Biiblã zãmsg yaa tɩlae zakã rãmb põsb yĩnga!

TAGS-Y n ges-y “Wẽnnaam Sẽn-tõe-fãa daar kãsengã zabr” sẽn na n kẽes nebã rabeem ningã! (Wil. 16:14) No-rɛɛs a Mise rɩka makr sẽn wilgd tɩ sɩd yaa zab-kãsenga. A yeelame tɩ ‘tãensã na n yẽnega wa siribd sẽn be bugum noore, n zoe n ta lond pʋsẽ wa koom sẽn daag tãng sigdga.’ (Mii. 1:4) Wakat kãnga, bõe n na n paam neb nins sẽn pa maand a Zeova raabã? Biiblã yeta woto: “Baraare, neb nins Zusoaba sẽn kʋ wã na n dɩga tẽng dũniyã kɩreng a yembr tɩ ta kɩreng a to.”—Zer. 25:33.

B sẽn pĩnd n keoog-d woto wã, zak-soben-dãmbã, la baa neb nins sẽn yaa b ye n wubd b kambã segd n soka b mens sok-kãngã: ‘Rẽ yĩnga, mam kamb nins sẽn mi b nensã na n põsa Armagedõ sasa bɩ?’ Biiblã wilgda vẽeneg tɩ sasa kãnga, b sã n tara zood sõma ne a Zeova tɩ zems ne b yʋʋmã sẽn kɩt tɩ b tõe n wʋm yɛlã to-to wã, b na n põsame.—Mat. 24:21.

Yãk wakat takɩ n zãmsd Biiblã zakã pʋgẽ wã yõodo

Roagdbã, maan-y y sẽn tõe fãa, n wʋb y kambã ne “Zusoabã saglg la a zãmsgo.” (Ef. 6:4) Tara yõod hal wʋsg tɩ y maan y sẽn tõe fãa n tõogd n zãmsd Biiblã ne y kambã. Tõnd datame tɩ d kambã yɩ wa Filip kiris-nebã a Poll sẽn pẽge, b sẽn da sak a Zeova ne yamleoogã yĩngã. A yeel-b-la woto: “Mam zo-nongdse, a wa yãmb sẽn da sak wakat fãa wã, bɩ y maan bũmb nins sẽn zems yãmb fãagrã ne dabeem la rigbu, ka mam sẽn be yãmb sʋka bal ye, la bɩ y maan masã n yɩɩda, mam sẽn ka be yãmb sʋkã.”—Fil. 2:12.

Rẽ yĩnga, baa yãmb sã n yi n bas y kambã, b sakda a Zeova noyã bɩ? La b sã n wa be lekollẽ wã yẽ? Bõe la y tõe n maan sõng y kambã tɩ b bãng t’a Zeova noyã sakr nafd-b lame, tɩ kɩt tɩ b tũud-b baa y sã n wa pa be ne-ba?

Y sã n dat tɩ y kambã tẽeb tall pãng hal tɩ b sakd a Zeova baa y sã n pa be ne-ba, yaa tɩlae tɩ y zakã rãmb naagd taab n zãmsd Biiblã. Bɩ d ges bũmb a tãab y sẽn tõe n maane, tɩ kɩt tɩ y zakã pʋgẽ Biibl zãmsgã naf-yã.

Ra n vaand-y ye

Zoob 1:6 sẽn yet tɩ “daar a yembre, Wẽnnaam kom-dibli kẽnga” a nengẽ wã, wilgdame tɩ Wẽnnaam yãka wakat n boond a malɛgsã fãa n tigimdẽ. Maan-y woto me ne y kambã. Yãk-y raar la lɛɛr takɩ, n maand y zak pʋgẽ zaabr Biibl zãmsgã, la y modgd n da vaandẽ ye. Sẽn paase, yãk-y wakat a to tɩ yell sã n wa gɩdg-y tɩ y pa tõoge, bɩ y maan-a wakat kãngã.

Ra n wa n kɩt-y tɩ zakã rãmb tagsdẽ tɩ yaa b yam daar la zãmsgã maand ye. Ra n yĩm-y tɩ yãmb pipi Biibl karen-biis yaa y kambã ye. La a Sʋɩtãan sẽn dat yaa a paam-b n kʋɩɩbe. (1 Pɩɛ. 5:8) Y sã n bas y zak pʋgẽ zaabr Biibl zãmsgã, tɩ zaab-kãng bɩ lebg televiziõ wã la y geta, wall tʋʋm a taab sẽn pa tar n yõod la y tʋmda, a Sʋɩtãan n na n kɩdme.—Ef. 5:15, 16; 6:12; Fil. 1:10.

