A Zeova Gomdã vɩɩme

Wilgr sebrã sak 13 n tãag sak 22 wã vaeesgo

BÕE n na n paam neb nins sẽn pa tũud Wẽnnaam a Zeova wã? La sẽn tũud-b a Zeova wã yẽ na n paama bõe? Bõe n na n paam a Sʋɩtãan ne a zĩn dãmbã? Bark bʋs la ãdem-bi-sakdbã na n paame, Kiristã sã n wa rɩt a naamã sẽn na n kaoos yʋʋm tusrã? Wilgri 13:1–22:21 * wã leokda sogs-kãensã la a taab sẽn tar yõod wʋsgo. Wilgr sebrã tõr pʋgẽ, yaa bõn-makr piig la a yoob la tʋm-tʋmd a Zã sẽn yã yʋʋmd 96 soabã sẽnesã. Wilgri sak 13–22 wã gomda yaoolem bõn-makr a wae wã yelle.

Tʋm-tʋmd a Zã yeelame tɩ “bark be ned ninga sẽn karemd bãngr-gom-kãngã la neb nins sẽn kelgd-a la sẽn deegd bũmb nins sẽn gʋls yẽ pʋgẽ wã zugu.” (Wil. 1:3; 22:7) D sã n karemd Wilgr sebrã la d tũud d sẽn karemdã, na n sõng-d lame tɩ d tũ Wẽnnaam ne d sũy fãa, la paas d tẽebã ne Wẽnnaam la a bi-ribl a Zezi Kirista. Leb n na n kɩtame tɩ d gũ bark toor-toorã d sẽn na n paam beoog daarã. *—Heb. 4:12.

B KIIGA WẼNNAAM SŨ-PUUGR TƲGD A YOPOE

(Wil. 13:1–16:21)

Wilgr 11:18 wã yeela woto: ‘Soolem toɛy-toɛy neb sũy ra yikame, la [Wẽnnaam] sũ-puugrã waame, la wakat taame, t’a na n sãam neb nins sẽn sãamd dũniyã.’ Bõn-makr a nii soabã wilgda Wẽnnaam sũ-puugrã võore, la a bilgd yɛl toɛy-toɛy ‘rũng sẽn tar zut a yopoe la yɩɩl piig’ sẽn maande.—Wil. 13:1.

Bõn-makr a wae soabã pʋgẽ, a Zã yãa ‘Pe-bilã sẽn yals tãng ninga sẽn boond tɩ Siõ wã zugu,’ tɩ neb tus koabga la tus pis-naas la tus a naas be ne-a. B yeelame tɩ nin-kãens “da paama fãagr nebã sʋka.” (Wil. 14:1, 4) Rẽ poore, malɛgs n pʋgl n moon koeese. Malɛg-kãens loogr poore, a Zã yãa ‘malɛgs a yopoe sẽn tar tʋgd a yopoe.’ A Zeova kõ-b-la noor tɩ b kẽng n tɩ kiig a “sũ-puugrã sẽn be tʋgd a yopoe wã pʋgẽ wã” a Sʋɩtãan dũniyã zĩis toɛy-toɛya. Wẽnnaam bʋ-kaoor koees n be tʋgd a yopoeyã pʋsẽ, n wilgd a sẽn na n kao bʋʋdã to-to wã. (Wil. 15:1; 16:1) Bõn-makr kãensã b yiibã kõta vẽenem n paasd toog a tãab-n-soabã ne baorg a yopoe soabã peebgã zugu. B bilgda Wẽnnaam bʋ-kaoorã sẽn na yɩ to-to wã n paasdẽ.—Wil. 11:14, 15.

Sogsg b sẽn leoke:

13:8—“Pebila vɩɩm sebrã” yaa bõe? Pa sebr sɩd-sɩd ye. Yaa bilgri. Yaa neb nins sẽn na n dɩ naam ne a Zezi Kirist saasẽ wã bal yʋy n be a pʋgẽ. Kiris-neb nins sẽn paam vʋʋsem sõngã zaeeb n nan ket tẽngã zugã yʋy zoe n bee be.

