Y tõe n wʋma Biiblã goam võor bɩ?

“Tõnd zakã rãmb da naagda taab n karemd Biiblã hat daar fãa. La mam da pa tolg n nong a kareng woto ye. Mam da tẽedame tɩ Biiblã yaa Wẽnnaam Gomde, la a goam wʋsg võor wʋmb da yaa toog wʋsg ne-⁠ma.”—A Steven sẽn yit Gãrãnd Bertayn.

“Mam sẽn wa n tar yʋʋm 17, mam yãka yam n na n karem Biiblã. La m mikame t’a võorã wʋmb yaa toogo, tɩ m kong n base.”—A Valvanera sẽn yit Ɛspayn.

“Mam zoe n karma Biiblã tõre, bala m da tagsdame tɩ m sẽn da yaa katolikã yĩnga, m segd n karm-a lame. Yʋʋm a tãab tõr la m dɩk n karm-a! La m pa tol n wʋm a goam wʋsg võor ye.”—A Jo-Anne sẽn yit Ostrali.

HAL n tãag rũndã, Biiblã n yaa sebr ning nebã sẽn tar n yɩɩda. A ket n yaa sebr ning nebã sẽn daad n yɩɩda, tɩ b tõe n paam-a zĩig zãng la bala. B lebgd-a-la ne buud-goam wʋsgo, la b rɩkd a goamã kasɛt rãmba, CD rãmb la DVD rãmb zut n yɩɩd pĩndã. La baasgo, neb wʋsg getame t’a võorã wʋmb yaa toogo. Yãmb me tagsda woto?

Biiblã soab ratame tɩ d wʋm a goamã võor bɩ?

Biiblã meng yeta woto: “Gʋlsg Sõamyã zãng yaa Wẽnnaam n kõ tõndo.” (2 Tɩmote 3:16) Dẽnd yaa Wẽnnaam a Zeova la Biiblã soaba. La rẽ yĩnga, a ratame tɩ tõnd wʋm a goamã võor bɩ? Bɩ a kɩtame tɩ yaa neb bilf bala, wala makre, tũudmã taoor dãmb la Biiblã bãngdb bal n tõe n wʋm a võore?

Ad Biiblã verse kẽer sẽn sõng-d tɩ d leoke:

“Tõ-kãngã mam sẽn kõt yãmb rũndã wã ka yɩɩd yãmb pãng ye, la ka zãr ne yãmb ye.”—Tõodo 30:11.

“Yãmb goamã pukr vẽnegda nebã, n kõt sẽn ka-b yam dãmbã bãngre.”—Yɩɩl Sõamyã 119:130.

“La wakat kãng bala, Sɩɩg sõng kõo a Zezi sũ-no-kãsenga, la b yeelame yaa: ‘M Ba sẽn yaa saasẽ, la dũniyã Zusoaba, mam pẽgda yãmba, yãmb sẽn solg bõn-kãens ne yam dãmbã la yẽesem dãmbã n yaool n vẽneg bõn-kãens ne kom-bõonega yĩnga.’ ”—Luk 10:21.

Woto fãa wilgdame tɩ Biiblã soab sɩd ratame tɩ y wʋm a gomdã võore! La baasgo, neb wʋsg sẽn sɩd rat n wʋm Biiblã võor getame t’a võorã wʋmb yaa toogo. Bõe n tõe n sõng-ba? Sõss nins sẽn pʋgdã tara sagls sẽn na n sõng-y tɩ y wʋm Biiblã goam võore.