Yãmb wilgda a Zeova y mi-beoog a sẽn maan bũmb ning y fãagrã yĩngã bɩ?
Yãmb wilgda a Zeova y mi-beoog a sẽn maan bũmb ning y fãagrã yĩngã bɩ?
“Pẽgr Zusoabã sẽn yaa Israɛll Wẽnnaam bãmb sẽn wa n fãag b nebã yĩnga.”—LUK 1:68.
1, 2. D tõe n maka tõnd sẽn be yell ning pʋgẽ wã ne bõe, la sogs-bʋs la d na n leoke?
MAMS-Y n ges-y wala yãmb sẽn na n yaa bãad n gãe logtor-yiri. B rɩka yãmb n tɩ gãneg ne bãad rãmb a taab sẽn tar yãmb bãagã buudu. Bãagã yaa bã-kʋʋdg sẽn pa tar tɩɩm. Yãmb wa n wʋmame tɩ logtor n gẽesd bãagã tɩɩm, tɩ y saagdẽ t’a na n paamame tɩ fãag-yã. Wakat fãa, y sokdame n dat n bãng logtorã sã n ket n bee gẽesg zugu. La daar a yembre, b wa n yeel-y lame tɩ logtorã paama bãagã tɩɩm! B yeelame tɩ logtorã maana a sẽn tõe fãa sẽn na yɩl tɩ sẽn bẽedb bãagã fãa paam n põse. Y manesem na n yɩɩ wãna? Yaa vẽeneg tɩ y sũur na n yɩɩ noog hal tɩ y pẽg logto-kãngã sẽn kɩt tɩ y na n põs kũumã.
2 Tõe tɩ y na n yeelame tɩ kiba-kãngã pa wõnd sɩd zãng ye. La tõnd fãa yaool n bee yell sẽn wõnd woto pʋgẽ. Tõnd yellã meng wẽnem yɩɩda bã-toaag ning yell d sẽn gomã. Yaa tɩlae tɩ d paam tɩ ned fãag-do. (Karm-y Rom dãmb 7:24.) Sẽn na yɩl n fãag tõndo, a Zeova sak n maana bũmb sẽn yaa kãsenga. A bi-riblã me sak n maana bũmb sẽn ka to. D na n bao n leoka sok-kãsems a naas rẽ wɛɛngẽ. Bõe yĩng tɩ d rat fãagre? Bõe la a Zezi sak n maan tõnd fãagrã yĩnga? Bõe la a Zeova sak n maane? La tõnd sẽn paam fãagrã, bõe la d tõe n maan n wilg d mi-beoog rẽ yĩngã?
Bũmb ning sẽn kɩt tɩ d rat fãagrã
3. Bõe yĩng tɩ d yetẽ tɩ yel-wẽndã wõnda bã-loangdga?
3 Bã-longdem yaa yel-beed menga. Kibayã wilgdame tɩ yaa girip ɛspayõllã sẽn zĩnd yʋʋmd 1918 wã n yɩ bã-longdem wẽnem sẽn yɩɩg a taabã fãa. A kʋʋ neb milyõ rãmb ka tɛka. Yaa sɩd tɩ bã-kʋʋds wẽnem sẽn yɩɩd girip ɛspayõllã beeme, tɩ b sã n yõk ned fãa bɩ a pa põsd ye. La tõe tɩ b pa paamd n yõkd neb wʋsg woto ye. * D yaool n tõe n maka ãdem-biisã sẽn dogd ne yel-wẽnd ningã ne bã-loangdga. Tẽeg-y Rom dãmb 5:12 sẽn yetã. Be b yeta woto: “Rao a yembr n wa ne yel-wẽna dũniyã tɩ kũum wa yel-wẽna yĩnga. Rẽ n kɩt tɩ kũum yõkd nebã fãa, fãa sẽn maand yel-wẽna yĩnga.” Yel-wẽndã sẽn wõnd bã-longdmã bẽega nebã fãa, bala b fãa maanda yel-wẽna. (Karm-y Rom dãmb 3:23.) La yaa neb a wãn la a kʋʋda? Tʋm-tʋmd a Poll yeelame tɩ yel-wẽndã kʋʋda “nebã fãa.”
