Ad a Zeova tʋm-tʋmd ning a sẽn nong ne a sũur fãa wã!

“Ad mam tʋm-tʋmdã . . . mam sẽn nong ne m sũur fãa zãngã!”—EZAI 42:1.

1. A Zezi kũumã tẽegr sẽn kolgdã, bõe la b sagend Wẽnnaam nin-buiidã tɩ b maane, la bõe yĩnga?

KIRISTÃ kũumã tẽegr sẽn kolgda yĩnga, yaa sõma tɩ Wẽnnaam nin-buiidã tũ tʋm-tʋmd a Poll sẽn sagl-b tɩ b ‘ges a Zezi sẽn yaa b tẽebã sɩngd la a taasdã.’ A Poll paasa woto: “Bɩ y tags namsg ninga bãmb sẽn sakã yelle, yel-wẽnã rãmb sẽn yɩ wãn n kɩɩs bãmbã, tɩ yãmb da yɛ la tɩ yãmb sũyã da sãam” ye. (Heb. 12:2, 3) Kiris-nebã fãa, sẽn paam-b vʋʋsem sõngã zaeebã, la piis a taabã sã n bʋgs Kiristã sẽn yɩ sakd a vɩɩmã tõre, n wa baas n sak n ki tɩ yɩ maoongã zugu, na n sõng-b lame tɩ b kell n maan a Zeova raabã n “da yɛ” ye.—Ges-y Galat dãmba 6:9 wã.

2. Bãngr-goam nins no-rɛɛs a Ezai sẽn togs Wẽnnaam bi-riblã zugã na n sõngd-d lame tɩ d maan bõe?

² A Zeova ra kɩtame tɩ no-rɛɛs a Ezai togs bãngr-goam toɛy-toɛy a bi-riblã zugu. Bãngr-gom-kãensã na n sõnga tõnd tɩ d tags Kirist Zezi * sẽn yaa “tõnd tẽebã sɩngd la a taasdã” yell neere. Bãngr-gom-kãens gomda a Zezi sẽn da na n yɩ ned ning buudã yelle, a namsgã la Wẽnnaam sẽn na n wa waoog-a n kɩt t’a lebg tõnd rĩm la d fãagdã yelle. B vaeesg na n kɩtame me tɩ d wʋm a Zezi kũumã tẽegr võor sõma n paase. Tẽegrã na n yɩɩ tʋʋl-nif kiuugã rasem a 9 wã sẽn yaa lamusã daare, wĩndgã lʋɩɩs poore.

B bãnga tʋm-tʋmdã

3, 4. a) A Ezai sebrã pʋgẽ, b sã n gomd “tʋm-tʋmd” yelle, nong n yaa ãnd yell la b gomda? b) Bõe la Biiblã yeel tɩ kɩt tɩ d bãng tʋm-tʋmd ning yell b sẽn gomd Ezai sak 42, 49, 50, 52, la 53 wã sẽn yaa a soaba?

³ A Ezai sebrã pʋgẽ, d yãta gom-bil ning b sẽn lebg tɩ ‘tʋm-tʋmdã’ naoor wʋsgo. Zĩis kẽere, yaa no-rɛɛsã meng la b boond woto. (Ezai 20:3; 44:26) Sasa ning me, yaa Israɛll nin-buiidã gilli, wall a Zakoob la b boond woto. (Ezai 41:8, 9; 44:1, 2, 21) La a Zeova tʋm-tʋmd ning yell b sẽn gomd Ezai sak 42, 49, 50, 52 la 53 wã yaa ãnda? Biiblã sɛb nins b sẽn gʋls ne gɛrkã pʋgẽ, b wilgda tʋm-tʋmd kãng sẽn yaa ned ningã vẽenega. Vʋʋsem sõngã sẽn da wa n kɩt tɩ koe-moond a Filip na n tɩ sõng Etiopi balem-naabã, Tʋʋm sebrã wilgame t’a ra karemda bãngr-gom-kãensã a yembre. Balem-naabã sẽn karem bãngr-gomd ning sẽn be Ezai 53:7, 8 wã, a soka a Filip woto:  “Togs maam. Wẽnnaam no-rɛɛsa gomda ãnda yell woto? Yaa bãmb meng yell bɩ, bɩ ned a to?” La a Filip yɩɩ tao-tao n bilg-a tɩ yaa Mesi wã sẽn yaa a Zezi wã yell la a Ezai sẽn gomdã.—Tʋʋ. 8:26-35.

