Yɩ-y zo-rãmb hakɩka, baa nonglem sẽn kae dũni kãngã pʋgẽ wã
Yɩ-y zo-rãmb hakɩka, baa nonglem sẽn kae dũni kãngã pʋgẽ wã
“Mam sẽn yet yãmbã, yaa tɩ y nong taaba.”—ZÃ 15:17.
1. Bõe yĩng tɩ pipi kiris-nebã ra segd n nong taab hal wʋsgo?
YƲNG ning sẽn deng a Zezi kũumã, a sagla a tʋm-tʋmdbã tɩ b mao n kell n nong taaba. Baraar zaabre, a ra reng n yeel-b lame tɩ yaa b sẽn na n nong taab la nebã na n bãng tɩ b yaa yẽ karen-biisi. (Zã 13:35) Tʋm-tʋmdbã ra segdame n modg n ket n nong taaba, sẽn na yɩl n wa tõog namsg ning b sẽn da na n wa paam b tẽebã yĩngã, la b tõog n tʋm tʋʋmd ning a Zezi sẽn na n bobl-bã. Sɩd me, pipi kiris-nebã wakatẽ, nebã ra miime tɩ b sɩd sakda Wẽnnaam ne b sũy fãa la b nong taab hal wʋsgo.
2. a) D yãka yam n na n maan bõe ne d sũy fãa, la bõe yĩnga? b) Sogs-bʋs la d na n leoke?
2 Rũndã-rũndã, siglg n be t’a nebã yit dũniyã ween-vɩɩs a naasã fãa, n yaool n nong taab wa pipi kiris-nebã. Ad d sũy nooma hal wʋsgo, d sẽn paam n be nin-kãensã sʋkã! D yãka yam n na n ket n sakd a Zezi noorã ne d sũy fãa, n nong taab ne nonglem hakɩka. La bʋko, yaoolem day-kãensã sasa, neb wʋsg yaa zãmb dãmba, la neb sẽn pa tar nonglem. (2 Tɩm. 3:1, 3) Naoor wʋsgo, b pa nong taab ne pʋ-peelem, la b sã n wa baood ned zoodo, yaa b mensã nafr yĩnga. D sã n dat n kell n yɩ kiris-neb hakɩka, d pa segd n wõneg nin-kãensã ye. Rẽ n so tɩ d segd n bao sogsg nins sẽn pʋgdã leoore: Bõe n kɩtd tɩ neb zood yɩ zood hakɩka? Bõe la d tõe n maan n paam zo-sõma? Sasa bʋg la d segd n sak n sãam zoodo? Bõe n na n sõng-d tɩ d zoodã kell n tall pãng la a kaoose?
Bõe n kɩtd tɩ neb zood yɩ zood hakɩka?
3, 4. Bõe n kɩtd tɩ neb zood yɩ zood hakɩka, la bõe yĩnga?
3 Neb sã n dat tɩ b zood tall pãng wʋsgo, yaa b fãa sẽn na n sɩd nong a Zeova. Rĩm a Salomo yeela woto: “Ned sã n tar pãng n tõe neb a taaba, neb a yiib tõee yẽ. La wĩir sã n kal a tãabo, a ka tõe n kaoog naana ye.” (Koɛ. 4:12) Neb a yiib sẽn nong a Zeova sã n yõg zoodo, zood kãng tallda pãng wa wĩir sẽn kal a tãabo.
4 Yaa sɩd tɩ baa neb sẽn pa nong a Zeova tõe n yõga zood tɩ tar yamleoogo. La sã n yaa a Zeova nonglem n kɩt tɩ neb yõg zoodo, b zoodã na n talla pãng n yɩɩge. Nin-kãensã moor sã n wa yõsg taaba, b na n welga b yellã tɩ zems ne a Zeova raabã. Wẽnnaam bɛɛb sã n wa rat n welg kiris-neb hakɩka, b mikdame tɩ b zoodã sãoong yaa toogo. Hal pĩnd wẽndẽ n tãag rũndã-rũndã, a Zeova nin-buiidã wilgame tɩ baa na tũ ne b yõore, b pa na n tol n zãmb b taabã ye.—Karm-y 1 Zã 3:16.
