Tʋm-tʋmd sẽn tũud sɩdã ne a taoor lʋɩtbã sulli
Tʋm-tʋmd sẽn tũud sɩdã ne a taoor lʋɩtbã sulli
“Ãnda n yaa tʋm-tʋmd sẽn tũud sɩd la sẽn tar yam t’a zu-soabã kõ-a noor t’a ges a zakã yelle, n moeneg a zakã wa sẽn zemse?”—LUK 12:42.
1, 2. A Zezi sẽn wa n wilgd a karen-biisã dũniyã yaoolem day bãndã, a soka sok-bʋg tɩ tar yõod ne-do?
A ZEZI sẽn da wa n wilgd a karen-biisã yɛl toɛy-toɛy nins sẽn na n yɩ bãnd n wilg tɩ dũniyã yaoolem day sɩngame wã, a wa n soka woto: “Ãnda n yaa tʋm-tʋmd sẽn tũud sɩd la sẽn tar yam t’a Zusoabã kõ-a noor t’a ges a zak yelle, n moeneg a zakã wa sẽn zemse?” Dẽ poore, a Zezi yeelame tɩ tʋm-tʋmd kãng Zusoabã na n dol-a-la a sẽn tũud sɩdã yĩnga, n kɩt t’a lebg a zakã fãa yel-gɛta.—Mat. 24:45-47.
2 Kiis a wãn sẽn deng rẽ, a Zezi ra zoe n soka sokr sẽn wõnd woto. (Karm-y Luk 12:42-44.) Gɛrk gom-bil ning b sẽn lebg Luk 12:42-44 moorã Biibl pʋgẽ tɩ “tʋm-tʋmdã” võor yaa “yel-gɛta.” Dẽnd baraarã, a Zezi boola tʋm-tʋmdã tɩ yel-gɛta. Yel-gɛt yaa ned b sẽn yãk t’a get zak rãmb bɩ tʋm-tʋmdb yelle. La yel-gɛtã me yaa ned ning sẽn yãk-a wã tʋm-tʋmda. Ãnda la tʋm-tʋmdã bɩ yel-gɛt ning yell a Zezi sẽn gomã, la wãn to la a ‘moenegd zakã wa sẽn zemse’? Tara yõod tɩ d fãa bãng Wẽnnaam sẽn tũnugd ne tʋm-tʋmd ning n sõngd a nin-buiidã tɩ b bãngd-a la b bãngd a raabã.
3. a) Kiris-neb ne yʋʋrã tũudum kiba-kɩtbã tagsdame tɩ tʋm-tʋmd ning yell a Zezi sẽn gomã yaa ãnd dãmba? b) Yaa ãnda la “yel-gɛtã” bɩ “tʋm-tʋmdã,” la yaa ãnda rãmb la ‘zakã rãmba’?
3 Kiris-neb ne yʋʋrã tũudum kiba-kɩtb kẽer nong n yetame tɩ yaa kiris-nebã tũudum toɛy-toɛyã taoor dãmb la a Zezi sẽn bool tɩ tʋm-tʋmdã. La a Zezi sẽn yaa tʋm-tʋmdã zusoabã pa yeel tɩ na n yɩɩ tʋm-tʋmdb wʋsg sẽn na n zĩnd dũniyã tũudum sul nins fãa sẽn yet tɩ b yaa kiris-nebã sʋk ye. A wilga vẽeneg tɩ na n yɩɩ “tʋm-tʋmd” bɩ “yel-gɛt” a yembre, a sẽn na n gũnug a paoongã fãa. Woto yĩnga, wa Gũusg Gasgã sẽn wae n wilgdẽ wã, yel-gɛtã tog n yaa neb sull ning a Zezi sẽn bool t’a “bãg-bilã,” rat n yeel tɩ kiris-neb nins sẽn paam vʋʋsem sõngã zaeebã. (Luk 12:32, NW ) D sã n karem a Luk evãnzillã sak 12:32-44 soabã, d bãngdame tɩ sɩd yaa nin-kãens yell la a Zezi sẽn da gomdã. Leb n yaa b fãa yembr-yembr la a sẽn bool t’a ‘zakã rãmb’ b sẽn segd n moenegã. La sokr n kete. Rẽ yĩnga, yaa tʋm-tʋmdã sull ned kam fãa n naagd n get zakã moenegr yell bɩ? D sã n maag d yĩng n vaees Biiblã, d yãta sok-kãngã leoorã vẽenega.