⁴ A Zezi sẽn da wa n yaa bi-pɛɛlga, vʋʋsem sõngã kɩtame tɩ nin-tɩrg a ye yʋʋr sẽn boond t’a Simeõ yeel tɩ biig a Zezi na n ‘yɩɩ vẽenem sẽn vẽnegd bu-zẽmse,’ wa b sẽn da pĩnd n togs Ezai 42:6 la 49:6. (Luk 2:25-32) Sẽn paase, Ezai 50:6-9 wã pʋgẽ, b pĩnd n wilga b sẽn da na n yaal a Zezi la b nams-a to-to a yõkrã daar yʋngã. (Mat. 26:67; Luk 22:63) Yʋʋmd 33 Pãntekotã loogr poore, tʋm-tʋmd a Pɩɛɛr wilgame t’a Zeova tʋm-tʋmdã yaa a Zezi. (Ezai 52:13; 53:11; karm-y Tʋʋma 3:13, 26.) La bõe la bãngr-gom-kãensã sẽn gomd Mesi wã yellã tõe n sõng-d tɩ d bãnge?

A Zeova zãmsa a tʋm-tʋmdã

5. Zãms-bʋg la tʋm-tʋmdã paam-yã?

⁵ Bãngr-gomd a ye la a Ezai togs Wẽnnaam tʋm-tʋmdã zugu, tɩ wilgd zems-n-taar ning sẽn da be a Zeova ne a bi-riblã sʋka, a sẽn da wa n nan ket saasẽ wã. (Karm-y Ezai 50:4-9.) Tʋm-tʋmdã meng wilgame t’a Zeova ra zãmsd-a lame. A yeela woto: “Yibeoog fãa, bãmb yokda mam tʋbre, tɩ m kelg wa karen-biiga.” (Ezai 50:4) Wakat kãens fãa, a Zeova tʋm-tʋmdã ra kelgda a Ba wã la a rɩkd a mak-sõngã, n lebg a karen-biig sẽn sakd-a. Ad a sẽn da paam tɩ bũmb fãa naandã ra zãmsd-a wã yɩɩ bark tɛkẽ!

6. Bõe la tʋm-tʋmdã yeelẽ tɩ wilgdẽ t’a sakda a Ba wã zãng-zãnga?

⁶ Bãngr-gomd kãngã pʋgẽ, tʋm-tʋmdã boola a Ba a Zeova tɩ “Zusoab a Wẽnnaam.” (Ezai 50:5) Woto wilgdame tɩ tʋm-tʋmdã ra miime t’a Zeova la yĩngr la tẽng naaba. Sẽn na yɩl n wilg t’a sakda a Ba wã zãng-zãnga, a yeela woto: “Zusoab a Wẽnnaam yoka mam tʋbre, la mam ka tõdg ye. Mam ka leb poorẽ ye.” (Ezai 50:5) Ãndũniyã la pipi ninsaalã naaneg sasa t’a ra be a Zeova ‘sɛɛgẽ wa tʋʋm mita.’ A ra bee ne a Zeova n “tar sũ-noog wakat fãa.” Sẽn paase, a sũur da nooma ne dũniyã Wẽnnaam sẽn naanã, la ne ninsaalbã.—Yel. 8:22-31.

