‘Wɩng-y ne tʋʋm-sõma maanego’!

‘A Zezi kõ a meng tõnd yĩng n fãag tõnd ne yel-wẽnã fãa la a kɩt tɩ tõnd lebg a neb a sẽn pek tɩ yɩ sõma, la sẽn wɩngd ne tʋʋm-sõma maanego.’—TƖT 2:14.

1. Yʋʋmd 33 soabã pʋgẽ, Nizã kiuug rasem piig raarã a Zezi sẽn kẽng wẽnd-doogẽ wã, bõe n maane?

YƲƲMD 33 soabã Pakã sẽn wa n kolge, Nizã kiuug rasem piig daarã, neb kʋʋng n da wa Zerizalɛm wẽnd-doogẽ wã n na n maan tigrã. A Zezi sẽn kẽng wẽnd-doogẽ wã, bũmb n maane. A Matɩe ne a Mark la a Luk fãa wilga b evãnzill dãmbã pʋsẽ tɩ baraare, a Zezi le riga neb nins sẽn da be beenẽ n koosd teedã. A luba ligd tekdbã tabl dãmba, la a lub neb nins sẽn koosd wala goeels me. (Mat. 21:12; Mark 11:15; Luk 19:45) Yʋʋm a tãab sẽn deng woto, a Zezi ra maana a buudu. A sẽn le rig nebã woto wã wilgdame t’a yẽesmã pa tol n boog ye.—Zã 2:13-17.

2, 3. Bõe n kɩt tɩ d miẽ tɩ bũmb nins a Zezi sẽn maan ne yẽesmã pa tek a sẽn dig koaasdbã ne ligd-tekdbã bala?

² A Matɩe wilga a evãnzillã pʋgẽ tɩ bũmb nins a Zezi sẽn maan baraar ne yẽesmã pa tek koaasdbã ne ligd-tekdbã rigb bal ye. A yeelame me t’a puka zoens nin la a maag koms-rãmba. (Mat. 21:14) A Luk me goma tʋʋm a taab a Zezi sẽn tʋm wakat kãng yelle.  A wilgame t’a Zezi “zãmsa nebã daar fãa Wẽnnaam dooga pʋgẽ.” (Luk 19:47; 20:1) Woto fãa wilgdame t’a Zezi sẽn wa n tʋmd a tʋʋmdã tẽng zugã, zãma wã ra neeme t’a sɩd ra tʋmda ne yẽesem.

³ Kaoosg zugẽ, tʋm-tʋmd a Poll gʋlsa a Tɩt n wilg-a t’a Zezi ‘kõ a meng tõnd yĩng n fãag tõnd ne yel-wẽnã fãa, la a kɩt tɩ tõnd lebg a neb a sẽn yɩlge, la sẽn wɩngd ne tʋʋm-sõma maanego.’ (Tɩt 2:14) Wãn to la tõnd tõe ‘n wɩng ne tʋʋm-sõma maaneg’ rũndã-rũndã? La wãn-wãn la Zida rĩm-tɩrsã mak-sõng tõe n sõng-d rẽ wɛɛngẽ?

Moon-y koɛɛgã la y maan karen-biisã ne yẽesem

4, 5. Bõe la Zida rĩm dãmb a naas maanẽ tɩ wilgdẽ tɩ b wɩnga ne tʋʋm-sõma maanego?

