Yãmb yaa tʋm-tʋmd sẽn tʋmd ne Wẽnnaam barkã kũunã bɩ?
Yãmb yaa tʋm-tʋmd sẽn tʋmd ne Wẽnnaam barkã kũunã bɩ?
“Bɩ y nong taab wʋsg ne ba-biis nonglem. Bɩ y waoog taaba.”—ROM 12:10.
1. Gom-bʋs sẽn kengd raood la d yãt Wẽnnaam Gomdã pʋgẽ?
WẼNNAAM GOMDÃ zĩis wʋsg yet-d lame tɩ d raood sã n koms wall d sũur sã n sãame, a Zeova na n sõng-d lame. Wala makre, b yeela woto: “[A Zeova] kokda neb nins fãa sẽn dat n lʋɩ wã, la bãmb doosda neb nins fãa sẽn kɩllã.” “Bãmb maagda neb nins sẽn tar sũ-sãoongã n tɩpd bãmb toodo.” (Yɩɩl 145:14; 147:3) Zĩig a to me, d saasẽ Ba wã yeela woto: “Mam yaa Zusoab sẽn yaa Wẽnnaam. Mam gãta yãmb dɩtg n yetẽ tɩ y ra zoe rabeem ye. Mam na n sõnga yãmba.”—Ezai 41:13.
2. Wãn-wãn la a Zeova sõngd a nin-buiidã?
2 La wãn-wãn la Wẽnnaam a Zeova sẽn be saasẽ tɩ nif pa ne-a wã gãt ‘tõnd nug-rɩtgo’? Sũ-sãams sã n wa kɩt me tɩ d kɩlle, wãn to la a roosd tõndo? A Zeova sõngda tõnd ne sõngr buud toor-toore. Wala makre, ne a vʋʋsem sõngã maasem, a kõta a nin-buiidã pãng sẽn yɩɩd ninsaal dẽndã. (2 Kor. 4:7; Zã 14:16, 17) Wẽnnaam Gomdã sẽn tar pãngã me roosda a nin-buiidã. (Heb. 4:12) La rẽ yĩnga, a Zeova sõngda tõnd ne sõngr buud a taab me bɩ? D sã n ges pipi Pɩɛɛr sebrã pʋgẽ, d yãtã sok-kãngã leoore.
‘Wẽnnaam barkã kũunã yaa toɛy-toɛya’
3. a) Bõe la tʋm-tʋmd a Pɩɛɛr yeel zu-loeesã wɛɛngẽ? b) Bõe yell la b gomd pipi Pɩɛɛr sak a naasã pʋgẽ?
3 Tʋm-tʋmd a Pɩɛɛr da goma ne kiris-neb sẽn paam vʋʋsem sõngã zaeebo, n yeel-b tɩ b sũy segd n yɩɩ noogo, bala b na n paama kũun sẽn yaa kãsenga. La a goamã pʋgẽ, a paasa woto: ‘Baa yãmb sẽn tar sũ-sãoong makr toɛy-toɛyã yĩngã.’ (1 Pɩɛ. 1:1-6) A Pɩɛɛr sẽn yeel tɩ makr “toɛy-toɛyã” tara võore. Wilgdame tɩ b zu-loeesã na n yɩɩ buk toor-toore. La a Pɩɛɛr pa tek a gomdã zĩ-kãng ye. Sẽn na yɩl t’a tẽed-n-taasã ra wa tẽ tɩ b pa na n tõog b zu-loeesã, a wilga vẽeneg tɩ kiris-nebã tõe n kɩsa sɩd t’a Zeova na n sõng-b-la zu-loɛɛg buud fãa pʋgẽ. Yaa tʋm-tʋmdã lɛtrã sak a 4 soabã pʋgẽ, a sẽn wa n gomd “bũmb fãa sɛɛb” yellã la a togs-b rẽnda.—1 Pɩɛ. 4:7.