7. Bõe n wilgd tɩ tʋm-tʋmdã namsgã fãa pʋgẽ, a ra kɩsa sɩd t’a Ba wã bee ne-a?

⁷ Zãmsg ning tʋm-tʋmdã sẽn paamã, n paas a sẽn da nong ninsaalbã sõng-a lame t’a tõog zu-loees la namsg a sẽn wa n wa tẽng zugã. Baa nams-toos sasa, a kell n maana a Ba wã raab ne a sũur fãa, a sẽn da nong rẽ wã yĩnga. (Yɩɩl 40:9; Matɩe 26:42; Zã 6:38) A Zezi namsgã fãa pʋgẽ, a kell n kɩsa sɩd t’a Ba wã sũur nooma ne-a, la t’a bee ne-a. Wa b sẽn da pĩnd n togs a Ezai sebrã pʋgẽ wã, a Zezi yeela woto: “Sẽn kõt-a maam bʋʋmã pẽnegdame. Yaa ãnda n na n bʋ ne maam? . . . Gese, Zusoab a Wẽnnaam sõngda maam.” (Ezai 50:8, 9) A Ezai bãngr-gomd a to n wilgd t’a Zeova sɩd sõnga a tʋm-tʋmdã a tẽng zug tʋʋmdã fãa pʋgẽ.

Tʋm-tʋmdã tẽng zug tʋʋmdã

8. Bõe n wilgd tɩ yaa a Zezi la a Zeova “nin-tũusdg” ning yell b sẽn pĩnd n gom Ezai 42:1 pʋgẽ wã?

⁸ Biiblã wilgda tõnd bũmb ning sẽn maan a Zezi lisgã reegr sasa yʋʋmd 29 soabã pʋgẽ wã. Kibarã yeta woto: “Sɩɩg Sõng . . . siga bãmb zugu. La koɛɛg yii yĩngr n yeele: ‘Fo yaa mam bi-nongre. Mam nonga foom ne m sũur fãa zãnga.’ ” (Luk 3:21, 22) A Zeova sẽn yeel woto wã, a wilga a “nin-tũusdgã” bɩ ned ning a sẽn yãk t’a Ezai ra pĩnd n gom a yellã sẽn yaa ned ningã vẽenega. (Karm-y Ezai 42:1-7.) A Zezi koe-moonegã sasa, a maana bũmb nins fãa b sẽn da pĩnd n wilg t’a na n maaname wã kɛpɩ. A Matɩe evãnzillã pʋgẽ, a lebs n dɩka Ezai 42:1-4 goamã n wilg tɩ pidsa a Zezi zugu.— Mat. 12:15-21.

9, 10. a) Wãn-wãn la a Zezi pids Ezai 42:3 goamã a koe-mooneg sasa? b) Wãn to la a Zezi bʋ bʋʋd ne sɩda, la wakat bʋg la a na n kɩt tɩ “tɩrlem zĩnd dũniyã zugu”?

⁹ Zʋɩf rãmbã tũudum taoor dãmb da pa nand zʋɩf rãmb nins sẽn da yaa talsã ye. (Zã  7:47-49) B ra paoogd-b lame, tɩ kɩt tɩ nin-kãensã ra wõnd ‘tã-wĩig sẽn gõde,’ bɩ ‘fɩtl peend’ bugum sẽn dat n ki. La a Zezi yẽ ra zoeta talsã la sẽn da namsd-bã nimbãanega. (Mat. 9:35, 36) A yeela nin-kãensã woto: “Bɩ y wa mam nengẽ, yãmb fãa sẽn yɛ la sẽn tʋkd zɩɩb sẽn yaa zɩsgo, la mam na kõ yãmb vʋʋsgo.” (Mat. 11:28) Sẽn paase, a Zezi bʋʋ “bʋʋd ne sɩda,” a sẽn zãms nebã a Zeova raabã tɩ b bãng sõma la wẽng n bakã. (Ezai 42:3) A wilgame me tɩ b segd n tũu Wẽnnaam tõogã ne zemsgo, la ne nimbãan-zoeere. (Mat. 23:23) A Zezi moona koɛɛgã tals la ra-kãag rãmb n pa bake, tɩ rẽ me wilgdẽ t’a nonga tɩrlem.—Mat. 11:5; Luk 18:18-23.