⁴ A Aza ne a Zozafat n paas a Ezekɩas ne a Zozɩas fãa yiisa neb n kɩt tɩ b menes bõn-naandsã pʋʋsg Zida. A Aza “yiisa bu-zẽmsã tẽn-kugã ne tẽn-kug nins sẽn be kunkub zutã la a kɛ ra-lugdsã la a wã bõn-naandsã.” (2 Kib. 14:2) A Zozafat sẽn da tũud a Zeova ne yẽesem wʋsgã kɩtame t’a “yiis kunkub tẽn-kugã ne bõn-naandsã Zida.”—2 Kib. 17:6; 19:3. *

⁵ Rasem a yopoe pak-kẽeng ning a Ezekɩas sẽn maan Zerizalɛmmã loogr poore, “Israɛll nebã fãa sẽn be be wã yiime n saag Zida tẽnsã pʋgẽ n kɛ rʋ-lugdsã la b sãam Astarte bõn-naandsã, la b wã kunkubã tẽn-kugã ne tẽn-kug a taabã sẽn be Zida ne Bẽnzame la Efrayim ne Manase wã, hali n sãam bãmb fãa.” (2 Kib. 31:1) A Zozɩas sẽn wa n na n deeg a naamã t’a tara yʋʋm a nii bala. A kibarã pʋgẽ b yeela woto: “Yẽ sẽn deeg naam tɩ yʋʋm niinẽ, n ket n yaa biiga, a sɩngame n bao a yaab a Davɩɩd Wẽnnaam. La yẽ sẽn deeg naamã tɩ yʋʋm piig la a yiiblẽ, yẽ sɩngame n yiis kunkubã tẽn-kugã ne ra-lugdsã la bõn-naandsã Zide ne Zerizalɛm.” (2 Kib. 34:3) Rĩm dãmb kãensã b naasã fãa sɩd wɩnga ne tʋʋm-sõma maanego.

6. Bõe yĩng tɩ d tõe n yeel tɩ tõnd koe-moonegã wõnda Zida rĩm sõma wã sẽn da kɩt tɩ b nin-buiidã maan bũmb ninsã?

⁶ Rũndã-rũndã, tõnd me sõngda nebã zĩig zãnga, n dat tɩ b paam b mens ne ziri tũudmã sẽn zãmsd-b bũmb ninsã la bõn-naandsã pʋʋsgo, wa Zida nebã sẽn da maanã. D sẽn moond koɛɛgã zak ne zakã yĩng kɩtame tɩ d segd neb buud toor-toore. (1 Tɩm. 2:4) Aazi bi-pugl a ye tẽra a ma wã sẽn da tar bõn-naands wʋsg b zakẽ wã n pʋʋsdẽ. Bi-pugl kãngã tagsame n bãng tɩ bõn-naands kãens toor-toorã fãa pa tõe n yaa Wẽnnaam sɩd-sɩdã ye. Rẽ kɩtame t’a ra wae n pʋʋsd Wẽnnaam n kotẽ t’a sõng-a t’a bãng-a. A sẽn wa n bãng Biiblã sẽn yet bũmb ning bõn-naandsã zugã, a pʋʋsa Wẽnnaam bark ne sũ-noog wʋsgo! Rũndã-rũndã, a moonda koɛɛgã sõma la ne yẽesem n sõngd neb tɩ b bãngd Wẽnnaam a Zeova la a raabã.—Yɩɩl 83:18, NW; 115:4-8; 1 Zã 5:21.

7. Wãn to la d tõe n dɩk neb nins a Zozafat sẽn da tʋm tɩ b saag n zãms Zida nebã makre?

⁷ Rẽ yĩnga d sẽn wat n moond zak ne zakã, d maanda d sẽn tõe fãa sẽn na yɩl tɩ koɛɛgã ta d moonegã zĩig neb zãng bɩ? D rɩk yam ne bũmb b sẽn maan rĩm a Zozafat wakatẽ wã. A naamã yʋʋm a tãab-n-soabã pʋgẽ, a kɩtame tɩ na-biis a nu, ne Levi buudã neb a wae la maan-kʋʋdb a yiib saag Zida tẽnsã fãa n zãms nebã a Zeova noyã. Nin-kãens tʋma b tʋʋmdã hal sõma, tɩ kɩt t’a Zeova rabeem yõk tẽns nins fãa sẽn gũbg Zida wã. (Karm-y 2 Kibay 17:9, 10.) D sã n moond ray nins la sasa ning nebã sẽn be b zagsẽ wã, d na n tõogd n paamd n sõsda ne neb wʋsgo.

