Biiblã toeemda neba

Bõe yĩng tɩ pag yam sẽn da yi tũudmã wa rɩkd sẽk wʋsg n sõngd nebã tɩ b bãngd Wẽnnaam? Bõe n kɩt tɩ rao sẽn da nong karate wa lebg ned sẽn nong laafɩ? Bõe n kɩt tɩ rao sẽn da yaa dorg la ra-yũuda, la sẽn nong zabr wa tõog n toeeme? Karm-y b sẽn togsd bũmb ningã:

MAAM LA WOTO

M YƲƲRE: PENELOPE TOPLICESCU

M YƲƲMA: 40

M YITA: OSTRALI

PĨNDÃ: M YAM DA YII TŨUDMÃ

M KIBARÃ: Mam doga Sydney sẽn yaa Ostrali tẽng a ye wã pʋgẽ. La mam sẽn wa n tar yʋʋm a yiibu, mam roagdbã yikame n kẽng Papouasie-Nouvelle-Guinée. Tõnd zĩnda Rabaul sẽn na ta yʋʋm a yiibu, rẽ poore d tɩ zĩnda Bougainville yʋʋm a nii. Televiziõ sẽn da pa be Papouasie-Nouvelle-Guinée sasa kãngã wã yĩnga, maam ne m yao wã ra nong n yita yɩng n deemdẽ. D ra nong n deemda koom, n mi n kẽng zĩig a to n tɩ ti zãn n maan rasem a wãn be.

Mam sẽn wa n ta yʋʋm piiga, mam wa n nonga tũudmã yɛla. M ma sẽn da yaa katolikã yĩnga, a kɩtame tɩ m tũud masɛɛr a ye sẽn da be tõnd sakã pʋgẽ n kẽnd n karemd Biiblã. Mam sakame n na n lebg katoliki, n deeg soobo. Rẽ tɩ m tara yʋʋm piiga.

Maam ne m zakã rãmb lebg n waa Ostrali, la m wa n sɩng n maanda sãmb-sãmb ne bũmb nins b sẽn zãms maam katolik rãmbã tũudum pʋgẽ wã. Sasa kãng tɩ m da taa yʋʋm piig la a tãabo. Mam sẽn wa n be kolɛɛse, m zãmsa kʋdemdã yɛla, tɩ maam ne m ba wã ra nong n sõsd tũudmã sẽn sɩng to-to, la kibay sẽn be Biiblã pʋgẽ tɩ d tagsdẽ tɩ yaa soalem zugu. Tarẽ-n-tarẽ, mam wa n basa katolik rãmbã tũudmã.

Mam sẽn wa n tar yʋʋm 16, m baaba ne m ma ra pa le vɩ ne taab ye. Ra pa nana ne m ma ye. La tarẽ-n-tarẽ, m wa n basa m ma n tɩ zĩnd ne m baaba la ne pag ning a sẽn da rat n kẽ kãadmã. Mam yao wã kell n zĩnda ne m ma tɩ b yik n kẽng Ostrali tẽng a to pʋgẽ. Wakat kãngã, m wa n tagsdame tɩ m yaa m yembre. Kaoosa sẽn ta yʋʋm a yi tɩ maam ne m ma yaool n tõog  n le zems taaba. Mam wa n sɩnga rãamã la dorgã yũubu, la m nong n kẽnd reem zĩisẽ n noogd m yõore. Mam basa lekollã, n paam tʋʋma. La mam sẽn wa n ta yʋʋm 20 n tar n dabda, m tʋma tʋʋm-dẽgd n sãam m vɩɩmã wakat kãngã.

