Bɩ kiris-nebã zags rãmb fãa rɩk a Zezi makre
Bɩ kiris-nebã zags rãmb fãa rɩk a Zezi makre
‘Kirist basa mamsg ne yãmb tɩ y tũ bãmb nao.’—1 PƖƐ. 2:21.
1. a) Tʋʋm bʋs la Wẽnnaam bi-riblã tʋm saasã la tẽngã naaneg sasa? b) Bõe la a Zezi yeel ninsaalbã zugu, la bõe la rẽ wilgda?
WẼNNAAM sẽn wa n naand saasã la tẽngã, a pipi bi-riblã ra be a sɛɛgẽ n yaa a “tʋʋm mita.” A Zeova bi-riblã sõng-a lame n maan dũmsã la tɩɩsã toor-toor sẽn be tẽngã zugã. A sõng-a lame me n maneg zĩig ning b sẽn kɩt tɩ lebg arzãn tɩ b zĩnig d yaab a Ãdem ne a Hawa a Zeova sẽn naan a meng wõnegã. Nand tɩ Wẽnnaam bi-ribl kãngã sẽn yaa a Zezi wã wa tẽng zug ka menga, a ra zoe n nonga ninsaalbã. A meng yeelame tɩ ‘ninsaalbã kõo yẽ sũ-noogo.’—Yel. 8:27-31; Sɩng. 1:26, 27.
2. a) Bõe ne bõe la a Zeova maan ãdem-biisã sẽn yaa koangdbã neer yĩnga? b) Bõe la a Zeova maan n na n sõng zagsã rãmba?
2 D yaab a Ãdem ne a Hawa yel-wẽndã tɛka, b yagensã fãagr naaga a Zeova raabã pʋgẽ. A Zeova kɩtame tɩ Kiristã wa ki sẽn na yɩl n fãag-b yel-wẽndã yembd pʋgẽ. (Rom 5:8) Sẽn paase, a Zeova kɩtame tɩ b gʋls Biiblã sẽn yaa a gomdã n kõ ãdem-biisã, n na n sõng-b tɩ b bãng n vɩɩmd sõma baa ne b sẽn yaa koangdbã. (Yɩɩl 119:105) A kõo sagls a gomdã pʋgẽ, n na n sõng-b tɩ b tõog tɩ zems-n-taar la sũ-noog zĩnd b zagsã pʋsẽ. Sɩngr sebrã goma kãadmã yell n yeel tɩ ‘rao na n basa a ba ne a ma n zĩnd ne a paga; la bãmb na n yɩɩ yĩng a yembre.’—Sɩng. 2:24.
3. a) Bõe la a Zezi wilg kãadmã wɛɛngẽ? b) Bõe yell la d na n gom sõs-kãngã pʋgẽ?
3 A Zezi koe-moonegã sasa, a wilgame tɩ Wẽnnaam datame tɩ neb sã n kẽ kãadem bɩ b kãadmã kaoos b yõor tɛka. Sẽn paase, a wilga bũmb nins b sẽn segd n maan sẽn na yɩl tɩ kãadmã ra wa kao, la tɩ sũ-noog zĩnd zagsã pʋsẽ. (Mat. 5:27-37; 7:12) Sõs-kãngã pʋgẽ, d na n goma sagls a Zezi sẽn kõ zagsã rãmb yelle. Bɩ d ges a Zezi mak-sõngã sẽn tõe n sõng pʋg-sɩdbã, pagbã la kambã to-to, n kɩt tɩ zagsã pʋsẽ vɩɩm tall bark la kõ-b sũ-noogo.
Kiris-ned sẽn wilgd to-to t’a waoogda a paga
4. Zĩ-bʋg wɛɛngẽ la a Zezi ne pʋg-sɩdb nins sẽn yaa kiris-nebã zu-sobend wõnd taaba?
4 Wẽnnaam yeelame tɩ kãadem pʋgẽ, raoã la zakã zu-soaba, wa a sẽn kɩt t’a Zezi yaa tigingã zu-soabã. Tʋm-tʋmd a Poll yeela woto: “Sɩd yaa pag zu-soab wa Kirist sẽn yaa bãmb nebã zu-soabã, bãmb nebã sẽn yaa bãmb yĩnga, la bãmb yaa fãagda. Rapa, bɩ y nong y pagbã wa Kirist sẽn nong bãmb tẽedbã n kõ bãmb meng bãmb yĩngã.” (Ef. 5:23, 25) Sɩd me, a Zezi sẽn ges a karen-biisã Wẽnnaam sẽn bobl-a wã yell to-to wã yaa mak-sõng sẽn wilgd pʋg-sɩdb nins sẽn yaa kiris-nebã sẽn segd n ges b pagbã yell to-to. Bɩ d ges yɛl kẽer a Zezi sẽn maan tɩ wilgdẽ t’a pidsa a zu-sobendã sõma.
