A Zoob kell n pẽga a Zeova yʋʋrã
A Zoob kell n pẽga a Zeova yʋʋrã
‘Bɩ a Zeova yʋʋrã paam pẽgre.’—ZOOB 1:21.
1. Tog n yaa ãnd n gʋls a Zoob sebrã, la yɩɩ wakat bʋgo?
A MOIIZ sẽn wa n na n zoe n yi Ezipt n tɩ zĩnd Madiã sẽn na yɩl t’a Faraõ ra wa kʋ-a wã, rẽ t’a ra tara yʋʋm 40. (Tʋʋ. 7:23) Madiã ra pa zãr ne Uz tẽngã ye. Dẽnd tog n yaa a Moiiz sẽn da wa n be Madiã wã la a wʋm a Zoob namsgã kibare. Kaoosg zugẽ, a Moiiz ne Israɛll nebã sẽn wa n yit rasempʋɩɩgẽ wã, b wa n kolga Uz soolmã, la tõe tɩ yɩɩ sasa kãng la a Moiiz wʋm a Zoob yellã sẽn baas to-to wã. Zʋɩf rãmbã kʋdemdã kibay sɛb wilgdame tɩ yaa a Zoob kũumã poor bilf la a Moiiz gʋls a Zoob sebrã.
2. Wãn to la a Zoob sebrã kengd neb nins sẽn tũud a Zeova rũndã-rũndã wã tẽebo?
2 Rũndã-rũndã, a Zoob sebrã kengda Wẽnnaam nin-buiidã tẽebo. Wãn to? A Zoob kibarã sõngda tõnd tɩ d wʋm yel-kãsems sẽn zĩnd saasẽ võore. Yel-kãens wilgda b sẽn kɩɩs tɩ Wẽnnaam pa tar sor n na n yɩ yĩngr la tẽng naaba, tɩ wa ne yel-kãseng ningã. A Zoob kibarã leb n sõngd-d lame tɩ d bãng kell n sak Wẽnnaam wakat fãa sẽn baood tɩ d maan bũmb ningã sõma, la sõngd-d me tɩ d wʋm a Zeova sẽn mi n basdẽ t’a nin-buiidã namsdẽ wã võore. Sẽn paase, a Zoob sebrã wilgda vẽeneg t’a Sʋɩtãan yaa a Zeova ne ãdem-biisã bɛ-kãsenga. Sebrã leb n wilgdame tɩ baa toog wʋsg pʋgẽ, ned buudã fãa tõe n kell n saka a Zeova wa a Zoobe. Bɩ d ges yɛl kẽer b sẽn bilg a Zoob sebrã pʋgẽ.
A Sʋɩtãan maka a Zoobe
3. A Zoob yɩɩ nin-bʋg buudu, la bõe yĩng t’a Sʋɩtãan kisg-a?
3 A Zoob ra yaa ra-kãagr la ned b sẽn waoogd wʋsgo. Leb n da yaa rao sẽn get a zakã neb yell neere. Nebã ra nonga a saglsã, la sẽn paase, a ra maanda sẽn dat-b sõngrã neere. La sẽn tar yõod n yɩɩda, a Zoob ra zoeta Wẽnnaam. Biiblã yeela woto: “Yẽ yaa pʋ-peelem soaba la nin-sõngo. Yẽ ra zoeta Wẽnnaam n ka maand wẽng ye.” Yaa a Zoob sẽn da zoet Wẽnnaamã yĩng la a Sʋɩtãan sẽn kisg-a n da namsd-a wã. Pa a arzɛkã la nebã sẽn da waoogd-a wã yĩng ye.—Zoob 1:1; 29:7-16; 31:1.
