A 4 soabã: Wẽnnaam yaa mens a tãabo

Sɩnga wãn tɩ b wa tẽed woto? Sebr a yembr yeta woto: “Neb kẽer tagsdame tɩ yaa yʋʋmd 300 soabã loogr poor la b sɩng nebã zãmsg woto. La wõnda yaa sɩda . . . Bala sẽn deng rẽ, b ra pa wae n zãmsd nebã tɩ ‘Wẽnnaam yaa mens a tãab’ ye. Kiris-nebã ra pa tẽed zãms-kãngã, la b ra pa sak-a me ye.”—New Catholic Encyclopedia (1967), Volim 14, seb-neng 299

Sebr a to me yeela woto: “Tigisg ning egiliizã taoor dãmb sẽn tall Nise yʋʋmd 325 soabã sig-noy kiuug rasem 20 wã raarã, a Kõnstãntẽ n lʋɩ taoor n sigl sõsgã. Yaa yẽ meng n kos . . . tɩ b wilg b no-sɩɩrã pʋgẽ tɩ Kiristã bee Wẽnnaam pʋgẽ, la tɩ ‘yẽ ne Ba wã fãa yaa nin-yende.’ . . . Baa b wʋsg sẽn da pa tẽed rẽ wã, neb a yiib bal n wilg tɩ b pa sake, tɩ sẽn ket-bã fãa zoe Rom naabã nif n sake.”—Encyclopædia Britannica (1970), volim a 6, seb-neng 386 soabã.

Bõe la Biiblã yeta? “A Etɩɛn sẽn pid ne Sɩɩg Sõngo, yẽ gesa yĩngr kuii. La yẽ yãa Wẽnnaam ziiri, la a Zezi sẽn yɛs Wẽnnaam dɩtgo. La yẽ yeelame: ‘Gese, mam yãa saasẽ sẽn pake, la Ninsaal Biigã sẽn yɛs Wẽnnaam dɩtgo.’ ”—Tʋʋma 7:55, 56.

Biiblã gom-kãensã wilgda bõe? Wẽnnaam vʋʋsem sõngã kẽe a Etɩɛnne, t’a yã a Zezi sẽn “yɛs Wẽnnaam dɩtgo.” Woto wilgda vẽeneg t’a Zezi sẽn vʋʋg n kẽng saasẽ wã, a pa tɩ lebg Wẽnnaam ye. A ra yaa toore, tɩ Wẽnnaam me yaa toore. B pʋd n pa gom neb a tãab yell ye. B ra yaa b yiibu. A Marie-Émile Boismard sẽn yaa katolik tũudmã taoor soab a ye wã makame n na n wilg tɩ Biiblã yetame tɩ Wẽnnaam yaa mens a tãabo, la a wa n baas n yeela a sebr a ye (À l’aube du christianisme — La naissance des dogmes) pʋgẽ woto: “Kãab-paalgã pʋgẽ, vɛrse kae sẽn yet tɩ yaa Ba wã, biigã la vʋʋsem sõngã n fãoog taab b tãabã fãa n yaa Wẽnnaam yɛngã ye.”

A Kõnstãntẽ waa ne zãms-kãngã sẽn na yɩl n welg no-koɛɛm sẽn da be a wakatẽ egiliizã taoor dãmb sʋka. La rẽ pʋd n waa ne sokr a to: Rẽ yĩnga a Zezi ma a Maari yaa Wẽnnaam ma bɩ?

Ges-y Biiblã vɛrse kãensã me: Matɩe 26:39; Zã 14:28; 1 Korẽnt rãmba 15:27, 28; Kolos rãmba 1:15, 16.

SƖDÃ LA WOTO:

Yaa yʋʋmd 300 soabã poor la b sɩng nebã zãmsg tɩ Wẽnnaam yaa mens a tãabo

[Fotã soaadba, seb-neng a 7]

Museo Bardini, Florence