Wilg-y tɩ y nanda y sẽn yaa a soab tigingã pʋgẽ wã
Wilg-y tɩ y nanda y sẽn yaa a soab tigingã pʋgẽ wã
“Wẽnnaam ninga will fãa yĩngã pʋgẽ wa sẽn zems bãmb daabo.”—1 KOR. 12:18.
1, 2. a) Bõe n wilgd tɩ d fãa tara tʋʋmd tigingã pʋgẽ d sẽn segd n nane? b) Sogs-bʋs la d na n leok sõs-kãngã pʋgẽ?
HAL pĩnd wẽndẽ Israɛllã sasa n tãag rũndã, a Zeova tigimda a nin-buiidã n zãmsd-b a Gomdã, la a wilgd-b sẽn segde. Wala makre, Israɛll nebã sẽn wa n tõog n deeg Ai tẽngã, a Zozue tigma nin-buiidã fãa n karem tõogã n wilg-ba. Biiblã yeta woto: “A Zozue karma tõogã goamã fãa, kãab-noodã ne kãab-beedã . . . Israɛll dãmbã ne b pagbã la b kambã la bu-zẽms nins sẽn tũ bãmb n wa wã taoore.”—Zoz. 8:34, 35.
2 Pipi kiris-nebã wakate, tʋm-tʋmd a Poll yeela a Tɩmote sẽn da yaa kãsem soabã tɩ tigingã yaa “Wẽnnaam zaka,” la ‘sɩdã ra-luka, la a yẽbgr sẽn tebended-a.’ (1 Tɩm. 3:15, Kãab-paalgã Koe-noogo) Rũndã-rũndã, “Wẽnnaam zakã” yaa kiris-neb hakɩkã fãa sẽn be dũniyã gill zugã sẽn naag taaba. Lɛtr ning Wẽnnaam sẽn kɩt t’a Poll gʋls n tool Korẽnt kiris-nebã, a sak 12 wã pʋgẽ, a maka tigingã ne ninsaal yĩngã. A yeelame tɩ baa yĩngã wil tʋʋm sẽn yaa toor-toorã, b fãa tara yõodo. A Poll yeela woto: “Wẽnnaam ninga will fãa yĩngã pʋgẽ wa sẽn zems bãmb daabo. La wil nins tõnd sẽn tẽed tɩ b ka be waoogr yĩngã pʋgẽ wã, tõnd kõo bãmb waoogr wʋsg n yɩɩda.” (1 Kor. 12:18, 23) Woto wilgdame tɩ Wẽnnaam zakã pʋga, kiris-ned hakɩk baa a ye pa tõe n yeel tɩ yẽ tʋʋmdã n tar yõod n yɩɩda, bɩ t’a yõod pa ta a taabã rẽnd ye. B tʋʋmã n yaa toor-toor bala. La d na n maana wãn n bãng d tʋʋmd sẽn yaa a soab tigingã pʋgẽ, la d nand rẽ? Bʋʋm bʋs n kɩt tɩ d tʋʋmã yaa toor-toore? Wãn-wãn la d tõe n kɩt ‘tɩ nebã fãa yã tɩ d bɩtame’?—1 Tɩm. 4:15.