5. Bõe n kɩt t’a Rut ne a Naomi zoodã tall pãng la a kaoose?
5 Sãmbg sẽn ka be, yaa ne neb nins sẽn nong a Zeova wã la d tõe n yõg zood tɩ yɩ sõma n yɩɩge. Tẽeg-y-yã a Rut ne a Naomi zoodã yelle. Pʋg-kãensã zoodã kibar bee Biiblã kibay nins sẽn gomd zood yell tɩ tar yamleoog wʋsgã sʋka. Bõe n kɩt tɩ b zoodã tall pãng la a kaoose? A Rut sẽn yeel a Naomi bũmb ningã leokda sok-kãngã. A yeel-a-la woto: “Fo nebã na n yɩɩ mam neba, la fo Wẽnnaamã me na n yɩɩ mam Wẽnnaam. . . . Bũmb sã n tõog n welg maam ne foom tɩ ka kũum, bɩ Zusoabã paas mam toogo.” (Rut 1:16, 17) Vẽenega, a Rut ne a Naomi fãa ra nonga Wẽnnaam hal wʋsgo, tɩ rẽ kɩt tɩ b ra modgdẽ tɩ b manesmã ne taab yaa sõma. Woto kɩtame t’a Zeova ning pʋg-kãensã barka.
D sẽn tõe n paam zo-sõma to-to
6-8. a) Zood sẽn yaa sõma paoong baooda bõe maanego? b) Wãn to la y tõe n sɩng zood baoobo?
6 A Rut ne a Naomi zoodã wilgdame tɩ zood hakɩk pa wat n paam yaar ye. Yaa sɩd tɩ rẽndame tɩ neb a yiibã reng n nong a Zeova. La b ned kam fãa me segd n saka modgr la mong-m-meng a to wã neer yĩnga. Baa y sã n yaa ma-biis sẽn tũud a Zeova, y sã n dat n yõg zood sẽn tar pãng ne taaba, baooda modgre. Sã n yaa woto, bõe la y tõe n maan n paam zo-sõma?
7 Yɩ-y pipi n sɩnge. Tʋm-tʋmd a Poll da sagla a zo-rãmb nins sẽn be Rommã tɩ b ‘sõng Wẽnnaam nebã sẽn dat sõngrã, la b maan sãambã sãando.’ (Rom 12:13) D sã n dat n wa tõog n yɩ ned sẽn sõngd neb la sẽn deegd sãamba, rẽnda d minim n maand rẽ. B sã n yeel tɩ ned minima bũmb maanego, rat n yeelame t’a soab maana bõn-kãng n yɩlme. Dẽnd ned pa tõe n led yãmb zĩigẽ n maan bũmb tɩ bõn-kãng wa lebg y minung ye. (Karm-y Yelbũn 3:27.) Bũmb y sẽn tõe n maan n wilg tɩ y reegda sãamba, yaa y sẽn na n mi n boond tigingã nebã toor-toorã tɩ b watẽ tɩ y naagd taab n dɩtẽ. Rẽ, bilf-bilfu, tõe n wa lebga y minungu. Rẽ yĩnga y pa tõe n mak woto maneg n ges sɩda?
8 Bũmb a to y sẽn tõe n maan n paam zo-rãmba, yaa y sẽn na n moond koɛɛgã ne tigingã nebã toor-toorã. Koe-moonegã sasa, y sã n kelgd y tẽed-n-taag sẽn taasd ned koɛɛgã, n gomd ne a sũur fãa tɩ wilgdẽ t’a nonga a Zeova, hakɩka y yam pa tõe n pa kẽ nin-kãngã ye.
9, 10. Mak-sõng bʋg la a Poll kõ-yã, la wãn to la d tõe n dɩk a makre?
9 Pak-y y sũurã yalengo. Sebr Sõng pʋgẽ, 2 Korẽnt dãmb 6:12, 13 yeta woto: “D sũurẽ wã weer be y yĩnga, yaa y meng sũurẽ la weer paoogda. Lebs-y tõnd d yel-sõmde; m gomda ne yãmb wala m kamba, m kot-y lame tɩ y pak y sũurã yalengo.” Yãmb zoe n tagsame tɩ ned sẽn tõe n yɩ yãmb zoa kae tigingã pʋgẽ bɩ? Sã n yaa woto, tõe tɩ y yãka neb kẽer bal n tagsdẽ tɩ bãmb n tõe n yɩ y zo-rãmba. Tʋm-tʋmd a Poll da paka a sũurã yaleng neb wʋsg yĩnga, tɩ yaa mak-sõng n kõ-do. Sasa n zĩnd t’a ra tagsdẽ t’a pa tol n tõe n yɩ ned sẽn pa zʋɩf zoa ye. La a wa n lebga “bu-zẽms tʋm-tʋmda.”—Rom 11:13.