¹⁰ A Ezai ra pĩnd n wilgame me t’a Zeova “nin-tũusdgã” na n kɩtame tɩ “tɩrlem zĩnd dũniyã zugu.” (Ezai 42:4) A sẽn yaa Mesi la Wẽnnaam Rĩungã rĩmã, ka la bilfu, a sɩd na n sãama ãdem-biisã goosneemã rãmbã fãa, tɩ yẽ goosneema wã rɩ naam ne tɩrlem. A na n lugla dũni-paalga, tɩ tɩrlem zĩnd a zugu.—2 Pɩɛ. 3:13; Dan. 2:44.

“Vẽenem” la “pʋlenga”

11. Wãn-wãn la a Zezi yɩ “dũniyã fãa vẽenem” pipi kiris-nebã wakate, la wãn to la a ket n yaa “dũniyã fãa vẽenem” rũndã-rũndã?

¹¹ A Zezi sɩd yɩɩ “dũniyã fãa vẽenem” tɩ pids Ezai 42:6 sẽn yetã. A koe-moonegã sasa, yɩɩ zʋɩf rãmbã la a reng n vẽnege, n sõng-b tɩ b bãng Wẽnnaam. (Mat. 15:24; Tʋʋ. 3:26) A Zezi yeela woto: “Mam yaa dũniyã vẽenem.” (Zã 8:12) A sɩd yɩɩ vẽenem n kõ zʋɩf rãmbã la buud a taabã. Pa a sẽn sõng-b tɩ b bãng Wẽnnaamã yĩng bal ye. Yaa a sẽn dɩk a vɩɩmã sẽn zems zãngã me n kõ tɩ yɩ maoong ãdem-biisã fãa yĩngã. (Mat. 20:28) A vʋʋgrã poore, a kõ a karen-biisã noor tɩ b yɩ a kaset rãmb “dũniyã tɛk fãa.” (Tʋʋ. 1:8) A Poll ne a Barnabas sẽn wa n moond koɛɛgã, b wilgame tɩ dũniyã fãa vẽenem bɩ “bu-zẽms vẽenemã” yell b sẽn da gomã yaa koe-noog ning bãmb sẽn moond sẽn pa-b zʋɩf rãmbã. (Tʋʋ. 13:46-48; ges-y Ezai 49:6.) A Zezi saam-biis nins sẽn paam vʋʋsem sõngã zaeeb n ket tẽng zugã ne b tũud-n-taasã ket n taasda vẽenem kãngã zĩig fãa, n sõngd nebã tɩ b tẽed a Zezi sẽn yaa “dũniyã fãa vẽenemã.”

12. Wãn-wãn la a Zeova kɩt t’a tʋm-tʋmdã yɩ “pʋleng” nebã fãa yĩnga?

¹² Bãngr-gomd kãng pʋgẽ me, a Zeova yeela tʋm-tʋmd ning a sẽn yãkã woto: “Mam gũuda foom. La mam dɩka foom n maan pʋleng ne nebã fãa tɩ f yɩ dũniyã fãa vẽenem.” (Ezai 42:6) A Sʋɩtãan maana a sẽn tõe fãa n na n kʋ a Zezi t’a ra tõog n pids a tʋʋmdã ye. La a Zeova gũu a Zezi yõorã n tãag wakat ning a sẽn da tog n ki wã. (Mat. 2:13; Zã 7:30) A kũumã poore, a Zeova vʋʋg-a lame n kɩt t’a lebg “pʋleng” nebã fãa yĩnga. Wẽnnaam sẽn maan woto wã wilgda vẽeneg t’a tʋm-tʋmdã na n kell n yɩɩ “dũniyã fãa vẽenem,” n sõng nebã tɩ b bãng yẽ a Wẽnnaam.—Karm-y Ezai 49:8, 9. *

13. A Zezi koe-moonegã sasa, wãn-wãn la a kɩt tɩ “neb nins sẽn be lik pʋgẽ wã” paam b mense, la wãn to la a ket n maand woto rũndã-rũndã?

