“Yãmb yaa mam zo-rãmba”

“Yãmb sã n maan bũmb nins fãa mam sẽn yeel yãmbã, yãmb yaa mam zo-rãmba.”—ZÃ 15:14.

1, 2. a) A Zezi zo-rãmbã ra yɩɩ nin-bʋs buudu? b) Bõe yĩng t’a Zezi zood paoong tar yõod wʋsgo?

RAP nins sẽn zĩ yĩngr doogã pʋgẽ ne a Zezi wã pa bãng-a wakat yɛnga, b nug-tʋʋmã me ra yaa toor-toore. Wala makre, a Pɩɛɛr ne a ba-biig a Ãnder da yɩɩ zĩm-yẽedba. A Matɩe ra tʋmda tʋʋmd zʋɩf rãmbã sẽn da kisi. A ra yaa yõor-yaood dɛɛgda. B sãnda wala a Zak ne a Zã bãnga a Zezi hal b yãadmẽ. Kẽer wala a Natanayɛll bãng-a-la sẽn da nan zems yʋʋm a wãn bala. (Zã 1:43-50) La b fãa sẽn tigim taab Zerizalɛm a Zezi yaoolem Pakã daar yʋngã ra kɩsa sɩd t’a yaa Mesi ning sẽn da segd n wa wã, Wẽnnaam bi-riblã. (Zã 6:68, 69) Sãmbg sẽn ka be, a Zezi sẽn yeel-b bũmb ning baraarã yɩ-b-la noog hal wʋsgo. A yeel-b-la woto: “Mam boola yãmb tɩ m zo-rãmba, tɩ bõe, bũmb nins fãa mam sẽn wʋm m Ba nengẽ wã, mam togsa yãmba.”—Zã 15:15.

² Rũndã-rũndã, a Zezi boonda kiris-neb nins sẽn paam vʋʋsem sõngã zaeebã fãa me t’a zo-rãmba. La d tõe n yeelame t’a sẽn boond-b rãmb t’a “piis a taabã” me yaa a zo-rãmba. (Zã 10:16) Baa d sẽn yaa ned ning buud fãa, d tõe n paam n lebga a Zezi zoa. A Zezi zood paoong tara yõod hal wʋsgo, bala rẽ kɩtdame me tɩ d lebg a Zeova zoa. Sɩd me, ned pa tõe n paam a Zeova zoodo, t’a pa reng n yɩ a Zezi zoa ye. (Karm-y Zã 14:6, 21.) La bõe la d segd n maan n paam n lebg a Zezi zoa la d tõog n kell n yɩ a zoa? Nand tɩ d leok sok-kãngã, d na n deng n gesa a Zezi sẽn maan bũmb nins n wilg t’a yaa zo-sõng hal tɩ yaa mak-sõng n kõt-dã, la d ges rẽ sẽn kɩt t’a karen-biisã me sak n maan bũmb ninsã, la yam ning d sẽn tõe n dɩke.

A Zezi yɩɩ zo-sõngo

3. Nebã ra miime tɩ yaa nin-bʋs zood la a Zezi ra baooda?

³ Rĩm a Salomo sẽn yɩ yam soabã ra yeelame tɩ “arzɛk soab tara zo-rãmb wʋsgo.” (Yel. 14:20) A gomdã wilgda ãdem-biisã sẽn pa zems zãngã manesem a yembr sẽn yaa kɛgre. Wʋsg sã n wa baood ned zoodo, b tagsda a soabã sẽn tõe n sõng-bã yell bala, n pa tagsd bãmb sẽn segd n sõng-a wã yell ye. A Zezi yẽ pa tol n tall tags-kãngã sẽn yaa kɛgrã ye. A pa bao ned zood a ligd wall a ziir yĩng ye. Daar a yembre, bi-bɩɩg sẽn yaa rĩm la arzɛk soab n wa n sõs ne a Zezi. Yaa sɩd tɩ Biiblã yeelame t’a ‘Zezi gesa yẽnda la a nong-a lame,’ n bool-a t’a wa tũ-a. La a sagl-a lame t’a reng n tɩ koos a paoongã n kõ naong rãmba. (Mark 10:17-22; Luk 18:18, 23) Nebã ra miime tɩ pa arzɛgsã rãmb la nin-bɛdã zood la a Zezi ra baood ye. A zo-rãmb ra wae n yaa naong rãmbã la neb nins nin-buiidã sẽn da pa nandã.—Mat. 11:19.