5. Wãn to la a Zezi ges a karen-biisã yelle?
5 A Zezi ra yaa ‘sũ-mar soaba, la nin-nana.’ (Mat. 11:29) La a sã n da wa yã bũmb a sẽn segd n maane, a maanda rẽ ne raoodo. A maana a sẽn da segd n maanã ne a sũur fãa. (Mark 6:34; Zã 2:14-17) A ra sagenda a karen-biisã ne bʋgsem. Baa sã n da wa yaa tɩlae t’a lebs n tẽeg-b saglg a sẽn da zoe n kõ-ba, a maanda rẽ ne bʋgsem. (Mat. 20:21-28; Mark 9:33-37; Luk 22:24-27) La ne rẽ fãa, a Zezi ra pa paoogd-b wall a yaand-b ye. A leb n da zɩ n maan bũmb tɩ kɩt t’a karen-biisã tags t’a pa nong-ba, bɩ tɩ b pa tol n tõe n tũ bũmb nins a sẽn wilgd-bã ye. A pʋd n da pẽgd-b lame la a kengd b raoodo. (Luk 10:17-21) Yaa vẽeneg tɩ yaa a Zezi nonglmã la a sẽn da wilgd t’a yaa wʋmdã yĩng n kɩt tɩ bãmb me ra nong-a la b waoogd-a wã.
6. a) A Zezi sẽn ges a karen-biisã yell to-to wã wilgda pʋg-sɩdbã bõe? b) Sagl-bʋs la a Pɩɛɛr kõ pʋg-sɩdbã?
6 A Zezi mak-sõngã wilgdame tɩ zu-sobend ning Wẽnnaam sẽn kõ pʋg-sɩdbã pa kõt-b sor tɩ b weoog b pagbã ye. B zu-sobendã pʋd n baoodame tɩ b nong-ba, n waoogd-ba, la b sak naong b yĩnga. Tʋm-tʋmd a Pɩɛɛr sagla rapã tɩ b rɩk a Zezi makr n nong b pagbã la b “waoogd-ba.” A yeela woto: “Rapa, bɩ yãmb me zĩnd ne y pagbã tɩ zems ne y sẽn mi-bã, n waoogd-b n miẽ tɩ pag yaa wa laag sẽn ka pãnga, bala yãmb ne bãmb fãa yaa vɩɩmã sẽn yaa lohorem y sẽn da pa segd ne wã pʋɩt-n-taase, tɩ bũmb ra gɩdg yãmb pʋʋsg ye.” (1 Pɩɛ. 3:7, NW ) La wãn-wãn la rao tõe n yaa a pag zu-soaba, la a leb n waoogd-a?
7. Wãn-wãn la rao tõe n wilg t’a waoogda a paga? Rɩk-y makr n wilgi.
7 Bũmb a ye rao sẽn tõe n maan n wilg t’a waoogda a pag yaa a sẽn na n sokd-a a tagsgo, a sã n wa rat n maan bũmb sẽn pak b zakã fãa. Wala makre, b sã n wa rat n toeem zaka, tʋʋmde, pa rẽ bɩ n yãk zĩig n tũ taab n tɩ vʋʋse, wall vɩɩmã sẽn lebgd toogã sã n kɩt tɩ b rat n boog teed kẽer b sẽn da raade. Sẽn yaa yɛl sẽn pak zakã fãa wã yĩnga, yɩta sõma tɩ raoã bãng a pagã tagsgo, la woto wilgdame me t’a waoogd-a lame, la t’a yaa wʋmda. Raoã sã n maan woto, b tõogd n yãka yam-sõngo, la na n yɩɩ nana ne pagã t’a tũ yam ning b sẽn yãkã. (Yel. 15:22) Pʋg-sɩdb nins sẽn yaa kiris-nebã sã n waoogd b pagbã, b paamdame tɩ b pagbã nong-b la b waoogd-ba, la sẽn yɩɩd fãa, b noogda a Zeova sũuri.—Ef. 5:28, 29.
