Y pʋʋsgã wilgda bõe yãmb ne a Zeova zoodã wɛɛngẽ?

“Yãmb wʋmda pʋʋsgo. Neb buud fãa na n waa yãmb nengẽ.”—YƖƖL 65:3.

1, 2. Bõe yĩng t’a Zeova nin-buiidã tõe n pʋʋsd-a ne bas-m-yam?

A ZEOVA kelgda a nin-buiidã pʋʋsg wakat fãa. D tõe n kɩsa sɩd ne rẽ. Baa a Zeova Kaset rãmbã bãmb milyõ rãmb sã n na n pʋʋs-a wakat yɛnga, a tõe n kelga b ned kam fãa.

² Yɩɩl-gʋlsd a Davɩɩd ra kɩsa sɩd zãng tɩ Wẽnnaam wʋmda a pʋʋsgã. A yeela woto: “Yãmb wʋmda pʋʋsgo. Neb buud fãa na n waa yãmb nengẽ.” (Yɩɩl 65:3) A Zeova ra kelgda a Davɩɩd pʋʋsgã, bala a ra tũud-a-la ne a sũur fãa. Bɩ d sok d mens woto: ‘Rẽ yĩnga mam pʋʋsgã wilgdame tɩ m kɩsa a Zeova sɩda, la t’a tũudmã yell n pak maam n yɩɩd bɩ? Mam pʋʋsgã wilgdame tɩ m yaa nin-bʋg buud a nifẽ?’

Pʋʋsd-y-yã a Zeova ne sik-m-menga

3, 4. a) D sã n dat tɩ Wẽnnaam deeg d pʋʋsgo, d manesem segd n yɩɩ wãna? b) D sã n wa maan yel-wẽn-kãseng tɩ namsd-do, d segd n maana bõe?

³ D sã n dat tɩ Wẽnnaam leokd d pʋʋsgã, d segd n pʋʋsd-a-la ne sik-m-menga. (Yɩɩl 138:6) Wala a Davɩɩde, d segd n kot-a lame t’a fees-do. A Davɩɩd da pʋʋs n kosa woto: “Wẽnnaam, bɩ y fees maam n bãng m sũuri, mak-y maam n bãng m tagsgo, n ges mam sã n tũuda so-wẽnga, la y yãag maam sor sẽn ka sɛt pʋgẽ.” (Yɩɩl 139:23, 24) D sã n pʋʋs n kos Wẽnnaam t’a fees-do, bɩ d sɩd sak me t’a feesd-do, la d tũud a Gomdã saglse. A Zeova tõe n sõng-d lame tɩ d tũ “sor sẽn ka sɛta,” rat n yeel tɩ n tõog n maan bũmb nins sẽn na n kɩt tɩ d wa paam vɩɩm sẽn pa satã.

⁴ La sã n wa mik tɩ d “tagsgã” namsd-d-la d sẽn maan yel-wẽn-kãseng yĩnga, d manesem segd n yɩɩ wãna? (Karm-y Yɩɩl Sõamyã 32:1-5.) D sã n maan yel-wẽnd tɩ namsd d sũur kasetã, tɩ d baas n pa rat n sak n kelg-a, tõe n wa kɩtame tɩ d pãngã sa, tɩ d lebg wa war sẽn yõk koodo. A Davɩɩd beegrã poore, a sũ-sãangã ra namsd-a lame, tɩ tõe t’a ra lebga bãad menga. La a sẽn wa n vẽneg a yel-wẽndã n togs Wẽnnaamã, a sɩd paama yolsg tɛkẽ! Tags-y n ges-y a Davɩɩd sũur sẽn yɩ noog to-to, a sẽn wa n bãng t’a Zeova ‘yiisa a yel-wẽndã,’ la t’a kõ-a-la sugrã. Kiris-ned sã n vẽneg a yel-wẽnd n togs Wẽnnaam, a paamda yolsgo, la yaa a sã n bao kãsem dãmbã sõngr me la a na n tõog n lebs n paam a Zeova zoodo.—Yel. 28:13; Zak 5:13-16.