4. Wẽn-sakd yaa nin-bʋg buudu?
4 A Zoob sebrã sɩngrẽ, b wilgame tɩ daar a ye, malɛgsã fãa tigma taab a Zeova taoore, t’a Sʋɩtãan me zĩnd be. La baraare, a rõda a Zoobe. (Karm-y Zoob 1:6-11.) Baa ne a Sʋɩtãan sẽn gom a Zoob paoongã yellã, a sẽn da baoodã yaa wilg bal t’a Zoob sẽn sakd Wẽnnaamã, pa ne pʋ-peelem ye. Ned sẽn yaa “wẽn-sakd” yaa ned sẽn yaa tɩrg la pʋ-peelem soaba. A pa maand wẽng ye. Biiblã pʋgẽ, b sã n yeel tɩ ned yaa wẽn-sakda, rat n yeelame t’a soabã tũuda Wẽnnaam ne a sũurã fãa.
5. Bõe la a Sʋɩtãan yeel a Zoob wẽn-sakrã wɛɛngẽ?
5 A Sʋɩtãan yeelame t’a Zoob sakda Wẽnnaam rẽ sẽn nafd-a wã yĩng lakae, pa ne pʋ-peelem ye. A yeelame tɩ yaa Wẽnnaam sã n ket n ningd a Zoob bark la a kogend-a la a na n ket n sakd-a. A Zeova basame t’a Sʋɩtãan mak nin-tɩrg a Zoobe, sẽn na yɩl tɩ b bãng a sẽn yeelã sã n sɩd yaa sɩda. A Sʋɩtãan sɩd maka a Zoobe. Daar a ye pʋgẽ bala, b wa n togs-a lame tɩ b zu a rũmsã pʋɩ-sʋka, la b kʋ sẽn ketã ne a tʋm-tʋmdbã, la b yeel-a t’a kambã bãmb piigã fãa me kiime. (Zoob 1:13-19) La rẽ yĩnga a Sʋɩtãan tõogame t’a Zoob bas Wẽnnaam sakr bɩ? Kibarã wilgda a Zoob manesem sẽn yɩ to-to a sẽn bõn a paoongã poore. Biiblã yetame t’a Zoob yeela woto: “Yaa Zusoabã n da kõ, la yaa bãmb n le reege. Bɩ b yʋʋrã paam pẽgre.”—Zoob 1:21.
6. a) Malɛgsã sẽn da wa n ye tigim taab a Zeova taoorã, bõe n maane? b) A Sʋɩtãan sẽn yeel tɩ ned na n dɩka a sẽn tar fãa n kõ a vɩɩm yĩngã rat n yeelame tɩ bõe?
6 Rẽ poore, malɛgsã ye wa n tigma taab a Zeova taoore, t’a Sʋɩtãan le rõd a Zoob yɛsa. A yeela woto: “Gãong ned gãong yĩnga. Ned na n dɩka a sẽn tar fãa n kõ a vɩɩm yĩnga. Masã, bɩ y tẽeg y nug n sɩɩs a kõabã ne a nemdã n ges a kõn tʋʋs yãmb y nifẽ?” Y sã n kelga a Sʋɩtãan goamã neere, y mikdame tɩ pa a Zoob a ye bal la a sẽn dõd ka wã ye. A sẽn yeel tɩ ‘ned na n dɩka a sẽn tar fãa n kõ a vɩɩm yĩngã,’ a rat n yeelame tɩ sã n wa yaa yõor yelle, “ned” buud fãa sẽn tũud a Zeova na n sak n kɩɩs-a lame. Rẽ kɩtame t’a Zeova bas a Sʋɩtãan t’a lobg a Zoob bã-wẽnga. (Zoob 2:1-8) La a Zoob toogã pa tek woto bal ye.