Mam sẽn wa n ta yʋʋm 25, mam sɩnga Biiblã yell tagsg yɛsa. Mam wa n paama tʋʋmd a to n da tʋmd ne a Liene sẽn yaa bi-pugl sẽn nong neba, n sakd a patrõ wã la a waoogd-a baa ne a sẽn da tãsd-a wã. Mam sẽn sok-a tɩ bõe yĩng t’a sĩnd baa ne a patrõ wã sẽn tãsd-a wã, a yeela maam tɩ yẽ zãmsda Biiblã ne a Zeova Kaset rãmbã, la a modgd n na n tũ Biiblã noyã wakat fãa. A Liene yeela maam t’a rat n zãmsa maam Biiblã. Mam da tẽedame t’a rat n yeelame t’a na n zãmsa mam bũmb nins fãa yẽ sẽn mi Biiblã zugã lɛɛr a ye pʋgẽ bala. Yʋn-kãnga, a Liene rɩka lɛɛr a tãab n leok sogsg nins fãa mam sẽn sok-a Biiblã wɛɛngẽ wã. Mam sũur yɩɩ noog wʋsgo, a sẽn tik Biiblã zug n leok mam sogsgã fãa wã.

M tẽrame tɩ mam sẽn sõs ne a Liene yʋn-kãng n yik n dɩk m mobillã n kuusẽ wã, mam sũur yika ne Wẽnnaam a sẽn pa kɩt tɩ m bãng-a pĩndã. Mam da miime t’a Zeova Kaset rãmbã pa tʋmd tʋʋm-dẽgdo, la m da tagsdẽ tɩ m pa le tõe n bas m minim wẽnsã ye. Mam da tagsdame tɩ m pa na n tõog n moond koɛɛgã zak-zak wa a Zeova Kaset rãmbã sẽn maandã ye. Mam kell n zãmsa Biiblã ne a Zeova Kaset rãmbã, n da baood n na n yã ziri b zãmsgã pʋgẽ n paam bʋʋm n bas-ba. La mam wa n bãngame tɩ m pa na n tol n yã ziri b zãmsgã pʋgẽ ye.

BIIBLÃ SẼN TOEEM MAAM TO-TO: Mam sẽn wa n bãngd manesem nins Biiblã sẽn wilgd tɩ d segd n tallame wã, mam sũur-kasetã ra ningda maam taale. Sẽn na yɩl tɩ m sũur-kasetã da ningd m taale, mam basa dorgã yũubu. La m wa n kẽnga tẽn-zẽnga, n le sɩng rãamã yũub la m kẽnd reem zĩisẽ n noogd m yõore. Wakat fãa mam sã n modgd n dat n tũ Biiblã noyã, wat n pa yãk neng ye. Mam pʋʋsda a Zeova, la ne rẽ fãa m sũurã ket n pa noom ye.

Mam sẽn bãng Rĩm a Davɩɩd ne a Batseba sẽn maan bũmb ningã, la a Zeova sẽn kʋm-b nimbãanegã sõnga maam wʋsgo. B sẽn sagl a Davɩɩdã, a talla raood n sak n deeg t’a kongame n pa bao bʋʋm n na n kõ a meng ye. A sika a meng n sak kiblgã. (2 Sãmwɛll 12:1-13) Wakat fãa mam sã n modg n pa tõoge, m tẽegda kiba-kãng yelle, tɩ lebg nana ne-m tɩ m kos a Zeova sugri. Masã, sẽn na yɩl n da lʋɩ kʋɩɩbg pʋgẽ, mam rengd n pʋʋsa a Zeova, la rẽ sõnga maam wʋsgo.

BIIBLÃ ZÃMSG SẼN NAF MAAM TO-TO: Mam sũur da nong n yikda wakat fãa. La goam nins sẽn be Efɛɛz rãmb 4:29-31 pʋgẽ wã sõnga maam tɩ m bãng tɩ m segd n basa “sũ-toog ne kisgri la sũ-yikri.” Mam sẽn tõog tɩ m sũur pa yikd tao-tao wã kɩtame tɩ m tõog m zɩlemdã. Sẽn paase, a Zezi sẽn sagl tɩ d bas tɩ d n-yẽe yɩ n-yẽe wã sõnga maam tɩ m sɩd tõogd n maand bũmb nins m sẽn yãk yam n na n maanã.—Matɩe 5:37.