A Zeova pĩnd wẽndẽ tʋm-tʋmdã
4. A Zeova ra boola Israɛll nebã t’a bõe, la yaool n da yaa ãnd dãmb bal n da zãmsd nin-buiidã?
4 A Zeova ra goma pĩnd wẽndẽ Israɛllã neb sẽn da yaa a nin-buiidã yelle, n bool b fãa t’a tʋm-tʋmda. A yeel-b-la woto: “Yãmb yaa mam kaset dãmba, la mam [“tʋm-tʋmd,” NW ] mam sẽn yãke.” (Ezai 43:10) Yaa Israɛll nin-buiidã fãa sẽn naag taab n da yaa tʋm-tʋmdã wakat kãnga. La yaool n da yaa maan-kʋʋdbã la Levi buudã neb bal n da zãmsd nin-buiidã Wẽnnaam Tõogã.—2 Kib. 35:3; Mal. 2:7.
5. A Zezi wilgame tɩ toeeng bʋg n da na n wa zĩndi?
5 La rẽ yĩnga yaa Israɛll buudã la “tʋm-tʋmd” ning yell a Zezi sẽn da gomdã bɩ? Ayo. A sẽn yeel zʋɩf rãmbã bũmb ning baraarã n wilgd tɩ pa bãmb ye. A yeel-b-la woto: “B na n deega Wẽnnaam soolem yãmb nengẽ n kõ buud ninga sẽn na n maan tʋʋm sẽn zemse.” (Mat. 21:43) Woto wilgda vẽeneg tɩ “tʋm-tʋmdã” na n toeemame. A Zeova ra na n wa yãka buud a to tɩ ledg-a. La wa sẽn da yaa to-to pĩndã, pa “tʋm-tʋmdã” sull neb fãa n na n ges nin-buiidã zãmsg yell ye.
B yãka tʋm-tʋmd ning sẽn tũud sɩdã
6. Bu-paal-bʋg neb la b sɩng yãkr yʋʋmd 33 Pãntekotã sasa, la yaa ãnd dãmbã?
6 Bu-paalg ning b sẽn yãkã yaa ‘Wẽnnaam Israɛllã,’ rat n yeel tɩ neb nins fãa Wẽnnaam sẽn zae ne vʋʋsem sõngã. (Gal. 6:16; Rom 2:28, 29; 9:6) Bu-paal-kãng nebã yãkr sɩnga Wẽnnaam sẽn zae kiris-nebã ne vʋʋsem sõngã yʋʋmd 33 Pãntekotã sasa wã. Dẽ poor tɛka, Wẽnnaam sã n zae kiris-ned ne a vʋʋsem sõngã bala, a soab lebgda bu-paalgã neda. Yaa bu-paal-kãngã la a Zezi Kirist sẽn yaa b Zusoabã sẽn yãk tɩ yaa a tʋm-tʋmdã. A kõ b ned kam fãa noor t’a moon koe-noogã la a maan karen-biisi. (Mat. 28:19, 20) La rẽ yĩnga b ned kam fãa segd n naag n gesa nebã zãmsg yell bɩ? D bao n bãng Biiblã sẽn yet bũmb ninga.
7. Sɩngrẽ wã, tʋm-tʋmdbã tʋʋmd ra yaa bõe, la b wa n paas-b-la tʋʋm-bʋgo?
7 A Zezi sẽn wa n yãk a tʋm-tʋmdb 12 wã, tʋʋmd ning a sẽn bobl-b pipi yɩɩ koe-noogã moonego. A tʋm-b lame tɩ b tɩ moon koɛɛgã. (Karm-y Mark 3:13-15.) Gɛrk gom-bil ning sẽn yaa apostolosã kell n zemsa ne tʋʋm-kãnga, bala a yita gom-bil a to pʋgẽ, tɩ yẽ soabã rat n yeel tɩ “tʋm neda.” La kaoosg zugẽ, kiris-nebã tiging luglg sẽn wa n kolgã, tʋm-tʋmdbã tʋʋmd wa n lebga b tẽed-n-taasã “yell gesg” me.—Tʋʋ. 1:20-26, NW.