A Zoob sakrã sẽn kõt tõnd sagls ninsi
7. Bõe yĩng tɩ d tõe n yeel t’a Zoob pagã la rap nins sẽn wa n ges-a wã paasa a toogã?
7 Sɩngrẽ wã, a Zoob yellã namsa a pagã wʋsg wa sẽn nams yẽ mengã. B kambã kũumã n paas b paoongã sãoongã tog n sãama pagã sũur hal wʋsgo. A sẽn da ne a sɩdã sẽn namsd ne bã-toaagã yɩɩ toog ne-a me. Daar a ye, a yeela a sɩdã woto: “Yãmb ket n kengda y meng y pʋ-peelmã pʋgẽ la? Tʋʋs-y Wẽnnaam n ki tɩ sɛ.” Rẽ poore, rap a tãab n wa a Zoob nengẽ. B yʋy boondame t’a Elifaaze, a Bildaad la a Zofaar. B yeelame tɩ b wa n na n belsa a Zoob a toogã pʋgẽ. La bʋko, b sẽn gom goam ninsã paasa a Zoob toogã, t’a yeel tɩ b “fãa belsgã yaa toogo.” Wala makre, a Bildaad yeelame tɩ tõe t’a Zoob kambã beega Wẽnnaam t’a rol-ba. A Elifaaz yẽ yeelame tɩ tog n yaa a Zoob tʋʋm wẽns n lebd-a. A pʋd n yeelame meng tɩ bũmb pa wilgd tɩ nin-tɩrg tara yõod Wẽnnaam nifẽ ye. (Zoob 2:9, 11; 4:8; 8:4; 16:2; 22:2, 3) Baa ne goam kãensã fãa sẽn paas a Zoob toogã, a kell n paa a tɩrlmã pʋgẽ. Yaa sɩd t’a sẽn wa n ‘tẽed t’a tara bʋʋm n yɩɩd Wẽnnaamã,’ a tudgame. (Zoob 32:2) La baa ne rẽ, a kell n pa n yɩɩ wẽn-sakd a namsgã fãa pʋgẽ.
8. Mak-sõng bʋg la a Elihu kõ neb nins sẽn tog n sagl b taabã?
8 Ned a to me n da wa n na n kaag a Zoobe, t’a yʋʋr boondẽ t’a Elihu. A reng n maaga a yĩng n kelg a Zoob goamã la a kelg rap a tãabã me goamã. A Elihu yʋʋm da pa ta neb a naasã fãa ye. La baa ne rẽ, a talla yam wʋsgo. A sẽn wa n na n gom ne a Zoobã, a waoog-a lame. A pẽg-a-la a tɩrlmã yĩnga. La baasgo, a yeela a Zoob t’a goamã pʋgẽ, a baoa naoor wʋsg n na n wilg t’a pa tar taal ye. Rẽ poore, a Elihu kõ a Zoob bʋʋm, n wilg tɩ ned sã n maand Wẽnnaam daab wakat fãa, tara yõod wʋsgo, la sɩd seka pẽgre. (Karm-y Zoob 36:1, 11.) Ad a Elihu sɩd kõo neb nins sẽn mi n tog n sagl b taabã mak-sõng tɛkẽ! A reng n yõka a menga. Sẽn paase, a kelga goamã neere. Rẽ poore, a pẽga bũmb nins sẽn segd ne pẽgrã, n yaool n na n kõ sagls sẽn sõngde.—Zoob 32:6; 33:32.
9. A Zeova maana bõe n sõng a Zoobe?
9 A Elihu saglsã poore, yel-kãseng n maane. Wẽnnaam mengã n gom ne a Zoobe! Kibarã yeelame t’a Zeova “koɛɛg yii sobg pʋgẽ” n gom ne a Zoobe. A soka a Zoob sogsg buud toor-toore. Yaa sɩd t’a Zeova maaga a yĩng n gom ne a Zoobe, la a pa bas n pa togs-a sɩd sẽn na yɩl t’a rems a tagsgã ye. A Zoob sakame n deeg t’a kongame, n yeel woto: “Mam paoodame . . . Mam yam tekame tɩ m zĩ tom ne tompɛglem pʋgẽ n kot-y sugri.” Rẽ poore, a Zeova wilgame t’a sũur yika ne rap a tãabã sẽn wa n gom goam sẽn pa sɩd lae-laeyã. A Zeova yeela a Zoob t’a pʋʋs b yĩnga. A sẽn sakã poore, a Zeova “kɩtame t’a Zoob le lebg wa a pĩnda, yẽ sẽn pʋʋs bãmb a zo-rãmba yĩngã. Zusoaba paasa a Zoob bũmb nins fãa a sẽn da tara naoor a yiib n yɩɩd pĩnda.”—Zoob 38:1; 40:4; 42:6-10.
Tõnd nonga a Zeova ne d sũy fãa bɩ?