13:11-13—B sẽn yeel tɩ we-rũng ning sẽn tar yɩɩl a yiib n gomd wa dragõ wã kɩtame tɩ bugum yi yĩngr n sig tẽngã zugã võor yaa bõe? We-rũng sẽn tar yɩɩl a yiibã makda Amerik ne Ãngeletɛɛr sẽn naag taab n so pãng dũniyã zugã. B sẽn yeel t’a gomda wa dragõ wã, yaa t’a tũnugda ne weoogre, bugsg la pãng buud toor-toore, n modgd tẽns a taabã n dat tɩ b tũ bãmb naamã buudu. B sẽn yeel t’a kɩtame tɩ bugum yi yĩngr n sig tẽngã zugã, yaa a sẽn maand wa a  yaa Wẽnnaam no-rɛɛsa, n yetẽ t’a tõoga Sʋɩtãanã poorẽ dãmb dũni gill zab a yiibã sasa, la a tõog kominismã b sẽn boond tɩ wẽnd-kae naamã.

16:17—B sẽn yeel tɩ b kiiga tʋk a yopoe soabã “pemsmã” pʋgẽ wã võor yaa bõe? Pa pemsem sɩd-sɩdã ye. Pemsem ning yell b sẽn gomd ka wã yaa yam-wẽns nins a Sʋɩtãan sẽn kɩtd tɩ yeelgdẽ tɩ “zãgsdbã fãa” tũudẽ wã. Dũniyã neb fãa vʋʋsda pems-kãngã sẽn yaa zẽnemã.—Ef. 2:2.

Zãmsg tõnd yĩnga:

13:1-4, 18. Rũngã makda goosneemã rãmbã, tɩ koomã makd ãdem-biisã sẽn dãmbd taabã. Yãa sẽn yaa ãdem-biisã n sigind goosneema rãmbã la b sẽn yeel tɩ rũngã zẽk n yii koomã pʋgẽ wã. (Ezai 17:12, 13; Dan. 7:2-8, 17) Yaa a Sʋɩtãan n so rũn-kãngã la a kõt-a pãnga. Rũngã tara nimero sẽn yaa 666, tɩ wilgdẽ t’a yaa wẽng wʋsg Wẽnnaam nifẽ. D sẽn mi rũngã sẽn makd bũmb ningã, kɩtame tɩ d miẽ t’a pa segd ne pẽgr la waoogr ning neb wʋsg sẽn kõt-a wã ye.—Zã 12:31; 15:19.

13:16, 17. Baa vɩɩmã sã n wa keng tɩ kɩt tɩ yɩl n koos wall d da bũmb lebg toog to-to fãa, d pa segd n bas tɩ rẽ kɩt tɩ d tũ rũngã raab ye. D sã n deeg rũngã gʋlsem d nug rɩtgo, wall d rĩyẽ wã wilgdame tɩ d basame t’a soog-do.

14:6, 7. Malɛkã sẽn yeel bũmb ningã wilgdame tɩ tõnd segd n modg n moona Wẽnnaam Rĩungã sẽn lugl saasẽ wã koe-noog tɩ neb wʋsg paam n wʋme. D segd n sõnga neb nins d sẽn zãmsd Biiblã tɩ b bãng tɩ b segd n maoome n da wa sãam Wẽnnaam sũuri, la b pẽgd-a ne pʋ-peelem.

14:14-20. “Dũniyã bõn-koaadlã tigsgã” yaa nin-tɩrsã b sẽn na n fãagã tigsgu. B tigsgã poore, malɛkã na n wʋra “dũniyã viyn biis n ning Wẽnnaam sũ-puugr vẽ wẽkr koglg kãsengã pʋgẽ.” Viyn kãng yaa a Sʋɩtãan dũniyã goosneema rãmb ne b tʋʋm-wẽnsã b sẽn na n menes wakat fãa yĩngã. Tõnd segd n maoome tɩ dũniyã viyn kãngã ra soog-d ye.—Mat. 24:42, 44.