4. Bõe yĩng tɩ 1 Pɩɛɛr 4:10 goamã kengd tõnd raoodo?
4 A Pɩɛɛr yeela woto: “Bɩ ned kam fãa rɩk Wẽnnaam barka kũuna yẽ sẽn deegã n yɩ tʋm-tʋmd sẽn yaa sõma n sõng a taab wa sẽn zems Wẽnnaam kũun toɛy-toɛyã.” (1 Pɩɛ. 4:10) Verse kãngã pʋgẽ, a Pɩɛɛr gomda kũun “toɛy-toɛy” yelle. Yaa sẽn na yɩl n wilg tɩ ‘zu-loeesã yaa buk toor-toore, la Wẽnnaam barkã kũunã me yaa buk toor-toore.’ Bõe yĩng tɩ gom-kãensã kengd raoodo? Woto wilgdame tɩ wakat fãa, sẽn wa n yaa zu-loɛɛg buk ning fãa n paam tõndo, d na n paama Wẽnnaam barkã kũun buk me sẽn na n sõng-d tɩ d tõog zu-loe-kãnga. La rẽ yĩnga yãmb tẽra a Pɩɛɛr sẽn wilg tõnd sẽn paamd Wẽnnaam barkã kũunã to-to wã bɩ? A wilgame tɩ yaa ne d saam-biisã maasem.
Tʋm-y n sõng-y taaba
5. a) Bõe la kiris-ned kam fãa segd n maane? b) La sogs-bʋs la d na n leoke?
5 A Pɩɛɛr goma ne tigingã neb fãa n yeel-b woto: “La sẽn yɩɩda, bɩ y paam nonglem wʋsg yãmb sʋka.” Rẽ poore, a paasa woto: “Bɩ ned kam fãa rɩk Wẽnnaam barkã kũuna yẽ sẽn deegã n yɩ tʋm-tʋmd sẽn yaa sõma n sõng a taab wa sẽn zems Wẽnnaam kũun toɛy-toɛyã.” (1 Pɩɛ. 4:8, 10) Woto rat n yeelame tɩ tigingã pʋgẽ, ned kam fãa tara a sẽn segd n maan n sõng a taabã. Tõnd ned kam fãa reega bũmb sẽn tar yõod wʋsg a Zeova nengẽ, n segd n dɩk-a n sõng d taabã. Bõn-kãng yaa bõe? A Pɩɛɛr yeelame tɩ yaa “kũuni.” La pʋd n yaa bõe menga? Wãn to la d tõe n dɩk-a n sõng d taabã?
6. Kũun nins Wẽnnaam sẽn kõ kiris-nebã kẽer la bʋse?
6 Wẽnnaam Gomdã yeta woto: “Bark sõma fãa la kũun sõma fãa yita yĩngri.” (Zak 1:17) Hakɩka, kũun nins fãa a Zeova sẽn kõt a nin-buiidã yaa bark sẽn yit a nengẽ. Kũun ning a Zeova sẽn kõt tõnd tɩ yɩɩd a taabã fãa yaa a vʋʋsem sõngã. Kũun-kãngã kɩtdame tɩ tõnd tõe n bao zʋg-sõma wala nonglem, maan-neere, la sũ-bʋgsem. D sã n paam zʋg-kãensã, b kɩtdame tɩ d nong d saam-biisã wʋsgo, la d sõngd-b ne d sũy fãa. Yam hakɩkã la bãngrã naaga kũun-sõma nins d sẽn paamd ne Wẽnnaam vʋʋsem sõngã maasmã. (1 Kor. 2:10-16; Gal. 5:22, 23) D pʋd n segd n bãngame tɩ d keelmã, d minimã la d tõod toor-toorã yaa d saasẽ Ba wã n kõ-do, tɩ d segd n dɩk-b n tʋm a yʋʋrã waoogr yĩnga. Wẽnnaam kõo tõnd zʋg-sõma la tõod kãensã fãa n dat n tũnug ne tõnd n sõng d saam-biisã.
Wãn-wãn la d na n tall-b n sõng d taabã?
7. a) B sẽn yeel tɩ “wa sẽn zemsã” rat n yeelame tɩ bõe? b) Sogs-bʋs la d segd n sok d mense, la bõe yĩnga?