Yõkd-y Wẽnnaam sɛɛg la y pʋʋsd-a barka

5. Yõk Wẽnnaam sɛɛgã rat n yeelame tɩ bõe?

⁵ Sẽn wa n yaa zu-loɛɛg ning fãa n sãamd d sũur la kõt-d yɩɩre, d segd n tũu a Poll sagl-kãngã. A yeela woto: “Da bʋ-y bũmb ba a ye yĩng ye. Zu-loɛɛg sã n beẽ, bɩ y wɩng ne pʋʋsgo, n wɩng ne Wẽnd sɛɛg yõkr sẽn naag ne bark pʋʋsgo, la zu-loeesa wilgri.” (Fil. 4:6, Sebr Sõngo) “Yõk Wẽnnaam sɛɛgã” rat n yeelame tɩ f “sik f meng n kos-a f sẽn datã.” Sẽn yɩɩd fãa, d sã n wa be yell pʋgẽ wall b sã n wa namsd tõnd d tẽebã yĩnga, d segd n pʋʋsa a Zeova n kos a sõngre.

6, 7. D pʋʋsg pʋgẽ, bõe yĩng tɩ d segd n tẽeg n pʋʋs Wẽnnaam barka?

⁶ La sã n yaa d sẽn wat n dat bũmb bal la d pʋʋsda, na n wilga bõe tõnd ne a Zeova zoodã wɛɛngẽ? A Poll yeelame tɩ d segd n naagda “ne bark pʋʋsgo.” Vẽenega, tõnd me tara bʋʋm n na n pʋʋs wa a Davɩɩde. A pʋʋsa a Zeova woto:  “Yãmb yaa kãseng n so pãng la ziiri la naam ne waoogre. Bũmb nins fãa sẽn be yĩngr la tẽngã yaa yãmb n so. Yaa yãmb n yaa rĩm n so fãa. . . . Tõnd Wẽnnaam, tõnd pʋʋsda yãmb bark n pẽgd yãmb yʋʋre. Y yʋʋrã toga ne waoogre.”—1 Kib. 29:11-13.

⁷ A Zezi ra pʋʋsda Wẽnnaam bark rɩɩbã yĩnga. Soaalã zaabr dɩɩbã luglg sasa, a pʋʋsa Wẽnnaam bark burã ne divẽ wã yĩnga. (Mat. 15:36; Luk 22:18, 19) Tõnd me segd n pʋʋsda a Zeova bark rɩɩbã yĩnga. La d segd n pʋʋsd-a-la bark me, a ‘tʋʋm kãsemsã a sẽn maan n kõ ninsaalbã yĩnga,’ la a “bʋʋdã kaoob sẽn yaa tɩrgã yĩnga,” n paas a sẽn kõ tõnd Biiblã yĩnga.—Yɩɩl 107:15; 119:62, 105.

Pʋʋsd-y neb a taabã yĩnga

8, 9. Bõe yĩng tɩ d tog n pʋʋsd d taabã yĩnga?

⁸ Yaa vẽeneg tɩ d pʋʋsda d mensã yĩnga, la d segd n tẽegda d taabã yell me, baa d tẽed-n-taas nins d sẽn pa mi wã. Tõe tɩ tʋm-tʋmd a Poll da pa mi Kolos tẽedbã fãa ye. La baasgo, a yeel-b-la a lɛtrã pʋgẽ woto: “Tõnd pʋʋsda Wẽnnaam sẽn yaa tõnd Zusoab a Zezi Kirist ba wã barka, la tõnd pʋʋsda yãmb yĩng n ka basdẽ ye. Tɩ bõe, tõnd wʋma yãmb tẽebã ne a Zezi Kirist la yãmb nonglem Wẽnnaam nebã fãa yĩngã” yelle. (Kol. 1:3, 4) A Poll pʋʋsa Tesalonik kiris-nebã yĩng me. (2 Tes. 1:11, 12) Pʋʋs-kãensã buudã wilgda d sẽn yaa ned ning buudu, la wilgdẽ tɩ d tẽed-n-taasã yell sɩd pak-d lame.

