‘Wa tũ maam’
‘Wa tũ maam’
“Ned sã n dat n tũ maam, bɩ a kɩɩs a meng raabo, n dɩk a kũum [da-luk, NW] daar fãa n tũ maam.”—LUK 9:23.
1, 2. a) Bool-bʋg la a Zezi taas nebã fãa? b) Bõe la yãmb maand n wilgdẽ tɩ y saka a Zezi boollã?
A ZEZI koe-moonegã baasg sẽnese, a ra wa n moonda koɛɛgã Zʋrdẽ kʋɩlgã rʋʋlle, Peere sẽn be Zida soolmã nug-rɩtgã sẽnese. La daar a yembre, bi-bɩɩg n kolg-a n sok n na n bãng a sẽn segd n maan bũmb ning n paam vɩɩm sẽn pa satã. A Zezi sẽn sok-a n mik t’a sɩng n tũuda a Moiiz Tõogã, a yeel-a-la woto: “Kẽng n koos bũmb nins fo sẽn tarã n kõ naong rãmba, la fo na paam paoong arzãn pʋga. La wa n tũ maam.” (Mark 10:21) Ad zu-noog tek woto! Yãmb we n tags b sẽn na n bool yãmb tɩ y wa tũ a Zezi sẽn yaa Wẽnnaam sẽn ka to wã biigã!
2 Bi-bɩ-kãngã tõdgã boollã, la neb a taab yẽ sakame. Sẽn deng t’a Zezi bool bi-bɩɩgã, a ra yeela a Filip me woto: ‘Wa tũ maam.’ (Zã 1:43) A Filip saka a Zezi boollã n wa paam n lebg a tʋm-tʋmda. Rẽ poore, a Zezi boola a Matɩe tɩ yẽ me sake. (Mat. 9:9; 10:2-4) Daar a to me, a Zezi yeela woto: “Ned sã n dat n tũ maam, bɩ a kɩɩs a meng raabo, n dɩk a kũum [da-luk, NW ] daar fãa n tũ maam.” (Luk 9:23) Woto wilgda vẽeneg tɩ yaa neb nins fãa sẽn nong tɩrlmã la a Zezi boond tɩ b wa tũ-a. Rẽnd ned ning fãa sẽn dat tõe n tũu a Zezi. La rẽ yĩnga yãmb datame bɩ? Tõnd sʋkã, neb wʋsg zoe n saka a Zezi boollã, la d moonda koɛɛgã n taasd bool-kãngã neb a taab me.
3. Bõe n tõe n sõng-d tɩ d ra bas a Zezi tũubu?
3 Bʋko, neb kẽer sẽn da sɩng Biiblã zãmsg wa n basame. La bilf-bilfu, b wa n tolg n basa a Zezi tũubu. (Heb. 2:1) Bõe n tõe n sõng tõnd tɩ d ra wa maan wa nin-kãensã? D segd n soka d mens woto: ‘Bõe n kɩt tɩ mam yãk yam n na n tũ a Zezi? La tũ a Zezi rat n yeelame tɩ bõe?’ Sogs-kãensã b yiibã leoor sã n be d yamẽ, na n sõng-d lame tɩ d kell n pa so-sõngã d sẽn yãka zugu, la na n kɩtame me tɩ d tõog n sõng neb a taab tɩ b tũ a Zezi.
Bõe yĩng tɩ d segd n tũ a Zezi?
4, 5. Bõe yĩng tɩ yaa a Zezi n sɩd tõe n yɩ tõnd naaba?
