Ned n be tɩ mam yell pak-a bɩ?

Rẽ yĩnga yãmb sũur zoe n sãamame hal tɩ y tags tɩ y pa tar ned sẽn tõe n sõng-yã, tɩ nebã pa mi yãmb sẽn namsd to-to wã, la tɩ baa b sã n miime me b toog kae bɩ?

D ZU-LOEESÃ sã n mi n wa yaa wʋsgo, lebgda wa sa-kẽeng sẽn nagd ned n pa yoogdẽ ye. Sasa ninga, d tõe n wa tagsdame tɩ yaa tõnd d ye bal la yɛlã fãa sigda, tɩ yaa n yɩɩda d pãnga, la tɩ d pa na n le tõog ye. Naoor wʋsgo, yaa d sã n wa tar zu-loe-kãsems la d tagsd woto. Tõe n yaa bũmb n sãam d sũur hal tɩ d yamã le ka vɩɩmã, wall bã-kɛgeng n yõk-do, pa rẽ bɩ sãmpogr la d paam tɩ koms-do, wall yɛl a taaba. Zu-loees a woto sasa, d tõe n tagsdame tɩ ned kae n na n sõng-do, la tɩ sẽn maand kae, tɩ kɩt tɩ d pa mi d sẽn tõe n tɩ paam belsg zĩig ning ye. La rẽ yĩnga ned n be tɩ tõnd yell pak-a bɩ?

Tõnd yell paka “belsg fãa Wẽnnaamã”

B boola Wẽnnaam Biiblã pʋgẽ tɩ “nimbãan-zoeer Ba la belsg fãa Wẽnnaam.” (2 Korẽnt dãmba 1:3) Wẽnnaam a Zeova miime tɩ tõnd rata belsgo. Biiblã pʋgẽ, b gomda belsg yell hal sẽn yɩɩd naoor koabga, la rẽ fãa yaa sẽn na yɩl n sõng-d tɩ d kɩs sɩd tɩ Wẽnnaam mi d zu-loeesã, la t’a ratame me n bels-do. D sã n bãng woto, kɩtdame tɩ d miẽ tɩ baa sã n wõnd neb a taabã pa ne d sẽn namsdã, wall b maand b toog kae, a Zeova yẽ neeme la a na n bels-d lame la a sõng-do.

D sã n karem Biiblã, d sɩd yãta zĩis wʋsg sẽn wilgd t’a Zeova geta ãdem-biig fãa yelle. Wala makre, b yeela woto: “[A Zeova] nee zĩiga fãa. Bãmb nee nin-wẽnsã ne nin-sõma wã fãa.” (Yelbũna 15:3) Zoob 34:21 wã me yeta woto: “Wẽnnaam geta nebã fãa kẽna. Bãmb yãta bũmb nins fãa nebã sẽn maandã.” A Zeova nee tõnd tʋʋmã fãa, tʋʋm sõma wã la tʋʋm-wẽnsã fãa. A leb n mi ned kam fãa yɛl sẽn yaa to-to, tɩ kɩt t’a mi a sẽn na n sõng-a to-to tɩ zems ne rẽ. No-rɛɛs a Hanani sẽn zĩnd Zida rĩm a Aza naamã sasa wã ra goma gomd sẽn sɩd wilgd rẽ. A yeela woto: “Zusoaba nif geta dũniyã zĩiga fãa n dat n sõng neb nins sẽn dat Wẽnnaam ne b sũyã fãa wã.”—2 Kibaya 16:7, 9.