10 Sẽn paase, a Poll da pa tũusd a zo-rãmbã a rog-taasã sʋk bal ye. Wala makre, baa a yʋʋm la a bãngr sẽn da yɩɩd a Tɩmote hal wʋsgã, b yɩɩ zo-rãmba. Rũndã-rũndã, kom-bɩɩs wʋsg yõga zood ne tigingã neb yʋʋm sẽn yɩɩd-ba, hal tɩ noom-ba. A Vanessa sẽn nan zems yʋʋm 20 wã yeela woto: “Mam tara zoa m sẽn nong hal wʋsgo, la a yʋʋmã yɩɩda 50. Mam tõe n sõsa ne-a, n togs-a bũmb ning fãa m sẽn tõe n togs m dog-taaga. La mam yell sɩd pak-a-la hal wʋsgo.” Zood a woto buud paamda wãn-wãna? A Vanessa yeela woto: “Zo-kãngã paoong tũu ne modgre.” Rẽ yĩnga yãmb me baooda zoa sẽn pa y rog-taag bɩ? Sã n yaa rẽ, a Zeova na n ninga y modgrã barka.
11. A Zonatã ne a Davɩɩd zoodã kibar sõngda tõnd tɩ d bãng bõe?
11 Yɩ-y zoa hakɩka. Rĩm a Salomo yeelame tɩ ‘zood kẽer n be n yaa noog n yɩɩd rogem.’ (Yel. 18:24b) Tõe t’a Salomo sẽn wa n yet woto wã, t’a ra tagsda a ba a Davɩɩd ne a Zonatã zoodã yelle. (1 Sãm. 18:1) Rĩm a Sayull da ratame t’a biig a Zonatã wa ledg-a n yɩ Israɛll rĩma. La a Zonatã ra sakame tɩ yaa a Davɩɩd n segd n wa yɩ rĩmã, bala yaa yẽ la a Zeova yãk-yã. A Zonatã ra pa maand sũ-kiir ne a Davɩɩd wa a Sayull ye. Nebã sẽn da pẽgd a Davɩɩdã pa yik a sũuri, la a leb n pa tẽ a Sayull sẽn dõd a Davɩɩd bũmb ningã ye. (1 Sãm. 20:24-34) Rẽ yĩnga d yaa wa a Zonatã bɩ? D zoa sã n paam zu-noog tʋʋmd tigingã pʋgẽ, d sũur noomame bɩ? A sã n wa paam zu-loɛɛga, d belsd-a lame la d sõngd-a bɩ? Ned sã n wa wɩt yãmb zoa, y yɩta tao-tao n tẽ a goamã bɩ, bɩ y sõngda y zoa wã wa a Zonatã?
Sasa bʋg la d segd n sak n sãam zoodo?
12-14. Zu-loe-bʋg la Biiblã karen-biis kẽer paamda, la wãn to la d tõe n sõng-ba?
12 Ned sẽn zãmsd Biiblã sã n wa sɩng a vɩɩmã toeengo, zoodã wɛɛngẽ, a tõe n sega zu-loeese. A tõe n tara zo-rãmb a sẽn nonge, tɩ b yaool n pa tũud Biiblã noy ye. Tõe t’a ra wae n sõsda ne-ba, tɩ b maand yɛl kẽer ne taaba. La masã, a bãngame tɩ bũmb nins b sẽn maandã tõe n kɩtame t’a pa tõog n toeeme, tɩ kɩt t’a rat n boog b tũubu. (1 Kor. 15:33) La ne rẽ fãa, a tõe n tagsdame t’a sã n bas-ba, a pa zo-sõng ye.
13 Y sã n zãmsda Biiblã n tar zu-loe-kãngã, bɩ y tẽeg tɩ y zo-sõng sũur segd n yɩɩ noog ne-yã, a sã n neẽ tɩ y maoodame n dat n bas zʋg-wẽnse. A na n datame meng n naag-y n bao n bãng a Zeova. La y zo-rãmb nins sẽn pa nong-y ne pʋ-peelmã na n “gomda yãmb wẽnga,” y sẽn pa “le magd ne bãmb n maand wẽngã” yĩnga. (1 Pɩɛ. 4:3, 4) La sɩd-sɩda, yaa bãmb n pa zo-sõmse. Pa yãmb ye.