16:13-16. ‘Sɩ-wẽnsã sẽn wẽnd wa bulumbugdã’ yaa zĩn dãmb sẽn maand bõn-bãna, n belgd dũniyã rĩm dãmb tɩ b tẽed tɩ Wẽnnaam sũ-puugrã tʋgd malɛgsã sẽn kiigã pa na n maan-b bũmbu, la b kɩtdẽ me tɩ rĩm dãmbã tigimd taab n na n wa zab ne a Zeova.—Mat. 24:42, 44.

16:21. Nand t’a Sʋɩtãan dũniyã saab ta, tõe tɩ bʋ-kaoor koees kẽer Wẽnnaam sẽn na n taasã na n yɩɩ toog wʋsgo. Koe-kãens la b sẽn mak ne sapɩlmã. La ne rẽ fãa, ãdem-biis wʋsg na n ket n tʋʋda Wẽnnaam.

RĨM NING SẼN TÕOGÃ RƖTA NAAM

(Wil. 17:1–22:21)

“Babilon kãsengã” sẽn yaa dũniyã gill ziri tũudmã yaa a Sʋɩtãan dũniyã bõn-wẽng a ye. Bõn-makr 11 soabã mak-a-la ne ‘pʋg-yood-kãseng sẽn zao rũn-zẽega.’ A sẽn zao rũng ningã tara yɩɩl piiga. La yɩɩl kãensã na n wẽneg n sãama pʋg-yoodrã zãnga. (Wil. 17:1, 3, 5, 16) Bõn-makr ning sẽn pʋgl dẽ wã maka pʋg-yoodrã ne “tẽn-kãsenga,” n wilg t’a na n lʋɩɩme, la a sagl Wẽnnaam nin-buiidã tɩ b ‘yi a pʋgẽ’ tao-tao. A lʋɩɩsã sãama neb wʋsg sũyã. La saasẽ dãmbã yẽ kɩdemda sũ-noogo, bala “pe-bilã pʋg-peegr daar taame.” (Wil. 18:4, 9, 10, 15-19; 19:7) Bõn-makr 13 soabã pʋgẽ, b yeelame tɩ sẽn zao-a “wed-pɛɛlgã” zaba ne dũniyã soolem toɛy-toɛya. A tõog n menesa a Sʋɩtãan dũniyã fasɩ.—Wil. 19:11-16.

Bõe n na n paam a Sʋɩtãan b sẽn boond tɩ “wag-kʋdrã”? Wakat bʋg la b na n lob-a “bugum mogrã” pʋgẽ? Bõn-makr 14 soabã leokda sogs-kãensã. (Wil. 20:2, 10) Yaoolem bõn-makr a yiibã gomda ãdem-biisã vɩɩm sẽn na n yɩ to-to yʋʋm tusrã sasa. Baasgẽ wã, a Zã yãa ‘vɩɩm koom kʋɩlg sẽn zoet tẽngã sʋka,’ tɩ b boond ‘ko-yũud sẽn tar a soab’ fãa t’a wa yũ.—Wil. 1:1; 22:1, 2, 17.

 Sogsg b sẽn leoke:

17:16; 18:9, 10—Bõe yĩng tɩ “dũniyã rĩm dãmb” sẽn sãam Babilon kãsengã wẽneg n yãbd-a? B sẽn yãbdã yaa b sẽn bõnã yĩng bala. Rĩm dãmbã sẽn sãam Babilon kãsengã poore, b mikame t’a ra tara yõod wʋsg ne-ba. A ra belgda nebã tɩ b tẽed tɩ tʋʋm-beed nins dũniyã rĩm dãmb sẽn tʋmdã tata Wẽnnaam yam. Babilon kãsengã ra leb n sõngd-b lame tɩ b paamd kom-bɩɩs n tʋmdẽ tɩ b kẽnd zabã. Sẽn paase, a ra kɩtdame tɩ nin-buiidã sakd rĩm dãmbã.