4. Bõe yĩng tɩ d yetẽ t’a Zezi zo-rãmbã ra yaa koangdba?

⁴ Yaa vẽeneg t’a Zezi zo-rãmbã ra yaa koangdb me. Wala makre, daar a yembre, a Pɩɛɛr kõ-a-la saglg sẽn da pa zems ne Wẽnnaam sẽn da ratã ye. (Mat. 16:21-23) A Zak ne a Zã sẽn da wa n kos a Zezi t’a kõ-b zĩ-kãsems Rĩungã pʋgẽ wã, wilgame tɩ b yaa neb sẽn nong naam. Bũmb ning b sẽn maana sãama tʋm-tʋmdb a taabã sũy wʋsgo. Bala b fãa ra sɩng n wẽeda no-koɛɛm n dat n bãng sẽn yaa-a kãseng n yɩɩda.  Baasgo, a Zezi sõng-b-la bilf-bilf ne sũ-mar n pa tol n yik a sũur ne-ba, hal tɩ b wa bãng tɩ b tagsgã pa zems ye.—Mat. 20:20-28.

5, 6. a) Bõe yĩng t’a Zezi kell n sak a tʋm-tʋmdbã wʋsg zoodo? b) Bõe n kɩt t’a Zezi wa tõdg t’a Zida kõn le yɩ a zoa?

⁵ A Zezi sẽn kell n sak nin-kãensã sẽn da yaa koangdbã zoodã pa a sẽn da yaa sugr soab tɩ loog nug yĩnga, bɩ a toor sẽn da kae ne rẽ yĩng ye. Yaa a sẽn da bas n get b zʋg-sõma wã n yɩɩdã yĩnga. Wala makre, yʋng ning b sẽn da na n wa yõk a Zezi wã, a yeela a Pɩɛɛr ne a Zak la a Zã tɩ b pʋʋs la b ra gũsi, tɩ b baas n gũsi. A Zezi sũur sãama ne-ba, la a ra bee bʋʋm me. La baasgo, a wilgame t’a miime tɩ pa pʋ-toog ye. A yeela woto: “Sɩɩga ratame la yĩngã ka pãng ye.”—Mat. 26:41.

⁶ La a Zezi wa n wilga a Zida t’a pa le yaa yẽ zoa ye. Baa ne a Zida sẽn da ket n maand waa a nong-a lame wã, a Zezi ra miime t’a zo-kãngã basame t’a Sʋɩtãan tõog-a. A Zida sẽn wa n bas n lebg dũniyã zoa wã yĩnga, a lebg Wẽnnaam bɛ. (Zak 4:4) Rẽ n so t’a Zezi reng n bas t’a Zida looge, t’a yaool n na n wilg a tʋm-tʋmdb 11 wã sẽn kell n sak-a ne b sũy fãa wã tɩ b yaa a zo-rãmba.—Zã 13:21-35.

7, 8. Bõe la a Zezi maan n wilg t’a nonga a zo-rãmbã?

⁷ A Zezi ra basda a zo-rãmb hakɩkã kong-bõoneg taale, la a baood b neer ne a sũur fãa. Wala makre, a pʋʋsa a Ba wã n kos tɩ b sã n wa tar zu-loees bɩ a kogl-ba. (Karm-y Zã 17:11.) A Zezi ra miime t’a karen-biisã mi n segd n vʋʋsame. (Mark 6:30-32) Sẽn paase, a ra pa baood t’a karen-biisã we n bãng yẽ tagsg bal ye. A ra mi n sokda bãmb me b tagsgo, la a maagd a yĩng n kelgd-ba.—Mat. 16:13-16; 17:24-26.

⁸ A Zezi vɩɩmã ne a kũumã fãa yɩ a zo-rãmbã neer yĩnga. Yaa sɩd t’a ra miime tɩ sẽn na yɩl tɩ ãdem-biisã wa paam sugr tɩ zems ne a Ba wã tɩrlmã, a ra segd n wa rɩka a vɩɩmã n kõ tɩ yɩ maoongo. (Mat. 26:27, 28; Heb. 9:22, 28) La baasgo, a Zezi maana rẽ nonglem yĩnga. A yeela woto: “Nonglem ka be sẽn yɩɩd woto ye, tɩ ned sak kũum a zo-rãmb yĩnga.”—Zã 15:13.

Bõe la a Zezi karen-biisã maan n wilg tɩ b me nong-a lame?

9, 10. A Zezi sẽn da yaa kõtã yĩng kɩtame tɩ nebã manesem da yaa wãn-wãn ne-a?