4. A Zeova ra ratame tɩ tõnd vɩɩmd n kaoos wãn to, la rũndã-rũndã neb wʋsg tagsg yaa wãn ne kũumã?
4 Rũndã-rũndã, neb wʋsg yaool n pa get tɩ yel-wẽndã la kũumã yaa wẽng wʋsg woto ye. B getame tɩ yaa ned sã n ki t’a yʋʋm nan paoodẽ bal la wẽnga. Sã n yaa ned sẽn kʋʋl n ki, b yetame tɩ pa “maneg n yaa wẽng ye.” La ãdem-biisã wae n yĩmdame tɩ naandã pʋd n da pa rat tɩ ninsaal ki ye. Baa tõnd sẽn kʋʋl to-to n ki, d pa paam n vɩɩmd n kaoos wa Wẽnnaam sẽn da ratã ye. Sɩd me, ned baa a ye zɩ n tõog n vɩɩmd n kaoos Wẽnnaam daar a ye meng ye. (2 Pɩɛ. 3:8) Wẽnnaam Gomdã pʋd n yetame meng tɩ tõnd yõorã yaa koɛɛga, hal n mak-a ne mo-pui la walem. (Yɩɩl 39:6; 1 Pɩɛ. 1:24) Tõnd pa segd n yĩm tɩ ninsaal yõorã sɩd yaa koɛɛg ye. Bõe yĩnga? Bala na n kɩtame tɩ d bãng tɩ bãag ning sẽn tar tõndã yaa wẽng wʋsg hal tɩ kɩt tɩ yaa tɩlae tɩ b tɩp-do, rat n yeel tɩ b fãag-do.
5. Yel-wẽndã kɩtame tɩ tõnd ned baa a ye zɩ n paam bõe?
5 D sã n dat n bãng yel-wẽndã ne a biisã wẽnem sẽn ta zĩig ningã, rẽnda d tags a sẽn wãad ninsaal to-to wã yelle. Rẽ bãngr yaa toogo, bala d pa tol n tõe n bãng n bilg d yaab a Ãdem ne a Hawa sẽn da tar bark ninsã ye. Sɩngrẽ wã, b ra yaa neb sẽn zems zãnga. Rat n yeel tɩ neb sẽn pa tar yel-wẽnde, sẽn tar laafɩ la keelem, n da tõe n maan bũmb fãa tɩ zemse. Woto kɩtame tɩ b ra na n tõog n vɩɩmd wakat fãa, n maand a Zeova raabo, tɩ b zʋg-sõma wã me ra na n tar paasgo. La bʋko, b maana b mens n bõn bark kãngã. B yãka yam n beeg a Zeova, tɩ rẽ kɩt tɩ bãmb ne b kambã la b yagensã fãa bõn vɩɩm ning buud a Zeova sẽn da rat tɩ b vɩɩmdã. (Sɩng. 3:16-19) B sẽn maan woto wã, b longa tõnd yel-wẽndã sẽn wõnd bã-wẽngã. B beegrã poor bala, a Zeova yeel-b lame tɩ b konga yẽ barkã. La a pʋlmame t’a na n wa fãaga tõndo.—Yɩɩl 103:10.
Bũmb ning a Zezi sẽn maan tõnd fãagrã yĩngã
6, 7. a) Bõe la a Zeova yeel tɩ wilgdẽ t’a segd n maana bũmb sẽn yaa kãseng tõnd fãagrã yĩnga? b) Maand nins a Abɛll la nin-tɩrs a taab sẽn kʋ sẽn deng a Moiiz wakatã wilgda tõnd bõe?
6 A Zeova ra miime tɩ sẽn na yɩl t’a Ãdem ne a Hawa poorẽ dãmbã paam fãagre, a segd n maana bũmb sẽn yaa kãsenga. Biiblã bãngr-gomd ning sẽn be Sɩngr 3:15 wã pʋgẽ, b wilgda fãagrã sẽn da na n tũ ne bũmb ningã. B yeelame t’a Zeova na n kɩtame tɩ yageng yɩ fãagda, n wa sãam a Sʋɩtãan n menes-a zãnga. La ra na n yɩɩ tɩlae tɩ b reng n nams fãagdã, tɩ yɩ wa b sẽn pogl-a a na-kãsenkãarẽ. Rẽnd yagengã ra na n deega toog la paoogre. La woto rat n yeelame tɩ bõe? Yaa yel-bʋs n da na n paam yageng ning a Zeova sẽn yãkã?