4 Yelbũnã sebr pʋgẽ, b yeela woto: “Yaa Zusoabã n wilgd ned sore. Ninsaal na n yɩɩ wãn n bãng a sore?” (Yel. 20:24) Ãdem-biisã sẽn be tẽng zug tɛk n tãag rũndã, b yɛlã fãa wilgdame tɩ gom-kãensã yaa sɩd fasɩ. Ninsaalbã sẽn yaa yel-wẽn-maandbã sɩd pa tõe n dɩ naam taab zut tɩ zems ye. Tõnd sakame n na n tũ a Zezi, bala d bãngame tɩ ned a to ka be n tõe n yɩ tõnd naab tɩ zems ye. Ges-y bʋʋm kẽer sẽn kɩt tɩ sɩd yaa yẽ a ye bal n tõe.
5 Pipi bʋʋmã yaa t’a Zeova meng n yãk a Zezi t’a yaa Mesi la sor-wilgda. Rẽ yĩnga pa vẽeneg tɩ yaa d naandã bal n mi ned ning sẽn tõe n soog tõnd tɩ yɩ sõma n yɩɩd sɩda? Bʋʋm a yiib-n-soaba, yaa t’a Zezi tara zʋg-sõma toor-toor sẽn kɩt tɩ d nong-a, la d rat n wõneg-a. (Karm-y Ezai 11:2, 3.) A yaa mak-sõng sẽn ka to n kõ tõndo. (1 Pɩɛ. 2:21) Tãab-n-soaba, a Zezi geta neb nins sẽn tũud-a wã yell sõma. A sẽn sak n ki b yĩngã sɩd wilga rẽnda. (Karm-y Zã 10:14, 15.) A Zezi wilgda tõnd d sẽn tõe n maan to-to me n paam sũ-noog rũndã-rũndã la d wa paam vɩɩm sẽn tar bark beoog daare, tɩ wilgdẽ t’a yaa pe-kɩɩm-sõngo. (Zã 10:10, 11; Wil. 7:16, 17) Bʋʋm kãensã fãa la b taab yĩnga, d bãnga yam d sẽn sak n na n tũu a Zezi wã. La tũ a Zezi rat n yeelame tɩ bõe?
6. Tũ a Zezi baoodame tɩ d maan bõe?
6 Pa d sã n boond d mens tɩ kiris-neb bal la wilgd tɩ d sɩd tũuda a Zezi ye. Rũndã-rũndã, sẽn yɩɩd neb milyaar a yiib n yet tɩ b yaa kiris-neba, la b tʋʋmã yaool n wilgda vẽeneg tɩ b yaa “tʋʋm wẽns maandba.” (Karm-y Matɩe 7:21-23.) Ned sã n wilg t’a rat n tũ a Zezi, d sõngda a soab t’a bãng tɩ neb nins sẽn sɩd tũud Kiristã modgda daar ne a to fãa n tũud Kiristã sẽn yeel la a maan bũmb ninsã. Sẽn na yɩl n wilg tũ Kiristã daar fãa wã sẽn dat n yɛɛlga, d na n vaeesa yɛl kẽer d sẽn mi a Zezi zugu.
Yɩ-y yam dãmb wa a Zezi
7, 8. a) Yam yaa bõe, la bõe n kɩt t’a Zezi ra yaa yam-kãseng soaba? b) Bõe la a Zezi maan tɩ wilgdẽ t’a yaa yam soaba, la wãn to la d tõe n dɩk a togs-n-taare?
7 A Zezi talla zʋg-sõma wʋsgo. La d na n goma a naas yell bala: A yamã, a sik-m-mengã, a yẽesmã la a nonglmã. D reng n gom a yamã yelle: Rat n yeel t’a sẽn da tõe tɩ bũmb fãa pʋgẽ bɩ a rɩk a bãngrã la a sẽn wʋmd yɛlã võor to-to n tʋmã. Tʋm-tʋmd a Poll yeelame tɩ yam ne yam-vẽnegr fãa solga Kirist pʋgẽ. (Kol. 2:3) La yɛ la a Zezi paam yam-kãnga? A meng yeela woto: “Yaa m Ba sẽn zãms maam bũmb ninga la m gomda.” (Zã 8:28) A Zezi yamã yita a Zeova nengẽ. Rẽ n kɩt t’a sẽn maan bũmb fãa tɩ yɩ sõma wã pa ling tõnd ye.
