D waoogd nebã, d sẽn yaa wẽn-tũudbã yĩnga
D waoogd nebã, d sẽn yaa wẽn-tũudbã yĩnga
“Bɩ yãmb yɩ Wẽnnaam togs-n-taase.”—EF. 5:1.
1, 2. a) Bõe yĩng tɩ d segd n wilg nonglem la waoogr ne neb a taabã? b) Bõe yell la d na n gom sõs-kãngã pʋgẽ?
NEBÃ waoogrã wɛɛngẽ, seb-gʋlsd a Sue Fox yeela woto: “Vʋʋsg kae neb a taabã waoogrã wɛɛngẽ ye. Yaa bũmb d sẽn segd n maand wakat fãa la zĩig fãa.” Neb sẽn be ne taab sã n minim n wilgdẽ tɩ b nonga taab la b waoogd taaba, naoor wʋsgo, mo-yõs la zab pa yɩt wʋsgo, la b welgr me pa yɩt toog ye. La nonglem la waoogr sã n kae, mo-yõsã tara paasg la kengr bala. D manesmã ne neb a taabã sã n pa wilgd tɩ d nand-b lame, wata ne zaba, kisgr la sũ-sãamse.
2 Kiris-neb hakɩkã nong n waoogda taab sõma. La baasgo, rẽndame tɩ d fãa kell n modg sẽn na yɩl n da wa yɩ wa dũni kãngã nebã sẽn pa mi to waoogrã ye. Biiblã tara sagls wʋsg rẽ wɛɛngẽ. Bɩ d ges b tũub sẽn tõe n sõng-d to-to tɩ d ra yɩ wa dũniyã rãmba, la kɩt me tɩ neb sak tũudum hakɩkã. Sẽn na yɩl n bãng neb a taabã nonglem la b waoogrã sẽn baood tɩ d maan bũmb ninsã, bɩ d ges a Zeova ne a bi-riblã mak-sõngã.
A Zeova ne a biigã kõo tõnd mak-sõngo
3. Mak-sõng bʋg la a Zeova kõ tõnd neb a taabã waoogrã wɛɛngẽ?
3 A Zeova kõo tõnd mak-sõng sẽn ka to nebã waoogrã wɛɛngẽ. Baa ne a sẽn yaa yĩngr la tẽng Naabã, a waoogda ninsaalbã la a maand-b neer wʋsgo. Wala makre, a sẽn wa n na n gom ne a Abrahaam la ne a Moiizã, a waoog-b lame. Bala a pʋda hebre wã gom-bil a ye sẽn wilgd t’a bõosd-b lame tɩ b maan a sẽn yet-bã. (Sɩng. 13:14; Yik. 4:6, NW ) Neb nins sẽn tũud a Zeova wã sã n beeg-a, a wilgdame t’a ‘yaa sũ-bʋgsem soaba, n yaa nimbãan-zoeta, t’a sũur ka puugd tao-tao, la t’a maanda nonglem wʋsg ne sɩda.’ (Yɩɩl 86:15) A Zeova pa wa neb kẽer sẽn nong n puugd b sũyã, neb a taabã sã n wa pa maan wa bãmb sẽn datã ye.
4. Ned sã n wa gomd ne-do, wãn to la d tõe n dɩk a Zeova togs-n-taare?
4 Bũmb a ye me sẽn wilgd tɩ Wẽnnaam waoogda nebã, yaa a sẽn maagd a meng n kelgd-bã. A Zeova sẽn wa n dat n sãam Sodom t’a Abrahaam sok-a sogsgã, a maaga a meng n kelg-a la a leok a sogsgã fãa. (Sɩng. 18:23-32) A pa tags t’a sãamda a sẽkã zaalem ye. A Zeova kelgda a nin-buiidã pʋʋsgo, la a kelgd yel-wẽn-maandb nins sẽn tek yam n kot-a sugrã me kosgã. (Karm-y Yɩɩl Sõamyã 51:13, 19.) Segdame tɩ tõnd me rɩk a Zeova togs-n-taare, tɩ d taabã sã n wa gomd ne-d bɩ d maagd d mens n kelgd-ba.
