A Zezi goamã sẽn tõe n sõng-d pʋʋsgã wɛɛngẽ to-to
A Zezi goamã sẽn tõe n sõng-d pʋʋsgã wɛɛngẽ to-to
“A Zezi sẽn togs bõn-kãens n sɛ, kʋʋnga yɛɛsa bãmb karengã yĩnga.”—MAT. 7:28.
1, 2. Bõe yĩng t’a Zezi sẽn zãms nebã to-to wã yɛɛs kʋʋngã?
D SEGD n saka Wẽnnaam bi-ribl yend a Zezi Kirist goamã, la d tũud rẽ wakat fãa. Ned da nan zɩ n zãms neb tɩ tall yamleoog wa yẽ sẽn maan to-to wã ye. Bala a sẽn zãms nebã tãngã zugã, b yɛɛsame!—Karm-y Matɩe 7:28, 29.
2 A Zeova bi-riblã pa zãms nebã wa gʋlsdbã sẽn da zãmsd nebã to-to wã ye. Nin-kãensã ra zãmsda nebã ninsaalbã sẽn pa zems zãngã tagsgo, la b gomd gom-wogdo. Kiristã zãmsa nebã “wa ned sẽn tar noore,” sẽn dat n yeel tɩ ned sẽn tar tõogo, bala a goamã ra yita Wẽnnaam nengẽ. (Zã 12:50) Bɩ d bao n bãng d sẽn segd n tũ sagls nins a Zezi sẽn kõ baraar pʋʋsgã wɛɛngẽ wã to-to.
D ra pʋʋsd wa zãmb dãmbã ye
3. Kʋms-y a Zezi sẽn yeel bũmb ning Matɩe 6:5 pʋgẽ wã.
3 Pʋʋsgã naaga bũmb nins tõnd sẽn maand n waoogd a Zeova wã sʋka. A tara yõod hal wʋsgo. Dẽnd d segd n pʋʋsda a Zeova. D sã n wa pʋʋsdẽ, d segd n tũu a Zezi sẽn yeel bũmb ning pʋʋsgã wɛɛngẽ tãngã zugã. A yeela woto: “Yãmb sẽn pʋʋsd wakate, bɩ yãmb da yɩ wa zãmb dãmbã sẽn nong tɩ yals karen-dotẽ la so-tiisẽ n pʋʋse tɩ neba ges bãmba ye. Mam yeta yãmb sɩda tɩ bãmb paamda b keoore.”—Mat. 6:5.
4-6. a) Bõe yĩng tɩ Fariziẽ rãmbã ra nong n ‘yalsd karen-dotẽ la so-tiisẽ’ n pʋʋsdẽ? b) Wãn to la nin-kãensã ra ‘paamd b keoore’?
4 A Zezi yeela a karen-biisã tɩ b sã n pʋʋsdẽ, bɩ b ra maan wa Fariziẽ rãmbã sẽn yaa “zãmb dãmba,” n yaool n tẽed tɩ b yaa tɩrsã ye. B ra rat n wilga zamã wã sʋk tɩ b yaa wẽn-tũudba. (Mat. 23:13-32) B ra nongame n “yalsd karen-dotẽ la so-tiisẽ” n pʋʋsdẽ sẽn na yɩl tɩ nebã “ges bãmba.” Pipi kiris-nebã wakatẽ wã, maoong sẽn yõogd bugmã sasa, (yibeoog wakat a wae la zaabr wakat a tãab sẽnese), zʋɩf rãmbã ra nong n tigimda taab wẽnd-doogẽ wã n pʋʋsdẽ. Sẽn da be-b Zerizalɛmmã wʋsg ra kẽngda wẽnd-doogã samandẽ n naagd kʋʋngã n pʋʋsdẽ. Zʋɩf rãmb nins sẽn da pa be Zerizalɛm pʋgẽ wã ra nong n kẽnda ‘karen-dotẽ’ wã n pʋʋsd naoor a yiib daar fãa.—Ges-y Luk 18:11, 13.