8 Wala makre, a Zezi tõog n yãka a sẽn na n maan bũmb ning a vɩɩmã pʋgẽ wã tɩ zems kɛpɩ. A pa tʋlg n na n bao teed wʋsg ye. Sẽn da pak-a n yɩɩd yaa Wẽnnaam daabã maanego. A rɩka a sẽkã la a pãngã fãa n tʋm Wẽnnaam Rĩungã yĩnga. Tõnd me rɩkda a Zezi mak-sõngã, n talld ‘nif sẽn yaa sõma,’ rat n yeel tɩ d pa baood teed wʋsg sẽn pa tɩlae ne-do, tɩ b yell gesg rɩkd sẽk la yaamsd ned ye. (Mat. 6:22) Sẽn na yɩl n tõog n moon koɛɛgã wʋsgo, kiris-neb kẽer basa yɛl b sẽn da maande, la b boog b teedo. Woto kɩtame tɩ sãnda tõog n lebg so-pakdba. Yãmb me sã n maana woto, y seka pẽgr wʋsgo. D sã n sɩd lʋɩɩsd Wẽnnaam Rĩungã taoore, kõt-d-la sũ-noog wʋsgo, la kɩtdẽ tɩ d neẽ tɩ d vɩɩmã tara yõodo.—Mat. 6:33.
Yɩ-y sik-m-mens rãmb wa a Zezi
9, 10. Bõe la a Zezi maanẽ tɩ wilgdẽ t’a yaa sik-m-meng soaba?
9 Masã, bɩ d gom a Zezi sik-m-mengã yelle. B sã n kõ ninsaalbã naam, naoor wʋsgo, b wat n tagsdame tɩ b yɩɩda b taabã. La a Zezi pa maan woto baa bilf ye! Baa ne a sẽn tar tʋʋm-kãsems a Zeova raabã pidsg pʋgẽ wã, a zɩ n zẽk a meng baa bilf ye. Tõnd me segd n yɩɩ sik-m-mens rãmb wa a Zezi. Tʋm-tʋmd a Poll yeela woto: “Bɩ y paam yam ninga Kirist Zezi sẽn da tarã. Bãmb basa b naam n lebg wa yamba, n dɩk yĩng wa ninsaala.” (Fil. 2:5, 7) A Poll gomdã rat n yeelame tɩ bõe?
10 A Zezi reng n zĩnda ne a Ba wã saasẽ n tall ziir bɩ naam wʋsgo, la a wa n sak n basa rẽ fãa “n lebg wa yamba.” Wẽnnaam dɩka a Zezi vɩɩmã n ning zʋɩf poak sẽn da nan pa mi rao pʋgẽ, t’a zĩnd be kiis a wae, hal tɩ b wa rog-a t’a yɩ bi-pɛɛlg sẽn pa tõe n maan fʋɩ ye. B yẽga a Zezi a ba-wubdg a Zozɛf sẽn yɩ ra-wãad t’a nug ra pa zãadã zakẽ. Be la a zĩnd a yãadmẽ n tãag a bɩʋʋngo. A Zezi pa tall yel-wẽnd ye. La a kell n saka a roagdbã sẽn da yaa koangdbã. (Luk 2:51, 52) Ad sik-m-meng sɩd tek woto!