D wilg tɩ d nanda d sẽn yaa a soabã, la d tʋʋmdã
3. Bõe la d tõe n maan n wilg tɩ d nanda tʋʋmd ning d sẽn tar tigingã pʋgẽ wã?
3 Bũmb a ye d sẽn tõe n maan n wilg tɩ d nanda tʋʋmd ning d sẽn tar tigingã pʋgẽ wã, yaa d sẽn na n sakd “tʋm-tʋmd sẽn tũud sɩd la sẽn tar yamã,” la Siglgã taoor lʋɩtb Sull ne d sũy fãa. (Karm-y Matɩe 24:45-47.) D segd n tagsame n ges d sã n sɩd sakda tʋm-tʋmdã sẽn kõt sagls ninsã neere. Wala makre, yʋʋmã sẽn loogã pʋgẽ, a kõo tõnd sagls futã yelgre, d mensã manegre, reemã, la ẽntɛrnetã wɛɛngẽ. Rẽ yĩnga d tũuda sagl-kãens fãa neere, tɩ kɩt tɩ d zoodã ne Wẽnnaam yaa sõma bɩ? La d tũuda tʋm-tʋmdã sẽn sagl tɩ d naagd taab d zakã pʋgẽ n zamsd Biiblã n pa vaandẽ wã bɩ? Rẽ yĩnga tõnd sɩd yãka zaabr a ye Biiblã zãmsg yĩng bɩ? D sã n yaa d ye, rẽ yĩnga d yãka wakat n zãmsd Biiblã bɩ? D yaa d ye tɩ d bee ne d zak rãmb me, d sã n tũud tʋm-tʋmdã saglse, a Zeova na n ningd-d-la barka.
4. Bũmb nins maaneg sẽn be ne ned kam fãa yam-yãkrã wɛɛngẽ, bõe la d pa segd n yĩmi?
4 Neb kẽer tõe n tagsdame tɩ reemã, futã yelgr la mengã manegr wɛɛngẽ, b segd n basa ned kam fãa t’a maan sẽn noom-a. La kiris-ned sẽn yaa sakd miime t’a sã n dat n maan bũmbu, pa a mengã raab bal la a segd n tũ ye. A miime tɩ sẽn yɩɩd fãa, a segd n tũu a Zeova raabã sẽn be a Gomdã pʋgẽ wã. Biiblã segd n yɩɩ ‘tõnd naoã fɩtla, la d sor vẽenem.’ (Yɩɩl 119:105) Yaa sõma me tɩ d tags n ges d yam-yãkrã sẽn tõe n maan d tẽed-n-taasã la sẽn pa-b kiris-nebã bũmb ninga, la d tags n ges sã n pa na n paoog koɛɛgã d sẽn moondã me.—Karm-y 2 Korẽnt dãmb 6:3, 4.
5. Bõe yĩng tɩ d segd n gũus n da wa tall soog-m-meng yam?
5 “Sɩɩg [bɩ yam] ninga sẽn tʋmd zãgsdbã fãa pʋsã” piuuga zĩig zãng wã pemsmã tõnd sẽn vʋʋsdã. (Ef. 2:2) Yam kãngã tõe n wa kɩtame tɩ d tagsdẽ t’a Zeova siglgã sagls tũub pa tɩlae ne-d ye. Vẽenega, tõnd ned baa a ye pa rat n yɩ wa a Diotrɛf sẽn da pa reegd tʋm-tʋmd a Zã saglsã ne waoogrã ye. (3 Zã 9, 10) D segd n gũusame n da wa tall soog-m-meng yam ye. Bɩ d gũus n da wa yeel wall d maan bũmb sẽn wilgd tɩ d kɩɩsda a Zeova sẽn tũnugd ne neb nins rũndã-rũndã n get a nin-buiidã yellã ye. (Sõd. 16:1-3) D pʋd n segd n wilgame tɩ d nanda zu-noog ning d sẽn tare, d sẽn paam n tʋmd ne tʋm-tʋmdã sull neb la d sakd b saglsã. D segdame me n modg n sakd d tigingã kãsem dãmbã.—Karm-y Hebre dãmb 13:7, 17.
