Tũudum buuda fãa yaa sõma bɩ?

RŨNDÃ-RŨNDÃ, tũudum toor-toor wʋsg n be. Sẽn nan pa kaoose, b sõdame n mik tɩ dũniyã gill zugu, tũudum-bɛdã taa bãmb 19, tɩ tũudũm bõonegã sõor dat n maan bãmb 10 000. Woto kɩtame tɩ yɩl n bãng n yãk tũudum lebg toog n yɩɩd pĩndã. La rẽ yĩnga tõnd sẽn yãk a soab fãa yaa sõma bɩ?

Neb kẽer yetame tɩ tũudmã sõor ka tɛkã yaa wa soay toɛy-toɛy sẽn debd zĩ-yende. Sã n yaa ne sẽn tẽed-b woto wã, f sẽn yãk tũudum ning fãa yaa sõma. B yetame tɩ Wẽnnaam sẽn yaa a ye wã yĩnga, f tũudmã sẽn yaa a soab fãa, yaa Wẽnnaam yɛngã la f tũuda.

Soayã fãa rebda Wẽnnaam nengẽ bɩ?

Neb wʋsg sak n deegame t’a Zezi Kirist yɩɩ tũudum karen-saam-kãsenga. La bõe la a yeel soayã wɛɛngẽ? A yeela a karen-biisã woto: “Bɩ y kẽ zak noor sẽn yaa sẽka.” Bõe yĩnga? A paasa woto: “Tɩ bõe, zak noor sẽn yaa yalengã, la sor sẽn yaa yalengã rabda sãoong zĩigẽ, la neb wʋsg kẽeda beenẽ. La zak noor sẽn yaa sẽkã la sor sẽn yaa bãanegã rabda vɩɩm zĩigẽ, la a yãtb yaa bilfu.”—Matɩe 7:13, 14.

A Zezi goamã rat n yeelame tɩ tũudum kẽer tar n dabda sãoong zĩigẽ bɩ? Bɩ rat n yeelame bal tɩ yaa sẽn  pa tẽed-b Wẽnnaamã n be so-yalengã zugu, tɩ sẽn tẽed-bã be so-bãanegã sẽn debd vɩɩm zĩigẽ wã zug baa b sẽn be tũudum ning fãa pʋgẽ?

A Zezi sẽn yeel tɩ soay a yiib bal n be wã poore, a paasa woto: “Gũus-y yãmb mens ne zãmb bãngdbã. Bãmb wata yãmb sʋk wa piisi, la bãmb sũyã pʋsẽ, bãmb yaa wa rigdinyĩids kom sẽn tara.” (Matɩe 7:15) La a wa n yeela woto me: ‘Ka neb nins fãa sẽn boond maam tɩ Zusoaba, Zusoaba! n na n kẽ saasẽ soolem ye. Yaa ned ning sẽn maand mam Ba sẽn be saasẽ raabã bala.’ (Matɩe 7:21) Ned sã n boond a meng tɩ bãngd bɩ no-rɛɛs wall a boond a Zezi tɩ “Zusoaba,” d tõe n yeelame tɩ yaa ned sẽn tar tũudum, la tɩ pa ned sẽn pa tẽed Wẽnnaam ye. Dẽnd yaa vẽeneg t’a Zezi ra rat n wilga nebã tɩ pa tũudmã fãa la sõma, la tɩ pa b karen-saam-dãmbã fãa me la d segd n tẽ ye.

D tõe n yãa so-bãanegã bɩ?

Soayã sẽn yaa ka tɛk tɩ yaool n pa b fãa n debd Wẽnnaam nengẽ wã yĩnga, wãn to la d tõe n bãng so-bãanegã sẽn debd vɩɩm zĩigẽ wã n bake? D rɩk makr wala yãmb sẽn na n kẽnd galʋ-tẽng pʋgẽ, n wa tudg y sore, n yals n na n bõos neb tɩ b sõng-yã. Ned a ye sẽn yet t’a mii sorã yeela yãmb tɩ y tees goabga, tɩ ned a to yeel-y tɩ sorã yaa rɩtgo. La ned a to me n yeel yãmb tɩ y sẽn tees zĩig ning fãa y na n ta y sẽn datẽ wã. La so-loaad a ye n yals n yiis galʋ-tẽngã karte, n wilg yãmb so-sõngã, la a kõ yãmb kartã sẽn na yɩl tɩ y getẽ, n da le wa tudg sorã ye. Rẽ yĩnga y kõn sak n deeg tɩ nin-kãngã sõngrã n na n kɩt tɩ y tõog n ta y sẽn datẽ wã sɩda?

Woto me, d sã n dat n bãng tũudum hakɩkã, d segd n paama bũmb sẽn wõnd kart tɩ sõng-do. Bũmb a woto sɩd beeme bɩ? N-ye. Kart kãng yaa Biiblã. A yeta woto: “Sebr sõngã zãng yii Wẽnnaam nengẽ, la a yõod ya a sõng-fo tɩ f zãmse, tɩ f gom n lubi, tɩ f rems sẽn golme la f wilg sẽn be neere.”—2 Tɩmote 3:16, Sebr Sõngo.

Tõe tɩ b lebga Biiblã ne yãmb buudã gomde, t’a tõe n sõng-y wala kart tɩ y bãng Wẽnnaam sẽn dat tɩ y tũ-a to-to. A Zeova Kaset rãmbã lebga Biiblã, tɩ b boond-a tɩ Les Saintes Écritures — Traduction du monde nouveau. Neb wʋsg pẽgda Biibl-kãngã hal wʋsgo. La y sã n pa a Zeova Kaset soaba, n dat n tall Biiblã lebgr a to n bao n bãng tũudum hakɩkã, y tõeeme. Rẽ n so tɩ sõs-kãensã sẽn na n pʋg taabã pʋsẽ, y na n mikame tɩ vɛrse rãmb nins b sẽn sõdgdã yita Biiblã lebgr toɛy-toɛy tũudum dãmb a taab sẽn tar pʋsẽ.

Y sã n wa karemd sõs-kãensã, bɩ y mak yãmb sẽn zoe n mi bũmb ninsã ne Biiblã sẽn yetã n gese. La y ning a Zezi sẽn yeel bũmb ning tɩ tõe n sõng-d tɩ d bãng tũudum hakɩkã n welgã me y yamẽ. A yeela woto: “Ade, tɩ-sõng fãa womda bi-sõma la tɩ-wẽng fãa womda bi-wẽnse. Tɩ-sõng pa tõe n wom bi-wẽns ye la tɩ-wẽng me pa tõe n wom bi-sõng ye.” (Matɩe 7:17, 18, Sebr Sõngo) Biiblã wilgda bi-sõma toɛy-toɛy “tɩ-sõngã” bɩ tũudum hakɩkã sẽn segd n wome. Bɩ d gom bi-sõma kãens b tãab yelle.

[Foto, seb-neng a 3]

Biiblã sõngda ned t’a bãng tũudum hakɩkã wa kart sẽn sõngd ned t’a bãng a sorã