7 Sẽn na yɩl tɩ ãdem-biisã paam b mens ne yel-wẽndã, fãagdã ra segd n maana bũmb tɩ yɩ paasgo, n yiis yel-wẽndã sẽn wa ne beem ningã, n kɩt tɩ b lebs n paam Wẽnnaam zoodo. La bõe la a sẽn da na n maan tɩ yɩ paasgã? Yɛl b sẽn da maand pĩnd wẽndẽ n wilgd tɩ na n tũu ne maoongo. A Abɛll sẽn yɩ pipi nin-tɩrgã ra maana rũms maoong n kõ a Zeova, tɩ kɩt t’a sũur yɩ noog ne-a. Kaoosg zugẽ, nin-tɩrs a taab wa a Nowe, a Abrahaam, a Zakoob la a Zoob me maana maand a woto buudu, tɩ yɩ Wẽnnaam noogo. (Sɩng. 4:4; 8:20, 21; 22:13; 31:54; Zoob 1:5) Rẽ poore, a Moiiz wakatẽ wã, tõog ning Wẽnnaam sẽn kõ wã wa n vẽnega nebã maandã wɛɛngẽ n paase.
8. Yʋʋmd fãa, paasg daarã sã n ta, maan-kʋʋdbã kãsem ra maanda bõe?
8 Maand nins a Moiiz tõogã sẽn da kɩt tɩ Israɛll nebã maandẽ wã sʋka, sẽn da tar-b yõod n yɩɩd yaa b rãmb nins b sẽn da maand paasg daarã. Yʋʋmd fãa, paasg daarã sã n ta, maan-kʋʋdbã kãsem maanda maand toor-toor sẽn da tar võore. A da rengd n maana maand maan-kʋʋdbã buud yĩngã, n yaool n maan buud a taabã fãa yĩnga. Baraarã, a kẽeda wẽnd-doogã zĩ-sõng sẽn yɩɩdã pʋgẽ n maan maando. Yaa yẽ a ye n tar sor n tõe n kẽ be. La yaa paasg daarã bal la a kẽed be. A kẽeda ne rũmsã zɩɩmã n yãk n mes kãabg koglgã sɛɛgẽ. Be, bug-zõos sẽn wẽnd sawadg n pɩnda, n da mi n pukdẽ tɩ makd a Zeova sẽn be be.—Yik. 25:22; Maan. 16:1-30.
9. a) Maan-kʋʋdbã kãsem da makda ãnda, la maand nins a sẽn da maand paasg raarã ra makda bõe? b) Maan-kʋʋdbã kãsem sẽn da kẽed zĩ-sõng sẽn yɩɩdã pʋgẽ wã ra makda bõe?
9 Wẽnnaam vẽnega tʋm-tʋmd a Poll t’a wilg maan-kʋʋdbã kãsem sẽn da maand bũmb ninsã võore. A wilgame tɩ maan-kʋʋdbã kãsem da makda a Zezi Kirist sẽn yaa Mesi wã, tɩ maand toor-toorã makd Kiristã kũumã sẽn yɩ maoongã. (Heb. 9:11-14) Kiristã maoongã sẽn zems zãngã yaa paasg neb sull a yiib yel-wẽn yĩnga. Pipi, yaa neb 144 000 sẽn paam vʋʋsem sõngã zaeeb n yaa Kiristã ba-biisi, n na n wa tɩ naag-a n yɩ maan-kʋʋdbã yel-wẽn yĩnga. Sẽn pʋgde, yaa “kʋʋn-kãsengã” neb Kiristã sẽn boond t’a “piis a taabã” yel-wẽn yĩnga. (Wil. 7:9, 14; Zã 10:16) Maan-kʋʋdbã kãsem sẽn da kẽed zĩ-sõng sẽn yɩɩdã pʋgẽ wã ra makda a Zezi sẽn na n wa kẽng saasẽ n tɩ wilg a maoongã yõod Wẽnnaam a Zeova taoorã.—Heb. 9:24, 25.