8. Bõe la d tõe n maan n paas d koe-moonegã?

⁸ Rũndã-rũndã, kiris-neb wʋsg sakame n bas b zagse, n kẽng zĩis koe-moondbã sẽn pa  waoog n tɩ sõng n moon koɛɛgã. Yãmb me tõe n maana woto bɩ? Sẽn pa tõe n maan-b woto wã tõeeme n zãms buud-gom-zẽnga, n sõng sãamb nins sẽn be b moonegã zĩigẽ n gomd gom-kãngã. Saam-biig a Ron sẽn tar yʋʋm 81 wã mikame tɩ neb sẽn gomd buud-goam toɛy-toɛy n be b moonegã zĩigẽ. Rẽ kɩtame t’a yãk yam n zãms pʋʋsem ne buud-goam 32! Sẽn nan pa kaoose, a sega rao ne a pag sẽn yaa yorb-rãmba, n pʋʋs-b ne b buudã gomde. Raoã ne a pagã soka a Ron a sã n zĩnda Afiriki. La a leokame tɩ ayo, tɩ b sok-a t’a maana wãn n wʋmd b buudã gomde. Woto kɩtame t’a paam n moon-b koɛɛgã sõma. B sak n deega sɛbã, la b kõ-a b adɛrse. A Ron tɩ kɩsa adɛrsã tiging sẽn pẽ-ba, sẽn na yɩl tɩ ned tõog n tɩ zãms-b Biiblã.

9. Bõe yĩng tɩ tar yõod tɩ d karemd Biiblã koe-moonegã sasa? Togs-y kibar sẽn wilgd rẽ.

⁹ Karen-saam dãmb nins a Zozafat sẽn da tʋm tɩ b saag Zida wã talla a Zeova “tõodã sebr” n zãms nebã. Tõnd me sẽn moond koɛɛgã dũniyã gill zugã, d modgdame n talld Biiblã n zãmsd nebã, bala a yaa Wẽnnaam Gomde. D karemda Biiblã n wilgd-ba, sẽn na yɩl tɩ b bãng a sẽn sɩd yet bũmb ninga. Wala makre, d saam-bi-poak a Linda ra moonda koɛɛgã n ta zak noor tɩ pag yeel-a t’a sɩdã komsame n gãe t’a segd n ges a yelle. Pagã paasa woto ne nintãm: “Mam pa tol n mi m sẽn maan Wẽnnaam bũmb ning t’a sak tɩ yel-kãngã paam maam ye.” La a Linda leok-a-la woto: “M tõe n bõos n wilg-y-la bũmb sẽn na n keng y raood bɩ?” Rẽ poore, a karma Zak 1:13 sẽn yetã la a yeel pagã woto: “Yel-beed nins fãa sẽn paamd tõnd ne d nebã pa Wẽnnaam sɩbgr ye.” Pagã sẽn wʋm dẽ wã, a mobga a Linda n pʋʋs-a barka. Ad a Linda sẽn yeele: “Yaa Biiblã mam sẽn karmã n bels-a. Wakat ninga, d tõe n mi n karma verse rãmb kẽer n mik tɩ d kɛlgdã ra nan zɩ n wʋm-b ye.” A Linda sẽn sõs ne pagã to-to wã kɩtame t’a sak tɩ b na n wat n zãmsd-a Biiblã.

Kom-bɩɩs sẽn tũud Wẽnnaam ne yẽesem

10. Bõe n kɩt t’a Zozɩas yaa mak-sõng n kõ kom-bɩɩs nins sẽn yaa kiris-nebã?

¹⁰ D lebs n tẽeg a Zozɩas yelle. A sɩnga Wẽnnaam baoob t’a nan ket n yaa biiga. A sẽn wa n tar yʋʋm 20, a yãka yam n na n menes bõn-naandsã pʋʋsg Zida. (Karm-y 2 Kibay 34:1-3.) Rũndã-rũndã, kom-bɩɩs ka tɛk n tʋmd Wẽnnaam Rĩungã tʋʋm ne yẽesem wa a Zozɩase.