6. Bõe yĩng tɩ d segd n tags neer n ges d sã n pa tõe n maan bũmb n paas Wẽnnaam tʋʋmdã pʋgẽ?
6 Bũmb a to d sẽn tõe n maan n wilg tɩ d nanda d sẽn yaa a soab tigingã pʋgẽ wã, yaa d sẽn na n tags neer n ges d sã n pa tõe n maan d sẽn tõe fãa n ‘waoog d tʋʋmdã,’ rat n yeel tɩ koe-moonegã, tɩ pẽg a Zeova. (Rom 11:13) Dũniyã gill zugu, neb kẽer modgame n lebg wakat fãa so-pakdba. Kẽer lebga misioneer dãmba, tigims sull yel-gɛtba, wall Betɛllẽ tʋm-tʋmdba. Saam-biis wʋsgo, pagb la rap gilgdame n sõngd n met Rĩungã roto. La a Zeova nin-buiidã wʋsg modgdame n get b zagsã rãmb yell sẽn na yɩl tɩ b ket n tũud a Zeova, la b modgdẽ tɩ semen fãa bɩ b moond koɛɛgã. (Karm-y Kolos dãmb 3:23, 24.) D tõe n kɩsa sɩd tɩ d sã n kẽes d mens Wẽnnaam tʋʋmdã pʋgẽ ne yamleoogo, n modgd n tʋmd ne d sũy fãa, d na n yãame tɩ d tara yõod tigingã pʋgẽ.
Bʋʋm kẽer sẽn kɩt tɩ d tʋʋmã yaa toor-toore
7. Bõe yĩng tɩ d yetẽ tɩ tʋʋm nins d sẽn tõe n tʋm tigingã pʋgẽ wã bee ne tõnd yɛlã sẽn yaa to-to wã?
7 Tara yõod tɩ d tags neer n ges d yɛlã sẽn yaa to-to wã, bala tʋʋm nins d sẽn tõe n tʋmã bee ne rẽ me. Wala makre, tigingã tʋʋm kẽer n be b sẽn pa tõe n bobl saam-bi-poak ye. D sẽn tõe n tʋm Rĩungã tʋʋm ninsã bee ne d yʋʋmã la d keelmã sẽn yaa to-to wã me. Yelbũn 20:29 wã yeta woto: “Kom-bɩɩs pãng la b waoogre. La nin-kẽemb me zoob-peend la b waoogre.” Kom-bɩɩsã sẽn tar keelmã yĩnga, b tõeyã tʋʋmã, la nin-kẽembã tara yam la minim sẽn sõngd tigingã wʋsgo. D pa segd n yĩm me tɩ sẽn wa n yaa tʋʋmd ning fãa la d tõe n tʋm a Zeova siglgã pʋgẽ, tũu ne a barkã ye.—Tʋʋ. 14:26; Rom 12:6-8.
8. Bõe yĩng tɩ d tõe n yeel tɩ d sẽn yaa a soab tigingã pʋgẽ wã bee ne d yam-yãkr me?
8 Pʋg-sadb a yiib sẽn yaa ma-biis kibar n wilgd bʋʋm a to sẽn kɩt tɩ tʋʋm nins d sẽn tar tigingã pʋgẽ wã pa ye wã. B yiibã fãa karmame n paam lise wã dipolom dãmb fãa. B roagdbã maana b sẽn tõe fãa sẽn na yɩl n sõng-b tɩ b karengã poor bɩ b yɩ so-pakdba. B karengã poore, a ye n lebg so-pakda, t’a to wã bao tʋʋmde. Bõe n kɩt tɩ b pa yãk yam a yembre? Bee ne ned fãa sẽn da rat bũmb ningã. B fãa maana b yam. Rẽ yĩnga tõnd sʋka neb wʋsg pa maand woto sɩda? D fãa segd n tagsa neer n ges d sẽn magd n na n wa maan bũmb ning Wẽnnaam tũudmã pʋgẽ. Tags-y n ges-y y sã n pa tõe n kẽes y meng sõma n paas Wẽnnaam tʋʋmã pʋgẽ, baa woto maaneg sã n baoodame tɩ y toeem y yɛl kẽere.—2 Kor. 9:7.
9, 10. Bao tʋʋmd n paas a Zeova tʋʋmã sʋk yamleoog sã n pa tar-do, bõe la d segd n maane?