Sɩngrẽ wã, m ma ra pa rat tɩ m zãms Biiblã ne a Zeova Kaset rãmbã ye. La kaoosg zugẽ, a wa n yeelame t’a sũur yaa noog ne maam. A pʋd n yeela woto: “Mam miime tɩ pa d sẽn wub foo to-to wã n kɩt tɩ f lebg woto ye. Yaa fo sẽn bãng a Zeova wã yĩnga.” A sẽn yeel maam woto wã, m sũur yɩɩ noog wʋsgo.

Masã, mam miime tɩ mam vɩɩmã tara võore. Sẽn na maan yʋʋm a wae la woto maam ne m sɩdã sẽn yaa so-pakdb n zãmsd nebã Biiblã. Mam moonda koɛɛgã zak-zaka, la m tagsdame tɩ m zɩ n tʋm tʋʋmd sẽn kõt sũ-noog n ta tʋʋm-kãngã ye.

MAAM LA WOTO

M YƲƲRE: DENIS BUSIGIN

M YƲƲMA: 30

M YITA: RISI

PĨNDÃ: MAM DA WẼEDA KARATE

 M KIBARÃ: Mam doga Perm sẽn yaa Risi tẽng a ye pʋgẽ. M bɩɩ Furmanov sẽn yaa tẽng sẽn tar neb 40 000 n be Ivanovo sẽn yaa Risi tẽng a ye me pʋgẽ wã. Furmanov yaa tẽng sẽn yaa neer la a tar tɩ-neeb vãad sẽn lebgd kõod la miid zĩ-likr kiuug sasa. Sẽn sɩng yʋʋmd 1981 tɛk n tɩ tãag 1999 wã, nin-kʋʋrã la tʋʋm-wẽnsã lebga wʋsg Furmanov. Mam roagdbã nug ra pa zãad ye. Maam ne m yao wã la m roagdbã ra vɩɩ roog sẽn yaa sẽk pʋgẽ.

Mam sẽn wa n tar yʋʋm a yopoe, m sɩnga karate zãmsgo. Mam da nonga karate wʋsgo, hal tɩ yaa rẽ yell bal n da pak maam. Mam sã n da paam sẽka, m da nong n kẽngda karate wã zãmsg zĩigẽ, hal tɩ m zo-rãmbã fãa ra yaa neb sẽn nong n wat zĩ-kãngã. Mam sẽn wa n ta yʋʋm 15 rẽ tɩ m zoe n paama m sẽntiir ruuzi. Yʋʋm a ye rẽ poore, m paama m sẽntiir marõ. Mam da naaga sull sẽn kẽnd Risi la Eurasi n wagsd taab karate wã yĩnga. M da tagsdame tɩ m beoog daarã na n yɩɩ sõma. La m sẽn wa n ta yʋʋm 17, mam vɩɩmã toeema fasɩ.

Maam ne m zo-rãmb kẽer tʋma tʋʋm-wẽng tɩ b yõg tõnd la b pag maam bãens roog yʋʋm a yiibu. Pa yɩ nana ne maam ye. Yɩɩ m sẽn wa n be bãens roogẽ wã la m yã Biiblã pipi. Mam karma Sɩngr sebrã, Yɩɩll Sõamyã, la Kãab-paalgã. Mam pʋd n da mii tõnd Ba sẽn be arzãnã pʋʋsgã ne zugu. Yʋng fãa, nand tɩ m kẽ gãaga, m da pʋʋsda pʋʋs-kãng n da tagsdẽ tɩ rẽ na n sõnga maam.

B wa n yiisa maam bãensã roogẽ yʋʋmd 2000 wã sasa, la ne rẽ fãa mam vɩɩmã ra ket n ka võor ye. Mam sɩnga dorgã yũubu, la yaa sasa kãng me la mam ma wã maan kaalem. Yaa yẽ la m da nong n yɩɩda, la a kaalmã yɩɩ toog wʋsg ne maam. La mam modgame n tõog n bas dorgã yũubu, n le sɩng karate wã zãmsg zĩigẽ kẽna. Mam wa n yikame n tɩ zĩnd Ivanovo n paam tʋʋm butik bedr pʋgẽ. Butikã taoor soab a ye n yaa pag sẽn yaa a Zeova Kaset soaba. A wilga maam yɛl kẽer sẽn be Biiblã pʋgẽ, la a kɩt t’a Zeova Kaset soab sẽn yaa rao wat n zãmsd maam Biiblã wakat fãa.