⁹ D sã n pʋʋsd kiris-neb nins sẽn paam vʋʋsem sõngã zaeebã yĩnga, la “piis a taabã” sẽn yaa b tũud-n-taasã me yĩnga, wilgda vẽeneg tɩ d rata Wẽnnaam siglgã neere. (Zã 10:16) A Poll da kosa a tẽed-n-taasã tɩ b pʋʋs tɩ wakat ning fãa a sẽn na n yaag a noor n gome, bɩ Wẽnnaam kõ-a gomd sẽn na n kɩt tɩ nebã bãng koe-noogã yel-solemdã võore. (Ef. 6:17-20) Rẽ yĩnga tõnd me nong n pʋʋsda d tẽed-n-taasã yĩng bɩ?

10. D sã n pʋʋsd d taabã yĩnga, bõe n na n maane?

¹⁰ D sã n pʋʋsd d taabã yĩngã, tõe n kɩtame tɩ baa d ra pa nong-b bɩ d wa nong-ba. D rɩk makr wala d sẽn na n pa tolg n nong d to, n yaool n pʋʋsd a yĩnga. Rẽ yĩnga d na tõog n ket n pa nong-a sɩda? (1 Zã 4:20, 21) Pʋʋs-kãensã buud kengda d tẽebã, la kɩtdẽ tɩ laafɩ la zems-n-taar be saam-biisã fãa sʋka. Leb n wilgdame tɩ d sɩd nonga taab ne Kiristã nonglem buudu. (Zã 13:34, 35) Nonglmã bee zʋg-sõma nins Wẽnnaam vʋʋsem sõngã sẽn kõtã sʋka. Rẽ yĩnga tõnd ned kam fãa nong n pʋʋsd n kota vʋʋsem sõngã bɩ? D kota a Zeova t’a sõng-d tɩ d paam nonglem, sũ-noogo, laafɩ, sũ-mare, maan-neere, sũ-maasem, tẽeb la yõk-m-mengã vʋʋsem sõngã sẽn kõtã bɩ? (Luk 11:13; Gal. 5:22, 23) Woto, d goamã la d manesmã na n wilgdame tɩ d vɩɩ vʋʋsem sõngã yĩnga, la tɩ d sẽn maandã fãa zemsda ne a raabã.—Karm-y Galat dãmb 5:16, 25.

11. Bõe yĩng tɩ y tõe n yeel tɩ zemsame tɩ d kos d taabã tɩ b pʋʋs d yĩnga?

 ¹¹ D sã n bãng tɩ lekollẽ wã, wakat ninga, b tõe n wa ratame tɩ d kambã maan zãmbo, d segd n pʋʋsa b yĩnga, la d tẽeg-b Biiblã sagls sẽn na n sõng-b tɩ b yɩ pʋ-peelem dãmba, la b ra wa maan sẽn yaa wẽng ye. A Poll yeela Korẽnt kiris-nebã woto: “Tõnd pʋʋsda Wẽnnaam yãmb yĩnga, tɩ yãmb kõn maan bũmb sẽn yaa wẽng ye.” (2 Kor. 13:7) Pʋʋs-kãensã buud nooma a Zeova, la wilgdẽ tɩ d yaa nin-tɩrse. (Karm-y Yelbũn 15:8.) Wa tʋm-tʋmd a Polle, tõnd me tõe n kosa d taabã tɩ b pʋʋs d yĩnga. A Poll da kosa a taabã woto: “Bɩ y pʋʋs tõnd yĩnga, tɩ bõe, tõnd tara sũur-kaset sõma, tõnd sẽn dat n maan bũmb fãa tɩ zemsã yĩnga.”—Heb. 13:18.