11-13. Kom-bɩɩs nins sẽn tũud a Zeova ne yẽesem rũndã-rũndã wã mak-sõngã kõta tõnd sagl-bʋse?

¹¹ A Hannah yaa bi-pugl sẽn vɩ Ãngletɛɛre. A sẽn da wa n tar yʋʋm 13 n zãmsd farend b lekollẽ wã, a wʋmame tɩ koe-moondb sul-bil n maand tigissã ne farende, n be tẽng a ye sẽn pa zãr ne-ba. Woto kɩtame t’a kos a ba wã t’a sak n na n yãagd-a tɩ b kẽnd tigissã beenẽ. Rũndã-rũndã, a Hannah tara yʋʋm 18, n yaa wakat fãa so-pakd n moond koɛɛgã ne farende, la  ne yẽesem. Rẽ yĩnga yãmb me tõe n zãmsa buud-gom-zẽng n paam n sõng nebã tɩ b bãng a Zeova bɩ?

¹² A Rachel gesa “ Poursuivez des objectifs qui honorent Dieu ” video wã hal tɩ yɩ-a noogo. Rẽ poore, a wilga a sẽn da tagsd to-to a sẽn wa n sɩng a Zeova raabã maaneg yʋʋmd 1995 soabã pʋgã, n yeel woto: “Mam da tagsdame tɩ m maanda a Zeova raabã ne m sũurã fãa.” La a paasa woto: “Mam sẽn ges darm kãngã wã poore, m mikame tɩ m da pa modgd wʋsg ye. Mam bãngame tɩ m segd n yẽega m meng a Zeova raabã maaneg pʋgẽ, n wɩngd ne Biiblã zãmsg la koɛɛgã moonego.” Rũndã-rũndã, a Rachel neeme t’a maanda a Zeova raabã ne yẽesem n yɩɩd pĩndã. Bark bʋs la a paam-yã? A yeela woto: “Zood ning mam sẽn tar ne a Zeova wã pãng paasame. M pʋʋsgã sõmblem me paasame. Masã, m zãmsda Biiblã sõma-sõma hal tɩ nafd-ma, tɩ m sã n karemd a kibayã me bɩ m wʋmd b võore. Woto kɩtame tɩ m nong koɛɛgã moonego, tɩ m sã n yãt a Zeova goamã sẽn belsd nebã to-to wã, noogda m sũuri.”

¹³ Bi-bɩɩg a ye yʋʋr sẽn boond t’a Luk gesa video a to tɩ keng a raoodo. Yaa Les jeunes s’interrogent . . . Que vais-je faire de ma vie ? video wã. Rẽ poore, a Luk yeela woto: “Video kãngã kɩtame tɩ mam zĩnd n tags m vɩɩmã zugu.” A paasa woto: “Pĩnda, b ra sagenda maam tɩ m deng n karem n zãag n wa paam tʋʋmd sẽn yaood sõma n yaool n ges Wẽnnaam tʋʋmã yelle. Sagl-kãensã buud pa sõngd ned t’a paas a zoodã ne a Zeova ye. B pʋd n komsda f tẽebã.” Kom-bɩɩse, rẽ yĩnga y tõe n dɩka a Hannah makrã, n bao n bãng y sẽn tõe n tũnug ne bũmb nins y sẽn zãms lekollẽ wã to-to n paas y koe-moonegã bɩ? Y leb n tõe n maana wa a Rachel, n yãk tʋʋmd Wẽnnaam tʋʋmã sʋk n tʋme. Rɩk-y-yã a Luk makrã me, tɩ na n kɩtame tɩ y gil bẽdg sẽn lubd kom-bɩɩs wʋsgo.

