Kiris-ned kũum sasa, b sẽn maand bũmb ninsã segd n waooga Wẽnnaam

TẼNS kẽer pʋsẽ, ned sã n maan kaalem, nebã tigimda taab n maan a kʋʋre, sẽn na yɩl n pʋʋs kiidã Wẽnd na maneg a reng taoore. Nedã kũum daare, kʋ-biisã ningda fu-sabla, n yãbd n kaasdẽ, hal n lʋɩt tẽng n bilimdẽ. Gãngãad pãbdame tɩ saoog saoodẽ, tɩ kẽer dɩtẽ la b yũuda, n laad n kaasdẽ. Sãnda meng yũuda rãamã n su gãe tẽnga.

A Zeova Kaset rãmb wʋsg vɩɩ zĩis neb wʋsg sẽn tẽed yɛl sẽn pa sɩd sẽn ki-bã wɛɛngẽ, la b zoet sẽn ki-bã menga. Neb wʋsg tẽedame tɩ ned sã n ki, a sɩɩgã bʋʋgda a yaab rãmba, t’a tõe masã n maan sẽn vɩ-bã neer bɩ wẽnga. Zĩis wʋsgo, yaa tags-kãensã n kɩt tɩ b nong n maand kʋyã. Yaa sɩd tɩ f ned sã n ki tɩ f yãbda, pa wẽng ye. A Zezi ne a karen-biisã meng yãba b ned sẽn ki yĩnga. (Zã 11:33-35, 38; Tʋʋ. 8:2; 9:39) La b pa kaas la b maan wala b wakatẽ nebã sẽn da maand to-to wã ye. (Luk 23:27, 28; 1 Tes. 4:13) Bõe yĩnga? Bala b ra mii bũmb ning sẽn maand ned kũum poore.

Biiblã yeta vẽeneg woto: “Nin-vɩɩs miime tɩ b na n kiime. La kũum ka mi bũmb ye. . . . La bãmb nonglmã ne b kisgrã la b sũ-kiirã me fãa sɛɛme. . . . Tʋʋmd ne tagsg la yam ne bãngr ka be kɩɩm-kulg fo sẽn dabd zĩig ninga ye.” (Koɛ. 9:5, 6, 10) Biiblã verse kãensã wilgda vẽeneg tɩ ned sã n ki, a pa le mi bũmb ye. A pa tõe n tagse, a pa mi sũ-noog bɩ sũ-sãangã, a pa tõe n gom bɩ n wʋm goam me ye. Tõnd sẽn mi woto wã, wãn to la tõe n sõng-d tɩ d bãng d sẽn segd n maaneg ned kũum sasa?

Lak-y ne rog-n-migs Wẽnnaam sẽn kisi

A Zeova Kaset rãmbã sẽn beẽ zĩig ning fãa la b sẽn yaa buud ning fãa neba, b lakda b mens fasɩ ne rog-n-migs nins nebã sẽn maand n tagsdẽ tɩ sẽn ki-bã mii bũmbu, la tɩ b tõe n maana sẽn vɩ-bã bũmbã. Wala makre, kʋ-sõsga, kũum mumb poor deem, kʋ-yiibu, kʋ maand n kõ kiidã, yɛl pʋg-kõapã sẽn maande, la rog-n-migs a taaba. Woto fãa yaa yɛl Wẽnnaam sẽn kisi. Bala yaa a Sʋɩtãan sẽn kɩt tɩ nebã tẽed tɩ ninsaal tara sɩɩg sẽn pa kiidã yĩng la b sẽn maand rẽ fãa wã. (Eze. 18:4) Kiris-neb hakɩkã pa tõe n naagd n dɩt Zusoabã rɩɩbo, la “zĩn-dãmbã rẽnd ye.” Rẽ n so tɩ b lakd b mens ne rog-n-migs kãensã. (1 Kor. 10:21) B sakda Biiblã noor ning sẽn yet tɩ b “welg ne bãmba,” la tɩ b ra sak n sɩɩs bõn-dẽgdã. (2 Kor. 6:17) La yɩl n tõog n maan woto mi n pa nana ye.