11. Wãn to la d tõe n wilg tɩ d yaa sik-m-mens rãmb wa a Zezi?
11 D tõe n yɩɩ sik-m-mens rãmb wa a Zezi, d sã n sakd n tʋmd tʋʋm sẽn wõnd paoogda neda. Wala makre, koe-moonegã. Neb kẽer tõe n getame tɩ koɛɛgã mooneg paoogda neda. Sẽn yɩɩd fãa, nebã sã n yaand-ba, n kɩɩsd-b la b pa rat n kelge. La d sã n yaool n nangd pãng ne tʋʋm-kãngã, d sõngda nebã sẽn na yɩl tɩ b sak a Zezi boollã. Dẽnd d koe-moonegã fãagda yõyã. (Karm-y 2 Tɩmote 4:1-5.) Makr a to d sẽn tõe n dɩk yaa d Rĩungã rot yell gesgã. Wakat ninga, d segd n pɩɩsa zĩigã, n wʋk sagdã, n pek ko-soalsgã la d tʋm tʋʋm a taaba. Vẽenega, tʋʋm kãensã fãa baooda sik-m-menga! La d miime tɩ yaa Rĩungã rotẽ la d kẽnd n zãmsd Wẽnnaam daabã, la tɩ b yell gesg naaga Wẽnnaam tʋʋmã sʋka. D sã n sakd n tʋmd tʋʋm nins sẽn wõnd paoogda nedã, d wilgdame tɩ d yaa sik-m-mens rãmba, la tɩ d tũuda Kiristã nao.
Tall-y yẽesem wa a Zezi
12, 13. a) Tʋʋm-bʋg la a Zezi tʋm n yɩɩge, la bõe yĩnga? b) Bõe n na n kɩt tɩ tõnd me moon ne yẽesem?
12 D gom yẽesem ning a Zezi sẽn da tar koe-moonegã pʋgẽ wã yell masã. A Zezi sẽn da wa n be tẽng zugu, a tʋma tʋʋm wʋsgo. Wõnda a sẽn wa n yaa bɩɩga, a tʋma ne a ba-wubdg a Zozɛf sẽn yɩ ra-wãadã. A Zezi koe-moonegã sasa me, a maana yel-soalmã, a sãooga bãad rãmb la a vʋʋg kũum menga. La tʋʋmd ning a sẽn tʋm n yɩɩg yaa koɛɛgã moonego, la nebã zãmsgo. (Mat. 4:23) D sẽn tũud-a wã, tõnd me segd n moona koɛɛgã la d zãms nebã. La wãn to la d tõe n dɩk a togs-n-taar zĩ-kãngã? D sã n bãng bũmb ning sẽn kɩt t’a Zezi moon koɛɛgã la a zãms nebã, d na n tõog n dɩka a makre.
13 Sẽn yɩɩd fãa, yaa a Zezi sẽn nong Wẽnnaamã yĩng la a sẽn moon koe-noogã la a zãms nebã. La a leb n da nonga sɩd ning a sẽn da taasd nebã. A ra getame tɩ sɩdã yõod ka to, tɩ kɩt t’a ra rat ne a sũur fãa tɩ nebã bãng-a. Tõnd me sẽn zãmsd nebã Biiblã, d getame tɩ sɩdã yõod ka to ye. Sɩd me, yãmb we n tags bũmb ning fãa d sẽn bãng Wẽnnaam Gomdã pʋgẽ wã yelle. Wala makre, d bãnga no-koeemd ning sẽn zĩnd Wẽnnaam naamã sẽn ka to wã poorẽ wã, la b sẽn na n welg-a to-to. D bãnga Biiblã sẽn yet bũmb ning kũ-rãmbã wɛɛngẽ me, la d mi ãdem-biisã sẽn na n paam bark nins Wẽnnaam dũni-paalgã pʋgẽ wã. D sã n bãnga bõn-kãensã sẽn kaoos tɩ pa kaoos me, d miime tɩ b yõodã pa sat lae-lae ye. (Karm-y Matɩe 13:52.) D sã n moond koɛɛgã ne d sũur fãa, d wilgda nebã tɩ d nonga bũmb nins a Zeova sẽn zãmsd tõndã.