Pag sẽn tõe n wilg to-to t’a waoogda a sɩda
8. Bõe yĩng tɩ pagbã pa segd n tũ a Hawa makrã?
8 A Zezi basa mak-sõng sẽn wilgd pagb nins sẽn yaa kiris-nebã me b sẽn segd n sak b sɩdbã zu-sobendã to-to. Yaa vẽeneg t’a Zezi tagsg sẽn da yaa to-to zu-sobendã sakr wɛɛngẽ wã yaa toor fasɩ ne d yaab a Hawa rẽndã! A Hawa pa kõ pagbã mak-sõng ye. A ra tara zu-soab a Zeova sẽn yãke, n tũnug ne yẽ n kõ-b noore. La a Hawa kɩɩsa noorã a sɩdã sẽn taas-a wã. (Sɩng. 2:16, 17; 3:3; 1 Kor. 11:3) Yaa sɩd tɩ b belga a Hawa, la a ra segd n deng n soka a sɩdã n bãng a sã n segd n saka koɛɛg ning sẽn yeel-a t’a kɩɩs Wẽnnaam noorã. La wall t’a maan woto wã, a yãka yam n na n wilg a sɩdã b sẽn segd n maanega.—Sɩng. 3:5, 6; 1 Tɩm. 2:14.
9. Zu-sobendã sakr wɛɛngẽ, mak-sõng bʋg la a Zezi kõ-do?
9 La a Zezi yẽ kõo mak-sõng sẽn ka to zu-sobendã sakr wɛɛngẽ. A manesmã, a tagsgã la a vɩɩmã fãa wilgame t’a pa bao n “na n deeg [Wẽnnaam] zĩiga, sẽn dat n yeel tɩ n bao n zeng Wẽnnaam ye.” A pʋd n “faaga a menga, n lebg wa yamba.” (Fil. 2:5-7, NW ) Rũndã-rũndã, baa a Zezi sẽn lebg Rĩma, a ket n sakda a Zusoabã. A sakda a Ba wã raab bũmb fãa pʋgẽ, la a wilgdẽ t’a Ba wã n yaa a Zusoaba.—Mat. 20:23; Zã 5:30; 1 Kor. 15:28.
10. Wãn to la pag tõe n wilg t’a sakame t’a sɩdã la a zu-soaba?
10 Pag sẽn yaa kiris-ned segd n dɩka a Zezi makrã, n wilgdẽ t’a sɩdã n yaa a zu-soaba. (Karm-y 1 Pɩɛɛr 2:21; 3:1, 2.) D ges a sẽn tõe n maand rẽ to-to. Wala makre, a biig sã n wa kos-a sor n na n maan bũmbu, sã n mik tɩ yẽ ne a sɩdã nan pa yẽs ne taab bũmb ning biigã sẽn dat n maanã wɛɛngẽ, yɩta sõma t’a sok biigã n ges a sã n deng n kosa a ba wã sore. Biigã sã n yeel t’a pa kos a ba wã sore, a segd n deng n yẽsa ne a sɩdã. Pag sẽn yaa kiris-ned pa segd n kɩɩs a sɩd gomd b kambã nifẽ ye. A sɩdã sã n yeel bũmb tɩ pa ta a yam, yɩta sõma t’a bas tɩ b sã n wa yaa b yiib bal bɩ a wilg-a a tagsgo.—Ef. 6:4.
Mak-sõng ning a Zezi sẽn kõ roagdbã
11. Mak-sõng bʋg la a Zezi kõ roagdbã?
11 Baa a Zezi sẽn pa kẽ kãadem la a pa tall kambã, a kõo kiris-neb nins sẽn yaa roagdbã mak-sõngo. Bõe yĩng tɩ d yet woto? A Zezi ra maagda a yĩng n zãmsd a karen-biisã ne a no-goamã la a manesmã. La a ra maanda woto ne nonglem. A tʋma tʋʋmd ning a sẽn bobl a karen-biisã, tɩ sõng-b tɩ b bãng b sẽn tog n tʋm-a to-to. (Luk 8:1) A Zezi manesem sẽn da yaa to-to ne a karen-biisã sõng-b lame tɩ b bãng b manesem sẽn segd n yɩ to-to ne taaba.—Karm-y Zã 13:14-17.
12, 13. Roagdb sã n dat n tõog n wub b kamb tɩ b wa yɩ wẽn-zoɛtba, bõe la b segd n maane?