8, 9. a) Tʋm-bʋg yell la tʋm-tʋmdb 12 wã ra get n yɩɩda? b) Ãnd dãmb me la b wa n bobl tʋʋm-kãsems tɩ taoor lʋɩtbã sull sake?
8 Tʋm-bʋg yell la tʋm-tʋmdb 12 wã ra get n yɩɩda? D sã n ges yɛl nins sẽn zĩnd Pãntekotã loogr poorã, d paamda sok-kãngã leoore. B ra pʋɩta pʋg-kõapã rɩɩb daar fãa, la neb kẽer n da wa n yik n yẽgemd pʋɩɩbã poorẽ, tɩ tʋm-tʋmdb 12 wã tigim karen-biisã fãa n yeel-b woto: “A ka zems tɩ tõnd bas Wẽnnaam koɛɛga togsgo n pʋɩ neba rɩɩb ye.” (Karm-y Tʋʋm 6:1-6.) Rẽ poore, tʋm-tʋmdbã yãka saam-biis sẽn tar yʋ-noog tigingã pʋgẽ n “ning yell kãng bãmb zutu,” sẽn na yɩl n tõog n kell n ges “Wẽnnaam koɛɛgã togsg yelle.” B sẽn maan woto wã, kɩtame tɩ b paam a Zeova barka. Bala “Wẽnnaam koɛɛga saagame n yɩɩd pĩnda, la karen-biisa paasa wʋsg Zerizalɛm.” (Tʋʋ. 6:7) Dẽnd tʋm-tʋmdbã sẽn ges tʋʋmd ning yell n yɩɩd yɩɩ sõng nebã tɩ b bãng a Zeova la a raabã sõma.—Tʋʋ. 2:42.
9 Kaoosg zugẽ, b wa n bobla neb a taab me tʋʋm-kãsemse. Wala makre, vʋʋsem sõngã kɩtame tɩ Ãntios tigingã yãk a Poll ne a Barnabas n tʋm-b tɩ b gilg n moon koɛɛgã. B wa n boola bãmb me tɩ tʋm-tʋmdba, baa b sẽn da pa be tʋm-tʋmdb 12 wã sʋkã. (Tʋʋ. 13:1-3; 14:14; Gal. 1:19) Kiris-nebã taoor lʋɩtbã sull sẽn da be Zerizalɛmmã wa n wilgame tɩ b sakame t’a Poll ne a Barnabas na n yɩ tʋm-tʋmdba. (Gal. 2:7-10) Rẽ poor bilfu, a Poll paamame n naag neb nins sẽn get kiris-nebã zãmsg yellã sʋka. Wẽnnaam vẽneg-a lame t’a gʋls a pipi lɛtre.
10. Rẽ yĩnga sẽn paam-b vʋʋsem sõngã zaeebã fãa ra naagd n geta kiris-nebã zãmsg yell bɩ? Wilg-yã a võore.
10 La rẽ yĩnga ra yaa sẽn paam-b vʋʋsem sõngã zaeebã fãa n da naagd n get koɛɛgã mooneg yelle, la b get kiris-nebã zãmsg yell bɩ? Ayo. Tʋm-tʋmd a Poll soka sogsg sẽn wilgd tɩ sɩd ra pa b fãa ye. A soka woto: “Fãa yaa tʋm-tʋmdb bɩ? Fãa yaa Wẽnnaam no-rɛɛsdb bɩ? Fãa yaa karen-saam dãmb bɩ? Fãa tara bõn-bãn kũun bɩ?” (1 Kor. 12:29) Baa sẽn da paam-b vʋʋsem sõngã zaeebã fãa sẽn da moond koɛɛgã, yaa neb bilf bala, rat n yeel tɩ neb a nii la b yãkẽ tɩ b gʋls Biiblã sɛb 27 nins b sẽn gʋls ne gɛrk wakat kãngã.
Rũndã-rũndã tʋm-tʋmd sẽn tũud sɩdã
11. “Paoong” ning b sẽn gũnug tʋm-tʋmdã yaa bõe?