 ¹³ Wa a Zeova sẽn da yeelã, a tʋm-tʋmdã na n ‘puka zoens nin la a yiis yembs bokẽ, la a yiis neb nins sẽn be lik pʋgẽ wã bi-bees roogẽ.’ (Ezai 42:7) A Zezi sẽn wa n tʋmd a tʋʋmdã tẽng zugã, a sɩd maana woto kɛpɩ. Bala a wilga nebã vẽeneg tɩ b bãng tɩ tũudmã rãmb sẽn zãmsd-b minimd ninsã pa sɩda, la a togs-b Rĩungã koe-noogã. (Mat. 15:3; Luk 8:1) A sẽn maan woto wã, a sõnga zʋɩf rãmb nins sẽn sak n lebg a karen-biisã tɩ b paam b mens ne ziri tũudmã zãmbã. (Zã 8:31, 32) A Zezi maana woto me n sõng neb milyõ rãmb sẽn pa zʋɩf rãmba, tɩ b paam b mens ne tũudmã zãmbo. A tʋmã a karen-biisã tɩ b ‘kẽng n maan nebã buud fãa tɩ b yɩ a karen-biisi,’ la a yeel-b woto: “Mam bee ne yãmb wakat fãa hal tɩ ta wakat sɛɛbo.” (Mat. 28:19, 20) A Zezi Kirist bee saasẽ, la a geta koe-noogã sẽn moond dũniyã gill zugã yelle.

A Zeova waooga “tʋm-tʋmdã”

14, 15. Bõe yĩng t’a Zeova zẽk a tʋm-tʋmdã, la wãn to la a zẽk-a?

¹⁴ Bãngr-gomd a to sẽn gomd tʋm-tʋmdã sẽn yaa Mesi wã yell pʋgẽ, a Zeova yeela woto: “Gese, mam tʋm-tʋmdã na n tõogame, yẽ na n yikame, b na n zẽk-a lame, la a na n yɩɩ kãseng wʋsgo.” (Ezai 52:13) A Zeova zẽka a bi-riblã, a sẽn kell n sak tɩ sɩd yaa yẽ a Zeova n segd n yɩ yĩngr la tẽng naaba, la a kell n sak-a hal n tãag a kũumã yĩnga.

¹⁵ Tʋm-tʋmd a Pɩɛɛr goma a Zezi yell n yeel woto: “Bãmb kẽnga [saasẽ] n tɩ be Wẽnnaam dɩtgo, la malɛk rãmbã ne pãn-soaadbã la pãens rãmbã sakda bãmba.” (1 Pɩɛ. 3:22) Tʋm-tʋmd a Poll me yeela woto: “B sika b meng n sak n ki, hal n ki kũum [da-luka, NW ] zugu. Yaa woto yĩng me n kɩt tɩ Wẽnnaam waoog bãmb ne waoogr sẽn yaa kãsenga, n kõ bãmb yʋʋr sẽn yɩɩd yʋyã fãa, hal tɩ ne a Zezi yʋʋre, dũmã fãa sẽn be yĩngr ne sẽn be tẽngã zugu, la sẽn be tẽngã pʋgẽ wã na n yĩgimdame, la tɩ zɛlmã fãa na n kɩsa kaset t’a Zezi Kirist yaa Zusoaba, tɩ yɩ tõnd Ba a Wẽnnaam waoogre.”—Fil. 2:8-11.