9 La sã n mik tɩ bao tʋʋmd n paas a Zeova tʋʋmã sʋk yamleoog pa tar tõndo, tɩ kɩt tɩ d pa yẽegd d menga, bõe la d segd n maane? Lɛtr ning a Poll sẽn gʋls Filip kiris-nebã pʋgẽ, a yeela woto: “Wẽnnaam n tʋmd yãmb pʋsẽ, tɩ yãmb yãk la y maan bãmb yam sõma.” Rẽnd a Zeova tõe n kɩtame tɩ d tʋlg n tʋm a tʋʋmde, la a sõng-d tɩ d tõog n pids d sẽn tʋlgã.—Fil. 2:13; 4:13.
10 Dẽnd tõnd tõe n kosa a Zeova t’a sõng-d tɩ d yamã kẽ a raabã maanego. Israɛll rĩm a Davɩɩd ra maana woto. A kosa a Zeova woto: “Zusoaba, kɩt-y tɩ mam bãng yãmb soayã. Bɩ y zãms maam tɩ m tũ yãmba. Tall-y maam yãmb sɩdã pʋgẽ, la y zãms maam. Tɩ bõe, yãmb yaa Wẽnnaam sẽn fãagd maam. Mam tẽeda yãmb daar fãa.” (Yɩɩl 25:4, 5) Wala a Davɩɩde, tõnd me tõe n kosa a Zeova sõngr sẽn na yɩl tɩ bũmb nins sẽn noom-a wã maaneg yamleoog kẽ-do. D sã n tẽegd Wẽnnaam a Zeova ne a bi-riblã sẽn tagsd to-to ne bũmb nins tõnd sẽn maand b tʋʋmdã pʋgẽ wã, d sũyã na n yɩɩ noogo, tɩ d dat n wilg-b d mi-beoogo. (Mat. 26:6-10; Luk 21:1-4) Woto tõe n kɩtame tɩ d kos a Zeova t’a sõng-d tɩ d tʋlg n tʋm a tʋʋmã n paase. Rẽ wɛɛngẽ, no-rɛɛs a Ezai kõo tõnd mak-sõngo. A Zeova ra wa n soka woto: “Mam na n tʋma ãnda? Ãnda n na n kẽng n kõ-do?” La a Ezai sẽn wʋmã a leoka woto: “Ad maam, bɩ y tʋm maam.”—Ezai 6:8.
D sẽn tõe n wilg to-to tɩ d bɩtame
11. a) Bõe yĩng tɩ rapã segd n modg n wa paam tʋʋm n paas tigingã pʋgẽ? b) Bõe la rapã tõe n maan n paam tɩ b bobl-b tʋʋm tigingã pʋgẽ?
11 Yʋʋmd 2008 wã pʋgẽ, dũniyã gill zugu, neb 289 678 n deeg lisgu. Woto wilgda vẽeneg tɩ b rata yel-gɛtb wʋsg n paase. Bõe la rapã tõe n maan tɩ b paam yel-gɛtb kãense? Biiblã wilgda sẽn dat n yɩ-b kãsemb sõngdbã la kãsem dãmbã sẽn segd n maan bũmb ninsã. Dẽnd b ned kam fãa segd n modg n pidsa bõn-kãense. (1 Tɩm. 3:1-10, 12, 13; Tɩt 1:5-9) Wãn to la saam-biig tõe n maan rẽ? Yaa a sẽn na n kẽesd a meng sõma koɛɛgã mooneg pʋgẽ, n tʋmd tʋʋm nins b sẽn bobl-a tigingã pʋgẽ wã sõma, n maoodẽ t’a sẽn leokd to-to tigissã sasa wã sõmblem paasdẽ, la a wilgdẽ t’a tẽed-n-taasã yell pak-a lame. A sã n maand woto, a wilgdame t’a sũur yaa noog a sẽn paam n be tigingã pʋgẽ, n tõe n tʋm a neer yĩngã.