5. D sã n dɩkd a Zezi togs-n-taare, wãn to la tõe n kɩt tɩ tõnd ne neb a taabã zems-n-taar paase?
5 A Zezi zãmsa bũmb wʋsg a Ba wã nengẽ. Nebã waoogrã naaga bõn-kãens sʋka. A sẽn wa n be tẽngã zugã, baa ne a tʋʋmdã sẽn mi n dɩkd a sẽkã la wat ne yaamsã, a ra maagda a meng n kelgd nebã la a sõngd-ba. A sak n sõnga wãoob la zoens sẽn da yaa bõs-rãmba, n paas neb a taab sẽn da rat sõngre. Baa b sã n waa a nengẽ tɩ seg a sẽn da rat n maan bũmb a to, a geta b yelle. Naoor wʋsgo, a basa a sẽn maandã sẽn na yɩl n sõng sũ-sãams rãmba. Ned sã n da wilg t’a tẽeda a Zezi, a waoogda a soabã hal sõma. (Mark 5:30-34; Luk 18:35-41) Tõnd sẽn yaa kiris-nebã yĩnga, d rɩkda a Zezi togs-n-taare, n sakd n sõngd neb a taabã la d maand-b neere. D sã n maand woto, d roagdbã, d yagsã la neb a taabã na n nee rẽ vẽenega. La sẽn yɩɩd fãa, manesem a woto waoogda a Zeova la kõt tõnd mensã sũ-noogo.
6. Mak-sõng bʋg la a Zezi kõ tõnd nebã nonglem la b waoogrã wɛɛngẽ?
6 A Zezi sã n da sõsd ne nebã, a ra mi n pʋta b yʋyã, tɩ woto me ra wilgdẽ t’a waoogd-b lame. Rẽ yĩnga, Zʋɩf rãmbã tũudum taoor dãmb me ra maanda woto bɩ? Ayo. B ra yetame meng tɩ neb nins sẽn pa mi tõogã yaa “zu-beed rãmb” bɩ kãab-wẽng rãmbã, tɩ kɩt tɩ b ra pa nand-b ye. (Zã 7:49) La Wẽnnaam biigã ra pa maand woto ye. Wala makre, a Zezi goma ne a Marte, a Maari, a Zase la ne neb a taab me n bool b yʋ-pɛɛlã. (Luk 10:41, 42; 19:5) Yaa sɩd tɩ d tẽnsã minung la d yɛlã sẽn yaa toor-toorã kɩtame tɩ d sẽn waoogd taab to-to b goamã pʋgẽ wã pa yembr ye. La a Zeova Kaset rãmbã modgdame n wilgd nonglem la waoogr ne nebã sõma. * B pa basd tɩ b tẽed-n-taasã la baa neb a taabã tarem la b bãngr sẽn yaa toor-toorã kɩt tɩ b yãk kẽer bal n waoogdẽ ye.—Karm-y Zak 2:1-4.
7. Wãn to la Biiblã saglsã tõe n sõng-d tɩ d bãng n waoogd d taabã baa d sẽn yit zĩig ninga?
7 Wẽnnaam ne a bi-riblã sẽn waoogd buud toor-toorã neb to-to wã wilgdame tɩ b nand-b lame, la kɩtdame me tɩ pʋ-peelem dãmbã sakd tũudum hakɩkã. Yaa sɩd tɩ nebã sẽn maand to-to n wilgdẽ tɩ b waoogda b taabã pa yembr zĩig zãng ye. Woto yĩnga, a Zeova Kaset rãmbã pa tar noy sẽn yaa dem-dem rẽ wɛɛngẽ ye. La baasgo, d tũuda Biiblã saglsã, tɩ kɩt tɩ sẽn wa n yaa zĩig ning fãa la d be bɩ d modgd n wilgdẽ tɩ d nanda neb a taabã. Masã, bɩ d ges neb a taabã waoogrã sẽn tõe n sõng-b tɩ b sak koɛɛgã to-to.
Pʋʋsd-y nebã la y mi n sõsd ne-ba
8, 9. a) Bõe la ned tõe n minim n maandẽ tɩ kɩt tɩ nebã wa getẽ t’a yaa nin-pa-nanda? b) Bõe yĩng tɩ d segd n modg n tũ a Zezi saglg ning sẽn be Matɩe 5:47 wã?
