs Wẽnnaam barka koe-noogã [neerã, NW ].” Yaa verse kãngã goamã sẽn kengd raoodã la d yãk yʋʋmd 2009 soabã yĩnga. A yeta woto: ‘Togs-y koe-noogã neere.’—Tʋʋ. 20:24.
D togsda koe-noogã neer rũndã-rũndã
10. Bõe n kɩt tɩ d miẽ tɩ tõnd me segd n togsa koe-noogã neere?
10 Pa tʋm-tʋmdbã bal la b sẽn kõ noor tɩ b moon koɛɛgã nebã n ‘togs koe-noogã neerã’ ye. A Zezi vʋʋgrã poore, a sẽn wa n tigim a karen-biis na maan bãmb 500 Galile n na n sõs ne-bã, a kõ-b-la noor n yeel woto: “Bɩ y kẽng n maan nebã buud fãa tɩ b yɩ mam karen-biisi, n lis bãmb ne Ba la Biiga la Sɩɩg Sõng yʋʋre. La y zãms bãmb tɩ b sak bũmb nins fãa mam sẽn da togs yãmbã.” A Zezi sẽn baas a gomdã to-to wã wilgdame tɩ yaa kiris-nebã fãa la a sẽn tʋm tɩ b moon koɛɛgã. A yeel-b lame yaa: “Gese, mam bee ne yãmb wakat fãa hal tɩ ta wakat sɛɛbo.”—Mat. 28:19, 20.
11. Zĩig zãnga, nebã miime t’a Zeova Kaset rãmbã tʋmda tʋʋm bʋg sẽn tar yõod wʋsgo?
11 Kiris-nebã ket n tũuda no-kãngã, n modgd sẽn na yɩl n ‘togs koe-noogã neer’ ne yẽesem. B sẽn moond koɛɛgã to-to n yɩɩd yaa zak ne zak wa a Poll sẽn da tẽeg Efɛɛz tigingã kãsem dãmbã. A David G. Stewart, Jr. goma misioneer dãmbã tʋʋmd sẽn womd biis ninsã yell sebr b sẽn yiis yʋʋmd 2007 soabã pʋgẽ n yeel woto: “A Zeova Kaset rãmbã sẽn wilgd b tũudmã neb b sẽn tõe n sõs ne nebã b tẽebã zug to-to wã sɩd womda biis wʋsgo. A Zeova Kaset rãmbã wʋsg tʋʋm-nongr yaa wilg nebã bãmb sẽn tẽed bũmb ninsã.” Rẽ womda bi-bʋse? Ad raoã sẽn paase: “Yʋʋmd 1999 soabã pʋgẽ, mam sõsa ne neb Erop soolmã yaang tẽn-bɛd a yiib pʋsẽ. Nin-kãensã bãmb koabg zugu, a 2 n digd a 4 bal n yeel tɩ tũudum ning neb b sẽn boond tɩ Les Saints des derniers jours bɩ ‘Mormon’ rãmbã zoe n wa sõsa ne bãmba. La sẽn yɩɩd neb 70 koabg zug yeelame t’a Zeova Kaset rãmbã zoe n wa sõsa ne bãmb n yɩlem menga.”
12. a) Bõe yĩng tɩ d moond zak-zak d moonegã zĩigẽ n yɩlemdẽ? b) Y mii ned sẽn da pa kelgd koɛɛgã sõma n wa toeem yam tɩ y tõe n togs a kibarã bɩ?
12 Tõe tɩ yãmb soolmẽ wã me, neb wʋsg zoe n kelga a Zeova Kaset rãmbã n yɩlme. La tõe meng tɩ yɩɩ yãmb me n yɩ sabab tɩ koɛɛgã ta-ba. Y sẽn moon zak ne zakã, tõe tɩ y sõsa ne rapa, pagb la kom-bɩɩse. Tõe tɩ y moona “naoor wʋsg” la kẽer baas n pa kelg ye. Sãnda tõe n yɩɩ Biiblã verse bɩ a gomd ning võor wilgr la b sak n kelg koɛɛg-koɛɛg bala. La y tõog n moona neb a taab yẽ sõma tɩ b sake. D sẽn ‘togsd koe-noogã neerã, woto fãa yaa manesem toɛy-toɛy d sẽn yãte. Wa y sẽn mi wã, neb d sẽn moon “naoor ka tɛk” tɩ b pa kelg sõma n yaool n wa toeem sõor waoogame. Tõe tɩ bũmb n maan-b rẽ poore, wall b nin-nongr la bũmb maanẽ tɩ kɩt tɩ b wa sake. Masã, b yaa tõnd saam-biisi. Woto yĩnga, baa y sã n moona neb sẽn pa kaoos tɩ wʋsg pa kelg-y bɩ y ra koms raood ye. D miime tɩ pa nebã fãa n na n sak sɩdã ye. La Wẽnnaam sẽn dat yaa d ket n wɩngd n moond koɛɛgã neer la ne yẽesem.