14. Bõe la d tõe n maan n yɩ karen-saam-sõma wa a Zezi?
14 D sã n bãng a Zezi sẽn da zãmsd nebã to-to wã me, d na n tõog n dɩka a togs-n-taare. Wakat buud fãa, a ra wilgda a kɛlgdbã Gʋlsg Sõamyã sẽn yet bũmb ninga. Naoor wʋsgo, nand t’a wilg bũmb sẽn tar yõodo, a yetame tɩ: “A gʋlsame.” (Mat. 4:4; 21:13) Yaa sẽn yɩɩd Biiblã sɛb nins sẽn gʋls ne hebre wã pʋɩ-sʋk goam la a Zezi sẽn lebs n dik wall a gom b yellã. Koe-moonegã pʋgẽ, tõnd me maanda wa a Zezi n karemd Biiblã n wilgdẽ wall d togsd a sẽn yetã ne zugu. Woto kɩtdame tɩ pʋ-peelem dãmbã bãngdẽ tɩ yaa Wẽnnaam goam la d sẽn taasd nebã lakae pa tõnd mens goam ye. Ned sã n sak n karem bũmb Biiblã pʋgẽ la a sak n na n sõs a sẽn karmã zug ne-do, nooma tõnd wʋsgo. La nin-kãensã buudã sã n sak n na n tũ a Zezi, noom-d lame n yɩɩda.
Tũ a Zezi rat n yeelame tɩ d nong nebã
15. A Zezi zʋg-bʋg n noom tõnd n yɩɩda, la kɩtdame tɩ d rat n maan bõe?
15 A Zezi zʋg-sõng ning sẽn noom tõnd n yɩɩd tɩ d na n gom a yell n baas yaa a sẽn da nong nebã. Tʋm-tʋmd a Poll yeela woto: “Kirist nonglem n so tõndo.” (2 Kor. 5:14) D sã n tags n ges a Zezi sẽn nong ãdem-biisã gill la a nong tõnd ned kam fãa to-to wã, noom-d-la hal wʋsgo, la kɩtdẽ tɩ d rat n dɩk a makre.
16, 17. Bõe ne bõe la a Zezi maan n wilg t’a nonga nebã?
16 Wãn-wãn la a Zezi wilgẽ t’a nonga nebã? Bũmb ning sẽn wilg rẽ n yɩɩd yaa a sẽn sak n ki ãdem-biisã yĩngã. (Zã 15:13) A Zezi koe-moonegã sasa me, a maana yɛl a taab sẽn wilgd t’a nonga nebã. Wala makre, a ra kʋmda sẽn da namsd-bã nimbãanega. A Lazaar kũumẽ wã, a sẽn yã a Maari ne neb nins sẽn da be ne-a wã tɩ b yãbdã, a sũur sãama wʋsgo. Baa ne a Zezi sẽn da mi t’a na n vʋʋga a Lazaar baraarã, a sũur sãamame hal t’a yãbe.—Zã 11:32-35.
17 A Zezi koe-moonegã sɩngrẽ, wãoor n kolg-a daar a yembr n yeel woto: “Yãmb sã n data yãmb tõe n maaga maam tɩ m yɩ yɩlemde.” A Zezi maana wãna? Kibarã pʋgẽ, b wilgame tɩ raoã “nimbãaneg yõka a Zezi” tɩ kɩt t’a maan bũmb sẽn ling nebã. A tẽega a nug n tik-a n yeele: “Mam datame. Bɩ f paam f menga n yɩ yɩlemde.” Tao-tao bala, raoã wãooda bas-a lame t’a lebg yɩlemde. A Zezi sẽn sɩɩs raoã linga nebã. Bala, a Moiiz Tõogã ra wilgame tɩ wãoor yaa rẽgdo. Sẽn paase, a Zezi ra tõe n sigsa bãagã meng t’a pa sɩɩs-a ye. La baasgo, a sẽn sɩɩs-a wã, yɩɩ raoã noog wʋsgo. Bala tõe tɩ ra maana yʋʋm tɩ ned pa sɩɩs-a ye. Hakɩka, a Zezi sɩd ra kʋmda nebã nimbãanega!—Mark 1:40-42.