8 Rũndã-rũndã vɩɩmã sẽn kɩt tɩ nebã wʋsg pa le tar sẽka yĩnga, zĩis kẽere, neb a yiib tõe n yõsga taab n pa tol n pʋʋs to ye. Yaa vẽeneg tɩ d pa tõe n yeel tɩ ned sã n kẽnd sor zugu, a tog n pʋʋsda a sẽn segd-b rãmbã fãa, wall a sõsd ne-b ye. La sasa a taaba, zemsame la yaa sõma tɩ d nong n maand woto. Rẽ yĩnga yamb minim n pʋʋsda nebã bɩ? Bɩ y nong n gãnemda y nengã, n pa pʋʋsd neda? D sã n pa gũusi, d tõeeme n wa minim n paoogd neb a taabã n pa miẽ meng ye.
9 A Zezi sagla tõnd zĩ-kãng wɛɛngẽ n yeel woto: “Yãmb sã n pʋʋsd yãmb ba-biisã bala, yãmb maandame n yɩɩd neb a taabã bɩ? Neb sẽn ka pʋʋsd Wẽnnaam me ka maand woto bɩ?” (Mat. 5:47) A Donald Weiss gʋlsa a sebr a ye pʋgẽ woto: “Ned sã n maan bũmb sẽn wilgd t’a pa nand a to wall sẽn paoogd a to wã, sãamda a sũuri. Yell a woto pʋgẽ, bʋʋm kae b sẽn tõe n kõ tɩ sigs a soabã sũur ye. A tɩɩmã yaa y sẽn na n pʋʋsd nebã la y mi n sõsd ne-ba.” D sã n mao n pa bas tɩ neb a taabã sẽn pa wɛ n wilgd nonglem la waoogrã kɩt tɩ d wõneg-ba, d modgrã pa na n yɩ zaalem ye.
10. Wãn to la neb a taabã waoogrã tõe n kɩt tɩ d tõog n moon koɛɛgã sõma? (Ges-y zĩ-gũbrã: “Rengd-y n pʋʋsd-y nebã noog-noogo.”)
10 Bɩ d ges d saam-biig a Tom ne a pag a Carol mak-sõngã. B vɩɩ Amerikdinoor tẽn-bedr a ye pʋgẽ. B yãame tɩ yaa sõma tɩ b minim n sõsd ne b yagsã, sẽn na yɩl n wa paamd n moond-b koɛɛgã. Wãn to la b maanda? A Tom yeela woto: “Wa Zak 3:18 sẽn yetã, tõnd modgdame n baood zems-n-taar la laafɩ ne nebã. D sã n mi n seg d yagsã, d sõsda ne-ba, la d sõsd ne neb nins sẽn tʋmd d zakã sɛɛgẽ wã. D sã n seg-ba, d pʋʋs-b-la noog-noogo. D mi n sõsda ne-b b kambã, b zagsã, b tʋʋmã la baa b baasã yelle. Woto kɩtdame tɩ d lebgd wa b zo-rãmba.” A Carol paasa woto: “D sã n le wa yã-b nindaare, d togsd-b-la d yʋyã, la d sok bãmb me b yʋya. Rẽ poore, d wilgd-b-la d sẽn maand bũmb ningã koɛɛg-koɛɛga. Woto, nindaare d tõe n paam n taas-b-la koɛɛgã.” A Tom ne a Carol sẽn maand woto wã, kɩtame tɩ b noom ne b yags wʋsgo. B yags wʋsg sak n deega tõnd sɛbã, tɩ kẽer meng sak n na n zãms Biiblã.
Waoogd-y nebã wakat buud fãa
11, 12. Bõe yĩng tɩ b sẽn mi n paoogd tõnd moonegã sasa wã pa ling-du, la d manesem segd n yɩɩ wãna?
11 Koɛɛgã mooneg sasa, d mi n segda neb sẽn paoogd tõndo. Rẽ pa ling tõnd ye. Bala a Zezi Kirist ra pĩnd n yeela a karen-biisã woto: “Bãmb sã n nams maam, b na n namsa yãmb me.” (Zã 15:20) La b sã n paoog tõnd tɩ d paoog-b n lebse, ka yõod ye. Woto yĩnga, bõe la d segd n maane? Tʋm-tʋmd a Pɩɛɛr wilga woto: “Yãmb sũyã pʋsẽ, bɩ y waoog Kirist sẽn yaa Zusoabã. Bɩ y bãng daar fãa tɩ leok ne sũ-maasem la sik-m-menga, ned ninga fãa sẽn sokd yãmb tẽeb yelle.” (1 Pɩɛ. 3:15) D sã n waoogd nebã, n leokd-b ne sũ-maasem la waoogre, tõe n kɩtame tɩ sẽn da paoogd-b tõndã toeem yam.—Tɩt 2:7, 8.