11 A Zezi goam nins sẽn be Matɩe 24:45 pʋgẽ wã wilgda vẽeneg tɩ neb sull sẽn da na n yɩ tʋm-tʋmd sẽn tũud sɩd la sẽn tar yam n na n zĩnd dũniyã saab wakate. Wilgr 12:17 wã goma nin-kãensã yelle, n bool-b tɩ pagã “yagensã sẽn kellã.” Kiristã rɩka a paoongã sẽn be tẽng zugã fãa n gũnug sul-kãnga. “Paoong” ning zusoabã sẽn yaa rĩmã sẽn gũnug a tʋm-tʋmd sẽn tũud sɩdã yaa a Rĩungã sẽn so bũmb nins fãa tẽngã zugã. Neb nins sẽn tũud zusoabã n paas roto, la tʋʋm-teed buud toor-toor sẽn sõngd-b tɩ b moond koɛɛgã naaga paoongã sʋka.
12, 13. Bõe n kɩtd tɩ kiris-ned bãng t’a paama saasẽ boollã?
12 Kiris-ned maanda wãn n bãng Wẽnnaam sã n yãk-a lame t’a na n wa tɩ vɩɩmd saasẽ, tɩ kɩt t’a be Wẽnnaam Israɛllã neb nins sẽn ket tẽngã zugã sʋka? Tʋm-tʋmd a Poll sẽn yeel a wakatẽ neb nins sẽn da na n wa tɩ vɩɩmd saasẽ wa yẽnda wã wilgda bũmb ning sẽn kɩtd tɩ b bãngdẽ wã. A yeela woto: “Tɩ bõe, neb nins Wẽnnaam Sɩɩgã sẽn tɛtã yaa Wẽnnaam kamba. La yãmb ka reeg yembd sɩɩga, tɩ kẽes yãmb dabeem yɛs ye. La yãmb deega Sɩɩg Sõngo sẽn kɩt tɩ tõnd yɩ Wẽnnaam kamba tɩ tõnd kelemdẽ n yetẽ: ‘Abba, Ba!’ La Sɩɩg Sõng mengã kɩta kaset ne tõnd sɩɩse tɩ tõnd yaa Wẽnnaam kamba. La tõnd sẽn yaa Wẽnnaam kamba, tõnd yaa neb nins Wẽnnaam sẽn bĩng b paoong b yĩnga, la tõnd yaa pʋɩt-n-taas ne Kirist, tõnd sã n paam pʋɩɩr ne bãmb namsgã, tõnd na n paama pʋɩɩr ne bãmb waoogra me.”—Rom 8:14-17.
13 D tõe n yeela koɛɛg-koɛɛg tɩ Wẽnnaam zaeya nin-kãens ne a vʋʋsem sõngã tɩ b paam saasẽ “boolgã,” rat n yeel tɩ b tõe n wa tɩ vɩɩmda saasẽ. (Heb. 3:1) Yaa Wẽnnaam a toor n boond b ned kam fãa. La b sã n paam boollã, zĩig pʋgẽ, lebgda vẽeneg b yamẽ wã tɩ sãmbs la rabeem kaẽ tɩ b sakame n na n lebg Wẽnnaam kamba. Biiblã yeta woto: “Sõng soabã zaeya yãmb ne vʋʋsem sõngo, la yãmb fãa tara bãngre. Mam sẽn gʋls yãmbã pa rat n yeel tɩ yãmb ka mi sɩdã ye, yaa yãmb sẽn mi sɩdã yĩnga, la ziri buud baa a ye kae sɩdã pʋgẽ ye.” (1 Zã 2:20, 21, NW) Dẽnd pa bãmb n yãkd b sã n dat n wa tɩ vɩɩmda saasẽ ye. Yaa a Zeova n yãkd-ba, n ning-b bãnde, rat n yeel tɩ n zae-b ne a vʋʋsem sõngã.—2 Kor. 1:21, 22; 1 Pɩɛ. 1:3, 4.