10. Bõe yĩng t’a Zeova pa sãam a Sʋɩtãan wall a maan wa a pa wʋm a rõdgã?
10 A Zeova n naan yĩngr la tẽnga. Yẽ la bũmb fãa soaala. A Sʋɩtãan sẽn wa n dõt a Zoobã, a Zeova ra tõe n maana wa a pa wʋme, wall a pʋd n sãam-a menga. La bõe yĩng t’a pa maan woto? Wẽnnaam da miime tɩ rẽ pa na n kɩt tɩ b bãng a Sʋɩtãan sẽn yeelã sã n yaa sɩd bɩ ziri ye. Sʋɩtãanã yeelame t’a Zoob sẽn sakd Wẽnnaamã yaa a paoongã yĩnga, la tɩ b sã n kɩt t’a bõn a paoongã, a na n basa Wẽnnaam sakre. A sɩd mak-a lame n gese, la a Zoob pa tol n bas Wẽnnaam ye. A Sʋɩtãan sẽn mik t’a pa tõogã, a yeelame tɩ ned kae n na n kell n sak Wẽnnaam bãag toog pʋgẽ, la tɩ b sã n kɩt tɩ bã-toaag nams a Zoobe, a na n kɩɩsa Wẽnnaam. A sɩd kɩtame tɩ bã-toaag yõk-a, la a Zoob kell n pa bas Wẽnnaam ye. Woto kɩtame tɩ lebg vẽeneg t’a Sʋɩtãan da rõta nin-kãngã sẽn yɩ nin-tɩrga, baa ne a sẽn da yaa koangd wa ned buud fãa wã. La rẽ yĩnga, wẽn-tũud fãa tõe n maana wa a Zoob bɩ?
11. Wãn to la a Zezi wilg vẽeneg t’a Sʋɩtãan sẽn yeelã fãa yaa ziri fasɩ?
11 Sɩd-sɩda, ned ninga fãa sẽn na n tõog n kell n sak Wẽnnaam baa a Sʋɩtãan sẽn na n nams-a ne toog ning fãa, a me tõogd n wilgame tɩ bɛ kãngã sẽn yaa wẽng wʋsgã sẽn yeelã pa yɩ sɩd ye. A Zezi sẽn wa tẽngã zugã, a kɩtame tɩ b bãng vẽeneg t’a Sʋɩtãan sẽn yeelã yaa ziri fasɩ. A Zezi ra yaa ned sẽn pa tar yel-wẽnd wa d yaab a Ãdem sẽn da yaa to-to nand t’a beegã. A sẽn tõog n kell n sak Wẽnnaam hal n tɩ ki wã wilga vẽeneg t’a Sʋɩtãan yaa ziri yagda, la tɩ bũmb nins a sẽn yeelã fãa yaa ziri fasɩ.—Wil. 12:10.
12. Bõe la tõnd fãa tõe la d segd n maane?
12 La baasgo, a Sʋɩtãan ket n makda neb nins sẽn tũud a Zeova wã. Woto kɩtame tɩ tõnd ned kam fãa tõe n wilg tɩ d sẽn sakd Wẽnnaamã yaa d sẽn nong-a lakae pa rẽ sẽn nafd tõndã yĩng ye. La d segd n sɩd maana woto, bala yaa zu-zẽkr meng n kõ-do. Bɩ bõe? Hakɩka, d sã n tõogd n sakd Wẽnnaam wakat fãa, d sɩd tõe n zẽka d zugu. Sẽn paase, d paamda raoodo, bala, d miime t’a Zeova kõt-d-la pãng tɩ d tõogd toogo, la d miẽ me tɩ wa a sẽn maan a Zoob nengẽ wã, a pa basd tɩ namsg loog d pãng ye.—1 Kor. 10:13.