Tũud-y saglsã ne y sũy fãa

14. D sã n dat n tũ a Zeova tɩ ta a yam, bõe la d segd n maane, la bõe yĩng tɩ rẽ maaneg yaa toog rũndã-rũndã?

¹⁴ Sẽn na yɩl t’a Zeova nin-buiidã sẽn tũud-a to-to wã ta a yam, b segd n yɩɩ yɩlmã. A Ezai keoog-d-la woto: “Neb nins fãa sẽn zãad Zusoabã laasã, yii be, [rat n yeel tɩ Babilon pʋgẽ,] n looge. Loog-y-yã! Ra sɩɩs-y bõn-dẽgd ye. Yi-y-yã a pʋgẽ n maneg y mense.” (Ezai 52:11) Yʋʋm wʋsg sẽn deng t’a Ezai togs gom-kãensã, rĩm-sõng a Aza modgame n kɩt tɩ b yiis yoaadbã Zida. (Karm-y 1 Rĩm dãmb 15:11-13.) Kaoosg zugẽ, tʋm-tʋmd a Poll me yeela a Tɩt t’a Zezi kõ a meng n na n kɩt tɩ neb nins fãa sẽn tũud-a wã yɩ yɩlma ‘la b yɩ a neb sẽn wɩngd ne tʋʋm-sõma maanego.’ (Tɩt 2:14) Rũndã-rũndã, nebã manesem sẽn tar sãoong n debdã yĩnga, kɩtame tɩ yaa toog tɩ d tõog n kell n yɩ yɩlma. Sẽn yɩɩd fãa, kom-bɩɩsã. Wala makre, Wẽnnaam nin-buiidã fãa, kãsembã la kom-bɩɩsã segd n maoome tɩ yoobã yɛlã b sẽn wilgd zĩig zãngã ra rẽgem b sũyã ye. Televiziõ wã, filim dãmbã pʋsẽ la sẽn yɩɩd fãa, ẽntɛrnetã pʋgẽ, b wilgda yel-kãense.

15. Bõe n tõe n sõng-d tɩ d kisg wẽng buud fãa?

¹⁵ D sã n tũud Wẽnnaam noyã ne d sũy fãa, na n sõng-d lame tɩ d kisg wẽng buud fãa. (Yɩɩl 97:10; Rom 12:9) Wa saam-biig a yembr sẽn yeelã, sẽn na yɩl n tõog n bas yoobã yɛl b sẽn wilgdã gesgo, rẽndame tɩ f sɩd kisg-a ne f  sũurã fãa. Bala a yaa bẽdg sẽn tar pãng wʋsgo. Yaa wa ɛma sẽn na n yõk kutu. F sã n dat n lak-b taaba, rẽnda f tak ne pãnga. Yɩl n tõog n bas yoobã yɛl me gesgo, rẽnda f sɩd modg wʋsgo. La f sã n mi wẽng ning a sẽn maand nedã, na n sõng-f lame tɩ f sɩd kisg-a. Saam-biig a yembr sẽn da mi n get yel-kãensã ẽntɛrnetã pʋgẽ maana modgr wʋsg n tõog n base. A rɩka a ordinatɛɛrã n tɩ rɩgl zĩig a sẽn mi t’a pa tõe n widg-a t’a zakã neb pa ne-a ye. A sẽn maan woto wã toor sẽn ka be, a yãka yam ne a sũur fãa n na n tolg n bas yel-yoodã gesg fasɩ n tõog t’a yamã lebg yɩlemde. A yãka yam me n na n wɩng ne tʋʋm-sõma maanego. A pʋd n maana bũmb a to menga. A tʋʋmdã sẽn kɩt tɩ yaa tɩlae ne-a t’a tʋm ne ẽntɛrnetã yĩnga, a yãka yam n na n kɩtdẽ t’a pagã zĩnded a sɛɛgẽ.