14 Ned sã n zãmsd Biiblã t’a pĩnd zo-rãmbã sẽn pa nong Wẽnnaamã bas-a, tigingã neb segd n bao-a a zood tɩ sõng-a. (Gal. 6:10) Rẽ yĩnga yãmb mii neb sẽn wat tigissã n yaool n nan yaa Biiblã karen-biis bɩ? Bɩ y modg n bao b zood n paam n sõng-ba.
15, 16. a) D zoa sã n wa bas a Zeova tũubu, bõe la d segd n maane? b) Wãn to la d tõe n wilg Wẽnnaam tɩ d nong-a lame?
15 La d zoa sẽn be tigingã pʋgẽ sã n wa yãk yam n dat n bas a Zeova, tɩ tõe tɩ na n wa yɩɩ tɩlae tɩ b yiis-a, bõe la d segd n maane? Yell a woto buud tõe n zab-d-la hal wʋsgo. Saam-bi-poak a ye bilga yẽ manesem sẽn yɩ to-to, a zo-nongr sẽn wa n bas a Zeova tũubu. A yeela woto: “Yellã sãama mam sũur hal wʋsgo. Mam da tagsdame tɩ m zoa wã ra nonga a Zeova ne a sũur fãa la t’a tẽebã tara pãnga. Mam soka m meng n ges a sã n da pa tũud a Zeova n dat n noog a zaka rãmb sũy bala. A yellã kɩtame tɩ mam maneg n fees m meng n na n bãng n sã n sɩd tũuda a Zeova ne yam-sõngo.” Bõe n sõng saam-bi-poakã yel-kãngã pʋgẽ? A yeela woto: “Mam kosa a Zeova sõngre. Dẽ poore, m yãka yam n na n wilg-a tɩ m sɩd nong-a-la ne m sũur fãa, la tɩ pa a sẽn kõt maam zo-rãmb a siglgã pʋgẽ wã yĩng bal ye.”
16 D ra tags tɩ d tõe n kell n yɩ Wẽnnaam zo-rãmba, la d tũud neb sẽn yãk yam n na n yɩ dũniyã zo-rãmb ye. Karen-biig a Zak yeela woto: “Yãmb ka mi tɩ zood ne dũniyã yaa beem ne Wẽnnaam la? Woto yĩnga, ned ninga sẽn dat n maan zood ne dũniyã yẽ yaa Wẽnnaam bɛ.” (Zak 4:4) Yell a woto pʋgẽ, d na n wilgame tɩ d sɩd nonga Wẽnnaam, d sẽn na n kell n kɩs sɩd tɩ d sã n sak n na n sãam zoodã, a Zeova na n sõng-d lame. (Karm-y Hebre rãmb 13:5b.) Saam-bi-poakã baasa a kibarã n yeel woto: “Mam bãngame tɩ ned pa tõe n modg a to t’a nong-a wall a nong a Zeova ye. Nonglem yaa yam-yãkre.” La bõe la d tõe n maan tɩ d zoodã ne neb nins sẽn ket n tũud a Zeova wã tall pãng la kaoose?
Bũmb ning sẽn kɩtd tɩ zood tall pãng la a kaoose
17. Zo-sõma sã n yẽsdẽ, b manesem yaa wãna?
17 Yẽsg paasda zood pãnga. Y sã n karem Biiblã kibay nins sẽn gomd a Rut ne a Naomi, a Davɩɩd ne a Zonatã n paas a Poll ne a Tɩmote zoodã yellã, y na n mikame tɩ zo-sõma yẽsg pʋgẽ, b waoogda taaba, la b pelgd b pʋs ne taaba. A Poll wilga d sẽn segd n yẽsd ne taab to-to wã n yeel woto: “Bɩ y kɩt tɩ yãmb goamã zĩnd bark wakat fãa n paam yamsem noom.” Yaa d sẽn segd n yẽsd to-to ne sẽn pa-b kiris-nebã yell la a Poll sẽn gomã. (Kol. 4:5, 6) Sẽn mik tɩ d segd n gomda ne sẽn pa-b kiris-nebã ne waoogrã, kiris-nebã sẽn yaa d zo-rãmbã n segd ne waoogr n yɩɩda!
18, 19. D zoa sẽn yaa kiris-ned sã n kõ-d saglga, d manesem segd n yɩɩ wãna, la mak-sõng bʋg la Efɛɛz kãsem dãmbã kõ-do?