12 Naoor wʋsgo, kambã nong n dɩkda b roagdbã makre. Baa sã n yaa mak-wẽnga. Woto yĩnga, roagdbã, sok-y y mens woto: ‘Mam kambã sã n get sẽk ning mam sẽn dɩkd n get tele wã la m deemd reem buud a taabã, la sẽk ning m sẽn dɩkd n zãmsd Biiblã la m yit koe-moonegã, kõt-b-la mak-bʋgo? Bõe yell n pak tõnd zakã rãmb n yɩɩda? Rẽ yĩnga tõnd lʋɩɩsda Wẽnnaam Rĩungã yɛl taoor n kõt d kambã mak-sõng bɩ?’ Roagdb sã n dat n tõog n wub b kamb tɩ b wa yɩ wẽn-zoɛtba, rẽndame tɩ Wẽnnaam goamã reng n kẽ bãmb mensã sũy sõma.—Tõo. 6:6.
13 Roagdbã sã n maood n tũud Biiblã noy wakat fãa, b kambã na n neeme, la rẽ la b na n sakd n deegd b saglsã la b sẽn zãmsd-b bũmb ninsã. La kambã sã n neẽ tɩ pa wakat fãa la b roagdbã tũud Biiblã noyã, b tõe n tagsame tɩ b yõodã pa waooge, wall tɩ b pa tõe n tũ-b ye. La woto na n kɩtame tɩ kambã sã n wa paam makr bɩ b kong pãng n kɩɩse.
14, 15. Bõe la roagdbã segd n sõng b kambã tɩ b maane, la wãn to la b tõe n sõng-b tɩ b maan dẽ?
14 Roagdb nins sẽn yaa kiris-nebã miime tɩ biig wubr pa tek ges t’a paam dɩɩbo, fut la teed a taab a sẽn dat bal ye. Dẽnd b sã n kɩt tɩ biig wa tagsdẽ t’a segd n baoa laogã bal tɩ rẽ n na n naf-a, pa yam tʋʋmd baa bilf ye. (Koɛ. 7:12) A Zezi sagla a karen-biisã tɩ b reng n bao Wẽnnaam Rĩungã ne a tɩrlmã. (Mat. 6:33) Woto yĩnga, roagdb nins sẽn yaa kiris-nebã segd n dɩka a Zezi makrã. B segd n mao n sõnga b kambã tɩ b wa yɩ neb sẽn nong Wẽnnaam daabã maanego.
15 Bũmb a ye sẽn tõe n sõng roagdbã tɩ b maan woto, yaa b sẽn na n baood soay tɩ b kambã sõsd ne kiris-neb nins sẽn yãk tʋʋmd Rĩungã tʋʋm sʋk n tʋmd wakat fãa wã. Wala makre, kom-bɩɩsã sã n minim n sõsd ne so-pakdbã la tigims sull yel-gɛtã ne a pagã, na n kengda b raoodo. Misioneer dãmba, Betɛllẽ tʋm-tʋmdb la sul nins sẽn gilgd n met siglgã rot toɛy-toɛyã neb wae n tara kibay sẽn wilgd sũ-noog ning b sẽn paamd b tʋʋmdã pʋgẽ wã. Roagdbã sã n boond nin-kãensã tɩ b wat n sõsd ne b zakã rãmba, b na n togs-b-la kibay kẽere. Kambã sã n yã nin-kãensã sẽn sak n bas yɛl kẽer baoob n maand a Zeova raabã, tõe n sõng-b lame tɩ b yãk yam n wa tʋm Rĩungã tʋʋm kẽere, la b bãng b sẽn tõe n zãms tʋʋm nins lekollẽ wã n wa tõog n ges b mens yell wakat kãnga.
Kambã, bõe n na n sõng-y tɩ y tũ a Zezi makrã?
16. Wãn to la a Zezi wilg t’a waoogda a Zozɛf ne a Maari la a saasẽ Ba wã?
16 Kambã, a Zezi basa mak-sõng n kõ yãmb me, tɩ y segd n tũ. A Zezi yãadmẽ, Wẽnnaam bobl-a-la a Zozɛf ne a Maari t’a ra segd n sak-ba. (Karm-y Luk 2:51.) A Zezi sak n deegame tɩ baa ne b sẽn yaa koangdbã, yaa bãmb la Wẽnnaam yãk tɩ b ges a yelle. Woto yĩng kɩtame t’a ra segd n waoog-ba. (Tõo. 5:16; Mat. 15:4) A Zezi sẽn wa n lebg kãsmã, a ra maanda sẽn noom a saasẽ Ba wã wakat fãa. Rat n yeel tɩ makr baa a ye pa tõog n kɩt t’a kɩɩs Wẽnnaam ye. (Mat. 4:1-10) B tõe n mi n wa ratame tɩ yãmb a kambã me kɩɩs y roagdbã. Bõe n tõe n sõng yãmb tɩ y rɩk a Zezi makrã, n yɩ sakdb wakat fãa?