⁹ A Zezi ra rɩkda a sẽkã la a sẽn tarã fãa n sõngd a karen-biisã la a wilgd-b a nonglem hal wʋsgo. Woto kɩtame tɩ neb wʋsg ra nong a zĩigẽ la b ra sõngd-a ne sũ-noogo. (Luk 8:1-3) A sẽn da sõngd nebã tɩ kɩt tɩ bãmb me sõngd-a wã yĩng kɩtame t’a wa yeel woto: “Kõ-y tɩ b na kõ yãmb me. Y na n kolemda y fuug tɩ b kiig-y wamd pidungu, wamd sẽn yegs yegse, n pĩ tɩ baas n sẽegdẽ. Yãmb sẽn dɩk wamd ning n mak n kõ y  taabã, wam-kãng la b rɩkd n mak n kõ yãmb me.”—Luk 6:38, Sebr Sõngo.

¹⁰ La neb wʋsg ra baooda a Zezi zoodo, b sẽn dat t’a sõngd-bã yĩng bala. Nin-kãensã zoodã sẽn da pa hakɩkã yĩnga, b wa n basa a Zezi pʋgbo, a sẽn yeel bũmb tɩ b pa wʋm a võor yĩnga. Wall tɩ b kell n tẽ tɩ tõe tɩ yaa bãmb n pa wʋm a gomdã võorã, b yɩɩ tao-tao n yeel t’a sẽn yeelã pa sakd reegre, n bas-a pʋgbo. La a Zezi tʋm-tʋmdbã yẽ kell n pʋg-a lame. B sega zu-loeese, la b maana b sẽn tõe fãa n kell n pa ne taab noog la toog wakate. (Karm-y Zã 6:26, 56, 60, 66-68.) Yaoolem yʋng ning a sẽn zĩnd ne a karen-biisã, a wilg-b lame t’a sũur nooma ne-ba, n yeel-b woto: “Yãmb yaa neb sẽn pa ne maam m makrã pʋgẽ n ka bas ye.”—Luk 22:28.

11, 12. Wãn to la a Zezi wa n wilg a karen-biisã t’a ket n nong-b lame, la b manesem yɩɩ wãn dẽ poore?

¹¹ A Zezi sẽn pẽg a karen-biisã n yeel-b tɩ b kell n paa ne yẽ a makrã fãa pʋgẽ wã, pa yã n kaoos la b zoe n bas-a ye. Baa b sẽn da nong a Zezi wã, wakat kãnga, b basame tɩ nin-saal zoees tõog-ba. La a Zezi le kõ-b-la sugri. A vʋʋgrã poore, a vẽenega a meng ne-ba, n bels-b la a wilg-b t’a ket n nong-b lame. Sẽn paase, a bobl-b-la tʋʋmde, n yeel-b tɩ b maan “nebã buud fãa” tɩ b yɩ a karen-biisi, la b yɩ a kaset rãmb “dũniyã tɛk fãa.” (Mat. 28:19; Tʋʋ. 1:8) Rẽ poore, a karen-biisã manesem yɩɩ wãna?

¹² B modga b pãng tɛk n moon Rĩungã koe-noog zĩig zãnga. Ne a Zeova vʋʋsem sõngã sõngre, pa yã n kaoos la b pids Zerizalɛm ne koɛɛgã ye. (Tʋʋ. 5:27-29) B pa bas tɩ baa kũum dabeem kɩt tɩ b bas n pa maan karen-biisã wa a Zezi sẽn yeel-bã ye. B moona koɛɛgã la b maan karen-biisã hal tɩ tʋm-tʋmd a Poll wa tõog n yeel yʋʋm 30 loogr poor tɩ koɛɛgã moona “dũniyã fãa.” (Kol. 1:23) Vẽenega, a Zezi karen-biisã wilgame tɩ b sũy nooma hal wʋsgo, b sẽn paam n yaa a Zezi zo-rãmbã!

13. Hal sẽn ta zĩ-bʋg la a Zezi karen-biisã bas tɩ bũmb nins a sẽn zãms-bã toeem-ba?

¹³ Neb nins me sẽn wa n sak n lebg a Zezi karen-biisã sak n tũu a zãmsgã tɩ kɩt tɩ b toeem b vɩɩmã. Yɩɩ tɩlae ne neb wʋsg tɩ b toeem b zʋgo, la b sẽn da vɩ to-to wã. Kẽer da yɩɩ yoaadba, raglem dãmba, rã-tɩgdb wall wagda. (1 Kor. 6:9-11) Sãnda me sẽn da yaa bu-wɛlsdb ra segd n toeema b sẽn tagsd to-to buud a taabã neb zutã. (Tʋʋ. 10:25-28) La b modgame n toeeme, n sak a Zezi. B basa b pĩnd zʋgã n lebg nin-paalse. (Ef. 4:20-24) B maoome n bãng “Kiristã tagsgo,” rat n yeel tɩ n wʋmd a tagsgã la a manesmã võore, la b rɩkd a togs-n-taare.—1 Kor. 2:16.

