Bũmb fãa tara a wakate

Biiblã yeelame tɩ “bũmb nins fãa sẽn maand dũniyã zugã tara b wakate.” Yaa rĩm a Salomo sẽn yɩ yam-kãseng soabã n gʋls gom-kãensã. A paasa woto: “rogem tara a wakate, la kũum me tara a wakate. Lubr wakat beeme, la meeb wakat me beeme. Nonglem wakat beeme, la kisgr wakat me beeme.” A Salomo wa n baas n soka woto: “Ninsaal namsga yõod yaa bõe?”—Koɛɛg Soaba 3:1-9.

NEB kẽer sã n karem gom-kãensã, b yetame tɩ Biiblã meng wilgdame tɩ Wẽnnaam deng n yãka bũmb fãa ne a wakate. Woto kɩtame tɩ b tagsdẽ tɩ b sẽn tẽed tɩ Wẽnnaam pʋlma nebã zemsa ne Biiblã. La rẽ yĩnga b tara bʋʋm bɩ? Biiblã sɩd wilgdame tɩ Wẽnnaam pʋlma ned kam fãa vɩɩm sẽn na n yɩ to-to bɩ? Sẽn mik tɩ ‘Gʋlsg Sõamyã zãng yaa Wẽnnaam n kõ tõndã’ yĩnga, Biiblã goam fãa tog n zemsa taaba. Rat n yeel tɩ d sã n karem bũmb Biiblã pʋgẽ, d pa tog n yã gomd Biiblã zĩig a to sẽn kɩɩsd bũmb ning d sẽn da karmã ye. Woto yĩng bɩ d bao n bãng Wẽnnaam Gomdã zĩis a taab sẽn yet bũmb ning pʋlengã wɛɛngẽ.—2 Tɩmote 3:16.

Wakat la zu-beed n be b fãa yĩnga

Koɛɛg Soab sebrã zĩig a to pʋgẽ me, a Salomo yeela woto: “Mam leb n yãame tɩ dũniyã zug ka, ka neb sẽn zoet tao-tao n tõogd zoees ye, la ka gãndaadã n tõogd zabr ye, la ka yam dãmb n paamd rɩɩb ye, la ka bãngdbã n paamd arzɛgs ye, la ka nin-yẽesems n paamd pẽgr me ye.” Bõe yĩng t’a yet woto? A wilga a gomdã võor n yeele: “Wakat n be bãmb fãa yĩnga, la zu-beed n be bãmb fãa yĩnga.”—Koɛɛg Soaba 9:11.

A Salomo ra pa rat n yeel tɩ bũmb nins fãa sẽn paamd ninsaalbã reng n pʋlmame ye. A ra rat n wilgame tɩ baa ãdem-biig sẽn modgd to-to fãa n na n maan bũmbu, a pa tõe n bãng sẽn na n baas to-to ye. Bala ‘wakat la zu-beed n be nebã fãa yĩnga.’ Naoor wʋsgo, nina mi n wa tɩ bee zĩig ning tɩ sabaab-wẽng ling-a zĩ-kãnga.

Wala makre, d bao n wʋm b sẽn yeel tɩ “ka neb sẽn zoet tao-tao n tõogd zoeesã” võore. Tõe tɩ y tẽrame wall y karmã yell ning sẽn zĩnd Etazĩni Losãzelɛs soolmẽ wã yʋʋmd 1984 soabã pʋgẽ, ze olẽmpik rãmbã sasa wã. Pagbã zoeesã sasa, sabaab n paam pagb a yiib sẽn da tõe zoees sõma, tɩ b ra tẽed tɩ b nin-yend n na n paam kũunã sẽn maan ne sãnemã tɩ b ned kam fãa me sɩd ra modgd n na n lʋɩ taoore. A ye wã ra yita Gãrãnd Bertayn t’a to wã yit Etazĩni. La zoeesã sasa, b yiibã wa n fão taaba. Yembrã lʋɩɩme n pa tõog n baas zoeesã ye. Pag a to wã kell n modgame la a sũurã sẽn da sãamã yĩng kɩtame t’a yɩ yopoe soaba.

Rẽ yĩnga yaa Wẽnnaam n da pʋlem tɩ na n yɩɩ woto bɩ? Neb kẽer na n yeelame tɩ n-ye. La yaa vẽeneg tɩ yaa b sẽn fão taabã n kɩt tɩ b baa a ye pa lʋɩ taoorã. Ned baa a ye me ra pa tõe n deng n bãng tɩ b yiibã na n fão taab ye. B sẽn fão taabã yaa Wẽnd pʋleng bɩ? Neb kẽer na n le yeelame tɩ n-ye. Kibay kɩtbã sẽn zĩnd beene wã yeelame tɩ yaa sẽn yaa wags-taab zoeese, tɩ b yiibã ned kam fãa tõe zoees n modgd n dat n deng a to wã yĩng n kɩt tɩ b fão taabã. Wala Biiblã sẽn yeelã, yaa “zu-beed” n paam b fãa. Baa  ned sẽn segl a meng sõma to-to n na n tʋm tʋʋmde, yel-lingdem tõe n kɩtame t’a modgrã pa yãk nenga, la yaool n pa pʋleng ye.