Bũmb a to yĩng me n kɩt t’a Zeova get ãdem-biisã. A Zezi yeela woto: “Ned ka tõe n wa mam nengẽ tɩ ka m Ba sẽn tʋm-a maamã n bool-a ye.” (Zã 6:44) A Zeova rata ãdem-biisã neer hal tɩ kɩt t’a feesd nebã sũyã, n dat n bãng b sã n tʋll n bãng-a lame. A sã n ges ned sũur n mik t’a soab rat n bãng-a lame, a sõngd-a lame. Wala makre, Repiblik Dominikɛn pag a ye n da bẽed kãnsɛɛr n be logtor yiri, tɩ b segd n maan-a woperasiõ. A pʋʋsa Wẽnnaam ne a sũur fãa n kos t’a sõng-a t’a bãng tũudum hakɩkã. A pʋʋsgã poor bilfu, a sɩdã wa n kõ-a-la sebr gom-zug sẽn yaa Bõe la Wẽnnaam dat tɩ tõnd maane? * n yeel-a tɩ yaa yibeoogã bal la pag a ye sẽn yaa a Zeova Kaset soab pɩʋʋg b zakẽ wã n moon koɛɛgã, tɩ yẽ reeg sebrã. Pagã sẽn karem sebrã a bãngame tɩ Wẽnnaam deega a pʋʋsgã. A  sak n na n zãmsa Biiblã ne Kaset soabã, la pa yã n maan kiis a yoob la a rɩk a meng n kõ Wẽnnaam n deeg lisg ye.

D sã n karemd Yɩɩl Sõamyã sebrã sẽn be Biiblã pʋgẽ wã, d yãta zʋɩf rãmb sẽn yɩ yɩɩl-gʋlsdb goam sẽn sɩd kengd raoodo. Wala makre, rĩm a Davɩɩd yɩɩlã pʋgẽ, a goma a Zeova sẽn nong a nin-buiidã n get b yell to-to wã yelle. Yɩɩl Sõamyã 56:98, in NW wã pʋgẽ, a Davɩɩd pʋʋsa a Zeova n kos-a woto: “Sui-y mam nintãmã y ko-waoog pʋgẽ. Bãmb ka be yãmb sebr pʋgẽ sɩda?” Yaa bũmb sẽn tar yõod la b suiid waoogẽ n bĩngi. Dẽnd a Davɩɩd gom-kãensã wilgdame t’a ra miime t’a Zeova ne a zu-loeesã, la a mi rẽ sẽn namsd-a to-to wã. A Zeova ra mi a Davɩɩd namsgã, la a tẽr bũmb nins sẽn kɩt t’a raag nin-tãma menga. Hakɩka, tõnd naandã geta neb nins fãa sẽn modgd n dat n maan a raabã, rat n yeel tɩ neb nins sẽn sɩd ‘rat-a ne b sũy fãa wã.’

Yɩɩl Sõamyã 23 soabã neb wʋsg sẽn mi wã me wilgdame tɩ Wẽnnaam nonga a nin-buiidã n get b yelle. A sɩngrẽ wã bala, yɩɩl-gʋlsdã boola Wẽnnaam tɩ pe-kɩɩma, n wilgdẽ t’a geta a yell sõma. Yɩɩllã sɩngda woto: “[A Zeova] yaa mam pe-kɩɩma, mam kõn kong bũmb ye.” Tẽns nins pʋsẽ b sẽn gʋls Biiblã, pe-kɩɩmbã geta b pesg fãa yell neere, hal n pʋt-a yʋʋre. Daar fãa, a boonda pesg fãa n maag a yĩng n saag-a la a ges a sã n pa tar sãmpogre. A sã n mik tɩ pesg n pogle, a sõogda kaam sẽn na yɩl tɩ maag tao-tao. Pesgã sã n pa keemẽ, mi n yaa tɩlae ne pe-kɩɩmã t’a gãneg-a n modg-a n kõ tɩɩm, la a kɩt t’a yik n kẽne, sẽn na yɩl t’a ra kell n gãand n wa ki ye. B sẽn mak a Zeova ne pe-kɩɩm a woto buudã sɩd wilgda a sẽn get neb nins sẽn baood-a wã yell to-to wã kɛpɩ.