A Sʋɩtãan sɩd yaa tɩtaam soab la kɩɩsda
13. Bõe la a Zoob sebrã sõngd tõnd tɩ d bãng a Sʋɩtãan zugu?
13 Biiblã sɛb nins b sẽn deng n gʋls ne gɛrkã sõngda tõnd tɩ d bãng a Sʋɩtãan sẽn kɩɩsd a Zeova to-to wã sõma n paase, tɩ Wilgr sebrã gomd a Zeova sẽn na n maan bũmb ning n wilg tɩ yẽ n sɩd segd n yɩ yĩngr la tẽng naaba, la a sãam Sʋɩtãanã zãng-zãngã. Kibay wʋsg me n be Biiblã sɛb nins b sẽn deng n gʋls ne hebre wã pʋgẽ, n gomd a Sʋɩtãan sẽn baood a Zeova noor la a tudgd ãdem-biisã to-to wã yelle. A Zoob sebrã sõngd-d lame tɩ d bãng bũmb wʋsg n paas a Sʋɩtãan kɩɩsgã wɛɛngẽ. Wala makre, d bãngdame t’a Zeova sẽn da tigim a malɛgsã t’a Sʋɩtãan me kẽngã, a pa kẽng n na n tɩ pẽg a Zeova ye. A kẽnga ne yam-wẽnga, n da rat n paam n maan sẽn pa segde. A sẽn dõd a Zoob t’a Zeova yeel-a tɩ bɩ a mak-a n gesã, a “yii [a Zeova] nengẽ n looge.”—Zoob 1:12; 2:7.
14. A Sʋɩtãan sẽn nams a Zoob to-to wã wilgda bõe?
14 Dẽnd a Zoob sebrã kɩtame tɩ d ne vẽeneg t’a Sʋɩtãan sɩd yaa ãdem-biisã fãa bɛ meng-menga. Zoob 1:6 sẽn gomd malɛgsã tigsg ning yellã poore, a Sʋɩtãan paama weer n nams a Zoob hal n tãag b tigsg ning yell b sẽn gomd Zoob 2:1 pʋgẽ wã sasa. Wakat kãng pʋgẽ, a Zoob sẽn kell n yɩ sakdã yĩnga, kɩtame t’a Zeova tõog n yeel a Sʋɩtãan woto: “Fo kɩtame tɩ m nams-a zaalem, la a ket n kengda a sũur a pʋ-peelmã pʋgẽ.” La a Sʋɩtãan pa sak n deeg t’a rõda a Zoob ye. A pʋd n kosame meng tɩ b kõ yẽ sor t’a ye mak-a n paas tɩ b gese. Woto kɩtame t’a paam n nams a Zoob a sẽn da wa n ket n tar a paoongã sasa, la a farã sasa me. A Sʋɩtãan sẽn nams a Zoob to-to wã wilgda vẽeneg t’a pa kʋmd naong rãmbã la neb nins sẽn namsd yel-beed toor-toor yĩngã nimbãaneg ye. A pʋd n kisa wẽn-sakdbã. (Zoob 2:3-5) La a Zoob sẽn kell n sak Wẽnnaamã, wilgame t’a Sʋɩtãan yaa ziri yagda.
15. Bõe n kɩt tɩ d tõe n yeel tɩ sɩdã kɩɩsdb wõnda a Sʋɩtãana?
15 A Sʋɩtãan n yɩ pipi n lebg kɩɩsda. Neb nins fãa sẽn kɩɩsd sɩdã rũndã-rũndã wã me sɩnga wa a Sʋɩtãan sẽn sɩng to-to wã. Tõe tɩ b reng n sɩnga tigingã neb kẽer wɩdga, pa rẽ bɩ kãsem dãmbã wɩdga, wall Siglgã taoor lʋɩtb Sull menga. Sɩdã kɩɩsdb kẽer yetame tɩ b pa segd n pʋt Wẽnnaam yʋʋrã sẽn yaa Zeova wã ye. B sẽn baood bũmb ningã pa b bãng a Zeova wall maan a raabã ye. Nin-kãensã kisa wẽn-sakdbã wala b ba a Sʋɩtãana. (Zã 8:44) Rẽ n kɩt tɩ neb nins sẽn tũud a Zeova wã zãagd b mens ne-ba.—2 Zã 10, 11.