Sã n yaa woto, Biiblã sẽn yet tɩ ‘bũmb fãa tara a wakatã’ rat n yeelame tɩ bõe? Rẽ yĩnga d pa tar d sẽn tõe n maaneg sẽn na yɩl tɩ d beoog vɩɩmã yɩ sõma sɩda?

Tʋʋmd fãa tara a wakate

A Salomo gomdã pa rat n wilg tɩ bũmb nins fãa sẽn paamd ãdem-biisã reng n pʋlmame ye. A ra gomda Wẽnnaam daabã yelle, la ninsaalbã sẽn segd n tʋm tɩ zems rẽ wã me yelle. Bõe n wilgd rẽ? D sã n maag d yĩns n karm a sẽn deng n gom bũmb nins yell n yaool n na n yeel tɩ bũmb fãa tara a wakatã, n paas a sẽn yeel bũmb nins a gom-kãng poorã, sõngd-d lame tɩ bãng tɩ sɩd yaa woto. A reng n goma tʋʋm wʋsg nebã fãa sẽn mi tɩ b tara b wakat sẽn zems yelle, tɩ rẽ poor t’a yeel woto: “Mam yãa tʋʋmd ninga Wẽnnaam sẽn kõ ninsaalba tɩ b maanã. Bãmb maana bũmb fãa sõma n zems a wakate.”—Koɛɛg Soaba 3:10, 11.

Wẽnnaam kõ ãdem-biisã tõog tɩ b tõe n tʋm tʋʋm wʋsgo. A Salomo sõdga tʋʋm kẽere. La Wẽnnaam kõ nebã sor tɩ b tõe n yãk b yam tʋʋmd n tʋme. La baasgo, b segd n bãngame tɩ b sã n dat tɩ tʋʋmd yɩ sõma, segdame tɩ b tʋm-a tɩ zems ne a wakatã. Wala makre, a Salomo yeela Koɛɛg Soaba 3:2 pʋgẽ wã tɩ “Bʋdb tara a wakate, la tigsg me tara a wakate.” Ka-koaadbã miime tɩ koodã buud toor-toorã bʋdb tara b wakate. D rɩk makr ne ka-koaad sẽn na n maan a toog kae, n yãk wakat yaar n bʋd a sẽn date. Rẽ yĩnga, baa a sã n tʋma wʋsgo, koodã sã n  pa yɩ sõma, a tõe n yeelame tɩ yaa Wẽnd pʋleng sɩda? Yaa vẽeneg tɩ yaa ayo! Yellã yaa a sẽn pa bʋd tɩ zems wakatã. A sẽn da segd n maan bũmb ning yaa a maag a yĩng n gũ wakat ning Wẽnnaam sẽn yãk tɩ yaa bʋdb wakatã n bʋde.

Dẽnd bũmb ning Wẽnnaam sẽn deng n yãkã pa ninsaal vɩɩmã sẽn na n yɩ to-to, bɩ bũmb fãa sẽn na n baas to-to wã ye. Yaa noy kẽer ninsaalbã sẽn segd n tũ sẽn na yɩl tɩ b tʋʋmã yɩ sõma. Ãdem-biisã sã n dat tɩ b tʋʋmã tall bi-sõma, rẽndame tɩ bãng wakat ning sẽn zems ne tʋʋmd fãa, la b tʋm tɩ zems ne rẽ. Bũmb ning Wẽnnaam sẽn pʋlem tɩ pa tõe n toeemã yaa raab ning a sẽn tar ne tẽngã la ãdem-biisã hal sɩngrẽ wã lakae, pa ninsaal fãa vɩɩm sẽn na n yɩ to-to wã la sẽn pʋlmã ye. A Zeova kɩtame tɩ no-rɛɛs a Ezai yeel woto: “Gomd ningã sẽn yit mam noorẽ wã ka na n le wa mam nengẽ zaalem ye. A na n maana bũmb ningã mam sẽn datã. La a na n tõoga bũmb ningã mam sẽn tʋm-a t’a tɩ maanã.”—Ezai 55:11.

Bɩ d bao n bãng Wẽnnaam sẽn yeel bũmb ning tẽngã la ãdem-biisã beoog daar vɩɩmã zug tɩ pa tõe n pa pidsã.