Tõnd pʋʋsgã wilgda yɛl a taaba

12. Bõe la d segd n pʋʋsd n kot n yɩɩda?

¹² Rẽ yĩnga d pʋʋsgã wilgdame tɩ d sũy nooma d sẽn yaa a Zeova Kaset soabã yĩnga, la tɩ d yẽesa ne a tʋʋmdã bɩ? D pʋʋsgã pʋgẽ d wilgdame tɩ sẽn pak-d n yɩɩd yaa a Zeova raabã pidsgu, Rĩungã koɛɛg moonego, nebã na bãng t’a Zeova n sɩd segd n yɩ yĩngr la tẽng naaba, la a yʋʋrã waoogr bɩ? A Zezi sẽn wa n na n wilg a karen-biisã b sẽn tõe n pʋʋs to-to wã, a sẽn sɩng pʋʋsgã ne goam ninsã wilgdame tɩ tõnd me segd n wɩngda ne bõn-kãens kosgo. A sɩnga a pʋʋsgã woto: ‘Tõnd Ba sẽn be saasẽ, tɩ yãmb yʋʋr yɩ ne waoogre, tɩ yãmb soolem wa, tɩ yãmb daab maan dũniyã zug wa sẽn maand saasẽ wã.’—Mat. 6:9, 10.

13, 14. Tõnd pʋʋsgã wilgda bõe?

¹³ Tõnd sẽn kot bũmb nins d pʋʋsgã pʋgẽ wã tõe n wilga sẽn be d sũurẽ wã, sẽn pak tõnd n yɩɩdã, la d sẽn dat bũmb ninsã. A Zeova mii tõnd ned kam fãa sõma. Yelbũn 17:3 wã yeta woto: “B yẽnegda wanzuri ne sãnem ne bugum. La yaa Zusoabã n makd ned sũuri.” Wẽnnaam nee bũmb nins fãa sẽn be d sũurẽ wã. (1 Sãm. 16:7) A mii tõnd tagsg sẽn yaa to-to ne tigissã, ne koɛɛgã moonegã la ne d saam-biisã. A Zeova mii tõnd tagsg sẽn yaa a soab Kiristã “ba-biisã” zug me. (Mat. 25:40) D sã n wa pʋʋsdẽ, a mii d sã n sɩd rata bũmb nins d sẽn kotã, bɩ sã n yaa gom-vɩɩd bala. A Zezi yeela woto: “Yãmb sã n pʋʋsdẽ, bɩ yãmb da gomd gom-vɩɩd wa buud a taabã nebã sẽn maandã ye, tɩ bõe, bãmb tẽedame tɩ bãmb sẽn gomd wʋsgã yĩnga, Wẽnnaam na n leoka bãmb pʋʋsgo.”—Mat. 6:7.

¹⁴ Tõnd sẽn yet bũmb nins d pʋʋsgã pʋgẽ wã wilgda d sã n sɩd teega Wẽnnaam. A Davɩɩd ra yeela woto: “Yãmb [a Zeova] yaa zĩ-lilldga, la pãng zĩig mam yĩnga, bɛyã nifẽ. Mam dat n paa yãmb yir wakat sẽn ka sɛta, n paam zĩ-soalgdg yãmb pɩgsã tẽngre.” (Yɩɩl 61:4, 5) Wẽnnaam ‘tẽegda a fu-roogã n lill tõndo,’ rat n yeel t’a kogend-d lame, la a get d yelle. (Wil. 7:15) D sã n pʋʋsd a Zeova, n kɩs sɩd tɩ sẽn wa n yaa yell ning fãa n dat n koms d tẽebã, a ‘bee ne-d’ n na n sõng-do, kengda d raood wʋsgo.—Karm-y Yɩɩl Sõamyã 118:5-9.

15, 16. D sã n wa rat zu-noog tʋʋmd tigingã pʋgẽ, pʋʋsgã tõe n sõng-d lame tɩ d bãng bõe?

¹⁵ D sã n pelgd d pʋs n pʋʋsd a Zeova d raab toɛy-toɛyã wɛɛngẽ, tõe n sõng-d lame tɩ d bãng bũmb ning sẽn kɩt tɩ d rat-bã. Wala makre, d sã n dat n yɩ yel-gɛt Wẽnnaam nin-buiidã sʋka, rẽ yĩnga yaa sẽn na yɩl n paam n sõng tigingã la d tʋm wʋsg koe-moonegã yĩng bɩ? Bɩ yaa d sẽn dat n yɩ d taabã “taoor soaba,” wall d sẽn dat n paam n soog-b yĩnga? Pa segd n yɩ woto a Zeova nin-buiidã sʋk ye. (Karm-y 3 Zã 9, 10; Luk 22:24-27.) Bũmb ning sẽn kɩt tɩ  d kot d sẽn tʋllã sã n pa zemse, d sã n pelg d pʋg n pʋʋs a Zeova, tõe n kɩtame tɩ d bãnge, la sõng-d tɩ d toeem yam tɩ d tʋlsmã nan pa paam pãng ye.