Pʋʋsgã la vʋʋgrã wilgdame tɩ Wẽnnaam sɩd geta d yelle

Wẽnnaam sẽn kɩt tɩ b gʋls yɩɩl nins yell d sẽn gomã la b taab Biiblã pʋgẽ wã pa sẽn  na yɩl tɩ d karem la d pẽg bal ye. B wilgda tõnd pĩnd wẽn-sakdb sẽn pelg b pʋs to-to n togs a Zeova b zu-loees n kos sõngre, la b sẽn wilg-a b mi-beoog to-to a sẽn sɩd sõng-bã yĩnga. B goamã wilgda vẽeneg tɩ b ra kɩsa sɩd tɩ Wẽnnaam nong-b lame la a get b yelle. D sã n karemd b goamã la d bʋgsd b zutu, na n kɩtame tɩ d me kɩs sɩd tɩ Wẽnnaam geta d yelle. Wẽnnaam sẽn sak tɩ d tõe n pʋʋs-a wã yaa bũmb sẽn wilgd vẽeneg tɩ d yell pak-a lame.

La wakat ninga, yell tõe n looga d nugu, hal n kɩt tɩ d pa mi d sẽn na n yeel bũmb ning d pʋʋsgã pʋgẽ ye. La rẽ yĩnga, woto tõe n kɩtame t’a Zeova pa bãng d toogã bɩ? Rom dãmba 8:26 leokda woto: “Sɩɩg Sõng sõngda tõnd d pʋʋsg pʋgẽ; tɩ bõe, tõnd ka mi tõnd sẽn na n kos bũmb nins tɩ zems ye. La Sɩɩg Sõng meng wẽeda sir ned sẽn ka tõe n togs ye, n yõkd Wẽnnaam sɛɛg tõnd yĩnga.” Verse kãngã wilgda tõnd tɩ pĩnd wẽn-sakdbã pʋʋsg Wẽnnaam sẽn kɩt tɩ b gʋls Biiblã pʋgẽ wã tõe n kell n zemsa ne tõnd sẽn dat n kos n pa tõeyã, t’a Zeova sẽn yaa Wẽnnaam sẽn ‘wʋmd pʋʋsgã’ geelgd rẽ wa tõnd kosgo.—Yɩɩl Sõamyã 65:3.

Wẽnnaam sẽn na n wa vʋʋg sẽn ki-bã me yaa bũmb sẽn wilgd vẽeneg tɩ tõnd ned kam fãa yell pak-a lame. A Zezi Kirist yeela woto: “Wakat watame tɩ fãa sẽn be yaad pʋsẽ na n wʋm bãmb [a Zezi] koɛɛg n yi.” (Zã 5:28, 29) Gɛrk gom-bil ning b sẽn lebg verse kãngã pʋgẽ tɩ “yaadã” võor meng-mengã yaa “pʋ-tẽer yaado.” Woto rat n yeelame tɩ Wẽnnaam tẽra sẽn be-b be wã sẽn da yɩ neb nins buudã takɩ.

Sẽn na yɩl n vʋʋg ned sẽn ki, rẽndame tɩ Wẽnnaam mi nin-kãng sõma, hal n mi a sẽn da yaa to-to, a sẽn da tar bãngr ningã la bũmb ning a soabã sẽn da tar a pʋ-tẽerẽ wã fãa. Yãmb we n tags n gese! (Mark 10:27) Baa a soabã sã n kiime tɩ maan yʋʋm tusa, a Zeova ket n tẽra a yell hal sõma. (Zoob 14:13-15; Luk 20:38) Dẽnd a Zeova ket n tẽra neb milyaar dãmb sẽn ki yelle, n mi b yembr-yembr hal sõma. Woto wilgdame tɩ tõnd ned kam fãa yell paka Wẽnnaam!