A Zoob kell n pẽga a Zeova yʋʋrã
16. Baa ne a Zoob namsgã fãa, bõe la a maan-yã?
16 A Zoob ra pẽgda a Zeova yʋʋrã la a ra nong n pʋt-a. Baa ne a sẽn wa n wʋm t’a kambã fãa kiime wã, a pa tol n sãbg Wẽnnaam baa bilf ye. Baa a sẽn pa wʋm yɛlã võor n da tagsdẽ tɩ yaa Wẽnnaam n kɩt tɩ yel-beedã paam-a wã, a kell n pẽga a Zeova yʋʋrã. A namsgã wakate, a pʋd n yeela woto: “Gese, yaa Zusoaba zoees la yam, yaa wẽng basg la bãngre.”—Zoob 28:28.
17. Bõe n sõng a Zoob t’a kell n sak Wẽnnaam?
17 Bõe n sõng a Zoob t’a pa tol n kɩɩs Wẽnnaam? Yaa vẽeneg tɩ nand tɩ yel-beedã paam-a, a ra sɩng n nonga a Zeova la a sakd-a. Bũmb pa wilgd t’a Zoob ra miime t’a Sʋɩtãan da wẽeda no-koeemd ne a Zeova ye. La ne rẽ fãa, a ra yãka yam n na n kell n sak Wẽnnaam. A yeela woto: “Hal n tãag m kũum, mam kõn yi m burkĩndã pʋgẽ ye!” (Zoob 27:5, NW ) Bõe n kɩt t’a Zoob wa nong Wẽnnaam ne a sũur fãa woto? Sãmbg sẽn ka be, a ra wʋma Wẽnnaam manesem sẽn yɩ to-to ne a Abrahaam, a Izaak la a Zakoob sẽn yɩ a yaab-rãmbã, la yaa vẽeneg tɩ rẽ yɩ-a-la noog hal wʋsgo. Sẽn paase, a Zeova sẽn naan bũmb ninsã me sõnga a Zoobe. A bʋgsa bõn-kãens kẽer zut tɩ kɩt t’a ra mi a Zeova sõma.—Karm-y Zoob 12:7-9, 13, 16.
18. a) Wãn to la a Zoob wilgẽ t’a nonga a Zeova ne a sũur fãa? b) Wãn-wãn la d rɩkd a Zoob mak-sõngã?
18 Bũmb ning a Zoob sẽn bãng a Zeova zugã kɩtame t’a ra tʋll n ta a yam. Wala makre, b wilgame t’a sẽn da tagsd tɩ tõe t’a zakã rãmb “kongdame n beegd Wẽnnaam” t’a pa miẽ wã yĩnga, a ra nong n maanda maand b yĩnga. (Zoob 1:5) Baa a Zoob nams-toaagã pʋgẽ, a kell n talla a Zeova pẽgre. (Zoob 10:12) Ad a sɩd kõ-d-la mak-sõngo! Tõnd me segd n modgda wakat fãa n bãngd a Zeova la a raabã sõma n paasdẽ. D tara tʋʋm d sẽn minim n tʋmdẽ tɩ sõngd-d tɩ d ket n nong a Zeova wʋsgo. Wala makre, Biiblã zãmsgo, tigissã kẽnde, pʋʋsgã la koe-noogo moonego. Sẽn paase, sasa buud fãa, d maanda d sẽn tõe sẽn na yɩl n kɩt tɩ b bãng a Zeova yʋʋrã. La wa a Zoob sẽn kell n sak a Zeova tɩ yɩ-a noogã, neb nins fãa sẽn sakd a Zeova rũndã-rũndã wã me noogda a sũuri. Sõsg ning sẽn pʋgdã pʋgẽ, d na n goma rẽ yelle.
Y tẽrame bɩ?
• Bõe n kɩt t’a Sʋɩtãan kisg a Zoobe?
• Bõe n paam a Zoobe, la a manesem yɩɩ wãna?
• Bõe n na n sõng tõnd tɩ d kell n sak Wẽnnaam wa a Zoobe?
• Bõe la a Zoob sebrã sõngd tõnd tɩ d bãng a Sʋɩtãan zugu?
[Zãmsgã sogsgã]
[Foto, seb-neng 12]
Yel-bʋs pʋsẽ la Wẽnnaam sakr tõe n wa yɩ toog ne-yã?