¹⁶ Kiris-nin-pogsã kẽer tõe n data ne b sũy fãa tɩ b sɩdbã yɩ kãsemb sõngdb wall kãsem dãmba. Tõe tɩ pagb nins sẽn pʋʋsd n kot rẽ wã tʋmdame tɩ zemsd ne b pʋʋsgã, n modgd n zãad b mens sõma. La sɩd tara yõod wʋsg tɩ b zã b mens sõma. Bala saam-biig zak rãmb no-goam la b yel-manesem sã n pa sõma, tõe n kɩtame tɩ yɩ toog ne tigingã neb tɩ b ges-a wa mak-sõngo.

D sã n wa pʋʋsd zãma yʋʋr yĩnga

17. Bõe yĩng tɩ mi n yaa sõma tɩ d bao zĩig neb sẽn ka be n pʋʋse?

¹⁷ A Zezi ra mi n baoa zĩig neb sẽn ka be, n tɩ pʋʋs a Ba wã. (Mat. 14:13; Luk 5:16; 6:12) Tõnd me segd n mi n baoa zĩig neb sẽn kae n pʋʋse. Sasa kãnga, tiisg sẽn ka be wã yĩnga, d tõe n pʋʋsa a Zeova ne d sũur fãa n tõog n yãk yam sẽn na n noog a sũuri, la sẽn paas d tẽebã pãng me. La a Zezi ra mi n zẽka a koɛɛg zãma sʋk n pʋʋs b yʋʋr yĩnga. Woto yĩnga, yɩta sõma tɩ d bao n bãng d sẽn tõe n dɩk a togs-n-taar to-to.

18. B sã n wa yãk saam-biig t’a pʋʋs tigingã yʋʋr yĩnga, bõe ne bõe la a pa segd n yĩm?

¹⁸ D tigissã sasa, b yãkda rap sẽn yaa pʋ-peelem dãmb tɩ b pʋʋsd tigingã neb fãa yʋʋr yĩnga. (1 Tɩm. 2:8) Pʋʋs-kãens baasgẽ, b tẽed-n-taasã fãa tog n tõog n deegame tɩ “amina,” sẽn dat n yeel tɩ “bɩ yɩ woto.” La sẽn na yɩl tɩ b reeg tɩ “amina,” rẽndame tɩ bũmb ning b sẽn kosã zemse. A Zezi sẽn wilg a karen-biisã b sẽn tõe n pʋʋs to-to wã pʋgẽ, a gomd baa a ye pa yɩ kɛgr wall sãamd sũur ye. (Luk 11:2-4) Sẽn paase, a pa bao n na n sõdg b ned kam fãa zu-loees ball-ball ye. Yaa d sẽn wat n pʋʋsd d yembrã la d tõe n sõdg rẽ lakae pa zãma sʋk ye. D sã n pʋʋsd neb wʋsg yʋʋr yĩng me, d pa segd n togs goam nebã fãa sẽn pa segd n wʋm ye.