5 Sẽn mik tɩ neb wʋsg da pa pẽ wẽnd-doog bɩ karen-doogã, pʋʋsgã wakat sã n da ta, b ra tõe n yalsa b sẽn datẽ fãa n pʋʋse. Kẽer da maanda b sẽn na maaneg tɩ pʋʋsgã wakat mik-b “so-tiisẽ,” sẽn na yɩl tɩ so-loaadbã “ges bãmba.” Nin-kãensã sẽn da yaa zãmb dãmbã ra pʋʋsda “pʋʋs wogdo,” sẽn na yɩl tɩ neb nins sẽn tũud sorã pẽg-ba. (Luk 20:47) Tõnd pa segd n tall manesem kãngã buud ye.
6 A Zezi yeelame tɩ zãmb dãmb kãensã “paamda b keoore.” B ra baooda ne b sũy fãa tɩ nebã pẽg-ba, la yaa rẽ bal la b keoore. Bala, b sẽn pa pʋʋs ne pʋ-peelmã yĩnga, a Zeova pa na n leok b pʋʋsgã ye. La a leokda a Zezi karen-biis hakɩkã pʋʋsgo, wa a Zezi goam nins sẽn pʋgdã sẽn wilgdã.
7. A Zezi sẽn sagl tɩ f kẽ “f roogẽ” n pʋʋsã rat n yeelame tɩ bõe?
7 “La fo sã n pʋʋsdẽ, kẽ f roogẽ n pag kʋɩlenga n pʋʋs fo Ba sẽn be zĩig sẽn solge. La fo Ba sẽn yã tɩ fo soosame n pʋʋse, bãmb na keo foom.” (Mat. 6:6) A Zezi sẽn yeel tɩ f sã n pʋʋsdẽ bɩ f kẽ f roogẽ n pag kʋɩlengã pa rat n yeel tɩ ned pa tõe n lʋɩ tigingã taoor n pʋʋs ye. A ra rat n wilgame bal tɩ d pa segd n yals zamã sʋk n pʋʋs sẽn na yɩl tɩ pẽg-d ye. D sã n wa paam zu-noog n na n lʋɩ neb taoor n pʋʋse, d segd n tẽega rẽ yelle. La sagls a taab me la a Zezi kõ pʋʋsgã wɛɛngẽ tɩ d segd n tũ.
8. Wala Matɩe 6:7 sẽn wilgdã, bõe la d pa segd n maan d pʋʋsgã pʋgẽ?
8 “Yãmb sã n pʋʋsdẽ, bɩ yãmb da gom gom-vɩɩd wa buud a taaba neba sẽn maanda ye, tɩ bõe, bãmb tẽedame tɩ bãmb sẽn gomd wʋsga yĩnga, Wẽnnaam na n leoka bãmb pʋʋsgo.” (Mat. 6:7) A Zezi leb n wilga bũmb a to d sẽn pa segd n maan d pʋʋsgã pʋgẽ: Yaa togsd bõn-yɛng n yɩlemdẽ wã. A ra pa rat n wilg tɩ d pa segd n kos bũmb ne d sũur fãa n yɩlme, bɩ n pʋʋs bark n yɩlem ye. A Zezi mengã kẽnga Gɛtsemane yʋng ning sẽn deng a kũumã n tɩ pʋʋse. La kosa bõn-yɛng n yɩlme, “n pʋʋs wa pĩndã bala.”—Mark 14:32-39.
9, 10. Bõe yĩng tɩ d pa segd n yet bõn-yɛng n yɩlemdẽ?