Tagsg ning sẽn zemsã
14. Sẽn paam-b vʋʋsem sõngã zaeebã tagsg yaa wãn ne b boollã?
14 Nand tɩ sẽn paam-b vʋʋsem sõngã zaeebã wa tɩ reeg b keoorã saasẽ, tags-bʋg la b ned kam fãa segd n talle? B fãa miime tɩ booll ning b sẽn paamã yaa zu-no-kãsenga, la baasgo, b miime tɩ nan yaa booll bala. Sẽn na yɩl n wa paam b keoorã, b segd n kell n talla tẽeb n tãag b kũum. B sẽn yaa sik-m-mens rãmb wa a Pollã, bãmb me yeta woto: “M ba-biisi, mam ka tagsd tɩ mam paam-a-la nand ye; la mam maanda bũmb a yembre; mam yĩmda bũmb nins sẽn be poorẽ n maoodẽ n dat n paam bũmb nins sẽn be taoorã. Mam dabda taoore n dat n paam Wẽnnaam [“saasẽ,” NW ] boolg kũuni Kirist Zezi maasem yĩnga.” (Fil. 3:13, 14) Sẽn paam-b zaeebã n ket tẽngã zugã fãa segd n maoome n ‘kẽn wa sẽn zems boolg ninga b sẽn bool-bã ne sik-m-menga,’ la “ne rabeem la rigbu.”—Ef. 4:1, 2; Fil. 2:12; 1 Tes. 2:12.
15. Kiris-neb a taabã tagsg segd n yɩɩ wãn ne kiris-neb nins sẽn yũud Tẽegrã divẽ la b wãbd a burã, la sẽn sɩd paam-b zaeebã tagsg yaa wãn ne kiris-neb a taabã?
15 La saam-biig wall saam-bi-poak sã n wa yeel t’a paama vʋʋsem sõngã zaeebo, n sɩng Tẽegrã divẽ yũub la a burã wãbre, kiris-neb a taabã manesem segd n yɩɩ wãn-wãn ne a soaba? B pa segd n wɩd-a ye. Paka yẽ ne a Zeova. (Rom 14:12) La kiris-neb nins sẽn sɩd paam vʋʋsem sõngã zaeebã pa baood tɩ kiris-neb a taabã tags tɩ b sẽn paam zaeebã yĩnga, b yɩɩd-b lame ye. B leb n pa tagsd tɩ b zaeebã kɩtame tɩ b gal yam la bãngr n yɩɩd kʋʋn-kãsengã nebã, la baa kʋʋn-kãsengã sʋk neb nins sẽn tar minim wʋsgã ye. (Wil. 7:9) B pa tagsd tɩ rẽ kɩtame tɩ b tar vʋʋsem sõngã n yɩɩd b tũud-n-taasã a Zezi sẽn boond t’a “piis a taabã” ye. (Zã 10:16) Tigingã pʋgẽ, b pa baood tɩ b waoogd-b n yɩɩd neb a taabã, la b pa yet me tɩ b sẽn yũud Tẽegrã divẽ la b wãbd a burã yĩnga, b yɩɩda tigingã kãsem dãmb ye.
16-18. a) Rẽ yĩnga yaa sẽn paam-b zaeebã fãa n naagd taab n vẽnegd Biiblã goamã võor n wilgdẽ bɩ? Rɩk-y makre. b) Bõe yĩng tɩ pa tɩlae tɩ Siglgã taoor lʋɩtb Sull deng n bãng sẽn yeel-b tɩ b paama zaeebã fãa tagsg n yaool n maan bũmbu?
16 Rũndã-rũndã, sẽn paam-b zaeeb n ket tẽngã zugã bee zĩig fãa dũniyã gill zugu. La rẽ yĩnga yaa b fãa n sõngd taab n vẽnegd Biiblã goamã n wilgdẽ bɩ? Ayo. Yaa sɩd tɩ yaa tʋm-tʋmdã n segd n ges zusoabã zak moenegr yelle, la pa b fãa n tʋmd tʋʋm toɛy-toɛyã ye. Pa b fãa n get kiris-nebã zãmsg yell ye. (Karm-y 1 Korẽnt dãmb 12:14-18.) Wa d sẽn zoe n gom tɩ loogã, pipi kiris-nebã wakate, b fãa ra naagd n moonda koɛɛgã. La yɩɩ neb bilf bal la Wẽnnaam kɩt tɩ gʋls Biiblã sɛbã la b ges b tigingã yelle.
17 D rɩk makr n wilg rẽ. B mi n yeela Biiblã pʋgẽ tɩ “Wẽnnaam tẽedbã” bɩ tigingã n maan bũmbu. Wala makre, tɩ b welga yelle. (Mat. 18:17) La baa b sẽn yeel tɩ tigingã n welg yellã, yaa kãsem dãmbã sẽn yaa tigingã taoor-lʋɩtbã bal n welg-a. Kãsem dãmbã pa rengd n saag n sok tigingã ned kam fãa n bãng a tagsg n yaool n wilg b sẽn na n maanegã ye. B tũuda Wẽnnaam noyã n tʋm tʋʋmd ning b sẽn bobl-bã, tigingã neb fãa neer yĩnga.