10. Biiblã bãngr-goam da pĩnd n wilgame tɩ bõe n na n paam Mesi wã?
10 Woto sɩd wilgda vẽeneg t’a Ãdem ne a Hawa poorẽ dãmbã fãagr da na n tũu ne maoongo. Rẽnd Mesi wã ra segd n wa kõo a vɩɩmã! Wẽnnaam no-rɛɛsdbã ra pĩnd n togsa goam sẽn bilgd rẽ sẽn na n yɩ to-to wã hal sõma. Wala makre, no-rɛɛs a Daniɛll yeela vẽeneg tɩ b “na n kʋʋ Wẽnnaam nin-tũusdgã sẽn yaa naabã” rat n yeel tɩ Mesi wã, tɩ kɩt “tɩ b “paam yel-wẽnã sugri.” (Dan. 9:24-26) A Ezai me ra pĩnd n wilgame tɩ b na n kisga Mesi wã, n nams-a la b kõs-a bɩ n kʋ-a ãdem-biisã yel-wẽn yĩnga.—Ezai 53:4, 5, 7.
11. Bõe la a Zeova bi-riblã maan n wilg t’a saka ne yamleoog n na n kõ a vɩɩmã tɩ yɩ maoong tõnd fãagr yĩnga?
11 Nand tɩ Wẽnnaam bi-riblã wa tẽng zug ka, a ra pĩnd n mii tõnd fãagrã sẽn da baood t’a wa sak n maan bũmb ningã. A ra segd n wa saka nams-toaag la kũum. La rẽ yĩnga a Ba wã sẽn deng n wilga yel-kãensã fãa wã, a tõdgame t’a kõn wa bɩ? Abada. A pʋd n saka a Ba wã raabã fãa ne yamleoogo. (Ezai 50:4-6) A Zezi sẽn wa n wa tẽngã zugã, a saka a Ba wã n maan a raabã. Bõe yĩnga? A leoka woto vẽenega: “Mam nonga m Ba.” La a wa n paasa bʋʋm a to n yeel woto: “Nonglem ka be sẽn yɩɩd woto ye, tɩ ned sak kũum a zo-rãmb yĩnga.” (Zã 14:31; 15:13) Dẽnd yaa a Zezi sẽn nong a Ba wã la a nong tõndã yĩng la a sẽn sak n maan woto fãa d fãagr yĩngã. Baa a sẽn da mi tɩ yaa tɩlae t’a rɩk a vɩɩmã sẽn zems zãngã n kõ tɩ yɩ maoongã, a sak n maana woto ne sũ-noog tõnd fãagr yĩnga.
A Zeova sẽn maan bũmb nins tõnd fãagrã yĩngã
12. Ãnd n yãk yam tɩ rondã na n zĩndã, la bõe yĩng t’a maan woto?
12 A Zezi pa yãk yam a toor n na n kõ a vɩɩmã tɩ yɩ maoong n dol yel-wẽnã ye. Yaa a Zeova n wilg tɩ na n tũu ne rẽ tɩ ãdem-biisã paam fãagre. Tʋm-tʋmd a Poll ra wilgame tɩ tẽn-kugrã sẽn da be wẽnd-doogẽ wã tɩ b kʋʋd maandã a zugã ra yaa makr sẽn wilgd t’a Zeova na n wa saka a Zezi maoongã. (Heb. 10:10) Dẽnd d segd n bãngame tɩ yaa a Zeova n yɩ pipi n dɩk segls sẽn na yɩl tɩ tõnd paam fãagr Kiristã maasem yĩnga. Segl-kãensã kɩtame tɩ b bãng t’a nonga ãdem-biisã wʋsgo, la t’a ratame tɩ b paam vɩɩm sẽn ka sɛtã.—Karm-y Zã 3:16.
13, 14. Wãn to la a Abrahaam kibarã sõngd tõnd tɩ d bãng tɩ d segd n wilga a Zeova d mi-beoogo?