16. Wãn-wãn la b zẽk a Zezi t’a “yɩ kãseng wʋsg” yʋʋmd 1914 soabã, la rẽ tɛka, bõe la a maan-yã?

¹⁶ Yʋʋmd 1914 soabã, a Zeova pʋd n zẽka  a Zezi n paase. A sẽn kɩt t’a lebg a Rĩungã rĩmã, a kɩtame t’a “yɩ kãseng wʋsgo.” (Yɩɩl 2:6; Dan. 7:13, 14) Wakat kãng tɛka, Kiristã ‘rɩta naam a bɛɛbã sʋka.’ (Yɩɩl 110:2) A reng n zaba ne a Sʋɩtãan ne a zĩn-dãmbã n tõog-ba, n dig-b tɩ b sig tẽngã zugu. (Wil. 12:7-12) Rẽ poore, a tʋma tʋʋmd sẽn kɩt tɩ b boond-a tɩ Sirus kãsenga. A fãaga a saam-biis nins sẽn paam vʋʋsem sõngã zaeeb n ket tẽngã zugã, n yiis-b “Babilon kãsengã” yembdẽ. (Wil. 18:2; Ezai 44:28) A gesame tɩ b moon koɛɛgã dũniyã gill zugu, n sõng tɩ b tigs a saam-biis nins sẽn paam zaeebã “sẽn kellã” kẽere, tɩ rẽ poor tɩ b tigimd neb milyõ rãmb sẽn sõngd nin-kãensã a sẽn boond tɩ “bãg-bilã.”—Wil. 12:17; Zã 10:16; Luk 12:32, NW.

17. D sẽn lebg n vaees a Ezai sebrã verse nins sẽn gomd “tʋm-tʋmdã” yell sõs-kãngã pʋgẽ wã, bõe la d bãng-yã?

¹⁷ Yaa vẽeneg tɩ d sẽn lebs n vaees a Ezai sebrã gom kãensã b sẽn da pĩnd n togsã, kɩtame tɩ d maneg n nong Kirist Zezi sẽn yaa d rĩm la d fãagdã. A sẽn kell n sak a Ba wã raab a tẽng zug tʋʋmdã sasa wã wilgdame tɩ zãmsg ning a sẽn paam a sẽn da wa n nan be ne-a saasẽ wã sɩd yɩɩ sõma. A mengã sẽn moon koɛɛgã to-to la a ket n get koɛɛgã mooneg yell hal n tãag rũndã wã wilgdame t’a sɩd yaa “dũniyã fãa vẽenem.” Sõsg ning sẽn pʋgdã pʋgẽ, d na n vaeesa bãngr-gomd a to sẽn wilgd tɩ tʋm-tʋmdã sẽn yaa Mesi wã ra na n namsame la a ki tõnd yĩnga. A kũumã tẽegr sẽn kolgdã, yaa sõma tɩ d maag d mens n “tags” rẽ yell neere.—Heb. 12:2, 3.

[Tẽngr not rãmbã]

Yãmb tẽrame bɩ?

• “Tʋm-tʋmd” ning yell a Ezai sẽn da pĩnd n gomã yaa ãnda, la bõe n kɩt tɩ d mi rẽ?

• Zãms-bʋg la “tʋm-tʋmdã” paam a Zeova nengẽ?

• Wãn to la a Zezi yaa “dũniyã fãa vẽenem”?

• Wãn to la a Zeova zẽk “tʋm-tʋmdã”?

[Zãmsgã sogsgã]

[Foto, seb-neng 21]

A Filip wilga vẽeneg tɩ “tʋm-tʋmd” ning yell a Ezai sẽn gomã yaa a Zezi sẽn yaa Mesi wã

[Foto, seb-neng 23]

Tʋm-tʋmd ning a Zeova sẽn yãkã kʋma talsã la sẽn namsd-bã nimbãanega

[Foto, seb-neng 24]

A Zezi Ba wã zẽk-a lame la a kɩt t’a lebg a Rĩungã rĩma