9 D pʋʋsgã pʋgẽ, d pa segd n togsd bõn-yɛng n yɩlemdẽ wa “buud a taaba nebã,” rat n yeel tɩ neb nins sẽn pa mi a Zeova wã sẽn maandã ye. B pʋʋsg pʋgẽ, b togsda bõn-yɛng bal n yɩlemdẽ, tɩ b sẽn yetã fãa me yaa gom-vɩɩd la goam b sẽn dɩk ne zugu. Neb n da pʋʋs wẽnnaam a Baal “yibeoog hal tɩ ta wĩnto-sʋka,” n da yet woto: “Baal, leok tõndo.” La b pʋʋsgã pa yãk neng ye. (1 Rĩm 18:26) Rũndã-rũndã, neb wʋsg pʋʋsda pʋʋs-wogdo, n togsd bõn-yɛng n yɩlemdẽ, n tẽed tɩ “Wẽnnaam na n leoka bãmb pʋʋsgo.” La a Zezi wilgame tɩ d sã n pʋʋsd pʋʋs-wogd n togsd bõn-yɛng n yɩlemdẽ la d gomd goam wʋsgo, d pʋʋsgã pa tar yõod Wẽnnaam nifẽ ye. A goam nins sẽn pʋgdã wilgda rẽ.
10 “Bɩ yãmb da yɩ wa bãmb ye, tɩ bõe, yãmb Ba mii yãmb sẽn datã, tɩ yãmb nan ka kos bãmb ye.” (Mat. 6:8) Zʋɩf rãmbã tũudmã taoor dãmb wʋsg ra maanda wa bu-zẽmsã neba, bala b sã n da pʋʋsdẽ, b ra gomda gom-wogdo. Kiris-neb hakɩkã pʋʋsda ne b sũy fãa, n pẽgd Wẽnnaam, n pʋʋsd-a barka, la b kot-a b sẽn date. (Fil. 4:6) La baa ne rẽ, d pa segd n yet bõn-yɛng n yɩlemdẽ n tẽed tɩ rẽ n na n kɩt tɩ Wẽnnaam wʋm la a leok-d ye. D sã n pʋʋsdẽ, d segd n tẽegame tɩ d gomda ne Wẽnnaam, la t’a ‘mii tõnd sẽn datã tɩ d nan ka kos-a ye.’
11. D sã n paam zu-noog n na n pʋʋs zãma taoore, bõe la d pa segd n yĩm?
11 A Zezi sẽn yeel bũmb ning pʋʋsgã wɛɛngẽ wã segd n kɩtame tɩ d tẽeg tɩ pa d gom-bɛdã bɩ d gom-wogdã n na n kɩt tɩ Wẽnnaam kelg-d ye. D segd n tẽegame me tɩ d sã n wa pʋʋsd zãma taoore, d pa segd n tũnug ne rẽ n na n bao yʋʋr ye. D pa segd me n tar pʋʋsg n tar pʋʋsg hal tɩ nebã wa gũud “ãmiinã” wã n kongdẽ ye. D sã n taasd kibay wall d sagend nebã d pʋʋsgã pʋgẽ, pa zems lae-lae ne a Zezi sẽn togs bũmb ning tãngã zugã ye.
A Zezi wilga tõnd d sẽn segd n pʋʋs to-to
12. A Zezi sẽn yeel tɩ ‘yãmb yʋʋr yɩ ne waoogrã’ rat n yeelame tɩ bõe?
12 A Zezi yeela a karen-biisã tɩ b pa segd n pʋʋs wa fariziẽ rãmbã, la a wilg b sẽn segd n pʋʋs to-to. (Karm-y Matɩe 6:9-13.) D pa segd n dɩk pʋʋsg ning a Zezi sẽn wilgã ne zug n togsd rẽ takɩ n yɩlemd wakat fãa ye. Pʋʋs-kãng yaa makr bal sẽn wilgd tõnd d sẽn tõe n kos bũmb nins d pʋʋsg pʋgẽ. Wala makre, a Zezi sɩnga a pʋʋsgã ne Wẽnnaam mengã pẽgre, n yeel woto: “Tõnd Ba sẽn be [saasẽ], tɩ yãmb yʋʋr yɩ ne waoogre.” (Mat. 6:9) D sẽn boond a Zeova tɩ “tõnd Ba” wã zemsame, bala yaa yẽ la tõnd naanda, sẽn be saasẽ wã sẽn zãr wʋsg ne tẽngã. (Tõo. 32:6; 2 Kib. 6:21; Tʋʋ. 17:24, 28) B sẽn yet tɩ ‘tõndã’ wilgdame tɩ d pa segd n yĩm tɩ Wẽnnaam nonga d tẽed-n-taasã me ye. ‘Yãmb yʋʋr yɩ ne waoogrã’ wilgdame tɩ d kota a Zeova t’a kɩt t’a yʋʋrã paam waoogre, b sẽn paoog a yʋʋrã hal sẽn sɩng ne Edɛn kɩɩsgã n tãag masã wã yĩnga. A Zeova na n leoka pʋʋs-kãngã n yiis wẽngã sẽn be tẽngã zugã t’a yʋʋrã sɩd paam waoogre.—Eze. 36:23.