13 A Zeova sẽn yãk yam n na n maan woto n wilg a nonglem ne tõndã, maan-a-la bõe? D pa tõe n bãng n bilg a Zeova sẽn sak bũmb ningã sẽn zab-a to-to ye. La kibar a ye n be Biiblã pʋgẽ n tõe n sõng-d tɩ d bãng rẽ sõma. A Zeova ra yeela a Abrahaam t’a maan bũmb maaneg sẽn yaa toogo. A ra yeel-a lame t’a rɩk a biig a Izaak n maan maoongo. A Abrahaam da nonga a biigã wʋsgo. A Zeova meng ra boola a Izaak t’a Abrahaam ‘bi-yend a sẽn nonge.’ (Sɩng. 22:2) Baa ne a sẽn da nong a Izaakã, a Abrahaam gesame t’a segd n saka a Zeova raabã. A sakame n na n maan a Zeova sẽn yeelã. La baa ne a Zeova mengã sẽn na n wa sak n maan a buudã, a pa bas t’a Abrahaam kʋ a biigã ye. A Abrahaam sẽn wa n dat n kodg a Izaakã, Wẽnnaam tʋma malɛk t’a wa yeel-a t’a ra sɩɩs biigã ye. Wẽnnaam sẽn mak a Abrahaam woto wã, a saka ne a sũur fãa baa ne sẽn da yaa toog ne-a wã, hal n da ning a yamẽ tɩ sã n pa Wẽnnaam n na n lebg n vʋʋg a biigã, a pa na n tol n le yã-a ye. La a ra kɩsa sɩd tɩ Wẽnnaam tõe n vʋʋga a biigã. Sɩd me, tʋm-tʋmd a Poll yeelame t’a Abrahaam sẽn lebg “n deeg a biigã, wẽnda wa kũum vʋʋgre.”—Heb. 11:19.
14 Yãmb we n mams n ges a Abrahaam sũ-sãangã sẽn da ta zĩig ninga, a sẽn wa n segend n na n kõ a biigã tɩ yɩ maoongã. Yel-kãngã sẽn maan a Abrahaam bũmb ningã sõngd-d lame tɩ d bãng a Zeova sũurã sẽn sãam to-to, a sẽn wa n bas tɩ b kʋ a sẽn boond a soab t’a ‘bi-nongrã.’ (Mat. 3:17) La tẽeg-y t’a Zeova sũ-sãangã yɩɩga rẽ, bala yẽ ne a biigã zĩnda ne taab n maan yʋʋm wʋsgo. Tõe tɩ taa yʋʋm milyaar dãmb menga. A bi-riblã yɩɩ “wa tʋʋm mit” n tʋm a sɛɛgẽ ne sũ-noogo, la a yɩ a koe-taasda, tɩ b boond-a tɩ “Gomdã.” (Yel. 8:22, 30, 31; Zã 1:1) D pa tõe n bãng n bilg a Zeova sũ-sãangã sẽn ta zĩig ning a sẽn wa n getẽ tɩ b namsd a biigã, n yaand-a, hal n wa tãag b sẽn na n kʋ-a wa tʋʋm-wẽns maandã ye. A Zeova sẽn sak woto fãa wã, yɩɩ sẽn na yɩl tɩ tõnd paam fãagre! La bõe masã la tõnd tõe n maan n wilg d mi-beoog d fãagrã yĩnga?
Bõe la d segd n maan n wilg d mi-beoogo?
15. Bõe la a Zezi maan n baas a paasg tʋʋm-kãsengã, la rẽ waa ne bõe?
15 Yaa a Zezi sẽn vʋʋg n kẽng saasẽ wã la a tɩ baas paasg tʋʋm-kãseng ning a sẽn tʋmã. A kẽnga a Ba wã nengẽ n tɩ wilg-a a maoongã yõodo. Rẽ waa ne bark wʋsg n kõ ãdem-biisã. Bala rẽ tɛka, b tõe n paama b yel-wẽnã sugr zãng-zãnga. Yaa neb nins sẽn yaa Kiristã ba-biis sẽn paam vʋʋsem sõngã zaeebã yel-wẽnã sugr nanda, la sẽn paase, “dũniyã nebã fãa” yel-wẽna sugri. A Zezi maoongã maasem yĩngã, neb nins fãa sẽn tekd yam n kot sugr ne b sũy fãa n lebgd kiris-neb hakɩkã paamda a Zeova zoodo. (1 Zã 2:2) La yãmb yẽ, Kirist maoongã maanda yãmb bõe?