BIIBLÃ SẼN TOEEM MAAM TO-TO: Mam sẽn wa n zãms Biiblã n bãng tɩ Wẽnnaam ratame tɩ tẽngã fãa lebg arzãnã, sɩd yɩ-m-la noog wʋsgo. Mam da ratame n wa paam n zĩnd sasa kãngã. Pa yã n kaoos la m bãng tɩ Wẽnnaam a Zeova tara noy a sẽn dat tɩ nebã tũ ye. Hal n tãag masã, sẽn da pak maam yaa mam mengã yell bala. La mam bãngame t’a Zeova ratame tɩ m tags neb a taabã me yelle, n maand b neere, la m nong laafɩ. Mam yaool n da pa maand woto ye.

Mam sẽn sɩng bũmb nins a Zeova sẽn maan mam nafr yĩngã yell tagsgã, wala makre, a sẽn dɩk a Biigã n kõ t’a yɩ maoong mam yel-wẽnã yĩngã, kɩtame tɩ m toeem m vɩɩmã sẽn na yɩl n wilg Wẽnnaam m mi-beoog a nonglmã yĩnga. Wala makre, goam nins sẽn be Yɩɩl Sõamyã 11:5 (NW ) pʋgẽ wã kɩtame tɩ m bãng tɩ Wẽnnaam kisa “wẽnem.” Rẽ kɩtame tɩ m bas televiziõ wã pʋgẽ filim dãmb sẽn wilgd tɩ wẽnemã la kisgrã pa wẽngã gesgo. Mam tõog n  basa karate wã, la pa yɩ nana ne maam ye. Saglg ning sẽn be 1 Korẽnt dãmb 15:33 pʋgẽ wã sõnga maam tɩ m bãng tɩ m tũud-n-taasã manesem tõe n kɩtame tɩ m paam yɛla. Mam sẽn zĩnd bãens roogẽ wã pʋd n wilgdame tɩ rẽ yaa sɩda. Woto kɩtame tɩ mam yãk yam n na n bas neb nins sẽn nong karate wã tũud-n-taare.

BIIBLÃ ZÃMSG SẼN NAF MAAM TO-TO: Mam sẽn zãms Biiblã ne a Zeova Kaset rãmbã la m kẽnd bãmb tigissã sõnga maam tɩ m lebg pʋ-peelem soaba. Wala makre, Hebre dãmb 13:5 kɩtame tɩ m bãng tɩ bũmb nins m sẽn tarã segd n sek-m lame, la kɩt tɩ m modg n bas ligdã nonglem. Mam sẽn tũ sagl-kãngã wã sõnga maam tɩ m bas pʋ-yagb la wagdem.

Wakat fãa m nong n data zo-rãmba. Pĩndã, mam yãa zood kẽer sẽn sãam yão-beed la ninsaalb zoees yĩnga. A Zeova Kaset rãmbã pa neb sẽn zems zãng ye. La mam bãngame tɩ b nonga Wẽnnaam noyã, la b modgd n tara manesem sõng ne neb a taabã tɩ wilgdẽ tɩ b tũuda no-kãensã. Masã m tara zo-rãmb hakɩk bãmb sʋka.

M pa mi m vɩɩmã sẽn da na n baas to-to, m sã n da pa zãms Biiblã noyã la m tũud-b ye. M da na n le kẽnga bãens roogẽ, pa rẽ bɩ m yɩ sabaab tɩ neb a taabã paamd toog la sũ-sãamse. La masã m tara pʋg-sõng la kom-dibli a yiibu. Maam ne m zakã rãmb sõngda neb a taabã tɩ b bãngd Wẽnnaam hal tɩ d sũy yaa noog wʋsgo.