Wakat ning Wẽnnaam sẽn yãkã sẽn yaa a soaba

A Salomo reng n yeelame tɩ Wẽnnaam “maana bũmb fãa sõma n zems a wakate.” Rẽ poore, sẽn na yɩl n sõng tõnd tɩ d wʋm a goamã võore, a paasa woto: “Bãmb ninga wakat sẽn ka sɛt tagsg ninsaal sũur pʋgẽ, baa ne yẽ sẽn ka tõe n tags n bãng tʋʋmd ningã Wẽnnaam sẽn maan hal sɩngr tɩ ta sɛɛbã.”—Koɛɛg Soaba 3:11.

Nebã sẽn wʋmd verse kãngã võor to-to wã pa a yen ye. La verse wã rat n yeelame bal tɩ tõnd ned kam fãa sũur pʋgẽ, d mii n sokda d mens n dat n bãng vɩɩmã yõodo, la beoog daarã sẽn na n yɩ to-to wã. Hal ãdem-biisã sẽn sɩng n be tẽng zugã tɛka, b getame tɩ ninsaal vɩɩmã pa tog n tek ned kam fãa modg n tʋm wʋsg n paam bũmb nins sẽn yaa tɩlae ne-a wã, tɩ kũumã wa kɩt tɩ fãa lebg zaalem ye. Wẽnnaam bõn-naandsã fãa sẽn be tẽngã zugã sʋka, yaa ninsaal bal n tõe n tags vɩɩmã yelle, la a tags sẽn wat beoog me yelle. D ned baa a yen pʋd n pa rat n ki ye. Bõe yĩng tɩ nebã pa rat n ki? Biiblã wilgdame tɩ yaa Wẽnnaam sẽn ‘ning wakat sẽn ka sɛt tagsg ninsaal sũur pʋgẽ’ wã yĩnga.

Ninsaalbã sẽn dat n vɩ wakat fãa n pa kiidẽ wã yĩng kɩtame tɩ b tẽed tɩ ned kũum poore, a tʋgd n vɩɩ zĩig a to. Kẽer yetame meng tɩ ninsaal tara sɩɩga, t’a kũum poor bɩ a sɩɩgã ket n vɩ. Sãnda me tẽedame tɩ ned sã n ki, b lebgd n dog-a-la zĩig a to. La baa ne rẽ, neb kẽer yetame tɩ bũmb nins sẽn paamd ninsaalbã pʋlmã Wẽndẽ, tɩ ned pa tõe n maan bũmb n toeem dẽ ye. La bʋko tags-kãensã fãa ket n yaa ninsaalb tagsg  bala. B ket n nan pa wʋm a võorã sõma ye. Bala sã n pa tũu ne Wẽnnaam sõngre, wa Biiblã sẽn yeelã, ninsaal sɩd “ka tõe n tags n bãng tʋʋmd ninga Wẽnnaam sẽn maan hal sɩngr tɩ ta sɛɛbã” ye.

Bãngdb wʋsg sɩng n maoodame n dat n bãng bũmb ning sẽn kɩt tɩ ninsaal baood n na n wʋm yel-kãngã võor n pa tõeyã. La sẽn mik tɩ yaa Wẽnnaam n ning vɩɩm sẽn ka sɛt tagsg ninsaal sũurã pʋgẽ wã, zemsame tɩ d tẽ t’a na n wa kɩtame tɩ d sɩd paam vɩ-kãnga. Biiblã pʋd n yeelame t’a Zeova ‘pukda a nugu, la bõn-vɩɩsã fãa paamda bark tɩ seke.’ (Yɩɩl Sõamyã 145:16) D sã n zãms Biiblã sẽn yaa Wẽnnaam Gomdã, d na n tõog n wʋma vɩɩmã la kũumã võore, la d bãng Wẽnnaam sẽn sɩng n dat tɩ tẽngã la ninsaalbã vɩɩm yɩ to-to wakat fãa yĩngã.—Efɛɛz rãmba 3:11.

[Foto, seb-neng a 5]

“Ka neb sẽn zoet tao-tao n tõogd zoees ye.”—Koɛɛg Soaba 9:11

[Foto, seb-neng a 6]

Rẽ yĩnga ka-koaad sã n pa bʋd tɩ zems ne wakatã t’a koodã pa yɩ sõma, yaa Wẽnd pʋleng sɩda?

[Foto, seb-neng a 7]

Yaa Wẽnnaam sẽn ‘ning wakat sẽn ka sɛt tagsg ninsaal sũurẽ’ wã yĩng n kɩt tɩ d tagsd vɩɩmã la kũumã yellã