Afirik la zĩis a taaba, nebã wʋsg tẽedame tɩ yaa tɩlae tɩ b maan rog-n-migs kẽere, sẽn na yɩl n da beeg yaab rãmbã ye. Ned sã n zãgs n pa maane, b yetame t’a beega yaab rãmbã, tɩ tõe n wa ne yel-beed tẽngã rãmb zugu. A Zeova Kaset rãmb wʋsg n zãgs tɩ b kõn maan rog-n-migs kãensã sẽn kɩɩsd Wẽnnaam noyã, tɩ b tẽngã neb wɩd-ba, n tʋ-ba, la b yiis sãnda buudẽ bɩ n dig-b n yiis tẽngã. B rõda kẽer tɩ b pa nong nebã, la tɩ b pa waoogd kũum ye. Wakat kẽere, neb n maand pãng n deegd kiris-neb kũum n soogdẽ, n maand kʋya. Tõnd miime tɩ Wẽnnaam kisa rog-n-migs  nins b sẽn maand sẽn ki-bã yĩngã. Woto yĩnga, bõe la d tõe n maam tɩ no-koɛɛm ra zĩnd tõnd ne neb nins sẽn tẽed tɩ rog-n-migsã yaa tɩlae wã sʋka? Sẽn paase, bõe la d tõe n maan n lak d mens ne rog-n-migs nins sẽn tõe n sãam zood ning d sẽn tar ne a Zeova wã?

Wilg-y y sẽn datã vẽenega

Zĩis kẽere, nebã tagsdame tɩ yaa buudã n tar sor n na n yãk b sẽn na n maan bũmb ning mumbã wɛɛngẽ. Kiris-ned segd n kɩtame tɩ nebã bãng vẽeneg t’a kaalem daare, yaa a Zeova Kaset rãmbã n na n ges bũmb nins fãa b sẽn segd n maana yelle, sẽn na yɩl tɩ zems ne Biiblã noyã. (2 Kor. 6:14-16) Bũmb nins kiris-nebã sẽn maand b ned kũumẽ wã pa segd n nams b tẽed-n-taasã sũur kaseto, bɩ n tudg neb nins sẽn mi a Zeova Kaset rãmbã sẽn tẽed la b zãmsd nebã bũmb ning sẽn ki-bã wɛɛngẽ wã ye.

B sã n wa kos tigingã saam-biig t’a ges bũmb nins b sẽn segd n maan ned kũum sasa yelle, kãsem dãmbã tõe n kõo kiidã neb saglse, la b sõng-b tɩ b bãng bũmb nins fãa b sẽn tog n maan tɩ zems ne Biiblã sẽn yetã. Neb sẽn pa tũud a Zeova sã n wa rat n maan bũmb Wẽnnaam sẽn kisi, kiris-nebã segd n wilga vẽeneg tɩ b pa sake, la b maag b yĩng n wilg b sẽn pa sakã võor ne raoodo. (1 Pɩɛ. 3:15) La nebã sã n baas n ket n dat n maan yɛl sẽn pa segd ne pãnga, bõe la d segd n maane? Kiris-nebã tõe n yãka yam n bas-b ne kũumã tɩ b maan b yam. (1 Kor. 10:20) Sã n wa yaa woto, d tõe n tɩ maana sõsg Rĩungã Roogẽ wall zĩig a to, n tall Wẽnnaam Gomdã n bels neb nins sũy sẽn sãamã. (Rom 15:4) Baa b pa wa ne kũumã beenẽ, bũmb nins b sẽn na n maanã segd n zemsame la waoog Wẽnnaam. (Tõo. 34:5, 6, 8) Yaa sɩd tɩ neb sẽn pa tũud a Zeova sã n modg-d n maan bũmb sẽn pa segde, tõe n paasa d sũ-sãamsã la d yɩɩrã. La d sẽn mi tɩ Wẽnnaam yãa d sẽn modg n na n tũ a noyã, la d miẽ t’a kõta neb nins sẽn tũud-a ne b sũy fãa wã ‘pãn-kãsengã,’ na n belsd-d lame.—2 Kor. 4:7.

D gʋls d sẽn datã sebr zug n bĩngi

Ned sã n deng n gʋls sebr n wilg bũmb ning a sẽn dat tɩ b maan a kũum poore, na n yɩɩ nana ne a buudã neb sẽn pa tũud a Zeova wã tɩ b sake, bala nebã nong n sakd n tũuda kiidã raabo. Sebrã pʋgẽ, d tõe n wilga bũmb nins b sẽn segd n maanã, sẽn yaa zĩig ning la d rat tɩ b maan dẽ, la ned ning sẽn tar sor n na n lʋɩ taoor tɩ b maan dẽ fãa. (Sɩng. 50:5) Neb sã n maan kaset la b naag n sĩyn sebrã, wat n yɩɩ nana tɩ b tõog n tũ a raabã. Neb nins sẽn tar yam la sẽn tagsd  beoog yellã miime tɩ b pa segd n gũ b kʋʋlem wakat bɩ b sẽn wat n gãe n wõosd n dat n ki, n yaool n na n gʋls sebr n wilg b raabã ye.—Yel. 22:3; Koɛ. 9:12.