A Zeova yaa roanda

D sã n dat tɩ Wẽnnaam nong-d hal tɩ kɩt t’a get d yell sõma, bõe la d segd n maane? Pipi, d segd n wilgdame tɩ d teeg-a lame, tɩ d sakd-a lame la d tẽed-a. Tʋm-tʋmd a Poll sɩd wilgame tɩ ned sã n dat tɩ Wẽnnaam get a yelle, yaa tɩlae t’a soab reng n tall tẽebo. A yeela woto: “Tẽeb sã n kaẽ, ned ka tõe n ta Wẽnnaam yam ye; tɩ bõe, ned ninga sẽn wat Wẽnnaam nengẽ, a tog n tẽeme tɩ bãmb beeme, la tɩ bãmb yaa neb nins sẽn baood bãmbã roanda.”—Hebre dãmba 11:6.

Verse kãngã wilgdame tɩ d sã n dat n paam tẽeb buud ning sẽn tat Wẽnnaam yamã, rẽndame tɩ d maan bũmb a yiibu. Pipi, d ‘tog n tẽeme t’a beeme,’ rat n yeel tɩ d sak n deeg tɩ yẽ la yĩngr la tẽng naaba, la tɩ d segd n saka a noyã la d tũ-a. La sẽn paas rẽ, d segd n tẽeme t’a ‘yaa neb nins sẽn baood-a wã roanda.’ Ned sẽn tar tẽeb hakɩkã kɩsa sɩd tɩ Wẽnnaam nonga neb nins sẽn tʋll n maan a raabã ne b sũy fãa wã, la t’a keood-b lame. Yãmb me sã n zãmsd Wẽnnaam Gomdã la y tigimd ne neb nins sẽn maand a raabã, y tõe n wa paama tẽeb kãng buudã sẽn kɩtd tɩ Wẽnnaam get d yell la a rond-dã.

Rũndã-rũndã, neb wʋsg tẽedame tɩ Wẽnnaam toor kae ne ãdem-biisã yɛl ye. La wa d sẽn yã wã, Biiblã wilgda vẽeneg tɩ neb nins sẽn tar tẽeb hakɩkã yell paka Wẽnnaam hal tɩ kɩt t’a get b yell sõma. Baa rũndã-rũndã vɩɩmã sẽn pid ne zu-loeese, yɩɩr la sũ-sãams toor-toorã, d pa segd n tags tɩ sẽn maand kae ye. Bala a Zeova nong-d lame n dat d neere. A pʋd n yet-d lame tɩ d teeg-a t’a sõng-do. Yɩɩl-gʋlsdã yeela woto: “Bas f yell ne Zusoabã la bãmb na kogl foom. Bãmb ka na n bas nin-tɩrg t’a leng wakat sẽn ka sɛt ye.”—Yɩɩl Sõamyã 55:23.

[Tẽngr note]

[Zĩ-gũbri/Foto, seb-​neng 27]

Verse rãmb sẽn kɩtd tɩ y kɩs sɩd tɩ y yell sɩd paka Wẽnnaam

“Zusoaba nif geta dũniyã zĩiga fãa n dat n sõng neb nins sẽn dat Wẽnnaam ne b sũyã fãa wã.”—2 KIBAYA 16:9.

“Sui-y mam nintãma y ko-waoog pʋgẽ. Bãmb ka be yãmb sebr pʋgẽ sɩda?”—YƖƖL SÕAMYÃ 56:9.

“Zusoaba yaa mam pe-kɩɩma, mam kõn kong bũmb ye.”—YƖƖL SÕAMYÃ 23:1.

“Yãmb wʋmda pʋʋsgo. Neb buud fãa na n waa yãmb nenge.”—YƖƖL SÕAMYÃ 65:3.

“La yãmb sã n bool maam, mam na n sakame. La y na n nonga maam tɩ m yaa y nug-tʋʋmde.”—ZOOB 14:15.

“Ned ninga sẽn wat Wẽnnaam nengẽ, a tog n tẽeme tɩ bãmb beeme la tɩ bãmb yaa neb nins sẽn baood bãmba roanda.”—HEBRE DÃMBA 11:6.

“Bas f yell ne Zusoabã la bãmb na kogl foom. Bãmb ka na n bas nin-tɩrg t’a leng wakat sẽn ka sɛt ye.”—YƖƖL SÕAMYÃ 55:23.