Tõnd me tõe n yɩɩ Kiristã zo-rãmba

14. A Zezi ra pʋlmame t’a na n maana bõe “dũniyã sɛɛb wakate”?

¹⁴ Pipi kiris-nin-kãensã wʋsg bãnga a Zezi wall b paam n yã-a-la a vʋʋgrã poore. La yaa vẽeneg tɩ tõnd pa paam n yã-a ye. Woto yĩnga, wãn to la tõnd tõe n yɩ Kiristã zo-rãmba? Pipi d segd n sakda tʋm-tʋmd sẽn tũud sɩd la sẽn tar yamã, sẽn yaa a Zezi ba-biis nins sẽn zae ne vʋʋsem sõngã n ket tẽngã zugã. A Zezi ra pʋlmame tɩ “dũniyã sɛɛb wakate,” a na n kɩtame tɩ tʋm-tʋmd-kãngã yɩ a “zaka fãa yel-gɛta.” (Mat. 24:3, 45-47) Rũndã-rũndã, neb wʋsg sẽn tʋll n lebg Kiristã zo-rãmb pa naag tʋm-tʋmdã sull pʋgẽ ye. La nin-kãensã manesem sẽn yaa to-to ne tʋm-tʋmdã sor-wilgrã tõe n manegame wall sãam zood ning b sẽn tar ne Kiristã. Bõe yĩnga?

15. Bõe la b na n ges n bãng ned sã n wõnda pesg wall bʋʋga?

 ¹⁵ Karm-y Matɩe 25:31-40. A Zezi boola tʋm-tʋmdã nebã sull t’a ba-biisi. A Zezi makr ning pʋgẽ a sẽn gom piis ne bʋʋs welgr yellã, a wilga vẽeneg tɩ tõnd sẽn maand a ba-biisã bũmb ningã, yaa yẽ la tõnd maanda. Sɩd me, a yeelame tɩ yaa nebã sẽn na n tall manesem ning ne baa “sẽn yaa-a yao-zʋʋg” yẽ ba-biisã sʋkã n na n kɩt tɩ b bãng ned sã n wõnda pesg wall bʋʋga. Woto yĩnga, neb nins sẽn na n wa vɩɩmd tẽngã zugã sã n dat n wilg tɩ b baooda Kiristã zoodo, pipi bũmb b sẽn segd n maan yaa sõng tʋm-tʋmd sẽn tũud sɩdã sulli.

16, 17. Wãn-wãn la d tõe n wilg tɩ d yaa Kiristã ba-biisã zo-rãmba?

¹⁶ Y sã n dat n wa vɩɩmd tẽngã zug Wẽnnaam Rĩungã naam wakate, wãn to la y tõe n wilg tɩ y yaa Kiristã ba-biisã zo-rãmba? D gom bũmb a tãab y sẽn tõe n maan yell bala. Pipi y segd n sõngd n moonda koɛɛgã ne y sũur fãa. Bala, Kiristã kõ a ba-biisã noor tɩ b moon koɛɛgã dũniyã tɛk fãa. (Mat. 24:14) La rũndã-rũndã, sã n pa ne b tũud-n-taasã b sẽn bool tɩ piis a taabã sõngre, na n yɩɩ toog ne Kirist ba-biis nins sẽn ket tẽngã zugã tɩ b tõog n tʋm tʋʋm-kãngã. Sɩd-sɩda, piis a taabã neb sã n moond koɛɛgã, yaa Kiristã ba-biisã la b sõngd n tʋmd tʋʋmd ning a sẽn bobl-bã. Kiristã ne tʋm-tʋmd sẽn tũud sɩd la sẽn tar yamã sũy nooma hal wʋsgo, nin-kãensã sẽn sõngd sõma tɩ wilgdẽ tɩ b yaa b zo-rãmbã.

¹⁷ Bũmb a yiib-n-soab piis a taabã neb sẽn tõe n maan n sõng Kiristã ba-biisã, yaa b sẽn na n kõt ligd n teend koe-moonegã. A Zezi sagla a karen-biisã tɩ b rɩk “dũniyã paoongã” n bao zo-rãmba. (Luk 16:9) Woto pa rat n yeel t’a Zeova ne a Zezi zoodã tõe n daame ye. La d sã n dɩkd d paoongã n teend Wẽnnaam Rĩungã, d wilgdame tɩ d nonglmã la d zoodã ne a Zeova la a Zezi wã pa ne no-goam bal ye. Yaa ne “tʋʋm la ne sɩda.” (1 Zã 3:16-18) D wilgdame tɩ d teenda Rĩungã ne d paoongo, n kẽesd d ligd n moond koɛɛgã, n kõt ligd sẽn na yɩl tɩ b me wall b ges d tigissã zĩis toor-toorã yelle, la d kõt ligd me sẽn na yɩl tɩ b tõog n moon koɛɛgã dũniyã gill zugu. D sẽn kõt bũmb ning ne yamleoogã yaa bilf tɩ yaa wʋsg me, yaa vẽeneg tɩ nooma a Zeova ne a Zezi hal wʋsgo.—2 Kor. 9:7.