18 Zood pʋgẽ, ned kam fãa rat a to wã saglse, tɩ kɩt tɩ b yẽsgã segd n yɩt ne nonglem, la ne pʋ-peelem. Rĩm a Salomo sẽn yɩ yam soabã yeela woto: “Kaam ne tɩdar kõta sũ-noogo. La f zoa sã n sagl-f ne nonglem, yaa noogo.” (Yel. 27:9) Rẽ yĩnga y zoa saglg noom-y-la wa b sẽn yeel ka wã bɩ? (Karm-y Yɩɩl Sõamyã 141:5.) Y zoa sã n yã y sẽn maan bũmb t’a keoog-yã, y manesem yaa wãn-wãna? Y getame tɩ yaa a sẽn nong-y yĩng la a sẽn keoog-yã bɩ, bɩ y yikda y sũuri?
19 Efɛɛz tigingã kãsem dãmb da yaa tʋm-tʋmd a Poll zo-rãmba. Wõnda a bãnga kẽer b sẽn wa nan lebg kiris-nebã. La a Poll ne a zo- kãensã yaoolem seg-taabã sasa, a sagl-b lame n togs-b sɩd vẽenega. B manesem yɩɩ wãna? B pa yik b sũy ye. B sũy pʋd n yɩɩ noog a Poll sẽn wilg tɩ b yell pak-a lame wã, hal tɩ b yãb menga, b sẽn bãng tɩ b pa na n le yã-a wã.—Tʋʋ. 20:17, 29, 30, 36-38.
20. Bõe la zoa hakɩk maanda?
20 Zoa hakɩk segd n sakda a to wã saglse, la yẽ me segd n sagenda a to wã. Tara yõod tɩ d bãng wakat ning d sẽn pa segd n kẽ d to wã yɛlẽ. (1 Tes. 4:11) Sẽn paase, d bãng me tɩ tõnd ned kam fãa “na n togsa a meng yell Wẽnnaam taoore.” (Rom 14:12) La sã n wa yaa tɩlae, zo-sõng bʋkda a meng n tẽeg a to wã a Zeova noyã. (1 Kor. 7:39) Wala makre, yãmb zoa sẽn yaa pʋg-sad sã n wa tɩ yõg zood ne bi-ribl sẽn pa tũud a Zeova, y manesem na n yɩɩ wãna? Rẽ yĩnga y na n sĩndame tɩ bala y pa rat n wa sãam y zoodã bɩ? La y sã n sagl-a lame t’a pa reege, y maanda wãna? Zoa hakɩk na n tɩ togsa kãsem dãmbã, sẽn na yɩl tɩ b sõng a to wã tɩ yell da wa paam-a ye. Woto maaneg baooda raoodo. La neb a yiibã sã n sɩd nong a Zeova, bũmb kae n tõe n sãam b zoodã ye.
21. Bõe la tõnd fãa mi n maandẽ, la tigingã pʋgẽ, bõe yĩng tɩ d segd n mao tɩ tõnd ne taab zoodã tall pãnga?
21 Wakat ninga, d tõe n maana bũmb tɩ sãam d zoa sũuri, wall d zoa n yeel bɩ a maana bũmb tɩ pa yɩ-d noogo. A Zak yeelame tɩ “tõnd fãa kongda ne bũmb wʋsgo.” (Kol. 3:13; Zak 3:2) La pa tõnd sẽn beegd d zoa wã wall a sẽn beegd tõndã sõor la d tõe n ges n bãng d zoodã sõmblem ye. Yaa d sã n sakd n kõta taab sugr ne d sũy fãa la d zoodã yaa sõma. Tigingã pʋgẽ, ad sɩd tara yõod wʋsg tɩ d mao tɩ tõnd ne taab zoodã tall pãnga! Bɩ d modgd n pelgd d pʋs n yẽsd ne taab la d kõt taab sugr ne d sũy fãa! Nonglem a woto buud yaa “bũmb fãa loɛtg sɩd-sɩdã.”—Kol. 3:14.
Y na n leokame tɩ bõe?
• Bõe la d tõe n maan n paam zo-sõma?
• Sasa bʋg la d segd n sak n bas tɩ zood sa?
• Bõe n na n sõng-d tɩ d zoodã kell n tall pãng la a kaoose?
[Zãmsgã sogsgã]
[Foto, seb-neng 25]
Bõe n kɩt t’a Rut ne a Naomi zoodã tall pãng la a kaoose?
[Foto, seb-neng 26]
Yãmb minim n deegda sãamb la y sõngd y taabã bɩ?