19:12—Bõe yĩng t’a Zezi tar yʋʋr tɩ ned baa a ye ka mi yʋʋrã kall yẽ bala? Wõnda yʋ-kãng makda naam la tʋʋm nins a sẽn tʋmd Zusoabã daar sasa wã. Ezai 9:5 wã wilga a naam yʋy la tʋʋm kẽer a sẽn na n tʋme. B sẽn yeel tɩ ned baa a ye ka mi yʋʋrã kall yẽ balã, wilgdame tɩ yaa yẽ a ye bal n na n tʋm tʋʋm kãense, la tɩ yẽ bal n mi a naamã sẽn zẽk-a n ta zĩig ningã. La a Zezi kɩtame tɩ neb sull b sẽn boond t’a pʋg-paal na n sõng-a. A ‘gʋlsa a yʋ-paalgã bãmb me zugu.’—Wil. 3:12.

19:14—Ãnd rãmb n na n zomb wiid n sõng a Zezi n zab Armagedõ wã? ‘Kʋʋng toɛy-toɛy’ n na n sõng a Zezi n zab Wẽnnaam zabrã. Yaa malɛgsã n paas kiris-neb nins sẽn paam zaeeb n kell n sak Wẽnnaam n tãag b kũum n be saasẽ masã wã—Mat. 25:31, 32; Wil. 2:26, 27.

20:11-15—Ãnd dãmb yʋy la b sẽn gʋls “vɩɩm sebrã” pʋgẽ wã? Yaa neb nins fãa sẽn na n paam vɩɩm sẽn kõn sa wã yʋy n be seb-kãng pʋgẽ. Rat n yet tɩ kiris-neb nins sẽn paam zaeebã, kʋʋn-kãsengã nebã, n paas nin-tɩrs nins fãa Wẽnnaam sẽn na n vʋʋgã. (Tʋʋ. 24:15; Wil. 2:10; 7:9) Yʋʋm tusrã sasa, neb nins sẽn na n paam vʋʋgr la b yaool n pa nin-tɩrsã sã n sak n tũ noy nins sẽn be sɛb nins b sẽn na n lakã pʋsẽ wã, b na n gʋlsa bãmb me yʋyã “vɩɩm sebrã” pʋgẽ. La b ket n tõe n yẽesa ned yʋʋre. Kiris-ned sẽn paam zaeeb sã n dat t’a yʋʋrã pa sebrã zugu, a segd n kell n saka Wẽnnaam n tãag a kũum. (Wil. 3:5) La neb nins sẽn na n vɩɩmd tẽngã zugã sã n dat tɩ b yʋyã pa sebrã zugu, rẽndame tɩ b kell n sak Wẽnnaam makr ning sẽn na n zĩnd yʋʋm tusrã loogr poorã sasa.—Wil. 20:7, 8.

Zãmsg tõnd yĩnga:

17:3, 5, 7, 16. “Yam ninga sẽn yit yĩngrã” sõnga tõnd tɩ d bãng pagã la rũn-zẽeg ning a sẽn zao wã sẽn makd bũmb ninsi. (Zak 3:17) Sɩngrẽ wã, yɩɩ siglg ning b sẽn da boond tɩ Société des Nations wã, la rũndã-rũndã, yaa siglg ning sẽn ledg-a tɩ b boondẽ tɩ Nations Unies wã n makd rũngã. Rẽ yĩnga, d sẽn wʋm yel-kãensã võorã pa segd n kɩt tɩ d moond Wẽnnaam a Zeova Rĩungã koe-noog la a bʋ-kaoorã sẽn watã ne yẽesem sɩda?

21:1-6. D tõe n kɩsa sɩd zãng tɩ b sẽn pĩnd n togs tɩ Wẽnnaam Rĩungã na n waa ne bark ninsã fãa na n pidsame. Bõe yĩnga? Bala b goma bark kãens yell n yeel woto: “A maaname n sɛ!”

22:1, 17. Yaa segls nins fãa a Zeova sẽn dɩk n na n fãag ãdem-biisã ne yel-wẽnã la kũumã la b sẽn mak ne “vɩɩm koom kʋɩlgã.” D zoe n tõe n paama ko-kãngã rũndã-rũndã. Bɩ d sak b sẽn boond-d tɩ d wa “reeg vɩɩm koomã zaalmã,” la d modg ne d sũy fãa n sõng neb a taab me tɩ b paam-a.

[Tẽngr note]

[Foto, seb-neng 25]

Wẽnnaam Rĩungã naam sasa, ãdem-bi-sakdbã na n paama bark buud toor-toore!