12. Wãn to la kom-bɩɩsã tõe n wilg b yẽesem Wẽnnaam tũudmã pʋgẽ?
12 Bõe la tigingã kom-bɩɩsã, sẽn yɩɩd fãa sẽn nan pa ta-b yʋʋm 20 wã tõe n maan tɩ b tẽebã bɩ? B segd n zãmsda Biiblã sẽn na yɩl n paam “yam” la “vẽnegr ning Sɩɩg Sõng sẽn kõtã.” (Kol. 1:9) B sã n zãmsd Wẽnnaam Gomdã ne b sũy fãa, la b kẽesd b mens sõma tigissã sasa, b na n tõog n maana woto. “Kʋɩlen-kãseng” n pak n kõ kom-bɩɩsã, tɩ b tõe n kẽes b mens zãng Wẽnnaam tʋʋmdã nens toɛy-toɛy pʋsẽ, la b sã n modg n bao zʋg-sõma nins sẽn na n sõng-b tɩ b kẽ be wã me, b tẽebã na n bɩɩme. (1 Kor. 16:9) Ned sã n kẽes a meng zãng a Zeova tʋʋmã pʋgẽ, a sũur na n sɩd yɩɩ noog ne a vɩɩmã, la a na n paama bark me.—Karm-y Koɛɛg Soab 12:1.
13, 14. Wãn-wãn la saam-bi-pogsã wilgd tɩ b nanda b sẽn yaa b rãmb tigingã pʋgẽ wã?
13 Saam-bi-pogsã me tõe n wilgame tɩ b sũy yaa noogo, b sẽn paam n pidsd Yɩɩl Sõamyã 68:11, (NW ) bãngr-gomdã. Be b yeela woto: “Pagb nins sẽn moond koe-noogã yaa tãb-biis kʋʋngo.” Saam-bi-poak sã n dat n wilg t’a nanda a sẽn yaa a soab tigingã pʋgẽ wã, bũmb a ye a sẽn tõe n maan yaa a sẽn na n wɩngd ne karen-biisã maanego. (Mat. 28:19, 20) Sɩd me, saam-bi-pogsã sã n kẽesd b mens sõma koɛɛgã mooneg pʋgẽ, la b maand modgr wʋsg tʋʋm-kãngã yĩng ne yamleoogo, b wilgdame tɩ b sũy yaa noog b sẽn paam n be tigingã pʋgẽ, n tõe n tʋm a neer yĩngã.
14 A Poll da yeela a Tɩt woto: “Zãms pʋg-yãansã me tɩ b yel-manesem yɩ sõma, . . . la bɩ b zãms neb a taab sẽn yaa sõma bala, tɩ b zãms pʋg-bi wã tɩ b nong b sɩdbã ne b kambã, la b yɩ yõk-m-mens rãmba, la gũus-m-mens rãmba, la b ges b zak yell neere, la b yɩ pʋg-sõma sẽn sakd bãmb mens sɩdbã, tɩ Wẽnnaam goamã ra paam tʋʋsg ye.” (Tɩt 2:3-5) Ad saam-bi-pogs nins tẽeb sẽn bɩ wã sɩd tõe n sõnga tigingã neb a taabã! B sã n sakd saam-biis nins sẽn lʋɩt taoor tigingã pʋgẽ wã, la b tar yam-sõng futã ningri, mengã manegr la reemã wɛɛngẽ, b kõta b taabã mak-sõngo, la b wilgdẽ tɩ b nanda b sẽn yaa b rãmb tigingã pʋgẽ wã.