16. Mak-bʋg n tõe n sõng-d tɩ d bãng tɩ d segd n sɩd pʋʋsa a Zeova bark wʋsgo, a sẽn kɩt tɩ d tõe n paam fãagrã?
16 Bɩ d lebg n tẽeg makrã d sẽn dɩk sɩngrẽ wã yelle. Logtor ning sẽn paam-a tɩɩmã wa n kẽe yãmb sẽn gãe roog ningã pʋgẽ, n yeel woto: “Ned ninga fãa sẽn na n sak n deeg tɩɩmã la a tũ sagls nins m sẽn na n kõ wã na n paama laafɩ.” Yãmb na n maana wãna, sã n mik tɩ bãad rãmb wʋsg zãgsame tɩ b pa na n deeg tɩɩmã, n yeel tɩ saglsã tũud yaa toogo? Baa ne y sẽn kɩs sɩd tɩ tɩɩmã yaa sõma wã, yãmb me na n tõdgame bɩ? Yaa vẽeneg tɩ ayo! Sãmbg sẽn ka be, y na n pʋʋsa logtorã bark tɩɩma yĩnga la y tũ a saglsã sõma. Tõe meng tɩ y na n sagla bãad rãmb a taabã tɩ b maan wa yãmba. Fãagrã yõod yɩɩda bãag tɩɩm. Dẽnd tõnd ned kam fãa segd n tʋlla ne a sũur fãa n pʋʋs a Zeova barka, a sẽn sak t’a bi-riblã ki tɩ yɩ maoong tõnd yĩngã.—Karm-y Rom dãmb 6:17, 18.
17. Bõe la y tõe n maan n wilg a Zeova y mi-beoogo, a sẽn maan bũmb nins y fãagrã yĩngã?
17 D sũy sã n sɩd noom ne a Zeova la ne a bi-riblã, b sẽn maan bũmb nins sẽn na yɩl n fãag tõnd ne yel-wẽnã la kũuma yĩnga, d na n wilg-b-la d mi-beoogo. (1 Zã 5:3) Woto na n kɩtame tɩ d maoodẽ n da tũud d mensã raab-wẽnsã ye. D pa na n tol n sak n maand yel-wẽnã ne yamleoogo, bala naoor wʋsgo, wat n kɩtame tɩ ned maand yel-wẽn n solgdẽ. D sã n maand woto, d wilgdame tɩ d pa nand Kiristã kũumã sẽn yɩ maoongã ye. D sã n dat n wilg d mi-beoogo, d na n maana d sẽn tõe fãa, n kell n yɩ neb a Zeova sẽn nonge. (2 Pɩɛ. 3:14) Sẽn paase, d na n gomda ne nebã d fãagrã yelle, n wilgd-b b sẽn tõe n maan to-to n ta a Zeova yam la b wa paam vɩɩm sẽn ka sɛtã. (1 Tɩm. 4:16) Sɩd zemsame tɩ d rɩkd d sẽkã la d pãngã n tʋmd a Zeova ne a bi-riblã pẽgr yĩnga! (Mark 12:28-30) Tags-y n ges-y-yã! Yaa bũmb nins a Zeova sẽn maan tõnd fãagrã yĩngã maasem n kɩt tɩ d tõe n tẽ tɩ d na n wa paama d mens zãng-zãng ne yel-wẽndã, la tɩ d na n wa paam n lebs n zemsa zãnga, n vɩɩmd wakat fãa wa Wẽnnaam sẽn da ratã.—Rom 8:21.
[Tẽngr note]
^ sull 3 B wilgame tɩ girip ɛspayõllã wakatẽ, a sẽn yõk neb ninsã fãa sõor kolga wakat kãng dũniyã neb gill pʋɩ-sʋka. B bilgdame tɩ bãagã sẽn yõk-b rãmbã sʋka, neb koabg sʋka, a kʋʋ nin-yend bɩ sẽn yɩɩd rẽ. La zĩis kẽere, neb koabg zugu, sẽn ki-bã taa neb piiga. La bãag ning b sẽn boond tɩ Ebola wã wẽnem yaool n yɩɩda girip ɛspayõllã. Bala a sẽn yõkd-b rãmbã sʋka, neb piig zugu, yaa neb a 9 la a kʋʋda.
Y na n leokame tɩ bõe?
• Bõe yĩng tɩ d rat fãagr ne d sũur fãa?
• A Zezi sẽn sak namsg tõnd yĩngã kɩtame tɩ d tʋll n maan bõe?
• A Zeova sẽn sak bũmb nins tõnd fãagrã yĩnga kɩtame tɩ y dat n maan bõe?
• Bõe la y rat n maan n wilg a Zeova y mi-beoogo?
[Zãmsgã sogsgã]
[Foto, seb-neng 30]
Bũmb nins maan-kʋʋdbã kãsem sẽn da maand paasg daarã kɩtame t’a ra makd Mesi wã
[Foto, seb-neng 31]
A Abrahaam sẽn da sak n na n dɩk a biigã n maan maoongã sõngda tõnd tɩ d bãng t’a Zeova sẽn maana sɩd yaa kãsenga