12 Rẽ yĩnga, bũmb bee d sẽn tõe n maan tɩ baa ned sã n wa paoog tõnd bɩ d tõog n waoog-a wa Wẽnnaam sẽn datã bɩ? N-ye. A Poll sagla tõnd woto: “Bɩ y kɩt tɩ yãmb goamã zĩnd bark wakat fãa n paam yamsem noom, la y bãng sẽn zems n leok ned kam fãa.” (Kol. 4:6) D sã n minim n waoogd d zagsã nebã, d karen-biisã, d tʋmd-n-taasã, d tẽed-n-taasã, la d yagsã, na n kɩtame tɩ baa ned sã n wa paoog-d bɩ d tõog n kell n waoog-a wa kiris-ned sẽn segd n maanã.—Karm-y Rom dãmb 12:17-21.
13. Kõ-y makr sẽn wilgd tɩ waoogrã tõe n kɩtame tɩ ned sẽn da pa rat n kelg koɛɛgã toeeme?
13 D sã n modgd n waoogd nebã baa zu-loees pʋgẽ, d modgrã pa na n yɩ zaalem ye. Wala makre, Zapõ saam-biig a ye n da moond koɛɛgã, n wa kẽ zak a ye tɩ zakã soab ne sãan sẽn da be ne-a naag taab n yaal-a. A kell n bʋka a sũur n gom ne-b ne waoogr la a yi, n kell n kẽng taoor ne koɛɛgã moonego. Sẽn yɩ bilfu, a wa n yãa sãanã sẽn yi n yas n get-a. Saam-biigã sẽn kolg-a wã, a yeela woto: “M da rat n kos-f-la sugr bũmb ning d sẽn maan-fã yĩnga. Baa ne tõnd sẽn yaal-fã, fo kell n pa gãnem f neng ne-d ye. M dat n bãnga m sẽn na n maan to-to n wa tõog n yɩ wa foo.” Ra-kãngã tʋʋmã ra sãamame, t’a ma wã me maan kaalem sẽn nan pa kaoose. Rẽ kɩtame t’a ra tagsdẽ tɩ yẽ pa tõe n le paam sũ-noog abada. Saam-biigã kãab-a-la Biiblã zãmsgo, t’a sake. A sɩd sɩnga zãmsgã, hal n zãmsd naoor a yiib semen fãa.
Zãms-y y kambã tɩ b waoogd nebã
14, 15. Pĩnd wẽndẽ wã, bõe la roagdb nins sẽn da tũud a Zeova wã ra wilgd b kambã?
14 Biiblã kibay wʋsg wilgdame tɩ pĩnd wẽndẽ wã, roagdbã ra modgdame n zãmsd b kambã tɩ b waoogd b zagsã neb la neb a taabã. Wala makre, ges-y Sɩngr 22:7 wã sẽn wilgd a Abrahaam ne a biig a Izaak sẽn da gomd ne taab ne waoogr to-to wã. A Zozɛf me manesmã sẽn yɩ to-to a bɩʋʋngã zugẽ wã wilgdame t’a roagdbã wub-a-la sõma. A sẽn wa n be bãensã roogẽ wã, a ra waoogda bãens kamb a taabã menga. (Sɩng. 40:8, 14) A sẽn gom ne a Faraõ to-to wã wilgdame t’a ra mii a sẽn tog n gom ne nin-naab to-to.—Sɩng. 41:16, 33, 34.
15 Noy piigã b sẽn da kõ Israɛll nin-buiidã sʋka, a ye n da yet woto: “Waoog f ba ne f ma n paam yõ-wok soolem ninga Zusoabã sẽn kõt foomã pʋgẽ.” (Yik. 20:12) Bũmb kambã sẽn tõe n maan n wilg tɩ b waoogda b roagdbã yaa b sẽn na n waoogd zakã nebã fãa. A Zɛfte bi-puglã sẽn sak n pids a ba wã pʋlengã baa sẽn da yaa toogã, a waooga a ba wã waoogr tɛkẽ.—Bʋk. 11:35-40.