18 Woto me, rũndã-rũndã yaa sẽn paam-b zaeebã neb bilf bal n tʋmd b fãa yʋʋr yĩnga. Yaa bãmb la b sẽn boond t’a Zeova Kaset rãmbã Siglgã taoor lʋɩtb Sullã. Yaa nin-kãensã sẽn yaa rap balã n get Rĩungã koɛɛg mooneg yelle, la b get kiris-nebã zãmsg me yelle. La wa b sẽn da maand to-to pipi kiris-nebã wakatã, rũndã-rũndã me, Siglgã taoor lʋɩtb Sull sã n na n maan bũmbu, b pa rengd n sok sẽn zae-bã ned kam fãa n bãng a tagsg ye. (Karm-y Tʋʋm 16:4, 5.) La sẽn zae-bã fãa kẽesda b toog zãng-zãng koɛɛgã mooneg la karen-biisã maaneg tʋʋmdẽ. Sẽn yaa sẽn paam-b zaeeb n ket tẽng zugã fãa la “tʋm-tʋmd sẽn tũud sɩd la sẽn tar yamã” yĩnga, b yaa wa yĩng a yembre. La b tʋʋmã yaa toor-toore.—1 Kor. 12:19-26.
19, 20. Tags-bʋg sẽn zems la kʋʋn-kãsengã neb segd n tall “tʋm-tʋmd sẽn tũud sɩd la sẽn tar yamã” la a taoor lʋɩtbã Sull zugu?
19 Vẽnegr nins d sẽn paamã fãa segd n kɩtame tɩ kʋʋn-kãsengã neb sõor sẽn tar paasg rũndã-rũndã wã maan bõe? B sẽn naag n yaa rĩmã paoongã yĩnga, b sakda ne b sũy fãa n tũud bũmb nins fãa Siglgã taoor lʋɩtb Sull sẽn tʋmd “tʋmd-tʋmd sẽn tũud sɩd la sẽn tar yamã” yʋʋr yĩngã sẽn wilgdã. Kʋʋn-kãsengã neb sũur nooma ne bũmb nins Wẽnnaam sẽn tũnugd ne a Siglgã taoor lʋɩtb Sull n wilgd-bã. B waoogda “tʋm-tʋmd sẽn tũud sɩd la sẽn tar yamã.” La baasgo, b gũusdame n pa waoogd sẽn yeel-b tɩ b paama vʋʋsem sõngã zaeebã n yɩɩg kiris-neb a taabã ye. Kiris-neb nins sẽn sɩd paam vʋʋsem sõngã zaeebã baa a ye pa baood waoogr a woto buud ye.—Tʋʋ. 10:25, 26; 14:14, 15.
20 D sã n naaga ‘zusoabã zak rãmb b sẽn segd n moenegã,’ rat n yeel tɩ d paama zaeeb n ket tẽngã zugu, wall d yaa kʋʋn-kãsengã ned me, bɩ d fãa yãk yam n kell n sak tʋm-tʋmd sẽn tũud sɩdã ne a taoor lʋɩt-bã Sull ne d sũy fãa. Bɩ d ned kam fãa ket n ‘gũusdẽ’ la a yɩ sakd hal n tãag saabã.—Mat. 24:13, 42.
Y tẽrame bɩ?
• “Tʋm-tʋmd sẽn tũud sɩd la sẽn tar yamã” yaa ãnda, la Zusoabã zak rãmb yaa ãnd dãmba?
• Kiris-ned maanda wãn n bãng Wẽnnaam sã n yãk-a lame t’a na n wa tɩ vɩɩmd saasẽ?
• Yaa ãnd dãmb n segd n ges kiris-nebã zãmsgã yelle?
• Kiris-ned sẽn paam zaeeb tagsg segd n yɩɩ wãn ne kiris-neb a taabã?
[Zãmsgã sogsgã]
[Foto, seb-neng 28]
Rũndã-rũndã, Siglgã taoor lʋɩtb Sull tʋmda tʋm-tʋmd sẽn tũud sɩdã neb fãa yʋʋr yĩnga. Yɩɩ woto me pipi kiris-nebã wakatẽ