13. a) D sẽn kot tɩ Wẽnnaam Rĩungã wa wã na n pidsa wãn-wãna? b) Wẽnnaam daabã sã n wa maand tẽngã zugu, yɛlã na n yɩɩ wãn-wãna?
13 “Tɩ yãmb soolem wa, tɩ yãmb daab maan dũniyã zug wa sẽn maand [saasẽ wã].” (Mat. 6:10) Sẽn zems ne pʋʋsg ning a Zezi sẽn wilgã, d segd n tẽegame tɩ soolmã bɩ Rĩungã yaa Wẽnnaam goosneemã sẽn be saasẽ wã. Yaa a Zezi Kirist ne neb nins sẽn paam vʋʋsem sõngã zaeebã b sẽn boond tɩ “Sẽn-ka-to nebã,” n yaa nanambs goosneem kãng pʋgẽ. (Dan. 7:13, 14, 18; Ezai 9:5, 6) D sã n kotẽ tɩ soolem bɩ Rĩungã wa, d kotame tɩ Wẽnnaam Rĩungã wa menes neb nins fãa sẽn kɩɩsd a naamã. A Zeova na n sɩd maana rẽ ka la bilfu, tɩ kɩt tɩ tẽngã gill lebg arzãna, tɩ tɩrlem, laafɩ la bãan zĩndi. (Yɩɩl 72:1-15; Dan. 2:44; 2 Pɩɛ. 3:13) A Zeova raabã zoe n maanda saasẽ. La d sẽn pʋʋsd t’a raabã maan dũniyã zugã, d kotame t’a wa pids bũmb nins a sẽn kãab tẽngã wɛɛngẽ wã, n menes a bɛɛbã wala a sẽn maan pĩnd wẽndẽ wã.—Karm-y Yɩɩl Sõamyã 83:2, 3, 14-19.
14. Bõe yĩng tɩ zems tɩ d pʋʋsd n kot d daarã rɩɩbo?
14 “Bɩ y kõ tõnd dɩɩb dũnda wa yãmb sẽn mi n kõt tõnd daar fãa wã.” (Mat. 6:11; Luk 11:3) D sẽn pʋʋsd woto wã, d kota Wẽnnaam t’a kõ-d rɩɩb rũndã daarã yĩng bala. Woto wilgdame tɩ d kɩsa sɩd t’a Zeova tõe n kɩtame tɩ d paam bũmb nins sẽn yaa tɩlae ne tõnd daar fãa wã. Woto rat n yeelame tɩ d pa segd n kos tɩ zʋʋg bũmb nins sẽn yaa tɩlae ne-dã ye. D sẽn pʋʋsd n kot d daarã rɩɩbã, tẽegda tõnd tɩ Wẽnnaam sẽn da kõ Israɛll nebã mannã, a yeelame tɩ b wʋk “sẽn sekd daar a yembr dɩɩbo.”—Yik. 16:4.
15. D sã n dat tɩ Wẽnnaam kõ-d sugri, bõe la d segd n maane?
15 A Zezi leb n wilga bũmb d sẽn segd n kotẽ. A yeela woto: “Bɩ y kõ tõnd sugri tõnd beegra yĩnga, a wa tõnd me sẽn kõt d bɛɛgdba sugrã.” (Mat. 6:12) Yaa tõnd sẽn na n kõ neb nins sẽn beeg tõndã sugr bal la a Zeova me na n kõ tõnd sugri. (Karm-y Matɩe 6:14, 15.) D segd n sak n kõo d taabã sugri.—Ef. 4:32; Kol. 3:13.