19. Ned sã n wa lʋɩ taoor n pʋʋsd tigingã fãa yĩnga, d yel-manesem segd n yɩɩ wãna?

¹⁹ B sã n wa yãk ned t’a lʋɩ taoor n pʋʋsd d yĩnga, d segd n wilgame tɩ d yaa wẽn-zoɛta. (1 Pɩɛ. 2:17) Yɛl n be d sẽn tõe n maan zĩis a taab la sasa a taaba, la pa zems tɩ d maan-b tigisg sasa ye. (Koɛ. 3:1) D rɩk makr wa ned sẽn na n dat tɩ nebã fãa gãd taab nus tɩ b pʋʋse. Woto tõeeme n pa yɩ d saam-biis kẽer noog wall tiis-ba, la baa d sãambã menga. Pʋʋsg sasa, pag ne a sɩd sã n data, b tõe n gãda taab nus tɩ nebã pa bãng meng ye. La b sã n dat n mobg taab zamã wã sʋk pʋʋsgã sasa, kẽer tõe n yãame tɩ sãam b sũuri. B tõe n wa tagsame tɩ bũmb ning sẽn da pak nin-kãensã n yɩɩd yaa wilg taab b nonglmã lakae pa pʋʋsgã sẽn waoogd a Zeova wã ye. Tõnd sẽn yaa  wẽn-zoɛtbã yĩnga, bɩ d modg n ‘maan bũmba fãa Wẽnnaam waoogr yĩngã,’ n da tol n wa tall manesem sẽn tõe n tiis d to, n sãam a sũur wall koms a raood ye.—1 Kor. 10:31, 32; 2 Kor. 6:3.

Bõe la d na n yeel d pʋʋsg pʋgẽ?

20. Wilg-y Rom dãmb 8:26, 27 wã sẽn dat n yɛɛlga.

²⁰ Wakat ninga, d tõeeme n pa mi bũmb ning d sẽn na n yeel d pʋʋsgã pʋgẽ ye. Tʋm-tʋmd a Poll da yeela woto: “Tõnd ka mi tõnd sẽn na n kos bũmb nins tɩ zems ye. La Sɩɩg Sõng meng wẽeda sir ned sẽn ka tõe n togs ye, n yõkd Wẽnnaam sɛɛg tõnd yĩnga. La sẽn feesd-a sũyã [rat n yeel tɩ Wẽnnaam] mii bũmb ninga sẽn yaa Sɩɩg Sõng yam.” (Rom 8:26, 27) A Zeova kɩtame tɩ b gʋls neb wʋsg pʋʋsg Biiblã pʋgẽ. Tõnd sã n wa pa mi d sẽn na n yɛɛlga, a geelgda pʋʋs-kãens wa tõnd pʋʋsgo, n deegdẽ. Wẽnnaam mii tõnd sõma, la a mii bũmb nins a sẽn tũnug ne a vʋʋsem sõngã n kɩt tɩ b gʋls tɩ be Biiblã pʋgẽ wã me sõma. Vʋʋsem sõngã sã n wa “yõkd Wẽnnaam sɛɛg tõnd yĩnga,” Wẽnnaam deegda d kosgã. La d sã n bãngd Wẽnnaam Gomdã sõma n paasdẽ, lebgda nana tɩ d bãngd d sẽn na n yeel bũmb ning d pʋʋsg sasa.

21. Sõsg ning sẽn pʋgdã na n goma bõe yelle?

²¹ Wa d sẽn yã sõs-kãngã pʋgẽ wã, d pʋʋsgã tõe n wilga yɛl wʋsgo. Wala makre, tõe n wilga d sã n tara zood sõma ne a Zeova, la wilg d sã n mii a Gomdã sõma me. (Zak 4:8) Sõsg ning sẽn pʋgdã pʋgẽ, d na n goma neb pʋʋsg yelle, la goam takɩ b sẽn togs b pʋʋsg pʋgẽ tɩ be Biiblã pʋgẽ me yelle. D sã n maag d yĩng n vaees pʋʋs-kãense, na n paasa d pʋʋsgã sõmblem.

Y na n leokame tɩ bõe?

• D sã n dat t’a Zeova leok d pʋʋsgo, manesem bʋg la d segd n talle?

• Bõe yĩng tɩ d segd n pʋʋsd d tẽed-n-taasã yĩnga?

• D pʋʋsgã tõe n wilga bõe d mensã la d raab toɛy-toɛyã zugu?

• Ned sã n lʋɩ taoor n pʋʋsd d yĩnga, d yel-manesem segd n yɩɩ wãna?

[Zãmsgã sogsgã]

[Foto, seb-neng 11]

Yãmb minim n pẽgda a Zeova la y pʋʋsd-a bark bɩ?

[Foto, seb-neng 13]

Ned sã n lʋɩ taoor n pʋʋsd d yĩnga, segdame tɩ d fãa yel-manesmã waoog a Zeova