7 A Pɩɛɛr sẽn gom kũun toɛy-toɛy nins d sẽn deegã yellã, a yeelame tɩ ned kam fãa reega ‘wa sẽn zemse.’ A sẽn yeel tɩ wa sẽn zemsã, wilgdame tɩ zʋg-sõma la tõod nins d sẽn deegdã tõe n yɩɩ toor-toore, la yɩɩg taab me. La ne rẽ fãa, b yeelame tɩ ned kam fãa ‘rɩk kũunã a sẽn deegã [sẽn yaa kũun ninga fãa], n sõng a taabã.’ B sẽn yeel tɩ ned kam fãa ‘rɩk yẽ sẽn deegã n yɩ tʋm-tʋmd sẽn yaa sõma n sõng a taabã,’ yaa noore. Dẽnd ned fãa segd n soka a meng woto: ‘Rẽ yĩnga mam dɩkda kũun nins m sẽn deeg a Zeova nengẽ wã n sõngd m tẽed-n-taasã bɩ?’ (Ges-y 1 Tɩmote 5:9, 10.) ‘Bɩ mam dɩkd-b lame n tʋmd m meng nafr yĩng n yɩɩda? Wala makre, n baood ligd bɩ yʋʋre.’ (1 Kor. 4:7) D sã n dɩkd kũun-kãensã n tʋmd d taabã sõngr yĩnga, d na n nooga a Zeova sũuri.—Yel. 19:17; karm-y Hebre dãmba 13:16.
8, 9. a) Tʋʋm-bʋs la d saam-biisã sẽn be dũniyã gill zugã tʋmd n sõngd taabã? b) Bõe la yãmb tigingã saam-biis maand n sõngd taaba?
8 Wẽnnaam Gomdã pʋgẽ, b wilgda tʋʋm toɛy-toɛy pipi kiris-nebã sẽn tʋm n sõng taaba. (Karm-y Rom dãmba 15:25, 26; 2 Tɩmote 1:16-18.) Rũndã-rũndã me, kiris-neb hakɩkã rɩkda b kũunã toɛy-toɛyã n tʋmd ne b sũy fãa n sõngd taab wa b sẽn yeelã. Bɩ d ges tʋʋm kẽer b sẽn tʋmd n sõngd taaba.
9 Kiuug fãa, saam-biis wʋsg rɩkda lɛɛr dãmb n segend tigingã sõss nins b sẽn bobl-bã. Tigissã sasa, b wilgda b taabã bõn-sõma nins b sẽn vaees Biiblã n yã wã, tɩ kengd b fãa raoodo. (1 Tɩm. 5:17) D neeme tɩ rap la pagb wʋsg sẽn be d sʋkã yaa neb sẽn sɩd nong b taabã ne b sũy fãa la b kʋmd-ba. (Rom 12:15) Kẽer nong n kaagda sũ-sãamsã sẽn loog b rãmbã, la b naagd-b n pʋʋsdẽ. (1 Tes. 5:14) Sãnda me gʋlsda goam sẽn kengd raood sõma n toond saam-biis nins sẽn be toog pʋgẽ wã. Neb a taab me sõngda sẽn kʋʋl-bã wall koms rãmbã tɩ b kẽngd tigissã. D saam-biis wʋsg me sõngd n lebsd n meta b taab rot sabab-rãmb sẽn sãame. Bũmb nins fãa saam-bi-kãensã, b pagb la b rap sẽn maand n sõngd b taabã tɩ wilgdẽ tɩ b nong-b lame wã yaa bark toor-toor sẽn yit Wẽnnaam nengẽ.—Karm-y 1 Pɩɛɛr 4:11.
Bõe yõod n yɩɩde?
10. a) Tʋm bʋs la Wẽnnaam bobl a Polle? b) Wãn to la d rɩkd a Poll togs-n-taare?