18. Bõe yĩng tɩ d segd n sakd Biiblã sagls kãsem dãmbã sẽn kõt-dã?

¹⁸ Bũmb a tãab-n-soab d sẽn tõe n maan n wilg tɩ d yaa Kiristã zo-rãmba, yaa d sẽn na n sakd tigingã kãsem dãmba. (Ef. 5:23) Tʋm-tʋmd a Poll yeela woto: “Bɩ y sak yãmb taoor dãmbã la y reeg bãmb goama.” (Heb. 13:17) Wakat ninga, d tõe n getame tɩ yaa toog ne-d tɩ d sak Biiblã sagls kãsem dãmbã sẽn kõ-do. D tõe n mii b pãn-komsem, tɩ woto tõe n wa kɩt tɩ d get rẽ n pa rat n deeg b saglg ye. La a Zezi sẽn yaa tigingã taoor  soabã meng miime tɩ b tara pãn-komsem, la a sak n kõ-b-la sor tɩ b ges a tigingã yelle. Woto yĩnga, tõnd manesem sẽn yaa to-to ne b saglsã tõe n manegame wall sãam zood ning d sẽn tar ne Kiristã. D sã n sakd kãsem dãmbã sagls ne sũ-noog n pa get b pãn-komsmã, d wilgdame tɩ d nonga Kiristã.

Zĩig ning d sẽn tõe n paam zo-sõmse

19, 20. Bõe la d tõe n paam tigingã pʋgẽ, la bõe yell la sõsg ning sẽn pʋgdã na n gome?

¹⁹ A Zezi ket n geta tõnd yell ne kãsem dãmbã sẽn nong-dã maasem, la pa ne bãmb bal ye. A kɩtdame me tɩ d paamd ma-rãmba, saam-biisi, la saam-bi-pogs tigingã pʋgẽ. (Karm-y Mark 10:29, 30.) Yãmb sẽn wa n sɩng a Zeova Kaset rãmbã tũubã, y nebã manesem yɩɩ wãna? Y sẽn da rat yaa b wilg b sũ-noog la b sõng-yã, y sẽn yãk yam n na n bao Wẽnnaam ne Kiristã zoodã yĩnga. La a Zezi wilgame tɩ wakat ninga, “ned meng yir dãmb na n yɩ a bɛɛba.” (Mat. 10:36) Ad d sẽn mi tɩ d tõe n paama zood sẽn noom n yɩɩd rogem tigingã pʋgẽ wã, sɩd kengda d raood wʋsgo!—Yel. 18:24.

²⁰ A Poll lɛtr ning a sẽn gʋls n tool Rom kiris-nebã baasg goamã wilgdame t’a paama zo-rãmb wʋsg beenẽ. (Rom 16:8-16) Tʋm-tʋmd a Zã me lɛtr a tãab-n-soabã baasgẽ, a yeela woto: “Pʋʋs zo-rãmbã fãa yembr-yembr n kõ maam.” (3 Zã 14) A Zã gom-kãensã wilgda vẽeneg tɩ yẽ me talla zo-rãmb wʋsg saam-biisã sʋka. Wãn to la d tõe n dɩk a Zezi ne a pipi karen-biisã togs-n-taare, n tõog n tall zood sẽn yaa sõma ne d tẽed-n-taasã? Sõsg ning sẽn pʋgdã na n leoka sok-kãngã.

Y na n leokame tɩ bõe?

• Bõe la a Zezi maan n wilg t’a yaa zo-sõngo?

• A Zezi sẽn wilg t’a nonga a karen-biisã kɩtame tɩ bãmb me maan bõe?

• Wãn-wãn la d tõe n wilg tɩ d yaa Kiristã zo-rãmba?

[Zãmsgã sogsgã]

[Foto, seb-neng 21]

A Zezi ra baood n bãngda a zo-rãmbã tagsg la b raabo

[Foto rãmba, seb-neng 23]

Wãn to la d tõe n wilg tɩ d tʋll n yɩɩ Kiristã zo-rãmba?