16. D sã n kot Wẽnnaam t’a ra bas tɩ d kẽ makr pʋgẽ, la t’a fãag tõnd wẽng soabã nugẽ, a võorã yaa bõe?
16 “La bɩ y ra bas tõnd tɩ d kẽ makr pʋgẽ ye, la bɩ y fãag tõnd wẽng soaba nugẽ.” (Mat. 6:13) Gom-kãensã võor yaa bõe? D segd n bãngame tɩ Wẽnnaam pa makd ned abada t’a maan wẽng ye. (Karm-y Zak 1:13.) Yaa a Sʋɩtãan sẽn yaa “wẽng soabã” la “makdã.” (Mat. 4:3) La goam kẽer n be Biiblã pʋgẽ, n wõnd b wilgdame tɩ yaa Wẽnnaam n wat ne yɛlã. Gom-kãens yaool n wilgdame bal t’a basame tɩ yel-kãens maane. (Rut 1:20, 21; Koɛ. 11:5) Dẽnd d sã n pʋʋsd a Zeova n kotẽ t’a “ra bas tõnd tɩ d kẽ makr pʋgẽ,” d kotame tɩ bũmb sã n wa rat n kɩt tɩ d kɩɩs a noyã bɩ a sõng-do. Sẽn na n baase, d sã n kot a Zeova t’a “fãag tõnd wẽng soaba nugẽ,” d kotame t’a ra bas t’a Sʋɩtãan tõog-d ye. La d segd n kɩsa sɩd tɩ Wẽnnaam ‘ka na n sak tɩ d paam makr sẽn yɩɩd d pãng ye.’—Karm-y 1 Korẽnt dãmba 10:13.
D ket ‘n kotẽ, n baoodẽ la d wẽedẽ’
17, 18. B sẽn yeel tɩ d ket n kotẽ, n baoodẽ la d wẽedẽ wã võor yaa bõe?
17 Tʋm-tʋmd a Poll sagla a tẽed-n-taasã tɩ b “pʋʋs n da bas ye.” (Rom 12:12) A Zezi me kõo sagls pʋʋsgã wɛɛngẽ n yeel woto: “Bɩ y kose, tɩ b na kõ-yã, bɩ y bao, tɩ y na yã, bɩ y wẽ kʋɩlenga, la b na pak n kõ-yã. Tɩ bõe, ned ninga sẽn kota, a na paam, ned ninga sẽn baooda, a na yã, la ned ninga sẽn wẽed kʋɩlenga, b na pak n kõ-a.” (Mat. 7:7, 8) Woto wilgdame tɩ d sã n dat bũmb sẽn zems ne Wẽnnaam daabã, zemsame tɩ d ket n kotẽ. Sẽn zems ne a Zezi sẽn wilg bũmb ningã, tʋm-tʋmd a Zã me yeela woto: “Tõnd tara tẽeb kãng ne [Wẽnnaam], tɩ tõnd sã n kos bũmb sẽn zems bãmb daabo, b kelgda tõndo.”—1 Zã 5:14.
18 A Zezi sẽn sagl tɩ d ket n kotẽ la d baoodẽ wã rat n yeelame tɩ d segd n wɩngda ne pʋʋsg n da basdẽ ye. Sẽn na yɩl n paam n zĩnd Wẽnnaam soolmã pʋgẽ la d paam bark nins a sẽn na n wa ne wã, d segdame me n ket n “wẽed kʋɩlenga.” Rẽ yĩnga d tõe n kɩsa sɩd tɩ Wẽnnaam na n leoka d pʋʋsgã bɩ? D sɩd tõe n kɩsa sɩda, d sã n sakd-a wakat fãa. Bala a Zezi yeelame tɩ “ned ninga sẽn kota, a na paam, ned ninga sẽn baooda, a na yã, la ned ninga sẽn wẽed kʋɩlenga, b na pak n kõ-a.” A Zeova nin-buiidã kẽer yãa yɛl wʋsg sẽn wilgd t’a sɩd “wʋmda pʋʋsgo.”—Yɩɩl 65:3.