Tara yõod tɩ d zãad d mens sõma

16, 17. D sẽn yaa kiris-neb n zãad d mens sõma wã kɩtame tɩ nebã yel-manesem yaa wãn to ne-do? Togs-y kibar sẽn wilgd rẽ.

¹⁶ Kom-bɩɩs nins sẽn maand a Zeova raabã, b pagb la b rap fãa zãada b mens sõma. La woto kɩtame tɩ neb wʋsg sɩd pẽgd-ba! (Karm-y 1 Pɩɛɛr 2:12.) Ned a ye sẽn da kẽng Lõndr Betɛllẽ wã n tɩ maneg masĩn toeema a sẽn da tagsd bũmb ning a Zeova Kaset rãmba zugã. Nin-kãngã pagã ra zãmsda Biiblã ne tõnd saam-bi-poaka. A pagã yãame t’a sɩd toeema yam. Pĩndã, a sɩdã ra pa rat tɩ saam-biisã kẽ a zakẽ wã ye. A sẽn tɩ maneg masĩnã Betɛllẽ wã, a sũur yɩɩ noog wʋsg ne saam-biisã sẽn tall manesem ning ne-a wã hali t’a pẽgda. A yeelame t’a pa tol n wʋm b baa a ye sẽn gomd gom-põos ye. La a paas tɩ b fãa yaa nin-bʋgsa, tɩ b zĩid-n-taarã yaa noogo. Bũmb sẽn yɩ-a noog n yɩɩd yaa a sẽn yã pʋgsadb la rasãmb sẽn tʋmd ne yẽesem, n dɩkd b pãng la b sẽk n sõngd sẽn na yɩl tɩ koe-noogã ta zĩig zãnga, tɩ yaool n pa yaood yĩngã.

¹⁷ Kom-bɩɩs nins sẽn tar nug-tʋʋm n tʋmd sẽn na yɩl n ges b roagdbã yellã me tʋmda ne b sũy fãa. (Kol. 3:23, 24) Woto kɩtame tɩ b tʋʋmã pa wae n sãamdẽ, bala b taoor dãmbã nong-b-la rẽ yĩnga, n pa rat tɩ b bas tʋʋmã ye.

18. Bõe la d tõe n maan n wilg tɩ d yaa neb sẽn ‘wɩngd ne tʋʋm-sõma maanego’?

¹⁸ D sã n teegd a Zeova, n sakd a noyã la d get d tigissã zĩis yell neere, d wilgdame tɩ d sɩd nonga a roogã, bala bõn-kãensã fãa naaga bũmb nins d sẽn maand n wilgd rẽ wã. Sẽn paase, d segd n moonda Rĩungã koɛɛg la d maand karen-biisã ne d pãng fãa. D yaa bi-bɩɩg tɩ d yaa kãsmã, d sẽn tũud Wẽnnaamã yĩnga, d sã n maand d sẽn tõe fãa n zãad d meng sõma, d na n paama bark buud toor-toore. D sã n modgd ne woto fãa maanego, zĩig zãnga, nebã na n neeme t’a Zeova nin-buiidã sɩd ‘wɩngda ne tʋʋm-sõma maanego.’—Tɩt 2:14.

[Tẽngr note]

Wãn to la kibay sẽn be Biiblã pʋgẽ la rũndã-rũndã neb mak-sõma sõng yãmb

• tɩ y bãng y sẽn tõe n moon koɛɛgã ne yẽesem to-to?

• tɩ y bãng kom-bɩɩs nins sẽn yaa kiris-nebã sẽn tõe n ‘wɩng ne tʋʋm-sõma maaneg’ to-to?

• tɩ y bãng y sẽn tõe n bas minim-wẽns to-to?

[Zãmsgã sogsgã]

[Foto, seb-neng 18]

Yãmb nong n karemda Biiblã koe-moonegã sasa bɩ?

[Foto, seb-neng 20]

Y sã n zãms buud-gom-zẽng lekollẽ wã, tõe n sõng-y lame tɩ y moon koɛɛgã n paase