Kɩt-y tɩ zãmsgã zemsd ne y zakã rãmb yɛlã

Zak pʋgẽ zaabr Biibl zãmsgã pa segd n yɩ bãngr baoob bal ye. Modgd-y tɩ zãmsgã zemsd ne zakã rãmb yɛlã, tɩ b ne a yõodã. Wãn to? Wakat ninga, bɩ y sõs zu-loɛɛg y kambã sẽn tõe n seg day nins sẽn watã pʋgẽ zugu. Wala makre, y tõe n mak n wilga b sẽn tõe n moon koɛɛgã to-to. Kambã sã n maand bũmb b sẽn mi sõma, noom-b lame. Y sã n nong n makd n wilgd-ba, tɩ kɩt tɩ b mi b sẽn na n maan to-to  n tõog n sõs ne baa neb nins sẽn pa rat n kelgã, na n sõng-b lame tɩ b sã n wa tʋmd koe-noogã tʋʋm toɛy-toɛyã bɩ b gomd ne raoodo.—2 Tɩm. 2:15.

Y leb n tõe n maan makre, n wilg y kambã b sẽn tõe n maan to-to, b taabã sã n wa rat tɩ b maan sẽn pa segde. Y tõe n kɩtame tɩ yãmb ne y zakã rãmb sõs Les jeunes s’interrogent — Réponses pratiques volume 2 sebrã sak 15 wã zugu. Sebrã zĩig ning b sẽn yet tɩ “ contre la pression du groupe ” tɩ be neng 132-133 wã me tara saglse, la a sõngd-b tɩ b tõe n bao b sẽn na n leok b to sẽn dat tɩ b maan sẽn pa segd to-to. Sebrã neng 133 wã tẽngr goamã sagenda kom-biisã woto: “ Entraînez-vous avec votre père, votre mère ou un(e) ami(e) mûr(e). ” Y tõe n mi n kɩtame tɩ y zak pʋgẽ zaabr Biibl zãmsgã sasa bɩ y maand mak n wilg a woto buudu.

Roagdbã tõe n tũnuga ne zakã pʋgẽ Biibl zãmsgã n wilg b kambã tɩ b sã n yãk tʋʋmd a Zeova tʋʋmã sʋk n na n wa tʋm b bɩʋʋng zugẽ, b na n paama bark wʋsgo. Rẽ wɛɛngẽ, Les jeunes s’interrogent, volume 2 wã sak 38 wã tara sagl-sõmã. A gom-zugã la woto: “ Que vais-je faire de ma vie ? ” Y sã n wa sõsd sag-kãngã zugu, bɩ y sõng y kambã tɩ b bãng tɩ sẽn tar yõod n yɩɩd yaa b sẽn na n lʋɩɩs a Zeova raabã maaneg taoor b vɩɩmã pʋgẽ. Sõng-y y kambã tɩ b tʋlg n wa yɩ so-pakdba, wall Betɛllẽ tʋm-tʋmdba, pa rẽ bɩ b wa kẽng Wẽnnaam tʋʋmdã zãmsg lekollẽ, wall b kẽes b mens zãng-zãng Wẽnnaam tʋʋmdã tʋʋm a taab pʋgẽ.

La gũus-y-yã. Bala, roagdb kẽer sẽn nong b kamb n dat tɩ b wa yãk tʋʋm a woto buud nong n gomda rẽ yell bala, n yĩmd n pa pẽgd b kambã b sẽn zoe n maand bũmb ninsã yĩng ye. Yaa sɩd tɩ zemsame tɩ y sagend y kambã tɩ b wa tʋm Wẽnnaam tʋʋmdã tʋʋm kẽere, wala makre, n yɩ Betɛllẽ tʋm-tʋmdb bɩ n yɩ misioneer dãmba. La rẽnda y gũusd n da tar dẽ yell bal goam n wa sãam y biigã sũur ye. (Kol. 3:21) Tẽeg-y tɩ yaa biigã n segd n wa nong a Zeova ne a sũur fãa, pa yãmb n na n modg-a ye. (Mat. 22:37) Woto yĩnga, bɩ y pẽgd biigã a sẽn zoe n maand bũmb ninsã yĩnga, la y ra nong n gomd y sẽn dat t’a maan t’a nan pa maandẽ wã yell bal ye. Sõng-y y biigã t’a tall mi-beoog ne a Zeova, a sẽn maan bũmb ninsã fãa yĩnga, la y bas-a t’a wilg-a t’a sũur nooma ne-a a sõmblmã yĩnga.

Kɩt-y tɩ zãmsgã tall yamleoogo

Bũmb a tãab-n-soab y sẽn tõe n maan tɩ kɩt tɩ y zakã pʋgẽ Biibl zãmsgã naf y fãa, yaa y sẽn na n kɩtdẽ tɩ zãmsgã tar yamleoogo. Wãn to la y tõe n maan woto? Wala makre, y tõe n mi n naaga taab n kelg darm wall y ges filim a Zeova siglgã sẽn yiisi, la y sõs a zugu. Y tõeeme me n naag taab n karem Biiblã, n pʋɩ karengã, tɩ sã n yaa kibar bɩ ned fãa ledg kibarã pʋgẽ nin-yɛnga.