19, 20. Sã n yaa ne Matɩe 7:9-11, bõe yĩng tɩ d tõe n yeel t’a Zeova yaa wa ba sẽn nong a kamba?
19 A Zezi yeelame tɩ Wẽnnaam yaa wa ba sẽn nong a kamb n kõt-b bõn-sõma. Tags-y n ges wa yãmb sẽn da na n zĩẽ tãngã zug baraar n kelgd a Zezi sõsgã! A goamã pʋgẽ, a wa n yeela woto: “Ãnda n be yãmb sʋka t’a biig kos-a buri, t’a kõ-a kugri? Walla a kos-a zĩifu t’a kõ-a waafo? Yãmb a nin-wẽnsa sã n bãng tɩ kõ yãmb kamba kũun sẽn yaa sõma, dẽ, sẽn yɩɩda, yãmb [saasẽ] Ba kõn kõ neb nins sẽn kos bãmba bõn-neeb bɩ?”—Mat. 7:9-11.
20 Baa ne ninsaalbã sẽn yaa yel-wẽn-maandb tɩ d tõe n yeel tɩ b yaa “nin-wẽnsã,” b nonga b kambã. Ba ka be sẽn na n sak n kõ a biig bũmb sẽn pa sõma ye. A na n modgame n bao “kũun sẽn yaa sõma” n kõ-a. D saasẽ Ba wã me sẽn nong tõndã yĩngã, a na n kõ-d-la “kũun sẽn yaa sõma,” wala makre, a vʋʋsem sõngã. (Luk 11:13) A Zeova yaa “bark sõma fãa la kũun sõma fãa” kõta. Wala makre, a vʋʋsem sõngã a sẽn kõt tõndã tõe n sõng-d lame tɩ d tʋm tʋʋm sẽn tat a yam.—Zak 1:17.
D kell n tũ a Zezi goamã tɩ naf-do
21, 22. Bõe n kɩt tɩ bũmb ning a Zezi sẽn zãms nebã tãngã zugã tar yõod wʋsgo, la yãmb tagsda wãn a Zezi goamã zugu?
21 Ned nan zɩ n zãms neb tɩ tall yamleoog wala a Zezi sẽn zãms nebã to-to tãngã zugã ye. A zãmsgã yɩɩ vẽenega, la sõngda tõnd tɩ d bãng Wẽnnaam sõma. Wala sõss a tãabã sẽn pʋgl taabã sẽn wilgã, d sã n tũud sagls nins a Zezi sẽn kõ nebã tãngã zugã, na n naf-d-la wʋsgo. A Zezi goamã tõe n kɩtame tɩ d vɩɩmã yɩ sõma masã, la a kõ-d saagr tɩ ka la bilfu d na n paama sũ-noogo.
22 Sagls nins a Zezi sẽn kõ nebã tãngã zugã pʋgẽ, yaa bãmb b wãn bal la d sẽn yã sõss a tãabã sẽn pʋgl taabã pʋgẽ wã. Pa zaalem yĩng la neb nins sẽn da kelgd-a wã sẽn yɛɛs a sẽn da zãmsd nebã to-to wã yĩngã ye. (Mat. 7:28) La yaa vẽeneg tɩ tõnd me manesem na n yɩɩ woto, d sã n modg tɩ karen-saam kãseng a Zezi Kirist goamã fãa kẽ d sũyã la d yamã.
Y na n leokame tɩ bõe?
• Bõe la a Zezi yeel zãmb dãmbã pʋʋsg wɛɛngẽ?
• Bõe yĩng tɩ d pʋʋsgã pʋgẽ d pa segd n togsd bõn-yɛng n yɩlemdẽ?
• A Zezi pʋʋsgã pʋgẽ bõe ne bõe yell la a gom-yã?
• B sẽn yeel tɩ d ket n kotẽ, n baoodẽ la d wẽedẽ wã võor yaa bõe?
[Zãmsgã sogsgã]
[Foto, seb-neng 15]
Bõe yĩng tɩ d segd n pʋʋs n kos d daarã rɩɩb bala?