MAAM LA WOTO

M YƲƲRE: JOSÉ CARLOS PEREIRA DA SILVA

M YƲƲMA: 31

M YITA: BERZƖLL

PĨNDÃ: BI-BƐƐGA

M KIBARÃ: M bɩɩ São Paulo zĩig a ye sẽn yaa rẽgd b sẽn boond tɩ Amerikana pʋgẽ. Ko-yɩlemd ra ka zĩ-kãng ye. Zĩigã me ra pida ne rẽgdo. Nebã ra miime tɩ zĩ-kãng yaa bi-bees la tʋʋm-wẽns zĩiga.

Mam bɩɩme n lebg bi-bɛɛg sẽn nong zabre. Mam da nong n pãbda nebã, tɩ kɩt tɩ nebã ra zoet maam sakã pʋgẽ. Mam fu-yerdi wã, m sẽn da yaa to-to wã la m manesmã ra kɩtame tɩ nebã ra mi tɩ m yaa bi-bɛɛga. Mam da yũuda rãamã wʋsgo, hal m mi n su n pa tõe n yik ye. Wala m kẽem dãmbã, mam me ra yũuda dorgã. Mam kẽem a yembr yũu dorgã tɩ loog-a t’a ki.

BIIBLÃ SẼN TOEEM MAAM TO-TO: Mam sẽn bãng a Zeova Kaset rãmbã, b wilga maam Biiblã pʋgẽ tɩ Wẽnnaam na n wa kɩtame tɩ tẽngã gill lebg arzãna. (Luk 23:42, 43; Wilgri 21:3, 4) Mam leb n bãngame tɩ sẽn ki-bã pa mi bũmbu, la tɩ Wẽnnaam pa sɩbgd nin-wẽns bug-tẽng ye. (Koɛɛg Soaba 9:5, 6) Mam sẽn bãng woto wã sõnga maam wʋsgo. Mam sẽn bãng bũmb nins Wẽnnaam zugã kɩtame tɩ m da rat ne m sũur fãa n toeem m  manesmã. Yɩl n tõog n bas dorgã, rãamã, nebã pãbrã la gom-põaasã m sẽn da minimã ra pa nana ye.

Tʋm-tʋmd a Poll sẽn yeel bũmb ning 1 Korẽnt dãmb 6:9-11 pʋgẽ wã sõnga maam wʋsgo. Verse a 9 la 10 wilgdame tɩ pipi kiris-nebã kẽer da tara manesem wẽns nins mam sẽn da tarã buudu. La b yaool n yeta verse 11 wã pʋgẽ woto: “Yãmb kẽer da yaa woto, la yãmb paama pekre, yãmb welgame tɩ yɩ sõma, la yãmb lebga tɩrs Zusoab a Zezi Kirist yʋʋrã yĩnga, la ne tõnd Wẽnnaam Sɩɩgã pãnga.” Gom-kãensã kɩtame tɩ m bãng tɩ mam me na n wa tõog n toeema m manesmã sẽn na yɩl n ta Wẽnnaam yam.

Mam sẽn wa n sɩng a Zeova Kaset rãmbã tigissã kẽnã, m kɩsa sɩd tɩ b tũudmã n tat Wẽnnaam yam. B ra miime tɩ mam yaa bi-bɛɛg la ned sẽn nong zaba, la baa ne rẽ b reega maam sõma.

BIIBLÃ ZÃMSG SẼN NAF MAAM TO-TO: Mam sã n da pa zãms Biiblã n toeem m manesmã, masã tɩ m kiime. La m tõog n sõnga m kẽem a yembr t’a bãng Biiblã sẽn yet bũmb ninga, tɩ sõng-a t’a tõog n bas dorgã yũubu. Mam sõnga m neb a taab me tɩ b sɩng Biiblã zãmsgo. Mam sẽn tõog n dɩk m meng n kõ Wẽnnaam sẽn nong tõnd wʋsgã la m maand a raabã noogda m sũuri.

[Goam sẽn tar pãnga, seb-neng 23]

“Masa, sẽn na yɩl n da lʋɩ kʋɩɩbg pʋgẽ, mam rengd n pʋʋsa a Zeova, la rẽ sõnga maam wʋsgo”