Gũusg Gasgã ne Réveillez-vous ! wã tara sõss y sẽn tõe n naagd taab n karemdẽ la y sõsd b zutu. Wala makre, y tõe n sõssa sogsg nins sẽn be Réveillez-vous ! wã neng 31 wã zugu. A gom-zugã yaa: “ Que répondriez-vous ? ” Gũusg Gasgã kẽer tara sõss kambã yĩnga, t’a  gom-zugã yaa: “ Pour nos jeunes lecteurs ”. Gũusg Gasgã kẽer me tara sõsg a to sẽn yet tɩ: “ Enseignez vos enfants ”.

“ Les Jeunes s’interrogent ” sõss nins sẽn yit Réveillez-vous ! wã pʋgẽ wã me tõe n sõnga roagdbã wa Les jeunes s’interrogent, volume 2 wã sẽn sõngd-b to-to wã. Y sã n wa sõsd seb-kãngã sõsg zugu, bɩ y tẽeg n sõs a sak fãa baasgẽ zĩ-gũbrã sẽn sokd tɩ “ Qu’en pensez-vous ? ” wã me zugu. Pa sẽn na yɩl tɩ y tẽeg bũmb ning y sẽn bãng sõsgã pʋgẽ wã yĩng bal la b sẽn ning zĩ-gũbrã ye. Zak neb tõe n sõsa sogs-kãens zug ne taab me.

La y segd n gũusame tɩ Biiblã zãmsg ra wa lebg sogs-toog sasa ye. Wala makre, y pa segd n modg biig t’a karem a sẽn gʋls bũmb ning “ Mon journal ” seb-nengã zugã tɩ y kelg ye. Y pa segd n modg-a t’a karem zĩis nins a sẽn gʋls a meng tagsa wã me ye. “ Un mot aux parents ” wã sẽn be sebrã neng a 3 wã yeta woto: “Y sã n dat tɩ y kom-bɩɩsã sɩd sak n gʋls b tagsa b sebrã pʋgẽ, bɩ y ra baood n na n bãng b sẽn gʋls bũmb ningã ye. Tõe tɩ b na n wa sak n togs-y lame.”

Y sã n modgdẽ tɩ y zak pʋgẽ Biibl zãmsgã tar yamleoogo, n zemsd ne zakã rãmb yɛla, la a pa vaandẽ, a Zeova na n ninga y modgrã bark wʋsgo. Sasa kãng y sẽn yãk Biiblã zãmsg yĩngã na n kɩtame tɩ y tõog n sõng y zakã rãmb tɩ b paam tẽeb sẽn tar pãnga.

[Zĩ-gũbri, seb-​neng 31]

Mi n bao-y bũmb takɩ n maane

“Tõnd zak pʋgẽ Biibl zãmsgã sasa, maam ne m sɩdã naagda d kom-pugli wã n segend tigissã. Rẽ poore, d kɩtdame tɩ kambã maan desẽ sẽn kʋmsd sagls ning d sẽn paamã. Wakat ninga, d yãkda Biiblã kibar a ye n lebs n mak yɛlã sẽn yɩ to-to rẽ wẽndã n wilgi. Wall d mak d sẽn na n kãab nebã d sɛbã pa rẽ bɩ n sɩng sõsg to-to koe-moonegã sasa n wilgi. Tõnd modgdame n get d kambã yʋʋma, n gũusdẽ tɩ zãmsgã zemsd b wʋmbo, n tar yamleoogo, la noom-ba.”—J. M. Etazĩni.

“Sẽn na yɩl n sõng Biiblã karen-biig a yembr biig t’a bãng tɩ Biiblã sẽn da wa n nan yaa seb-pindmã, a tall n karem da pa nana, tõnd dɩka a Ezai sebrã n yãk a sagsã la a vɛrse rãmbã nimero rãmba, n maan-a tɩ lebg seb-wok t’a goamã fãa pʋgd taaba. Rẽ poore, d baoa ra-bɩlem n sok sebrã noy a yiibã. Tõnd yeela biigã t’a rɩk sebrã masã n gẽes zĩig ning a Zezi sẽn karem Nazarɛt karen-doogẽ wã n karme. Luk 4:16-21 wã yeelame t’a Zezi laka sebrã, n karem Ezai 61:1, 2 wã a sẽn da ratã. Biigã makame n mik tɩ sebrã sags la a vɛrse rãmbã sẽn ka be wã yĩnga, Ezai sak 61 wã yãab yaa toog wʋsgo. Woto kɩtame t’a tags a Zezi sẽn maan to-to n tõog n yã zĩigã yelle, n yeel woto: ‘Ad a Zezi sɩd ra ka to ye!’ ”—Y. T. Zapõ

[Foto, seb-neng 30]

Y sã n nong n maand makr n wilgdẽ, na n sõnga y kambã, b taabã sã n wa rat tɩ b maan sẽn pa segde

[Foto, seb-neng 31]

Modg-y tɩ y zak pʋgẽ zaabr Biibl zãmsgã tall yamleoogo