Yãmb yãka wakat takɩ n zãmsd Biiblã bɩ?

RƖẼ, Siglgã taoor lʋɩtb Sull wilgame tɩ toeeng n na n zĩnd tigingã tigiss sẽn maand to-to wã pʋgẽ, sẽn na yɩl tɩ d paam sẽk n paase, n zãmsd Biiblã ne d zagsã rãmba. Y sã n yaa zak soaba, bɩ y modg n yãk daar n zãmsd Biiblã ne y pagã la y kambã n pa vaandẽ ye. Zãmsgã segd n zemsda ne y zakã rãmb yɛla, tɩ nafd b fãa. Sẽn kẽ-b kãadem n pa tar kambã segd n dɩka wakat kãng n naagd taab n zãmsd Biiblã. Saam-biis la saam-bi-pogs nins sẽn pa kẽ kãadem la b pa tar zak pʋgẽ zɩɩbã segd n dɩka wakat kãng me n zãmsd Biiblã.

Saam-biis wʋsg wilgame tɩ b sũy yaa noogo, b sẽn dɩk segls zak pʋgẽ zaabr Biibl zãmsgã yĩngã. Wala makre, kãsem soab a ye yʋʋr sẽn boond t’a Kevin yeela woto: “Tõnd tigingã neb sũy yaa noog hal tɩ b ka noor n pʋʋsd bark ye. Kãsem dãmbã yẽsa ne taaba, n ges d sẽn tõe n dɩk ra-zaall ning b sẽn kõ-dã n zãmsd Biiblã ne d zagsã rãmb wa Siglgã taoor lʋɩtb Sull sẽn datã.”

A Jodi sẽn yaa kãsem soab pagã yeela woto: “Tõnd tara kom-pugli a tãab sẽn tar yʋʋm 15, 11, la yʋʋm a 2. Sẽn nan pa kaoose, tõnd toeema tiginga, n kẽng mugs tiging pʋgẽ. Tigissã fãa seglg rɩkda sẽk wʋsgo. La b sẽn yãk raar n kõ nebã fãa wã, masã tõnd zakã rãmb tõe n naagda tãab n zãmsd Biiblã!”

A John ne a pagã a JoAnn sẽn yaa wakat fãa so-pakdbã yeela woto: “Pĩnda, ra pa wakat fãa la tõnd zakã rãmb tõogd n zãmsd Biiblã ne taab ye. Bala tigingã tʋʋm toɛy-toɛyã ra rɩkda d sẽka wʋsgo. Toeeng-kãngã yaa bark sẽn yit a Zeova nengẽ n na n sõng-d wʋsg tẽebã wɛɛngẽ, d sã n dɩk sẽk ning a sẽn kõt-dã n tʋm wa sẽn segdã.”

Saam-biig a Tony sẽn yaa rakõor t’a yʋʋm zems 25 wã yãka talaat daar fãa zaabr n na n zãmsd Biiblã. A segenda tigissã semennã ray a taab pʋsẽ. La a Tony yeela woto: “Mam nonga talaat daar n yɩɩda.” Bõe yĩnga? Ad a sẽn yeele: “Baraar zaabr yaa wakat mam sẽn yãk n pẽnegd a Zeova. Mam dɩkda lɛɛr a yiib tõr n vaeesd sõss sẽn paasd maam ne a Zeova zoodã pãnga. Mam sẽn dɩkd sẽk wʋsg woto n zãmsd Biiblã kɩtame tɩ m paamd n bʋgsd vɛrse rãmb nins m sẽn karmã zutu.” Woto naf-a-la wãn to? A yeela woto: “A Zeova saglsã kẽeda mam sũurã hal sõma n yɩɩd pĩndã.” A tara makr sẽn wilgd rẽ bɩ? A Tony paasa woto: “Mam karma a Davɩɩd ne a Zonatã zoodã kibar Étude perspicace sebrã pʋgẽ. A Zonatã sẽn pa bao a meng nafr b zoodã pʋgẽ wã kõo maam yam wʋsgo. A mak-sõngã kɩtame tɩ m bãng yɩ zoa hakɩk sẽn dat n yɛɛlga. Mam yãgda wakat fãa n na n paam zãmsg sẽn tar yõod a woto talaat raar zaabr fãa!”

Sãmbg sẽn ka be, a Zeova nin-buiidã ned kam fãa sã n tʋm ne sẽk ning d sẽn paam masã wã neere, n zãmsd Biiblã sõma yẽ a ye wall ne a zakã rãmba, na n naf-a-la wʋsgo.