10 Wẽnnaam pa bobl a nin-buiidã tõod toɛy-toɛyã sẽn na yɩl tɩ b tʋm n sõng taab bal ye, a bobl-b-la koɛɛg me b sẽn segd n taas ãdem-biisã fãa. Tʋm-tʋmd a Poll wilga vẽeneg tɩ Wẽnnaam sɩd bobl-a-la tʋʋm kãensã a yiibã. A gʋlsa Efɛɛz tigingã neb n yeel-b tɩ Wẽnnaam bobl-a-la tʋʋmd b sõngr yĩnga. (Ef. 3:2) La a yeela woto me: ‘Wẽnnaam gesame tɩ tõnd zemsame tɩ togs koe-noogã.’ (1 Tes. 2:4) Wa a Polle, tõnd me miime tɩ Wẽnnaam bobl-d-la a Rĩungã koɛɛg moonego. A Poll moona koɛɛgã ne a sũur fãa n kõ-d mak-sõngo. Tõnd me maood n dɩkda a togs-n-taare, n moond koɛɛgã ne yẽesem. (Tʋʋ. 20:20, 21; 1 Kor. 11:1) D miime tɩ Rĩungã koɛɛgã mooneg fãagda neba. La wa a Polle, tõnd me maoodame n baood d sẽn tõe n maaneg n keng d tẽed-n-taasã tẽebo.—Karm-y Rom dãmba 1:11, 12; 10:13-15.
11. Wãn to la d segd n ges koɛɛgã mooneg la d saam-biisã sõngrã?
11 La tʋʋm bãmbã b yiibã sʋka bʋg yõod n yɩɩda? Ned sã n sok woto yaa wa a sẽn na n sok tɩ liuul pɩgs a yiibã sʋka, bʋg yõod n yɩɩda? Rẽ yĩnga ned na sok woto sɩda? Liuul sã n pa tar a pɩgs a yiibã fãa, a pa tõe n yɩk ye. Woto me, yaa tɩlae ne kiris-nebã tɩ b tʋm tʋʋm-kãensã b yiibã fãa. Rẽ kɩtame tɩ d pa segd n tags tɩ koɛɛgã d sẽn moondã la d sẽn segd me n sõng d saam-biisã yaa tʋʋm sẽn pa tũud taab ye. Wala tʋm-tʋmd a Pɩɛɛr ne a Polle, d segd n gesame tɩ b yiibã tũuda taaba. Bõe yĩng tɩ b yet tɩ b tũud taaba?
12. Wãn-wãn la a Zeova tũnugd ne-d n pidsd a raabã?
12 D sẽn yaa koe-moondbã, d tũnugda ne tõod nins fãa d sẽn tarã sẽn na yɩl tɩ Wẽnnaam Rĩungã koe-noog kẽ neb nins d sẽn moondã sũyã. D maanda woto n dat n sõng-b tɩ b lebg Kiristã karen-biisi. D leb n tũnugda ne d tõodã la kũun nins fãa d sẽn deegd Wẽnnaam nengẽ wã, n kengd d saam-biisã raood ne d no-goam la ne tʋʋm sõma. (Yel. 3:27; 12:25) Woto me yaa sẽn na yɩl tɩ b kell n yɩ Kiristã karen-biisi. D moonda koɛɛgã tɩ yaa d taabã la d sõngd me, d paamdame t’a Zeova tũnugd ne-d n pidsd a raabã.—Gal. 6:10.
“Bɩ y nong taab wʋsgo”
13. D sã n bas taab sõngre, bõe n na n maane?
13 A Poll sagla a tẽed-n-taasã woto: “Bɩ y nong taab wʋsg ne ba-biis nonglem. Bɩ y waoog taaba.” (Rom 12:10) D sẽn sɩd nong d saam-biisã kɩtame tɩ d rɩkd kũun nins d sẽn deeg Wẽnnaam nengẽ wã, n tʋmd b neer yĩng ne d sũy fãa. D miime t’a Sʋɩtãan sã n tõog n kɩt tɩ d ye pa sõngd taaba, na n sãama d zems-n-taarã. (Kol. 3:14) La d sã n pa zemsd taab me, d pa na n tõog n naag taab n moon koɛɛgã ne yẽesem ye. A Sʋɩtãan miime t’a sã n tõog tɩ d bas taab sõngre, yaa wa b sẽn tão liuul n kaoog a pɩgsr t’a pa ye tõe n yɩk ye. Bala tõnd me pa na n ye tõog n pids d tʋʋmdã ye.