18. Wãn to la d tõe n wilg tɩ d kʋmda nebã?
18 Tõnd sẽn tũud Kiristã, segdame tɩ d me wilgdẽ tɩ d nonga nebã, n kʋmd-ba. (1 Pɩɛ. 3:8, Sebr Sõngo) Yaa sɩd tɩ d tẽed-n-taag sã n bẽed yam-ka-m-meng wall bã-kɛgeng a to, tõeeme n pa nana tɩ d bãng n kʋm-a ye. Sẽn yɩɩd fãa, a buudã sã n zɩ n paam-do. La baa ne a Zezi sẽn da zɩ n bẽ wã, a ra kʋmda bãad rãmbã nimbãanega. Wãn to la d tõe n dɩk a makre? Yaa d sẽn na n maagd d yĩng n kelgd bãad rãmbã b sã n wa togsd b toogã sẽn yaa to-to. D tõe n soka d mens woto me: ‘Sã n da yaa maam la woto, m da na n maana wãna?’ Yaa d sã n kʋmd nebã la d na n tõog n ‘bels sũ-sãoong rãmbã’ sõma. (1 Tes. 5:14) Woto la d wilgd tɩ d tũuda a Zezi.
19. D sã n bãngd a Zezi na n kɩtdame tɩ d tʋll n maan bõe?
19 A Zezi Kirist sẽn yeel la a sẽn maan bũmb ninsã sɩd zãmsda tõnd bõn-sõma wʋsgo! D sã n bãngd-a n paasdẽ, d na n dat n wõneg-a lame n paase, la d tʋll me n sõng nebã tɩ b tũ-a. Woto yĩng bɩ d fãa tũ Rĩm ning sẽn yaa Mesi wã, la d maan rẽ ne sũ-noog masã la wakat fãa!
Y tõe n leokame bɩ?
• Wãn to la d tõe n yɩ yam dãmb wa a Zezi?
• Bõe la d tõe n maan n wilg tɩ d yaa sik-m-mens rãmba?
• Wãn-wãn la d tõe n paam yẽesem koe-moonegã pʋgẽ?
• Bõe la d tõe n maan n wilg tɩ d nonga nebã wa a Zezi?
[Zãmsgã sogsgã]
[Zĩ-gũbri/Foto, seb-neng 11]
SEBR SẼN NA N SÕNG-D TƖ D RƖK KIRISTÃ TOGS-N-TAARE
Yʋʋmd 2007 rasem a tãab tigis-kãsengã sasa, sebr sẽn tar nens 192 la b yiis-yã, t’a gom-zugã yaa: “ Viens, suis-moi. ” B yiisa seb-kãngã n na n sõng kiris-nebã tɩ b bãng n dɩk a Zezi togs-n-taare. Sebrã sɩngr-goamã rɩka sags a yiibu, tɩ babg ning sẽn pʋglã gomd a Zezi zʋg-sõma toor-toor wala a sik-m-mengã, a raoodã, a yamã, a sakrã, la a sẽn tõog toogã yelle.
Babg a yiib-n-soabã gomda a Zezi sẽn moon koe-noogã la a zãms nebã yelle. A tãab-n-soabã gomda bũmb kẽer a sẽn maan n wilg t’a nonga tõnd wʋsgo. Sebrã sɩngrẽ n tãag a baasgo, d yãta sagls sẽn tõe n sõng kiris-nebã tɩ b tõog n dɩk a Zezi togs-n-taare.
D kɩsa sɩd tɩ seb-kãngã na n sõnga tõnd ned kam fãa t’a fees a meng neere, n bãng a sã n sɩd tũuda a Zezi, la a bãng a sẽn tõe n tũ-a sõma to-to n paase. Sebrã na n sõnga “neb nins fãa sẽn dat vɩɩm sẽn-kõn-sa wã” tɩ b lebg Kiristã karen-biisi.—Tʋʋ. 13:48, NW.