Sãnda tõe n getame tɩ yaa toog ne-b tɩ b reng n gʋls b sẽn dat tɩ b maan bũmb nins b kũum poorã. La d sã n maan woto, wilgdame tɩ d bɩɩ tẽebã wɛɛngẽ, la tɩ d nonga neb a taabã. (Fil. 2:4) La yaa sõma tɩ d reng n wilg yɛlã vẽeneg d toor d sẽn ket n vɩ sasa, la d ra bas tɩ buudã neb sũur wa yik rẽ yĩng tɩ b modg n maan yɛl tõnd sẽn pa rat la Biiblã sẽn gɩdg ye.

D ra maan yel-bɛd ye

Afirik zĩis kẽere, neb wʋsg tẽedame tɩ yaa tɩlae tɩ b ned kaalmẽ bɩ b maan yel-kãsemse, sẽn na yɩl tɩ yaab rãmbã sũur da yik ye. Neb kẽer tũnugda ne rẽ n na n wilg tɩ b yaa nin-bɛda, la tɩ b yaa arzɛk rãmba. (1 Zã 2:16) B rɩkda sẽk la ligd wʋsg sẽn na yɩl n maan kʋʋrã tɩ nebã bãng tɩ kiidã yɩɩ nin-kãsenga. Sẽn na yɩl n paam tɩ neb wʋsg zĩnd kʋʋrã sasa, b tabendeda kiidã foto rãmb zĩis toɛy-toɛya, sẽn na yɩl tɩ nebã yã n wa a kʋʋrã. B maanda fut sẽn tar kiidã foto, n pʋɩ nebã tɩ b yelge. B raada kũum koglg ligd sẽn yaa toogo, sẽn na yɩl tɩ nebã bãng tɩ kiidã yɩɩ nin-kãsenga. Afirik tẽng a ye pʋgẽ, kiidã neb pʋd n kɩtdame tɩ b maan kũum koglg sẽn wõnd mobilli, sɩlga, koom koglgo, bɩ bũmb a to, sẽn na yɩl n wilg tɩ b yaa nin-bɛd la tɩ b tara arzɛka. B tõeeme n yiis kũumã a koglgã pʋgẽ n gãneg gãag b sẽn maneg tɩ yaa sõma zugu. Kiidã sã n yaa paga, b tõeeme n yelg-a maryaas fu-pɛɛlga, la b ning-a nag-teedo. Rẽ yĩnga zemsame tɩ Wẽnnaam nin-buiidã naag n maan yel-kãensã sɩda?

Kiris-neb nins sẽn tũud Wẽnnaam noyã sõma wã miime tɩ b pa segd n maan wala neb nins sẽn pa mi a Zeova la b toog kae ne a noyã ye. Tõnd miime tɩ rog-n-mik kãensã ‘pa yit Wẽnnaam nengẽ ye. Yaa dũniyã rẽnda,’ la dũniyã na n looga ka la bilfu. (1 Zã 2:15-17) D segd n maana gũusg sõma n da wa maan wags-taab n na n wilg tɩ d yɩɩda d taabã ye. (Gal. 5:26) B gũus n gesame tɩ nebã sẽn zoet sẽn  ki-bã yĩnga, naoor wʋsgo, b sã n wʋm tɩ ned n kae, b kaoogd n waa kʋ-yirã, tɩ kɩt tɩ kiidã neb pa ye tõe n bãng n ges bũmb nins fãa sẽn na n maana yelle, tɩ tõe n wa lebg yaare. Neb wʋsg sẽn waoogd kiidã yĩnga, tõe n wa kɩtame tɩ b maan yɛl sẽn pa zems ne Biiblã noyã. Wala makre, b wiisdame n pa satẽ, b lobda kũum ligd la teed a taaba, n mobgd-a la b gomd ne-a wala a vɩɩme. Woto buud sã n maan kiris-ned kaalmẽ, sãamda a Zeova yʋʋre, la sãamd a nin-buiidã me yʋʋre.—1 Pɩɛ. 1:14-16.