14. D sã n sõngd taaba, ãnda la nafda? Rɩk-y makr n wilgi.
14 D sã n sõngd taaba, pa nafd neb nins sẽn paamd sõngrã bal ye. Nafda sõngdbã me. (Yel. 11:25) Ad makr a ye sẽn yit Etazĩni n sɩd wilgd rẽ. A Ryan ne a pag a Roni yaa Illinois saam-biisi. B sẽn wa n wʋm tɩ seb-kẽeng ning b sẽn bool tɩ Katrina wã sãama d saam-biis wʋsg zags Louisiane soolmẽ wã, b sẽn nong b saam-biisã yĩnga, b basa b tʋʋmã la b zakã, n da karavan-kʋdr n manege, n na n tog sor n kẽng zĩ-kãng sẽn be hal kɩlo 1 400 zĩigẽ wã, n tɩ sõng-ba. B tɩ zĩnda be sẽn yɩɩd yʋʋmde, n dɩk b sẽka, b pãng la b laog n sõng saam-biisã. Wakat kãng t’a Ryan ra tara yʋʋm 29. A yeela woto: “Mam sẽn tɩ sõng ne tʋʋmã, sõng-m lame tɩ m nong Wẽnnaam n paase. Mam yãa a Zeova sẽn ges a nin-buiidã yell to-to.” A paasa woto: “Mam sẽn tɩ naag saam-biis yʋʋm sẽn yɩɩd-m n tʋmã, kɩtame tɩ m bãng m sẽn tõe n sõng saam-biisã to-to. Mam bãngame me t’a Zeova siglgã tara tʋʋm wʋsgo, tõnd a kom-bɩɩsã sẽn tõe n tʋme.” A pag a Roni da tara yʋʋm 25. Yẽ me yeela woto: “Mam sẽn paam n naag n sõng m taabã, m sũur yaa noogo. M sũur da zɩ n yɩ noog wa woto ye. Mam miime tɩ na n maana yʋʋm tɩ m ket n dɩt yam kãngã d sẽn yãkã yõodo.”
15. Bõe yĩng tɩ d segd n dɩkd Wẽnnaam barkã kũun d sẽn deegdã n sõngd taaba?
15 D sã n sɩd tũud Wẽnnaam noorã n moond koe-noogã la d sõngd d saam-biisã, nafda d fãa. D sẽn sõngd-b rãmbã tẽeb paasdame, tɩ tõnd me paamd sũ-noog d sẽn sõngd-bã yĩnga. (Tʋʋ. 20:35) Tigingã neb fãa sã n get taab yell la b sõngd taaba, b ne taab nonglmã me na n paasdame. Sẽn paase, d sẽn nong taabã na n wilgdame tɩ d sɩd yaa kiris-neb hakɩka. A Zezi yeela woto: “Yãmb sã n nong taaba, nebã fãa na n bãngame tɩ yãmb yaa mam karen-biisi.” (Zã 13:35) Sẽn tɩ yɩɩd fãa, d sẽn yaa a Zeova Kaset rãmba yĩnga, d sã n sõngd d taabã wa a sẽn datã, waoogd-a lame. Ad woto fãa sɩd yaa bʋʋm sẽn sek d na ‘rɩk Wẽnnaam barkã kũun d sẽn deegdã, n yɩ tʋm-tʋmdb sẽn yaa sõma, n sõngd taaba’! Yãmb na n ket n maanda woto bɩ?—Karm-y Hebre dãmba 6:10.
Y tẽrame bɩ?
• Bõe la a Zeova maand n kengd a nin-buiidã raood rũndã-rũndã?
• Bõe la b bobl tõndo?
• Bõe ne bõe la d tõe n maan n sõng d saam-biisã?
• Bõe n na n kɩt tɩ d ket n dɩkd kũun nins d sẽn deegã n tʋmd n sõngd taaba?
[Zãmsgã sogsgã]
[Foto rãmba, seb-neng 17]
Y rɩkda “kũun” nins y sẽn deegã n sõngd y taabã bɩ, bɩ y baooda y meng nafre?
[Foto rãmba, seb-neng 19]
D moonda koɛɛgã la d sõngd d saam-biisã
[Foto, seb-neng 20]
Saam-biis nins sẽn sõngd sabab rãmb sẽn paam-b rãmbã segda ne pẽgre