17, 18. a) Mak-bʋs buud la kom-bɩɩsã segd lekollẽ wã? b) La bõe n tõe n sõng-b tɩ b tõog n da maan kɛgre?
17 Y karen-bi-taasã wʋsg pa mi Biiblã noy sõma, wall b pʋd n pa nand-b ye. Woto kɩtame tɩ b tõe n wa rat tɩ y naag-b n maan yɛl sẽn pa segde, tɩ y sã n tõdgdẽ bɩ b yaand-yã. Rẽ yĩnga y karen-bi-taasã zoe n pʋd-y-la yʋʋr n na n yaal-yã, y sẽn zãgs tɩ y kõn naag-b n maan bũmb yĩng bɩ? B sã n maand woto, y manesem yaa wãna? Y mii vẽeneg tɩ y sã n zoe y taabã nif n sak n naag-b n maan kɛgre, y na n sãama y roagdbã sũyã, la y sãam a Zeova sũuri. Y sã n sak y karen-bi-taasã raabo, bõe n na n maan-yã? Tõe tɩ y ra yãka yam n dat n wa lebg so-pakd wall kãsemb-sõngda, pa rẽ bɩ n wa kẽng zĩig koe-moondbã sẽn pa waoog n tɩ sõng n moone, wall y wa tɩ tʋm Betɛllẽ wã. Rẽ yĩnga y sã n sak n naag y karen-bi-taasã n maan yɛl sẽn pa segde, y na tõog n wa maan y sẽn datã sɩda?
18 Kom-bɩɩsã, rẽ yĩnga yell zoe n kɩtame tɩ y tʋlg n na n kɩɩs Wẽnnaam noyã bɩ? Yell a woto taoore, y maanda wãna? Tags-y mak-sõng ning a Zezi sẽn kõ-y-yã yelle. A kell n saka Wẽnnaam n pa tol n bas tɩ bũmb baa a ye kɩt t’a maan kɛgr ye. Y sã n tẽeg rẽ, na n kenga y raoodo, tɩ y tõog n wilg y taabã vẽeneg tɩ y pa na n naag-b n maan bũmb y sẽn mi tɩ pa segd ye. Wa a Zezi, tagsd-y sũ-noog ning y sẽn na n paame, y sã n wa tõog n sakd a Zeova la y maand a raabã y vɩɩmã tõre.—Heb. 12:2.
Bũmb ning sẽn kɩtd tɩ sũ-noog zĩnd zak pʋgẽ
19. Bõe n tõe n kɩt tɩ d paam sũ-noog hakɩka?
19 A Zeova ne a Zezi Kirist sɩd rata ãdem-biisã neere. B saglsã maasem yĩnga, tõnd tõe n paama sũ-noog d vɩɩmã pʋgẽ, baa ne d sẽn yaa koangdbã. (Ezai 48:17, 18; Mat. 5:3) A Zezi zãmsa a karen-biisã yɛl wʋsg b sẽn tõe n maan n paam sũ-noogo. La pa rẽ bal la a zãms-b ye. A wilg-b-la bũmb ning sẽn tar yõod n yɩɩd ninsaal vɩɩmã pʋgẽ wã. Sẽn paase, a vɩɩmã tõr yaa mak-sõng d sẽn segd n tũ. D zagsã pʋsẽ, d yaa zak soaba, d yaa pag tɩ d yaa biig me, d sã n tũ a Zezi makrã, na n naf-d lame. Woto yĩng bɩ d fãa tũ a mak-sõngã! Bɩ d modg n tũ bũmb nins a Zezi sẽn zãms nebã la d rɩk a makrã, tɩ rẽ la d na n paam sũ-noog d zagsã pʋsẽ.
Y na n leokame tɩ bõe?
• Wãn to la pʋg-sɩdbã segd n pids b zu-sobendã Wẽnnaam sẽn bobl-bã?
• Wãn to la pag wilgd t’a rɩkda a Zezi mak-sõngã?
• A Zezi manesem sẽn da yaa to-to ne a karen-biisã wilgda roagdbã bõe?
• Wãn to la a Zezi mak-sõngã tõe n naf kom-bɩɩsã?
[Zãmsgã sogsgã]
[Foto, seb-neng 13]
Rao sẽn nong a pag sã n wa rat n maan bũmb sẽn pak b zakã fãa, bõe la a na n deng n maane?
[Foto, seb-neng 14]
Segb-bʋs la pag tõe n tũnug n wilg t’a sakame t’a sɩdã la a zu-soaba?
[Foto, seb-neng 15]
Kambã rɩkda b roagdbã mak-sõngo