D sẽn mi ned sẽn lebgd bũmb ning a kũum poorã, segd n kɩtame tɩ d ned sã n maan kaalem bɩ d ra maan wa neb nins sẽn pa mi a Zeova wã sẽn maandã ye. (Ef. 4:17-19) Baa ne a Zezi sẽn yɩ nin-kãseng n yɩɩd nebã fãa wã, a mumbã sasa b pa maan yel-kãsems ye. (Zã 19:40-42) Neb nins sẽn tar ‘Kirist tagsgã’ buudã pa get tɩ b sã n mum ned woto yaa paoogr ye. (1 Kor. 2:16) Vẽenega, d ned kũumẽ, d sã n pa bao n na n maan yɛlã n bao yʋʋre, na n sõng-d lame tɩ d ra kɩɩs Wẽnnaam noyã, la kɩt tɩ zũnd-zãnd ra zĩndi, tɩ Wẽnnaam ne a nin-buiidã yʋʋr paam waoogre.

D segd n maana kibs bɩ?

Mumbã poore, buudã neba, yagsã, la neb a taab mi n tigma taab n maan kibsa. Sasa kãnga, b nong n ningda mizik tɩ bʋrgã yaa wʋsgo, n saoodẽ, n yũud rãamã tɩ loogd nugu, la b tʋmd tʋʋm-dẽgdo. Neb kẽer tagsdame tɩ woto yaa sẽn na yɩl tɩ b yĩm b sũ-sãangã. Sãnda me tagsdame tɩ yaa b rog-n-mikã n baood tɩ b maan rẽ. La neb wʋsg tẽedame tɩ rẽ yaa tɩlae, sẽn na yɩl n waoog kiidã, la sõng-a t’a ta a yaab rãmbẽ.

Kiris-neb hakɩkã miime tɩ Biiblã sẽn yetã yaa sɩda. A yeta woto: “Sũ-sãoong n são laado. Tɩ bõe, nen-gãneng manegda sũuri.” (Koɛ. 7:3) Sẽn paase, b miime tɩ sẽn tar yõod yaa b sẽn na n tags ninsaal vɩɩmã sẽn yaa koɛɛgã zugu, la b tags Wẽnnaam sẽn na n wa vʋʋg sẽn ki-bã yelle. Sẽn mi-b a Zeova sõma wã pʋd n miime tɩ “ned kũum daar n são a rogem daare.” (Koɛ. 7:1) Woto yĩnga, kiris-nebã sẽn mi tɩ yaa tẽeb ziri n kɩt tɩ b maan kibs kãense, la b miẽ tɩ b tʋmda tʋʋm-yood dẽ sasa wã, b pa maand a buudu, la b pa kẽngd a buudã me ye. D sã n kẽng kibs a woto, wilgdame tɩ d pa waoogd a Zeova, la tɩ d toog kae ne rẽ sẽn tõe n maan d tẽed-n-taasã bũmb ningã ye.

D kɩt tɩ b bãng tɩ d pa maand wa neb a taabã ye

D sẽn paam n pa zoet sẽn ki-bã wa neb sẽn pa mi a Zeova wã, d sũy yaa noogo. (Zã 8:32) Tõnd sẽn yaa “vẽenem kamb” n mi bũmb ning Biiblã sẽn yet sẽn ki-bã wɛɛngẽ wã, kɩtame tɩ d pa wilgd d sũ-sãangã wa neb a taabã sẽn maand to-to wã, bala d miime tɩ sẽn ki-bã na n wa vʋʋgame. (Ef. 5:8; Zã 5:28, 29) Woto kɩtame tɩ d pa wilgd d sũ-sãangã tɩ loog nug wa neb nins sẽn pa tar saagrã sẽn nong n maandẽ wã ye. (1 Tes. 4:13) D sẽn mi tɩ sẽn ki-bã na n wa vʋʋgame wã na n sõng-d lame tɩ d kell n tũ a Zeova ne raoodo, n da bas tɩ ninsaal zoees gɩdg-d ye.—1 Pɩɛ. 3:13, 14.

Yaa d sã n tũud Biiblã noyã wakat fãa la d na n sõng nebã tɩ b bãng ‘neb nins sẽn sakd Wẽnnaam ne sẽn ka sakd-a wã n bake.’ (Mal. 3:18) Wakat n wat tɩ kũum ka na n le zĩnd ye. (Wil. 21:4) D sẽn gũud wakat kãngã wã yĩnga, bɩ d fãa modg n yɩ neb sẽn pa tar taal la sẽn yaa yɩlem a Zeova nifẽ, sẽn lak b mens fasɩ ne dũni-wẽng kãngã la a rog-n-migs nins fãa Wẽnnaam sẽn kisã.—2 Pɩɛ. 3:14.

[Foto, seb-neng 30]

Yɩta sõma tɩ d reng n gʋls d sẽn dat tɩ b maan d kũum poorã n bĩngi

[Foto, seb-neng 31]

Bũmb nins fãa sẽn maand kiris-ned kũumẽ wã segd n zemsame la yɩ ne waoogre