16-18. a) Wãn to la roagdbã tõe n zãms b kambã tɩ b waoogd neb a taabã? b) Roagdbã sã n maan woto, a yõodã na n yɩɩ bõe?
16 Tara yõod wʋsg tɩ d zãmsd d kambã tɩ b waoogd nebã. Sẽn na yɩl tɩ b wa yɩ kãsemb sẽn mi neb waoogre, rẽndame tɩ b zãms kambã b sẽn segd n maan to-to sãan sã n wa wa zakẽ wã, la b zãms-b b sẽn na n gom ne nebã telefõnnẽ to-to, la b sẽn segd n dɩ to-to neb sʋka. Roagdbã segd n sõng-b lame tɩ b bãng bũmb ning sẽn kɩt tɩ b segd n sak n yik tɩ kãsem zĩndã, la b sẽn segd n waoogd sẽn kʋʋlbã la bãad-rãmbã võore. La b wilg-b bũmb ning sẽn kɩt tɩ b sã n yã ned sẽn zɩt zɩɩb bɩ b segd n sõng a soabã. Segdame me tɩ b sõng kambã tɩ b bãng wakat ning b sẽn segd n yeel ned tɩ gaafare, barka, maan-m sugri, wall wa tɩ m sõng-fo.
17 Zãms kambã tɩ b waoogd neb a taabã pa baood tɩ y yɩ nin-toaag ye. Bũmb ning sẽn na n sõng kambã n yɩɩd yaa yãmb mensã sẽn na n kõt-b mak-sõngo. A Kurt sẽn tar yʋʋm 25 wã wilga bũmb ning sẽn sõng yẽ ne a ma-biis a tãabã tɩ b bãng neb a taabã waoogrã. A yeela woto: “Tõnd ra geta m baaba ne m ma sẽn gomd ne taab ne bʋgsem la waoogr to-to wã, la b sẽn wilgd b nonglem ne neb a taabã, n maagd b mens n sõsd ne-b la b kelgd-b ne waoogr to-to wã me. Rĩungã roogẽ, nand tɩ tigissã sɩng la b baasg poor me, m baaba ra tallda maam tɩ d gilgd n pʋʋsd sẽn kʋʋl-bã la d sõsd ne-ba. Rẽ kɩtame tɩ m da ne a sẽn pʋʋsd-b la a waoogd-b to-to wã.” A Kurt paasa woto: “Tarẽ n tarẽ, ma-me wa n maanda wa yẽ. Nebã waoogr wa n lebga mam minungu. M da pa get rẽ wa bũmb m segd n maan bal ye. Yaa bũmb sẽn moom maam.”
18 Roagdbã sã n zãms b kambã nebã waoogre, a yõod yaa bõe? B sã n wa bɩ, na n sõng-b lame tɩ b tõog n paam zo-rãmba, la b yɩ neb sẽn tar zems-n-taar ne neb a taabã. B tʋʋmã zĩisẽ, zems-n-taar na n zĩnda bãmb ne b tʋʋmã taoor dãmbã sʋka, la bãmb ne b tʋmd-n-taasã sʋk me. Sẽn paase, kamb nins sẽn yaa pʋ-peelem dãmb la b wilgd tɩ b nanda neb a taabã kõta b roagdbã sũ-noogo.—Karm-y Yelbũn 23:24, 25.
Nebã waoogr kɩtdame tɩ d yaa toore
19, 20. Bõe yĩng tɩ d segd n modg n dɩk tõnd Wẽnnaam a Zeova ne a biigã togs-n-taar n waoogd nebã?
19 A Poll ra yeela woto: “Bɩ yãmb yɩ Wẽnnaam togs-n-taas wa kom-nongdse.” (Ef. 5:1) D sã n dat n dɩk a Zeova ne a bi-riblã togs-n-taare, yaa tɩlae tɩ d tũud Biiblã saglsã. Wala makre, b rãmb nins yell d sẽn gom sõs-kãngã pʋgẽ wã. D sã n minim n maand woto, na n kɩtame tɩ d ra yɩ wa kẽer sẽn waoogd neb nins sẽn yaa b taoor dãmbã bal sẽn na yɩl n paam yʋ-noogo, wall b waoogd neb a taab sẽn na yɩl n paam bũmbã ye.—Ziid 16.