Tõe n woma biis d poorẽ
13. Wãn-wãn la d koe-moonegã tõe n wom biis tɩ d pa bãnge?
13 A Poll koe-moonegã sẽn wom biis ninsã pa tek a sẽn sõng-b rãmb a toor tɩ b lebg kiris-nebã bal ye. Yaa woto me ne tõnd koe-moonegã rũndã-rũndã. D maoodame n moond zak ne zakã wakat fãa n sõsd ne neb wʋsgo. D moonda d yagse, d tʋmd-n-taase, d karen-bi-taas la d roagdba. Rẽ yĩnga d mii woto sẽn womd biis ninsã fãa bɩ? Sasa ninga, womda tao-tao. La wakat ning me, sɩdã tõe n kaoosa neb kẽer sũyẽ n yaool n wa wom biisi. La baa pa yɩ woto me, d sẽn moon b rãmbã tõe n wa togsa neb a taab d sẽn yeel-bã, d sẽn tẽed bũmb ninsã la d manesem sẽn yɩ to-to ne-bã. B tõe n wa yɩɩ sabab tɩ b taab sak koɛɛgã tɩ b pa bãng ye.
14, 15. Bi-bʋs la saam-biig a ye koe-mooneg wom-yã?
14 D tara kibay sẽn sɩd wilgd rẽ tɩ d tõe n gom a yembr yelle. Yaa a Ryan ne a pag a Mandi sẽn be Etazĩni n vɩ Floriid soolmẽ wã kibare. Daar a yembre, a Ryan paama weer n kõ kasetã ẽnd rao a yembr sẽn yaa a tʋmd-n-taaga, b tʋʋmã zĩigẽ. A Ryan fu-yerdi wã la a sẽn gom to-to wã yɩɩ raoã noog t’a pẽg wʋsgo. B sõsgã pʋgẽ, a Ryan goma kũum vʋʋgrã la bũmb ning sẽn paamd ned a kũum poorã me yelle. Yʋʋmd 2007 yʋʋm-vẽkr kiuugã daar a yembr zaabre, raoã soka a pag a Jodi a sẽn mi bũmb ning a Zeova Kaset rãmbã zugu. A Jodi sẽn da yaa katolikã leokame tɩ yẽ sẽn mi bal yaa tɩ b “moonda koɛɛgã zak ne zaka.” Rẽ poore, a Jodi gʋlsa “Tẽmoin de Zeova” a ordinatɛɛrã pʋgẽ n yã tõnd sit wɛɛbã adɛrse (www.watchtower.org). Woto kɩtame tɩ sẽn na maan kiis a tãab la bala, a paam n karem Biiblã la sõss a taab sẽn yɩ-a noogo.
15 A Jodi ne a Mandi sẽn yaa logto-pogsã, b wa n sega taaba. A Jodi soka a Mandi sogsg wʋsg t’a leoke. Rẽ zugẽ, b sõsa naoor wʋsg Biiblã zug t’a Jodi wa sak tɩ b na n wat n zãmsd-a Biiblã. Pa yã n kaoos la a sɩng Rĩungã Roogẽ kẽnd ye. Zĩ-likr kiuug pʋgẽ, a Jodi lebga koe-moond sẽn pa reeg lisgu, la yʋʋmd 2008 wao-fugdg kiuugã pʋgẽ, a reega lisgu. A yeela woto: “Mam sẽn bãng sɩdã, masã m vɩɩmã tara võor tɩ m sũur noome.”
16. Bõe la Floriid saam-biig kibar wilgd d sẽn modgd n togsd koɛɛgã neerã wɛɛngẽ?
16 A Ryan da pa mi t’a sẽn kõ raoã kasetã na n wa yɩɩ sabab tɩ ned a to wa bãng sɩdã ye. La yaa vẽeneg t’a wa n bãngame t’a sẽn modgd ‘n togsd koɛɛgã neerã’ womda biisi. La tõe tɩ y moonda zak ne zaka, y tʋʋmã zĩisẽ, y lekoll dãmbẽ la sasa a taab tɩ tũud ne rẽ tɩ neb a taab wʋmd koe-noogã tɩ y pa miẽ ye. Wa a Poll sẽn da pa mi a koe-moonegã sẽn na n wom biis nins fãa Aazi soolmẽ wã, tõe tɩ yãmb me pa tõe n bãng y koe-moonegã bi-sõma fãa ye. (Karm-y Tʋʋma 23:11; 28:23.) La tara yõod wʋsg tɩ y ket n moond koe-noogã neere!
17. Bõe la yãmb tʋll ne y sũy fãa n maan yʋʋmd 2009 soabã pʋgẽ?
17 Yʋʋmd 2009 soabã pʋgẽ, bɩ d fãa modg n moon koɛɛgã zak ne zak la ne soay a taaba. Rẽ, d me wat n tõog n yeela wa a Poll woto: “Mam ka tẽed tɩ mam yõorã yaa bõn-kãseng ne maam ye. Mam sẽn data yaa tɩ mam we n tõog n baas bũmb ninga b sẽn ning mam zug tɩ m maanã, la m maan tʋʋmd ninga Zusoab a Zezi sẽn kõ maam tɩ m togs Wẽnnaam barkã koe-noogã [neere, NW ].”
Wãn to la y na n leoke?
• Pipi kiris-nebã wakatẽ, wãn-wãn la tʋm-tʋmd a Pɩɛɛr ne a Poll la neb a taab togs koe-noogã neere?
• Bõe yĩng tɩ d koe-moonegã tõe n wom n yɩɩg tõnd sẽn da tagsde?
• Yʋʋmd 2009 soabã verse la bʋgo, la bõe yĩng tɩ y tẽed t’a zemsame?
[Zãmsgã sogsgã]
[Goam sẽn tar pãngã, seb-neng 27]
Yʋʋmd 2009 soabã verse yeta woto: ‘Togs-y koe-noogã neere.’ —Tʋʋma 20:24.