15. Bõe la saam-bi-poak sẽn pa kẽ kãadem tõe n maan t’a sẽn yaa a yembrã ra wa sãamd a sũuri?
15 Wakat ninga, tõe n yaa toog ne saam-bi-pogs nins sẽn pa kẽ kãadmã tɩ b bãng tɩ b tara yõod tigingã pʋgẽ. Saam-bi-poak a yembr yeela woto: “Ned sã n nan pa kẽ kãadem, a sẽn yaa a ye wã tõe n mi n sãamda a sũuri.” B sok-a-la a sẽn maand to-to n maood ne zu-loe-kãnga, t’a leoke: “Pʋʋsgã ne Biiblã zãmsgã sõngd-m lame tɩ m tẽegdẽ tɩ m tara yõod tigingã pʋgẽ. M zãmsda Biiblã n bãngd a Zeova tagsg sẽn yaa a soab mam zugu. Rẽ sõngda maam tɩ m maood n na n sõng tigingã neb a taabã. Rẽ kɩtdame tɩ m pa le tagsd m mengã yell bal ye.” Yɩɩl Sõamyã 32:8 wã pʋgẽ, a Zeova yeela a Davɩɩd woto: “Mam nif geta foom, la mam yaa fo sagenda.” Sɩd-sɩda, a Zeova rata a nin-buiidã ned kam fãa neere. Dẽnd yaa vẽeneg tɩ saam-bi-pogs nins sẽn pa kẽ kãadmã yell pak-a lame. A na n sõnga d fãa tɩ d bãng tɩ d tara yõod tigingã pʋgẽ.
Kell-y n pa-y tigingã pʋgẽ!
16, 17. a) Bõe yĩng tɩ d tõe n yeel tɩ bũmb kae d sẽn da tõe n maan t’a yõodã ta d sẽn sak a Zeova boollã? b) Bõe la d segd n maan n kell n pa tigingã pʋgẽ?
16 A Zeova wilga tõnd ned kam fãa a nonglem, n kɩt tɩ d yaa a zo-rãmba. A Zezi yeela woto: “Ned ka tõe n wa mam nengẽ tɩ ka m Ba sẽn tʋm-a maamã n bool-a ye.” (Zã 6:44) A Zeova gesa dũniyã neb milyaar dãmbã sʋka, n bool tõnd ned kam fãa tɩ d wa a tigingã pʋgẽ. Bũmb kae d sẽn da tõe n maan t’a yõodã ta d sẽn sak a boollã ye. D sẽn sakã kɩtame tɩ d vɩɩmã tar võore. Sẽn paase, d sẽn paam n be tigingã pʋgẽ la d miẽ tɩ d tara yõodã sɩd kõt-d-la sũ-noog tɛkẽ!
17 Yɩɩl-gʋlsdã ra yeela woto: “Zusoaba, mam nong n kaoosa yãmb doogẽ.” A paasa woto: “Mam nao yalsda tɩrlem pʋgẽ. Mam na n pẽga Zusoabã neb tiging pʋgẽ.” (Yɩɩl 26:8, 12) Wẽnnaam a Zeova ratame tɩ tõnd ned kam fãa bãng t’a tara yõod a siglgã pʋgẽ. D sã n kell n sakd n tũud bũmb nins fãa a sẽn wilgd tõndã, la d ket n wɩngd ne a tʋʋmã, d na n kell n paa tigingã pʋgẽ, n nand d sẽn yaa a soabã.
Y tẽrame bɩ?
• Bõe yĩng tɩ d tõe n yeel tɩ ned kam fãa tara yõod tigingã pʋgẽ?
• Bõe la d tõe n maan n wilg tɩ d nanda d sẽn yaa a soab tigingã pʋgẽ wã, la d tʋʋmdã?
• Bʋʋm bʋs n kɩt tɩ d tʋʋmã yaa toor-toor tigingã pʋgẽ?
• Bõe la kom-bɩɩsã la kãsembã tõe n maan n wilg tɩ b nanda b sẽn yaa b rãmb tigingã pʋgẽ wã?
[Zãmsgã sogsgã]
[Foto, seb-neng 21]
Bõe la rapã tõe n maan n paam tɩ b bobl-b tʋʋm tigingã pʋgẽ?
[Foto, seb-neng 22]
Wãn to la saam-bi-pogsã wilgd tɩ b nanda b sẽn tõe n maan bũmb nins tigingã pʋgẽ wã?