20 Sẽn yaa a Sʋɩtãan n so dũni kãngã sẽn be a yaoolem dayã pʋgẽ wã yĩnga, a maanda a sẽn tõe fãa sẽn na yɩl n kɩt tɩ nebã ra waoogd taab wa a Zeova sẽn datã ye. La a Sʋɩtãan pa na n tol n tõog tɩ kiris-neb hakɩkã bas nebã waoogr ye. Bɩ d fãa yãk yam n ket n maand wa tõnd Wẽnnaam a Zeova sẽn wilgd nonglem la waoogr ne nebã. La d rɩkd a biigã me togs-n-taare. Woto, d goamã la d manesmã na n wilgda wakat fãa tɩ d pa wõnd neb nins sẽn pa tol n dat n waoog b taabã ye. D sã n maand woto, na n kɩtame tɩ tõnd Wẽnnaam a Zeova sẽn waoogd nebã yʋʋr paam pẽgre, la kɩt me tɩ pʋ-peelem dãmbã wa naag tõnd tũudum hakɩkã pʋgẽ.
[Tẽngr note]
^ sull 6 Buud kẽer pʋsẽ, ned sã n bool ned sẽn yɩɩd-a ne a yʋ-peell tɩ pa a soabã n kõ-a sore, yaa paoogre. Sã n yaa woto yãmb babgẽ wã, kiris-nebã segd n tũu minung kãngã.
Y tẽrame bɩ?
• Mak-sõng bʋg la a Zeova ne a bi-riblã kõ tõnd nebã waoogrã wɛɛngẽ?
• Bõe yĩng tɩ d yetẽ tɩ d sã n pʋʋsd nebã ne waoogre, wilgdame tɩ d yaa kiris-neb hakɩka?
• D sã n waoogd nebã, wãn to la tõe n kɩt tɩ d paam n moon-b koɛɛgã sõma?
• Bõe la roagdbã tõe n maan n sõng b kambã tɩ b bãng neb waoogre?
[Zãmsgã sogsgã]
[Zĩ-gũbri, seb-neng 30]
Rengd-y n pʋʋsd-y nebã noog-noogo
Neb wʋsg yetame tɩ pa nana ne-b tɩ b sɩng sõsg ne ned b sẽn pa mi ye. La a Zeova Kaset rãmbã sẽn nong Wẽnnaam la b nong neb a taabã yĩnga, b modgda wʋsg n sõsd ne neb b sẽn pa mi, sẽn na yɩl n sõng-b tɩ b bãng bũmb nins sẽn be Biiblã pʋgẽ wã. Bõe n tõe n sõng yãmb tɩ tõog n maan rẽ sõma?
Saglg n be Filip rãmb 2:4, n tõe n sõng-y wʋsgo. Be b yeta woto: “Bɩ yãmb ned kam fãa da ges a meng yell bal ye, bɩ y ges taab yell me.” Masã, bɩ y tags n ges y sẽn na n yas ned y sẽn pa mi taoore. Y sẽn pa mi taabã yĩnga, a yamã na n yoodame t’a pa rat n sõs ne-y ye. La wãn to la y na n kɩt t’a sak n sõs ne-y sõma? Y sã n deng n pʋʋs-a noog-noogo, tõe n kɩtame t’a yam gãande. La pʋʋsmã bal pa sek ye.
Tõe tɩ y sẽn wa n na n gom ne-a wã, t’a ra tagsda bũmb sẽn pak-a yelle. Y sã n dat t’a bas bõn-kãng yell tagsg la a kelg-yã, tõeeme n pa yɩ nana ye. La y sã n maag y meng n bao n bãng a sẽn da tagsd bũmb ning yellã, n tik y sõsgã rẽ zugu, tõe n kɩtame t’a sak n sõse. A Zezi sẽn da wa n seg Samari pagã bulgẽ wã, yɩɩ woto la a maan-yã. (Zã 4:7-26) Yaa koom daab n da wa ne pagã bulgẽ wã. La a Zezi tika rẽ zug n tɩʋʋs a sõsgã, n paam n wilg-a Wẽnnaam daabã.
[Foto rãmba, seb-neng 29]
D sã n waoogd nebã, tõe n kɩtame tɩ d paam n moon-b koɛɛgã sõma
[Foto, seb-neng 31]
Yaa zĩig fãa la d segd n waoogd nebã